မျှော်လင့်ချက်—ဘဝအတွက် အကျိုးရှိသလား

အသက် ဆယ်နှစ်ပဲ ရှိသေးတဲ့ ဒယ်နီရယ်ခမျာ ကင်ဆာရောဂါဒဏ် ခံစားနေရတာ တစ်နှစ်ကြာပါပြီ။ မျှော်လင့်ချက် မရှိတော့လို့ ဆရာဝန်တွေရော ဆွေမျိုးတွေပါ လက်လျှော့လိုက်ရပြီ။ ဒါပေမဲ့ ဒယ်နီရယ်ရဲ့ မျှော်လင့်ချက် ရောင်ခြည်ကတော့ တောက်ပနေဆဲပါ။ သူ့မျှော်လင့်ချက်က တစ်နေ့ကျရင် သုတေသီ ဖြစ်အောင် လုပ်မယ်၊ ကင်ဆာဆေး ဖော်နိုင်အောင် ကြိုးစားမယ်တဲ့။ ခုတော့ သူ့ကို ကုပေးနေတဲ့ ဆရာဝန် လာကြည့်မယ့် နေ့ကို မျှော်လင့်တကြီး စောင့်နေတယ်။ ဒါပေမဲ့ အဲဒီနေ့မှာ ရာသီဥတု ဆိုးနေလို့ ဆရာဝန် ရောက်မလာနိုင်ခဲ့ဘူး။ ဒယ်နီရယ် စိတ်ဓာတ်တွေ ထိုးကျသွားတယ်။ အဲဒီနေ့ကစပြီး ပျော့ခွေသွားတာ နောက်နှစ်ရက်အကြာမှာပဲ ဆုံးသွားရှာတယ်။

မျှော်လင့်ချက်ဟာ ကျန်းမာရေးအပေါ် သက်ရောက်မှု ရှိကြောင်း လေ့လာခဲ့တဲ့ ကျန်းမာရေးဝန်ထမ်းတစ်ဦးက ဒယ်နီရယ်ရဲ့ အဖြစ်ကို ပြောပြခဲ့တာပါ။ အဲဒီလိုအဖြစ်မျိုးကို သင်လည်း ကြားဖူးမှာပါ။ ဥပမာ၊ အသက်ငင်နေတဲ့ သက်ကြီးရွယ်အိုက ချစ်ရတဲ့သူ ရောက်လာဖို့ ဒါမှမဟုတ် မင်္ဂလာ နှစ်ပတ်လည်ပွဲ ကျင်းပဖို့ မျှော်လင့်စောင့်စားနေတယ်။ သူ့မျှော်လင့်ချက်လည်း ပြည့်သွားရော မကြာခင်မှာပဲ ကွယ်လွန်သွားတယ်။ ဒီဖြစ်ရပ်တွေမှာ ဘယ်အချက်ကို သတိထားမိလဲ။ မျှော်လင့်ချက်က တကယ်ပဲ အကျိုးရှိသလား။

မျှော်လင့်ချက်၊ အကောင်းမြင်စိတ်၊ အပြုသဘောထား ရှိတာက ပျော်ရွှင် ကျန်းမာစေနိုင်တယ်လို့ ဆေးသုတေသီတွေ ယူဆကြတယ်။ ဒီယူဆချက်ကို လူအားလုံး သဘောတူချင်မှ တူမယ်။ သုတေသီတချို့ကတော့ သိပ္ပံပညာနဲ့ မကိုက်ညီလို့ ဆိုပြီး လက်မခံကြဘူး။ ရုပ်ပိုင်းဆိုင်ရာ အရာဝတ္ထုတွေကြောင့်သာ ကျန်းမာရေး ထိခိုက်တာလို့ ယူဆကြတယ်။

မျှော်လင့်ချက်ရဲ့ အရေးကြီးမှုကို လက်မခံကြတာ မဆန်းပါဘူး။ နှစ်ပေါင်း ထောင်ကျော်ကတည်းက ဂရိအတွေးအခေါ်ပညာရှင် အရစ္စတိုတယ်က မျှော်လင့်ချက်ဆိုတာ “စိတ်ကူးယဉ် အိပ်မက်သက်သက်ပါ” လို့ ဆိုတယ်။ အမေရိကန် နိုင်ငံ့ခေါင်းဆောင် ဘင်ဂျမင် ဖရန်ကလင်က “မျှော်လင့်ချက်နဲ့ အသက်ရှင်ရင် ငတ်သေသွားလိမ့်မယ်” တဲ့။

ဒါဆိုရင် မျှော်လင့်ချက်နဲ့ပတ်သက်တဲ့ အမှန်တရားက ဘာလဲ။ စိတ်သက်သာရာ ရဖို့ စိတ်ကူးယဉ်ပုံဖော်ပြီး အတွေးနယ်ချဲ့တာကိုပဲ အမြဲဆိုလိုသလား။ ကျန်းမာပျော်ရွှင်ဖို့ မျှော်လင့်ချက် မရှိမဖြစ် လိုတယ်လို့ သတ်မှတ်နိုင်မယ့် အခြေခံ အကြောင်းရင်း ရှိသလား။

မျှော်လင့်ချက် ဘာကြောင့် လိုအပ်

ရှေ့ဆောင်းပါးမှာ ဖော်ပြခဲ့တဲ့ ကင်ဆာရောဂါသည်လေး ဒယ်နီရယ်သာ မျှော်လင့်ချက် ခိုင်မာနေခဲ့ရင်ကော။ ကင်ဆာရောဂါ ပျောက်သွားမှာလား။ ဒီနေ့ထိ သူ အသက်ရှင်နေမှာလား။ မျှော်လင့်ချက်က ကုစားပေးနိုင်တယ်လို့ ပြောတဲ့သူတွေတောင် အဖြေမပေးနိုင်ကြပါဘူး။ ဒါကြောင့် သေချာတာက မျှော်လင့်ချက်ဟာ ကင်ဆာပျောက်ဆေး မဟုတ်တဲ့အတွက် တအားကြီး အမွှမ်းမတင်သင့်ဘူး။

CBS News မေးမြန်းခန်းတစ်ခုမှာ ဒေါက်တာ နေသန် ချာနီက အသည်းအသန် လူနာတွေကို ကုသတဲ့အခါ မျှော်လင့်ခြင်းအစွမ်းကို အမွှမ်းတင်လွန်းရင် အန္တရာယ်ရှိနိုင်ကြောင်း အခုလို ပြောတယ်– “စိတ်တည်ငြိမ်အောင် တရားမှတ်ဖို့ မကြိုးစားဘူး၊ အကောင်းမြင်စိတ် မရှိဘူးလို့ ဇနီးတွေကို အပြစ်တင်တဲ့ ခင်ပွန်းတွေ ရှိဖူးတယ်။ ကင်ဆာအကျိတ် ပွားလာတာ သူတို့ မထိန်းနိုင်လို့ ဆိုပြီး လူနာကို အတွေးဝင်စေတာပေါ့။ ဒါက မဖြစ်သင့်တဲ့ကိစ္စပါ။”

ရောဂါကျွမ်းနေသူတွေခမျာ ရောဂါကို ကြိုးစားတိုက်ထုတ်နေရလို့ ခြေကုန်လက်ပန်းကျနေတာ။ အပြစ်ရှိတယ်ဆိုတဲ့စိတ်နဲ့ ထပ်ပြီး ဝန်ပိစေချင်ကြမှာ မဟုတ်ပါဘူး။ ဒါဆိုရင် မျှော်လင့်ချက်က အကျိုးမရှိဘူးဆိုတဲ့ သဘောလား။

မဟုတ်ပါဘူး။ ဥပမာ၊ ဒေါက်တာ နေသန်က ရောဂါလက္ခဏာနဲ့ နာကျင်မှုကို သက်သာစေတဲ့ ကုထုံး ပညာရှင်လည်း ဖြစ်တယ်။ အဲဒီကုထုံးက ရောဂါကို ပစ်မှတ်ထား တိုက်ထုတ်ပြီး အသက် ဆွဲထားမယ့်အစား လူနာရဲ့ နောက်ဆုံးအချိန်မှာ သက်သောင့်သက်သာ ဖြစ်အောင်၊ နေပျော်အောင် ကူညီပေးတဲ့ ကုထုံးပါ။ ဒေါက်တာ နေသန်လို ဆရာဝန်တွေက စိတ်ပျော်ရွှင်အောင် ကူညီပေးတဲ့ ကုထုံးဟာ ရောဂါကျွမ်းနေသူအတွက်တောင် အကျိုးရှိတယ်လို့ ယုံကြည်ကြတယ်။ မျှော်လင့်ချက် ရှိရင် နေပျော်စေပြီး ကောင်းကျိုး ရနိုင်တဲ့ အထောက်အထားတွေ ရှိပါတယ်။

မျှော်လင့်ချက် အရေးပါမှု

“မျှော်လင့်ချက်ဟာ အစွမ်းထက်တဲ့ ကုထုံးပဲ” ဆိုပြီး ဆေးဂျာနယ်လစ် ဒေါက်တာ ဒဗလျူ ဂေဖဲယ်ဂျုံး ပြောတယ်။ ရောဂါကျွမ်းနေသူတွေကို စိတ်ဓာတ်ကြံ့ခိုင်အောင် ကူညီခြင်းရဲ့ ကောင်းကျိုးကို သိဖို့ လေ့လာမှုအမျိုးမျိုး လုပ်ခဲ့ကြတယ်။ လူနာကို စိတ်ဓာတ်ကြံ့ခိုင်အောင် ကူညီတဲ့အခါ အကောင်းမြင်စိတ်နဲ့ မျှော်လင့်ချက် ပိုရှိလာပုံရတယ်။ ၁၉၈၉ ခုနှစ် လေ့လာမှုတစ်ခုအရ စိတ်ဓာတ်ကြံ့ခိုင်တဲ့ လူနာတွေ ပိုအသက်ရှည်ကြောင်း တွေ့ရှိခဲ့ကြတယ်။ ဒီအချက်ကို လတ်တလော တွေ့ရှိချက်တွေက လက်မခံပေမဲ့ စိတ်ပိုင်းဆိုင်ရာ ထောက်မမှု ရရှိတဲ့ လူနာတွေက မရတဲ့ လူနာတွေထက် စိတ်ဓာတ်ကျတာ၊ နာကျင်တာ အဖြစ်နည်းကြတယ်လို့ လေ့လာမှုတွေက အတည်ပြုထားတယ်။

အကောင်းမြင်စိတ်နဲ့ အဆိုးမြင်စိတ်ဟာ နှလုံးသွေးကြောကျဉ်းရောဂါအပေါ် သက်ရောက်မှု ရှိပုံကိုလည်း လေ့လာခဲ့ကြတယ်။ ဘဝကို အကောင်းမြင်စိတ် ရှိခြင်း၊ အဆိုးမြင်စိတ် ရှိခြင်းနဲ့ပတ်သက်ပြီး လူပေါင်း ၁,၃၀၀ ကျော် ပါဝင်တဲ့ လေ့လာဆန်းစစ်ချက်တစ်ခု လုပ်ခဲ့တယ်။ ၁၀ နှစ်အကြာမှာ လူ ၁၂ ရာခိုင်နှုန်းကျော်က နှလုံးသွေးကြောကျဉ်းရောဂါ ခံစားနေရကြောင်း တွေ့ရှိခဲ့ကြတယ်။ လူ ၁,၃၀၀ ကျော်ထဲမှာ တစ်ဝက်လောက်က အဆိုးမြင်စိတ် ရှိသူတွေ ဖြစ်နေတယ်။ ဟားဗတ် ပြည်သူ့ကျန်းမာရေးကျောင်းက ကျန်းမာရေးနဲ့ လူမှုရေး အပြုအမူ လက်ထောက်ပါမောက္ခ လော်ရာ ခါဇန်စကီ ဒီလိုပြောတယ်– “‘အကောင်းမြင်စိတ်က’ ကျန်းမာရေးအတွက် အကျိုးရှိတယ်ဆိုတဲ့ ယူဆချက်က တစ်ဆင့်စကားတွေပဲ များတယ်။ ဒါပေမဲ့ ဒီလေ့လာမှုက အကောင်းမြင်စိတ်ဟာ နှလုံးရောဂါအတွက် အကျိုးရှိတယ်ဆိုတဲ့ အယူအဆအတွက် ဆေးဘက်ဆိုင်ရာ အထောက်အထားပါ။”

ခွဲစိတ်ပြီးတဲ့နောက် ငါ ကျန်းမာတယ်လို့ ယူဆသူတွေက မြန်မြန် နာလန်ထူကြတယ်။ ကျန်းမာရေး မကောင်းဘူးလို့ ယူဆသူတွေက ပြန်နာလန်ထူဖို့ ပိုကြာတတ်တယ်။ အသက်ရှည်ခြင်းနဲ့ အကောင်းမြင်စိတ် ဆက်စပ်မှု ရှိနေတယ်။ အိုမင်းခြင်းနဲ့ပတ်သက်ပြီး အကောင်းမြင်ခြင်းနဲ့ အဆိုးမြင်ခြင်းဟာ သက်ကြီးရွယ်အိုတွေအပေါ် သက်ရောက်မှု ရှိပုံကို လေ့လာမှုတစ်ခု ပြုလုပ်ခဲ့ကြတယ်။ ကွန်ပျူတာဂိမ်းတွေ ကစားချိန်မှာ အသက်ကြီးရင့်ခြင်းကို ဉာဏ်ပညာ၊ အတွေ့အကြုံရင့်ခြင်းနဲ့ ဆက်စပ်ပြတဲ့ လျှပ်တစ်ပျက် စကားလုံးတွေ မြင်ရတွေ့ရတဲ့ သက်ကြီးရွယ်အိုတွေဟာ အားမာန်ပါပါ လမ်းလျှောက်နိုင်တာကို တွေ့ရှိရတယ်။ ဒါက ၁၂ ပတ်စာ လေ့ကျင့်ခန်း လုပ်တာနဲ့ ညီတယ်။

အကောင်းမြင်စိတ်နဲ့ မျှော်လင့်ချက် ရှိတာက ကျန်းမာရေးအတွက် ဘာကြောင့် အကျိုးရှိသလဲ။ သိပ္ပံပညာရှင်တွေ၊ ဆရာဝန်တွေက လူ့စိတ်နဲ့ ခန္ဓာကိုယ်အကြောင်း ကောင်းကောင်း နားမလည်သေးလို့ အတိအကျ မဖြေနိုင်ကြဘူး။ အဲဒီပညာရပ်ကို လိုက်စားတဲ့သူတွေက အတွေ့အကြုံ၊ အသိပညာပေါ် မူတည်ပြီး ခန့်မှန်းကြတာတော့ ရှိတယ်။ ဦးနှောက်နဲ့ အာရုံကြော ပါမောက္ခတစ်ဦး ဒီလိုပြောတယ်– “မျှော်လင့်ချက် ရှိပြီး ပျော်ရွှင်နေရင် စိတ်ဖိစီးမှု နည်းမယ်။ စိတ်ဖိစီးမှု နည်းရင် ခန္ဓာကျန်းမာလာမယ်။ ဒါဟာ ကျန်းမာနေဖို့ ကိုယ်တိုင် လုပ်နိုင်တဲ့အရာတစ်ခုပါပဲ။”

အဲဒီယူဆချက်က ဆရာဝန်၊ စိတ်ပညာရှင်၊ သိပ္ပံပညာရှင်တချို့အတွက် အသစ်အဆန်း ဖြစ်နေတယ်။ ကျမ်းစာကျောင်းသားတွေအတွက်တော့ အဆန်း မဟုတ်ပါဘူး။ လွန်ခဲ့တဲ့ အနှစ် ၃,၀၀၀ နီးပါးက ပညာရှိ ဘုရင် ရှောလမုန်က “ရွှင်လန်းတဲ့စိတ်ဟာ ဆေးစွမ်းကောင်းတစ်လက်ပဲ။ ကြေကွဲတဲ့စိတ်ကတော့ ခွန်အားဆုတ်ယုတ်စေတယ်” လို့ ရေးတယ်။ (ပညာအလိမ္မာ ၁၇:၂၂) ဒီစကားတွေက တစ်ဖက်စွန်း မရောက်တာ သတိပြုပါ။ ရွှင်လန်းတဲ့စိတ်ဟာ ရောဂါမှန်သမျှ ပျောက်စေတယ်လို့ မပြောဘဲ “ဆေးစွမ်းကောင်း” လို့ပဲ ပြောထားတယ်။

မျှော်လင့်ချက်က ဆေးစွမ်းတစ်လက်ဆိုရင် ဘယ်ဆရာဝန်က မညွှန်ဘဲ နေပါ့မလဲ။ ဒါ့အပြင် မျှော်လင့်ချက်က ကျန်းမာရေးကောင်းစေရုံထက်မက အကျိုးရှိစေတယ်။

အကောင်းမြင်စိတ်၊ အဆိုးမြင်စိတ်နဲ့ သင့်ဘဝ

အကောင်းမြင်စိတ်က နည်းအမျိုးမျိုးနဲ့ အကျိုးရှိစေကြောင်း သုတေသီတွေ တွေ့ရှိခဲ့ကြတယ်။ အကောင်းမြင်စိတ် ရှိသူတွေက ကျောင်း၊ အလုပ်ခွင်၊ အားကစားမှာ စွမ်းစွမ်းတမံ လုပ်ဆောင်နိုင်တယ်။ ဥပမာ၊ အမျိုးသမီး ပြေးခုန်ပစ်အသင်းကို လေ့လာချက်တစ်ခုမှာ နည်းပြတွေက အမျိုးသမီးတွေရဲ့ ပြေးခုန်ပစ်စွမ်းရည်ကို အကဲဖြတ်ပေးကြတယ်။ အမျိုးသမီးတွေကိုယ်တိုင်လည်း ကိုယ့်စွမ်းရည်နဲ့ပတ်သက်ပြီး ဘယ်လောက် မျှော်လင့်ထားတယ်ဆိုတာ ဆန်းစစ်ရတယ်။ သူတို့ရဲ့ မျှော်လင့်ချက်က နည်းပြတွေရဲ့ အကဲဖြတ်ချက်ထက် ပိုမှန်တယ်ဆိုတာ တွေ့ရှိခဲ့ကြတယ်။ မျှော်လင့်ချက်က ဘာကြောင့် ဒီလောက် အစွမ်းထက်တာလဲ။

အဆိုးမြင်စိတ်ရဲ့ အကျိုးဆက်ကိုလည်း လေ့လာခဲ့ကြတယ်။ ၁၉၆၀ ပြည့်လွန်နှစ်တွေမှာ သုတေသီတွေက တိရစ္ဆာန်အမူအကျင့်ကို လေ့လာစမ်းသပ်ကြည့်တဲ့အခါ “ကိုယ်တိုင် ကြုံတွေ့ဖူးလို့ စိတ်ပျက်အားလျော့သွားခြင်း” ကို တွေ့ရှိခဲ့ကြတယ်။ လူတွေမှာလည်း အဲဒီလိုအမူအကျင့် ရှိမှန်း တွေ့ရှိခဲ့တယ်။ ဥပမာ၊ စမ်းသပ်ခံလူတစ်စုကို ဆူညံသံတွေ ဖွင့်ပေးပြီး နားမထောင်ချင်ရင် ခလုတ်နှိပ်လိုက်လို့ ပြောထားတယ်။ သူတို့ ခလုတ်ပိတ်လိုက်တဲ့အခါ ဆူညံသံတွေ ရပ်သွားတယ်။

နောက်လူတစ်စုကို အဲဒီအတိုင်း ပြောပေမဲ့ ခလုတ်မနှိပ်ကြလို့ ဆူညံသံ ရပ်သွားအောင် မလုပ်နိုင်ခဲ့ဘူး။ အများစုမှာ ကူကယ်ရာမဲ့ ခံစားချက်မျိုး ဖြစ်ပေါ်လာတယ်။ နောက်တစ်မျိုး စမ်းသပ်ကြည့်တော့လည်း ဘာတုံ့ပြန်မှုမှ မရှိဘူး၊ ဘာမှ ထူးမှာ မဟုတ်လို့ ဖြစ်လာသမျှ ခါးစည်းခံတော့မယ်ဆိုပြီး ခံယူထားကြတယ်။ ဒါပေမဲ့ သူတို့ထဲက အကောင်းမြင်စိတ်ရှိသူတွေကတော့ ဘာမှ မတတ်နိုင်တော့ဘူးဆိုတဲ့ ခံစားချက်ကို အရှုံးမပေးဘူး။

သုတေသန လုပ်ဖို့ ကူညီပေးခဲ့တဲ့ ဒေါက်တာ မာတင် ဆယ်လီမဲန်က အကောင်းမြင်စိတ်၊ အဆိုးမြင်စိတ်ကို အထူးပြုလေ့လာခဲ့တယ်။ ကူကယ်ရာ မဲ့နေတယ်လို့ ခံစားနေရသူတွေရဲ့ အမြင်ကို အသေအချာ ဆန်းစစ်တယ်။ အဆိုးမြင်စိတ်ကြောင့် လူတွေက ဘဝမှာ ကြိုးစားအားထုတ်မှု မရှိတော့ဘူး၊ နေ့စဉ် လုပ်ရိုးလုပ်စဉ်တွေကိုတောင် မလုပ်ချင်တော့တာကို ဒေါက်တာ မာတင် တွေ့ရှိခဲ့တယ်။ အဆိုးမြင်စိတ်နဲ့ပတ်သက်ပြီး ဒီလို အကျဉ်းချုပ် ဖော်ပြတယ်– “၂၅ နှစ် လေ့လာပြီးနောက်မှာ ကျွန်တော် သိလိုက်ရတာက ကိုယ့်ကြောင့် အဖြစ်ဆိုးတွေ ကြုံရတယ်၊ ဆက်ကြုံနေရဦးမှာပဲ၊ ဘာပဲ လုပ်လုပ် ထူးခြားလာမှာ မဟုတ်ဘူးလို့ အဆိုးမြင်တဲ့သူတွေလို ထင်မြင်ယူဆတတ်တဲ့ အကျင့် ရှိနေရင် ပိုပြီးတော့တောင် ဒုက္ခတွေ ကြုံတွေ့ရနိုင်တယ်ဆိုတဲ့ အချက်ပါပဲ။”

အဲဒီအချက်ကလည်း ဒီနေ့ခေတ် တချို့သူတွေအတွက် အသစ်အဆန်း ဖြစ်နိုင်တယ်။ ဒါပေမဲ့ ကျမ်းစာကျောင်းသားတွေက “ဒုက္ခရောက်ချိန်မှာ စိတ်ဓာတ်ကျနေရင် အားလျော့သွားလိမ့်မယ်” ဆိုတဲ့ ကျမ်းစကားကနေ သိရှိပြီးသား ဖြစ်တယ်။ (ပညာအလိမ္မာ ၂၄:၁၀) စိတ်ဓာတ်ကျနေချိန်မှာ အဆိုးမြင်စိတ် ရှိနေရင် လုပ်ချင်ကိုင်ချင်စိတ် ရှိတော့မှာ မဟုတ်ဘူး။ ဒါဆိုရင် ဘာက အဆိုးမြင်စိတ်ကို တွန်းလှန်ပြီး မျှော်လင့်ချက်နဲ့ အကောင်းမြင်စိတ်ကို ပျိုးထောင်ပေးနိုင်သလဲ။

[ရုပ်ပုံ]

မျှော်လင့်ချက် ရှိရင် ကောင်းကျိုး အများကြီး ရရှိနိုင်

အဆိုးမြင်စိတ်ကို ဖျောက်ဖျက်နိုင်

ကြုံတွေ့ခံစားနေရတဲ့ ဘဝဒုက္ခတွေကို ဘယ်လို ရှုမြင်သလဲ။ အဲဒီမေးခွန်းရဲ့ အဖြေပေါ် မူတည်ပြီး သင်ဟာ အကောင်းမြင်သူလား၊ အဆိုးမြင်သူလားဆိုတာ ခွဲခြားနိုင်တယ်လို့ ပညာရှင်တွေ ယူဆထားကြတယ်။ ကျွန်တော်တို့အားလုံး ခံစားနေရတဲ့ ဘဝဒုက္ခတွေ အမျိုးမျိုး ရှိကြတယ်။ ပိုဆိုးရွားတာတွေလည်း ရှိတယ်။ တချို့က ဒုက္ခတွေကို အောင်မြင်ကျော်လွှားပြီး ဘဝကို အစပြုကြိုးစားဖို့ ဘာကြောင့် အသင့်ရှိနေတာလဲ။ တချို့ကျတော့ ဘာမဟုတ်တဲ့ အခက်အခဲတွေကိုတောင် ဘာကြောင့် အရှုံးပေးပြီး လက်မှိုင်ချချင်တာလဲ။

ဥပမာ၊ သင်က အလုပ်ရှာနေတယ် ဆိုပါစို့။ သင့်ကို အင်တာဗျူး လုပ်ပြီး ပယ်ချလိုက်တဲ့အခါ ဘယ်လို ခံစားရလဲ။ သင့်ကို မကြိုက်လို့ ပယ်ချလိုက်တာဆိုတော့ ‘ငါ့ကို ဘယ်သူမှ အလုပ်ခန့်မှာ မဟုတ်ဘူး။ ဒီတစ်သက် အလုပ်ရတော့မယ် မထင်ဘူး’ လို့ ယူဆမိနိုင်တယ်။ ပိုဆိုးတာက ကိုယ့်ရဲ့ ဘဝကဏ္ဍတိုင်းမှာ အဲဒီလိုယူဆသွားပြီး ‘ငါ အရည်အချင်း မရှိဘူး၊ အသုံးမကျဘူး’ ဆိုတဲ့ အတွေး ဝင်လာနိုင်တယ်။ အဲဒီအတွေးတွေက အဆိုးမြင်စိတ်ကို ဖြစ်ပေါ်စေတယ်။

အဆိုးမြင်စိတ်ကို ဖျောက်ဖျက်ပါ

အဆိုးမြင်စိတ်ကို ဘယ်လို ဖျောက်ဖျက်နိုင်သလဲ။ အရေးကြီးဆုံးအဆင့်က အဆိုးမြင်စိတ် ရှိလာပြီဆိုတာ အသိအမှတ် ပြုရမယ်။ နောက်အဆင့်က အဲဒီစိတ်ကို ဖျောက်ဖျက်ရမယ်။ သင့်ကို ငြင်းပယ်လိုက်ရတဲ့ အကြောင်းရင်းကို စဉ်းစားကြည့်ပါ။ ဥပမာ၊ သင့်ကို အလုပ်မခန့်ချင်လို့ ငြင်းပယ်လိုက်တာလား။ အလုပ်ရှင် လိုချင်တဲ့ အရည်အသွေးတွေ သင့်မှာ မရှိလို့ တခြားတစ်ယောက်ကို ရှာနေတာလား။

အသေအချာ သုံးသပ်ကြည့်ရင် အဆိုးမြင် သဘောထားက စိတ်လှုပ်ရှားမှုကို မထိန်းနိုင်လို့ ဖြစ်ပေါ်လာတာပါ။ အငြင်းခံလိုက်ရတာနဲ့ပဲ လုံးဝ အသုံးမကျတဲ့သူ ဖြစ်သွားသလား။ ဘုရားသခင်၊ မိသားစု၊ မိတ်ဆွေတွေနဲ့ ပြောဆိုဆက်သွယ်ရာမှာ ကိုယ် ဘယ်လောက်ထိ အောင်မြင်နေသလဲဆိုတာ စဉ်းစားကြည့်နိုင်မလား။ ဘာပဲလုပ်လုပ်၊ ဘယ်လိုပဲဖြစ်ဖြစ် အောင်မြင်မှာ မဟုတ်ဘူးဆိုတဲ့ အဆိုးမြင်စိတ်တွေကို ဖယ်ရှားပစ်ဖို့ သင်ယူပါ။ သင် ဘယ်တော့မှ အလုပ်ရမှာ မဟုတ်ဘူးလို့ မယူဆလိုက်ပါနဲ့။ အဆိုးမြင် သဘောထားကို ဖျောက်ဖျက်နိုင်မယ့် အချက်တွေ ရှိသေးတယ်။

ပန်းတိုင်ရောက်မယ်ဆိုတဲ့ အကောင်းမြင်စိတ်

မကြာသေးခင်နှစ်တွေက မျှော်လင့်ချက်ရဲ့ အဓိပ္ပာယ် ဖွင့်ဆိုချက်ကို သုတေသီတွေ စိတ်ဝင်စားလာကြတယ်။ မျှော်လင့်ချက်မှာ ကိုယ့်ပန်းတိုင်တွေအတိုင်း လုပ်နိုင်မယ်လို့ ယုံကြည်မှုလည်း ပါတယ်ဆိုပြီး ယူဆကြတယ်။ တကယ်တော့ မျှော်လင့်ချက်ရဲ့ အဓိပ္ပာယ်က နောက်ဆောင်းပါးမှာ တွေ့ရမယ့်အတိုင်း အများကြီး ကျယ်ပြန့်တယ်။ ဒါပေမဲ့ ဒီအဓိပ္ပာယ် ဖွင့်ဆိုချက်ကလည်း အများကြီး အကျိုးပြုပါတယ်။ ပန်းတိုင်အတိုင်း လုပ်နိုင်မယ်လို့ မျှော်လင့်ထားရင် အကောင်းမြင်စိတ်၊ ပန်းတိုင်ကို အာရုံစူးစိုက်နိုင်စွမ်း ရှိလာမယ်။

အနာဂတ် ပန်းတိုင်တွေအတိုင်း လုပ်နိုင်မယ်ဆိုတာ ယုံကြည်စိတ်ချနိုင်ဖို့ ပန်းတိုင်တွေကို အရင်က အရောက်လှမ်းနိုင်ခဲ့တယ်ဆိုတဲ့ ခံစားချက် ရှိဖို့ လိုအပ်တယ်။ အဲဒီလိုခံစားချက် မရှိရင် ကိုယ်ချမှတ်မယ့် ပန်းတိုင်တွေကို အသေအချာ စဉ်းစားရမယ်။ ဦးဆုံး၊ ကိုယ့်မှာ ပန်းတိုင်တွေ ရှိသလား။ ဘဝမှာ ဘာဖြစ်ချင်လဲ၊ ဘာက အရေးကြီးဆုံးလဲဆိုတာ အချိန်ယူ မစဉ်းစားဘဲ နေ့စဉ် လုပ်ရိုးလုပ်စဉ်တွေကို လုပ်နေမိတတ်ကြတယ်။ ဦးစားပေးရာတွေကို အတိအကျ သိရှိဖို့ ရှေးနှစ်ပေါင်းများစွာကတည်းက ကျမ်းစာမှာ အကြံပြုထားတယ်– ‘ပိုအရေးကြီးတဲ့အရာတွေကို ပိုင်းခြားသိမြင်ပါ။’​—ဖိလိပ္ပိ ၁:၁၀။

ဦးစားပေးရာတွေကို သတ်မှတ်လိုက်ရင် ကဏ္ဍအသီးသီး ဖြစ်တဲ့ ဝတ်ပြုရေးပိုင်းမှာ၊ မိသားစုဘဝမှာ၊ အလုပ်အကိုင်၊ ပညာရေးမှာ အရေးကြီး ပန်းတိုင်တွေ ချမှတ်ဖို့ လွယ်သွားမယ်။ ဒါပေမဲ့ အစပိုင်းမှာ ပန်းတိုင်အများကြီး မချမှတ်ဖို့ အရေးကြီးတယ်။ ကိုယ်လုပ်နိုင်မယ့် ပန်းတိုင်တွေကို ဦးဆုံး ချမှတ်ပါ။ ပန်းတိုင်အတိုင်း မလုပ်နိုင်တော့ဘူးဆိုရင် စိတ်ပျက်အားလျော့ပြီး အရှုံးပေးလိုက်နိုင်တယ်။ ဒါကြောင့် ကြီးမားတဲ့ ရေရှည်ပန်းတိုင်တွေကို ရေတိုပန်းတိုင်အဖြစ် ခွဲပြီး လုပ်ဆောင်တာ ပိုကောင်းတယ်။

“ဆန္ဒရှိက နည်းလမ်းရ” ဆိုရိုးစကားအတိုင်း အရေးကြီး ပန်းတိုင်တွေ ချမှတ်ပြီးရင် အဲဒီပန်းတိုင်တွေကို ကြိုးစားလုပ်ချင်တဲ့ စိတ်ဆန္ဒ၊ ခိုင်မာတဲ့ ဆုံးဖြတ်ချက် ရှိရမယ်။ ကိုယ့်ပန်းတိုင်ရဲ့ တန်ဖိုး၊ ဒီပန်းတိုင်ကို ရရှိခြင်းကြောင့် ရရှိမယ့် အကျိုးကျေးဇူးတွေကို ဆင်ခြင်ခြင်းအားဖြင့် ကိုယ့်ဆုံးဖြတ်ချက် ခိုင်မာလာနိုင်တယ်။ အတားအဆီးတွေ ကြုံရမယ်ဆိုတာတော့ မှန်ပါတယ်။ ဒါပေမဲ့ အဲဒီအတားအဆီးတွေကြောင့် တက်လမ်းမှာ ပိတ်မိနေမယ့်အစား ကျော်လွှားအောင်မြင်ဖို့ ကြိုးစားရမယ်။

ပန်းတိုင်တွေအတိုင်း လုပ်ဆောင်နိုင်ဖို့ လက်တွေ့ကျ နည်းလမ်းတွေကို စဉ်းစားရမယ်။ မျှော်လင့်ချက်ရဲ့ တန်ဖိုးကို ကျယ်ကျယ်ပြန့်ပြန့် လေ့လာခဲ့တဲ့ စာရေးဆရာ စီအာရ် စနိုက်ဒါက ပန်းတိုင်တစ်ခုကို ရောက်နိုင်ဖို့ ဘက်ပေါင်းစုံ စဉ်းစားသုံးသပ်ရမယ်လို့ အကြံပြုထားတယ်။ ပထမနည်း မအောင်မြင်ရင် ဒုတိယနည်း၊ တတိယနည်း စသဖြင့် အသုံးပြုရမယ်။

ပန်းတိုင်တစ်ခုကို နောက်ပန်းတိုင်တစ်ခုနဲ့ ဘယ်အချိန် အစားထိုးရမလဲဆိုတာ သိအောင် လုပ်ဖို့လည်း စနိုက်ဒါ အကြံပေးတယ်။ ကိုယ်မလုပ်နိုင်တဲ့ ပန်းတိုင်အတွက် မကျေမနပ် ဖြစ်နေရင် စိတ်ဓာတ်ကျလာနိုင်တယ်။ ကိုယ် လုပ်နိုင်မယ့် ပန်းတိုင်တစ်ခုနဲ့ အစားထိုးလိုက်တဲ့အခါ အောင်မြင်ဖို့ မျှော်လင့်ချက် ရှိလာနိုင်မယ်။

ဒီကိစ္စနဲ့ပတ်သက်ပြီး ကျမ်းစာမှာ စံနမူနာကောင်းတစ်ခု ရှိတယ်။ ဘုရင် ဒါဝိဒ်က ယေဟောဝါဘုရားအတွက် ဗိမာန်တော်ကို သိပ်ဆောက်ပေးချင်ပေမဲ့ ဒီအခွင့်ထူးကို သူ့သား ရှောလမုန်ပဲ ရရှိမယ်လို့ ဘုရား ပြောတယ်။ အဲဒီအခါ ဒါဝိဒ်ဟာ မကျေမနပ် ဖြစ်မယ့်အစား၊ လုပ်ချင်တာကို တဇွတ်ထိုး လုပ်မယ့်အစား ပန်းတိုင်တွေ ပြောင်းလိုက်တယ်။ ဆောက်လုပ်ရေး စီမံကိန်းကို ရှောလမုန် အပြီးသတ်နိုင်ဖို့ လိုအပ်မယ့် ငွေကြေးနဲ့ ပစ္စည်းတွေကို စုဆောင်းပေးတဲ့နေရာမှာ ဒါဝိဒ် အားစိုက်လုပ်ဆောင်တယ်။​—၁ ဘုရင်များ ၈:၁၇-၁၉။ ၁ ရာဇဝင်ချုပ် ၂၉:၃-၇။

အဆိုးမြင်စိတ်ကို ဖျောက်ဖျက်ပြီး အကောင်းမြင်စိတ်ကို ပျိုးထောင်ခြင်းအားဖြင့် ကိုယ့်မျှော်လင့်ချက် ရှင်သန်နေတာတောင် တစ်ခါတလေ မျှော်လင့်ချက် ပျောက်ဆုံးသွားနိုင်တယ်။ ကိုယ် ဘာမှ မတတ်နိုင်တဲ့ ဒီလောကရဲ့ မျှော်လင့်ချက် မဲ့နေတဲ့ အခြေအနေတွေကြောင့်လည်း ဖြစ်နိုင်တယ်။ ဆင်းရဲမှု၊ စစ်မှု၊ မတရားမှု၊ ဖျားနာမှု၊ သေခြင်းစတဲ့ ဝမ်းနည်းစရာ ပြဿနာတွေကြားမှာ အကောင်းမြင်စိတ်နဲ့ မျှော်လင့်ချက်ကို ဘယ်လို ထိန်းထားနိုင်မလဲ။

[ရုပ်ပုံ]

ကိုယ် ရချင်တဲ့ အလုပ်အတွက် ငြင်းပယ်ခံလိုက်ရရင် ဒီတစ်သက် အလုပ်ရတော့မှာ မဟုတ်ဘူးလို့ ယူမှတ်လိုက်မလား

[ရုပ်ပုံ]

ကာလဒေသ၊ အခြေအနေပေါ် မူတည်ပြီး ပန်းတိုင်တွေကို ဒါဝိဒ် ချမှတ်ခဲ့

စစ်မှန်တဲ့ မျှော်လင့်ချက်ကို ဘယ်မှာ ရှာတွေ့နိုင်မလဲ

သင့်နာရီ ပျက်သွားပြီ။ ဘယ်မှာ ပြင်မလဲ၊ စဉ်းစားရတော့မယ်။ နာရီပြင်တဲ့ ကြော်ငြာတွေ တစ်ပုံကြီး။ ကြော်ငြာတွေက ပြင်ပေးနိုင်တယ်လို့ အာမခံပေမဲ့ တစ်ယောက်တစ်မျိုး ပြောနေကြတယ်။ လွန်ခဲ့တဲ့နှစ်တွေမှာ ဒီနာရီကို တီထွင်ခဲ့တဲ့ အိမ်နီးချင်းတစ်ယောက်က အခမဲ့ ပြင်ပေးမယ်လို့ သိလိုက်ရရင် ဘယ်လိုနေမလဲ။ သူ့ကိုပဲ ပြင်ခိုင်းမယ် မဟုတ်လား။

သင့်မျှော်လင့်ချက်ကို အဲဒီနာရီနဲ့ နှိုင်းယှဉ်နိုင်တယ်။ ဒုက္ခကာလမှာ လူအများနည်းတူ သင်လည်း မျှော်လင့်ချက် မဲ့နေတယ်ဆိုရင် ဘယ်ကနေ အကူအညီ ရနိုင်မလဲ။ ပြဿနာတွေကို ဖြေရှင်းပေးနိုင်တယ်လို့ လူအတော်များများ ပြောဆိုပြီး အကြံဉာဏ်တွေ ပေးနေကြတယ်။ ဒါပေမဲ့ အဲဒီအကြံဉာဏ်တွေက ရှုပ်ထွေးပြီး တစ်ယောက်တစ်ပေါက်စီ ဖြစ်နေတယ်။ ဒါဆိုရင် မျှော်လင့်ချက် ပေးနိုင်စွမ်းရှိတဲ့ အရှင်ဆီကနေ အကြံဉာဏ် မတောင်းသင့်ဘူးလား။ အဲဒီအရှင်ဟာ “ကျွန်တော်တို့ တစ်ယောက်နဲ့မှ မဝေး” တဲ့အပြင် ကူညီပေးချင်စိတ်လည်း ရှိတယ်လို့ ကျမ်းစာမှာ ဖော်ပြတယ်။—တမန်တော် ၁၇:၂၇။ ၁ ပေတရု ၅:၇။

မျှော်လင့်ချက်အတွက် ပိုလေးနက်တဲ့ အဓိပ္ပာယ် ဖွင့်ဆိုချက်

ဒီနေ့ခေတ် ဆရာဝန်တွေ၊ သိပ္ပံပညာရှင်တွေနဲ့ စိတ်ပညာရှင်တွေလည်း မျှော်လင့်ချက်အကြောင်း ပြောတတ်ကြတယ်။ ဒါပေမဲ့ ကျမ်းစာမှာ ပါတဲ့ မျှော်လင့်ချက်က အဓိပ္ပာယ် ကျယ်ပြန့်ပြီး ပိုလေးနက်တယ်။ မူရင်းဘာသာစကားမှာ “မျှော်လင့်ချက်” ကို မျှော်လင့်တကြီး စောင့်စားခြင်း၊ ကောင်းမွန်ရာကို စောင့်မျှော်နေခြင်းလို့ အဓိပ္ပာယ် ဖွင့်ထားတယ်။ မျှော်လင့်ချက်မှာ အပိုင်း နှစ်ပိုင်း ပါတယ်။ ကောင်းမွန်ရာကို လိုချင်တောင့်တခြင်းနဲ့ အဲဒီအတိုင်း ဖြစ်လာမယ်လို့ ယုံကြည်ရတဲ့ အကြောင်းရင်းတို့ ဖြစ်တယ်။ ကျမ်းစာမှာ ပါတဲ့ မျှော်လင့်ချက်ဟာ ဖြစ်စေချင်တဲ့ ဆန္ဒလောက်ပဲ မဟုတ်ဘူး။ တကယ် ဖြစ်လာမယ်ဆိုတာ ခိုင်မာတဲ့ အထောက်အထား ရှိတယ်။

ယုံလွယ်တာမျိုး မဟုတ်ဘဲ အမှန်တကယ် တည်ရှိတယ်လို့ စိတ်ချစွာ ယုံကြည်ခြင်းနဲ့ မျှော်လင့်ခြင်းဟာ တူနေသလိုပဲ။ (ဟီဘရူး ၁၁:၁) ဒါပေမဲ့ ကျမ်းစာမှာ ယုံကြည်ခြင်းနဲ့ မျှော်လင့်ခြင်းကို ခွဲခြားဖော်ပြထားတယ်။—၁ ကောရိန္သု ၁၃:၁၃။

ဥပမာ၊ သူငယ်ချင်း တစ်ယောက်ကို သင် အကူအညီတောင်းတယ် ဆိုပါစို့။ ကူညီပေးမယ်လို့ သင် မျှော်လင့်ထားတယ်။ အဲဒီလိုမျှော်လင့်တာက သူ့ကို ယုံကြည်ပြီး ခင်မင်ရင်းနှီးလို့ပဲ မဟုတ်ဘူး။ သူ ကြင်နာသနားတယ်၊ ရက်ရောတယ်ဆိုတဲ့ အထောက်အထား ရှိလို့ ဖြစ်တယ်။ ဒီမှာ တွေ့ရတဲ့အတိုင်း ယုံကြည်ခြင်းနဲ့ မျှော်လင့်ခြင်းက အနီးကပ် ဆက်စပ်ပေမဲ့ ကွဲပြားတယ် မဟုတ်လား။ ဘုရားသခင်အပေါ် အဲဒီလိုမျှော်လင့်ခြင်း ရှိနိုင်သလား။

မျှော်လင့်ခြင်း ရှိနိုင်တဲ့ အကြောင်းရင်းများ

စစ်မှန်တဲ့ မျှော်လင့်ချက်ကို ဘုရားသခင်ပဲ ပေးနိုင်တယ်။ ကျမ်းစာခေတ်မှာ ယေဟောဝါဘုရားကို “အစ္စရေးရဲ့ မျှော်လင့်ချက်” လို့ ခေါ်ထားတယ်။ (ယေရမိ ၁၄:၈) ဘုရားသခင်ဆီက စစ်မှန်တဲ့ မျှော်လင့်ခြင်းကို အစ္စရေးတွေ ရရှိတာကြောင့် ဘုရားသခင်က သူတို့ရဲ့ မျှော်လင့်ချက် ဖြစ်ခဲ့တယ်။ ဘုရားပေး မျှော်လင့်ချက်က ဖြစ်စေချင်တဲ့ ဆန္ဒလောက်ပဲ မဟုတ်ဘူး။ ခိုင်မာတဲ့ အထောက်အထား ရှိတယ်။ ရာစုနှစ်များစွာတစ်လျှောက် အစ္စရေးတွေကို ဘုရားသခင် ကတိတွေ ပေးခဲ့ပြီး အဲဒီအတိုင်း လုပ်ဆောင်ပေးခဲ့တဲ့ မှတ်တမ်း ရှိတယ်။ သူတို့ရဲ့ခေါင်းဆောင် ယောရှုက “ယေဟောဝါဘုရား ပေးခဲ့တဲ့ ကောင်းမွန်တဲ့ ကတိအားလုံး မပြည့်စုံဘဲ မနေဘူးဆိုတာ ခင်ဗျားတို့ သိတာပဲ” လို့ ပြောတယ်။—ယောရှု ၂၃:၁၄။

အဲဒီမှတ်တမ်းကို ထိန်းသိမ်းထားတာ နှစ်ပေါင်းထောင်နဲ့ချီ ရှိနေပြီ။ ကျမ်းစာမှာ ဘုရားပေးကတိတွေ အများကြီး ရှိတဲ့အပြင် ကတိတွေ ပြည့်စုံခဲ့တဲ့ သမိုင်းမှတ်တမ်းတွေကိုလည်း ဖော်ပြထားတယ်။ ကျမ်းစာမှာ ပါတဲ့ မပြည့်စုံသေးတဲ့ ကတိတွေကိုလည်း ယုံကြည်စိတ်ချနိုင်တယ်။ ဘာကြောင့်လဲဆိုတော့ အဲဒီကတိတွေ ပေးတဲ့အချိန်မှာ ပြည့်စုံပြီးသွားသလိုမျိုး မှတ်တမ်းတင်ထားလို့ ဖြစ်တယ်။

ဒါကြောင့် ကျမ်းစာကို မျှော်လင့်ချက် ပေးတဲ့ စာအုပ်လို့ ပြောရင်လည်း မမှားပါဘူး။ လူတွေနဲ့ ဘုရားသခင် ပြောဆိုဆက်သွယ်တဲ့ မှတ်တမ်းကို လေ့လာရင် ဘုရားအပေါ် ထားတဲ့ မျှော်လင့်ချက် ပိုခိုင်မာလာမယ်။ “ကျမ်းစာမှာ ကြိုတင်ရေးထားသမျှဟာ ကျွန်တော်တို့ကို သွန်သင်ဆုံးမဖို့ ဖြစ်တယ်။ ကျမ်းစာက ကျွန်တော်တို့ကို ခံနိုင်ရည်နဲ့ နှစ်သိမ့်မှု ပေးတဲ့အတွက် မျှော်လင့်ချက် ရှိစေတယ်” လို့ တမန်တော် ပေါလု ရေးခဲ့တယ်။—ရောမ ၁၅:၄။

ဘုရားပေး မျှော်လင့်ချက်က ဘာလဲ

ဘယ်အချိန်မှာ မျှော်လင့်ချက် အလိုအပ်ဆုံးလဲ။ သေခြင်းတရားကို ရင်ဆိုင်ရချိန်မှာ မဟုတ်လား။ ဥပမာ၊ လူအတော်များများက ချစ်ရသူတစ်ဦး သေဆုံးချိန် အခိုက်အတန့်မှာ မျှော်လင့်ချက်ဆိုတာ ဘာကို ဆိုလိုနေမှန်း မသိကြဘူး။ သေခြင်းတရားထက် မျှော်လင့်ချက်မဲ့တာ ဘာရှိဦးမှာလဲ။ သေခြင်းတရားကို ဘယ်သူမှ ရှောင်လို့ မရဘူး။ တစ်နေ့နေ့ တစ်ချိန်ချိန်မှာ အားလုံး ကြုံတွေ့ရတယ်။ ဒါကြောင့် ကျမ်းစာမှာ သေခြင်းကို “နောက်ဆုံး ရန်သူ” လို့ ခေါ်ထားတယ်။—၁ ကောရိန္သု ၁၅:၂၆။

သေခြင်းတရားနဲ့ပတ်သက်ပြီး ဘာမျှော်လင့်ချက် ရှိသလဲ။ နောက်ဆုံးရန်သူ သေခြင်းဟာ “ဖျက်ဆီးခံရမယ်” လို့ အဲဒီကျမ်းချက်မှာပဲ ဖော်ပြထားတယ်။ ယေဟောဝါဘုရားမှာ သေခြင်းကို ဖယ်ရှားပေးနိုင်တဲ့ တန်ခိုး ရှိတယ်။ သေလွန်သူတွေကို အသက်ပြန်ရှင်အောင် လုပ်ပေးပြီး သက်သေပြခဲ့တယ်။ သေလွန်သူ ၉ ယောက်ကို အသက်ပြန်ရှင်အောင် ဘုရားသခင် လုပ်ပေးခဲ့တဲ့ အထောက်အထားကို ကျမ်းစာမှာ ဖော်ပြထားတယ်။

သေဆုံးတာ လေးရက် ရှိပြီ ဖြစ်တဲ့ လာဇရုကို အသက်ပြန်ရှင်အောင် လုပ်ပေးဖို့ သားတော် ယေရှုကို ယေဟောဝါဘုရား တန်ခိုးပေးခဲ့တယ်။ ယေရှုက လူအများကြီးရှေ့မှာ လာဇရုကို အသက်ပြန်ရှင်အောင် လုပ်ပေးခဲ့တယ်။—ယောဟန် ၁၁:၃၈၊ ၄၈၊ ၅၃။ ၁၂:၉၊ ၁၀။

“သေလွန်သူတွေကို ဘာဖြစ်လို့ အသက်ပြန်ရှင်အောင် လုပ်ပေးတာလဲ။ သူတို့ အသက်ကြီးလာပြီး နောက်ဆုံး သေရတာပဲ မဟုတ်လား” လို့ စဉ်းစားမိမယ်။ ဟုတ်ပါတယ်၊ သူတို့ သေဆုံးသွားကြတယ်။ ဒါပေမဲ့ အထောက်အထားခိုင်လုံတဲ့ ရှင်ပြန်ထမြောက်ခြင်း မှတ်တမ်းကြောင့် ချစ်ရတဲ့ သေဆုံးသူတွေကို ပြန်အသက်ရှင်စေချင်တဲ့ ဆန္ဒအပြင် ယုံကြည်ရတဲ့ အကြောင်းရင်းပါ ရှိလာတယ်။ သူတို့ ပြန်အသက်ရှင်လာမယ်ဆိုတာ ယုံကြည်ဖို့ အထောက်အထား ရှိလာတယ်။ နောက်တစ်နည်း ပြောရရင် စစ်မှန်တဲ့ မျှော်လင့်ချက် ရှိလာကြတယ်။

“ကျွန်တော်ဟာ လူသေတွေကို ရှင်ပြန်ထမြောက်စေသူ၊ အသက်ရစေတဲ့သူပဲ” လို့ ယေရှု ပြောတယ်။ (ယောဟန် ၁၁:၂၅) တစ်ကမ္ဘာလုံး အတိုင်းအတာနဲ့ သေလွန်သူတွေကို အသက်ပြန်ရှင်အောင် ယေရှု လုပ်ပေးနိုင်ဖို့ ယေဟောဝါဘုရား တန်ခိုးပေးလိမ့်မယ်။ “သင်္ချိုင်းဂူတွေမှာ ရှိနေသူအားလုံး [ခရစ်တော်ရဲ့] အသံကို ကြားပြီး ထွက်လာမယ့်အချိန် ရောက်လာတော့မယ်” လို့ ယေရှု ပြောတယ်။ (ယောဟန် ၅:၂၈၊ ၂၉) သင်္ချိုင်းမှာ အိပ်ပျော်နေသူအားလုံး မြေကြီးပရဒိသုမှာ နေထိုင်ဖို့ အသက်ပြန်ရှင်လာမယ့် မျှော်လင့်ချက် ရှိပါတယ်။

ပရောဖက် ဟေရှာယက ရှင်ပြန်ထမြောက်ခြင်းကို မြင်သာအောင် ဒီလိုပုံဖော်တယ်– “လူသေတွေ ပြန်ရှင်လာမယ်။ ငါ့ရဲ့ လူမျိုးထဲက သေဆုံးသူတွေ ပြန်ထလာမယ်။ မြေမှုန့်ထဲမှာ နေထိုင်သူတို့၊ နိုးထပြီး ရွှင်လန်းစွာ သီချင်းဆိုကြ။ ပြည်မှာ ကျတဲ့ ဆီးနှင်းဟာ မနက်ခင်းမှာ ကျတဲ့ ဆီးနှင်းလို ဖြစ်လိမ့်မယ်။ မြေကြီးက အစွမ်းမရှိတော့တဲ့ လူသေတွေကို အသက်ရှင်စေမယ်။”—ဟေရှာယ ၂၆:၁၉။

နှစ်သိမ့်မှု ရစေတယ် မဟုတ်လား။ မိခင်ရဲ့ သားအိမ်မှာ လုံလုံခြုံခြုံ ရှိနေတဲ့ ကလေးတစ်ယောက်လိုမျိုး သေလွန်သူတွေလည်း အလုံခြုံဆုံး နေရာမှာ ရှိနေတာကို မြင်ယောင်ကြည့်နိုင်တယ်။ သင်္ချိုင်းမှာရှိတဲ့သူတွေက တန်ခိုးအကြီးဆုံးအရှင် ဘုရားသခင်ရဲ့ မှတ်ဉာဏ်မှာ ရှိနေကြတယ်။ (လုကာ ၂၀:၃၇၊ ၃၈) မွေးကင်းစကလေးကို မိသားစုက ကြိုဆိုသလို မကြာခင် သာယာလှပတဲ့ ကမ္ဘာပေါ် ပြန်အသက်ရှင်လာကြမယ့် သေလွန်သူတွေကိုလည်း ကြိုဆိုကြမှာ ဖြစ်တယ်။ ဒါကြောင့် သေခြင်းတရားကို ရင်ဆိုင်ရချိန်မှာတောင် မျှော်လင့်ချက် ရှိပါတယ်။

မျှော်လင့်ချက်က သင့်ကို ဘာလုပ်ပေးနိုင်

မျှော်လင့်ချက်ဟာ ဘယ်လောက် အရေးကြီးလဲဆိုတာ ပေါလု ပြောပြတယ်။ ဘုရားသခင် ပြင်ဆင်ပေးထားတဲ့ ရင်အုပ်တန်ဆာမှာ သံခမောက်ကို မျှော်လင့်ချက်နဲ့ ခိုင်းနှိုင်းထားတယ်။ (၁ သက်သာလောနိတ် ၅:၈) ကျမ်းစာခေတ်မှာ စစ်သားတွေက သားရေခေါင်းစွပ်ပေါ် သံခမောက်ကို ဆောင်းထားတယ်။ ခေါင်းကို ထိမှန်တဲ့ လက်နက်အများစု ချော်ထွက်သွားနိုင်တယ်။ သေလောက်တဲ့ ဒဏ်ရာ ရမှာ မဟုတ်ဘူး။ သံခမောက်က ခေါင်းကို ကာကွယ်ပေးသလို မျှော်လင့်ခြင်းကလည်း စဉ်းစားတွေးခေါ်ပုံတွေကို ကာကွယ်ပေးနိုင်တယ်လို့ ပေါလု ဆိုလိုနေတာပါ။ သင်က ဘုရားပေး မျှော်လင့်ချက်ကို ယုံကြည်မယ်ဆိုရင် အခက်အခဲတွေ ကြုံရတဲ့အခါ ကြောက်ရွံ့တုန်လှုပ်မှာ မဟုတ်ဘူး။ စိတ်ငြိမ်သက်နေပါလိမ့်မယ်။ ဒါကြောင့် ကျွန်တော်တို့အားလုံး သံခမောက်လိုမျိုး မျှော်လင့်ချက် လိုအပ်ကြတယ် မဟုတ်လား။

ဘုရားပေး မျှော်လင့်ချက်နဲ့ပတ်သက်ပြီး ပေါလုက “အဲဒီမျှော်လင့်ချက်ဟာ ကျွန်တော်တို့အတွက် ကျောက်ဆူးလို ခိုင်ခံ့မြဲမြံနေတယ်” လို့ ရေးတယ်။ (ဟီဘရူး ၆:၁၉) သင်္ဘောပျက်ဘေးကနေ လွတ်မြောက်လာတဲ့ ပေါလုက ကျောက်ဆူးရဲ့ အရေးပါမှုကို ကောင်းကောင်း သိထားတယ်။ လေပြင်းမုန်တိုင်း ကျတဲ့အခါ သင်္ဘောသားတွေက ကျောက်ဆူးကို ပင်လယ်ထဲ ချလိုက်တယ်။ ပင်လယ်ကြမ်းပြင်ထဲ ကျောက်ဆူး စိုက်ဝင်သွားရင် မုန်တိုင်းကြားမှာ သင်္ဘောဟာ အန္တရာယ် မရှိဘဲ ပေါလောပေါ်နေလိမ့်မယ်။ အဲဒီလိုမလုပ်ရင် ကျောက်ဆောင်တွေနဲ့ တိုက်မိပြီး ပျက်စီးသွားနိုင်တယ်။

ဘုရားပေး ကတိတွေလည်း ကျွန်တော်တို့အတွက် ခိုင်ခံ့မြဲမြံတဲ့ မျှော်လင့်ချက် ဖြစ်မယ်ဆိုရင် မငြိမ်မသက် ဖြစ်နေတဲ့ ဒီလောကရဲ့ ဒဏ်ကို ခံရပ်နိုင်ဖို့ ထောက်ကူပေးပါလိမ့်မယ်။ စစ်၊ ရာဇဝတ်မှု၊ ဝမ်းနည်းမှု၊ သေခြင်း မရှိတော့မယ့်အချိန် မကြာခင် ရောက်လာတော့မယ်လို့ ယေဟောဝါဘုရား ကတိပေးထားတယ်။ (စာမျက်နှာ ၁၀ က လေးထောင့်ကွက်ကို ကြည့်ပါ။) အဲဒီမျှော်လင့်ချက် ရှိမယ်ဆိုရင် ဘေးအန္တရာယ်တွေကို ရှောင်နိုင်မယ်။ ဘုရားသခင့်စံနှုန်းနဲ့အညီ အသက်ရှင်နိုင်မယ်။ ဒီလောကရဲ့ အကျင့်ယိုယွင်းမှုကို ငြင်းပယ်နိုင်မယ်။

ယေဟောဝါဘုရားက သင့်ကို အဲဒီမျှော်လင့်ချက် ရစေချင်တယ်။ လူအမျိုးမျိုးကို ကယ်တင်ခြင်း ရဖို့ ဘုရားသခင် အလိုတော် ရှိတယ်။ ဘယ်လိုနည်းနဲ့ ကယ်တင်ခြင်း ရနိုင်သလဲ။ ဦးဆုံး၊ အမှန်တရားအကြောင်း တိကျမှန်ကန်စွာ သိရှိရမယ်။ (၁ တိမောသေ ၂:၄) ကျမ်းစာအမှန်တရားနဲ့ပတ်သက်တဲ့ အသိပညာကို လေ့လာလိုက်စားဖို့ အားပေးချင်ပါတယ်။ ဘုရားပေး မျှော်လင့်ချက်က ဘယ်မျှော်လင့်ချက်ထက်မဆို သာလွန်မြင့်မြတ်တယ်။

သင့်ဆီမှာ ဘုရားပေး မျှော်လင့်ချက် ရှိမယ်ဆိုရင် ခိုကိုးရာ မဲ့နေတယ်လို့ ဘယ်တော့မှ ခံစားရမှာ မဟုတ်ဘူး။ အကြောင်းကတော့ အလိုတော်နဲ့ ညီတဲ့ ပန်းတိုင်တွေအတိုင်း လုပ်ဆောင်နိုင်ဖို့ ဘုရား ခွန်အားပေးနိုင်လို့ပါပဲ။ (၂ ကောရိန္သု ၄:၇။ ဖိလိပ္ပိ ၄:၁၃) အဲဒီမျှော်လင့်ချက်ကို ပိုင်ဆိုင်ချင်လို့ ရှာဖွေနေတယ်ဆိုရင် သတ္တိရှိပါ။ ရှာတွေ့မှာ ကျိန်းသေပါတယ်။

[လေးထောင့်ကွက်]

မျှော်လင့်ချက် ရှိစေတဲ့ အကြောင်းရင်းများ

အောက်ပါ အချက်တွေကြောင့် ကိုယ့်မျှော်လင့်ချက် ရှင်သန်လာနိုင်တယ်–

◼ ပျော်ရွှင်ချမ်းမြေ့တဲ့ အနာဂတ်အကြောင်း ဘုရားသခင် ကတိပေးထားတယ်။

သာယာလှပတဲ့ ကမ္ဘာမြေကြီးမှာ ပျော်ရွှင်စည်းလုံးတဲ့ လူမိသားစုတွေ နေထိုင်ရမယ်လို့ ကျမ်းစာမှာ ဖော်ပြထားတယ်။​—ဆာလံ ၃၇:၁၁၊ ၂၉။ ဟေရှာယ ၂၅:၈။ ဗျာဒိတ် ၂၁:၃၊ ၄။

◼ ဘုရားသခင်က မလိမ်တတ်ဘူး။

လိမ်ညာတာ မှန်သမျှကို ယေဟောဝါဘုရား ရွံရှာမုန်းတီးတယ်။ သန့်ရှင်းမြင့်မြတ်လွန်းတဲ့ ဘုရားသခင်က လိမ်ပြောဖို့ဆိုတာ လုံးဝ မဖြစ်နိုင်ဘူး။​—ပညာအလိမ္မာ ၆:၁၆-၁၉။ ဟေရှာယ ၆:၂၊ ၃။ တိတု ၁:၂။ ဟီဘရူး ၆:၁၈။

◼ ဘုရားသခင်က တန်ခိုးအကြီးဆုံးအရှင် ဖြစ်တယ်။

ယေဟောဝါဘုရားတစ်ပါးတည်းပဲ အနန္တတန်ခိုးရှင် ဖြစ်တယ်။ စကြဝဠာမှာ ဘုရားရဲ့ ကတိ ပျက်သွားအောင် လုပ်နိုင်တဲ့သူ ဘယ်သူမှ မရှိဘူး။​—ထွက်မြောက်ရာ ၁၅:၁၁။ ဟေရှာယ ၄၀:၂၅၊ ၂၆။

◼ ဘုရားသခင်က သင့်ကို ထာဝရအသက် ရစေချင်တယ်။

​—ယောဟန် ၃:၁၆။ ၁ တိမောသေ ၂:၃၊ ၄။

◼ ဘုရားသခင်က ကျွန်တော်တို့ကို မျှော်လင့်ချက်ထားတယ်။

ဘုရားသခင်က ကျွန်တော်တို့ရဲ့ အပြစ်အနာအဆာတွေကို မကြည့်ဘဲ ကောင်းကွက်၊ ကြိုးစားအားထုတ်မှုတွေကို အာရုံစိုက်တယ်။ (ဆာလံ ၁၀၃:၁၂-၁၄။ ၁၃၀:၃။ ဟီဘရူး ၆:၁၀) ကျွန်တော်တို့ မှန်ရာ လုပ်ဆောင်မယ်လို့ မျှော်လင့်တယ်။ မှန်ရာ လုပ်ဆောင်တဲ့အခါ ဘုရား ပျော်ရွှင်တယ်။​—ပညာအလိမ္မာ ၂၇:၁၁။

◼ အလိုတော်တဲ့ ညီတဲ့ ပန်းတိုင်တွေကို ပြည့်မီနိုင်အောင် ကူညီပေးမယ်လို့ ဘုရား ကတိပြုထားတယ်။

ယေဟောဝါဘုရားကို ဝတ်ပြုသူတွေဟာ ခိုးကိုးရာ မဲ့နေတယ်လို့ ယူမှတ်စရာ မလိုဘူး။ ဘုရားက တန်ခိုးအရှိဆုံး စွမ်းအား ဖြစ်တဲ့ သန့်ရှင်းသော စွမ်းအားတော်ကို ရက်ရက်ရောရော ပေးသနားပြီး ကျွန်တော်တို့ကို ကူညီပေးနေတယ်။​—ဖိလိပ္ပိ ၄:၁၃။

◼ ဘုရားသခင်ကို မျှော်လင့်တဲ့သူတွေ ဘယ်တော့မှ နောင်တရစရာအကြောင်း မရှိဘူး။

ဘုရားသခင်က အကြွင်းမဲ့ ယုံကြည်ကိုးစားထိုက်တဲ့အရှင် ဖြစ်တဲ့အတွက် ကျွန်တော်တို့ စိတ်ပျက်ရမှာ မဟုတ်ဘူး။​—ဆာလံ ၂၅:၃။

[ရုပ်ပုံ]

သံခမောက်က ဦးခေါင်းကို ကာကွယ်ပေးသလို မျှော်လင့်ချက်က စိတ်ကို ကာကွယ်ပေး

[ရုပ်ပုံ]

ခိုင်မာတဲ့ မျှော်လင့်ချက်က ကျောက်ဆူးနဲ့ တူပြီး တည်ငြိမ်မှု ရှိစေနိုင်

[Credit Line]

Courtesy René Seindal/Su concessione del Museo Archeologico Regionale A. Salinas di Palermo