ဘုရားသခင်၏အကြီးမြတ်ဆုံးဆုကျေးဇူးကို လေးမြတ်ကြောင်းဖော်ပြခြင်း

၁။ ကျွန်ုပ်တို့သည် အဘယ်ကြောင့် ယေဟောဝါအား အထူးကျေးဇူးတင်ကြသနည်း။

^၁ ယေဟောဝါ၏ ‘ကောင်းမြတ်သောဆုကျေးဇူးများ’ ထဲတွင် ကိုယ်တော်ချစ်မြတ်နိုးသောသားတော်ပေးဆက်သည့် ရွေးနုတ်ဖိုးသည် အကြီးမြတ်ဆုံးဖြစ်၏။ (ယာ. ၁:၁၇) ယင်းက ကျွန်ုပ်တို့၏အပြစ်များကို ခွင့်လွှတ်ခြင်းအပါအဝင် ကောင်းချီးများစွာ ရရှိစေနိုင်သည်။ (ဧ. ၁:၇) ယင်းအတွက် ကျွန်ုပ်တို့အမြဲ ကျေးဇူးတင်လေးမြတ်ကြသည်။ ကျွန်ုပ်တို့သည် အထူးသဖြင့် အောက်မေ့ရာကာလအတွင်း ယင်းတန်ဖိုးရှိဆုကျေးဇူးကို အချိန်ယူတွေးတောဆင်ခြင်ကြသည်။

၂။ ကျွန်ုပ်တို့မိသားစုနှင့် ကိုယ်ကိုယ်တိုင်၏ ရွေးနုတ်ဖိုးကိုကျေးဇူးတင်လေးမြတ်စိတ် မည်သို့တိုးပွားစေနိုင်သနည်း။

^၂ ကျေးဇူးတင်လေးမြတ်စိတ်တိုးပွားစေပါ– သင့်မိသားစု၏ကျေးဇူးတင်လေးမြတ်စိတ်တိုးပွားစေရန် မတ် ၃၀ တွင်ကျရောက်သည့် အောက်မေ့ရာပွဲမတိုင်မီအပတ်များတွင် သင့်မိသားစုဝတ်ပြုမှုညချမ်း၌ ရွေးနုတ်ဖိုးအကြောင်းကို ပြန်သုံးသပ်ပါလေ။ ထို့ပြင် အောက်မေ့ရာပွဲအတွက် အထူးကျမ်းစာဖတ်ရှုခြင်းကို မိသားစုလိုက် နေ့စဉ်သုံးသပ်ကြပါ။ ရွေးနုတ်ဖိုးက သင့်အား မည်သို့အကျိုးပြုခဲ့ပုံနှင့် ယေဟောဝါ၊ မိမိတို့ကိုယ်ကိုယ်၊ အခြားသူများ၊ အနာဂတ်နှင့်ပတ်သက်သော သင့်ရှုမြင်ပုံကို မည်သို့သက်ရောက်မှုရှိစေခဲ့ကြောင်းတို့ကို ကိုယ်တိုင်ပြန်လည်တွေးတောပါလေ။ အောက်မေ့ရာပွဲတွင် သီဆိုမည့်သီချင်းသစ်နှစ်ခုဖြစ်သည့် နံပါတ် ၈ နှင့် ၁၀၉ တို့ကို ကြိုတင်လေ့ကျင့်သီဆိုခြင်းကလည်း အကျိုးရှိကြောင်း တွေ့ရလိမ့်မည်။—ဆာ. ၇၇:၁၂။

၃။ ကျွန်ုပ်တို့၏ကျေးဇူးတင်လေးမြတ်မှုကို မည်သို့ဖော်ပြနိုင်သနည်း။

^၃ ကျေးဇူးတင်လေးမြတ်ကြောင်း ဖော်ပြချက်များ– ရွေးနုတ်ဖိုးကို ကျေးဇူးတင်လေးမြတ်ခြင်းက ယေဟောဝါနှင့် ကိုယ်တော့်သားတော်ကိုစေလွှတ်ခြင်းဖြင့် ကိုယ်တော်၏ကြီးမားသောမေတ္တာအကြောင်း အခြားသူများအား ပြောပြရန် လှုံ့ဆော်ပေးသည်။ (ဆာ. ၁၄၅:၂-၇) အချို့မိသားစုများသည် မတ်၊ ဧပြီနှင့် မေလအတွင်း အနည်းဆုံး မိသားစုဝင်တစ်ဦးဦး အရန်ရှေ့ဆောင်လုပ်ရန် စီစဉ်ခြင်းဖြင့် ကျေးဇူးတင်လေးမြတ်ကြောင်း ဖော်ပြကြသည်။ သင့်အတွက် ယင်းသို့မဖြစ်နိုင်ပါက ဓမ္မအမှုတွင် တိုးချဲ့ပါဝင်နိုင်ရန် “အချိန်ကို ဝယ်ယူ” နိုင်သလော။ (ဧ. ၅:၁၆) အခြားသူများ ကျွန်ုပ်တို့နှင့်အတူ အောက်မေ့ရာပွဲတက်ရောက်ရန် ကူညီပေးဖို့လည်း ကျေးဇူးတင်လေးမြတ်စိတ်က လှုံ့ဆော်ပေးပါလိမ့်မည်။ (ဗျာ. ၂၂:၁၇) ပြန်လည်ပတ်မှုများ၊ ကျမ်းစာသင်သားများ၊ အလုပ်ဖော်များနှင့် အိမ်နီးချင်းများကိုဖိတ်ခေါ်ဖို့ စာရင်းပြုစုပါလေ၊ ထို့နောက် အောက်မေ့ရာပွဲသို့ ဖိတ်ခေါ်သည့်အထူးကင်ပိန်းတွင် အတတ်နိုင်ဆုံးပါဝင်ပါ။

၄။ အောက်မေ့ရာကာလကို အဘယ်နည်းများဖြင့် ပညာရှိစွာ အသုံးပြုနိုင်ကြသနည်း။

^၄ လူသားတို့ကိုပေးသော ယေဟောဝါ၏ဆုကျေးဇူးကို ကျွန်ုပ်တို့မည်မျှကျေးဇူးတင်လေးမြတ်ကြောင်းတင်ပြနိုင်ရန် အောက်မေ့ရာပွဲကာလတွင် အခွင့်အလမ်းသစ်များရှိပါသည်။ ရွေးနုတ်ဖိုးနှင့် “ခရစ်တော်၏အတိုင်းမသိ ကြွယ်ဝပြည့်စုံမှု” အတွက် ကျွန်ုပ်တို့၏ကျေးဇူးတင်လေးမြတ်မှုတင်ပြရန် ဤအချိန်အခါသမယကို အသုံးပြုနိုင်ကြပါစေ။—ဧ. ၃:၈။