ကျမ်းစာသင်သားများအား နိုင်ငံတော်သတင်းကောင်း ကြေညာသူများဖြစ်လာရန် ကူညီပေးပါ

^၁ မဿဲ ၂၈:၁၉၊ ၂၀ တွင် တပည့်တော်များကို ယေရှုပေးခဲ့သောတာဝန်မှာ အလွန်ကျယ်ပြန့်သည်။ ခရစ်တော်၏တပည့်တော်များသည် အခြားသူတို့ကို တပည့်ဖြစ်စေရန် မိန့်မှာခံရပြီး ထိုသူတို့က တစ်ဖန် တပည့်ဖြစ်စေခြင်းလုပ်ငန်းတွင် ပြန်လည်ပါဝင်ကြမည်ဖြစ်သည်။ သို့ဖြင့် ကျွန်ုပ်တို့ ယခုအသက်ရှင်နေသော ဆုံးခန်းချိန်အတွင်း ဘုရားသခင့်နိုင်ငံတော်သတင်းကောင်းကို နောက်ဆုံးအနေဖြင့် ကမ္ဘာချီကြွေးကြော်သည့်လုပ်ငန်းအတွက် အုတ်မြစ်ချပေးကြသည်။—မ. ၂၄:၁၄။

^၂ ကျွန်ုပ်တို့၏ကျမ်းစာသင်သားများမှာ ကျွန်ုပ်တို့၏သားသမီးများ သို့မဟုတ် ကျမ်းစာသင်အံလိုသည့် အခြားသူများဖြစ်နိုင်သည်။ ထိုသူတို့သည် အခြားသူတို့အား ယေရှုခရစ်၏တပည့်များဖြစ်လာဖို့ ကူညီပေးရမည့် တာဝန်ကို လက်ခံယူနိုင်ရန် ကျွန်ုပ်တို့ စိတ်ရင်းမှန်ဖြင့် ကူညီပေးလိုကြပါသည်။—လု. ၆:၄၀။

^၃ သက်သေခံတတ်ရန် သူတို့ကို ပြင်ဆင်ပေးပါ– သင်ယူနေသောအရာကို အခြားသူတို့အား ဝေမျှရန် သင့်ကျမ်းစာသင်သားများကို တိုက်တွန်းပါ။ အားတက်ဖွယ် လယ်ကွင်းလုပ်ငန်းတွေ့ကြုံမှုများကို ပြောပြပါ။ သင့်သားသမီးများ တတ်စွမ်းနိုင်သည့်အတိုင်းအတာနှင့်အညီ ငယ်သောအရွယ်မှစ၍ လယ်ကွင်းလုပ်ငန်းတွင် အဓိပ္ပာယ်ရှိရှိ ပါဝင်နိုင်ရန် လေ့ကျင့်ပေးပါ။ (ဆာ. ၁၄၈:၁၂၊ ၁၃) ဓမ္မအမှုကို သင်တန်ဖိုးထားလေးမြတ်ကြောင်း အပြောဖြင့်ရော၊ ပုံသက်သေဖြင့်ပါ တင်ပြပါ။—၁ တိ. ၁:၁၂။

^၄ ယေဟောဝါသည် မိမိ၏ဖြောင့်မတ်သောစံနှုန်းများကို လက်ခံကာ နာခံသူများကိုသာ အသုံးပြုတော်မူသည်။ ကြေညာသူအသစ်များသည် ဆက်ကပ်အပ်နှံနှစ်ခြင်းခံပြီးသော အတွေ့အကြုံရှိ ဓမ္မအမှုဆောင်များလောက် အသိပညာရှိမည်မဟုတ်သော်လည်း အခြေခံကျမ်းစာသွန်သင်ချက်များကို ယုံကြည်ပြီး ရှင်းပြနိုင်ရမည်။ (အဖွဲ့အစည်းစာအုပ်၊ စာ. ၇၉-၈၂ ကိုရှု။) ထို့ပြင် ‘မဟာဗာဗုလုန်’ မှ လုံးဝထွက်လာကာ နိုင်ငံရေးနှင့်ကင်းရှင်းပြီး အစည်းအဝေးများကို မှန်မှန်တက်ရောက်သင့်သည်။—ဗျာ. ၁၈:၂၊ ၄; ယော. ၁၇:၁၆; ဟေဗြဲ ၁၀:၂၄၊ ၂၅။

^၅ သင့်ကျမ်းစာသင်သားသည် နှစ်ခြင်းမခံသေးသောကြေညာသူအဖြစ် အရည်အချင်းပြည့်မီပြီဟု သင်ယူဆသည်နှင့်တစ်ပြိုင်နက် ဦးစီးကြီးကြပ်မှူးကို ပြောပြသင့်သည်။ သင်သားသည် နှစ်ခြင်းမခံသေးသောကြေညာသူအဖြစ် အသင်းတော်နှင့်ပူးပေါင်းဖို့ အရည်အချင်းပြည့်မပြည့် ဆုံးဖြတ်ရန် သင်နှင့်သင့်သင်သားကို အကြီးအကဲနှစ်ဦးနှင့်တွေ့ဆုံဖို့ သူစီစဉ်ပေးပါလိမ့်မည်။ သို့ဖြင့် သင်သည် သင့်ကျမ်းစာသင်သားနှင့်အတူ လယ်ကွင်းလုပ်ငန်းတွင် ပါဝင်စဉ် သူ့ကိုဆက်လေ့ကျင့်ပေးနိုင်သည့် အခွင့်ထူးရရှိပါလိမ့်မည်။