ဘုရားသခင်၏နိုင်ငံတော်နှင့် ဖြောင့်မတ်ခြင်းကို ဆက်ရှာလေ

“ဘုရားသခင်၏နိုင်ငံတော်နှင့် ဖြောင့်မတ်ခြင်းတရားတော်ကို ရှေ့ဦးရှာကြလော့။ နောက်မှ ထိုအရာများကို ထပ်၍ပေးတော်မူလတ္တံ့။”—မဿဲ ၆:၃၃။

၁၊ ၂။ ကောင်းမှုကိုယ်နှိုက်ကို ကျမ်းပြုဆရာနှင့်ဖာရိရှဲများ မည်သို့ဖြစ်စေသနည်း။ တပည့်နောက်လိုက်များအား အဘယ်သတိပေးချက်ကို ယေရှုပေးခဲ့သနည်း။

ဘု ရားသခင်၏လမ်းစဉ်မဟုတ်သည့် ကိုယ်ပိုင်လမ်းစဉ်ဖြင့် ဖြောင့်မတ်ဖို့ ကျမ်းပြုဆရာနှင့်ဖာရိရှဲများ ကြိုးစားကြသည်။ ထိုမျှသာမက ကောင်းမှုများကို သူတို့ပြုသည့်တိုင် လူမြင်ကောင်းရန်အတွက် ယင်းကောင်းမှုတို့ကို ဟန်ဆောင်ပြုမူလေ့ရှိကြသည်။ သို့ဖြင့် ဘုရားသခင့်အမှုတော်ကို သူတို့မထမ်း၊ မိမိဂုဏ်ကိုသာ ဖော်ကျူးနေကြ၏။ ဤဟန်ဆောင်မှုအကြောင်း တပည့်တော်များကို ယေရှုသတိပေးခဲ့သည်။ “လူများတို့မြင်စေခြင်းငှာ ကိုယ်သီလအကျင့်ကို သူ့ရှေ့မှောက်၌မကျင့်မည်အကြောင်း သတိပြုကြလော့။ သို့မဟုတ် ကောင်းကင်ဘုံ၌ရှိတော်မူသော သင်တို့အဘထံမှ အကျိုးကိုမခံမရကြ။”—မဿဲ ၆:၁။

^၂ ဆင်းရဲသားများအားပေးကမ်းသူတို့ကို ယေဟောဝါချီးမွမ်းသည်မှန်သော်လည်း ဖာရိရှဲများနည်းတူပေးကမ်းသူတို့ကို မချီးကျူးပါ။ သူတို့ကိုအတုမယူရန် ယေရှုသတိပေးပါသည်။ “ထိုကြောင့်သင်သည်အလှူဒါနကိုပေးသောအခါ လျှို့ဝှက်သောသူတို့သည် လူများအချီးမွမ်းကိုခံလို၍ ပွဲသဘင်လမ်းခရီး၌ မိမိတို့ရှေ့မှာ တံပိုးခရာမှုတ်စေသည်နည်းတူ မပြုနှင့်။ ငါအမှန်ဆိုသည်ကား ထိုသူတို့သည် မိမိတို့အကျိုးကို [အပြည့်] ရကြပြီ။”—မဿဲ ၆:၂။

၃။ (က) ကျမ်းပြုဆရာနှင့်ဖာရိရှဲများ မည်သို့အပြည့်ပေးဆပ်ခံရပြီးပြီနည်း။ (ခ) အလှူဒါနပေးခြင်းနှင့်ပတ်သက်၍ ယေရှု၏ ရှုမြင်ချက်ကား မည်သို့ထူးခြားသနည်း။

^၃ ‘မိမိတို့အကျိုးကို အပြည့်ရကြပြီ’ (အပဲခို) ဟုပြန်ဆိုနိုင်သည့် ဂရိစကားလုံးသည် စီးပွားရေးဆိုင်ရာပြေစာများ၌ အများအားဖြင့်အသုံးပြုလေ့ရှိသည်။ ယင်းကို တောင်ပေါ်ဒေသနာတွင်အသုံးပြုထားခြင်းက “မိမိတို့အကျိုးကိုရကြပြီ” ဖြစ်ကြောင်း၊ ဆိုလိုသည်ကား “သူတို့အကျိုးခံစားရာပြေစာကို လက်မှတ်ရေးထိုးပြီးပြီ၊ ပြေစာရရှိနှင့်ပြီးသကဲ့သို့ပင် အကျိုးရရှိခွင့်ကိုခံစားရပြီဖြစ်သည်။” (ဒဘလျူအီးဗိုင်း၏ An Expository Dictionary of New Testament Words ) ဆင်းရဲသားများအားပေးကမ်းမည်ဟု လူသိရှင်ကြားကတိပြုတတ်ကြသည်။ တရားဇရပ်တွင် လှူဒါန်းသူများ၏အမည်ကို ကြေညာလေ့ရှိသည်။ များများပေးကမ်းသူတို့ကို ဝတ်ပြုကိုးကွယ်ချိန်တွင် ရဗ္ဗိဆရာများဘေး၌ ထိုင်ခုံပေးခြင်းဖြင့် အထူးဂုဏ်ပြုပါသည်။ လူမြင်ကောင်းအောင် သူတို့ပေးကမ်းကြ၏၊ တွေ့မြင်သူတို့ကလည်း သူတို့အား ဂုဏ်တင်ချီးမွမ်းကြသည်။ သို့ဖြစ်၍ သူတို့၏ပေးကမ်းခြင်းမှရသော အကျိုးပြေစာကို “အပြည့်ပေးဆပ်ပြီးပြီ” ဟုရေးမှတ်နိုင်ပါသည်။ ယေရှု၏သဘောထားမှာမူမည်မျှခြားနားလှသည်တကား။ အလှူဒါနပေးကြောင်းကို “မထင်ရှားစေ”နှင့်။ “မထင်ရှားသောအရာကို မြင်တော်မူသော သင်၏အဘသည် အကျိုးကို ထင်ရှားစွာ ပေးတော်မူလတ္တံ့။”—မဿဲ ၆:၃၊ ၄။ သု၊ ၁၉:၁၇။

ဘုရားသခင်နှစ်သက်တော်မူသော ဆုပတ္ထနာများ

၄။ ဖာရိရှဲများ၏ဆုပတ္ထနာကား မည်သို့ဖြစ်သဖြင့် ထိုသူများအား လျှို့ဝှက်သောသူတို့ဟု ယေရှု ခေါ်ရခြင်းဖြစ်သနည်း။

^၄ ကိုယ်တော်ထံတောင်းသည့် ဆုပတ္ထနာများကို ယေဟောဝါနှစ်သက်တော်မူသော်လည်း ဖာရိရှဲများ၏ဆုပတ္ထနာကိုကား မနှစ်မြို့ပါ။ တပည့်တော်များအား ယေရှုဤသို့မှာကြားသည်။ “သင်သည် ဆုတောင်းပတ္ထနာပြုသောအခါ လျှို့ဝှက်သောသူတို့နည်းတူမပြုနှင့်။ ထိုသူတို့သည် လူများတို့ရှေ့မှာထင်ရှားစေခြင်းငှာ ပွဲသဘင်လမ်းဆုံလမ်းဝတို့၌ ရပ်လျက်ဆုတောင်းခြင်းငှာ အလိုရှိကြ၏။ ငါအမှန်ဆိုသည်ကား၊ ထိုသူတို့သည် မိမိတို့အကျိုးကိုခံရကြ၏။” (မဿဲ ၆:၅) မိမိတို့ မည်သည့်နေရာတွင် ရှိစေကာမူ အချိန်တန်လျှင် ရွတ်ဆိုရမည့် နေ့စဉ်ဆုတောင်းချက်များစွာကို ဖာရိရှဲများ သိရှိထားကြရသည်။ သီအိုရီအရဆိုလျှင် လူတို့နောက်ကွယ်၌ ယင်းတို့ကိုပြုကြရသည်။ သို့သော်ဆုတောင်းရမည့်အချိန်တွင် လေးဘက်လေးတန်မှ လူသွားလူလာတို့ရှေ့ “လမ်းဆုံလမ်းဝ၌” ရောက်ရှိနေကြရန် ကြံဖန်တတ်ကြသည်။

၅။ (က) အခြားအဘယ်အကျင့်များကြောင့် ဖာရိရှဲများ၏ ဆုပတ္ထနာများကို ဘုရားသခင်နားမညောင်းခြင်းဖြစ်သနည်း။ (ခ) ယေရှု၏စံပြဆုတောင်းချက်တွင် အဘယ်အရာများကို ကိုယ်တော်အဓိကထားသနည်း။ ယင်းတို့ကို ယခုခေတ်လူများသဘောတူညီကြပါသလော။

^၅ ဟန်ဆောင်ကြည်ညိုပုံဖြင့်လည်း “ရှည်စွာသောပတ္ထနာစကားကို ရွတ်တတ်ကြ၏။” (လုကာ ၂၀:၄၇) နှုတ်တိုက်ထုံးတမ်းစဉ်လာတစ်ခုက ဤသို့ဆိုသည်။ “ဘုရားတရားကြည်ညိုသည့် ရှေးလူကြီးများသည် တီဖီလ်လာ [ဆုတောင်းချက်] ကိုမရွတ်ဆိုမီ တစ်နာရီတိုင် စောင့်ဆိုင်းလေ့ရှိကြ၏။” (မစ်ရှ်နာ) ထိုအချိန်တိုင်သော် သူတို့၏ဘုရားတရားကြည်ညိုမှုကို လူတိုင်းတွေ့မြင်ပြီးသားဖြစ်ပြီး အံ့သြမိန်းမောနေမည်အမှန်။ ဤကဲ့သို့သောဆုပတ္ထနာမျိုးသည် အဘယ်အရပ်သို့မျှမရောက်နိုင်ပါ။ မထင်ရှားသောအရပ်၌ဆုတောင်း၍ အချည်းနှီးသောစကားဖြင့် အထပ်ထပ်မမြွက်ဆိုရန် ယေရှုမှာကြားပြီးနောက် ရိုးရှင်းသောစံနမူနာဆုတောင်းချက်ကို သွန်သင်ပေးတော်မူခဲ့သည်။ (မဿဲ ၆:၆-၈။ ယောဟန် ၁၄:၆၊ ၁၄။ ၁ ပေတရု ၃:၁၂) ယေရှု၏စံပြဆုတောင်းချက်သည် အရေးကြီးရာတို့ကို ရှေ့ဦးထားစေသည်။ “ကောင်းကင်ဘုံ၌ ရှိတော်မူသော အကျွန်ုပ်တို့အဘ၊ ကိုယ်တော်၏နာမတော်အား ရိုသေလေးမြတ်ခြင်း ရှိပါစေသော။ နိုင်ငံတော်တည်ထောင်ပါစေသော။ အလိုတော်သည် . . . ပြည့်စုံပါစေသော။” (မဿဲ ၆:၉-၁၃) ယနေ့လူနည်းစုသာ ဘုရားသခင်နာမတော်ကိုသိကြပြီး ယင်းကိုရိုသေလေးမြတ်လိုသူမှာပို၍ပင်နည်းပါးသည်။ သို့ဖြစ်၍ ကိုယ်တော်အား အမည်မဲ့ဘုရားတစ်ဆူဖြစ်စေကြသည်။ ဘုရားသခင့်နိုင်ငံတော် တည်ထောင်စေမည်လော။ နိုင်ငံတော်တည်ထောင်ပြီ၊ သူတို့နှလုံးထဲတည်ရှိသည်ဟူ၍ ယူဆသူများစွာရှိပါသည်။ အလိုတော်ပြည့်စုံပါစေဟု သူတို့ဆုတောင်းကြမည်ဖြစ်သော်လည်း လူအများသည် ကိုယ်အလိုကိုသာပြုလုပ်ကြ၏။—သု၊ ၁၄:၁၂။

၆။ ဂျူးများ၏အစာရှောင်ခြင်းသည် အဓိပ္ပာယ်မဲ့သည်ဟူ၍ ယေရှု အဘယ်ကြောင့် ပြစ်တင်ရှုတ်ချသနည်း။

^၆ အစာရှောင်ခြင်းကို ယေဟောဝါလက်ခံအသိအမှတ်ပြုသည်မှန်သော်လည်း ဖာရိရှဲများပြုမူသကဲ့သို့ပြုခြင်းကို လက်ခံနိုင်မည်မဟုတ်ပါ။ ကျမ်းပြုဆရာနှင့် ဖာရိရှဲတို့၏ ပေးကမ်းလှူဒါန်းခြင်းနှင့် ဆုတောင်းခြင်းနည်းတူ သူတို့၏အစာရှောင်ခြင်းကိုလည်း အဓိပ္ပာယ်မရှိဟု ယေရှုယူမှတ်ကြောင်း ထင်ရှားသည်။ “သင်တို့သည် အစာရှောင်ခြင်းအကျင့်ကိုကျင့်သောအခါ လျှို့ဝှက်သောသူတို့နည်းတူ မျက်နှာညှိုးငယ်ခြင်းမရှိကြနှင့်။ ထိုသူတို့သည် မိမိတို့အစာရှောင်သည်ကို လူများတို့ရှေ့မှာ ထင်ရှားစေခြင်းငှာ မိမိတို့မျက်နှာကို ဖျက်တတ်ကြ၏။” (မဿဲ ၆:၁၆) သူတို့၏နှုတ်တိုက်ထုံးတမ်းစဉ်လာများအရ အစာရှောင်ချိန်တွင် ဖာရိရှဲများသည် ဆေးကြောသန့်စင်ရန်မဟုတ်၊ ကိုယ်ကိုယ်ကို ဆီလောင်းရမည်လည်းမဟုတ်ဘဲ ခေါင်းပေါ်ပြာလူးကြရမည်ဖြစ်သည်။ အစာမရှောင်သည့်အချိန်တွင် ဂျူးများသည် ကိုယ်ကိုမှန်မှန်ဆေးကြောသန့်စင်စေ၍ တစ်ကိုယ်လုံးဆီလူးပေးလေ့ရှိကြသည်။

၇။ (က) အစာရှောင်ချိန်တွင် ယေရှု၏ တပည့်နောက်လိုက်များသည် မည်သို့ကျင့်ကြံပြုမူရန်ဖြစ်သနည်း။ (ခ) အစာရှောင်ခြင်းနှင့်ပတ်သက်၍ ဟေရှာယခေတ်က ယေဟောဝါ အဘယ်အရာတောင်းဆိုသနည်း။

^၇ အစာရှောင်ခြင်းနှင့်ပတ်သက်၍ တပည့်နောက်လိုက်များအား ယေရှုဤသို့မိန့်မှာသည်။ “အစာရှောင်သည်ကို လူများတို့ရှေ့မှာ မထင်ရှားစေဘဲ၊ မထင်ရှားသောအရပ်၌ရှိတော်မူသော သင်တို့အဘရှေ့တော်၌သာ ထင်ရှားစေခြင်းငှာ ခေါင်းကိုလိမ်းကျံလော့။ မျက်နှာကိုလည်း သစ်လော့။” (မဿဲ ၆:၁၇၊ ၁၈) ဟေရှာယခေတ်တွင် ဖောက်ပြန်သောဂျူးများသည် သူတို့၏အစာရှောင်ခြင်း၊ ကိုယ်ကိုညှဉ်းဆဲခြင်း၊ ခေါင်းငုံ့ခြင်း၊ လျှော်တေအဝတ်ဝတ်၍ ပြာလူးပြီးထိုင်နေခြင်းအမှုကို ဂုဏ်ယူကြသည်။ သို့သော် ဖိနှိပ်ခံရသူများကို လွတ်မြောက်မှုပေးရန်၊ ဆာငတ်သူများကို ကျွေးမွေးရန်၊ အိုးအိမ်မဲ့သူများကို နေစရာပေးရန်နှင့် အဝတ်ချည်းစည်းဖြစ်သူများကို ဝတ်ဆင်ပေးရန် ယေဟောဝါအလိုရှိတော်မူသည်။—ဟေရှာယ ၅၈:၃-၇။

ကောင်းကင်ဘဏ္ဍာကို စုဆောင်းလော့

၈။ ကျမ်းပြုဆရာနှင့် ဖာရိရှဲများသည် ဘုရားသခင့်မျက်နှာသာတော်နှင့်တွေ့ခြင်းကို အဘယ်ကြောင့် အဓိကမထားဘဲ ဖြစ်သွားသနည်း။ နောင်တွင် ပေါလုပြောဆိုသည့် အဘယ်မူကို သူတို့လျစ်လျူရှုကြသနည်း။

^၈ ဖြောင့်မတ်ခြင်းတရားရှာရာတွင် ကျမ်းပြုဆရာနှင့်ဖာရိရှဲများသည် ဘုရားသခင့်မျက်နှာသာတော်ကို မည်သို့ရယူနိုင်မည်အကြောင်း အဓိကမထားဘဲ လူ့ချီးမွမ်းဂုဏ်တင်ခြင်းကို ခံလိုကြပါသည်။ လူ့ထုံးတမ်းစဉ်လာများကို ဦးစားပေးလွန်းလှသဖြင့် ဘုရားသခင်၏မှတ်တမ်းတင်နှုတ်ကပါဌ်တော်ကို ဘေးဖယ်ထား၍ အချည်းနှီးဖြစ်စေကြသည်။ ကောင်းကင်ဘဏ္ဍာအစား မြေကြီးပေါ်သူတို့၏အဆင့်ရာထူးကို သူတို့နှလုံးစွဲလမ်းကြသည်။ ခရစ်ယာန်ဖြစ်လာသူ ဖာရိရှဲတစ်ဦး နောင်နှစ်အနည်းငယ်အချိန်တွင်ရေးသားခဲ့သော ရိုးရှင်းသည့်တရားမှန်ကို သူတို့ငြင်းပယ်ကြသည်။ “လူ၏အမှုကိုသာ ဆောင်ရွက်သကဲ့သို့မဟုတ်၊ သခင်ဘုရား [ယေဟောဝါ၊ ကဘ] ၏အမှုတော်ကိုဆောင်ရွက်သကဲ့သို့ ပြုလေသမျှတို့၌ စေတနာစိတ်နှင့်ပြုကြလော့။ သင်တို့သည် . . . အမွေတော်တည်းဟူသောအကျိုးကို ထိုသခင်ဘုရား [ယေဟောဝါ၊ ကဘ] ၏လက်တော်မှခံရလိမ့်မည်။”—ကောလောသဲ ၃:၂၃၊ ၂၄။

၉။ မြေကြီးဘဏ္ဍာကို ဆုံးရှုံးသွားနိုင်သည့် အဘယ်အန္တရာယ်များ ရှိသနည်း။ သို့သော် စစ်မှန်သောဘဏ္ဍာကို အဘယ်အရာက လုံခြုံစေမည်နည်း။

^၉ ယေဟောဝါဘုရားသခင်သည် သင့်စုငွေကို စိတ်ဝင်စားသည်မဟုတ်၊ ကိုယ်တော်ကို မည်မျှကြည်ညိုမြတ်နိုးသည်ကို စိတ်ဝင်စားတော်မူသည်။ သင့်ဘဏ္ဍာရှိရာအရပ်၌ သင့်နှလုံးရှိသည်ကို ကိုယ်တော်သိတော်မူ၏။ သင့်ဘဏ္ဍာကို သံချေးပိုးရွများ ဖျက်ဆီးပစ်နိုင်မည်လော။ သူခိုးဝင်၍ ဘဏ္ဍာကိုခိုးယူသွားနိုင်မည်လော။ သို့မဟုတ် စီးပွားရေးမတည်ငြိမ်နိုင်သော ဤခေတ်သမယတွင် ငွေဖေါင်းပွမှုသည် ယင်း၏ဝယ်ချမ်းပေးနိုင်စွမ်းကို လျော့နည်းစေနိုင်ပါသလော။ အစုစပ်ဈေးကွက်ကျဆင်းပျက်စီးသည့်အတွက် ဒေဝါလီဖြစ်သွားနိုင်မည်လော။ ရာဇဝတ်မှုတိုးများလာသည့်အတွက် သင့်ဘဏ္ဍာအခိုးခံရမည်လော။ ကောင်းကင်၌စုဆောင်းထားသည့် ဘဏ္ဍာဖြစ်ပါမူ ထိုသို့အဘယ်နည်းဖြင့်မျှမဖြစ်နိုင်ပေ။ သင့်ကိုယ်ခန္ဓာကို အလင်းပေးသည့်မီးခွက်ဖြစ်သော သင့်မျက်စိသည် ရိုးရှင်းပြီး ဘုရားသခင့်နိုင်ငံတော်နှင့် ဖြောင့်မတ်ခြင်းအပေါ် အာရုံစူးစိုက်နေမည်ဆိုလျှင် ထိုသို့ဖြစ်မည်မဟုတ်ပါ။ စည်းစိမ်ဥစ္စာသည် ပျောက်လွင့်သွားတတ်သည်။ “ငွေရတတ်ခြင်းငှာ မကြိုးစားနှင့်။ ကိုယ်ဉာဏ်ကိုအမှီမပြုနှင့်။ ပျောက်တတ်သောအရာကို စေ့စေ့မျက်မှောက်ပြုသင့်သလော။ အကယ်စင်စစ် ရွှေလင်းတသည် မိုးကောင်းကင်သို့ပျံတတ်သကဲ့သို့ ထိုအရာသည် အတောင်တို့ကိုလုပ်၍ ပျံသွားတတ်၏။” (သု၊ ၂၃:၄၊ ၅) ထိုကြောင့် စည်းစိမ်ဥစ္စာအတွက် အဘယ်ကြောင့်အိပ်ပျက်ခံမည်နည်း။ “ရတတ်သောသူ၏စည်းစိမ်မူကား စည်းစိမ်ရှင်ကို အအိပ်ပျက်စေတတ်၏။” (ဒေသနာ ၅:၁၂) “သင်တို့သည် ဘုရားသခင်၏အစေကိုလည်းကောင်း၊ လောကီစည်းစိမ်၏အစေကိုလည်းကောင်း၊ မခံနိုင်ကြ” ဟုယေရှု၏သတိပေးချက်ကို စွဲမှတ်ထားပါ။—မဿဲ ၆:၁၉-၂၄။

စိုးရိမ်ပူပန်ခြင်းကို ပျောက်လွင့်စေသည့် ယုံကြည်ခြင်း

၁၀။ စည်းစိမ်ဥစ္စာအစား ဘုရားသခင်ကိုယုံကြည်အားထားရန် အဘယ်ကြောင့်အလွန်အရေးကြီးသနည်း။ အဘယ်သြဝါဒကို ယေရှုပေးသနည်း။

^၁၀ ယေဟောဝါရှင်သည် စည်းစိမ်ဥစ္စာကိုမဟုတ်၊ ကိုယ်တော်အား ယုံကြည်အားထားစေလိုတော်မူသည်။ “ယုံကြည်ခြင်းမရှိလျှင် ဘုရားသခင်၏စိတ်တော်နှင့် မတွေ့နိုင်။ အကြောင်းမူကား၊ ဘုရားသခင့်အထံတော်သို့ချဉ်းကပ်သောသူသည်၊ ဘုရားသခင်ရှိတော်မူသည်ကိုလည်းကောင်း၊ ကိုယ်တော်ကိုရှာသောသူအား အကျိုးပေးတော်မူသည်ကိုလည်းကောင်း ယုံကြည်ရမည်။” (ဟေဗြဲ ၁၁:၆) ယေရှုမိန့်ဆိုသည်ကား ဤသို့။ “စည်းစိမ်ရှိသော်လည်း စည်းစိမ်၌အသက်မတည်။” (လုကာ ၁၂:၁၅) ဘဏ်၌စုထားသည့် ငွေသန်းပေါင်းများစွာသည် ရောဂါရှိသောအဆုတ်ကို အလုပ်လုပ်စေမည်မဟုတ်၊ သို့မဟုတ် ပင်ပန်းနေသောနှလုံးကို လှုပ်ရှားစေနိုင်သည်မဟုတ်ပါ။ ထိုကြောင့် တောင်ပေါ်ဒေသနာတွင် ဤသို့ယေရှုဆက်မိန့်တော်မူသည်။ “ထိုကြောင့်ငါဆိုသည်ကား၊ အဘယ်သို့စားသောက်ရမည်ဟု အသက်အဖို့မစိုးရိမ်ကြနှင့်။ အဘယ်သို့ဝတ်ရမည်ဟု ကိုယ်အဖို့မစိုးရိမ်ကြနှင့်။ အစာထက် အသက်မြတ်သည်မဟုတ်လော။ အဝတ်ထက် ကိုယ်မြတ်သည်မဟုတ်လော။”—မဿဲ ၆:၂၅။

၁၁။ ယေရှုသည်မိမိ၏ပုံဥပမာများကို အဘယ်မှရရှိခဲ့ပြီး၊ တောင်ပေါ်ဒေသနာတွင်မည်သို့ပေါ်လွင်သနည်း။

^၁၁ ယေရှုသည် နှုတ်ဖြင့်ပုံဥပမာများပေးရာတွင် ပြောင်မြောက်သူဖြစ်သည်။ မည်သည့်နေရာသို့ကြည့်ကြည့် ပုံဥပမာပေးရန်အတွက် ကိုယ်တော်စဉ်းစားပါသည်။ အမျိုးသမီးတစ်ဦး မီးခုံပေါ် မီးညှိထားသည့်မီးခွက် တင်လိုက်သည်ကိုတွေ့မြင်ပြီး ယင်းကို ပုံဥပမာပေးသည်။ သိုးနှင့်ဆိတ်ခွဲနေသော သိုးထိန်းတစ်ဦးကို မြင်လိုက်၍လည်း ယင်းက ပုံဥပမာတစ်ခုဖြစ်လာသည်။ ဈေး၌ ကလေးငယ်များ ကစားနေကြသည်ကိုတွေ့ပြီး ပုံဥပမာအဖြစ်အသုံးပြုသည်။ တောင်ပေါ်ဒေသနာတွင်လည်း ထို့အတူပင်ဖြစ်သည်။ ကာယလိုအပ်ရာများအတွက် ပူပန်ခြင်းအကြောင်း ပြောဆိုနေစဉ် ပျံသန်းသွားလာနေသည့်ငှက်များ၊ တောင်စောင်းရှိ နှင်းပန်းများကိုပြ၍ ဥပမာပေးရန်ကောင်းမည်ကို ကိုယ်တော်တွေ့ရှိတော်မူသည်။ ငှက်တို့သည် စိုက်ပျိုးပြီး ရိတ်သိမ်းတတ်သလော။ ထိုသို့မပြုကြချေ။ နှင်းပန်းတို့သည် ချည်ငင်၍ ရက်ကန်းရက်ပါသလော။ မရက်ပါ။ ယင်းတို့ကို ဘုရားသခင်ပြုလုပ်ထားသည်အလျောက် ပြုစုစောင့်ရှောက်ပေးတော်မူ၏။ သင်မူကား ငှက်၊ နှင်းပန်းတို့ထက် တန်ဖိုးရှိကြပေသည်။ (မဿဲ ၆:၂၆၊ ၂၈-၃၀) ကိုယ်တော်သားတော်ကို စွန့်လွှတ်တော်မူသည်ကား ယင်းတို့အတွက်မဟုတ် သင်တို့အတွက်ဖြစ်သည်။—ယောဟန် ၃:၁၆။

၁၂။ (က) ငှက်များနှင့် ပန်းမန်တို့ဆိုင်ရာ ယေရှု၏ဥပမာများက တပည့်တော်များအလုပ် လုပ်ကိုင်စရာမလိုဟူ၍ ဆိုလိုနေပါသလော။ (ခ) အကျင့်၊ ယုံကြည်ခြင်းခြင်းနှင့်စပ်လျဉ်း၍ အဘယ်အချက်ကို ယေရှုတင်ပြနေခြင်းဖြစ်သနည်း။

^၁၂ မိမိတို့စားသောက်နေထိုင်ဝတ်ဆင်နိုင်ရန် အလုပ်လုပ်စရာမလိုဟု တပည့်နောက်လိုက်များအား ယေရှုဤတွင်မိန့်တော်မူခြင်းမဟုတ်ပါ။ (ဒေသနာ ၂:၂၄။ ဧဖက် ၄:၂၈။ ၂ သက်သာလောနိတ် ၃:၁၀-၁၂ ကိုရှု) ထိုနွေဦးနံနက်ချိန်တွင် ငှက်များအစာရှာဖွေ၊ မိတ်လိုက်၊ အသိုက်များလုပ်၊ ဥများပေါ်ဝပ်ပြီး ပေါက်စငှက်ကလေးများကို အစာရှာကျွေးမွေးရေး၌ အလုပ်များနေကြသည်။ ဤအမှုများကို လုပ်ကိုင်လျက်နေစဉ် သူတို့ပူပန်နေကြသည်ကိုလည်း မတွေ့ရချေ။ ပန်းမန်တို့သည်လည်း ရေနှင့်ဓာတ်သတ္တုရရေးအတွက် မြေကြီးထဲအမြစ်စွဲမြဲစေခြင်း၊ နေရောင်ခြည်ရရန် သစ်ရွက်များဖြာထွက်စေခြင်း၌ အလုပ်များနေကြသည်။ ညှိုး၍မသေမီ ရင့်မှည့်ပြီးပန်းပွင့်လျက် မျိုးစေ့ပြန့်ပွားစေရသည်။ ယင်းတို့လည်း မပူပန်ဘဲ အလုပ်လုပ်လျက်နေကြသည်။ ငှက်များ၊ ပန်းများအတွက် ဘုရားသခင်လိုရာများကိုပေးတော်မူသည်။ ‘ယုံကြည်အားနည်းသောသူတို့၊ . . . ထိုမျှမက သင်တို့ကို [ပေး] တော်မူမည်မဟုတ်လော။’—မဿဲ ၆:၃၀။

၁၃။ (က) လူ့သက်တမ်းတိုးခြင်းအကြောင်း ပြောဆိုရာတွင် တစ်တောင်ဟူသောအတိုင်းအထွာကို ယေရှုအသုံးပြုခြင်းကား အဘယ်ကြောင့်သင့်လျော်သနည်း။ (ခ) သင့်ဘဝကို မကုန်ဆုံးနိုင်သည်တိုင် မိုင်ပေါင်းသန်းနှင့်ချီသည့်ပမာ မည်သို့တိုးရှည်စေနိုင်သနည်း။

^၁၃ ထိုကြောင့်ယုံကြည်ပါ။ မစိုးရိမ်ပါနှင့်။ ပူပန်ခြင်းအားဖြင့် အခြေအနေ ထူးကဲလာမည်မဟုတ်ပါ။ “အဘယ်သူသည် စိုးရိမ်ခြင်းအားဖြင့် မိမိအသက်တာကို တစ်တောင်ခန့်မျှ တိုးပွားစေနိုင်သနည်း” ဟုယေရှုမေးမြန်းတော်မူသည်။ (မဿဲ ၆:၂၇) သို့သော် လူ့သက်တမ်းကာလကို အကွာအဝေးတိုင်းထွာသည့် အတောင်တစ်တောင်နှင့် ယေရှုအဘယ်ကြောင့် နှိုင်းယှဉ်ပြသနည်း။ သမ္မာကျမ်းစာက “လူဆိုးတို့၏လမ်း၊” “ဖြောင့်မတ်သောသူတို့၏လမ်း၊” “ပျက်စီးခြင်းသို့ရောက်သောလမ်း၊” နှင့် ‘အသက်ရှင်ခြင်းသို့ရောက်သော ကျဉ်းမြောင်းသည့်လမ်း’ ဟူသည့်စကားလုံးများကို အသုံးပြုသဖြင့် လူ့သက်တမ်းကို ခရီးစဉ်တစ်ခုနှင့် မကြာခဏနှိုင်းယှဉ်ထားရခြင်းဖြစ်သည်။ (ဆာလံ ၁:၁။ သု၊ ၄:၁၈။ မဿဲ ၇:၁၃၊ ၁၄) နေ့စဉ်လိုအပ်ရာများအတွက် စိုးရိမ်ခြင်းအားဖြင့် လူ့အသက်ကို “တစ်တောင်” ဟူသည့်အနည်းငယ်မျှပင် မတိုးရှည်စေနိုင်ပါ။ သို့ရာတွင် မကုန်မဆုံးနိုင်သည့် မိုင်ပေါင်းသန်းကုဋေချီ သင့်ဘဝအသက်တာကို တိုးရှည်စေနိုင်သည်။ “ဘာစားသောက်ရမည်နည်း၊” “ဘာဝတ်ရမည်နည်း၊” ဟုစိုးရိမ်နေခြင်းအားဖြင့်မဟုတ်ဘဲ ယုံကြည်ခြင်းရှိကာ ယေရှုမှာကြားသည့်အတိုင်း ပြုမူခြင်းအားဖြင့်ဖြစ်သည်။ “ဘုရားသခင်၏နိုင်ငံတော်နှင့် ဖြောင့်မတ်ခြင်းတရားတော်ကို ရှေ့ဦးရှာကြလော့။ နောက်မှ ထိုအရာများကို ထပ်၍ပေးတော်မူလတ္တံ့။”—မဿဲ ၆:၃၁-၃၃။

ဘုရားသခင်၏နိုင်ငံတော်နှင့် ဖြောင့်မတ်ခြင်းတရားတော်ကို ရယူခြင်း

၁၄။ (က) တောင်ပေါ်ဒေသနာ၏ အဓိကအချက်ကားအဘယ်နည်း။ (ခ) နိုင်ငံတော်နှင့် ဖြောင့်မတ်ခြင်းကို ကျမ်းပြုဆရာနှင့် ဖာရိရှဲများသည် အဘယ်နည်းမှားဖြင့် ရှာယူခဲ့သနည်း။

^၁၄ တောင်ပေါ်ဒေသနာတော်၏ နိဒါန်းဝါကျတွင် ကောင်းကင်နိုင်ငံတော်သည် ဝိညာဉ်ရေးလိုအပ်သည်ကို အသိအမှတ်ပြုသူတို့၏ ပိုင်ဆိုင်ရာဖြစ်ကြောင်း ယေရှုမိန့်တော်မူခဲ့သည်။ စတုတ္ထဝါကျ၌ ဖြောင့်မတ်ခြင်းတရားကို ဆာလောင်ငတ်မွတ်နေသူများသည် ဝပြောလာမည်ဟု မိန့်ဆိုသည်။ ဤတွင် ဘုရားသခင်၏နိုင်ငံတော်နှင့် ဖြောင့်မတ်ခြင်းကို ယေရှုအဓိကနေရာ၌ ထားတော်မူသည်။ ယင်းသည် တောင်ပေါ်ဒေသနာ၏ အဓိကအချက်ဖြစ်သည်။ လူသားအပေါင်းတို့၏ ပြဿနာပေါင်းစုံ၏ အဖြေဖြစ်ပေသည်။ သို့သော် ဘုရားသခင့်နိုင်ငံတော်နှင့် ဘုရားသခင့်ဖြောင့်မတ်ခြင်းကို မည်သို့ရယူနိုင်ပါမည်နည်း။ ယင်းတို့ကို မည်သို့ဆက်ရှာဖွေနိုင်မည်နည်း။ ရေးမှတ်သည့် ပညတ်တရားနှင့် နှုတ်တိုက်ထုံးတမ်းစဉ်လာများကိုပါ သိနာတောင်အရပ်၌ မောရှေအား ဘုရားသခင်ပေးတော်မူသည်ဟု ယူမှတ်သည့် ကျမ်းပြုဆရာနှင့် ဖာရိရှဲများ ရှာသည့်နည်းအတိုင်း မဟုတ်ပါ။ သူတို့က နှုတ်တိုက်ထုံးတမ်းစဉ်လာများပါ ပါဝင်သည်ဟု ယူမှတ်သော မောရှေပညတ္တိကျမ်းအရ ဘုရားသခင့်နိုင်ငံတော်နှင့် ဖြောင့်မတ်ခြင်းတရားကို ရှာကြသည်။

၁၅။ (က) ဂျူးများအဆိုအရ သူတို့၏နှုတ်တိုက် ထုံးတမ်းစဉ်လာများသည် အဘယ်အချိန်တွင် စတင်ခဲ့သနည်း။ ရေးမှတ်လျက်ရှိသော မောရှေပညတ္တိကျမ်းထက် ယင်းတို့ကို သူတို့မည်သို့ဦးစားပေးသနည်း။ (ခ) ယင်းထုံးတမ်းစဉ်လာများ အမှန်တကယ် အဘယ်အချိန်တွင် စဖြစ်ပေါ်လာသနည်း။ မောရှေ၏ ပညတ္တိကျမ်းကို ယင်းတို့က မည်သို့ဖြစ်စေသနည်း။

^၁၅ ယင်းနှင့်ပတ်သက်၍ သူတို့၏ ထုံးတမ်းစဉ်လာက ဤသို့ဖြစ်သည်။ “ပညတ္တိကျမ်း [အောက်ခြေမှတ်ချက်အရ၊ “‘နှုတ်တိုက်ထုံးတမ်းစဉ်လာ’”] ကိုသိနာအရပ်တွင် မောရှေရရှိခဲ့ပြီး ယောရှုအား အပ်နှင်းပေးသည်။ ယောရှုက အကြီးအကဲများ၊ အကြီးအကဲများက ပရောဖက်တို့ထံ၊ ပရောဖက်များက ဗဟိုတရားဇရပ်အဖွဲ့ဝင်တို့ထံ အပ်နှင်းသည်။” အချိန်တန်လေသော် သူတို့၏ နှုတ်တိုက်ပညတ်ချက်များသည် မှတ်တမ်းတင်ပညတ္တိကျမ်းထက်ပင် ဦးစားပေးခံရလေသည်။ “[မှတ်တမ်း] ပညတ္တိကျမ်းကို ချိုးဖောက်သောသူသည် အပြစ်မရှိ။” သို့သော် “ကျမ်းပြုဆရာများ၏ [နှုတ်တိုက်ထုံးတမ်းစဉ်လာ] စကားများကို ထပ်ဖြည့်မည်ဆိုလျှင် အပြစ်ကြီးလေးသည်။” (မစ်ရှ်နာ) သူတို့၏ နှုတ်တိုက်ထုံးတမ်းစဉ်လာများသည် သိနာအရပ်၌ အစပြုခဲ့သည်မဟုတ်ပါ။ အမှန်သော်ကား၊ ခရစ်တော်မကြွရောက်မီ နှစ်ပေါင်းနှစ်ရာအတွင်း အလျင်အမြန်စုစည်းလာပါသည်။ ယင်းတို့ကို မောရှေပညတ္တိကျမ်းသို့ ထပ်ဖြည့်ခြင်း၊ ၄င်းမှထုတ်နှုတ်ပစ်ခြင်းအားဖြင့် ပညတ္တိကျမ်းကို အချည်းနှီးဖြစ်စေသည်။—တရားဟောရာ ၄:၂။ ၁၂:၃၂ နှိုင်းယှဉ်။

၁၆။ လူသားတို့အတွက် ဘုရားသခင့်ဖြောင့်မတ်ခြင်းတရား မည်သို့ရှိလာသနည်း။

^၁၆ ဘုရားသခင်၏ဖြောင့်မတ်ခြင်းသည် ပညတ်တရားအားဖြင့်မဟုတ် ယင်းနှင့်မစပ်ဆိုင်ပါ။ “ထိုသို့ပညတ်တရားသည် ဒုစရိုက်အပြစ်ကို ထင်ရှားစေသည်ဖြစ်သောကြောင့် ပညတ်တရား၏အကျင့်အားဖြင့် ဘုရားသခင့်ရှေ့တော်၌ အဘယ်သူမျှ ဖြောင့်မတ်ရာသို့မရောက်ရာ။ ယခုမူကား ပညတ္တိကျမ်းနှင့် အနာဂတ္တိကျမ်းတို့သည် သက်သေခံသည်နှင့်အညီ ပညတ်တရားနှင့်မစပ်ဆိုင်သော ဘုရားသခင်၏ ဖြောင့်မတ်ခြင်းတရားတည်းဟူသော ယေရှုခရစ်ကို ယုံကြည်ခြင်းအားဖြင့် ယုံကြည်သောသူအပေါင်းတို့အဖို့ဖြစ်၍ ထိုသူအပေါင်းတို့အပေါ်သို့ရောက်သော ဘုရားသခင်၏ ဖြောင့်မတ်ခြင်းတရားသည် ထင်ရှားခဲ့ပြီ။” (ရောမ ၃:၂၀-၂၂) ထိုကြောင့်ဘုရားသခင်၏ ဖြောင့်မတ်ခြင်းတရားသည် ခရစ်တော်ယေရှု၌ ယုံကြည်ခြင်းအားဖြင့်ဖြစ်ကြောင်း “ပညတ္တိကျမ်းနှင့် အနာဂတ္တိကျမ်းတို့သည် သက်သေခံသည်။” မေရှိယပရောဖက်ပြုချက်များသည် ယေရှု၌ပြည့်စုံခဲ့သည်။ ပညတ္တိကျမ်းကိုလည်း ကိုယ်တော်ပြည့်စုံစေသည်။ နှက်တိုင်ပေါ် သံရိုက်ခံရခြင်းအားဖြင့် ပယ်ရှင်းခြင်းခံရသည်။—လုကာ ၂၄:၂၅-၂၇၊ ၄၄-၄၆။ ကောလောသဲ ၂:၁၃၊ ၁၄။ ဟေဗြဲ ၁၀:၁။

၁၇။ တမန်တော်ပေါလုအဆိုအရ ဘုရားသခင်၏ ဖြောင့်မတ်ခြင်းတရားကို ဂျူးများ အဘယ်ကြောင့်မသိနိုင်ကြသနည်း။

^၁၇ သို့ဖြစ်သောကြောင့် ဖြောင့်မတ်ခြင်းတရားကို ဂျူးများ ရှာမတွေ့ခဲ့ကြောင်း တမန်တော်ပေါလုရေးသားခဲ့ရခြင်းဖြစ်သည်။ “ထိုသူတို့သည် မှန်သောပညာမရှိသော်လည်း၊ ဘုရားသခင်ဘက်၌ စိတ်အားကြီးသည်ဟု သူတို့အဖို့ ငါသက်သေခံ၏။ ထိုသူတို့သည် ဘုရားသခင်၏ဖြောင့်မတ်ခြင်းတရားကိုမသိဘဲ ကိုယ်ဖြောင့်မတ်ခြင်းကို တည်စေခြင်းငှာ ရှာကြံသောကြောင့် ဘုရားသခင်၏ဖြောင့်မတ်ခြင်းတရားကို ဝန်မခံကြ။ ယုံကြည်သောသူအပေါင်းတို့သည် ဖြောင့်မတ်ရာသို့ရောက်မည်အကြောင်း၊ ပညတ်တရားသည် ခရစ်တော်အားဖြင့် စုံလင်ခြင်းရှိ၏။” (ရောမ ၁၀:၂-၄) ခရစ်တော်ယေရှုအကြောင်း ပေါလု ဤသို့လည်း ရေးသားခဲ့သည်။ “ငါတို့သည် ထိုသူအားဖြင့် ဘုရားသခင့်ရှေ့တော်၌ ဖြောင့်မတ်သောသူဖြစ်မည်အကြောင်း” “ဘုရားသခင်သည် အပြစ်နှင့်ကင်းစင်သောသူကို ငါတို့အတွက်ကြောင့် အပြစ်ရှိသောသူဖြစ်စေတော်မူ” သည်။—၂ ကောရိန္သု ၅:၂၁။

၁၈။ “နှက်တိုင်တင်ခံရသော ခရစ်တော်” ကို ဂျူးထုံးစံလိုက်သူများ၊ ဂရိဒဿနိကဆရာများ၊ “ခေါ်တော်မူခြင်းခံရသူများ” မည်သို့ယူမှတ်သနည်း။

^၁၈ အသက်ငင်နေသော မေရှိယအား ဂျူးတို့က လူပျော့လူညံ့ဟူ၍သာ သဘောထားသည်။ ဤသို့သော မေရှိယသခင်မျိုးကို ဂရိဒဿနိကဆရာများက ပညာမဲ့သူဟုယူမှတ်သည်။ မည်သို့ဆိုစေ ပေါလုကြွေးကြော်သကဲ့သို့ပင်ဖြစ်သည်။ “ယုဒလူတို့သည် နိမိတ်လက္ခဏာကိုတောင်းတတ်ကြ၏။ ဟေလသလူတို့သည် ပညာကိုရှာတတ်ကြ၏။ ငါတို့မူကား၊ လက်ဝါးကပ်တိုင်မှာ အသေခံတော်မူသော ခရစ်တော်၏ အကြောင်းအရာကို ဟောပြောကြ၏။ ထိုအကြောင်းအရာသည်ကား၊ ယုဒအမျိုးသား ထိမိ၍လဲစရာအကြောင်းဖြစ်၏။ တစ်ပါးအမျိုးသား၌ကား၊ မိုက်မဲခြင်းဖြစ်၏။ သို့သော်လည်း ယုဒလူဖြစ်စေ၊ ဟေလသလူဖြစ်စေ၊ ခေါ်တော်မူသောသူတို့၌ ဘုရားသခင်၏တန်ခိုးတော်နှင့် ဘုရားသခင်၏ ပညာတော်တည်းဟူသော ခရစ်တော်၏ တရားဖြစ်၏။ ဘုရားသခင်၏ မိုက်မဲခြင်းအရာသည် လူတို့၏ပညာထက် သာ၍ပညာရှိ၏။ ဘုရားသခင်၏ အားနည်းခြင်းအရာသည် လူတို့၏အစွမ်းထက် သာ၍အစွမ်းရှိ၏။” (၁ ကောရိန္သု ၁:၂၂-၂၅) ခရစ်တော်ယေရှုသည် ဘုရားသခင့်တန်ခိုးတော်နှင့် ဉာဏ်ပညာ၏ထင်ရှားဖော်ပြချက်ဖြစ်ပြီး နာခံမှုရှိသော လူသားတို့ဖြောင့်မတ်ခြင်းသို့ရောက်၍ ထာဝရအသက်ရခြင်းငှာ ဘုရားသခင့်လမ်းကြောင်း ဖြစ်တော်မူသည်။ “ထိုသခင်၏နာမတော်မှတစ်ပါး ငါတို့ကိုကယ်တင်နိုင်သော နာမတစ်စုံတစ်ခုမျှ ကောင်းကင်အောက် လူတို့တွင်မပေါ်မရှိ။”—တမန်တော် ၄:၁၂။

၁၉။ နောက်ဆက်တွဲဆောင်းပါးကား အဘယ်အကြောင်းကို တင်ပြမည်နည်း။

^၁၉ ပျက်စီးခြင်းဘေးမှ ကျွန်ုပ်တို့လွတ်မြောက်ကာ ထာဝရအသက်ရလိုလျှင် ဘုရားသခင်၏ နိုင်ငံတော်နှင့် ကိုယ်တော်၏ဖြောင့်မတ်ခြင်းတရားကို အဆက်မပြတ် ရှာနေရမည်ဖြစ်ကြောင်း နောက်ဆက်တွဲဆောင်းပါးက ဖော်ပြပါသည်။ ထိုသို့ပြုရန် ယေရှု၏သြဝါဒကို နာရုံမက ကျင့်ဖို့ရန်လည်း လိုအပ်ပါသည်။

ပြန်လည်စစ်ဆေးရန် မေးခွန်းများ

▫ မိမိတို့၏ အလှူဒါန၊ ဆုပတ္ထနာများနှင့် အစာရှောင်ခြင်းတို့ကို ဂျူးဘာသာရေးခေါင်းဆောင်များ မည်သို့ဖြစ်စေကြသနည်း။

▫ သင့်ဘဏ္ဍာကို စုဆောင်းရန် အလုံခြုံဆုံးနေရာကား အဘယ်နေရာ ဖြစ်သနည်း။

▫ ကျွန်ုပ်တို့၏ ကာယရေးလိုအပ်ချက်များအတွက် စိုးရိမ်ပူပန်ခြင်းကို အဘယ်ကြောင့် ရှောင်သင့်သနည်း။

▫ မိမိတို့၏ နှုတ်တိုက်ထုံးတမ်းစဉ်လာများ မည်သို့စတင်ခဲ့သည်ဟု ဂျူးလူမျိုးက အဆိုပြုသနည်း။

▫ ဘုရားသခင့်နိုင်ငံတော်နှင့် ဖြောင့်မတ်ခြင်းတရားကို အဘယ်နည်းဖြင့် ရရှိနိုင်သနည်း။