“သင်တို့စကားသည် ဆားအားဖြင့်ငန်သောအရသာနှင့် ပြည့်စုံ . . . ပါစေ”

၁။ ‘ကျွန်ုပ်တို့စကားကို ဆားအားဖြင့်ငန်သောအရသာနှင့်ပြည့်စုံ’ စေခြင်းဟူသည် အဘယ်အရာကိုဆိုလိုသနည်း။

^၁ “လူအသီးအသီးတို့အား အဘယ်သို့ပြန်ပြောရမည်ကို သိနိုင်မည်အကြောင်း သင်တို့စကားသည် ဆားအားဖြင့်ငန်သောအရသာနှင့် ပြည့်စုံလျက် အစဉ်မပြတ်တင့်တယ်လျောက်ပတ်ပါစေ။” (ကော. ၄:၆) ကျွန်ုပ်တို့၏စကားကို ဆားအားဖြင့်ငန်သောအရသာနှင့် ပြည့်စုံစေခြင်းဟူသည် မှန်ကန်သောစကားလုံးများရွေးချယ်ပြီး နားထောင်သူ နှစ်သက်လက်ခံစေမည့်နည်းဖြင့် ပြောဆိုခြင်းဖြစ်၏။ ဓမ္မအမှုတွင် ထိုသို့ပြောဆိုရန် အလွန်အရေးကြီးသည်။

၂။ ယေရှုသည် ရှမာရိအမျိုးသမီးတစ်ဦးကို မည်သို့သက်သေခံနိုင်ခဲ့သနည်း။

^၂ ယေရှု၏ပုံသက်သေ– ယေရှုသည် ရေတွင်းအနီးတွင် အနားယူနေစဉ် ရေခပ်ဖို့လာသော ရှမာရိအမျိုးသမီးတစ်ဦးကို အစပြုပြောဆိုခဲ့သည်။ စကားပြောဆိုနေစဉ် ထိုအမျိုးသမီးက ရှမာရိနှင့်ဂျူးတို့စပ်ကြား ကြာမြင့်စွာကပင် ရန်ငြိုးရှိကြောင်း ပေါ်လွင်စေသည့်အချက်များကို အကြိမ်ကြိမ်ဖော်ပြခဲ့သည်။ ဂျူးတို့သည် ရှမာရိလူတို့ကို တစ်ပါးအမျိုးသားမှဆင်းသက်သည်ဟု တထစ်ချယူဆကြသော်လည်း ရှမာရိလူတို့သည် ယာကုပ်မှဆင်းသက်သည်ကို သူယုံကြည်ကြောင်း ပြောဆိုခဲ့သည်။ ယေရှုသည် သူ၏အဆိုကို ငြင်းခုံချေပမည့်အစား အပြုသဘောပါပါ ဆက်ပြောဆိုခဲ့သည်။ ရလဒ်အနေဖြင့် ကိုယ်တော်သည် သူ့ကိုသက်သေခံနိုင်ခဲ့ရာ သူနှင့်ထိုမြို့မှရှမာရိအမျိုးသားများ အကျိုးခံစားခဲ့ရသည်။—ယော. ၄:၇-၁၅၊ ၃၉။

၃။ ဓမ္မအမှုတွင်ပါဝင်စဉ် ယေရှု၏ပုံသက်သေကို ကျွန်ုပ်တို့ မည်သို့တုပနိုင်သနည်း။

^၃ ကျွန်ုပ်တို့ဟောပြောသည့်အခါ ကျွန်ုပ်တို့၏ရည်ရွယ်ချက်မှာ “ဝမ်းမြောက်စရာသတင်းကို ကြားပြော” ရန်ဖြစ်ကြောင်း အမှတ်ရနေသင့်သည်။ (ရော. ၁၀:၁၅) ကျွန်ုပ်တို့သည် သမ္မာကျမ်းစာမှ တည်ဆောက်မှုဖြစ်စေသော နှစ်သက်ဖွယ်အကြောင်းအရာများကို အိမ်ရှင်အား ဝေမျှလိုပြီး သူ၏ကိုယ်ပိုင်ယုံကြည်ချက်များကို တိုက်ခိုက်သည်ဟု မထင်စေလိုပေ။ သူသည် မှားယွင်းသောရှုမြင်ချက်ကို ပြောဆိုလာပါက ကျွန်ုပ်တို့ ချက်ချင်းပြန်ချေပဖို့မလိုပါ။ သူ၏ပြောဆိုချက်တွင် ကျွန်ုပ်တို့သဘောတူနိုင်စရာ သို့မဟုတ် စိတ်ရင်းမှန်ဖြင့်ချီးမွမ်းနိုင်စရာ တစ်စုံတစ်ခု ရှိပါသလော။ “ဒီအချက်လည်း ဖြစ်နိုင်ချေရှိတယ်လို့ တွေးကြည့်ဖူးသလား” ဟုပြောခြင်းဖြင့် ကျမ်းချက်တစ်ချက်ကို မိတ်ဆက်နိုင်ပေမည်။

၄။ အိမ်ရှင်သည် ရိုင်းစိုင်းစွာပြောဆိုလျှင် ကျွန်ုပ်တို့ အဘယ်အရာလုပ်ဆောင်သင့်သနည်း။

^၄ အိမ်ရှင်သည် ရိုင်းစိုင်းစွာပြောဆိုမည် သို့မဟုတ် အငြင်းအခုံလုပ်လိုခြင်းသာဖြစ်မည်ဆိုလျှင်ကော။ ကျွန်ုပ်တို့၏အပြောအဆိုနှင့် အပြုအမူတို့တွင် နူးညံ့သိမ်မွေ့မှုကို ဆက်၍တင်ပြသင့်သည်။ (၂ တိ. ၂:၂၄၊ ၂၅) အိမ်ရှင်သည် နိုင်ငံတော်သတင်းကောင်းကို စိတ်မဝင်စားလျှင် ကျွန်ုပ်တို့ လိမ္မာပါးနပ်စွာထွက်ခွာလာခြင်းက အကောင်းဆုံးဖြစ်၏။—မ. ၇:၆; ၁၀:၁၁-၁၄။

၅။ ညီအစ်မတစ်ဦးသည် ယဉ်ယဉ်ကျေးကျေးတုံ့ပြန်ခြင်းဖြင့် အဘယ်ရလဒ်ကောင်းများ ရရှိခဲ့သနည်း။

^၅ ရလဒ်ကောင်းများ– ညီအစ်မတစ်ဦးသည် အိမ်နီးချင်းအမျိုးသမီးတစ်ဦးကို သက်သေခံရန် ကြိုးစားသောအခါ ထိုအမျိုးသမီးသည် ဒေါသတကြီး ဆဲဆိုလေတော့သည်။ ထိုအခါ ညီအစ်မက “တောင်းပန်ပါတယ်။ သွားလိုက်ပါဦးမယ်” ဟူ၍ ယဉ်ယဉ်ကျေးကျေးပြန်ပြောလေ၏။ နှစ်ပတ်ကြာသော် ထိုအမျိုးသမီးသည် ညီအစ်မ၏တံခါးကို လာခေါက်၍ သူ့အပြုအမူအတွက် တောင်းပန်ပြီး ညီအစ်မပြောဆိုရာကို နားထောင်လိုကြောင်း ပြောခဲ့သည်။ ယဉ်ကျေးစွာတုံ့ပြန်ခြင်းဖြင့် ရလဒ်ကောင်းများရလေ့ရှိသည်။—သု. ၁၅:၁; ၂၅:၁၅။

၆။ ဓမ္မအမှုတွင် တင့်တယ်လျောက်ပတ်သောစကားကို ပြောဆိုခြင်းသည် အဘယ်ကြောင့်အရေးကြီးသနည်း။

^၆ ထို့ကြောင့် သတင်းကောင်းဟောပြောရာတွင် ကျွန်ုပ်တို့၏စကားကို တင့်တယ်လျောက်ပတ်စေရန် ကြိုးစားပါ။ သို့ဆိုလျှင် အိမ်ရှင်သည် နားမထောင်လိုလျှင်ပင် ယေဟောဝါသက်သေများ နောက်တစ်ကြိမ်ရောက်လာသောအခါ ပို၍နားထောင်လိုပေမည်။