ဘုရားသခင့်ကရုဏာတော်ကို ယနေ့အတုယူ

“ထာဝရဘုရား [ယေဟောဝါ] ၏လက်တော်သို့ရောက်ပါစေ။ ကရုဏာတော်ကြီးလှ၏။—၂ ဓမ္မရာဇဝင် ၂၄:၁၄။ NW

၁။ ဘုရားသခင်၏ကရုဏာတော်ကို ဒါဝိဒ်မည်သို့သဘောထားသနည်း။

လူ တို့ထက် ယေဟောဝါသည် ကရုဏာပိုရှိကြောင်း ကိုယ်ပိုင်တွေ့ကြုံမှုမှ ဒါဝိဒ်မင်းကြီး သိရှိသည်။ ဘုရားသခင်၏နည်းလမ်းတော်သို့မဟုတ်လမ်းစဉ်များသည် အကောင်းဆုံးဖြစ်ကြောင်း စိတ်ချယုံကြည်သည့်အတွက် နည်းလမ်းတော်များကို ဒါဝိဒ်သိကျွမ်းလို၍ သမ္မာတရားအတိုင်း သွားလာသည်။ (၁ ရာဇဝင်ချုပ် ၂၁:၁၃။ ဆာလံ ၂၅:၄၊ ၅) ဒါဝိဒ်၏သဘောထားမျိုး အသင်၌ရှိပါသလော။

၂။ ကြီးလေးသောအပြစ်ကို ကိုင်တွယ်ခြင်းနှင့်ပတ်သက်၍ မဿဲ ၁၈:၁၅-၁၇ တွင်ယေရှုအဘယ်အကြံပေးထားသနည်း။

^၂ သမ္မာကျမ်းစာသည် ဘုရားသခင်၏အတွေးအခေါ်ကို ကျွန်ုပ်တို့အား ထိုးထွင်းသိမြင်စေသည်။ ကျွန်ုပ်တို့အားပြစ်မှားသူနှင့် မည်သို့ဆက်ဆံရမည်အကြောင်းကိုပင် သိရှိစေသည်။ နောင်တွင် ခရစ်ယာန်အကြီးအကဲများဖြစ်လာမည့် တမန်တော်များအား ယေရှုဤသို့မိန့်တော်မူခဲ့သည်။ “သင်၏ညီအစ်ကိုသည် သင့်ကိုပြစ်မှားလျှင် သူ့ဆီသို့သွား၍ နှစ်ယောက်တည်းချင်း သူ၏အပြစ်ကိုပြ၍ ဆုံးမလော့။ သူသည် သင်၏စကားကိုနားထောင်လျှင် ညီအစ်ကိုကိုရပြီ။” ဤအပြစ်မှာ မိမိ မလေးမစားပြုခံရခြင်းမျှမဟုတ်ဘဲ ကလိန်ကျမှု သို့မဟုတ် ဂုဏ်အသရေဖျက်မှုကိုဆိုလိုပါသည်။ ဤအဆင့်တွင် ပြဿနာမပြေလည်လျှင်လည်းကောင်း၊ သက်သေခံများရှိမည်ဆိုလျှင်လည်းကောင်း၊ ပြစ်မှားခံရသူသည် မှားယွင်းခံရကြောင်းသက်သေပြရန် သူတို့အားခေါ်သွားသင့်သည်။ ဤကား နောက်ဆုံးအဆင့်လော။ မဟုတ်သေးချေ။ “ထိုသူတို့၏စကားကို [အပြစ်ပြုသူ] နားမထောင်လျှင် အသင်းတော်အားကြားပြောလော့။ အသင်းတော်၏စကားကို နားမထောင်လျှင် သာသနာပလူကဲ့သို့လည်းကောင်း၊ အခွန်ခံကဲ့သို့လည်းကောင်း ထိုသူကိုမှတ်လော့။”—မဿဲ ၁၈:၁၅-၁၇။

၃။ နောင်တမရသောပြစ်မှားသူအား “သာသနာပလူကဲ့သို့လည်းကောင်း၊ အခွန်ခံကဲ့သို့လည်းကောင်း” မှတ်ရမည်ဟု မိန့်တော်မူရာတွင် ယေရှုဘာကိုဆိုလိုသနည်း။

^၃ ဂျူးများဖြစ်ကြသဖြင့် ပြစ်မှားသူအား “သာသနာပလူကဲ့သို့လည်းကောင်း၊ အခွန်ခံကဲ့သို့လည်းကောင်း” ဆက်ဆံရမည်ကား အဘယ်အရာကိုဆိုလိုကြောင်း တမန်တော်များသိနားလည်ကြမည်။ ဂျူးတို့သည် သာသနာပလူတို့နှင့်ပေါင်းသင်းမှုကို ရှောင်ကြသည်။ ရောမအခွန်ခံများအဖြစ် အမှုထမ်းသောဂျူးများကိုလည်း သူတို့ရွံမုန်းလေ့ရှိသည်။a(ယောဟန် ၄:၉။ တမန်တော် ၁၀:၂၈) သို့ဖြစ်၍ အသင်းတော်ကပြစ်မှားသူအား ပယ်ထုတ်လျှင် တပည့်တော်များသည် သူနှင့်ပေါင်းသင်းမှုရပ်စဲရမည်ဟု ယေရှုမှာကြားနေခြင်းဖြစ်သည်။ သို့သော် ယေရှုသည် အခွန်ခံများနှင့်ပေါင်းသင်းခဲ့သည်ကို မည်သို့ဆိုမည်နည်း။

၄။ မဿဲ ၁၈:၁၇ ပါကိုယ်တော်၏စကားအတိုင်း အခွန်ခံသောသူတို့နှင့်ဆိုးသောသူများနှင့် ယေရှုအဘယ်ကြောင့်ဆက်ဆံနိုင်သနည်း။

^၄ လုကာ ၁၅:၁ ကဤသို့ဆိုသည်။ “အခွန်ခံသောသူတို့နှင့်ဆိုးသောသူအပေါင်းတို့သည် နားထောင်ခြင်းငှာ အထံတော်သို့ ချဉ်းကပ်သည်။” အခွန်ခံတိုင်း၊ ဆိုးသောသူတိုင်း ထိုအုပ်စုတွင်မပါပါ။ သို့သော် အမြောက်အမြားရှိနေပါသည်။ (လုကာ ၄:၄၀ နှင့်နှိုင်းယှဉ်) မည်သူတို့နည်း။ သူတို့အပြစ်လွှတ်ခံရမည်ဟု မျှော်လင့်သူများဖြစ်သည်။ ဤသူများအဝင်အချို့တို့သည် နှစ်ခြင်းဆရာယောဟန်၏ နောင်တယူခြင်းသတင်းကို စောစောကနှစ်မြို့ခဲ့သည်။ (လုကာ ၃:၁၂။ ၇:၂၉) ထိုကြောင့် ယေရှုထံအခြားသူများရောက်လာသောအခါ သူတို့အားကိုယ်တော်ဟောပြောခဲ့ခြင်းသည် မဿဲ ၁၈:၁၇ ပါကိုယ်တော်၏သြဝါဒကို မချိုးဖောက်ပါ။ “အခွန်ခံသောသူများနှင့် ဆိုးသောသူများ [ယေရှုကိုကြားနား၍] . . . နောက်တော်သို့လိုက်ကြ” သည်ကိုသတိပြုပါ။ (မာကု ၂:၁၅) ဤသူတို့သည် အကူအညီမတောင်းလိုသည့် လမ်းဆိုးတွင်ဆက်လိုက်သွားလိုသူများ မဟုတ်ကြပါ။ ယေရှု၏သတင်းတရားကို သူတို့ကြားနာကြပြီးနောက် နှလုံးထိမိခံရသူများဖြစ်ကြသည်။ ပြောင်းလဲရန်ကြိုးစားနေဟန်ရှိကြသော်လည်း အပြစ်ပြုနေဆဲဖြစ်ဦးတော့ သူတို့အား “ကောင်းသောသိုးထိန်း” ဟောပြောသွန်သင်ပေးခြင်းအားဖြင့် ကရုဏာရှင်ခမည်းတော်ကို ကိုယ်တော်အတုယူနေခြင်းဖြစ်သည်။—ယောဟန် ၁၀:၁၄။

ခွင့်လွှတ်ခြင်းကား ခရစ်ယာန်တာဝန်တစ်ရပ်

၅။ ခွင့်လွှတ်ခြင်းနှင့်ပတ်သက်၍ ဘုရားသခင်၏အခြေခံအခြေအနေကား အဘယ်နည်း။

^၅ ခွင့်လွှတ်ရန်အသင့်ရှိသော ကျွန်ုပ်တို့ခမည်းတော်ထံမှ ဤနွေးထွေးသောအာမခံချက်များ ရရှိထားသည်။ “ကိုယ်အပြစ်တို့ကို ဖော်ပြတောင်းပန်လျှင် ငါတို့အပြစ်များကိုလွှတ်၍ ဒုစရိုက်ရှိသမျှနှင့်ကင်းစင်စေခြင်းငှာ ဘုရားသခင်သည် သစ္စာတရားနှင့်လည်းကောင်း၊ ဖြောင့်မတ်ခြင်းတရားနှင့်လည်းကောင်း ပြည့်စုံတော်မူ၏။” “သင်တို့သည် ဒုစရိုက်ကိုမပြုစေခြင်းငှာ ဤအရာများကို သင်တို့အား ငါရေး၍ပေးလိုက်၏။ တစ်စုံတစ်ယောက်သောသူသည် ဒုစရိုက်ကိုပြုမိလျှင် ဖြောင့်မတ်တော်မူသောအရှင် ယေရှုခရစ်တည်းဟူသော ငါတို့အမှုဆောင်သခင်သည် ခမည်းတော်ထံ၌ရှိတော်မူ၏။” (၁ ယောဟန် ၁:၉။ ၂:၁) နှင်ထုတ်ခံရသူတစ်ဦးအတွက် ခွင့်လွှတ်ခြင်းရှိနိုင်ပါမည်လော။

၆။ နှင်ထုတ်ခံရသောသူကို မည်သို့ခွင့်လွှတ်၍ပြန်လက်ခံနိုင်မည်နည်း။

^၆ ရှိပါသည်။ အသင်းတော်ကိုကိုယ်စားပြုသောအကြီးအကဲတို့သည် နောင်တမရသောပြစ်မှုအတွက် နှင်ထုတ်ချိန်တွင်ပင် နှင်ထုတ်ခံရသူအား နောင်တပြန်ယူပြီးဘုရားသခင်၏ခွင့်လွှတ်ခြင်းကိုခံယူနိုင်ကြောင်း ရှင်းပြမည်။ နောင်တယူရန်အထောက်အကူဖြစ်မည့် ကျမ်းစာသြဝါဒများကို သူကြားနာနိုင်သည့် နိုင်ငံတော်ခန်းမ၌ စည်းဝေးများတက်ရောက်နိုင်ပါသည်။ (၁ ကောရိန္သု ၁၄:၂၃-၂၅ နှင့်နှိုင်းယှဉ်။) အချိန်တန်သော် သန့်ရှင်းသောအသင်းတော်အတွင်း အသင်းသားအဖြစ် ပြန်လက်ခံခွင့်ကို သူရှာယူလိုမည်။ ထိုအခါ အကြီးအကဲများသည် သူနှင့်တွေ့ဆုံကာ အမှန်နောင်တရမရ၊ အပြစ်ပြုသောလမ်းစဉ်ကိုစွန့်မစွန့် စစ်ဆေးမေးမြန်းကြမည်။ (မဿဲ ၁၈:၁၈) ထိုသို့ဆိုလျှင် ၂ ကောရိန္သု ၂:၅-၈ ပါပုံစံအတိုင်း သူ့အားပြန်လက်ခံနိုင်ပေမည်။ နှင်ထုတ်ခံရသည်မှာ နှစ်ချီရှိပြီဆိုလျှင် တိုးတက်ရန်အပတ်တကုတ်ကြိုးစားဖို့လိုပေမည်။ ထိုနောက် ဝိညာဉ်ရေးဘက်သန်မာသောခရစ်ယာန်တစ်ဦးဖြစ်လာနိုင်ရန် သူ၏ကျမ်းစာပညာနှင့်တန်ဖိုးထားလေးစားမှုကို တည်ဆောက်ပေးရန်အတွက်လည်း အကူအညီအတော်အတန်လိုအပ်ပေမည်။

ယေဟောဝါထံ ပြန်လာခြင်း

၇၊ ၈။ ပြည်နှင်ခံရသောလူမျိုးနှင့်ပတ်သက်၍ အဘယ်ပုံစံကိုဘုရားသခင်ချမှတ်ထားသနည်း။

^၇ သို့သော် အကြီးအကဲများကိုယ်တိုင် နှင်ထုတ်ခံထားသူတစ်ဦးထံ ဦးစွာသွား၍ ချဉ်းကပ်နိုင်ပါသလော။ ထိုသို့ပြုနိုင်သည်။ ဒဏ်မစီရင်ဘဲနေခြင်းအားဖြင့်သာမဟုတ်၊ အပြုသဘောပါသောလုပ်ရပ်များဖြင့် မေတ္တာကရုဏာတင်ပြလေ့ရှိကြောင်း သမ္မာကျမ်းစာဖေါ်ပြသည်။ ဤတွင် ယေဟောဝါပုံသက်သေကို အတုယူနိုင်ပါသည်။ သစ္စာမရှိသောလူမျိုးတော်အား ပြည်နှင်မခံရမီ သူတို့ပြန်လာရန် မျှော်လင့်နိုင်ကြောင်း ကိုယ်တော်ပရောဖက်ပြုတော်မူသည်။ “အိုယာကုပ်အမျိုး၊ ဤအရာတို့ကို ဆင်ခြင်လော့။ အိုဣသရေလအမျိုး၊ သင်သည် ငါ့ကျွန်ဖြစ်၏။ . . . သင်၏ဒုစရိုက်တို့ကို တိမ်တိုက်ကဲ့သို့လည်းကောင်း၊ သင်၏အပြစ်တို့ကို တိမ်လွှာကဲ့သို့လည်းကောင်း ငါချေပြီ။ ငါ့ထံသို့ပြန်လာလော့။ သင့်ကိုငါရွေးနှုတ်ပြီ။”—ဟေရှာယ ၄၄:၂၁၊ ၂၂။

^၈ ထိုနောက် ပြည်နှင်ခံနေကြစဉ် အပြုသဘောပါနည်းလမ်းဖြင့် ယေဟောဝါထပ်ဆင့်စီမံတော်မူသည်။ ‘ကိုယ်တော်ကိုရှာ၍ တွေ့နိုင်ကြရန်’ ဣသရေလလူမျိုးအား ဖိတ်ခေါ်ဖို့အတွက် ကိုယ်တော်၏ကိုယ်စားလှယ်များဖြစ်သော ပရောဖက်များကို စေလွှတ်တော်မူခဲ့သည်။ (ယေရမိ ၂၉:၁၊ ၁၀-၁၄) ယေဇကျေလ ၃၄:၁၆ တွင်ကိုယ်တော်တိုင်အား သိုးထိန်းအဖြစ်လည်းကောင်း၊ ဣသရေလလူမျိုးအား ပျောက်သောသိုးများအဖြစ်လည်းကောင်း ဤသို့ခိုင်းနှိုင်းတော်မူခဲ့သည်။ “ပျောက်သောသိုးကို ငါရှာမည်။ သူတစ်ပါးနှင်သောသိုးကိုလိုက်၍ ဆောင်ခဲ့မည်။” ယေရမိ ၃၁:၁၀ တွင်ကိုယ်တော်တိုင်သည် ဣသရေလလူမျိုး၏သိုးထိန်းဖြစ်တော်မူသည်ဟု ယေဟောဝါသရုပ်ဖေါ်ပြသေးသည်။ ပျောက်သောသိုးပြန်လာရန် သိုးခြံတွင်စောင့်နေသောသိုးထိန်းအဖြစ် ကိုယ်တော်တိုင်အား တင်ပြနေခြင်းမဟုတ်။ ယင်းအစား ပျောက်လွင့်နေသောသိုးများကို ရှာဖွေနေသောသိုးထိန်းအဖြစ် တင်စားဖေါ်ပြထားသည်။ လူအများစုသည် နောင်တမယူ၊ ပြည်နှင်ခံနေရစဉ်ပင် သူတို့ပြန်လှည့်လာကြရန် ဘုရားသခင်ကဦးစွာကြိုးစားဆောင်ရွက်ခဲ့သည်ကို သတိပြုပါ။ မာလ ခိ ၃:၆ နှင့်အညီ ခရစ်ယာန်အစီအစဉ်တွင် ဘုရားသခင်၏ဆက်ဆံမှုကို ပြောင်းလဲလိမ့်မည်မဟုတ်။

၉။ ခရစ်ယာန်အသင်းတော်တွင် ဘုရားသခင်၏ပုံသက်သေကို မည်သို့လိုက်လျှောက်ကြသနည်း။

^၉ နှင်ထုတ်ခံခဲ့ရ၍ ယခုနောင်တရသူအချို့ထံ ဦးစွာချဉ်းကပ်ပေးရန်အကြောင်း ရှိကောင်းရှိမည်ဟု ယင်းကအကြံပြုသည်မဟုတ်လော။ ကောရိန္သုအသင်းတော်မှ ဆိုးသောသူကိုနှင်ထုတ်ရမည်ဟု တမန်တော်ပေါလုညွှန်ကြားခဲ့သည်ကို သတိရပါ။ နောင်တွင် ထိုသူ၏နောင်တကြောင့် သူ့အားမေတ္တာပြကြရန် အသင်းတော်အားမှာကြားသည်။ သို့ဖြင့် နောင်တွင် အသင်းတော်အတွင်း ထိုသူအားပြန်လက်ခံကြသည်။—၁ ကောရိန္သု ၅:၉-၁၃။ ၂ ကောရိန္သု ၂:၅-၁၁။

၁၀။ (က) နှင်ထုတ်ခံရသူအချို့ကိုချဉ်းကပ်ရန် ကြိုးစားရာတွင် အဘယ်ရည်ရွယ်ချက်ရှိသင့်သနည်း။ (ခ) ဦးစွာချဉ်းကပ်ရမည့်သူတို့သည် ခရစ်ယာန်ဆွေမျိုးများမဖြစ်ရခြင်းကား အဘယ်ကြောင့်နည်း။

^၁၀ ရှေ့တွင်ကိုးကားထားသောစွယ်စုံကျမ်းက ဤသို့ဆိုသည်။ ‘အဆက်အသွယ်ဖြတ်တောက်ခြင်း၏ အခြေခံသဘောတရားမှာ “အနည်းငယ်သောတဆေးသည် မုန့်စိမ်းတစ်ပုံလုံးကို ဖောင်းကြွစေတတ်သည်’ ဟူသောအဖွဲ့အစည်း၏စံချိန်များကို ကာကွယ်ပေးရန်အတွက်ဖြစ်သည်။ (၁ ကော၊ ၅:၆) ဤရည်ရွယ်ချက်ကို ကျမ်းဆိုင်ရာနှင့်ကျမ်းမူပြင်ပစာပိုဒ်များတွင် ရှင်းလင်းစွာဖေါ်ပြထားသည်။ သို့သော် နှင်ထုတ်ပြီးနောက်ပင် ယင်းပုဂ္ဂိုလ်အတွက်စိုးရိမ်မှုက ၂ ကော၊ ၂:၇-၁၀ ပါပေါလု၏ပန်ကြားချက်၏အခြေခံသဘောတရားဖြစ်သည်။’ (ကျွန်ုပ်တို့စာလုံးမဲဖြင့်ဖေါ်ပြ) သို့ဖြစ်၍ ဤသို့သောစိုးရိမ်မှုမျိုးကို သိုးအုပ်ကိုထိန်းကျောင်းသောသိုးထိန်းများ ယနေ့တင်ပြသင့်သည်ကား ယုတ္တိရှိပေသည်။ (တမန်တော် ၂၀:၂၈။ ၁ ပေတရု ၅:၂) မိတ်ဆွေဟောင်းများနှင့်ဆွေမျိုးများသည် နှင်ထုတ်ခံရသူ ပြန်လှည့်လာမည်ဟု မျှော်လင့်ကြမည်ဖြစ်သော်လည်း ၁ ကောရိန္သု ၅:၁၁ ပါအမိန့်တော်ကိုလေးစားသည့်အနေနှင့် နှင်ထုတ်ခံရသူနှင့် ပေါင်းသင်းဆက်ဆံမှုမပြုကြပါ။bဤကဲ့သို့သောသူသည် ပြန်လာလိုစိတ်ရှိမရှိ ဦးစွာစစ်ဆေးမေးမြန်းကြည့်ရန် ခန့်အပ်ခံသိုးထိန်းများတာဝန်ဖြစ်ကြောင်း သူတို့အသိအမှတ်ပြုကြသည်။

၁၁၊ ၁၂။ အကြီးအကဲများပင် နှင်ထုတ်ခံရသော မည်ကဲ့သို့သူတို့ထံမချဉ်းကပ်သင့်သနည်း။ သို့သော် မည်ကဲ့သို့သောသူတို့ထံ လည်ပတ်နိုင်မည်နည်း။

^၁၁ သို့သော် “တပည့်တော်များကိုသွေးဆောင်ခြင်းငှာ မှားသောစကားကိုပြောတတ်သော” ဖောက်ပြန်သူ အစရှိသောနှင်ထုတ်ခံရသူအချို့ကိုမူကား အကြီးအကဲများပင် ဦးစွာချဉ်းကပ်ရန် သင့်တော်မည်မဟုတ်ပါ။ ဤသူတို့သည် “ဖျက်ဆီးတတ်သော မိစ္ဆာဒိဌိအယူများကို ပရိယာယ်အားဖြင့်သွင်း . . . သောမိစ္ဆာဆရာတို့” ဖြစ်သည်။ (တမန်တော် ၂၀:၃၀။ ၂ ပေတရု ၂:၁၊ ၃) တိုက်လှန်နေသောသဘော၊ မှားယွင်းမှုကို ကိုယ်ထိလက်ရောက်အားပေးသောသဘောကြောင့် နှင်ထုတ်ခံရသူများကို ရှာဖွေယူရန်အကြောင်းကိုလည်း သမ္မာကျမ်းစာမတင်ပြပါ။—၂ သက်သာလောနိတ် ၂:၃။ ၁ တိမောသေ ၄:၁။ ၂ ယောဟန် ၉-၁၁။ ယုဒ ၄၊ ၁၁။

^၁၂ သို့ရာတွင် နှင်ထုတ်ခံရသူများစွာတို့သည် ထိုကဲ့သို့သောသူများမဟုတ်ကြချေ။ တစ်ဦးမှာ နှင်ထုတ်ခံရသည့် ကြီးလေးသောအပြစ်ကို သူရပ်စဲခဲ့မည်ဖြစ်သည်။ အခြားတစ်ဦးမှာမူ ဆေးလိပ်သုံးစွဲခဲ့ပေမည်၊ သို့မဟုတ် သောက်ကြူးခဲ့မည်။ သို့သော် ယခုအခြားသူတို့အား မှားယွင်းကြရန် သွေးဆောင်သူမဟုတ်တော့ပေ။ ပြည်နှင်ခံနေရသောဣသရေလလူမျိုးသည် ဘုရားသခင်ထံပြန်မလာမီပင် ကိုယ်တော်သည် သူတို့ထံကိုယ်စားလှယ်တော်များ လွှတ်ပေးကြောင်း သတိရပါ။ နှင်ထုတ်ခံရသူကို စစ်ဆေးကြည့်ရန် ပေါလုသော်လည်းကောင်း၊ ကောရိန္သုအသင်းတော်မှ အကြီးအကဲများသော်လည်းကောင်း ဦးစွာချဉ်းကပ်ခဲ့သည်ရှိမရှိ သမ္မာကျမ်းစာမဖေါ်ပြထားပါ။ ထိုသူသည် နောင်တရ၍ မတရားမေထုန်ပြုခြင်းအမှုကို ရပ်စဲခဲ့သောအခါ သူ့အားပြန်လက်ခံကြရန် အသင်းတော်ထံပေါလုမှာကြားခဲ့သည်။

၁၃၊ ၁၄။ (က) မေတ္တာပါချဉ်းကပ်မှုကို နှင်ထုတ်ခံရသူအချို့ တုံ့ပြန်ကောင်းတုံ့ပြန်လိမ့်မည်ဟု ထင်မှတ်စရာအဘယ်အကြောင်းများရှိသနည်း။ (ခ) အကြီးအကဲများအဖွဲ့သည် အဆက်အသွယ်ပြုရန် မည်သို့စီစဉ်နိုင်သနည်း။

^၁၃ များမကြာမီက အကြီးအကဲတစ်ဦးသည် နှင်ထုတ်ခံရသူနှင့်ကြုံတွေ့ခဲ့သည့်အဖြစ်များရှိသည်။cသင့်တော်လျောက်ပတ်သည်ရှိသော် သိုးထိန်းသည် ပြန်လက်ခံနိုင်ရန် ပြုလုပ်ရမည့်အမှုများကို တိုတိုနှင့်လိုရင်း ဖေါ်ပြလေ့ရှိသည်။ ဤကဲ့သို့သောသူအချို့သည် နောင်တယူကာ ပြန်လက်ခံထားသူများဖြစ်နေကြပြီ။ ဤသို့သောဝမ်းသာစရာအဖြစ်များမှ နှင်ထုတ်ခံရသူ သို့မဟုတ် ပေါင်းသင်းမှုဖြတ်တောက်သူများသည် သိုးထိန်းများ၏မေတ္တာပါချဉ်းကပ်မှုကို တုံ့ပြန်ကောင်းတုံ့ပြန်လိမ့်မည်ဟု သိရှိရသည်။ သို့သော် ဤကိစ္စကို အကြီးအကဲများ မည်သို့ကိုင်တွယ်မည်နည်း။ အနည်းဆုံးတစ်နှစ်တစ်ခါအနေနှင့် အကြီးအကဲများအဖွဲ့သည် မိမိတို့ရပ်ကွက်တွင် ဤကဲ့သို့သောသူများရှိမရှိ ဆွေးနွေးသုံးသပ်သင့်သည်။dတစ်နှစ်ကျော်ကျော် နှင်ထုတ်ခံရထားသူများကို အကြီးအကဲများ အာရုံပြုကြမည်။ အခြေအနေအရ လျောက်ပတ်မည်ဆိုလျှင် အကြီးအကဲနှစ်ဦး (အခြေအနေကိုနားလည်ထားသူများဖြစ်လျှင်ပိုကောင်းမည်) အား ဤကဲ့သို့သောသူထံလည်ပတ်ရန် တာဝန်အပ်နှင်းမည်။ သို့သော် ကဲ့ရဲ့ပြစ်တင်၊ အန္တရာယ်ပြုလိုသောသဘောတင်ပြသူ သို့မဟုတ် အကူအညီပေးမှုမရလိုဟု အသိပေးထားသူ မည်သူမဆိုထံ လည်ပတ်မည်မဟုတ်ပါ။—ရောမ ၁၆:၁၇၊ ၁၈။ ၁ တိမောသေ ၁:၂၀။ ၂ တိမောသေ ၂:၁၆-၁၈။

^၁၄ သိုးထိန်းနှစ်ဦးသည် ခဏအလည်အပတ်လာလိုကြောင်း တယ်လီဖုန်းဆက်မေးနိုင်သည်။ သို့မဟုတ်သင့်တော်သောအချိန်တွင် အလည်အပတ်သွားနိုင်ပေမည်။ လည်ပတ်ရောက်ရှိချိန်တွင်ခက်ထန်စရာ၊ စိမ်းကားစရာပင်မလို။ မေတ္တာကရုဏာနှင့်စိုးရိမ်မှုဖြစ်ပေါ်ကြောင်းကို လှိုက်လှဲစွာတင်ပြသင့်သည်။ ဖြစ်ခဲ့သောအမှားကို ပြန်ဖေါ်မည့်အစား ဟေရှာယ ၁:၁၈၊ ၅၅:၆၊ ၇ နှင့်ယာကုပ် ၅:၂၀ အစရှိသည့်ကျမ်းချက်များကို သူတို့ဆွေးနွေးနိုင်သည်။ ဘုရားသခင်၏သိုးတော်စုသို့ သူပြန်လာလိုလျှင် အဘယ်သို့ပြုမူရမည်အကြောင်း ကြင်နာစွာရှင်းပြနိုင်ပေသည်။ ကျမ်းစာနှင့်ကင်းမျှော်စင်အသင်းစာပေများကိုဖတ်ရှုခြင်း၊ နိုင်ငံတော်ခန်းမ၌ စည်းဝေးများကိုတက်ခြင်း အစရှိသည်တို့ကို ပြောပြနိုင်သည်။

၁၅။ နှင်ထုတ်ခံရသူနှင့်အဆက်အသွယ်ပြုရာတွင် အကြီးအကဲများ အဘယ်အရာကိုသတိရထားသင့်သနည်း။

^၁၅ နောင်တရှိမရှိ၊ တစ်ဖန်ပြန်သွားသင့်မသင့်ကို အကြီးအကဲများဆုံးဖြတ်ရန် ဉာဏ်ပညာနှင့်ထိုးထွင်းသိမြင်ခြင်း လိုအပ်ပါသည်။ သို့သော် အချို့သောနှင်ထုတ်ခံရသူများအား “နောက်တစ်ဖန်နောင်တရအံ့သောငှာ အသစ်ပြုပြင်ခြင်းသို့မရောက်နိုင်” စေကြောင်းကိုသတိရထားသင့်သည်။ (ဟေဗြဲ ၆:၄-၆။ ၂ ပေတရု ၂:၂၀-၂၂) လည်ပတ်ပြီးနောက် အသင်းတော်လုပ်ငန်းတော်ကော်မတီထံ သူတို့နှစ်ဦးသည် နှုတ်ဖြင့်အကြောင်းတင်ပြနိုင်ပါသည်။ ဤကော်မတီကတစ်ဆင့် အကြီးအကဲများအဖွဲ့၏ လာမည့်အစည်းအဝေးတွင် အကြောင်းကြားရမည်။ အကြီးအကဲများ၏ မေတ္တာကရုဏာပါဦးစွာချဉ်းကပ်ခြင်းက ဘုရားသခင်၏ဤကြည့်မြင်ပုံကို ရောင်ပြန်ဟပ်ခြင်းဖြစ်သည်။ “ငါ့ထံသို့ပြန်လာကြလော့။ ငါသည်လည်း သင်တို့ဆီသို့ ပြန်လာမည်ဟု ကောင်းကင်ဗိုလ်ခြေအရှင်ထာဝရ [ယေဟောဝါ၊ NW] ဘုရားမိန့်တော်မူ၏။—မလာခိ ၃:၇။

အခြားကရုဏာပါအကူအညီ

၁၆၊ ၁၇။ အသင်းမှနှင်ထုတ်ခံရသူ၏ ခရစ်ယာန်ဆွေမျိုးတို့ကို မည်သို့ယူမှတ်သင့်သနည်း။

^၁၆ အကြီးအကဲများမဟုတ်၍ နှင်ထုတ်ခံရသူများအား ဤသို့ဦးစွာချဉ်းကပ်ကြမည်မဟုတ်သော ကျွန်ုပ်တို့ကော။ ဤအစီအစဉ်နှင့်အညီ ယေဟောဝါကိုအတုယူလျက် မည်သို့ပြုလုပ်ကြမည်နည်း။

^၁၇ အသင်းမှနှင်ထုတ်ထားမည် သို့မဟုတ် ပေါင်းသင်းမှုရပ်စဲထားသူဖြစ်နေသ၍ ဤညွှန်ကြားချက်ကို ကျွန်ုပ်တို့လိုက်နာရမည်။ “ညီအစ်ကိုဟုခေါ်ဝေါ်သောသူသည် မတရားသောမေထုန်၌မှီဝဲခြင်း၊ လောဘလွန်ကျူးခြင်း၊ ရုပ်တုကိုကိုးကွယ်ခြင်း၊ ဆဲရေးကဲ့ရဲ့ခြင်း၊ သေရည်သေရက်နှင့်ယစ်မူးခြင်း၊ အနိုင်အထက်လုယူခြင်းမှစ၍ ထိုသို့သောအမှုကိုပြုသောသူနှင့်မပေါင်းဖော်ရသည်သာမက ထိုသူနှင့်အတူစားသောက်ခြင်းကိစ္စကိုမျှမပြုရဟု ငါရေးထား၍ပညတ်၏။” (၁ ကောရိန္သု ၅:၁၁) သို့သော် နှင်ထုတ်ခံရသူနှင့် တစ်အိမ်တည်းနေသူ ခရစ်ယာန်မိသားစု၏သဘောကို ဤကျမ်းစာညွှန်ကြားချက်က မထိခိုက်သင့်ပေ။ ရှေးခေတ်ကဂျူးများသည် အခွန်ခံများကိုမုန်းတီးသဖြင့် အခွန်ခံ၏အိမ်ထောင်စုကိုပင် ဆက်ဂယက်ရိုက်သည်။ ယင်းသဘောထားကို ယေရှုမထောက်ခံပါ။ အကူအညီမခံလိုသောအပြစ်သားအား “သာသနာပလူကဲ့သို့လည်းကောင်း၊ အခွန်ခံကဲ့သို့လည်းကောင်း” မှတ်ရမည်ဟုကိုယ်တော်ပြောသည်။ ခရစ်ယာန်မိသားစုအတွင်း ထိုသို့ပြုရမည်ဟု ကိုယ်တော်မိန့်တော်မမူချေ။—မဿဲ ၁၈:၁၇။

၁၈၊ ၁၉။ နှင်ထုတ်ခံရသူ၏သစ္စာရှိဆွေမျိုးတို့အား ခရစ်ယာန်စိတ်ဓာတ်တင်ပြနိုင်သည့် နည်းအချို့ကားအဘယ်နည်း။

^၁၈ သစ္စာရှိခရစ်ယာန်များဖြစ်သည့် မိသားစုကို အထူးအားပေးကူညီရမည်။ သူတို့၏ဝိညာဏလမ်းစဉ်ကိုအားမပေးသော နှင်ထုတ်ခံသူနှင့် တစ်အိမ်တည်းနေထိုင်ရ၍ စိတ်ဆင်းရဲခြင်း၊ အတားအဆီးများကိုပင် ခံနေရပေမည်။ ထိုသူသည် ခရစ်ယာန်များ မိမိအိမ်သို့လည်ပတ်လာခြင်းကိုပင် မနှစ်သက်ပုံရှိမည်။ သို့မဟုတ် သစ္စာရှိသူမိသားစုတို့ထံ လည်ပတ်လာကြသည့်အခါ ဧည့်သည်များကိုရှောင်နေရမည့် ယဉ်ကျေးမှုကိုပင် သူမပြဘဲနေပေမည်။ ခရစ်ယာန်အစည်းအဝေးများနှင့်စည်းဝေးပွဲကြီးများကိုတက်ရောက်ရန် မိသားစု၏ကြိုးပမ်းမှုကို ခဲယဉ်းစေရန်ပြုကောင်းပြုမည်။ (မဿဲ ၂၃:၁၃ နှင့်နှိုင်းယှဉ်။) ဤအဖြစ်မျိုးကြုံနေရသောခရစ်ယာန်များသည် ကျွန်ုပ်တို့၏ကရုဏာအမှန်ခံသင့်ပေသည်။—၂ ကောရိန္သု ၁:၃၊ ၄။

^၁၉ တယုတယကရုဏာပြနိုင်သောနည်းတစ်နည်းကား ‘နှစ်သိမ့်အားပေး’ ခြင်းဖြင့်ဖြစ်သည်။ မိသားစုမှသစ္စာရှိသူတို့အား အားပေးတည်ဆောက်မှုဖြစ်သောစကားများ ပြောဆိုနိုင်ပါသည်။ (၁ သက်သာလောနိတ် ၅:၁၄) စည်းဝေးမစမီနှင့်စည်းဝေးပြီးနောက်၊ လယ်ကွင်းလုပ်ငန်း၌ပါဝင်ချိန်၊ သို့မဟုတ် အခြားအချိန်အခါတွင် အတူတကွရှိသောအခါ အားပေးနိုင်သောအခွင့်ကောင်းများစွာရရှိပါသည်။ နှင်ထုတ်ခြင်းအကြောင်း ထည့်မပြောဘဲ တည်ဆောက်မှုဖြစ်သော အခြားစကားများစွာပြောဆိုနိုင်ပါသည်။ (သု၊ ၂၅:၁၁။ ကောလောသဲ ၁:၂-၄) ထိုအိမ်ထောင်ရှိခရစ်ယာန်များထံ အကြီးအကဲများသိုးထိန်းလုပ်ငန်း ဆက်လုပ်ကိုင်မည်မှန်သော်လည်း နှင်ထုတ်ထားသူနှင့် လုံးဝမဆက်ဆံဘဲ ကျွန်ုပ်တို့လည်း သူတို့ထံလည်ပတ်နိုင်ကြပါသည်။ နှင်ထုတ်ထားသူက တံခါးဖွင့်သူ၊ တယ်လီဖုန်းကိုင်သူဖြစ်ပါက ကျွန်ုပ်တို့တွေ့လိုသော ခရစ်ယာန်ဆွေမျိုးအမည်ကိုပြောလိုက်နိုင်သည်။ တစ်ခါတစ်ရံ ခရစ်ယာန်မိသားစုအား ကျွန်ုပ်တို့အိမ်သို့အလည်အပတ်ခေါ်ဖိတ်နိုင်ပါသည်။ သတိရသင့်သည်ကား ကြီးသည်၊ ငယ်သည်ဖြစ်စေ ဤသူတို့သည် ကျွန်ုပ်တို့၏အမှုဆောင်ဖက်များ၊ ဘုရားသခင့်အသင်းတော်ဝင်များဖြစ်ကြရာ သူတို့အားရှောင်ဖယ်နေရန်မဟုတ်ပါ။—ဆာလံ ၁၀:၁၄။

၂၀၊ ၂၁။ နှင်ထုတ်ခံရသူတစ်ဦးကို ပြန်လက်ခံသည့်အခါ ကျွန်ုပ်တို့မည်သို့သဘောထား၍ပြုမူသင့်သနည်း။

^၂၀ နှင်ထုတ်ခံရသူတစ်ဦးကို ပြန်လက်ခံသည့်အခါ ကရုဏာပြရန်အခွင့်အရေးရပြန်သည်။ ‘အပြစ်ပြုသူနောင်တရ’ သောအခါ ကောင်းကင်၌ဝမ်းမြောက်ခြင်းရှိကြောင်း ယေရှု၏ပုံဥပမာများကတင်ပြသည်။ (လုကာ ၁၅:၇၊ ၁၀) အသင်းမှနှင်ထုတ်ခံရသူနှင့်စပ်လျဉ်း၍ ကောရိန္သုအသင်းထံ ပေါလုဤသို့ရေးသားသည်။ “သူသည် ဝမ်းနည်းခြင်းအားကြီးလျက် မိန်းမောတွေဝေခြင်းမရှိစေခြင်းငှာ သင်တို့သည် . . . သူ့ကိုနှစ်သိမ့်စေခြင်းငှာပြုသင့်၏။ ထိုကြောင့် သင်တို့သည် သူ့ကိုအမှန်ချစ်ကြသည်ကို ထင်ရှားစွာပြမည်အကြောင်း ငါတောင်းပန်၏။”(၂ ကောရိန္သု ၂:၇၊ ၈) ညီအစ်ကိုတစ်ဦးအားပြန်လက်ခံပြီးနောက် ဤအကြံပြုချက်ကို မေတ္တာပါပါစိတ်ထားမှန်မှန်နှင့် ဆက်ကျင့်သုံးကြစို့လေ။

^၂၁ ယေရှု၏သားမိုက်ပုံဥပမာသည် ကျွန်ုပ်တို့ရှောင်သင့်သောအန္တရာယ်တစ်ခုကို ဖေါ်ပြသည်။ သားကြီးသည် နောင်တရ၍ပြန်လာသူအတွက် ဝမ်းမြောက်မည့်အစား မကျေမနပ်ဖြစ်ခဲ့သည်။ ထိုသို့မဖြစ်ကြနှင့်။ လွန်လေပြီးသောအချိန်ကအမှားကို အာဃာတထားခြင်း၊ ပြန်လက်ခံလိုက်သည့်အတွက် မရှုဆိတ်မရှိစေနှင့်။ သို့ဖြစ်မည့်အစား ယေဟောဝါ၏တုံ့ပြန်မှုကိုဖေါ်ပြသည့် ဖခင်ကဲ့သို့ဖြစ်ရန် ကြိုးစားသင့်သည်။ ပျောက်နေ၍သတင်းလုံးဝမရသောသားကိုပြန်တွေ့သည့်အခါ ဖခင်သည်ဝမ်းသာအယ်လဲဖြစ်ခဲ့သည်။ (လုကာ ၁၅:၂၅-၃၂) ထိုနည်းတူစွာ ပြန်လက်ခံထားသောညီအစ်ကိုကို ကျွန်ုပ်တို့လှိုက်လှိုက်လှဲလှဲပြောဆိုအားပေးကြမည်။ ခွင့်လွှတ်တတ်၍ မေတ္တာကရုဏာရှိသော ကျွန်ုပ်တို့၏ကောင်းကင်ခမည်းတော်နည်းတူ ကျွန်ုပ်တို့လည်းကရုဏာရှိကြောင်း တင်ပြသင့်သည်။—မဿဲ ၅:၇။

၂၂။ ယေဟောဝါဘုရားသခင်ကိုအတုယူရာတွင် အဘယ်အရာပါဝင်သနည်း။

^၂၂ ကျွန်ုပ်တို့ဘုရားသခင်ကိုအတုယူလိုလျှင် ကိုယ်တော်၏အမိန့်တော်များနှင့်တရားမျှတသောသဘောနှင့်အညီ ကရုဏာပြကြရမည်အမှန်။ ကိုယ်တော်ကို ဆာလံဆရာဤသို့ဖေါ်ပြထားသည်။ “ထာဝရဘုရား [ယေဟောဝါ၊ NW] သည်ကျေးဇူးပြုတတ်သောသဘော၊ သနားစုံမက်တတ်သောသဘောနှင့်ပြည့်စုံ၍ ခန္တီတော်နှင့်ကရုဏာတော်သည် အလွန်ကြွယ်ဝပါ၏။ ထာဝရဘုရား [ယေဟောဝါ၊ NW] သည်ခပ်သိမ်းသောသူတို့အား ကျေးဇူးပြုချင်သောသဘောရှိ၍ ဖန်ဆင်းတော်မူသမျှတို့ကို သနားစုံမက်တော်မူ၏။” (ဆာလံ ၁၄၅:၈၊ ၉) ခရစ်ယာန်များအတုယူစရာ မေတ္တာပါပုံသက်သေကောင်းဖြစ်ပါသည်တကား။

[အောက်ခြေမှတ်ချက်များ]

ဤအချက်များကို သင်သတိပြုမိသလော

▫ ဂျူးများသည် အခွန်ခံများနှင့်အပြစ်သားများကို မည်သို့ဆက်ဆံသနည်း။ သို့သော် ယေရှုမူကား ဤကဲ့သို့သောသူအချို့နှင့် အဘယ်ကြောင့်ဆက်ဆံသနည်း။

▫ ပျောက်နေသူများစွာတို့အား ကရုဏာရှိစွာဦးဆုံးချဉ်းကပ်ဖို့အတွက် ကျမ်းစာမှအဘယ်အခြေခံရှိသနည်း။

▫ အကြီးအကဲများအဖွဲ့သည် ဤသို့ဦးစွာချဉ်းကပ်မှုကို မည်သို့ပြုလုပ်နိုင်သနည်း။ မည်သူတို့ထံချဉ်းကပ်မည်နည်း။

▫ ပြန်လက်ခံထားသူတို့နှင့် နှင်ထုတ်ခံရသောသူများ၏မိသားစုတို့အား ကရုဏာမည်သို့ပြသင့်သနည်း။

[စာမျက်နှာ ၂၁ ပါ လေးထောင့်ကွက်]

တစ်ချိန်က ဘုရားသခင်၏သန့်ရှင်း၍ ပျော်ရွှင်သောအသင်းတော်အဝင်ဖြစ်သူ မည်သူမဆို ယခုနှင်ထုတ်ခံရမည် သို့မဟုတ် ပေါင်းသင်းမှုဖြတ်ထားမည်ဆိုသည်တိုင် ဤကဲ့သို့သောအခြေအနေမျိုးတွင် တည်မြဲတည်နေစရာမလိုပါ။ ထိုသို့ဖြစ်မည့်အစား ထိုသူသည် နောင်တယူနိုင်ပြီး အသင်းတော်၏အကြီးအကဲများနှင့် အဆက်အသွယ်ပြုရန် ကိုယ်တိုင်ဦးစွာချဉ်းကပ်နိုင်သည်။ ပြန်လမ်းပွင့်နေပါသည်။

[Picture Credit Line on page 21]

Garo Nalbandian