စိတ်ပျက်အားလျော့ခြင်းကို သင်အောင်မြင်ကျော်လွှားနိုင်!
ပညာရှိတစ်ဦးက တစ်ကြိမ်တွင် ဤသို့ရေးသားခဲ့သည်– “သင်သည်အမှုရောက်သောကာလ၌ စိတ်ပျက်လျှင် အားနည်း၏။” (သု. ၂၄:၁၀) သင်သည် စိတ်ပျက်အားလျော့ဖူးပါက ထိုဖော်ပြချက်နှင့် သင်သဘောတူပေမည်။
စိတ်ပျက်အားလျော့ခြင်း၏အကျိုးဆက်များမှ လွတ်ကင်းသူမည်သူမျှမရှိပါ။ တော်သင့်ရုံစိတ်ပျက်အားလျော့ခြင်းသည် တစ်ရက်နှစ်ရက်ကြာပြီးနောက် ငြိမ်ကျသွားနိုင်သည်။ သို့သော် စိတ်နာကျင်မှုများ သို့မဟုတ် နာကြည်းမှုတို့နှင့်ပတ်သက်သောအခါ ပြဿနာသည် ကြာရှည်တည်ရှိနိုင်သည်။ နှစ်ပေါင်းများစွာသစ္စာရှိခဲ့ကြသော အချို့ခရစ်ယာန်များသည် အလွန်စိတ်ဓာတ်ကျလာကြရာ အသင်းတော်အစည်းအဝေးများတက်ရောက်ခြင်းနှင့် လယ်ကွင်းဓမ္မအမှု၌ပါဝင်ခြင်းတို့ကိုပင် ရပ်စဲခဲ့ကြပြီ။
သင်သည် စိတ်ပျက်အားလျော့လာလျှင် အားယူပါ! အတိတ်မှသစ္စာရှိကျေးကျွန်များသည် စိတ်ပျက်အားလျော့ခြင်းကို အောင်မြင်စွာကျော်လွှားခဲ့ကြရာ အသင်လည်း ဘုရားသခင့်အကူအညီဖြင့် ကျော်လွှားနိုင်ပါသည်။
အခြားသူများက သင့်ကိုစိတ်နာကျင်စေသောအခါ
မဆင်မခြင်ပြောသောစကား သို့မဟုတ် အမှုမဲ့အမှတ်မဲ့ပြုသောလုပ်ရပ်တိုင်းမှ လွတ်ကင်းဖို့ သင်မမျှော်လင့်နိုင်ပေ။ သို့သော် အခြားသူတို့၏မစုံလင်မှုကြောင့် ယေဟောဝါထံ သင်၏အမှုဆောင်ခြင်းကို အနှောင့်အယှက်ဖြစ်ခွင့်မပေးဘဲနေနိုင်သည်။ တစ်စုံတစ်ဦးက သင့်ကိုစိတ်နာကျင်စေခဲ့လျှင် စိတ်ပျက်အားလျော့ဖွယ်အခြေအနေတစ်ခုကို ရှမွေလ၏မိခင်ဟန္န မည်သို့ကိုင်တွယ်ခဲ့ကြောင်း သုံးသပ်ခြင်းက အကူအညီဖြစ်စေသည်ကို သင်တွေ့ရှိပေမည်။
ဟန္နသည် ကလေးအလွန်လိုချင်သော်လည်း သူသည် အမြုံဖြစ်သည်။ သူ့လင်သား၏ဒုတိယဇနီး ပေနိန္နမှာ သားသမီးများရှိ၏။ ဟန္န၏အခြေအနေကို အကင်းပါးစွာသိတတ်မည့်အစား ပေနိန္နသည် ပြိုင်ဘက်တစ်ဦးအဖြစ်ရှုမြင်ခဲ့ပြီး ထိုသဘောထားကိုပြခဲ့ရာ ဟန္နသည် “အစာမစားနိုင်၊ ငိုလျက်နေတတ်၏။”—၁ ဓမ္မရာဇဝင် ၁:၂၊ ၄-၇။
တစ်နေ့တွင် ဟန္နသည် ဆုတောင်းရန်တဲတော်သို့တက်သွားခဲ့သည်။ သူ့နှုတ်ခမ်းလှုပ်နေသည်ကို ဣသရေလယဇ်ပုရောဟိတ်မင်းဧလိမြင်တွေ့ခဲ့သည်။ ဟန္နဆုတောင်းနေသည်ကိုမသိဘဲ သူအရက်မူးခြင်းဖြစ်ရမည်ဟု ဧလိယူမှတ်ခဲ့၏။ “သင်သည် အဘယ်မျှကာလပတ်လုံး ယစ်မူးလိမ့်မည်နည်း။ သင်၏စပျစ်ရည်ကို ပယ်ရှောင်လော့” ဟုသူဆို၏။ (၁ ဓမ္မရာဇဝင် ၁:၁၂-၁၄) ဟန္နမည်သို့ခံစားခဲ့ရမည်ကို သင်မှန်းဆကြည့်နိုင်သလော။ အားပေးမှုရရှိဖို့ တဲတော်သို့သူလာခဲ့သည်။ ဣသရေလလူမျိုးတွင် ဩဇာအရှိဆုံးသူများထဲမှတစ်ဦး၏ မမှန်မကန်စွပ်စွဲမှုကိုခံရဖို့ သူအမှန်ပင်မျှော်လင့်ခဲ့မည်မဟုတ်ချေ!
အခြေအနေက ဟန္နကိုအလွန်စိတ်ဓာတ်ကျစေခဲ့သည်။ တဲတော်၌ယဇ်ပုရောဟိတ်မင်းအဖြစ် ဧလိအမှုထမ်းနေသမျှကာလပတ်လုံး ဘယ်သောအခါမျှပြန်မသွားတော့ဟု ကျိန်ဆိုလျက် သူသည် တဲတော်မှချက်ချင်းထွက်သွားနိုင်ခဲ့သည်။ သို့သော် ဟန္နသည် ယေဟောဝါနှင့်သူ၏ဆက်ဆံရေးကို လုံးလုံးလျားလျားတန်ဖိုးထားခဲ့သည်။ ထိုလမ်းစဉ်လိုက်ခဲ့လျှင် ကိုယ်တော်နှစ်သက်မည်မဟုတ်ကြောင်း သူသိရှိခဲ့သည်။ တဲတော်မှာ စစ်မှန်သောဝတ်ပြုရေး၏ဗဟိုဖြစ်ခဲ့သည်။ ယေဟောဝါသည် မိမိ၏နာမတော်ကို ထိုနေရာ၌တည်စေခဲ့သည်။ မစုံလင်သူဖြစ်လင့်ကစား ဧလိသည် ယေဟောဝါရွေးကောက်ထားသောကိုယ်စားလှယ်ဖြစ်၏။
ဧလိ၏စွပ်စွဲချက်ကို ဟန္န၏ဘုရားတရားကြည်ညိုသောတုံ့ပြန်မှုသည် မျက်မှောက်ခေတ်ကျွန်ုပ်တို့တွက် ပုံသက်သေကောင်းတစ်ခုဖြစ်သည်။ မိမိအားမှားယွင်းစွာစွပ်စွဲခဲ့ခြင်းကို သူအခွင့်မပေးခဲ့ချေ၊ သို့သော် အလွန်လေးစားသောနည်းဖြင့် တုံ့ပြန်ခဲ့သည်။ သူဤသို့ပြန်ဖြေခဲ့သည်– “မဟုတ်ပါအရှင်။ ကျွန်မသည် စိတ်ညှိုးငယ်သောမိန်းမဖြစ်ပါ၏။ စပျစ်ရည်ကိုမသောက်ပါ၊ သေရည်သေရက်ကိုမသောက်ပါ၊ ထာဝရဘုရားရှေ့တော်၌ စိတ်နှလုံးကိုသွန်းလောင်းလျက်နေပါ၏။ ကိုယ်တော်၏ကျွန်မကို အဓမ္မမိန်းမဟူ၍ မမှတ်ပါနှင့်။ မြည်တမ်းစရာအကြောင်း၊ ဝမ်းနည်းစရာအကြောင်းများသည်ဖြစ်၍၊ ယခုတိုင်အောင်လျှောက်နေပါသည်။”—၁ ဓမ္မရာဇဝင် ၁:၁၅၊ ၁၆။
ဟန္နသည်အချက်ကျကျပြောဆိုခဲ့သလော။ ဧကန်အမှန်ပင်။ သို့သော် ဧလိ၏မှားယွင်းသောစွပ်စွဲချက်အတွက် သူ့ကိုအတင့်ရဲစွာပြစ်တင်ဝေဖန်ခြင်းမပြုဘဲ လိမ္မာပါးနပ်စွာပြောဆိုခဲ့သည်။ တစ်ဖန် ဧလိသည် ကြင်နာစွာသူ့ကို ဤသို့တုံ့ပြန်ပြောဆိုခဲ့သည်– “ငြိမ်ဝပ်စွာသွားလော့။ ယခုဆုတောင်းသည်အတိုင်း ဣသရေလအမျိုး၏ဘုရားသခင် ပေးသနားတော်မူပါစေသော။” ကိစ္စရပ်ကိုဖြေရှင်းပြီးသည်နှင့် ဟန္နသည် “ခြားနားသောမျက်နှာနှင့်သွား၍ အစာစားလေ၏။”—၁ ဓမ္မရာဇဝင် ၁:၁၆-၁၈။
ဤမှတ်တမ်းမှ ကျွန်ုပ်တို့အဘယ်အရာသင်ယူရရှိသနည်း။ ဟန္နသည် နားလည်လွဲမှားမှုကို တည့်မတ်ရန် ချက်ချင်းလုပ်ဆောင်ခဲ့သည်၊ သို့သော် အလွန်ရိုသေစွာဖြင့်ဖြစ်သည်။ ရလဒ်အနေနှင့် သူသည် ယေဟောဝါ၊ ဧလိတို့နှင့် ကောင်းသောဆက်ဆံရေးကို ဆက်ထိန်းသိမ်းခဲ့သည်။ ကောင်းသောဆက်သွယ်ရေးနှင့် အနည်းငယ်သောလိမ္မာပါးနပ်မှုတို့သည် သေးငယ်သောပြဿနာများ ကြီးထွားမသွားအောင် ကာကွယ်ပေးလေ့ရှိသည်တကား!
အခြားသူတို့နှင့် သဘောထားကွဲလွဲမှုများကိုဖြေရှင်းရာတွင် နှစ်ဖက်စလုံးမှ နှိမ့်ချမှုနှင့် ပြောင်းသာလွှဲသာရှိမှုတို့လိုအပ်ကြောင်း အသိအမှတ်ပြုရမည်။ သဘောထားကွဲလွဲမှုကိုဖြေရှင်းရန် သင်၏ကြိုးပမ်းမှုကို ယုံကြည်သူချင်းတစ်ဦးက တုံ့ပြန်ဖို့ပျက်ကွက်ခဲ့လျှင် ကိစ္စရပ်ကို ယေဟောဝါ၏လက်တော်၌အပ်ကာ ကိုယ်တော့်အချိန်နှင့် ကိုယ်တော့်နည်းလမ်းတော်အတိုင်း ကိုင်တွယ်မည်ကို ယုံကြည်စိတ်ချနိုင်သည်။
လုပ်ငန်းတော်အခွင့်အရေးတစ်ခုကို သင်ဆုံးရှုံးဖူးသလော
အချို့က ဘုရားသခင့်လုပ်ငန်းတော်၌ မြတ်နိုးရသည့်အခွင့်အရေးတစ်ခုကို လက်လွှတ်ခဲ့ရခြင်းကြောင့် စိတ်ဓာတ်ကျလာကြသည်။ မိမိတို့၏ညီအစ်ကိုများအတွက် လုပ်ဆောင်ပေးရခြင်းကို သူတို့ပျော်ရွှင်ခဲ့ကြပြီး အခွင့်အရေးဆုံးရှုံးသောအခါ မိမိတို့သည် ယေဟောဝါ သို့မဟုတ် ကိုယ်တော့်အဖွဲ့အစည်းအတွက် အသုံးမကျတော့ဟု ခံစားရကြသည်။ ထိုသို့သင်ခံစားရလျှင် ယောဟန်မာကုဟူ၍လည်းခေါ်ဆိုသော ကျမ်းရေးသူမာကု၏ပုံနမူနာကိုသုံးသပ်ခြင်းအားဖြင့် ထိုးထွင်းသိမြင်မှုရရှိနိုင်သည်။—တမန်တော် ၁၂:၁၂။
ပေါလုနှင့် ဗာနဗတို့၏ ပထမခရစ်ယာန်သာသနာပြုခရီးစဉ်တွင် မာကုသည် သူတို့နှင့်အတူလိုက်ပါခဲ့သည်၊ သို့သော် ခရီးစဉ်လမ်းခုလတ်တွင် သူတို့ကိုထားခဲ့ကာ ယေရုရှလင်မြို့သို့ပြန်သွားခဲ့သည်။ (တမန်တော် ၁၃:၁၃) နောက်ပိုင်းတွင် ဗာနဗသည် အခြားခရီးစဉ်တစ်ခု၌ မာကုကိုမိမိတို့နှင့်အတူခေါ်သွားလိုခဲ့သည်။ သို့သော် သမ္မာကျမ်းစာက ဤသို့ဆို၏– “ပေါလုက၊ ပံဖုလိပြည်၌ သူတို့နှင့်ခွာ၍ အမှုထမ်းရာသို့မလိုက်မသွားသောထိုသူကို မခေါ်သင့်ဟုသဘောရှိ၏။” ဗာနဗကသဘောမတူပေ။ “ထိုအကြောင်းနှင့် [ပေါလုနှင့် ဗာနဗ] အချင်းချင်းမသင့်သဖြင့် တခြားစီသွား၍၊ ဗာနဗသည် မာကုကိုခေါ်ပြီးလျှင် ကုပရုကျွန်းသို့လွှင့်လေ၏။ . . . ပေါလု . . . သည် သိလကိုရွေးချယ်ပြီးလျှင်ထွက်” သွားသည်ဟု မှတ်တမ်းကဆက်ဖော်ပြ၏။—တမန်တော် ၁၅:၃၆-၄၀။
ရိုသေလေးစားရသော တမန်တော်ပေါလုက မိမိနှင့်အတူမလုပ်ဆောင်လိုကြောင်း၊ မိမိ၏အရည်အချင်းနှင့်ပတ်သက်၍ အငြင်းပွားမှုက ပေါလုနှင့်ဗာနဗတို့ကိုစိတ်ဝမ်းကွဲစေခဲ့ကြောင်း သိရှိရခြင်းကြောင့် မာကုသည် ဝမ်းနည်းပက်လက်ဖြစ်ခဲ့မည်မှာမလွဲပေ။ သို့သော် ထိုမျှနှင့်ဇာတ်လမ်းမဆုံးသေးပါ။
ပေါလုနှင့် သိလတို့မှာ ခရီးသွားဖော်တစ်ဦး လိုအပ်ကြဆဲဖြစ်သည်။ လုတ္တရမြို့သို့သူတို့ရောက်သောအခါ မာကုနေရာကိုအစားထိုးဖို့ တိမောသေအမည်ရှိ လူငယ်တစ်ဦးကို သူတို့တွေ့ရှိခဲ့ကြသည်။ ယခု တိမောသေရွေးချယ်ခံရချိန်တွင် သူနှစ်ခြင်းခံပြီးသည်မှာ နှစ်နှစ်သုံးနှစ်သာရှိပေမည်။ တစ်ဖက်တွင်မူ မာကုသည် ခရစ်ယာန်အသင်းတော်နှင့် ပူးပေါင်းခဲ့သည်မှာ အသင်းတော်တည်ထောင်စကတည်းကဖြစ်သည်—အမှန်မှာ ပေါလုထက်ပင်ပို၍ကြာခဲ့ပြီ။ သို့တိုင် အခွင့်အရေးအပ်နှင်းခံရသူမှာ တိမောသေဖြစ်သည်။—တမန်တော် ၁၆:၁-၃။
သူ့အစား အသက်ပိုငယ်၊ အတွေ့အကြုံပို၍နည်းသူတစ်ဦးကို အစားထိုးလိုက်ကြောင်း သိရသောအခါ မာကုမည်သို့တုံ့ပြန်ခဲ့သနည်း။ သမ္မာကျမ်းစာကမဖော်ပြပါ။ သို့သော် မာကုသည် ယေဟောဝါ၏လုပ်ငန်းတော်၌ ဆက်၍တက်ကြွစွာပါဝင်ခဲ့ကြောင်းဖော်ပြသည်။ ရနိုင်သည့်အခွင့်အရေးများကို သူရယူခဲ့သည်။ ပေါလု၊ သိလတို့နှင့်အတူ သူအမှုမထမ်းနိုင်ခဲ့သော်လည်း ဗာနဗ၏ဇာတိနယ်မြေဖြစ်သော ကုပရုကျွန်းသို့ ဗာနဗနှင့်အတူခရီးထွက်နိုင်ခဲ့သည်။ ထို့ပြင် မာကုသည် ဗာဗုလုန်မြို့တွင် ပေတရုနှင့်အတူအမှုထမ်းခဲ့သည်။ အဆုံး၌ ရောမမြို့တွင် ပေါလု—နှင့်တိမောသေ—တို့နှင့်အတူ လုပ်ဆောင်ခွင့်ရရှိခဲ့သည်။ (ကောလောသဲ ၁:၁; ၄:၁၀; ၁ ပေတရု ၅:၁၃) နောက်ပိုင်းတွင် မာကုသည် ခရစ်ဝင်ကျမ်းလေးစောင်မှ တစ်စောင်ကိုရေးသားရန် မှုတ်သွင်းခြင်းပင်ခံခဲ့ရသည်တကား!
၎င်းတို့အားလုံးတွင် အဖိုးတန်သင်ခန်းစာတစ်ခုရှိသည်။ မာကုသည် သူလက်လှမ်းမီနိုင်ဆဲရှိသော အခွင့်အရေးများကို တန်ဖိုးထားရန်ပျက်ကွက်သည်အထိ လက်လွတ်ဆုံးရှုံးသွားသည့် အခွင့်အရေးနှင့်ပတ်သက်၍ အလွန်ရတက်မအေးမဖြစ်ခဲ့ချေ။ မာကုသည် ယေဟောဝါ၏လုပ်ငန်းတော်၌ အလုပ်များနေခဲ့ပြီး သူ့ကိုယေဟောဝါကောင်းချီးပေးခဲ့သည်။
ထို့ကြောင့် အခွင့်အရေးတစ်ခုကို သင်လက်လွတ်ဆုံးရှုံးခဲ့လျှင် စိတ်ဓာတ်မကျပါနှင့်။ အပြုသဘောထားရှိကာ အလုပ်များနေမည်ဆိုလျှင် အခြားအခွင့်အရေးများကို ရရှိနိုင်ပေမည်။ သခင်ဘုရား၏အမှုတော်၌ လုပ်ဆောင်စရာများစွာရှိပါသည်။—၁ ကောရိန္သု ၁၅:၅၈။
တည်ကြည်သောကျေးကျွန်တစ်ဦး စိတ်ပျက်အားလျော့ခဲ့
ယုံကြည်ခြင်းအတွက် ကြိုးစားတိုက်လှန်ရန် မလွယ်ကူချေ။ တစ်ခါတစ်ရံ သင်စိတ်ပျက်အားလျော့လာပေမည်။ ထို့ပြင် ဘုရားသခင်၏တည်ကြည်သောကျေးကျွန်တစ်ဦးသည် ထိုနည်းအတိုင်းမဖြစ်သင့်ဟုယူမှတ်ကာ စိတ်ပျက်အားလျော့နေခြင်းနှင့်ပတ်သက်၍ အပြစ်ရှိသည်ဟုပင်ခံစားရနိုင်သည်။ ဣသရေလနိုင်ငံ၏ ထင်ရှားသောပရောဖက်တစ်ပါးဖြစ်သူ ဧလိယ၏အဖြစ်ကိုစဉ်းစားကြည့်ပါ။
ဗာလယဇ်ပုရောဟိတ်များကို ဧလိယသတ်လိုက်ကြောင်း တစ်ယူသန်ဗာလဝတ်ပြုရေးကိုမြှင့်တင်ပေးသူ ဣသရေလနိုင်ငံ၏မိဖုရားယေဇဗေလသိရှိသောအခါ သူ့ကိုသတ်ပစ်ဖို့ကျိန်ဆိုခဲ့သည်။ ဧလိယသည် ယေဇဗေလထက် သာ၍ကြီးမားသောရန်သူများနှင့် ရင်ဆိုင်ခဲ့ဖူးသည်၊ သို့သော် သူသည် ရုတ်တရက် အလွန်စိတ်ပျက်အားလျော့လာပြီး သေလိုစိတ်ပေါ်ခဲ့သည်။ (၃ ဓမ္မရာဇဝင် ၁၉:၁-၄) မည်သို့ဖြစ်နိုင်သနည်း။ သူတစ်စုံတစ်ခုကိုမေ့လျော့ခဲ့ပြီ။
ဧလိယသည် မိမိ၏ခွန်အားရင်းမြစ်အဖြစ် ယေဟောဝါထံမျှော်ကိုးဖို့ မေ့လျော့ခဲ့သည်။ သေသူကိုရှင်ပြန်စေရန်နှင့် ဗာလယဇ်ပုရောဟိတ်များအား ရင်ဆိုင်ရန်ခွန်အားကို ဧလိယအား မည်သူပေးခဲ့ပြီနည်း။ ယေဟောဝါပင်။ သေချာပါသည်၊ မိဖုရားယေဇဗေလ၏ အမျက်ဒေါသကိုရင်ဆိုင်ဖို့ခွန်အားကို ယေဟောဝါပေးနိုင်ပါသည်။—၃ ဓမ္မရာဇဝင် ၁၇:၁၇-၂၄; ၁၈:၂၁-၄၀; ၂ ကောရိန္သု ၄:၇။
မည်သူမဆို ယေဟောဝါ၌ယုံကြည်ကိုးစားခြင်းတွင် ခေတ္တခဏ ယိမ်းယိုင်သွားနိုင်သည်။ တစ်ခါတစ်ရံ သင်သည် ဧလိယကဲ့သို့ ပြဿနာတစ်ခုကိုဖြေရှင်းရန် “အထက်မှသက်ရောက်သောပညာ” ကိုအသုံးပြုမည့်အစား လူ့အမြင်ဖြင့်ရှုမြင်နိုင်သည်။ (ယာကုပ် ၃:၁၇) သို့ရာတွင် ယေဟောဝါသည် ခေတ္တသတိလစ်ဟင်းခြင်းအတွက် ဧလိယကိုမစွန့်ပစ်ခဲ့ချေ။
ဧလိယသည် ဗေရရှေဘမြို့သို့၊ ထို့နောက် သူ့ကိုအဘယ်သူမျှမတွေ့နိုင်ဟု သူယူမှတ်သည့်တောထဲသို့ ထွက်ပြေးခဲ့သည်။ သို့သော် ယေဟောဝါသူ့ကိုရှာတွေ့ခဲ့၏။ သူ့ကိုနှစ်သိမ့်ရန် ကောင်းကင်တမန်တစ်ပါးကို ကိုယ်တော်စေလွှတ်ခဲ့သည်။ ကောင်းကင်တမန်သည် ဧလိယစားဖို့ လတ်လတ်ဆတ်ဆတ် ဖုတ်ထားသောမုန့်နှင့် သောက်ဖို့လန်းဆန်းစေသောရေကို အသေအချာစီစဉ်ပေးခဲ့သည်။ ဧလိယအနားယူပြီးနောက် ကောင်းကင်တမန်သည် မိုင် ၂၀၀ နီးပါးဝေးသော ဟောရပ်တောင်သို့သွားရန် သူ့ကိုညွှန်ကြားခဲ့သည်၊ ထိုတွင် ယေဟောဝါ၏ထပ်ဆင့်ခွန်အားပေးမှုကို သူရရှိမည်ဖြစ်သည်။—၃ ဓမ္မရာဇဝင် ၁၉:၅-၈။
ဟောရပ်တောင်တွင် ဧလိယသည် ယုံကြည်ခြင်းကိုခိုင်ခံ့စေသော ယေဟောဝါ၏တန်ခိုးတော်ပြကွက်တစ်ခုကို ကိုယ်တိုင်မြင်တွေ့ခဲ့သည်။ ထို့နောက် သူတစ်ဦးတည်းမဟုတ်ကြောင်း ဖြည်းညင်းသောအသံဖြင့် သူ့ကို ယေဟောဝါစိတ်ချစေခဲ့သည်။ ယေဟောဝါသူနှင့်အတူရှိပြီး ဧလိယမသိရှိသော်လည်း သူ့ညီအစ်ကို ၇,၀၀၀ လည်းသူနှင့်အတူရှိခဲ့သည်။ နောက်ဆုံးတွင် သူလုပ်ဆောင်ရန်အလုပ်ကို ယေဟောဝါပေးအပ်ခဲ့သည်။ မိမိ၏ပရောဖက်အဖြစ်မှ ဧလိယကိုကိုယ်တော်မပစ်ပယ်ခဲ့ချေ။—၃ ဓမ္မရာဇဝင် ၁၉:၁၁-၁၈။
အကူအညီရနိုင်
တစ်ခါတစ်ရံ တော်သင့်ရုံစိတ်ပျက်အားလျော့ခြင်းကို သင်ကြုံတွေ့ရလျှင် ပို၍အနားယူခြင်း သို့မဟုတ် အာဟာရဖြစ်စေသောအစာ စားသုံးမည်ဆိုပါက သက်သာသည်ကိုတွေ့ရှိရပေမည်။ အိပ်ရေးဝဝအိပ်ပြီးနောက်တွင် ကြီးမားသောပြဿနာများသည် အတော်ပင်သေးငယ်သွားသည်ဟုထင်ရလေ့ရှိကြောင်း ၁၉၇၇ တွင် သူကွယ်လွန်ချိန်အထိ ယေဟောဝါသက်သေများ၏ အုပ်ချုပ်ရေးအဖွဲ့ဝင်တစ်ဦးအဖြစ်အမှုထမ်းခဲ့သူ နေသန် အိပ်ချ်. နောရ်က တစ်ကြိမ်တွင် သတိပြုမိခဲ့သည်။ သို့သော် ပြဿနာကြာရှည်တည်ရှိသောအခါ ယင်းကုစားနည်းဖြင့်မလုံလောက်နိုင်ပါ—စိတ်ပျက်အားလျော့ခြင်းကို သင်တိုက်လှန်ဖို့ အကူအညီလိုအပ်မည်။
ယေဟောဝါသည် ဧလိယကိုခွန်အားပေးဖို့ ကောင်းကင်တမန်တစ်ပါးကို စေလွှတ်ခဲ့သည်။ ယနေ့ ဘုရားသခင်သည် အကြီးအကဲများနှင့် အခြားရင့်ကျက်သောခရစ်ယာန်များမှတစ်ဆင့် အားပေးမှုကို ပြင်ဆင်ပေးသည်။ အကြီးအကဲများသည် အမှန်ပင် “လေလုံ၍မိုးသက်မုန်တိုင်းကွယ်ရာအရပ်ကဲ့သို့” ဖြစ်နိုင်သည်။ (ဟေရှာယ ၃၂:၁၊ ၂) သို့သော် သူတို့ထံမှအားပေးမှုရရှိရန် သင်အစပြုလုပ်ဆောင်ဖို့လိုပေမည်။ ဧလိယသည် စိတ်ပျက်အားလျော့ခဲ့သော်လည်း ယေဟောဝါထံမှညွှန်ကြားချက်ရရှိဖို့ ဟောရပ်တောင်သို့သွားခဲ့သည်။ ခွန်အားရှိစေသောညွှန်ကြားချက်များကို ခရစ်ယာန်အသင်းတော်မှတစ်ဆင့် ကျွန်ုပ်တို့ရရှိကြသည်။
အကူအညီရယူပြီး စိတ်နာကျင်ခြင်း သို့မဟုတ် အခွင့်အရေးများလက်လွှတ်ဆုံးရှုံးခြင်းစသည့် စမ်းသပ်မှုများကို ကျွန်ုပ်တို့ရဲရဲဝံ့ဝံ့ရင်ဆိုင်သောအခါ အရေးကြီးသောကိစ္စတစ်ရပ်တွင် ယေဟောဝါဘက်မှရပ်တည်ကြသည်။ အဘယ်ကိစ္စနည်း။ စာတန်က လူသားများသည် ကိုယ်ကျိုးအတွက်သာ ယေဟောဝါအားဝတ်ပြုကြသည်ဟု အခိုင်အမာဆိုခဲ့သည်။ ကျွန်ုပ်တို့ဘဝတွင် အရာရာအဆင်ပြေသောအခါ ဘုရားသခင်အားဝတ်ပြုကြမည်ကို စာတန်မငြင်းပါ၊ သို့သော် ကျွန်ုပ်တို့သည် ပြဿနာများကြုံတွေ့ရသောအခါ ဘုရားသခင်အားဝတ်ပြုခြင်းကို ရပ်တန့်သွားမည်ဟု သူအခိုင်အမာဆိုသည်။ (ယောဘအခန်းကြီး ၁ နှင့် ၂) စိတ်ပျက်အားလျော့သည့်ကြားမှ ယေဟောဝါ၏လုပ်ငန်းတော်ကို မယိမ်းမယိုင်ဆက်၍ ထမ်းဆောင်ခြင်းအားဖြင့် ကျွန်ုပ်တို့သည် စာတန်၏သွားပုပ်လေလွင့်စွပ်စွဲချက်ကိုဖြေဆိုရန် ထောက်ကူနိုင်ကြသည်။—သု. ၂၇:၁၁။
ဟန္န၊ မာကုနှင့် ဧလိယတို့အားလုံး သူတို့၏ပျော်ရွှင်မှုကို ခေတ္တလုယူသွားသော ပြဿနာများရှိခဲ့ကြသည်။ သို့သော် သူတို့၏ပြဿနာများကို အောင်မြင်ကျော်လွှားခဲ့ကြပြီး အကျိုးဖြစ်ထွန်းစေသောဘဝများဖြစ်စေခဲ့ကြသည်။ အသင်လည်း ယေဟောဝါ၏အကူအညီဖြင့် စိတ်ပျက်အားလျော့ခြင်းကို အောင်မြင်ကျော်လွှားနိုင်ပါသည်!