နှစ်ခြင်းပေးသူ ယောဟန်—ပျော်ရွှင်မှု ဆက်ထိန်းနိုင်ဖို့ ကူညီပေးတဲ့ ပုံနမူနာ

သင်ဟာ လက်လှမ်းမမီနိုင်တဲ့ အသင်းတော် တာဝန်တစ်ခုကို တောင့်တနေသလား။ အဲဒီတာဝန်ကို တခြားတစ်ယောက် ရထားတာ ဖြစ်နိုင်တယ်။ ဒါမှမဟုတ် တစ်ချိန်က ကိုယ်ရခဲ့တဲ့ တာဝန် ဖြစ်နိုင်တယ်။ ဒါပေမဲ့ အသက်အရွယ်၊ ကျန်းမာရေး ပြဿနာ၊ စားဝတ်နေရေး အခက်အခဲ၊ မိသားစုတာဝန်ကြောင့် ဆက်မလုပ်နိုင်တော့တာ၊ အဖွဲ့အစည်းရဲ့ အပြောင်းအလဲကြောင့် နားလိုက်ရတာ ဖြစ်နိုင်တယ်။ ဘာကြောင့်ပဲဖြစ်ဖြစ် အမှုတော်မှာ ဆန္ဒရှိသလောက် မပါဝင်နိုင်တော့ဘူးလို့ ခံစားရနိုင်တယ်။ အဲဒီအခါမျိုးမှာ စိတ်ပျက်မိနိုင်တယ်။ ဒါပေမဲ့ စိတ်ဓာတ်ကျတာ၊ နာကြည်းတာစတဲ့ အပျက်သဘောထားတွေကို ဘယ်လို တိုက်ထုတ်နိုင်မလဲ။ ပျော်ရွှင်မှုကို ဘယ်လို ဆက်ထိန်းနိုင်မလဲ။

နှစ်ခြင်းပေးသူ ယောဟန်ရဲ့ ပုံနမူနာကနေ ပျော်ရွှင်မှု ဆက်ထိန်းနိုင်ပုံကို သင်ယူနိုင်တယ်။ ယောဟန်ဟာ အခွင့်ထူးတွေ ရထားတယ်။ ဒါပေမဲ့ မျှော်လင့်မထားတာတွေကို ကြုံခဲ့ရတယ်။ အမှုဆောင်ချိန်ထက် ထောင်ထဲမှာ နေရချိန် ပိုများမယ်လို့ သူ စဉ်းစားမိမှာ မဟုတ်ဘူး။ ဒါတောင် ဆက်ပျော်ရွှင်ပြီး ကျန်တဲ့အသက်တာတစ်လျှောက် ပျော်ရွှင်မှုကို ဆက်ထိန်းထားတယ်။ သူ့ကို ဘာက ကူညီပေးသလဲ။ စိတ်ပျက်စရာတွေ ကြုံရချိန်မှာ ကျွန်တော်တို့ကို ဘာက ဆက်ပျော်ရွှင်စေနိုင်သလဲ။

ပျော်ရွှင်စေတဲ့တာဝန်

အေဒီ ၂၉၊ နွေဦးမှာ ယောဟန်ဟာ မေရှိယရဲ့ ရှေ့ပြေးအဖြစ် စအမှုဆောင်တယ်။ “နောင်တရကြပါ။ ကောင်းကင်နိုင်ငံ နီးနေပြီ” လို့ သူဟောတယ်။ (မ. ၃:၂။ လု. ၁:၁၂-၁၇) သူဟောတာကို နားထောင်ဖို့ ရပ်ဝေးကနေတောင် လူတွေ ရောက်လာတယ်။ လူများစွာက နောင်တယူပြီး နှစ်ခြင်းခံကြတယ်။ သူတော်ကောင်း ယောင်ဆောင်တဲ့ ဘာသာရေးခေါင်းဆောင်တွေ မပြောင်းလဲရင် တရားစီရင်ခံရမယ်လို့ ယောဟန် သတ္တိရှိရှိ သတိပေးတယ်။ (မ. ၃:၅-၁၂) အေဒီ ၂၉၊ ဆောင်းဦးမှာ ယေရှုကို နှစ်ခြင်းပေးတဲ့အချိန်ဟာ ယောဟန်ရဲ့ အမှုဆောင်လုပ်ငန်းအတွက် အရေးကြီးဆုံးအချိန်ပဲ။ အဲဒီအချိန်ကစပြီး ကတိထားရာ မေရှိယဖြစ်တဲ့ ယေရှု နောက်ကို လိုက်ဖို့ လူတွေကို လမ်းညွှန်ပေးတယ်။—ယော. ၁:၃၂-၃၇။

ယောဟန်ရဲ့ ထူးခြားတဲ့ ကဏ္ဍနဲ့ပတ်သက်ပြီး ယေရှုက “အသက်ရှင်ခဲ့သမျှ လူတွေထဲမှာ နှစ်ခြင်းပေးသူ ယောဟန်ထက် ကြီးမြတ်တဲ့သူ မပေါ်သေးဘူး” လို့ ပြောတယ်။ (မ. ၁၁:၁၁) ရခဲ့တဲ့ ကောင်းချီးတွေအတွက် ယောဟန် သိပ်ပျော်မှာပဲ။ ယောဟန်လိုပဲ ဒီနေ့ခေတ် လူများစွာလည်း ကောင်းချီးတွေ ရနေတယ်။ ဥပမာ၊ ညီအစ်ကို တယ်ရီအကြောင်း သုံးသပ်ကြည့်ပါ။ သူနဲ့ ဇနီး စန်ဒရာဟာ အချိန်ပြည့်လုပ်ငန်းမှာ နှစ်ပေါင်း ၅၀ ကျော် ပါဝင်ခဲ့တယ်။ “ကျွန်တော် အခွင့်ထူး အများကြီး ရခဲ့တယ်။ ရှေ့ဆောင်၊ ဗေသလ အိမ်သား၊ အထူးရှေ့ဆောင်၊ တိုက်နယ်ကြီးကြပ်မှူး၊ ခရိုင်ကြီးကြပ်မှူးအဖြစ် အမှုဆောင်ခဲ့ပြီး အခု အထူးရှေ့ဆောင်အဖြစ် အမှုဆောင်နေတယ်” လို့ တယ်ရီ ပြောတယ်။ ဘုရားရေးရာ အခွင့်ထူးတွေ ရတာ ပျော်စရာပဲ။ ဒါပေမဲ့ အခြေအနေ အပြောင်းအလဲတွေကြား ပျော်ရွှင်မှုကို ဆက်ထိန်းဖို့ ကြိုးစားအားထုတ်မှု လိုကြောင်း ယောဟန်ဆီကနေ သင်ယူရပါမယ်။

တန်ဖိုးထားလေးမြတ်စိတ် ဆက်ရှိနေပါ

နှစ်ခြင်းပေးသူ ယောဟန် ဆက်ပျော်ရွှင်ရတဲ့ အကြောင်းရင်းက အခွင့်ထူးတွေကို တန်ဖိုးထားလေးမြတ်နေလို့ပဲ။ ဥပမာတစ်ခု သုံးသပ်ကြည့်ပါ။ ယေရှု နှစ်ခြင်းခံပြီးနောက် ယောဟန်ရဲ့ အမှုဆောင်လုပ်ငန်း ဆုတ်ယုတ်လာပြီး ယေရှုရဲ့ အမှုဆောင်လုပ်ငန်းကတော့ တိုးတက်လာတယ်။ ဒါကြောင့် ယောဟန်ရဲ့ တပည့်တွေ စိုးရိမ်ပြီး “အခု အဲဒီလူက နှစ်ခြင်းပေးနေတော့ လူအများကြီး သူ့ဆီ သွားနေကြပြီ” လို့ပြောတယ်။ (ယော. ၃:၂၆) ယောဟန်က “သတို့သမီးကို ရတဲ့သူဟာ သတို့သားပါ။ ဒါပေမဲ့ အနားမှာ ရပ်နေတဲ့ မိတ်ဆွေကလည်း သတို့သားရဲ့အသံကို ကြားပြီး ဝမ်းသာကြည်နူးနေတတ်တယ်။ အဲဒီလိုပဲ ကျွန်တော်လည်း ဝမ်းသာကြည်နူးနေတယ်” လို့ ပြောတယ်။ (ယော. ၃:၂၉) ယောဟန်က ယေရှုနဲ့ မပြိုင်ဘူး။ မိမိရထားတဲ့ အခွင့်ထူးဟာ ယေရှုကြောင့် မှေးမှိန်သွားပြီလို့ မတွေးဘူး။ အဲဒီအစား ‘သတို့သားရဲ့ မိတ်ဆွေ’ ဖြစ်ခွင့်ကို တန်ဖိုးထားတဲ့အတွက် ဆက်ပျော်ရွှင်ခဲ့တယ်။

အခက်အခဲတွေကြားမှာတောင် ဆက်ပျော်ရွှင်နိုင်ဖို့ ယောဟန်ရဲ့ စိတ်ထားက ကူညီပေးတယ်။ ဥပမာ၊ ယောဟန်ဟာ မွေးကတည်းက နာဇရိလူဖြစ်တဲ့အတွက် စပျစ်ဝိုင် မသောက်ဘူး။ (လု. ၁:၁၅) “မသောက်မစားတတ်တဲ့ ယောဟန်” ဆိုတဲ့ ယေရှုစကားက ယောဟန်ရဲ့ ရိုးရှင်းတဲ့ဘဝကို မြင်သာစေတယ်။ ယေရှုနဲ့ တပည့်တွေမှာတော့ အဲဒီလို တားမြစ်ချက်တွေ မရှိဘူး။ အများသူငါလို သာမန်ဘဝနဲ့ နေနိုင်တယ်။ (မ. ၁၁:၁၈၊ ၁၉) ယောဟန်ဟာ အံ့ဖွယ်အမှုတွေ မလုပ်နိုင်ပေမဲ့ ယောဟန်ရဲ့ တပည့်ဖြစ်ခဲ့ဖူးပြီး အခု ယေရှုရဲ့ တပည့် ဖြစ်နေသူတွေကတော့ အံ့ဖွယ်အမှုတွေ လုပ်နိုင်ကြတယ်။ (မ. ၁၀:၁။ ယော. ၁၀:၄၁) ယောဟန်ဟာ အဲဒီကွာခြားချက်တွေကို အာရုံစိုက်မယ့်အစား ယေဟောဝါ ပေးထားတဲ့ တာဝန်ကို ထက်သန်စွာ ဆက်ထမ်းဆောင်ခဲ့တယ်။

ကျွန်တော်တို့လည်း လက်ရှိတာဝန်ကို တန်ဖိုးထားမယ်ဆိုရင် ဆက်ပျော်ရွှင်နိုင်ပါလိမ့်မယ်။ အစောပိုင်းမှာ ဖော်ပြခဲ့တဲ့ တယ်ရီက “ကိုယ်ရထားတဲ့ တာဝန်ကိုပဲ အာရုံစိုက်တယ်” လို့ ပြောတယ်။ အဲဒီအချိန်ပြည့်လုပ်ငန်းမှာ ပါဝင်ခဲ့တဲ့ အသက်တာအကြောင်း ပြန်စဉ်းစားရင်း “လုံးဝ နောင်တ မရပါဘူး။ ပျော်စရာ အမှတ်တရတွေချည်းပါပဲ” လို့ ပြောတယ်။

ဘယ်တာဝန်ပဲ ရပါစေ ကိုယ့်တာဝန်ကို တန်ဖိုးရှိစေတဲ့အရာက ဘာလဲ ဆိုတာကို စဉ်းစားခြင်းက ဘုရားအမှုတော်မှာ ဆက်ပျော်ရွှင်စေနိုင်တယ်။ “ဘုရားသခင်ရဲ့ လုပ်ဖော်ဆောင်ဖက်” ဖြစ်ရတာ အခွင့်ထူးပါပဲ။ (၁ ကော. ၃:၉) အမွေရထားတဲ့ ပစ္စည်းတစ်ခုကို ဂရုတစိုက် ထိန်းသိမ်းထားမှ အမြဲ လှပနေမယ်။ အဲဒီလိုပဲ ယေဟောဝါနဲ့ တွဲလုပ်ဆောင်နေရတဲ့ အခွင့်ထူးအကြောင်း တွေးတောမယ်ဆိုရင် ဆက်ပျော်ရွှင်နေမယ်။ ကိုယ့်ရဲ့ စွန့်လွှတ်မှုကို သူတစ်ပါးရဲ့ စွန့်လွှတ်မှုနဲ့ နှိုင်းယှဉ်မှာ မဟုတ်သလို ကိုယ်ရထားတဲ့ အခွင့်ထူးက တခြားသူတွေရဲ့ အခွင့်ထူးလောက် တန်ဖိုးမရှိဘူးလို့လည်း ယူဆမှာ မဟုတ်ဘူး။—ဂလ. ၆:၄။

ဘုရားရေးရာကို အာရုံစိုက်ပါ

မိမိရဲ့ အမှုဆောင်လုပ်ငန်း အချိန်ကြာမှာ မဟုတ်မှန်း သိပေမဲ့ ဒီလောက်မြန်မြန် ပြီးဆုံးသွားမယ်လို့တော့ ယောဟန် ထင်မှာ မဟုတ်ဘူး။ (ယော. ၃:၃၀) ယေရှုကို နှစ်ခြင်းပေးပြီး ခြောက်လလောက်အကြာ အေဒီ ၃၀ မှာ ဘုရင်ဟေရုဒ်က ယောဟန်ကို ထောင်ချလိုက်တယ်။ ဒါတောင် ယောဟန် တတ်နိုင်သလောက် ဆက်ဟောနေတုန်းပဲ။ (မာ. ၆:၁၇-၂၀) ဒီအပြောင်းအလဲတွေကြား ယောဟန်ကို ဘာက ဆက်ပျော်ရွှင်စေတာလဲ။ ဘုရားရေးရာ တွေကို ဆက်အာရုံစိုက်ခဲ့လို့ပဲ။

ယောဟန် ထောင်ကျနေတုန်း ယေရှုရဲ့ အမှုဆောင်လုပ်ငန်း တိုးတက်မှုတွေအကြောင်း ကြားတယ်။ (မ. ၁၁:၂။ လု. ၇:၁၈) ယေရှုဟာ မေရှိယဖြစ်ကြောင်း ယောဟန် စိတ်ချပေမဲ့ မေရှိယနဲ့ပတ်သက်တဲ့ ကျမ်းချက်အားလုံးကို ယေရှု ဘယ်လို ပြည့်စုံစေမလဲဆိုတာ တွေးမိမှာပဲ။ မေရှိယက ဘုရင်ဖြစ်မှာဆိုတော့ မကြာခင်မှာပဲ ယေရှု စတင်အုပ်ချုပ်တော့မှာလား။ ယေရှု ဘုရင်ဖြစ်လာရင် သူကော ထောင်ကနေ လွတ်လာမလား။ ယေရှုအကြောင်း ပိုသိချင်တဲ့အတွက် တပည့်နှစ်ယောက်ကို လွှတ်ပြီး “ခင်ဗျားဟာ ကျွန်တော်တို့ စောင့်မျှော်နေတဲ့သူလား၊ နောက်တစ်ယောက်ကို စောင့်မျှော်ရမှာလား” လို့ မေးခိုင်းလိုက်တယ်။ (လု. ၇:၁၉) သူတို့ ပြန်လာပြီး “မျက်မမြင်တွေ ပြန်မြင်လာပြီ။ ခြေမသန်သူတွေ လမ်းလျှောက်နိုင်ပြီ။ အနာကြီးရောဂါသည်တွေ ပြန်ကောင်းလာပြီ။ နားမကြားသူတွေ ကြားရပြီ။ သေလွန်သူတွေ အသက်ပြန်ရှင်လာပြီ။ ဆင်းရဲသားတွေ သတင်းကောင်း ကြားရပြီ” လို့ ယေရှု ပြောခိုင်းလိုက်တဲ့အကြောင်း၊ ယေရှုရဲ့ အံ့ဖွယ် ကုသမှုတွေအကြောင်း ပြန်ပြောတဲ့အခါ ယောဟန် အသေအချာ နားထောင်ခဲ့မှာပဲ။—လု. ၇:၂၀-၂၂။

သူတို့ရဲ့ စကားကြောင့် ယောဟန် အားရှိသွားမှာပဲ။ မေရှိယနဲ့ပတ်သက်တဲ့ ပရောဖက်ပြုချက်တွေကို ယေရှု ပြည့်စုံစေကြောင်း သေချာသွားတယ်။ ယေရှု ပေါ်လာလို့ ယောဟန် ထောင်ကနေ လွတ်သွားမှာ မဟုတ်ပေမဲ့ မိမိရဲ့ အမှုဆောင်လုပ်ငန်း အချည်းနှီး မဖြစ်မှန်း ယောဟန် သိတယ်။ ဘယ်လိုအခြေအနေမှာပဲ ဖြစ်ပါစေ ယောဟန် ဆက်ပျော်ရွှင်ခဲ့တယ်။

ယောဟန်လိုပဲ ကျွန်တော်တို့လည်း ဘုရားရေးရာကို အာရုံစိုက်မယ်ဆိုရင် ပျော်ရွှင်စွာ၊ စိတ်ရှည်စွာ ခံရပ်နိုင်ပါလိမ့်မယ်။ (ကော. ၁:၉-၁၁) ကျမ်းစာ ဖတ်ခြင်း၊ တွေးတောဆင်ခြင်ခြင်း၊ ကျွန်တော်တို့ရဲ့ အမှုဆောင်လုပ်ငန်း ဘယ်တော့မှ အချည်းနှီး မဖြစ်ကြောင်း အမှတ်ရခြင်းအားဖြင့် ခံရပ်နိုင်ပါတယ်။ (၁ ကော. ၁၅:၅၈) “နေ့တိုင်း ကျမ်းစာတစ်ခန်း ဖတ်တာက ယေဟောဝါနဲ့ ပိုရင်းနှီးဖို့၊ ကိုယ့်ကိုယ်ကိုယ် မဟုတ်ဘဲ ဘုရားကို အာရုံစိုက်ဖို့ ကူညီပေးတယ်” လို့ စန်ဒရာ ပြောတယ်။ အမှုဆောင်လုပ်ငန်း မှတ်တမ်းတွေကို အာရုံစိုက်ခြင်းကလည်း ကိုယ့်ကိုယ်ကိုယ်ထက် ယေဟောဝါရဲ့ လုပ်ဆောင်ပြီးမြောက်မှုတွေကို အာရုံစိုက်စေတယ်။ “JW ရုပ်သံ^® အစီအစဉ်က အဖွဲ့အစည်းနဲ့ ပိုရင်းနှီးဖို့၊ ကိုယ့်တာဝန်မှာ ဆက်ပျော်ရွှင်ဖို့ ကူညီပေးတယ်” လို့ စန်ဒရာ ပြောတယ်။

ယောဟန်ဟာ ဧလိယနဲ့ “ကျွန်တော်တို့လိုပဲ ခံစားချက် ရှိတဲ့လူ” ဖြစ်တယ်။ တိုတောင်းလှတဲ့ အမှုဆောင်ချိန်အတွင်း “ဧလိယလို စိတ်ဓာတ်မျိုး၊ စွမ်းရည်မျိုး” နဲ့ လုပ်ဆောင်ခဲ့တယ်။ (ယာ. ၅:၁၇။ လု. ၁:၁၇) တန်ဖိုးထားလေးမြတ်တတ်တဲ့၊ ဘုရားရေးရာကို အာရုံစိုက်တဲ့ ယောဟန်ရဲ့ ပုံသက်သေကို တုပမယ်ဆိုရင် ကျွန်တော်တို့လည်း ဘယ်အခြေအနေမှာပဲဖြစ်ပါစေ ဘုရားအမှုတော်မှာ ပျော်ရွှင်မှုကို ဆက်ထိန်းထားနိုင်ပါတယ်။