ပွဲနေ့များ

အဓိပ္ပာယ်သတ်မှတ်ချက်– တစ်စုံတစ်ခုသောအခြင်းအရာကိုအောက်မေ့ရန် အများအားဖြင့် ရုံးပိတ်ကျောင်းပိတ်ရက်များအဖြစ်၊ သတ်မှတ်သောနေ့များဖြစ်သည်။ မိသားစု သို့မဟုတ် အကျိုးတူ-လူမျိုးတူ-ဘာသာတူလူစု၊ ကျင်းပသောပွဲနေ့များလည်း၊ ဖြစ်နိုင်သည်။ ပါဝင်ဆင်နွှဲသူတို့က ၎င်းတို့ကို ဘာသာရေး၊ လူမှုရေး၊ သို့မဟုတ် လောကီရေးရာအဖြစ် ယူမှတ်တတ်ကြသည်။

ခရစ္စမတ်သည် သမ္မာကျမ်းစာပေါ်အခြေခံသောပွဲလော

ကျင်းပသောနေ့စွဲ

မက်ကလင်းတော့နှင့်စထရောင်းတို့၏စွယ်စုံကျမ်း၊ က ဤသို့ဆို၏– “ခရစ္စမတ်ပွဲသည် ဘုရားသခင့်အမိန့်အရမဟုတ်။ ဓမ္မသစ်ကျမ်းမှ အစပြုခဲ့သည်လည်းမဟုတ်။ ဓမ္မသစ်ကျမ်း၌ ခရစ်တော်၏မွေးနေ့ကို စိစစ်ရှာဖွေ၍မတွေ့နိုင်။ အခြားမည်သည့်နေရာမှာလည်း ရှာ၍မတွေ့နိုင်။”​—(နယူးယောက်၊ ၁၈၇၁)၊ အတွဲ ၂၊ စ. ၂၇၆။

လုကာ. ၂:၈-၁၁၊ အရ၊ ယေရှုမွေးဖွားစဉ် သိုးထိန်းများ ညအချိန်တွင် လယ်ပြင်၌ ရှိနေကြသည်။ ယေရှုလက်ထက်၊ နေ့စဉ်ဘဝ၊ ဟူသောစာအုပ်က ဤသို့ဆိုသည်– “သိုးစုတို့သည် . . . အမိုးအကာအောက်တွင်နေ၍ ဆောင်းကူးကြသည်။ ဤအချက်ကိုကြည့်ရုံနှင့် ဆောင်းအချိန်၌ ခရစ္စမတ်ပွဲလုပ်သော၊ မိရိုးဖလာနေ့စွဲသည် မှန်ပုံမရ။ ခရစ်ဝင်ကျမ်းက သိုးထိန်းများသည် လယ်ပြင်မှာရှိကြသည်ဟု၊ ဆိုသောကြောင့်ဖြစ်သည်။”​—(နယူးယောက်၊ ၁၉၆၂)၊ ဟင်နရီ၊ ဒံနီယယ်လ်-ရော့ပ်စ်၊ စ. ၂၂၈။

အမေရိကန်းနားစွယ်စုံကျမ်း က ကျွန်ုပ်တို့အား ဤသို့အသိပေး၏– “ဒီဇင်ဘာ၊ ၂၅၊ ကို၊ ခရစ္စမတ်နေ့စွဲအဖြစ်သတ်မှတ်သည့်အကြောင်းမှာ မထင်မရှားဖြစ်နေသည်။ သို့သော် ထိုနေ့ကိုရွေးချယ်သည့်အကြောင်းမှာ ဒိဋ္ဌိပွဲနေ့များနှင့်တိုက်ဆိုင်စေရန်ဖြစ်သည်ဟု၊ အများက ယူဆကြပါသည်။ ထိုဒိဋ္ဌိပွဲများမှာ ‘နေပြန်မွေးခြင်း’၊ ကို အထိမ်းအမှတ်ပြုသည့်အနေနှင့် နေ့တာရှည်စပြုသောဆောင်းယဉ်စွန်းအချိန်တစ်ဝိုက်တွင် ကျင်းပသောပွဲများဖြစ်သည်။ . . . ရောမလူတို့၏ဆက်တန်ပွဲ (လယ်ယာနတ် ဆက်တန်နှင့် နေ၏တစ်ကျော့ပြန်အစွမ်းတန်ခိုးကိုရည်စူးသောပွဲလမ်း)၊ ကိုလည်း ထိုအချိန်၌ကျင်းပကြသည်။ အချို့သောခရစ္စမတ်ထုံးစံများသည် အဆိုပါဒိဋ္ဌိပွဲလမ်းမှ၊ ပေါက်ဖွားလာသည်ဟု၊ ယူဆကြသည်။”​—(၁၉၇၇)၊ အတွဲ ၆၊ စ. ၆၆၆။

ကက်သလစ်စွယ်စုံကျမ်းသစ် က ဤသို့ဝန်ခံသည်– “ခရစ်တော်၏မွေးနေ့ကိုမသိပါ။ ခရစ်ဝင်ကျမ်းက နေ့ကိုသော်လည်းကောင်း၊ လကိုသော်လည်းကောင်း အရိပ်အမြွက်မပြပါ။ . . . အိပ်ချ်. ယူစင်းနာ၊ တင်သွင်း၍ . . . ယနေ့ပညာရှင်အများကလက်ခံသော အဆိုကြမ်းအရ၊ . . . ခရစ်တော်၏မွေးနေ့ကို ဆောင်းယဉ်စွန်း (ဂျူလီယံပြက္ခဒိန်၌ ဒီဇင်ဘာ၊ ၂၅၊ အီဂျစ်ပြက္ခဒိန်၌ ဇန်နဝါရီ၊ ၆)၊ အဖြစ်သတ်မှတ်လိုက်သည်။ ထိုနေ့တွင် နေသည် မြောက်ကောင်းကင်ယံဆီသို့ ပြန်လှည့်လာသည်နှင့်အမျှ အလင်းနတ်မစ်သရကိုးကွယ်သောဒိဋ္ဌိများသည် dies natalis Solis Invicti (မနှိမ်နင်းနိုင်သောနေမင်း၏မွေးနေ့)၊ ကို ကျင်းပကြလေသည်။ ၂၇၄၊ ခုနှစ်၊ ဒီဇင်ဘာလ ၂၅၊ ရက်နေ့တွင် ဩရီးလီယံက နေ-နတ်ကို အင်ပါယာ၏ဦးစီးနာယကအဖြစ်သမုတ်လိုက်ပြီး သူ့အဖို့ ကင်းပတ်စ်မားရှပ်စ်၌ ဗိမာန်တစ်ဆောင်ဆောက်၍ ဆက်ကပ်ခဲ့သည်။ ခရစ္စမတ်သည် ရောမတွင် နေကိုးကွယ်မှု၊ အထူးအားသန်သည့်အချိန်၌ အစပြုခဲ့သည်။”​—(၁၉၆၇)၊ အတွဲ ၃၊ စ. ၆၅၆။

ကြယ်တစ်လုံးလမ်းပြရာ၊ လိုက်ပါလာသော၊ မာဂုပညာရှိများ

ထိုမာဂုပညာရှိများမှာ အမှန်အားဖြင့် အရှေ့တိုင်းမှ နက္ခတ်ဗေဒင်ပညာရှင်များဖြစ်ကြသည်။ (မ. ၂:၁၊ ၂၊ ကဘ; NE) နက္ခတ်ဗေဒင်သည် ယနေ့ လူကြိုက်များသော်လည်း သမ္မာကျမ်းစာက ၎င်းကို ပြင်းထန်စွာရှုတ်ချသည်။ (“ကံကြမ္မာ”၊ ဟူသောအဓိကခေါင်းစဉ်အောက် စာမျက်နှာ ၃၆၊ ၃၇ ကိုရှု။) ဘုရားသခင်သည် မိမိရှုတ်ချသောအမှုကိုပြုသည့်ပုဂ္ဂိုလ်များအား မွေးကင်းစယေရှုထံ၊ ခေါ်ဆောင်သွားပါ့မည်လော။

မဿဲ ၂:၁-၁၆၊ က ကြယ်သည် နက္ခတ်ဗေဒင်ပညာရှင်တို့အား ရှေးဦးစွာ ဟေရုဒ်မင်းထံသို့ ထို့နောက်မှ ယေရှုထံသို့ ဆောင်သွားကြောင်း ၎င်းနောက်သော် ဟေရုဒ်က ယေရှုကိုသတ်ရန်အားထုတ်ခဲ့ကြောင်း တင်ပြထားသည်။ နက္ခတ်ဗေဒင်ပညာရှင်များအပြင် အခြားသူများလည်း ၎င်း “ကြယ်” ကိုမြင်ခဲ့သည်ဟု ကျမ်းချက်၌ မဆိုထားပါ။ ထိုသူများ ထွက်ခွာသွားသည့်နောက် ယေဟောဝါ၏ကောင်းကင်တမန်က သူငယ့်အသက်ချမ်းသာရဖို့ အီဂျစ်ပြည်သို့ တိမ်းရှောင်ရန် ယောသပ်အား သတိပေးလေသည်။ ၎င်း “ကြယ်” သည် ဘုရားသခင့်ထံတော်မှလာသောလက္ခဏာဖြစ်မည်လော။ သို့မဟုတ် ဘုရားသခင့်သားတော်ကို သတ်ဖြတ်လိုသောပုဂ္ဂိုလ်တစ်ဦးထံမှလာသလော။

ခရစ္စမတ်အနုပညာလက်ရာများက ထိုသူတို့သည် သူငယ်ယေရှုကို နွားစားခွက်ထဲ၌ တွေ့ရသည့်စံဖြင့် ပုံဖော်လေ့ရှိသော်လည်း သမ္မာကျမ်းစာမှတ်တမ်းက ထိုသို့မဆိုကြောင်းသတိပြုပါ။ နက္ခတ်ဗေဒင်ပညာရှင်များ ရောက်လာကြသောအခါ ယေရှုနှင့်မိဘတို့သည် အိမ်တစ်ဆောင်ထဲ၌ နေထိုင်လျက်ရှိကြသည်။ ထိုအချိန် ယေရှု၏အရွယ်နှင့်ပတ်သက်၍ဆိုရလျှင် နက္ခတ်ဗေဒင်ပညာရှင်များထံမှ သိရှိသည့်အချက်အလက်အပေါ်မူတည်၍ ဟေရုဒ်က ဗက်လင်မြို့ရှိ အသက်နှစ်နှစ်နှင့်နှစ်နှစ်အောက်အရွယ်ယောက်ျားကလေးအားလုံးကို သတ်ပစ်ရန် အမိန့်ထုတ်ခဲ့ကြောင်းကို သတိရပါ။​—မ. ၂:၁၊ ၁၁၊ ၁၆။

ပွဲဓလေ့အတိုင်း လက်ဆောင်ပေးခြင်း၊ စန်တာကလော့စ်နှင့် ဖားသားရ်ခရစ္စမတ် စသောပုံပြင်များ

ခရစ္စမတ်လက်ဆောင်ပေးခြင်းဓလေ့သည် မာဂုပညာရှိများ၏လုပ်ရပ်ပေါ် အခြေပြုသည်မဟုတ်။ အထက်ဆိုခဲ့သည့်အတိုင်း သူတို့သည် ယေရှုမွေးချိန်၌ ရောက်လာကြသည်မဟုတ်။ ထို့ပြင်၊ သူတို့အချင်းချင်း လက်ဆောင်ပေးကမ်းကြသည်မဟုတ်ဘဲ ထိုခေတ်တွင် လူထူးလူမြတ်တို့ထံ အလည်အပတ်သွားစဉ် ထုံးစံရှိသည့်အတိုင်း သူငယ်ယေရှုအား လက်ဆောင်ဆက်ကပ်ခဲ့ခြင်းသာဖြစ်သည်။

အမေရိကန်းနားစွယ်စုံကျမ်းက ဤသို့ဆို၏– “ဆက်တန်နလီယာပွဲကျင်းပစဉ် အကြီးအကျယ်စားသောက်ကြပြီး လက်ဆောင်လဲလှယ်ကြသည်။” (၁၉၇၇၊ အတွဲ ၂၄၊ စ. ၂၉၉) အများအားဖြင့် ၎င်း​—လက်ဆောင်လဲလှယ်မှုသည် ခရစ္စမတ်စွန့်ကြဲမှုစိတ်ဓာတ်ပင်ဖြစ်၏။ ထိုသို့သောပေးကမ်းခြင်းစိတ်ဓာတ်ဖြင့် တကယ်ပျော်ရွှင်မှု မခံစားကြရချေ။ မဿဲ ၆:၃ နှင့် ၂ ကောရိန္သု ၉:၇ ပါခရစ်ယာန်မူများကို ချိုးဖောက်သောကြောင့်တည်း။ ခရစ်ယာန်တစ်ဦးအနေနှင့် တစ်နှစ်အတွင်း အခြားမည်သည့်အချိန်မဆို မေတ္တာ၏အထိမ်းအမှတ်အဖြစ် သူတစ်ပါးအား ဆန္ဒရှိသလောက် အကြိမ်များစွာ လက်ဆောင်ပေးနိုင်ပေသည်။

လက်ဆောင်ယူလာသူမှာ စန်တာကလော့စ်၊ စိန့်နစ်ကိုလာ့စ်၊ ဖားသားရ်ခရစ္စမတ်၊ Père Noël, Knecht Ruprecht, မာဂုပညာရှိ၊ the elf Jultomten (သို့မဟုတ် Julenissen) ဖြစ်ကြောင်း၊ သို့မဟုတ် La Befana ခေါ်စုန်းမပင်ဖြစ်ကြောင်း ဒေသအလိုက် ကလေးများအား ပြောကြားကြသည်။ (ကမ္ဘာ့စာအုပ်စွယ်စုံကျမ်း၊ ၁၉၈၄၊ အတွဲ ၃၊ စ. ၄၁၄) ထိုပုံပြင်တစ်ခုမျှမှန်သည်မဟုတ်။ ထိုသို့သောပုံပြင်များကို ကလေးများအား ပြောကြားခြင်းဖြင့် သူတို့စိတ်ထဲ၌ အမှန်တရားကိုလေးစားသောသဘော ပျိုးထောင်ရာရောက်သလော။ ဘုရားသခင်ကို သစ္စာဖြင့်ကိုးကွယ်ရမည်ဟုမိန့်ဆိုခဲ့သောယေရှုအားလည်း ဂုဏ်ပြုရာရောက်သလော။​—ယော. ၄:၂၃၊ ၂၄။

ခရစ်ယာန်မဆန်သောဇာစ်မြစ်မှ ပေါက်ဖွားလာဖွယ်ရှိသည့်ပွဲများကို ဘာသာရေးသဘောဖြင့်မဟုတ်ဘဲ ကျင်းပလျှင် ရမည်လော

ဧ. ၅:၁၀၊ ၁၁၊ သမ္မာ– “အရှင်ဘုရားနှစ်သက်တော်မူသောအရာသည် အဘယ်အရာဖြစ်သည်ကို စစ်ဆေးလျက် အကျိုးမဲ့သောမှောင်မိုက်အမှုများနှင့် မဆက်ဆံသည်သာမက ထိုအမှုများ၏အပြစ်ကို ဖော်ပြကြလော့။”

၂ ကော. ၆:၁၄-၁၈– “တရားသောအမှုသည် မတရားသောအမှုကို အဘယ်သို့လက်ခံနိုင်မည်နည်း။ အလင်းသည် မှောင်မိုက်နှင့် အဘယ်သို့ဆက်ဆံနိုင်မည်နည်း။ ခရစ်တော်သည် ဗေလျာလနှင့် အဘယ်သို့သင့်တင့်နိုင်မည်နည်း။ ယုံကြည်သောသူသည် မယုံကြည်သောသူနှင့်အတူ အဘယ်အကျိုးအပြစ်ကို ခံရမည်နည်း။ ဘုရားသခင်၏ဗိမာန်တော်သည် ရုပ်တုတို့နှင့် အဘယ်သို့စပ်ဆိုင်ရမည်နည်း။ . . . ထာဝရဘုရားမိန့်တော်မူပြန်သည်ကား သင်တို့သည် ထိုသူတို့အထဲမှထွက်၍ အသီးအခြားနေကြလော့။ မစင်ကြယ်သောအရာကို လက်နှင့်မျှ မတို့ကြနှင့်။ ထိုသို့ပြုလျှင် သင်တို့ကို ငါသည် လက်ခံမည်။ . . . သင်တို့သည်လည်း ငါ၏သားသမီးဖြစ်ကြလိမ့်မည်ဟု အနန္တတန်ခိုးနှင့်ပြည့်စုံသောထာဝရဘုရား မိန့်တော်မူ၏။” (လူတစ်ဦးသည် ယေဟောဝါကိုအမှန်ချစ်၍ စိတ်တော်ကိုရွှင်လန်းစေလိုသောဆန္ဒပြင်းပြပါက ခရစ်ယာန်မဆန်သောဓလေ့ထုံးစံများကို သံယောဇဉ်ဖြတ်နိုင်ပေမည်။ ယေဟောဝါကိုတကယ်သိကျွမ်း၍ချစ်သောသူသည် ဘုရားတုများကိုဂုဏ်ပြုသော၊ သို့မဟုတ်၊ မုသားကိုအားပေးသော ဓလေ့ထုံးစံများကို ရှောင်ကြဉ်ရသဖြင့် မိမိ၌ ပျော်ရွှင်မှုဆုံးရှုံးရသည်ဟု မယူမှတ်ပါ။ မေတ္တာစစ်သည် သူ့အား မဖြောင့်မတ်သောအရာ၌ ဝမ်းမြောက်စေသည်မဟုတ်၊ သစ္စာတရား၌ ရွှင်လန်းစေမည်တည်း။ ၁ ကောရိန္သု ၁၃:၆ ကိုရှု။)

ထွက်မြောက်ရာ ၃၂:၄-၁၀ (သမ) နှင့်နှိုင်းယှဉ်ပါ။ ဣသရေလလူတို့သည် အီဂျစ်လူများ၏ဘာသာရေးဓလေ့ကိုယူပြီး “ထာဝရဘုရားကိုရည်၍ ပူဇော်ရသောပွဲနေ့” ဟူသောအမည်သစ်ကိုပေး၏။ သို့ရာတွင် ယေဟောဝါသည် ထို့အတွက် သူတို့ကို ပြင်းစွာဒဏ်ခတ်တော်မူသည်။ ယနေ့ကျွန်ုပ်တို့သည် ပွဲနေ့များနှင့်ဆက်နွှဲယ်သော ၂၀ ရာစုဓလေ့ထုံးတမ်းများကိုသာ မြင်ရသည်။ အချို့ဆိုလျှင် ဘေးကင်းသယောင်ရှိ၏။ သို့သော် ယေဟောဝါသည် ၎င်းတို့မြစ်ဖျားခံရာဒိဋ္ဌိထုံးစံများကို မျက်ဝါးထင်ထင်မြင်တော်မူခဲ့သည်။ ကျွန်ုပ်တို့အလေးထားသင့်သည့်အရာမှာ ကိုယ်တော့်အမြင်မဟုတ်ပေလော။

ဥပမာ– လူတစ်အုပ်က လူကြီးလူကောင်းတစ်ဦးအိမ်သို့သွား၍ သူ့မွေးနေ့ကိုကျင်းပရန်လာပါသည်ဟု ပြောသည်ဆိုပါစို့။ ထိုလူကြီးသည် မွေးနေ့များကျင်းပသည်ကိုမကြိုက်ချေ။ စားကြူးသောက်ကြူး၍ အကျင့်လျော့ရဲသည်ကိုလည်း မမြင်လို။ သို့သော် အထက်ပါလူအချို့သည် ထိုအလုံးစုံတို့ကိုပြုကြ၏။ ထို့ပြင် ထိုလူကြီးမှလွဲ၍ ကျန်လူအားလုံးအတွက် လက်ဆောင်ယူလာကြသည်။ ထို့ထက်ကား၊ ထိုလူကြီး၏ရန်သူတစ်ဦးမွေးနေ့ကိုရွေး၍ ပွဲလုပ်ကြသည်။ ထိုလူကြီး မည်သို့ခံစားရမည်ထင်သနည်း။ သင်သည် ထိုအမှုထဲ ပါဝင်လိုမည်လော။ ခရစ္စမတ်ပွဲ၏လုပ်ရပ်မှာ ဤအတိုင်း ချွတ်စွပ်ပင်။

အီစတာနှင့် ဆိုင်ရာထုံးစံများ၏ဇာစ်မြစ်ကား အဘယ်နည်း

ဗြိတဲန်နစ်ကာစွယ်စုံကျမ်းက ဤသို့မှတ်ချက်ပေး၏– “အီစတာပွဲကျင်းပခြင်းအကြောင်း ဓမ္မသစ်ကျမ်း၌ အရိပ်အမြွက် မတွေ့ရ။ အသင်းတော်၏ ရှေးအာဏာပိုင်၊ ဘာသာရေးစာရေးဆရာများ၏စာပေများ၌လည်း မတွေ့ရချေ။ ကနဦးခရစ်ယာန်များ၏စိတ်ထဲ၌ နေ့ထူးနေ့မြတ်ဟူသောအတွေး မရှိချေ။”​—(၁၉၁၀)၊ အတွဲ ၈၊ စ. ၈၂၈။

ကက်သလစ်စွယ်စုံကျမ်းက ဤသို့ဆို၏– “နွေဦးပေါက်ရာသီကိုကြိုဆိုသည့် ဒိဋ္ဌိပွဲဓလေ့များစွာတို့သည် အီစတာပွဲအဖြစ်သို့ကူးပြောင်းလာသည်။ ကြက်ဥသည် နွေဦးပေါက်စ၏ထွက်ပြူခြင်းဘဝကိုပုံခိုင်းသည်။ . . . ယုန်သည် ဒိဋ္ဌိလက္ခဏာတစ်ခုဖြစ်၍ အစဉ်သဖြင့် မွေးဖွားခြင်းသတ္တိ၏အထိမ်းအမှတ်ဖြစ်သည်။”​—(၁၉၁၃)၊ အတွဲ ၅၊ စ. ၂၂၇။

အလက်ဇန္ဒား ဟစ်စလော့ပ် က ထိုဘေဘီလုန်နှစ်ခု စာအုပ်၌ ဤသို့ရေးသားလိုက်သည်– “အက်စတာဟူသောအခေါ်အဝေါ်ကိုယ်နှိုက်က ဘာကိုဆိုလိုသနည်း။ ခရစ်ယာန်အမည်တစ်ခုမဟုတ်။ ၎င်း၏နဖူးပေါ်မှာပင် ကယ်လ်ဒီးယန်း (ခါလဒဲ) လူမျိုး၏ဇာစ်မြစ်ကိုဖော်ပြနေသည်။ အက်စတာသည် အက်စတားတီးပင်ဖြစ်၍ ကောင်းကင်ဘုရင်မ ဘဲလ်တစ်စ်၏ဘွဲ့တစ်ခုဖြစ်သည်။ . . . အဆီးရီးယန်းလူတို့၏ကျောက်တိုင်ပေါ်၌ လေးယပ်တွေ့ရှိရသည့်အတိုင်းဆိုလျှင် သူ၏နာမည်မှာ . . . အစ်ရှတာပင်ဖြစ်သည်။ ဤကား အက်စတာပွဲ၏သမိုင်းပင်တည်း။ ယနေ့ထက်တိုင် ၎င်းနှင့်စပ်လျဉ်း၍ လူအများစောင့်ထိန်းသောဓလေ့ထုံးစံများက ၎င်းသည် ဘေဘီလိုးနီးယန်းလူများ၏ပွဲလမ်းဖြစ်သည် ဟူသောသမိုင်းထွက်ဆိုချက်ကို လုံလောက်စွာ ထောက်ခံလျက်နေသည်။ ယခုခေတ်မှာကဲ့သို့ သောကြာနေ့မြတ်၏လက်ဝါးကပ်တိုင်ဘန်းကိတ်များနှင့် ဆေးဆိုးထားသောအီစတာတနင်္ဂနွေဥများကို ကယ်လ်ဒီးယန်းလူများ၏အခမ်းအနားများမှာလည်း တွေ့ရပါသည်။”​—(နယူးယောက်၊ ၁၉၄၃)၊ စစ. ၁၀၃၊ ၁၀၇၊ ၁၀၈။ ယေရမိ ၇:၁၈ နှင့်နှိုင်း။

နှစ်သစ်ကူးပွဲများသည် ခရစ်ယာန်များအဖို့ ကန့်ကွက်စရာလော

ကမ္ဘာ့စာအုပ်စွယ်စုံကျမ်း အရ၊ “ရောမမင်း ဂျူးလိယပ်စီဇာက ဘီ.စီ. ၄၆ ခုတွင် ဇန်နဝါရီ ၁ ရက်ကို နှစ်သစ်ကူးနေ့အဖြစ် သတ်မှတ်လိုက်သည်။ ယင်းနေ့ကို ရောမလူတို့က မြို့တံခါး၊ အိမ်တံခါးနှင့်အစပျိုးခြင်းတို့၏နတ်ဘုရား ဂျေးနပ်စ်အား ဆက်ကပ်ခဲ့သည်။ သူ၏အမည်ကိုအစွဲပြု၍ ဇန်နဝါရီလကိုသမုတ်၏။ သူ၌ အရှေ့ နှင့်အနောက်ဘက်ဆီသို့ ကြည့်နေသောမျက်နှာနှစ်ခုရှိသည်။”​—(၁၉၈၄)၊ အတွဲ ၁၄၊ စ. ၂၃၇။

နှစ်သစ်ကူးနေ့စွဲနှင့်ထုံးစံများသည် တိုင်းပြည်အလိုက် ခြားနားသည်။ ဒေသများစွာတို့၌ ဓလေ့အတိုင်း ပျော်ရွှင်မြူးတူး၍ သေရည်သောက်လေ့ရှိကြသည်။ သို့သော် ရောမ ၁၃:၁၃ ကဤသို့သြဝါဒပေး၏– “ပွဲလုပ်ခြင်း၊ ယစ်မျိုးသောက်ကြူးခြင်း၊ မတရားသောမေထုန်၌မှီဝဲခြင်း၊ ကိလေသာညစ်ညူးခြင်း၊ ရန်တွေ့ခြင်း၊ ဂုဏ်ပြိုင်ခြင်းအမှုတို့ကိုကြဉ်ရှောင်၍ နေ့အချိန်၌ကဲ့သို့ တင့်တယ်လျောက်ပတ်စွာ ကျင့်ဆောင်ပြုမူကြကုန်အံ့။” (၁ ပေတရု ၄:၃၊ ၄; ဂလာတိ ၅:၁၉-၂၁ တို့ကိုလည်းရှု။)

“လူသေများဝိညာဉ်” ကို အောက်မေ့သောပွဲနေ့များ၏ဇာစ်မြစ်ကား အဘယ်နည်း

၁၉၁၀ ခုနှစ်ထုတ် ဗြိတဲန်နစ်ကာစွယ်စုံကျမ်းက ဤသို့ဆို၏– “စိုးလ်များနေ့ . . . သေလွန်သူသစ္စာရှိတို့အား သတိရအောက်မေ့ရန် ရိုမင်ကက်သလစ်ချာ့ချ်က သတ်မှတ်သောရက်။ သေသောအခါ အပြစ်သေးမွှားများမှ သုတ်သင်ဆေးကြောခြင်းမခံရသေးသည့်၊ သို့မဟုတ် ကျူးလွန်ခဲ့သည့်အပြစ်များအတွက် အပြစ်မဖြေရသေးသည့်သစ္စာရှိ၏စိုးလ်သည် ပီတိချမ်းသာရူပါရုံမရသေး၊ မစ္ဆားပွဲ၌ ဆုတောင်းခြင်းနှင့် ပူဇော်ခြင်းတို့ဖြင့် သူ့အား ချမ်းသာရစေနိုင်သည် ဟူသောအယူဝါဒရှိကြရာ၊ ထိုအယူဝါဒကိုအခြေပြု၍ ပွဲခံခြင်းဖြစ်သည်။ . . . စိုးလ်များနေ့နှင့်စပ်လျဉ်းသော လူကြိုက်များအယူအဆအချို့တို့သည် ဒိဋ္ဌိဇာစ်မြစ်ရှိ၍ မှတ်ဉာဏ်မမီတော့သော ရှေးပဝေသဏီနှင့်ဆိုင်သည်။ ထို့ကြောင့် ကက်သလစ်နိုင်ငံအမြောက်အမြားမှ လယ်သမားတို့က စိုးလ်များနေ့၌ လူသေတို့သည် မိမိတို့အိမ်သို့ပြန်လာ၍ လူရှင်၏အစာကို စားသောက်ကြသည်ဟု ယူဆကြပါသည်။”​—အတွဲ ၁၊ စ. ၇၀၉။

အမေရိကန်းနားစွယ်စုံကျမ်းက ဤသို့ဆို၏– “သူတော်စင်များနေ့၏အကြိုနေ့ပွဲနှင့်ဆက်စပ်သော ထုံးစံများ၏ဝိသေသလက္ခဏာများသည် ခရစ်ယာန်အကြိုခေတ်များမှ စဲလ်တစ်လူမျိုးများ၏ ဒရူးအစ်ဘာသာရေးအခမ်းအနားမှ ဆင်းသက်လာကြောင်း တွေ့နိုင်သည်။ စဲလ်တစ်လူမျိုးများသည် အဓိကဘုရားနှစ်ပါးဖြစ်သော နေဘုရားနှင့် လူသေတို့၏ စမ်ဟိုင်းအမည်ရှိ ဘုရားတို့ကို ကိုးကွယ်ကြသည်။ စမ်ဟိုင်း၏ပွဲနေ့ကို စဲလ်တစ်လူတို့၏နှစ်သစ်အစ နိုဝင်ဘာလ ၁ ရက်၌ကျင်းပသည်။ လူသေတို့အတွက်ပွဲနေ့ကို ခရစ်ယာန်တို့၏အခမ်းအနားအထဲသို့ တစ်စစ သွတ်သွင်းလေသည်။”​—(၁၉၇၇)၊ အတွဲ ၁၃၊ စ. ၇၂၅။

လူသေကိုးကွယ်ခြင်း ဟူသောစာအုပ်က အောက်ပါဇာစ်မြစ်ကိုပြညွှန်၏– “ရှေးလူမျိုးများအားလုံး၏ဒဏ္ဍာရီပေါင်းချုပ်တို့သည် ရေလွှမ်းမိုးခြင်းအဖြစ်အပျက်များနှင့် ဆက်နွှဲယ်လျက်ရှိသည်။ . . . ထိုအခြင်းအရာကို အောက်မေ့လျက် လူသေတို့အတွက် ပွဲကြီးလမ်းကြီး ကျင်းပကြသည့်အဖြစ်က ယင်းအဆို မည်မျှခိုင်လုံကြောင်း သာဓကပြနေပေသည်။ အချင်းချင်း အနည်းနှင့်အများ ကူးလူးဆက်ဆံမှုရှိသောလူမျိုးများသာ ထိုပွဲကြီးကို ကျင်းပကြသည်မဟုတ်။ သမုဒ္ဒရာရေပြင်ကြီးမက အချိန်ရာစုနှစ်များစွာကွာလှမ်းသော လူမျိုးများလည်း ကျင်းပကြသည်။ ထို့ပြင် အားလုံးကလည်း ထိုပွဲကို ရေလွှမ်းမိုးသောနေ့ သို့မဟုတ်၊ ထိုနေ့၏ဝန်းကျင်အချိန်တွင် ကျင်းပကြသည်။ မောရှေ၏မှတ်တမ်းတင်ချက်အရ ဒုတိယလ ဆယ့်ခုနစ်ရက် ဖြစ်သည်​—ထိုလသည် ကျွန်ုပ်တို့၏နိုဝင်ဘာလနှင့် ထပ်တူလောက်ကျသည်။” (လန်ဒန်၊ ၁၉၀၄၊ ဗိုလ်မှူးကြီး ဂျေ. ဂါးနီးယား၊ စ. ၄) ထို့ကြောင့် ထိုပွဲလမ်းများသည် စင်စစ်အားဖြင့် နောဧလက်ထက် ဘုရားသခင်၏ဖျက်ဆီးကိုခံရသောဆိုးယုတ်သူတို့အား ဂုဏ်ပြုကိုးကွယ်ရာမှ စတင်လာခြင်းဖြစ်သတည်း။​—က. ၆:၅-၇; ၇:၁၁။

“လူသေများဝိညာဉ်” ကိုအောက်မေ့သောထိုပွဲနေ့များသည် လူသေများ အခြားတစ်နေရာတွင် အသက်ရှင်နေသယောင် သဘောသက်ရောက်စေသည်ဖြစ်ရာ လူသေသည် သတိတရားလုံးဝမရှိ ဟူသောကျမ်းစာဖော်ပြချက်နှင့်ဆန့်ကျင်၏။​—ဒေ. ၉:၅၊ ၁၀; ဆာ. ၁၄၆:၄။

လူ၏စိုးလ်မသေနိုင်ဟူသောအယူ၏ဇာစ်မြစ်နှင့်ပတ်သက်၍ စာမျက်နှာ ၃၃၂ ပါ “သေခြင်း” ကိုလည်းကောင်း၊ စာမျက်နှာ ၉၀၊ ၉၁ ပါ “စိုးလ်” ကိုလည်းကောင်းရှု။

ဗက်လန်တိုင်းနေ့၏မူလအစကား အဘယ်နည်း

ကမ္ဘာ့စာအုပ်စွယ်စုံကျမ်းက ကျွန်ုပ်တို့အား ဤသို့သိကြားစေ၏– “ဗက်လန်တိုင်းနေ့သည် ဗက်လန်တိုင်းအမည်ရှိ ခရစ်ယာန်အာဇာနည်နှစ်ဦးကို အောက်မေ့သောပွဲနေ့၌ ကျရောက်သည်။ သို့သော် ထိုနေ့နှင့်ဆက်နွှဲယ်သောထုံးစံများမှာမူ . . . ဖေဖော်ဝါရီ ၁၅ ရက်ရောက်တိုင်းကျင်းပသော လူပါကာလီယာ ခေါ် ရှေးရောမပွဲလမ်းတစ်ရပ်မှ ဆင်းသက်လာပုံရသည်။ ထိုပွဲလမ်းသည် မိန်းမနှင့်အိမ်ထောင်ရေးနတ်ဘုရားမ ဂျူးနိုးကိုလည်းကောင်း၊ သဘာဝတရားနတ်ဘုရား ပန်ကိုလည်းကောင်း ဂုဏ်ပြုသည်။”​—(၁၉၇၃)၊ အတွဲ ၂၀၊ စ. ၂၀၄။

ရက်တစ်ရက်ကိုသတ်မှတ်ပြီး မိခင်များအားဂုဏ်ပြုသည့်ဓလေ့သည် အဘယ်ကစခဲ့သနည်း

ဗြိတဲန်နစ်ကာစွယ်စုံကျမ်းက ဤသို့ဆို၏– “ရှေးဂရိ (ဟေလသ) နိုင်ငံ၏ မိခင်ကိုးကွယ်သောဓလေ့တစ်ခုမှ ပွဲတစ်ရပ်ပေါ်ပေါက်လာသည်။ အာရှမိုင်းနားတစ်လျှောက် ဘုရားများ၏မယ်တော်မြတ်ဖြစ်သော စစ်ဘလီ သို့မဟုတ် ရီးယားအဖို့ ပွဲလုပ်ခြင်းနှင့်အတူ မိခင်ကိုရှိခိုးကိုးကွယ်ခြင်းအမှုကို ထုံးတမ်းဓလေ့အတိုင်း ပြုကြသည်။”​—(၁၉၅၉)၊ အတွဲ ၁၅၊ စ. ၈၄၉။

နိုင်ငံတစ်နိုင်ငံ၏နိုင်ငံရေးသမိုင်းဖြစ်ရပ်များကို အောက်မေ့သည့်အနေနှင့် ပြုလုပ်သောအခမ်းအနားများကို ခရစ်ယာန်များ မည်သို့ရှုမှတ်သည်နှင့်ပတ်သက်၍ အဘယ်ကျမ်းမူများက ရှင်းလင်းတင်ပြသနည်း

ယော. ၁၈:၃၆– “ယေရှုက ငါ၏နိုင်ငံသည် ဤလောကနှင့်မစပ်ဆိုင် . . . ဟု [ရောမဘုရင်ခံအား] မိန့်တော်မူ၏။”

ယော. ၁၅:၁၉၊ သက– “သင်တို့ [ယေရှုနောက်တော်လိုက်များ] သည် ဤလောကနှင့် သက်ဆိုင်သူများဖြစ်ပါမူ လောကသားတို့သည် မိမိတို့၏သွေးချင်းသားချင်းများသဖွယ် သင်တို့အားချစ်ကြလိမ့်မည်။ ငါသည် သင်တို့ကို ဤလောကထဲက ရွေးကောက်သည်ဖြစ်၍ သင်တို့သည် ဤလောကနှင့်မသက်ဆိုင်။ ထို့ကြောင့် လောကသားတို့သည် သင်တို့ကို မုန်းကြ၏။”

၁ ယော. ၅:၁၉၊ သမ္မာ– “တစ်လောကလုံးသည် မာရ်နတ်၏လက်၌ရှိသည်ကို . . . ငါတို့သိကြ၏။” (ယောဟန် ၁၄:၃၀; ဗျာဒိတ် ၁၃:၁၊ ၂; ဒံယေလ ၂:၄၄၊ ၄၅ တို့နှင့်နှိုင်း။)

အခြားဒေသန္တရနှင့်ပြည်လုံးကျွတ်ပွဲနေ့များ

အမြောက်အမြားရှိသည်။ ဤတွင် အကုန်အစင်မဆွေးနွေးနိုင်ပါ။ သို့သော် အထက်၌တင်ပြသောသမိုင်းဆိုင်ရာအချက်အလက်များက မည်သည့်ပွဲနေ့နှင့်စပ်လျဉ်း၍မဆို ဘာကိုသတိပြုရမည်ဖြစ်ကြောင်း ဖော်ပြပေသည်။ ဆွေးနွေးတင်ပြထားသည့်ကျမ်းမူများကလည်း ယေဟောဝါဘုရားသခင့်စိတ်တော်ကိုရွှင်လန်းစေရန် အဓိကဆန္ဒရှိသောပုဂ္ဂိုလ်များအတွက် လုံလောက်သောလမ်းညွှန် ပေးနေပေသည်။