အဖြေရဖို့ ဘယ်လို ဆုတောင်းနိုင်သလဲ

ယေရှုရဲ့ နာမည်ကတစ်ဆင့် ယေဟောဝါဘုရားဆီ ဆုတောင်းပါ

“အဖဘုရားက ခင်ဗျားတို့ တောင်းသမျှ ကျွန်တော့်နာမည်ကို ထောက်ပြီး ပေးသနားလိမ့်မယ်။”—ယောဟန် ၁၆:၂၃။

ယေဟောဝါဘုရားက ယေရှုခရစ်ရဲ့ နာမည်ကတစ်ဆင့် ဆုတောင်းစေချင်မှန်း ယေရှုရဲ့ စကားတွေကနေ ရှင်းရှင်းလင်းလင်း သိရတယ်။ ရုပ်တုတွေ၊ သူတော်စင်တွေ၊ ကောင်းကင်တမန်တွေ၊ သေသွားတဲ့ ဘိုးဘေးတွေကနေတစ်ဆင့် မတောင်းစေချင်ဘူး။ ယေရှုရဲ့ နာမည်ကတစ်ဆင့် ဘုရားသခင်ဆီ ဆုတောင်းတာက ယေရှုရဲ့ အရေးပါတဲ့ အခန်းကဏ္ဍကို အသိအမှတ်ပြုရာရောက်တယ်။ “ကျွန်တော့်ကို မဖြတ်သန်းဘဲ ဘယ်သူမှ အဖဘုရားဆီ မရောက်နိုင်ဘူး” လို့ ယေရှု ပြောခဲ့တယ်။—ယောဟန် ၁၄:၆။

ရင်ဖွင့်ဆုတောင်းပါ

“ဘုရားကို ရင်ဖွင့်ကြပါ။”—ဆာလံ ၆၂:၈။

ယေဟောဝါဆီ ဆုတောင်းတဲ့အခါ မေတ္တာရှိတဲ့ အဖေတစ်ယောက်နဲ့ စကားပြောသလို ပြောသင့်တယ်။ ဆုတောင်းစာအုပ်ထဲက ဖတ်ပြတာမျိုး၊ အလွတ်ရနေတာကို ရွတ်ပြတာမျိုး မလုပ်ဘဲ ရင်ထဲက လာတဲ့ စကားတွေကို လေးလေးစားစား ပြောသင့်တယ်။

ဘုရားသခင့် အလိုတော်နဲ့အညီ ဆုတောင်းပါ

“အလိုတော်နဲ့အညီ ဆုတောင်းမယ်ဆိုရင် ဘုရား နားထောင်မယ်ဆိုတာ စိတ်ချတယ်။”—၁ ယောဟန် ၅:၁၄။

သမ္မာကျမ်းစာထဲမှာ ကျွန်တော်တို့အတွက် ယေဟောဝါဘုရား လုပ်ပေးမယ့်အရာတွေ၊ ကျွန်တော်တို့ကို လုပ်စေချင်တဲ့အရာတွေ ရေးထားတယ်။ ဘုရားသခင် လက်ခံတဲ့ ဆုတောင်းချက်တွေ ဖြစ်ဖို့ဆိုရင် “အလိုတော်နဲ့အညီ” ဆုတောင်းဖို့ လိုတယ်။ ဘုရားသခင့် အလိုတော်အကြောင်း ကောင်းကောင်း သိဖို့ ကျမ်းစာကို လေ့လာရမယ်။ ဘုရားသခင်ကို သိကျွမ်းပြီး အလိုတော်နဲ့အညီ ဆုတောင်းမယ်ဆိုရင် ကျွန်တော်တို့ရဲ့ ဆုတောင်းချက်တွေကို ဘုရား နားထောင်မယ်။

ဘာအတွက် ဆုတောင်းနိုင်သလဲ

ကိုယ့်ရဲ့ လိုအပ်ရာတွေအတွက် ဆုတောင်းပါ။ အခြေခံလိုအပ်ရာတွေ ဖြစ်တဲ့ စားစရာ၊ ဝတ်စရာ၊ နေစရာအတွက် ဆုတောင်းနိုင်တယ်။ မှန်ကန်တဲ့ ဆုံးဖြတ်ချက်တွေ ချနိုင်တဲ့ ဉာဏ်ပညာ ရဖို့၊ အခက်အခဲတွေကို ခံရပ်နိုင်တဲ့ ခွန်အား ရဖို့ ဆုတောင်းနိုင်တယ်။ ယုံကြည်ခြင်း ရှိဖို့၊ ခွင့်လွှတ်ခံရဖို့၊ ဘုရားအကူအညီ ရဖို့လည်း ဆုတောင်းနိုင်တယ်။—လုကာ ၁၁:၃၊ ၄၊ ၁၃။ ယာကုပ် ၁:၅၊ ၁၇။

တခြားသူတွေအတွက် ဆုတောင်းပါ။ သားသမီးတွေ တစ်ယောက်နဲ့ တစ်ယောက် ချစ်ချစ်ခင်ခင် ရှိတာကို တွေ့တဲ့အခါ မိဘတွေ ပျော်တယ်။ ယေဟောဝါလည်း မြေကြီးပေါ်မှာ ရှိတဲ့ မိမိရဲ့ သားသမီးတွေကို ချစ်ချစ်ခင်ခင် ရှိစေချင်တယ်။ ဒါကြောင့် ကိုယ့်ရဲ့ အိမ်ထောင်ဖက်နဲ့ သားသမီးတွေ၊ မိသားစုဝင်တွေ၊ မိတ်ဆွေတွေအတွက် ဆုတောင်းပေးနိုင်တယ်။ “အချင်းချင်းအတွက် ဆုတောင်းပေးကြပါ” လို့ တပည့်ဖြစ်သူ ယာကုပ် ရေးခဲ့တယ်။—ယာကုပ် ၅:၁၆။

ကျေးဇူးတင်ကြောင်း ပြောပါ။ ဖန်ဆင်းရှင်နဲ့ပတ်သက်ပြီး သမ္မာကျမ်းစာမှာ ဒီလိုပြောတယ်– “ဘုရားသခင်က ခင်ဗျားတို့ကို အစားအစာ အလျှံပယ် ပေးဖို့၊ ရွှင်လန်းဝမ်းမြောက်စေဖို့ မိုးကောင်းကင်ကနေ မိုးရွာစေတယ်၊ အသီးအနှံတွေ ဖြစ်ထွန်းစေတဲ့ ရာသီဥတုကို ပေးတယ်။” (တမန်တော် ၁၄:၁၇) ကျွန်တော်တို့အတွက် ဘုရားသခင် လုပ်ပေးရာတွေကို စဉ်းစားတဲ့အခါ ဆုတောင်းချက်မှာ ဘုရားသခင်ကို ကျေးဇူးတင်ကြောင်း ပြောဖို့ လှုံ့ဆော်ခံရတယ်။ ကျေးဇူးတင်တယ်ဆိုတာကို ကျွန်တော်တို့ရဲ့ အသက်ရှင်နေထိုင်ပုံနဲ့လည်း ဖော်ပြသင့်တယ်။—ကောလောသဲ ၃:၁၅။

စိတ်ရှည်ပါ၊ ဆက်ဆုတောင်းနေပါ

စိတ်ရင်းမှန်နဲ့ တောင်းတဲ့ ဆုတောင်းချက်တွေ ချက်ချင်း အဖြေ မရတဲ့အခါမျိုးမှာ စိတ်ဓာတ်ကျနိုင်တယ်။ အဲဒါက ကျွန်တော်တို့ကို ဘုရားသခင် စိတ်မဝင်စားဘူးဆိုတဲ့ အဓိပ္ပာယ်လား။ မဟုတ်ပါဘူး။ ဆက်ဆုတောင်းဖို့ လိုကြောင်း ဖော်ပြတဲ့ အောက်ပါတွေ့ကြုံမှုတွေကို သုံးသပ်ကြည့်ပါ။

ရှေ့ဆောင်းပါးမှာ ပါတဲ့ စတိဗ် ဒီလိုပြောတယ်– “ကျွန်တော်သာ ဆက်ဆုမတောင်းခဲ့ဘူးဆိုရင် ဘဝကို အရှုံးပေးလိုက်တာ ကြာပြီ။” ဘာကြောင့် အရှုံးမပေးခဲ့တာလဲ။ သမ္မာကျမ်းစာကို သူလေ့လာတဲ့အခါ ဆုတောင်းရမယ်၊ ဇွဲမလျှော့ဘဲ ဆုတောင်းရမယ်ဆိုတာ သိခဲ့လို့ပဲ။ “မိတ်ဆွေတွေဆီက ရတဲ့ မေတ္တာပါ ထောက်မမှုအတွက် ဘုရားသခင်ကို ကျေးဇူးတင်ကြောင်း ဆုတောင်းပြောပြတယ်။ အခု ကျွန်တော် အရင်ကထက် ပိုပျော်လာပြီ” လို့ စတိဗ် ပြောတယ်။

ဘုရားသခင်ဆီ ဆုတောင်းဖို့ မထိုက်တန်ဘူးဆိုပြီး ခံစားခဲ့ရတဲ့ ဂျဲနီကော။ “ကျွန်မ တော်တော် စိတ်ဓာတ်ကျနေတဲ့အချိန်မှာ တန်ဖိုးမရှိဘူးလို့ ဘာကြောင့် ခံစားရသလဲဆိုတာ သိအောင် ကူညီပေးပါဆိုပြီး ဆုတောင်းခဲ့တယ်။” ဘယ်လို အကူအညီ ရခဲ့သလဲ။ “ဆုတောင်းလိုက်တဲ့အခါ ကျွန်မ ကိုယ့်ကိုယ်ကိုယ် မြင်သလို ဘုရား မမြင်ဘူးဆိုတာ နားလည်လာတယ်။ လက်မလျှော့ဘဲ ဆက်ကြိုးစားဖို့လည်း ကူညီပေးခဲ့တယ်။” ဘာအကျိုး ရခဲ့သလဲ။ “ယေဟောဝါဟာ တကယ် တည်ရှိတယ်၊ မေတ္တာရှိပြီး ဂရုစိုက်စောင့်ရှောက်တတ်တဲ့ ဘုရား၊ ဖခင်၊ မိတ်ဆွေဆိုတာ သိမြင်လာတယ်။ ဘုရား လုပ်စေချင်တာကို ကြိုးစားပြီး လုပ်နေသ၍ ကျွန်မကို ကူညီပေးဖို့ အမြဲ အသင့်ရှိနေတယ် ဆိုတာကိုလည်း သိလာတယ်။”

အစ္စဘဲလ်ရဲ့ တွေ့ကြုံမှုကိုလည်း သုံးသပ်ကြည့်ပါ။ သူ ကိုယ်ဝန်ရှိလာတဲ့အခါ ဆရာဝန်က မသန်မစွမ်းလေး မွေးလာမယ်လို့ ပြောတယ်။ သူ တော်တော် ဝမ်းနည်းသွားတယ်။ ကိုယ်ဝန်ဖျက်ချဖို့ တချို့က အကြံပေးကြတယ်။ “စိတ်ဆင်းရဲလွန်းလို့ သေမတတ် ခံစားခဲ့ရတယ်။” သူ ဘာလုပ်ခဲ့သလဲ။ “အကူအညီ ရဖို့ ဘုရားသခင်ဆီ ဆုတောင်းပြီးရင်း ဆုတောင်းခဲ့တယ်” လို့ သူပြောပြတယ်။ နောက်တော့ မသန်မစွမ်းသားလေး ဂျဲရတ် မွေးလာတယ်။ ဆုတောင်းချက်တွေကို ဘုရား အဖြေပေးတယ်လို့ အစ္စဘဲလ် ခံစားခဲ့ရသလား။ ခံစားခဲ့ရပါတယ်။ “အခု ကျွန်မသား အသက် ၁၄ နှစ် ရှိပြီ။ မသန်စွမ်းပေမဲ့ ပျော်ရွှင်နေတဲ့ သားကို မြင်ရတဲ့အခါ ကျွန်မရဲ့ ဆုတောင်းချက်တွေကို ဘုရား အကောင်းဆုံး အဖြေပေးတယ်ဆိုတာ သိလာတယ်။ ကျွန်မသားက ယေဟောဝါဘုရား ပေးတဲ့ တကယ့် ကောင်းချီးပါပဲ” လို့ အစ္စဘဲလ် ပြောတယ်။

အထက်ပါ ရင်တွင်းခံစားချက်တွေက ဆာလံကျမ်းမှာ ပါတဲ့ ဒီစကားတွေကို သတိရစေတယ်– “အို ယေဟောဝါ၊ ကိုယ်တော်က စိတ်နူးညံ့သူတွေရဲ့ တောင်းဆိုချက်ကို ကြားလိမ့်မယ်။ သူတို့စိတ်နှလုံးကို ခိုင်ခံ့စေပြီး သူတို့စကားကို အာရုံစိုက်ပေးလိမ့်မယ်။” (ဆာလံ ၁၀:၁၇) ဆက်ဆုတောင်းနေဖို့ အားပေးမှု ဖြစ်စေတဲ့ ကျမ်းချက်ပါပဲ။

ကျမ်းစာထဲမှာ ယေရှုရဲ့ ဆုတောင်းချက်တွေကို မှတ်တမ်းတင်ထားတယ်။ တပည့်တွေကို သင်ပေးခဲ့တဲ့ ဆုတောင်းချက်ကတော့ လူသိအများဆုံးပါပဲ။ အဲဒီကနေ ဘာသင်ယူနိုင်သလဲ။