အကြီးအကဲများ—သင်တို့အားအပ်နှင်းထားရာကို စောင့်ရှောက်လော့

“သင်တို့သည် ကိုယ်ကိုသတိနှင့်ကြည့်ရှုကြလော့။ ဘုရားသခင်သည်မိမိ (သားတော်၏) အသွေးနှင့် ဝယ်တော်မူသောအသင်းတော်ကို လုပ်ကျွေးစေခြင်းငှာ၊ သန့်ရှင်းသောဝိညာဉ်တော်သည် သင်တို့ကိုအအုပ်အချုပ်ခန့်တော်မူသော သိုးစုတစ်စုလုံးကိုလည်း သတိနှင့်ကြည့်ရှုကြလော့။”—တမန်တော် ၂၀:၂၈။

၁။ ခရစ်ယာန်အပ်နှင်းရာတွင် ဘာပါဝင်သနည်း။

ယေဟောဝါဘုရားရှင်သည်၊ မိမိ၏မြေကြီးဆိုင်ရာအဖွဲ့အစည်းရှိသူများအား ထူးမြတ်လှသောအပ်နှင်းရာပေးထားသည်။ သို့သော်၊ အပ်နှင်းရာကားအဘယ်နည်း။ တန်ဖိုးရှိသောအရာဖြစ်ပြီး၊ တာဝန်ယူရမည့်သူထံ ပေးအပ်ထားခြင်းဖြစ်သည်။ ခရစ်ယာန်အပ်နှင်းခြင်းတွင်၊ “ကျန်းခံ့ရေးတရားပုံစံ” ပေးသော “အချိန်တန်အစာကျွေး” သော “သစ္စာနှင့်လည်းကောင်း၊ သမ္မာသတိနှင့်လည်းကောင်း ပြည့်စုံသောကျေးကျွန်” အားဖြင့် ပေးဝေသော ကျမ်းစောင်များမှ သမ္မာတရားပါဝင်သည်။ (၂ တိမောသေ ၁:၁၃၊ ၁၄။ မဿဲ ၂၄:၄၅-၄၇) ဤအပ်နှင်းခြင်းတွင် အသင်းတော်အတွင်းနှင့် ပြင်ပတွင်ဟောပြောရမည့်သမ္မာတရားနှင့် ဆက်နွယ်နေသည့်၊ အမှုဆောင်ခြင်းပါဝင်သည်။ (၂ တိမောသေ ၄:၁-၅) ဝိညာဉ်တော်ခန့်အပ်ခံ အကြီးအကဲများအပါအဝင် နိုင်ငံတော်ကြွေးကြော်သူများသည် ဤအပ်နှင်းခံထားခြင်းကို အဖိုးအထိုက်ဆုံးအဖြစ်လေးမြတ်သင့်သည်။

၂။ အကြီးအကဲများတွင် မည်သည့်ထပ်ဆင့်အပ်နှင်းရာရရှိထားပြီး၊ ယင်းနှင့်စပ်လျဉ်း၍ ပေတရုကဘာပြောသနည်း။

^၂ ခရစ်ယာန်အကြီးအကဲများသည် ဘုရားသိုးတော်စုကို အုပ်ထိန်းရသည့်ထပ်ဆင့်အပ်နှင်းရာတာဝန်ရရှိထားသည်။ ယင်းနှင့်စပ်လျဉ်း၍ တမန်တော်ပေတရုက ရေးသားခဲ့သည်။ “သင်းအုပ်အရာ၌လည်းကောင်း၊ ခရစ်တော်၏ဆင်းရဲဒုက္ခဝေဒနာကို သိမြင်သောသက်သေအရာ၌လည်းကောင်း ခန့်ထားသောသူ၊ ထင်ရှားစေတော်မူလတံ့သော ဘုန်းအသရေတော်ကိုဆက်ဆံသောသူဖြစ်သော ငါပေတရုသည် သင်တို့တွင်ရှိသော သင်းအုပ်ချင်းတို့ကို တောင်းပန်ပါ၏။ သင်တို့နှင့်အတူရှိသော ဘုရားသခင်၏သိုးတော်စုကို ထိန်းခြင်းအမှုမှာ၊ အနိုင်ထိန်းရသောကြောင့်မဟုတ်၊ မစင်ကြယ်သောစီးပွားကို တပ်မက်သောကြောင့်မဟုတ်ဘဲ၊ အလိုလိုစေတနာစိတ်ရှိ၍ ကြည့်ရှုအုပ်ထိန်းကြလော့။ အသီးအသီးအုပ်သော အသင်းတော်တို့ကို အာဏာထား၍ အစိုးတရပြုသည်မဟုတ်ဘဲ၊ သိုးတော်စုရှေ့မှာ ပုံသက်သေကို ပြသောသူဖြစ်ကြလော့။ သို့ဖြစ်လျှင်၊ သိုးထိန်းအကြီးပေါ်ထွန်းတော်မူသောအခါ၊ သင်တို့သည် မညှိုးမနွမ်းတတ်သော ဘုန်းကြီးသောပန်းဦးရစ်သရဖူကို ခံရကြလိမ့်မည်။”—၁ ပေတရု ၅:၁-၄။

၃။ ခရစ်ယာန်အကြီးအကဲများသည် မည်သည့်ပင်မများဖြစ်သင့်သနည်း။

^၃ ခရစ်ယာန်အကြီးအကဲများသည် “လေလုံ၍ မိုးသက်မုန်တိုင်းကွယ်ရာအရပ်ကဲ့သို့လည်းကောင်း၊ သွေ့ခြောက်သောမြေ၌စီးသော ချောင်းရေကဲ့သို့လည်းကောင်း၊ နေပူသောအရပ်၌ ကျောက်လုံးကြီးအရိပ်ကဲ့သို့လည်းကောင်းဖြစ်ရကြမည်။” (ဟေရှာယ ၃၂:၁၊ ၂) ယင်းကအကြီးအကဲများသည် ဘုရားရှင်၏သိုးကဲ့သို့သောကျေးကျွန်များအတွက် လုံခြုံမှု၊ ငြိမ်သက်မှုနှင့်တည်ငြိမ်မှု ပင်မများဖြစ်သင့်သည်။ သိုးတော်စု၏ အကြီးအကဲများ သို့မဟုတ် လက်ထောက်သိုးထိန်းများမှာ “သာမန်ထက်ပို၍” တောင်းဆိုထားသည်။ အကြောင်းမှာ၊ သူတို့အား “များစွာသောဥစ္စာကိုအပ်နှင်း” ထားသောကြောင့်ဖြစ်သည်။ (လုကာ ၁၂:၄၈) သူတို့တွင် စောင့်ရှောက်ရမည့် အဖိုးထိုက်လှသော အပ်နှင်းထားရာအမှန်ပင်ရရှိထားပါသည်။

သင့်အားအဘယ်ကြောင့်အပ်နှင်းထား

၄။ အကြီးအကဲများ အဘယ်ကြောင့် ဤမျှလိုအပ်ရသနည်း။

^၄ ကမ္ဘာတစ်ဝန်း ယေဟောဝါသက်သေများ၏ အသင်းတော် ၆၀,၀၀၀ ကျော်တည်ရှိခြင်းက၊ ဘုရားရှင်၏သိုးတော်စုကို စောင့်ရှောက်ရန် ဝိညာဏာအရည်အချင်းပြည့် ယောက်ျားထောင်ပေါင်းများစွာ လိုအပ်စေသည်။ နိုင်ငံတစ်ခုစီတွင် အကြီးအကဲများစွာရှိပြီး၊ ယင်းကားရွှင်လန်းစရာအကြောင်းပင်။ ကမ္ဘာတစ်ဝန်းတွင် အသင်းတော်တစ်ခုစီ၌ ပျှမ်းမျှနိုင်ငံတော်ကြွေးကြော်သူ ၆၀ ခန့်ရှိသည်။ ထို့ကြောင့် အကြီးအကဲများအတွက် လုပ်ဆောင်စရာများစွာရှိလေသည်။—၁ ကောရိန္သု ၁၅:၅၈။

၅။ အကြီးအကဲအဖြစ်အမှုထမ်းရသော အခွင့်အရေးကို ဘယ်အပေါ်အခြေခံ၍ လူတစ်ဦးအားပေးသနည်း။

^၅ သင်သည်အကြီးအကဲတစ်ဦးဖြစ်လျှင် အဘယ်ကြောင့် ဤကောင်းချီးခံအခွင့်အရေးကို သင့်အားပေးအပ်ထားသနည်း။ အကြောင်းမှာ၊ သင်သည် အချို့အရာများလုပ်ခဲ့ပြီး သင်၌ဝိညာဏအရည်အချင်းရှိသောကြောင့်ဖြစ်သည်။ ဥပမာအနေနှင့်၊ သင်သည် ဘုရားနှုတ်ကပတ်တော်ကို အပတ်တကုတ်လေ့လာခဲ့ပေမည်။ (ယောရှု ၁:၇၊ ၈) အမှုဆောင်လယ်ကွင်းတွင် သင်သည် ဇွဲရှိစွာဖြင့်ပါဝင်ခဲ့ပြီး၊ အခြားသူများကိုလည်း နိုင်ငံတော်ကြွေးကြော်သူများဖြစ်လာရန် ကူညီပေးခဲ့ပေမည်။ “ရှေးမဆွက စုံစမ်းခြင်း” ခံပြီးနောက်၊ သင်သည် ဓမ္မအမှုထမ်းတစ်ဦးအနေနှင့် သစ္စာရှိစွာအမှုဆောင်လျက်ရှိသည်။ ကြီးကြပ်ရေးမှူးတစ်ဦးဖြစ်ရခြင်းသည် “ကောင်းသောအမှု” ဖြစ်ကြောင်း သင်လေးမြတ်ပြီး၊ အကြီးအကဲတစ်ဦးဖြစ်ရန် သင် ‘တောင့်တ’ သို့မဟုတ် အရည်အချင်းရှိအောင် သင်ရှာကြံခဲ့သည်။ (၁ တိမောသေ ၃:၁၊ ၁၀။ NW) တိမောသေကဲ့သို့ သင်သည် “ညီအစ်ကိုတို့တွင် အသရေရှိသောသူဖြစ်” ခဲ့သည်။ (တမန်တော် ၁၆:၂) အကြီးအကဲအဖြစ် ထောက်ခံခဲ့စဉ်က သင်သည် အသက် ၃၀ နီးပါးသို့မဟုတ် ထို့ထက်ပိုကြီးကောင်းကြီးမည်ဖြစ်ပြီး၊ ဘဝတွင် အတွေ့အကြုံရှိနေပေမည်။ အသင်းတော်သည် သင့်အားဝိညာဏပါရမီရင့်ကျက်သူ၊ ထိရောက်သောကျမ်းစာသွန်သင်ချက်ပေးနိုင်သူ၊ ချဉ်းကပ်နိုင်သူနှင့် သူတစ်ပါးအတွင်းရေးထိန်းသိမ်းထားနိုင်သူအဖြစ် လေးစားလာခဲ့သည်။—သု၊ ၂၅:၉၊ ၁၀။

သင်၏အပ်နှင်းရာကို မည်သို့စောင့်ရှောက်ပုံ

၆၊ ၇။ ၁ တိမောသေ ၄:၁၃-၁၅ ကအကြီးအကဲတစ်ဦးအနေနှင့် မိမိအားအပ်နှင်းရာကို စောင့်ရှောက်ရန်မည်သည့်သြဝါဒပေးထားသနည်း။

^၆ မှန်ပါသည်။ သင်သည် အကြီးအကဲတစ်ယောက်ဖြစ်လျှင်၊ သင်၌ခရစ်ယာန်ကြီးကြပ်မှု အပ်နှင်းထားခြင်းသည် အကြောင်းရင်းကောင်းရှိ၍ဖြစ်သည်။ မည်မျှကောင်းသောအခွင့်အရေးကြီးပါတကားဟု သင်ခံစားခဲ့ပေမည်။ သို့သော်သင့်အပ်နှင်းရာကို သင်မည်သို့စောင့်ရှောက်မည်နည်း။

^၇ အကြီးအကဲတစ်ဦးအနေနှင့် သင်၏အပ်နှင်းရာကို စောင့်ရှောက်နည်းတစ်ခုမှာ အပြုသဘောရှိပြီး၊ သင်၏တာဝန်များကို ထမ်းဆောင်ရာ၌ ကြိုးပမ်းရန်ဖြစ်သည်။ ကျွန်ုပ်တို့အားလုံး ယေဟောဝါအဖွဲ့အစည်းတွင် ခန့်အပ်ထားရာတာဝန်အသီးသီးရရှိထားသည်။ ထို့ကြောင့်၊ သင့်နေရာတွင် သင်နေပြီး ‘အငယ်ဆုံးသောသူ’ အဖြစ် ပြုမူရောင့်ရဲနေပါ။ (လုကာ ၉:၄၆-၄၈။ တရားသူကြီး ၇:၂၁နှင့်နှိုင်းယှဉ်ပါ) သင်၏အခွင့်အရေးကို မြတ်နိုးပြီး၊ ဘယ်သောအခါမျှ ‘ပျင်းရိ’ သောလက်ဖြင့် မလုပ်ကိုင်ပါနှင့်။ (သု၊ ၁၀:၄) ရပ်တန့်မနေဘဲ ယေဟောဝါရှင်၏အကူအညီဖြင့်၊ အမှုဆောင်ကဏ္ဍ အားလုံးတွင်တိုးတက်နေပါ။ ပေါလု တိမောသေကို ပေးခဲ့သော အကြံဉာဏ်ကိုလိုက်နာပါ။ “ကျမ်းစာကိုဖတ်ခြင်း၊ တိုက်တွန်းသွေးဆောင်ခြင်း၊ ဆုံးမသြဝါဒပေးခြင်းကို ကြိုးစား၍ပြုလော့။ ဗျာဒိတ်တော်ကိုခံ၍၊ သင်းအုပ်များတို့သည် လက်တင်ခြင်းနှင့်တကွ၊ သင်၌အပ်ပေးသော ဆုကျေးဇူးကို မပြုစုဘဲမနေနှင့်။ သင်၏တိုးပွားခြင်းကို လူအပေါင်းတို့အား ထင်ရှားစေခြင်းငှာ၊ ဤအရာများကို စိတ်စွဲလမ်း၍ ကြိုးစားအားထုတ်လော့။”—၁ တိမောသေ ၄:၁၃-၁၅။

၈။ အကြီးအကဲတစ်ဦးသည် သွန်သင်ချက်မှန်ပေးနိုင်ရန်နှင့် စည်းဝေးများတွင် ဝိညာဏအရ ကြွယ်ဝစွာပေးဝေနိုင်ရန် ဘာကအကူအညီပေးမည်နည်း။

^၈ သင်၌အကျိုးရှိသော ကိုယ်ပိုင်လေ့လာမှု အစီအစဉ်ကောင်းရှိကြောင်း၊ သေချာပါစေ။ အကြီးအကဲတစ်ဦးအနေနှင့် သင့်အားလျော်ကန်သော ကျမ်းစာသွန်သင်ချက်များပေးရန် မှန်ကန်စွာမျှော်လင့်ထားသည်။ ဤတာဝန်အတွက် အသင့်ရှိရန် သမ္မာကျမ်းစာတစ်အုပ်လုံးကို ဆင်ခြင်တွေးတောလျက် အကြိမ်များစွာပင်ဖတ်ရှုပြီးပြီလော။ (သု၊ ၁၅:၂၈) သင်၏စင်မြင့်တာဝန်များကောအသို့နည်း။ ကျွန်ုပ်တို့၏ စည်းဝေးများတွင် တက်ရောက်သူများကို ဝိညာဉ်ရေးအရ ကြွယ်ဝစေရေးအတွက် ဝေမျှနိုင်ရန်၊ ယေဟောဝါ၏အကူအညီကို ဆုတောင်းလျက်တောင်းလျှောက်ပြီး၊ ယင်းတို့ကိုကောင်းစွာပြင်ဆင်ပါ။ အကြီးအကဲများသည် အထူးသဖြင့် ‘ကြားနာသောသူတို့၏ အကျိုးကိုပြုစုစေခြင်းငှာ၊ တည်ဆောက်စရာဖို့ကောင်းသော စကားကိုသာ’ ပြောသင့်သည်။—ဧဖက် ၄:၂၉။ ရောမ ၁:၁၁။

၉။ ၂ တိမောသေ ၄:၂ အရ၊ အကြီးအကဲတစ်ဦးဘာပြုလုပ်ရမည်နည်း။

^၉ အကြီးအကဲတစ်ဦးအနေနှင့် ပေါလု၏တိုက်တွန်းချက်ကို နာယူပါ။ “နှုတ်ကပတ်တရားတော်ကိုဟောပြောလော့။ အချိန်ရှိသည်ဖြစ်စေ၊ မရှိသည်ဖြစ်စေ၊ ကြိုးစားအားထုတ်လော့။ အပြစ်ကိုဖေါ်ပြလော့။ ဆုံးမခြင်းကိုပြုလော့။ အလွန်ရှည်သောစိတ်နှင့် ဩဝါဒမျိုးကိုပေး၍ တိုက်တွန်းသွေးဆောင်လော့။” (၂ တိမောသေ ၄:၂) ပေါလုသည် အယူဖောက်ပြန်ခြင်းကိစ္စကိုစိုးရိမ်ခဲ့သည်။ အကြောင်းမှာ၊ အသင်းတော်ရှိအချို့သည် ‘စကား. . .ငြင်းခုံခြင်း’ ‘မိုက်မဲ၍ပညာကင်းသောပုစ္ဆာအမေး’ များမေးခြင်းနှင့် ‘သမ္မာတရားကိုဝန်မခံ’ သူများဖြစ်နေသည်။ (၂ တိမောသေ ၂:၁၄-၁၈၊ ၂၃-၂၅; ၃:၈-၁၃; ၄:၃၊ ၄) အသင်းတော်သည် ဒုက္ခအခြေအနေ သို့မဟုတ် သာယာသောအခြေအနေ တွေ့ကြုံနေရသည်ဖြစ်စေ၊ မတွေ့ကြုံရသည်ဖြစ်စေ၊ တိမောသေသည် “နှုတ်ကပတ်တော်ကိုဟောပြော” နေရမည်။ ယင်းကယုံကြည်သူဘက်သားများအား အယူဖောက်ပြန်ခြင်းကို တွန်းလှန်ရန်အားရှိစေမည်။ ယနေ့တွင်အလားတူပင် အကြီးအကဲများသည် ထိုးထွင်းသောနှုတ်ကပတ်တော်ကို နှလုံးသို့ရောက်စေပြီး၊ ယေဟောဝါ၏စံချိန်များကို စွဲကိုင်ရန်အားပေးသော ဘုရားသတင်းတော်ကို ဟောပြောရမည်။—ဟေဗြဲ ၄:၁၂။

၁၀။ အကြီးအကဲတစ်ဦးသည် မိမိ၏အိမ်ထောင်၊ အခြားသူများနှင့်အတူ အမှုဆောင်လယ်ကွင်းတွင် အဘယ်ကြောင့်မှန်မှန်လုပ်ဆောင်သင့်သနည်း။

^၁၀ အာဏာပိုင်ပိုင်နှင့် ပြောနိုင်ရန် အကြီးအကဲတစ်ဦးသည် ဘုရားနှုတ်ကပတ်တော်နှင့်အညီနေရမည်။ သို့သော်သူသည် ‘နှုတ်ကပတ်တော်ဟောပြောခြင်း’ ကို အသင်းတော်အတွင်း စင်မြင့်ပေါ်မှာသာ ပြုလုပ်လျှင် သူသည် မိမိအားပေးအပ်ထားရာကို အပြည့်အဝမစောင့်ရှောက်ချေ။ ယင်းအထက်အောက် ကျမ်းပိုဒ်၌ ပေါလုသည်တိမောသေအား “ဧဝံဂေလိဟောပြောသူလုပ်ငန်းကို ဆောင်ရွက်လော့” ဟု တိုက်တွန်းခဲ့သည်။ အကြီးအကဲတစ်ဦးအနေနှင့် ‘သင်၏ဓမ္မအမှုကို အကုန်အစင်ပြု’ နိုင်ရန် ဘုရားနှုတ်ကပတ်တော်ကို သင်သည် “လူစုဝေးရာနှင့်တစ်အိမ်တက်တစ်အိမ်ဆင်း” တွင်ဟောပြောရမည်။ (၂ တိမောသေ ၄:၅။ တမန်တော် ၂၀:၂၀၊ ၂၁။ NW) ထို့ကြောင့်၊ သင်၏မိသားစုဝင်များနှင့် အမှုဆောင်လယ်ကွင်းတွင် လုပ်ဆောင်ပါ။ ယင်းကသင်နှင့် သင်၏ဇနီးစပ်ကြားဝိညာဏနှောင်ကြိုးကိုဖြစ်စေနိုင်ပြီး၊ သင်၏ကလေးများကို ကြီးစွာသောအကျိုးပြုလိမ့်မည်။ အသင်းတော်ရှိ အခြားအသင်းသားများနှင့် ဟောပြောခြင်းလုပ်ငန်းတွင် အတူပါဝင်ရန်လည်း အချိန်အချို့ကို အသုံးပြုပါ။ ၄င်းကဝိညာဏနှောင်ကြိုးကို ခိုင်မြဲစေပြီး၊ ညီအစ်ကိုချင်းမေတ္တာကို တိုးပွားစေသည်။ (ယောဟန် ၁၃:၃၄၊ ၃၅) မှန်ပါသည်။ အကြီးအကဲတစ်ဦးသည် မိမိ၏မိသားစုနှင့်အသင်းတော်စပ်ကြား၊ တန်ဖိုးရှိအချိန်ကို ခွဲဝေရာ၌ မျှတမှုရှိရန်ကြိုးပမ်းရမည်။ ပိုင်းခြားသိမြင်ခြင်းဖြင့် တစ်ဘက်ကိုအချိန်များစွာပေးမိ၍ အခြားတစ်ဘက်ကို လျစ်လျူရှု၊ ယိုယွင်းသွားစေမည်မဟုတ်ချေ။

၁၁။ အကြီးအကဲတစ်ဦးသည်၊ သင်ပြသူတစ်ဦးအဖြစ် သူ၏စွမ်းရည်ကို တိုးပွားရန် အဘယ်ကြောင့်ကြိုးပမ်းသင့်သနည်း။

^၁၁ အကြီးအကဲတစ်ဦးအနေဖြင့် အပ်နှင်းထားရာကို စောင့်ရှောက်ရန် သင်ပြသူတစ်ဦးအနေနှင့် သင်၏စွမ်းရည်တိုးပွားရန်အားထုတ်လုပ်ဆောင်ပါ။ “သင်ပြသောသူသည် သင်ပြခြင်းအမှုကိုပြုစေ” “တိုက်တွန်းနှိုးဆော်သောသူသည် တိုက်တွန်းနှိုးဆော်ခြင်းအမှုကိုပြုစေ” ဟုပေါလုပြောခဲ့သည်။ (ရောမ ၁၂:၇၊ ၈။ NW) သင်ပြသူတစ်ဦးသည် အခြားသူများရှေ့တွင် သင်ကြားပြသသူအဖြစ် ရပ်တည်နေသောကြောင့် သူ့ထံမှအခြားသူများသည် များစွာမျှော်လင့်နိုင်ခွင့်ရှိသည်။ အကြီးအကဲတစ်ဦးသည် သွန်သင်ရာတွင် အမှားကြီးမှားခဲ့ပြီး၊ ယုံကြည်သူဘက်သားများအား ပြဿနာဖြစ်ပေါ်စေလျှင် ဘုရား၏တရားစီရင်ခြင်း ခံရမည်။ မှန်ပါသည်။ သင်ပြသူများသည် “သာ၍ကျပ်တည်းသောစစ်ကြောစီရင်ခြင်းကိုခံရမည်။” (ယာကုပ် ၃:၁၊ ၂။ မဿဲ ၁၂:၃၆၊ ၃၇) ထို့ကြောင့် အကြီးအကဲများသည် ဘုရားနှုတ်ကပတ်တော်၏လေးနက်သော ကျောင်းသားများဖြစ်ရန် လိုအပ်ပြီး၊ အသက်တာတွင် ကျင့်သုံးရမည်။ သို့နှင့်၊ ကိုယ်တိုင်ကျင့်သုံးခြင်းဖြင့် နောက်ခံထားသော သူတို့၏ကျမ်းဆိုင်ရာသွန်သင်ချက်ကို ယုံကြည်သူဘက်သားများသည် အလွန်လေးမြတ်ကြပေလိမ့်မည်။ ယင်းသည် အသင်းတော်ကို အယူဖောက်ပြန်ခြင်း အပါအဝင်မလျောက်ပတ်သော လွှမ်းမိုးမှုများမှလည်း ကာကွယ်ပေးမည်။

ထောင်ချောက်များကိုရှောင်

၁၂။ တစ်ခါက ဤစာစောင်တွင် ထုတ်ဝေခဲ့သောမည်သည့်သွန်သင်ချက်သည် အကြီးအကဲတစ်ဦးအား လျှာကိုအလွဲသုံးစားမပြုရန် အကူအညီပေးမည်နည်း။

^၁၂ အကြီးအကဲတစ်ဦးအနေနှင့် ထောင်ချောက်များကို ရှောင်ခြင်းဖြင့်လည်း သင့်အားအပ်နှင်းရာကို စောင့်ရှောက်ပါ။ ယင်းတို့မှ တစ်ခုမှာ သင်ပြသူတစ်ဦးအနေနှင့် လျှာကိုတလွဲသုံးခြင်းဖြစ်သည်။ ၄င်းနှင့်စပ်လျဉ်း၍ သတိပြုရန်လိုအပ်ကြောင်း ယေဟောဝါအဖွဲ့အစည်းမှ အလေးအနက်တင်ပြခဲ့သည်မှာ ကြာပေပြီ။ ဥပမာအနေနှင့် ၁၈၉၇ ခု၊ မေလ ၁၅ ရက်ထုတ်တွင် ယင်းစာစောင်သည် ယာကုပ် ၃:၁-၁၃ ကိုဆွေးနွေးခဲ့ပြီး၊ အကြီးအကဲများကို ဤသို့အထူးပြောထားသည်။ “သူတို့တွင် ကျွမ်းကျင်လိမ္မာသောလျှာရှိလျှင်၊ မဟာကောင်းချီးများအတွက် လမ်းကြောင်းဖြစ်နိုင်ပြီး၊ အတော်များများကို သခင်ဘုရား၊ သမ္မာတရားနှင့်ဖြောင့်မတ်ခြင်းလမ်းသို့ တိမ်းညွတ်စေမည်။ သို့မဟုတ်အခြားတစ်ဘက်မှကြည့်လျှင် အမှားနှင့်ရောနှောနေပါက လျှာသည် မပြောပြနိုင်လောက်အောင် ဘေးဥပဒ်ပြုနိုင်ပြီး၊ ယုံကြည်ခြင်း၊ စာရိတ္တ၊ မွန်မြတ်သောလုပ်ငန်းများကို ထိခိုက်စေနိုင်သည်။ သင်ကြားပြသခြင်း ဆုကျေးဇူးရရှိသူတစ်ဦးသည် ဘုရားနှင့်လူရှေ့တွင် တာဝန်တိုးများလာသည်. . . ကောင်းချီးမင်္ဂလာ၊ လန်းဆန်းမှုနှင့် ခွန်အားဖြစ်စေမည့် ဘုရားနှုတ်ကပတ်တော်စီးဆင်းမည့်စမ်းရေပေါက် မည်သူမဆိုသည် ခါးသောရေ၊ ကျိန်ဆဲခြင်းဖြစ်စေသော မှောက်မှားသော သွန်သင်ချက်များ၊ ဘုရားကိုရှုတ်ချ၍ ကိုယ်တော်၏နှုတ်ကပတ်တော်ကို လွဲမှား၊ ခိုက်စေသည့် ပြောဆိုသူမဖြစ်သင့်ချေ။ ဦးဆောင်သူများ ရွေးချယ်ရာ၌ ‘လျှာ’ အရည်အချင်းကို ပြည့်မီရန် သတ်မှတ်ချက်ကို လျစ်လျူမရှုသင့်ချေ။ မီးကဲ့သို့လျှာ ရှိသူကိုမဟုတ်ဘဲ၊ နူးညံ့သူ၊ လျောက်ပတ်သူ၊ သူတို့၏လျှာကို ‘ထိန်းချုပ်’ နိုင်သူ၊ “ဘုရားရှင်၏မြွက်ဟချက်နှင့်အညီ ‘ပြောဟော’ ရန်ဂရုစိုက်ကြိုးပမ်းသူများကိုသာ ရွေးချယ်သင့်သည်။” ထို့ကြောင့်အကြီးအကဲတစ်ဦးသည် သူ၏လျှာကို မှန်ကန်စွာ အသုံးပြုရန်မည်မျှအရေးကြီးလှပါတကား။

၁၃။ အကြီးအကဲများသည် အပန်းဖြေခြင်းနှင့်စပ်လျဉ်း၍ မည်သို့သတိပြုသင့်သနည်း။

^၁၃ အလွန်အကျွံအပန်းဖြေခြင်းသည်လည်း ရှောင်ရမည့်ထောင်ချောက်တစ်ခုဖြစ်သည်။ အပန်းဖြေခြင်းသည် လန်းဆန်း၊ တည်ဆောက်မှုဖြစ်စေသင့်ပြီး၊ ခရစ်ယာန်တစ်ဦးကို နွမ်းလျ၊ သွေဖည်မသွားစေသင့်။ ထို့ပြင်၊ ကြီးကြပ်ရေးမှူးများသည် “လျောက်ပတ်စွာကျင့်သောသူ” ဖြစ်ရမည်။ (၁ တိမောသေ ၃:၂) အပန်းဖြေခြင်းနှင့် စပ်လျဉ်း၍ သင့်ပြုမူပုံသည်လျောက်ပတ်လျှင်၊ သင်နှင့်သင်မိသားစုကို ကာကွယ်ပေးမည်ဖြစ်ပြီး၊ အသင်းတော်အတွက် ပုံသက်သေကောင်းဖြစ်စေမည်။ ရက်သတ္တပတ်၏အကုန်ပိုင်းတွင် သင်၏ယုံကြည်သူဘက်သားများသည် အမှုဆောင်လယ်ကွင်းဝယ် ကြိုးကြိုးစားစားပါဝင်နေချိန်တွင် အပန်းဖြေမှုရည်ရွယ်ချက်အတွက် သင်မကြာခဏ ထွက်သွားနေလျှင် ပုံသက်သေကောင်းတင်ပြရာရောက်မည်မဟုတ်ချေ။ သတင်းကောင်းကို ကြေညာရမည်ဖြစ်ပြီး၊ အကြီးအကဲများသည် ဤလုပ်ငန်းတွင် ဇွဲရှိသော နိုင်ငံတော်ကြွေးကြော်သူများအဖြစ် ဦးဆောင်ရမည်။—မာကု ၁၃:၁၀။ တိတု ၂:၁၄။

၁၄။ (က) အကြီးအကဲများ လိင်သီလယိုယွင်မှုကို ကာကွယ်ရန်မည်သည့်ကျမ်းဆိုင်ရာ ပုံသက်သေများပေါ်လွင်သနည်း။ (ခ) အကြီးအကဲများသည်၊ ဝိညာဏညီအစ်မများကိုကူညီရာတွင် မည်သည့်ထပ်တလဲလဲအကြံပြုချက်ကို လျစ်လျူမရှုသင့်သနည်း။

^၁၄ လိင်သီလယိုယွင်းခြင်းသည် ရှောင်ရှားရမည့် နောက်ထောင်ချောက်တစ်ခုဖြစ်သည်။ ဘုရားလူမျိုးတော်၏ တည်ကြည်မှုကို ချိုးဖျက်ရန်စာတန်၏ ကြိုးပမ်းမှုတွင်အသုံးပြုသော သွေးဆောင်မှုများကို မတွန်းလှန်ပါက လောက၏စာရိတ္တယိုယွင်းမှုသည် အကြီးအကဲတစ်ဦးကိုပင် လွှမ်းမိုးနိုင်သည်။ (မဿဲ ၄:၁-၁၁။ ၆:၉၊ ၁၃ နှင့်နှိုင်းယှဉ်ပါ) ပရောဖက်ဗာလမ်ကိုသတိရပါ။ ဣသရေလများကို သူကျိန်ဆဲရန် ကြိုးစားရာတွင် မအောင်မြင်သောအခါ သူတို့အားလိင်ကိုးကွယ်မှုတွင် ပါဝင်လာရန် သွေးဆောင်နိုင်ပါက ယေဟောဝါကိုယ်နှိုက် သူတို့ကို ကျိန်ဆဲမည်ဖြစ်ကြောင်း သူတွေးတောမိခဲ့သည်။ ထို့ကြောင့်ဗာလမ်က မောဘဘုရင်ဗာလက်အား “ဣသရေလအမျိုးသားတို့သည် ရုပ်တုရှေ့မှာ ပူဇော်သောယဇ်ကောင်ကို စားစေခြင်းငှာလည်းကောင်း၊ မတရားသောမေထုန်ကို ပြုခြင်းငှာလည်းကောင်း ထိမိ၍လဲစရာအရာကို သူတို့ရှေ့၌ချထားမည်အကြောင်း” အကြံပေး၏။ သူတို့သည် ယင်းထောင်ချောက်ကို ရှောင်ရှားခဲ့သလော။ မရှောင်ရှားခဲ့ပါ။ အကြောင်းမှာ၊ သူတို့သည် မောဘအမျိုးသမီးများနှင့်ဖောက်ပြားကြပြီး သူတို့၏ဘုရားများကို ဦးချသောကြောင့် ယေဟောဝါ၏ဒဏ်ခတ်မှုဖြင့် ဣသရေလ ၂၄၀၀၀ သေဆုံးခဲ့ရသည်။ (ဗျာဒိတ် ၂:၁၄။ တောလည်ရာ ၂၅:၁-၉) ‘ဘုရား . . . စိတ်နှလုံးတော်နှင့်ညီညွတ်သူ’ ဒါဝိဒ်ပင်လျှင် လိင်သီလယိုယွင်းခြင်း ထောင်ချောက်ထဲကျသွားသည်ကိုသတိရပါ။ (၁ ဓမ္မရာဇဝင် ၁၃:၁၄။ ၂ ဓမ္မရာဇဝင် ၁၁:၂-၄) အကြီးအကဲတစ်ဦးအနေနှင့် ဝိညာဏညီအစ်မတစ်ဦးကို နှစ်ယောက်တည်းမကူညီရန်၊ ဤတာဝန်ကိုထမ်းရွက်ရာတွင် နောက်ထပ်အကြီးအကဲတစ်ဦးအတူရှိနေရန် “သစ္စာရှိကျေးကျွန်” ၏ထပ်တလဲလဲအကြံပေးချက်ကို နာယူပါ။—လုကာ ၁၂:၄၂။

၁၅။ အကြီးအကဲမိသားစုသည်၊ သူ့အားရုပ်ဝါဒထောင်ချောက်ထဲမကျရောက်အောင်မည်သို့ကူညီပေးနိုင်သနည်း။

^၁၅ ရုပ်ဝါဒသည် အကြီးအကဲတစ်ဦး ရှောင်ရှားရမည့် နောက်ထောင်ချောက်တစ်ခုဖြစ်သည်။ ယေဟောဝါသည် လောက်ငစွာပေးတော်မူမည်ကိုသိလျက် မရှိမဖြစ်သောအရာများနှင့် ရောင့်ရဲနေပါ။ (မဿဲ ၆:၂၅-၃၃။ ဟေဗြဲ ၁၃:၅) သင်၏မိသားစုကို အသုံးအစွဲစေ့စပ်ရန် လေ့ကျင့်ပါ။ အကြောင်းမှာ၊ ဖြုန်းတီးခြင်းသည် မိသားစုကို ကူညီခြင်း၊ အမှုဆောင်လုပ်ငန်းတွင်ပါဝင်ခြင်း၊ အသင်းတော်ကိုခိုင်ခန့်စေခြင်းနှင့် နိုင်ငံတော်အကျိုးသယ်ပိုးရာ၌ တိုးမြှင့်ခြင်းတို့တွင် အသုံးပြုနိုင်သည့် အချိန်နှင့်ဥစ္စာကြေးငွေ၊ ခွန်အားတို့၏ သူခိုးဖြစ်သည်။ အကြီးအကဲတစ်ဦးသည် ဤကိစ္စတွင် သူ၏မိသားစုပူးပေါင်းလုပ်ဆောင်မှုမှ အကျိုးရရှိပြီး၊ အမှန်မလိုအပ်သောအရာများအတွက် သူ့အားဖိအားမပေးသောကြောင့် သူအထူးကျေးဇူးတင်သည်။ “နှောင့်ရှက်ခြင်းနှင့်ယှဉ်၍ ကြီးစွာသောစည်းစိမ်ထက် ထာဝရဘုရားကိုကြောက်ရွံ့ခြင်းနှင့် ယှဉ်သောဥစ္စာအနည်းငယ်သည် သာ၍ကောင်းပေ၏” ဟူသည်မှာမှန်ကန်လှပါသည်။—သု၊ ၁၅:၁၆။

“ကိုယ်ကိုသတိနှင့် ကြည့်ရှုကြလော့”

၁၆။ ပေါလုသည် ဧဖက်ရှိကြီးကြပ်ရေးမှူးများအားမည်သည့်သြဝါဒပေးခဲ့သနည်း။

^၁၆ အကြီးအကဲများသည် သူတို့၏အပ်နှင်းရာကို စောင့်ရှောက်ရမည်ဆိုလျှင် ဧဖက်ရှိကြီးကြပ်ရေးမှူးများထံ ပေါလု၏အကြံဉာဏ်ကို ကျင့်သုံးရမည်။ သူတို့အားဤသို့ပြောခဲ့သည်။ “သင်တို့သည် ကိုယ်ကိုသတိနှင့်ကြည့်ရှုကြလော့။ ဘုရားသခင်သည် မိမိအသွေးနှင့် ဝယ်တော်မူသော အသင်းတော်ကို လုပ်ကျွေးစေခြင်းငှာ၊ သန့်ရှင်းသောဝိညာဉ်တော်သည် သင်တို့ကိုအအုပ်အချုပ်ခန့်ထားတော်မူသော သိုးစုတစ်စုလုံးကိုလည်း သတိနှင့်ကြည့်ရှုကြလော့။ အကြောင်းမူကား၊ ငါမရှိသည်နောက် ကြမ်းတမ်းသော တောခွေးတို့သည် သိုးများကို မသနားဘဲသင်တို့အထဲသို့ဝင်မည်ကိုလည်းကောင်း၊ တပည့်တော်များကို သွေးဆောင်ခြင်းငှာ၊ မှားသောစကားကို ပြောတတ်သောလူတို့သည် သင်တို့အထဲ၌လည်း ပေါ်လာမည်ကိုလည်းကောင်း ငါသိ၏။ ထိုကြောင့်စောင့်ရှောက်၍နေကြလော့။ ငါသည်သုံးနှစ်ပတ်လုံး နေ့ညမပြတ်လူအပေါင်းတို့ကို မျက်ရည်နှင့်တကွဆုံးမ၍နေကြောင်းကို အောက်မေ့ကြလော့။”—တမန်တော် ၂၀:၂၈-၃၁။

၁၇၊ ၁၈။ နှစ်ပေါင်း ၈၀ ခန့်က ဤမဂ္ဂဇင်းတွင်ထုတ်ဝေခဲ့သောမည်သည့်သွန်သင်ချက်သည် ခရစ်ယာန်အကြီးအကဲများနှင့် သက်ဆိုင်နေသေးသနည်း။

^၁၇ လွန်ခဲ့သည့်နှစ်ပေါင်း ၈၀ ကျော်က ကင်းမျှော်စင် (မတ်လ ၁၊ ၁၉၀၉) သည်၊ ဖေါ်ပြပါ ပေါလု၏အကြီးအကဲချင်းတို့အား သွန်သင်ချက်ကို ကိုးကားပြီး ဤသို့ဆိုခဲ့သည်။ “နေရာတိုင်းရှိ အကြီးအကဲများသည် အထူးနာယူရန်လိုအပ်သည်။ စုံစမ်းမှုတိုင်းတွင် ပို၍မျက်နှာသာရသူနှင့် ပို၍ပေါ်လွင်သူသည် အပြင်းထန်ဆုံးအတားအဆီးနှင့် စုံစမ်းခြင်းများရင်ဆိုင်ရသောကြောင့်ဖြစ်သည်။ ထို့ကြောင့် [ယာကုပ်] ကတိုက်တွန်းသည်။ ‘ငါညီအစ်ကိုတို့၊ ငါတို့သည် သာ၍ကျပ်တည်းသော စစ်ကြောစီရင်ခြင်းကိုခံရမည်ဟု သင်တို့သိ၍ အများသောဆရာမဖြစ်ကြနှင့်။’ ထို့ကြောင့်၊ ကျွန်ုပ်တို့သည် နှလုံးဖြူစင်သော၊ တစ်ကိုယ်ကောင်းစိတ်ကင်းမဲ့သော အကြီးအကဲများအားလုံး၊ လူသားအားလုံးအတွက် မေတ္တာနှင့်ဆန္ဒကောင်းရှိရန်နှင့် သူတို့အားလုံးသည် သန့်ရှင်းသောဝိညာဉ်တော်၏ အသီးများ၊ ကျေးဇူးတော်များနှင့်ပြည့်၍ သိုးတော်စုကိုလည်း ကြည့်ရှုရန်တိုက်တွန်းသည်။ သိုးတော်စုသည် သခင်ဘုရား၏ ပိုင်ဆိုင်ရာဖြစ်သောကြောင့် သခင်ဘုရားနှင့် သိုးတော်စုအပါအဝင်အပေါ် သင်တာဝန်ရှိသည်ကို သတိရပါ။ သိုးထိန်းချုပ်ကြီးနှင့် စာရင်းရှင်းရမည့်သူများအနေနှင့် သိုးတော်စု၏စိုးလ် (အကျိုး) ကြည့်ရှုရမည်ကိုသတိရပါ။ အရာခပ်သိမ်းတွင် မေတ္တာသာလျှင် အဓိကအရာဖြစ်ကြောင်းသတိရပါ။ အယူဝါဒကိုလည်း လျစ်လျူမရှုဘဲနေစဉ် ကိုယ်တော်၏ခန္ဓာအင်္ဂါအသီးသီးတွင် သခင်ဘုရား၏စိတ်ဝိညာဉ်တည်ရှိရန်၊ သို့ဖြင့်၊ သူတို့သည် ‘အလင်းတော်’ ရှိ သန့်ရှင်းသူများ၏ အမွေကိုခံနိုင်သူများဖြစ်လာရန်နှင့် ဘုရားအလိုတော်နှင့်အညီ၊ ဤဆိုးယုတ်သောအချိန်တွင် မလဲကျဘဲ အရာခပ်သိမ်းကို လုပ်ဆောင်ပြီးနောက် ခရစ်တော်၊ ကိုယ်တော်.ခန္ဓာ၊ ကိုယ်တော်.အဝင်၊ ကိုယ်တော်.တွဲဘက်ပူဇော်သူများ၊ ကိုယ်တော်.တွဲဘက်အမွေခံများတွင် အပြည့်အဝရပ်တည်နိုင်ရန်အထူးကြည့်ရှုကြလော့။”

^၁၈ ယင်းစကားများသည် ထိုစောစောပိုင်းအချိန်က ယေဟောဝါအဖွဲ့အစည်း၏အခြေအနေ၊ နားလည်မှုနှင့်အညီ ဝိညာဏဘိသိက်ခံအကြီးအကဲများ၊ ယုံကြည်သူဘက်သားများကို ရည်ညွှန်းခဲ့သည်။ သို့ပင်ငြားလည်း၊ ထိုသွန်သင်ချက်သည် ယနေ့တွင်မည်မျှသက်ဆိုင်လှပါတကား။ သူတို့၏မျှော်လင့်ချက်သည် ကောင်းကင်ဖြစ်စေ၊ မြေကြီးဖြစ်စေ ခရစ်ယာန်အကြီးအကဲများသည် မိမိတို့ကိုယ်ကို ဂရုစိုက်ရမည်ဖြစ်ပြီး၊ သူတို့အားအပ်နှင်းထားရာကို စောင့်ရှောက်ရမည်။ ဘုရားသိုးတော်စု၏အကျိုးကို မေတ္တာဖြင့်စောင့်ရှောက်ရမည်။

သင့်အားအပ်နှင်းရာကို စောင့်ရှောက်ခြင်းမှ ပျော်ရွှင်မှုရစေ

၁၉၊ ၂၀။ အကြီးအကဲများသည် သူတို့အားအပ်နှင်းထားရာကိုစောင့်ရှောက်သောအခါ ပျော်ရွှင်မှုရရှိကြောင်း အဘယ်ကြောင့်ပြောနိုင်သနည်း။

^၁၉ ခရစ်ယာန်အကြီးအကဲတစ်ဦးအနေနှင့် သင့်အားအပ်နှင်းရာကို စောင့်ရှောက်ခြင်းဖြင့် ရွှင်လန်းမှု—နှလုံးထဲမှပျော်ရွှင်မှု—ကိုဖြစ်ပေါ်စေသည်။ အရေးကြီးတာဝန်တစ်ရပ်ကို ကောင်းစွာထမ်းရွက်ရာတွင် ပျော်ရွှင်မှုရှိသည်။ ထို့ကြောင့်သတိရှိပါ။ ဆုတောင်းပါ။ ကြိုးပမ်းပါ။ အကြီးအကဲတစ်ဦးအနေနှင့် သင့်ထံအပ်နှင်းရာကို စောင့်ရှောက်၍ “ကိုယ်တော်မှာထားတော်မူသည်အတိုင်း အကျွန်ုပ်ပြုပါပြီ” ဟု အတွင်းရေးမှူး၏ မင်အိုးပါသူကဲ့သို့ သင်ပြောနိုင်မည့်အချိန်ကို စောင့်မျှော်ပါလေ။—ယေဇကျေလ ၉:၃၊ ၄၊ ၁၁။

^၂၀ မှန်ပါသည်။ နောဧကို “မှာထားတော်မူသည်အတိုင်းပြုလေ၏” ဟုဆိုသကဲ့သို့၊ သင်ပြောနိုင်ရန် အကြီးအကဲတစ်ဦးအနေနှင့်၊ သစ္စာရှိရှိလုပ်ဆောင်ပါ။ (ကမ္ဘာဦး ၆:၂၂) ထိုသို့ကြိုးပမ်းဆောင်ရွက်ခြင်းဖြင့်၊ အသင်းတော်သည် နည်းလမ်းများစွာ အကျိုးခံစားရသည်။ အဓိကအနေနှင့် မိမိတို့အားအပ်နှင်းထားရာကို စောင့်ရှောက်သောသစ္စာရှိအကြီးအကဲများ၊ ခိုင်မာ၍လှုပ်လှုပ်ရှားရှားနှင့်အမှုထမ်းနေသော အသင်းတော်များဖြင့် ယေဟောဝါရှင်သည် ဂုဏ်တင်ခံရလေသည်။ သို့သော်သင်သည် “ကောင်းလေစွ၊ ကျွန်ကောင်း” ဟု အပြောခံရရန်အတွက် ထပ်ဆင့်လိုအပ်သည်များရှိသေးသည်။ (လုကာ ၁၉:၁၇။ NW) အကြီးအကဲတစ်ဦးအနေနှင့် ဘုရားရှင်၏သိုးတော်စုကို ကြင်နာယုယစွာဖြင့်လည်း ဆက်ဆံရမည်။

သင်မည်သို့ဆိုမည်နည်း

▫ ခရစ်ယာန်အကြီးအကဲများသည် မည်သည့်ထပ်ဆင့်အပ်နှင်းရာရရှိထားသနည်း။

▫ အကြီးအကဲတစ်ဦးသည် မိမိ၏အပ်နှင်းရာကို စောင့်ရှောက်ရန် မည်သို့အပြုသဘောဖြင့် လုပ်ဆောင်မည်နည်း။

▫ မိမိအားအပ်နှင်းရာကို စောင့်ရှောက်ရန် အကြီးအကဲတစ်ဦးသည် မည်သည့်ထောင်ချောက်များကို ရှောင်ရှားမည်နည်း။

▫ အကြီးအကဲများသည် သူတို့အားအပ်နှင်းရာကို စောင့်ရှောက်လျှင် အဘယ်ကြောင့်ပျော်ရွှင်မှုရရှိသနည်း။

[စာမျက်နှာ ၉ ပါ ရုပ်ပုံ]

ခရစ်ယာန်အကြီးအကဲများသည် “လေလုံ၍မိုးသက်မုန်တိုင်းကွယ်ရာအရပ်ကဲ့သို့” ဖြစ်ရမည်

[စာမျက်နှာ ၁၁ ပါ ရုပ်ပုံ]

အကြီးအကဲတစ်ဦးအနေနှင့် သင့်မိသားစု၊ အခြားသူများနှင့်အတူအမှုဆောင်လယ်ကွင်းတွင်မှန်မှန် ပါဝင်ပါ

[စာမျက်နှာ ၁၂ ပါ ရုပ်ပုံ]

အကြီးအကဲတစ်ဦးအနေနှင့် သင့်အားအပ်နှင်းရာကို စောင့်ရှောက်လျှင် အသင်းတော်သည်နည်းလမ်းများစွာဖြင့်အကျိုးခံစားရမည်