ခရစ်ယာန်အသက်တာနဲ့ အမှုဆောင်လုပ်ငန်း လေ့ကျင့်ခန်းစာစောင် မှာပါတဲ့ အညွှန်းများ
စက်တင်ဘာ ၃-၉
ကျမ်းစာထဲက အဖိုးတန်ဘဏ္ဍာများ | ယောဟန် ၁-၂
“ပထမဆုံး အံ့ဖွယ်အမှုကို ယေရှု ပြုလုပ်”
(ယောဟန် ၂:၁-၃) သုံးရက်မြောက်နေ့မှာ ဂါလိလဲပြည်၊ ကာနမြို့မှာ မင်္ဂလာပွဲရှိတယ်။ ယေရှုရဲ့မိခင်လည်း အဲဒီကို ရောက်နေတယ်။ ၂ ယေရှုနဲ့ တပည့်တွေကိုပါ မင်္ဂလာပွဲတက်ဖို့ ဖိတ်ထားတယ်။ ၃ စပျစ်ဝိုင် ကုန်ခါနီးမှာ ယေရှုရဲ့မိခင်က “သူတို့မှာ ဝိုင်မရှိတော့ဘူး” လို့ ပြောတဲ့အခါ၊
ခရစ်တော်ဟာ ဘုရားသခင်ရဲ့ တန်ခိုးတော်ဖြစ်
၃ ယေရှုဟာ ကာနမြို့က မင်္ဂလာဆောင်မှာ ပထမဆုံးအံ့ဖွယ်အမှုကို ပြုလုပ်ခဲ့တယ်။ မျှော်လင့်ထားတာထက် ဧည့်သည်တွေပိုများသွားလို့ ဝိုင်မလောက်တာ ဖြစ်နိုင်တယ်။ ကြင်စဦးမောင်နှံအတွက် တော်တော်ရှက်စရာပဲ။ သူတို့ ဧည့်ဝတ်မကျေသလို ဖြစ်သွားတယ်။ မင်္ဂလာပွဲမှာ ယေရှုရဲ့မိခင် မာရိလည်း ရှိနေတယ်။ နှစ်တွေတစ်လျှောက် မာရိဟာ ယေရှုနဲ့ပတ်သက်တဲ့ ပရောဖက်ပြုချက်အားလုံးကို သေချာတွေးတောခဲ့မှာပဲ။ ယေရှုဟာ “အမြင့်ဆုံးသောအရှင်၏ သားတော်” လို့ အခေါ်ခံရမယ်ဆိုတာ မာရိသိတယ်။ (လု. ၁:၃၀-၃၂; ၂:၅၂) ယေရှုမှာ အံ့ဖွယ်အမှုပြုလုပ်နိုင်တဲ့ တန်ခိုးရှိတယ်လို့ မာရိယုံကြည်တဲ့အတွက် ယေရှုဆီ အကူအညီတောင်းလိုက်တာလား။ ဘာပဲဖြစ်ဖြစ် မာရိရော ယေရှုပါ ဒီဇနီးမောင်နှံကို ကူညီချင်တာ ထင်ရှားတယ်။ ဒါကြောင့် ယေရှုဟာ ရေလီတာ ၃၈၀ (ဂါလံ ၁၀၀) ကို “ကောင်းသောစပျစ်ဝိုင်” အဖြစ် အံ့ဖွယ်နည်းနဲ့ ပြောင်းလဲပေးလိုက်တယ်။ (ယောဟန် ၂:၃၊ ၆–၁၁ ကိုဖတ်ပါ။) ယေရှုမှာ ဒီအံ့ဖွယ်အမှု ပြုလုပ်ဖို့ တာဝန်ရှိလို့လား။ မရှိပါဘူး။ ဒါပေမဲ့ ဒီလိုလုပ်ပေးတာဟာ လူတွေကို ဂရုစိုက်လို့၊ ရက်ရောတဲ့ဖခင်ကို တုပလို့ဖြစ်တယ်။
(ယောဟန် ၂:၄-၁၁) ယေရှုက “ကျွန်တော်တို့နဲ့ ဘာဆိုင်လို့လဲ။ ကျွန်တော့်အချိန် မရောက်သေးဘူး” လို့ပြောတယ်။ ၅ ဒါနဲ့ ယေရှုရဲ့မိခင်က “သူပြောတဲ့အတိုင်း လုပ်ကြ” ဆိုပြီး ဧည့်ခံတဲ့သူတွေကို ပြောတယ်။ ၆ အဲဒီမှာ ဂျူးတွေရဲ့ သန့်စင်ခြင်းထုံးစံအရ ကျောက်ရေအိုး ၆ လုံး ထားပေးထားတယ်။ ရေအိုးတစ်လုံးမှာ ရေ ၂ ပုံး၊ ၃ ပုံး လောက် ဆံ့တယ်။ ၇ ယေရှုက “ဒီအိုးတွေထဲ ရေဖြည့်ပါ” လို့ပြောတော့ အိုးနှုတ်ခမ်းဝအထိ ရေဖြည့်ကြတယ်။ ၈ အဲဒီနောက် “နည်းနည်း ခပ်ပြီး ပွဲအုပ်ဆီ ယူသွားလိုက်” လို့ပြောတော့ အဲဒီအတိုင်း လုပ်ကြတယ်။ ၉ ပွဲအုပ်က စပျစ်ဝိုင်ဖြစ်သွားတဲ့ ရေကို မြည်းကြည့်တယ်။ (ဧည့်ခံတဲ့သူတွေက ဒီစပျစ်ဝိုင် ဘယ်လိုဖြစ်လာမှန်း သိပေမဲ့ ပွဲအုပ်ကတော့ မသိဘူး။) အဲဒီနောက် သတို့သားကို ခေါ်ပြီး၊ ၁၀ “လူတွေက စပျစ်ဝိုင် အကောင်းစားကို အရင်ဆုံး တည်ခင်းပြီး ဧည့်သည်တွေ မူးတော့မှ အညံ့ကို တည်ခင်းတတ်ကြတယ်။ ခင်ဗျားကတော့ ဝိုင်အကောင်းစားကို အခုထိ ချန်ထားတာပဲ” လို့ပြောတယ်။ ၁၁ ယေရှုက ဂါလိလဲပြည်၊ ကာနမြို့မှာ ဒီအံ့ဖွယ်အမှုကို ဦးဆုံးလုပ်ပြီး သူ့တန်ခိုးကို ပြခဲ့တယ်။ တပည့်တွေလည်း ယေရှုကို ယုံကြည်လာကြတယ်။
ဦးဆုံးအံ့ဖွယ်အမှု
ဒါက ယေရှုရဲ့ ဦးဆုံးအံ့ဖွယ်အမှုပဲ။ ဒီအံ့ဖွယ်အမှုကို တပည့်သစ်တွေတွေ့ပြီး သူ့ကို ပိုယုံကြည်လာကြတယ်။ အဲဒီနောက် မိခင်၊ ညီတွေနဲ့အတူ ဂါလိလဲအိုင်ရဲ့ အနောက်မြောက်ဘက်ကမ်းခြေမှာရှိတဲ့ ကပေရနောင်မြို့ကို ဆင်းသွားတယ်။
ရှာဖွေလေ့လာ ဘုရားရေးရာရတနာ
(ယောဟန် ၁:၁) အစအဦးမှာ နှုတ်ကပတ်တော် ရှိတယ်။ နှုတ်ကပတ်တော်ဟာ ဘုရားသခင်နဲ့အတူ ရှိတယ်။ နှုတ်ကပတ်တော်ကလည်း ဘုရားတစ်ပါးပါပဲ။
nwtsty ယဟ ၁:၁ လေ့လာမှု မှတ်စု
နှုတ်ကပတ်တော်– ဒါမှမဟုတ် “လိုဂေါ့စ်”။ ဂရိ၊ ဟိုလိုဂေါ့စ်။ ဒီနေရာမှာ ဘွဲ့အမည်အနေနဲ့ အသုံးပြုထားတာဖြစ်တယ်။ ယဟ ၁:၁၄ နဲ့ ဗ ၁၉:၁၃ မှာလည်း သုံးထားတယ်။ ဒီဘွဲ့အမည်ပိုင်ဆိုင်သူဟာ ယေရှုဖြစ်ကြောင်း ယောဟန် ဖော်ပြတယ်။ ယေရှု မြေကြီးပေါ်မလာခင် နာမ်ဝိညာဉ်သားဘဝ၊ စုံလင်တဲ့ လူသားအဖြစ် မြေကြီးပေါ် အမှုဆောင်ချိန်နဲ့ ကောင်းကင်ရောက်သွားပြီးနောက်မှာ အဲဒီဘွဲ့အမည်ကို ခံယူခဲ့တယ်။ ယေရှုဟာ ဘုရားကိုယ်စား တခြားနာမ်ဝိညာဉ်သားတွေ၊ လူသားတွေနဲ့ ပြောဆိုဆက်သွယ်ပေးရလို့ ဘုရားသခင်ရဲ့ ပြောရေးဆိုခွင့်ရှိသူ ဖြစ်တယ်။ ဒါကြောင့် ယေရှု မြေကြီးပေါ်မလာခင် ယေဟောဝါဟာ ကောင်းကင်တမန်ဖြစ်တဲ့ နှုတ်ကပတ်တော်ကို အသုံးပြုပြီး လူသားတွေနဲ့ ပြောဆိုဆက်သွယ်မယ်လို့ ယူဆတာက အကျိုးသင့်အကြောင်းသင့်ရှိတယ်။—က ၁၆:၇-၁၁။ ၂၂:၁၁။ ၃၁:၁၁။ ထွ ၃:၂-၅။ သူ ၂:၁-၄။ ၆:၁၁၊ ၁၂။ ၁၃:၃။
နဲ့အတူ– စာသားအရ၊ “ဆီသို့။” ရှေ့နောက်စကားအရ ဂရိ ဝိဘတ်စကားလုံး ပရော့စ်က နီးကပ်မှု၊ ရင်းနှီးမှု ရှိခြင်းကို ညွှန်ပြတယ်။ အဲဒီအပြင် နှုတ်ကပတ်တော်နဲ့ စစ်မှန်တဲ့တစ်ဆူတည်းသော ဘုရားသခင်ဟာ သီးခြားပုဂ္ဂိုလ်တွေဖြစ်မှန်း ဖော်ပြတယ်။
နှုတ်ကပတ်တော်ကလည်း ဘုရားတစ်ပါးပါပဲ– ဒါမှမဟုတ် နှုတ်ကပတ်တော်ဟာ [“ဘုရားကဲ့သို့သောသူ”] ဖြစ်တယ်။ ဒီဝါကျမှာ ယောဟန်က “နှုတ်ကပတ်တော်” လို့ခေါ်တဲ့ (ဂရိ၊ ဟိုလိုဂေါ့စ်။ ဒီအခန်းငယ်ရဲ့ နှုတ်ကပတ်တော် လေ့လာမှု မှတ်စုကို ကြည့်ပါ) ယေရှုခရစ်ရဲ့ ဂုဏ်ပုဒ်တစ်ခုကို ဖော်ပြတယ်။ ဘုရားသခင်ရဲ့ သားဦးဖြစ်တဲ့ နှုတ်ကပတ်တော်ဟာ ထူးကဲတဲ့ရာထူးကို ရထားတယ်။ ဘုရားသခင်က သူ့အားဖြင့် တခြားအရာအားလုံးကို ဖန်ဆင်းခဲ့တဲ့အတွက် သူ့ကို “ဘုရားတစ်ပါး၊ ဘုရားကဲ့သို့သောသူ၊ မြင့်မြတ်သူ” လို့ ဖော်ပြနိုင်တယ်။ ယေရှုကို အနန္တတန်ခိုးရှင် ဘုရားသခင်နဲ့ တန်းတူဖြစ်စေတဲ့ “နှုတ်ကပတ်တော်သည် ဘုရားသခင်ဖြစ်တော်မူ၏” ဆိုတဲ့ ပြန်ဆိုမှုကို ဘာသာပြန်သူများစွာက ပိုနှစ်သက်ကြတယ်။ ဒါပေမဲ့ “နှုတ်ကပတ်တော်” ဟာ အနန္တတန်ခိုးရှင် ဘုရားသခင်နဲ့ မတူကြောင်း ယောဟန် ဖော်ပြတဲ့ အကြောင်းရင်း အများကြီးရှိတယ်။ ဦးဆုံး၊ ရှေ့ဝါကျနဲ့ နောက်ဝါကျတို့မှာ “နှုတ်ကပတ်တော်” ဟာ “ဘုရားသခင်နဲ့အတူ ရှိ” တယ်လို့ ရှင်းရှင်းလင်းလင်း ဖော်ပြတယ်။ အဲဒီအပြင် အခန်းငယ် ၁ နဲ့ ၂ မှာ ဂရိစကားလုံး သီးအော့စ် သုံးကြိမ်ပါတယ်။ ပထမနဲ့ တတိယ သီးအော့စ် ဆိုတဲ့ စကားလုံးရှေ့မှာ တိကျအညွှန်းစကားလုံးပါပြီး ဒုတိယအကြိမ်ရှေ့မှာတော့ မပါဘူး။ ဒုတိယ သီးအော့စ် စကားလုံးရှေ့မှာ တိကျအညွှန်းစကားလုံး မပါတာက ထူးခြားတယ်လို့ ပညာရှင် အတော်များများ ပြောကြတယ်။ သီးအော့စ် စကားလုံးရှေ့မှာ တိကျအညွှန်းစကားလုံးပါရင် အနန္တတန်ခိုးရှင် ဘုရားသခင်ကို ရည်ညွှန်းတာဖြစ်တယ်။ မပါရင်တော့ “နှုတ်ကပတ်တော်” ရဲ့ ထူးခြားတဲ့ဂုဏ်ပုဒ်ကို ရည်ညွှန်းတာဖြစ်တယ်။ ဒါကြောင့် အင်္ဂလိပ်၊ ပြင်သစ်နဲ့ ဂျာမန်ဘာသာပြန်ကျမ်းတချို့က ယောဟန် ၁:၁ ကို ကမ္ဘာသစ်ဘာသာပြန်ကျမ်းနဲ့ ခပ်ဆင်ဆင် ဘာသာပြန်ကြတယ်။ ဒီလိုနဲ့ “နှုတ်ကပတ်တော်” ဟာ “ဘုရားတစ်ပါး၊ မြင့်မြတ်သူ၊ ကောင်းကင်တမန်ကဲ့သို့၊ ဘုရားကဲ့သို့သောသူ” ဆိုတဲ့ အဓိပ္ပာယ်မျိုးနဲ့ ပြန်ဆိုကြတယ်။ ဒီသဘောနဲ့အညီ ကော့ပ်တစ်ဘာသာစကားရဲ့ ဒေသသုံးစကားဖြစ်တဲ့ ဆဟီဒစ်၊ ဘိုဟဲရစ်စကားတွေနဲ့ ယောဟန်ခရစ်ဝင်ကျမ်းကို ပြန်ဆိုထားတဲ့ ကျမ်းစောင်တွေမှာ ယောဟန် ၁:၁ ထဲက သီးအော့စ် ပါတဲ့ ပထမအကြိမ်နဲ့ ဒုတိယအကြိမ်ကို ခွဲခြားဖော်ပြတယ်။ ဒီဘာသာပြန်ကျမ်းတွေဟာ အေဒီ တတိယနဲ့ စတုတ္ထရာစုက ကျမ်းစောင်တွေဖြစ်တယ်။ အဲဒီဘာသာပြန်ဆိုချက်တွေက “နှုတ်ကပတ်တော်” ရဲ့ ဂုဏ်ပုဒ်တစ်ခု ကို ပေါ်လွင်စေတယ်။ သူ့ရဲ့အနေအထားဟာ ဘုရားနဲ့တူတယ်၊ ဒါပေမဲ့ အနန္တတန်ခိုးရှင်ဖြစ်တဲ့ သူ့ဖခင်နဲ့ တန်းတူဖြစ်စေတာ မဟုတ်ဘူး။ ဒီအခန်းငယ်နဲ့အညီ ကော ၂:၉ က “ဘုရားသခင်ရဲ့ ဂုဏ်ရည်တော်တွေဟာ ခရစ်တော်ဆီမှာ အလုံးစုံရှိတယ်” လို့ ဖော်ပြထားတယ်။ ၂ပ ၁:၄ အရဆိုရင်လည်း ခရစ်တော်ရဲ့အမွေခံဖက်တွေတောင် “ဘုရားသခင်လို ဝိညာဉ်ပုဂ္ဂိုလ်တွေ ဖြစ်လာနိုင်မယ်။” အဲဒီအပြင် စက်ပ်တွားဂျင့်ဘာသာပြန်ကျမ်းမှာ အသုံးပြုထားတဲ့ ဂရိစကားလုံး သီအော့စ်ဟာ “ဘုရားသခင်” လို့ပြန်ဆိုတဲ့ ဟီဘရူးစကားလုံး အဲလ် (ʼel)၊ အီလိုဟင် (ʼelo.himʹ) တို့နဲ့ တူတယ်။ အဲဒီစကားလုံးတွေရဲ့ အခြေခံအဓိပ္ပာယ်က “တန်ခိုးကြီးသူ၊ အစွမ်းခွန်အားကြီးသူ” ဖြစ်တယ်။ ဒီဟီဘရူးစကားလုံးတွေကို အနန္တတန်ခိုးရှင် ဘုရားသခင်၊ တခြားဘုရားတွေ၊ လူတွေကို ရည်ညွှန်းရာမှာ အသုံးပြုတယ်။ (ယဟ ၁၀:၃၄ လေ့လာမှု မှတ်စုကို ကြည့်ပါ။) နှုတ်ကပတ်တော်ကို “ဘုရားတစ်ပါး” ဒါမှမဟုတ် “တန်ခိုးကြီးသူ” လို့ ခေါ်တာက ရှာ ၉:၆ ပါ ပရောဖက်ပြုချက်နဲ့ ကိုက်ညီတယ်။ အဲဒီမှာ မေရှိယကို (“အနန္တတန်ခိုးရှင် ဘုရားသခင်” လို့မဟုတ်ဘဲ) “တန်ခိုးကြီးတဲ့ဘုရား” လို့ ခေါ်ကြမယ်၊ အဲဒီအပြင် သူ့လက်အောက်ခံတွေအဖြစ် နေထိုင်ခွင့်ရမယ့် သူအားလုံးရဲ့ “ထာဝရဖခင်” ဖြစ်လာမယ်လို့ ကြိုဟောထားတယ်။ စိတ်ထက်သန်တဲ့ သူ့ဖခင် “ဗိုလ်ခြေတို့ရဲ့အရှင်” ယေဟောဝါက အဲဒီကြိုဟောချက်တွေကို ပြည့်စုံစေပါလိမ့်မယ်။—ရှာ ၉:၇။
(ယောဟန် ၁:၂၉) နောက်တစ်နေ့ ၊ ယေရှုလာနေတာကို မြင်တဲ့အခါ ယောဟန်က “ကြည့်ပါ၊ ဒီလောကရဲ့ အပြစ်ကို ဖယ်ရှားပေးမယ့် ဘုရားသခင်ရဲ့သိုးသငယ်ဟာ သူပဲ။
nwtsty ယဟ ၁:၂၉ လေ့လာမှု မှတ်စု
ဘုရားသခင်ရဲ့ သိုးသငယ်– ယေရှုနှစ်ခြင်းခံပြီး မာရ်နတ်သွေးဆောင်တာကို ခံရပြီးနောက် နှစ်ခြင်းပေးသူ ယောဟန်က သူ့ကို “ဘုရားသခင်ရဲ့ သိုးသငယ်” လို့ ခေါ်ခဲ့တယ်။ ဒီအသုံးအနှုန်းက ဒီကျမ်းချက်နဲ့ ယဟ ၁:၃၆ မှာပဲ ပါတယ်။ (နောက်ဆက်တွဲ က၇ ကိုကြည့်။) ယေရှုကို သိုးသငယ်နဲ့ နှိုင်းယှဉ်တာ သင့်တော်ပါတယ်။ အပြစ်ရှိမှန်း သိပြီး ဘုရားသခင်နဲ့ ပြန်သင့်မြတ်ချင်သူတွေဟာ သိုး ပူဇော်ကြတယ်လို့ ကျမ်းစာမှာ ဖော်ပြထားတယ်။ ဒါက လူသားတွေအတွက် မိမိရဲ့ စုံလင်တဲ့ လူ့အသက်ကို စွန့်ပြီး ပူဇော်မယ့် ယေရှုရဲ့ ပူဇော်သက္ကာကို ကြိုတင်ဖော်ပြတာ ဖြစ်တယ်။ “ဘုရားသခင်ရဲ့ သိုးသငယ်” ဆိုတဲ့ အသုံးအနှုန်းက ကျမ်းပိုဒ်အတော်များများကို ပြန်စဉ်းစားမိစေတယ်။ ဟီဘရူးကျမ်းစောင်တွေကို နှစ်ခြင်းပေးသူယောဟန် အကျွမ်းဝင်တဲ့အတွက် သူပြောဆိုခဲ့တဲ့စကားက– သားအိဇက်အစား အာဗြဟံ မီးရှို့ပူဇော်ခဲ့တဲ့ သိုးထီး (က ၂၂:၁၃)၊ ကျွန်ခံနေရတဲ့ အစ္စရေးတွေ လွတ်မြောက်ဖို့ အီဂျစ်ပြည်မှာ သတ်ခဲ့တဲ့ ပသခါသိုးသငယ် (ထွ ၁၂:၁-၁၃) ဒါမှမဟုတ် ဂျေရုဆလင်မှာရှိတဲ့ ဘုရားသခင့် ပူဇော်ရာပလ္လင်ပေါ်မှာ မနက်တိုင်း၊ ညနေတိုင်း ပူဇော်ခဲ့တဲ့ သိုးထီးလေး (ထွ ၂၉:၃၈-၄၂) တွေကို ရည်ညွှန်းတာ ဖြစ်နိုင်တယ်။ ဟေရှာယပရောဖက်ပြုချက်မှာ ‘အသတ်ခံရမယ့် သိုးလို ခေါ်သွား’ ခံရသူ၊ “ငါ့ကျွန်” လို့ ယေဟောဝါ ခေါ်တဲ့သူကို ယောဟန် ပြောချင်တာလည်း ဖြစ်နိုင်တယ်။ (ရှာ ၅၂:၁၃။ ၅၃:၅၊ ၇၊ ၁၁) တမန်တော်ပေါလုက ကောရိန္သုအသင်းတော်ကို ပထမဆုံးအကြိမ် စာရေးတုန်းက ယေရှုကို “ပသခါသိုးသငယ်” လို့ ခေါ်ဆိုခဲ့တယ်။ (၁က ၅:၇) တမန်တော်ပေတရုကျတော့ “ခရစ်တော်ရဲ့ တန်ဖိုးကြီးတဲ့သွေး” ကို “အနာအဆာ၊ အစွန်းအထင်းကင်းတဲ့ သိုးသငယ်ရဲ့သွေးနဲ့တူ” တယ်လို့ ပြောခဲ့တယ်။ (၁ပ ၁:၁၉) ပြီးတော့ ဗျာဒိတ်ကျမ်းမှာ ဂုဏ်တင်ခံရတဲ့ယေရှုကို “သိုးသငယ်” လို့ ၂၅ ကြိမ်ထက်မက တင်စားပြီး ခေါ်ဆိုထားတယ်။—ဥပမာတချို့– ဗ ၅:၈။ ၆:၁။ ၇:၉။ ၁၂:၁၁။ ၁၃:၈။ ၁၄:၁။ ၁၅:၃။ ၁၇:၁၄။ ၁၉:၇။ ၂၁:၉။ ၂၂:၁။
ကျမ်းစာဖတ်ရှုခြင်း
(ယောဟန် ၁:၁-၁၈) အစအဦးမှာ နှုတ်ကပတ်တော် ရှိတယ်။ နှုတ်ကပတ်တော်ဟာ ဘုရားသခင်နဲ့အတူ ရှိတယ်။ နှုတ်ကပတ်တော်ကလည်း ဘုရားတစ်ပါးပါပဲ။ ၂ သူဟာ အစအဦးကတည်းက ဘုရားသခင်နဲ့အတူ ရှိခဲ့တယ်။ ၃ ဘုရားသခင်က သူ့ကိုသုံးပြီး အရာခပ်သိမ်းကို ဖန်ဆင်းခဲ့တယ်။ သူမပါဘဲ ဖန်ဆင်းထားတာ ဘာတစ်ခုမှ မရှိဘူး။ ၄ သူ့ကိုသုံးပြီး ဘုရားသခင် ဖန်ဆင်းခဲ့တဲ့အရာဟာ အသက်ပဲ။ အဲဒီအသက်ဟာ လူတွေအတွက် အလင်းပဲ။ ၅ အဲဒီအလင်းဟာ အမှောင်မှာ ထွန်းလင်းနေတယ်။ အမှောင်က အဲဒီအလင်းကို မလွှမ်းနိုင်ဘူး။ ၆ ဘုရားသခင်က ယောဟန်လို့ခေါ်တဲ့ လူတစ်ယောက်ကို မိမိရဲ့ကိုယ်စားလှယ်အဖြစ် စေလွှတ်လိုက်တယ်။ ၇ သူက အဲဒီအလင်းအကြောင်း လူတွေကို သက်သေခံဖို့ ရောက်လာတာ။ သူ့စကားကိုကြားပြီး လူအမျိုးမျိုး ယုံကြည်လာစေဖို့ပဲ။ ၈ သူဟာ အဲဒီအလင်း မဟုတ်ဘူး။ အလင်းအကြောင်း သက်သေခံဖို့ ရောက်လာတာ။ ၉ လူအမျိုးမျိုးကို အလင်းပေးမယ့် စစ်မှန်တဲ့အလင်းဟာ လူ့လောကကို ရောက်လာတော့မယ်။ ၁၀ သူက ဒီလောကထဲမှာ ရှိတယ်။ ဘုရားသခင်က သူ့ကိုသုံးပြီး ဒီလောကကို ဖန်ဆင်းခဲ့တယ်။ ဒါပေမဲ့ ဒီလောကက သူ့ကို မသိဘူး။ ၁၁ နေရင်းပြည်ကို လာတော့လည်း သူ့လူမျိုးက လက်မခံဘူး။ ၁၂ သူကတော့ မိမိကိုလက်ခံသူ၊ မိမိနာမည်ကို ယုံကြည်သူအားလုံးကို ဘုရားသခင်ရဲ့ သားသမီးဖြစ်ခွင့်ပေးတယ်။ ၁၃ သူတို့ဟာ လူ့သဘာဝအလျောက် မွေးဖွားလာတာ မဟုတ်ဘူး။ မိဘရဲ့အလိုအရ၊ ဖခင်ရဲ့အလိုအရ မွေးဖွားလာတာ မဟုတ်ဘူး။ ဘုရားသခင်ရဲ့ အလိုအရ မွေးဖွားလာသူတွေဖြစ်တယ်။ ၁၄ နှုတ်ကပတ်တော်ဟာ သွေးသားခန္ဓာနဲ့ မွေးဖွားလာပြီး ကျွန်တော်တို့နဲ့အတူ နေထိုင်တယ်။ သူ့ဘုန်းအသရေကို ကျွန်တော်တို့ မြင်ခဲ့တယ်။ ဖခင်က တစ်ဦးတည်းသောသားကို ပေးအပ်တဲ့ ဘုန်းအသရေမျိုးပဲ။ သူဟာ ဘုရားသခင်ရဲ့ မျက်နှာသာနဲ့ ပြည့်ဝတဲ့သူ၊ အမှန်တရားနဲ့ ပြည့်ဝတဲ့သူ ဖြစ်တယ်။ ၁၅ (ယောဟန်က “‘ကျွန်တော့်နောက်မှာ လာနေသူဟာ ကျွန်တော် မရှိခင်ကတည်းက တည်ရှိခဲ့သူဖြစ်လို့ ရှေ့ကိုရောက်နှင့်နေပြီ’ လို့ ကျွန်တော်ပြောတာ ဒီလူပဲ” ဆိုပြီး သူ့အကြောင်း သက်သေခံခဲ့တယ်။) ၁၆ သူ အဲဒီလိုပြည့်ဝနေတဲ့အတွက် ကျွန်တော်တို့မှာ မဟာကရုဏာကို ခံစားပြီးရင်း ခံစားနေရတယ်။ ၁၇ ပညတ်ကျမ်းကို မောရှေကတစ်ဆင့် ရခဲ့တယ်။ မဟာကရုဏာနဲ့ အမှန်တရားကိုတော့ ယေရှုခရစ်ကတစ်ဆင့် ရခဲ့တယ်။ ၁၈ ဘုရားသခင်ကို ဘယ်သူမှ မမြင်ဖူးဘူး။ ဒါပေမဲ့ အဖဘုရားရဲ့ဘေးမှာ ရှိနေတဲ့အပြင် ဘုရားတစ်ပါးလည်းဖြစ်တဲ့ တစ်ဦးတည်းသောသားက အဖဘုရားအကြောင်း ရှင်းပြတယ်။
စက်တင်ဘာ ၁၀-၁၆
ကျမ်းစာထဲက အဖိုးတန်ဘဏ္ဍာများ | ယောဟန် ၃-၄
“ရှမာရိအမျိုးသမီးတစ်ဦးကို ယေရှု သက်သေခံ”
(ယောဟန် ၄:၆၊ ၇) အဲဒီမှာ ယာကုပ်ရေတွင်း ရှိတယ်။ ယေရှုက ခရီးပန်းလာလို့ အဲဒီရေတွင်းနားမှာ ထိုင်တယ်။ အချိန်ကတော့ မွန်းတည့် ၁၂ နာရီ လောက်ရှိနေပြီ။ ၇ အဲဒီအခါ ရှမာရိ အမျိုးသမီးတစ်ယောက် ရေလာခပ်တော့ ယေရှုက “ရေနည်းနည်းလောက် တိုက်ပါလား” လို့တောင်းတယ်။
nwtsty ယဟ ၄:၆ လေ့လာမှု မှတ်စု
ခရီးပန်းလာလို့– ယေရှု ‘ပင်ပန်းသွားတယ်’ လို့ ဒီတစ်နေရာမှာပဲ ကျမ်းစာကဆိုတယ်။ အချိန်က မွန်းတည့် ၁၂:၀၀ နာရီရှိပြီ။ ယေရှုဟာ ယုဒပြည် ဂျော်ဒန်ချိုင့်ဝှမ်းကနေ ရှမာရိပြည်၊ ရှုခါမြို့အထိ တစ်မနက်လုံး ခရီးနှင်ခဲ့တာ ပေ ၃,၀၀၀ ကျော် မတ်စောက်တဲ့တောင်ကို တက်ခဲ့ပုံရတယ်။—ယဟ ၄:၃-၅။ နောက်ဆက်တွဲ က၇ ကိုကြည့်။
(ယောဟန် ၄:၂၁-၂၄) အဲဒီအခါ ယေရှုက “ကျွန်တော်ပြောတာ ယုံပါ။ ဒီတောင်ပေါ်မှာလည်း မဟုတ်၊ ဂျေရုဆလင်မြို့မှာလည်း မဟုတ်ဘဲ အဖဘုရားကို ကိုးကွယ်ရမယ့်အချိန် ရောက်လာတော့မယ်။ ၂၂ ခင်ဗျားတို့က ကိုယ်မသိတဲ့အရာကို ကိုးကွယ်ကြတယ်။ ကျွန်တော်တို့ ဂျူးတွေကတော့ ကယ်တင်ခြင်းအကြောင်း ဦးဆုံးသိခွင့်ရတဲ့အတွက် ကိုယ်သိတဲ့အရာကို ကိုးကွယ်ကြတယ်။ ၂၃ အဖဘုရားကို နည်းမှန်လမ်းကျ ဝတ်ပြုသူတွေဟာ စွမ်းအားတော်လမ်းပြမှုနဲ့အညီ၊ အမှန်တရားနဲ့အညီ ကိုးကွယ်မယ့်အချိန် ရောက်လာမယ်။ အဲဒီအချိန်ဟာ အခုအချိန်ပဲ။ အဲဒီလို ကိုးကွယ်မယ့်သူတွေကို အဖဘုရား ရှာနေတယ်။ ၂၄ ဘုရားသခင်ဟာ ဝိညာဉ်ပုဂ္ဂိုလ် ဖြစ်တယ်။ ဘုရားသခင်ကို ကိုးကွယ်တဲ့သူတွေဟာ စွမ်းအားတော် လမ်းပြမှုနဲ့အညီ၊ အမှန်တရားနဲ့အညီ ကိုးကွယ်ရမယ်” လို့ပြောတယ်။
(ယောဟန် ၄:၃၉-၄၁) ရှမာရိအမျိုးသမီးက “ကျွန်မ လုပ်ခဲ့သမျှ သူအတိအကျ ပြောနိုင်တယ်” လို့သက်သေခံတဲ့အတွက် အဲဒီမြို့ထဲက ရှမာရိလူ အတော်များများ ယေရှုကို ယုံကြည်လာကြတယ်။ ၄၀ ရှမာရိလူတွေ ရောက်လာပြီး သူတို့ဆီမှာတည်းဖို့ တောင်းပန်တဲ့အတွက် ယေရှုက အဲဒီမြို့မှာ နှစ်ရက်နေတယ်။ ၄၁ ဒါကြောင့် နောက်ထပ် လူအတော်များများလည်း ယေရှုသွန်သင်တာကို ကြားရတဲ့အတွက် ယုံကြည်လာကြတယ်။
ရှာဖွေလေ့လာ ဘုရားရေးရာရတနာ
(ယောဟန် ၃:၂၉) သတို့သမီးကိုရတဲ့သူဟာ သတို့သားပါ။ ဒါပေမဲ့ အနားမှာရပ်နေတဲ့ မိတ်ဆွေကလည်း သတို့သားရဲ့အသံကို ကြားပြီး ဝမ်းသာကြည်နူးနေတတ်တယ်။ အဲဒီလိုပဲ ကျွန်တော်လည်း ဝမ်းသာကြည်နူးနေတယ်။
nwtsty ယဟ ၃:၂၉ လေ့လာမှု မှတ်စု
သတို့သားရဲ့မိတ်ဆွေ– ကျမ်းစာခေတ်မှာ သတို့သားနဲ့ရင်းနှီးတဲ့ မိတ်ဆွေတစ်ဦးက သတို့သားကိုယ်စား မင်္ဂလာပွဲမှာ လိုအပ်သမျှ လုပ်ကိုင် ပေးရတယ်။ သူဟာ သတို့သမီးနဲ့ သတို့သားကို ပေါင်းစပ်ပေးသူလို့ ယူမှတ်ခံရတယ်။ မင်္ဂလာဆောင်တဲ့နေ့မှာ သတို့သားရဲ့အိမ် ဒါမှမဟုတ် သတို့သားအဖေရဲ့အိမ်ကို သတို့သမီးနဲ့ဆိုင်တဲ့ သူအားလုံး မင်္ဂလာပွဲအတွက် သွားကြရတယ်။ ပွဲခံချိန်မှာ သတို့သမီးနဲ့ စကားပြောတဲ့ သတို့သားရဲ့အသံကို ကြားတဲ့အခါ သတို့သားရဲ့မိတ်ဆွေဟာ တာဝန်ကျေပြီလို့ ခံစားရပြီး ဝမ်းသာနေတယ်။ နှစ်ခြင်းပေးသူယောဟန်က သူ့ကိုယ်သူ ‘သတို့သားရဲ့မိတ်ဆွေ’ နဲ့ နှိုင်းယှဉ်ခဲ့တယ်။ ဒီကျမ်းချက်မှာ သတို့သားက ယေရှုဖြစ်ပြီး တပည့်တွေက သတို့သမီးကို တင်စားတယ်။ နှစ်ခြင်းပေးသူယောဟန်ဟာ မေရှိယအတွက် လမ်းပြင်ဆင်ပေးတဲ့အခါ “သတို့သမီး” ထဲပါဝင်တဲ့ ဦးဆုံးသူတွေကို ယေရှုခရစ်နဲ့ မိတ်ဆက်ပေးခဲ့တယ်။ (ယဟ ၁:၂၉၊ ၃၅။ ၂က ၁၁:၂။ ဧ ၅:၂၂-၂၇။ ဗ ၂၁:၂၊ ၉) ‘သတို့သားရဲ့မိတ်ဆွေ’ ဟာ မိမိရဲ့တာဝန် အောင်မြင်ပြီးမြောက်သွားလို့ ဝမ်းသာနေတယ်။ အဲဒီအခါ သူဟာ အဓိကပုဂ္ဂိုလ် မဟုတ်တော့ဘူး။ အဲဒါကြောင့် ယေရှုနဲ့ပတ်သက်တဲ့ မိမိရဲ့လုပ်ငန်းအကြောင်း ယောဟန်က “ခရစ်တော်ဟာ တိုးတက်နေရမယ်၊ ကျွန်တော်ကတော့ ဆုတ်ယုတ်သွားရမှာပဲ လို့ပြော” ခဲ့တယ်။—ယဟ ၃:၃၀။
(ယောဟန် ၄:၁၀) ယေရှုက “ဘုရားသခင် ဘာဆုလက်ဆောင် ပေးထားမှန်း၊ ‘ရေနည်းနည်းလောက် တိုက်ပါလား’ လို့ပြောတဲ့သူဟာ ဘယ်သူဘယ်ဝါဖြစ်မှန်း ခင်ဗျား မသိဘဲကိုး။ သိခဲ့ရင် သူ့ကို အသက်ရေ တောင်းမှာပဲ၊ သူလည်း အသက်ရေ ပေးမှာပဲ” လို့ဖြေတယ်။
nwtsty ယဟ ၄:၁၀ လေ့လာမှု မှတ်စု
အသက်ရေ– ဒီဂရိအသုံးအနှုန်းဟာ စီးဆင်းနေတဲ့ရေ၊ စမ်းရေ ဒါမှမဟုတ် စမ်းရေကနေရတဲ့ ရေချိုကို ဆိုလိုတာဖြစ်တယ်။ ဒါက ရေလှောင်ကန်ထဲက ရေသေနဲ့ မတူဘူး။ ဝ ၁၄:၅ မှာ “စမ်းရေ၊” တစ်နည်းအားဖြင့် “စီးသောရေ” ဆိုတဲ့ ဟီဘရူးအသုံးအနှုန်းက စာသားအရ “အသက်ရေ” ဖြစ်တယ်။ ယေ ၂:၁၃ နဲ့ ၁၇:၁၃ မှာ ယေဟောဝါကို “အသက်ရေရဲ့ ပင်ရင်း” လို့ ဖော်ပြထားတယ်။ ဒါက အသက်ပေးတဲ့ ပုံဆောင်ရေကို ဆိုလိုတယ်။ ယေရှုက ရှမာရိအမျိုးသမီးနဲ့ စကားပြောချိန်မှာ “အသက်ရေ” ကို တင်စားအသုံးပြုခဲ့တာ ဖြစ်ပေမဲ့ ပကတိရေကို ဆိုလိုတယ်လို့ အမျိုးသမီးက အစပိုင်းမှာ ယူဆခဲ့တယ်။—ယဟ ၄:၁၁။ ယဟ ၄:၁၄ လေ့လာမှု မှတ်စုကို ကြည့်။
ကျမ်းစာဖတ်ရှုခြင်း
(ယောဟန် ၄:၁-၁၅) ယေရှုရဲ့တပည့် ဖြစ်လာသူတွေ၊ ယေရှုနှစ်ခြင်းပေးသူတွေဟာ ယောဟန်ထက် ပိုများတယ်ဆိုတဲ့သတင်း ဖာရိရှဲတွေဆီ ရောက်သွားမှန်း သခင်ယေရှု သိလိုက်တယ်။ ၂ (တကယ်တော့ ယေရှုကိုယ်တိုင် နှစ်ခြင်းပေးတာမဟုတ်ဘဲ တပည့်တွေ နှစ်ခြင်းပေးကြတာ။) ၃ ဒါနဲ့ ယေရှုက ယုဒပြည်ကနေ ထွက်ပြီး ဂါလိလဲပြည်ကို တစ်ခေါက်ပြန်သွားတယ်။ ၄ လမ်းခရီးမှာ ရှမာရိပြည်ကို ဖြတ်သွားရတော့၊ ၅ ရှုခါဆိုတဲ့ ရှမာရိမြို့တစ်မြို့ကို ရောက်လာတယ်။ ရှုခါမြို့ဟာ ယောသပ်ကို ဖခင်ယာကုပ်ပေးခဲ့တဲ့ မြေကွက်နဲ့နီးတယ်။ ၆ အဲဒီမှာ ယာကုပ်ရေတွင်း ရှိတယ်။ ယေရှုက ခရီးပန်းလာလို့ အဲဒီရေတွင်းနားမှာ ထိုင်တယ်။ အချိန်ကတော့ မွန်းတည့် ၁၂ နာရီ လောက်ရှိနေပြီ။ ၇ အဲဒီအခါ ရှမာရိ အမျိုးသမီးတစ်ယောက် ရေလာခပ်တော့ ယေရှုက “ရေနည်းနည်းလောက် တိုက်ပါလား” လို့တောင်းတယ်။ ၈ (တပည့်တွေကတော့ စားစရာဝယ်ဖို့ မြို့ထဲသွားကြပြီ။) ၉ ရှမာရိအမျိုးသမီးက “ရှင်ဟာ ဂျူးလူမျိုးဖြစ်လျက်နဲ့ ရှမာရိလူမျိုးဖြစ်တဲ့ ကျွန်မကို ဘာလို့ ရေတောင်းသောက်တာလဲ” လို့မေးတယ်။ (မေးရတဲ့ အကြောင်းရင်းက ဂျူးတွေဟာ ရှမာရိတွေနဲ့ အပေါင်းအသင်း မလုပ်ကြလို့ပဲ။) ၁၀ ယေရှုက “ဘုရားသခင် ဘာဆုလက်ဆောင် ပေးထားမှန်း၊ ‘ရေနည်းနည်းလောက် တိုက်ပါလား’ လို့ပြောတဲ့သူဟာ ဘယ်သူဘယ်ဝါဖြစ်မှန်း ခင်ဗျား မသိဘဲကိုး။ သိခဲ့ရင် သူ့ကို အသက်ရေ တောင်းမှာပဲ၊ သူလည်း အသက်ရေ ပေးမှာပဲ” လို့ဖြေတယ်။ ၁၁ အဲဒီအခါ ရှမာရိအမျိုးသမီးက “ရေတွင်းက အနက်ကြီး။ ဆရာ့ဆီမှာ ခပ်စရာရေပုံးမှ မရှိတာ။ အဲဒီအသက်ရေကို ဘယ်ကနေ ရမှာလဲ။ ၁၂ ဒီရေတွင်းကို ဘိုးဘေးယာကုပ်က ကျွန်မတို့ကို ပေးခဲ့တာ။ သူကိုယ်တိုင်ရော သားမြေးတွေ၊ တိရစ္ဆာန်တွေပါ ဒီတွင်းရေကို သောက်ခဲ့ကြတယ်။ ဆရာက သူ့ထက် ကြီးမြတ်လို့လား” ဆိုပြီး မေးတယ်။ ၁၃ ယေရှုက “ဒီရေကို သောက်တဲ့သူဟာ နောက်တစ်ခါ ရေငတ်ဦးမယ်။ ၁၄ ကျွန်တော်ပေးတဲ့ရေကို သောက်တဲ့သူကတော့ ဘယ်တော့မှ ရေငတ်မှာ မဟုတ်ဘူး။ သူ့အထဲမှာ အဲဒီရေဟာ ထာဝရအသက်ရစေမယ့် စိမ့်ထွက်နေတဲ့ စမ်းရေလို ဖြစ်လိမ့်မယ်” လို့ဖြေတယ်။ ၁၅ ရှမာရိအမျိုးသမီးက “ဆရာ၊ ကျွန်မကို အဲဒီရေ တိုက်ပါလား။ ဒါဆို ရေငတ်တော့မှာ မဟုတ်ဘူး။ ဒီကိုလာပြီး ရေခပ်စရာလည်း မလိုတော့ဘူး” ဆိုပြီးပြောတယ်။
စက်တင်ဘာ ၁၇-၂၃
ကျမ်းစာထဲက အဖိုးတန်ဘဏ္ဍာများ | ယောဟန် ၅-၆
“ယေရှုနောက်ကို စိတ်ရင်းမှန်နဲ့ လိုက်ပါ”
(ယောဟန် ၆:၉-၁၁) “ဒီကောင်လေးဆီမှာ မုယောမုန့်ငါးလုံးနဲ့ ငါးကလေးနှစ်ကောင် ရှိပါတယ်။ ဒါပေမဲ့ လူတွေ ဒီလောက်များတာ ဘယ်လိုလုပ် လောက်မှာလဲ” ဆိုပြီးပြောတယ်။ ၁၀ ယေရှုက “လူတွေကို ထိုင်ခိုင်းလိုက်ပါ” လို့ပြောတော့ အဲဒီမှာရှိတဲ့ မြက်ခင်းပြင်ကြီးပေါ် လူတွေထိုင်ကြတဲ့အခါ ယောက်ျား ၅,၀၀၀ လောက် ရှိနေတယ်။ ၁၁ ယေရှုက မုန့်ကိုယူ၊ ကျေးဇူးတင် ချီးမွမ်းပြီးနောက် လူတွေကို ဝေပေးတယ်။ ငါးကိုလည်း ဝေပေးလိုက်တော့ လူတွေ အဝစားရတယ်။
nwtsty ယဟ ၆:၁၀ လေ့လာမှု မှတ်စု
လူတွေထိုင်ကြတဲ့အခါ ယောက်ျား ၅,၀၀၀ လောက် ရှိနေတယ်– ဒီအံ့ဖွယ်အမှုအကြောင်း ပြောတဲ့အခါ မဿဲတစ်ဦးတည်းကပဲ “အမျိုးသမီးတွေ၊ ကလေးတွေလည်း ရှိသေး” တယ်လို့ ထည့်ပြောတယ်။ (မ ၁၄:၂၁) ဒါကြောင့် ဒီအံ့ဖွယ်ကျွေးမွေးမှုမှာ စားခဲ့ရသူ စုစုပေါင်း ၁၅,၀၀၀ လောက်ရှိနိုင်တယ်။
(ယောဟန် ၆:၁၄) ယေရှုလုပ်တဲ့ အံ့ဖွယ်အမှုကို မြင်တဲ့အခါ လူတွေက “သူဟာ လူ့လောကမှာ ပေါ်ထွန်းလာမယ့် ပရောဖက်ပဲ ဖြစ်ရမယ်” ဆိုပြီးပြောကြတယ်။
(ယောဟန် ၆:၂၄) ဒီဖက်ကမ်းမှာ ယေရှုနဲ့တပည့်တွေ မရှိမှန်း သိတဲ့အခါ လူတွေက ယေရှုကိုရှာဖို့ အဲဒီလှေတွေကို စီးပြီး ကပေရနောင်မြို့ဆီ ထွက်လာကြတယ်။
nwtsty ယဟ ၆:၁၄ လေ့လာမှု မှတ်စု
ပရောဖက်ပဲ– တရ ၁၈:၁၅၊ ၁၈ မှာဖော်ပြထားတဲ့ မောရှေနဲ့တူတဲ့ ပရောဖက်ဟာ မေရှိယပဲဖြစ်မယ်လို့ အေဒီ ပထမရာစုက ဂျူးတွေ မျှော်လင့်နေကြတယ်။ ဒါကိုကြည့်ရင် လူ့လောကမှာ ပေါ်ထွန်းလာမယ့် ဆိုတဲ့ အသုံးအနှုန်းက မေရှိယပေါ်ထွန်းမှာကို ဆိုလိုပုံရတယ်။ ဒီအခန်းငယ်မှာပါတဲ့ အဖြစ်အပျက်ကို ယောဟန်ပဲ မှတ်တမ်းတင်ခဲ့တယ်။
(ယောဟန် ၆:၂၅-၂၇) အိုင်တစ်ဖက်ကမ်းမှာ ယေရှုကိုတွေ့တော့ “ဆရာ၊ ဒီကို ဘယ်တုန်းက ရောက်လာတာလဲ” ဆိုပြီး မေးကြတယ်။ ၂၆ ယေရှုက “ကျွန်တော် မှန်တာကို ပြောမယ်၊ အမှန်အတိုင်း ပြောမယ်။ ခင်ဗျားတို့ ကျွန်တော့်ကိုရှာတာ အံ့ဖွယ်အမှုတွေမြင်ရလို့ မဟုတ်ဘူး၊ မုန့်အဝစားရလို့ပဲ။ ၂၇ ပျက်စီးတတ်တဲ့အစာကို မဟုတ်ဘဲ ထာဝရအသက်ရစေတဲ့ အစာကို ရဖို့ ကြိုးစားကြပါ။ လူသားက ခင်ဗျားတို့ကို အဲဒီအစာ ပေးလိမ့်မယ်။ သူဟာ အဖဘုရားသခင်ရဲ့ မျက်နှာသာရကြောင်း အာမခံချက်ရထားသူပဲ” လို့ပြောတယ်။
(ယောဟန် ၆:၅၄) ကျွန်တော့်အသားကို စားပြီး ကျွန်တော့်သွေးကို သောက်တဲ့သူဟာ ထာဝရအသက် ရလိမ့်မယ်။ သူ့ကို နောက်ဆုံးသောနေ့မှာ ရှင်ပြန်ထမြောက်လာအောင် ကျွန်တော်လုပ်ပေးမယ်။
(ယောဟန် ၆:၆၀) တပည့်အများစုက ဒါကိုကြားတဲ့အခါ “သူပြောနေတာတွေက လန့်စရာကြီးပါလား။ ဘယ်သူနားခံနိုင်မှာလဲ” လို့ ညည်းကြတယ်။
(ယောဟန် ၆:၆၆-၆၉) ဒီစကားတွေကြောင့် တပည့်အတော်များများက ယေရှုနောက်လိုက် မလုပ်တော့ဘဲ စွန့်လွှတ်ခဲ့ရာတွေဆီ ပြန်လှည့်သွားကြတယ်။ ၆၇ ဒါနဲ့ ယေရှုက တမန်တော် ၁၂ ယောက်ကို “ခင်ဗျားတို့ကော ထွက်သွားချင်သလား” လို့မေးတဲ့အခါ၊ ၆၈ ရှိမုန်ပေတရုက “သခင်၊ ဘယ်သူ့ဆီ သွားရမှာလဲ။ ထာဝရအသက်ရစေတဲ့ စကားတွေဟာ သခင့်ဆီမှာပဲ ရှိတာပါ။ ၆၉ သခင်ဟာ ဘုရားသခင်ဆီကလာတဲ့ သန့်ရှင်းသူဖြစ်မှန်း ကျွန်တော်တို့ သိပါတယ်။ ယုံလည်းယုံပါတယ်” လို့ဖြေတယ်။
nwtsty ယဟ ၆:၂၇၊ ၅၄ လေ့လာမှု မှတ်စု
ပျက်စီးတတ်တဲ့အစာ . . . ထာဝရအသက်ရစေတဲ့ အစာ– တချို့သူတွေဟာ အကျိုးအမြတ်ရဖို့အတွက်ပဲ မိမိနဲ့၊ တပည့်တွေနဲ့ ပေါင်းသင်းနေမှန်း ယေရှု သိတယ်။ ကာယအစာက တစ်နေ့ ပြီးတစ်နေ့ အသက်ရှင်စေတာ မှန်ပေမဲ့ ကျမ်းစာထဲက “အစာ” ကျတော့ လူတွေကို ထာဝစဉ်အသက်ရှင်စေမှာ ဖြစ်တယ်။ ယေရှုက “ထာဝရအသက်ရစေတဲ့ အစာ” ရဖို့ ကြိုးစားကြပါလို့ လူအုပ်ကို အားပေးခဲ့တယ်။ ဆိုလိုတာက ဘုရားသခင်နဲ့ ဆက်ဆံရေးကောင်းရှိဖို့၊ သိရှိနားလည်လာတာတွေကို ယုံကြည်သက်ဝင်ဖို့ ကြိုးစားရမယ်။—မ ၄:၄။ ၅:၃။ ယဟ ၆:၂၈-၃၉။
ကျွန်တော့်အသားကို စားပြီး ကျွန်တော့်သွေးကို သောက်တဲ့သူ– ပုံဆောင်သဘောအရ စားသောက်တဲ့သူဟာ ယေရှုခရစ်ကို ယုံကြည်သက်ဝင်သူ ဖြစ်တယ်လို့ ရှေ့နောက်စကားက ဖော်ပြတယ်။ (ယဟ ၆:၃၅၊ ၄၀) အေဒီ ၃၂ မှာ ယေရှု ဒီစကားတွေပြောခဲ့လို့ နောက်တစ်နှစ်ကြာမှ အစပြုကျင်းပမယ့် သခင့်ညစာစားပွဲအကြောင်း ပြောနေတာ မဟုတ်ဘူး။ အဲဒီမိန့်မှာချက်ကို “ဂျူးတွေရဲ့ ပသခါပွဲ ရောက်တော့” မယ့်အချိန်မှာ ပြောခဲ့တာဖြစ်တယ်။ (ယဟ ၆:၄) အဲဒါကြောင့် သူ့ပရိသတ်က ကျင်းပတော့မယ့်ပွဲနဲ့ အီဂျစ်ပြည်ကနေ အစ္စရေးတွေ ထွက်ခဲ့တဲ့ညမှာ သူတို့အသက်ကို ကယ်တင်ခဲ့တဲ့ သိုးအသွေးရဲ့ အရေးပါမှုကို သတိရကြမှာဖြစ်တယ် (ထွ ၁၂:၂၄-၂၇)။ မိမိရဲ့အသွေးဟာ တပည့်တွေ ထာဝရအသက်ရဖို့ အရေးပါကြောင်း ယေရှု အလေးပေး ပြောဆိုနေတာဖြစ်တယ်။
ယေဟောဝါ၏နာမတော်ကို အမှီပြုလျက် သွားလာကြကုန်အံ့
၁၃ မည်သို့ပင်ဖြစ်စေ၊ လူအုပ်သည် ယေရှုနောက် တကောက်ကောက်လိုက်ခဲ့ကြရာ ယောဟန်ပြောသည့်အတိုင်း “အိုင်တစ်ဖက်၌” ကိုယ်တော့်ကို တွေ့လေသည်။ ဘုရင်တင်မြှောက်ခြင်းကို ကိုယ်တော်ငြင်းပယ်ပြီးနောက်၌ပင် ကိုယ်တော်နောက် သူတို့ အဘယ်ကြောင့်လိုက်ခဲ့ကြသနည်း။ မောရှေခေတ်က တောကန္တာရတွင် ကာယအစာကို ယေဟောဝါ ကျွေးမွေးခဲ့ခြင်းအကြောင်း ထောက်ပြခြင်းဖြင့် သူတို့၏ဇာတိစိတ် ပေါ်လွင်လာ၏။ သူတို့ဆိုလိုသည်မှာ ယေရှုသည်လည်း မိမိတို့ကို ကာယအစာပေးသင့်သည်ဟု ဖြစ်၏။ သူတို့ အမြင်မှားနေသည်ကို ယေရှုတွေ့မြင်ပြီး တည့်မတ်ပေးရန် ဝိညာဉ်ရေးအမှန်တရားများကို သူတို့အားသွန်သင်ပေးလေတော့သည်။ (ယောဟန် ၆:၁၇၊ ၂၄၊ ၂၅၊ ၃၀၊ ၃၁၊ ၃၅-၄၀) ထိုအခါ ယေရှုက “ငါအမှန်အကန်ဆိုသည်ကား၊ လူသား၏အသားကိုမစား၊ အသွေးကိုမသောက်လျှင် သင်တို့၌အသက်မရှိ။ ငါ၏အသားကိုစား၍ ငါ၏အသွေးကိုလည်း သောက်သောသူသည် ထာဝရ အသက်ကိုရ၏။ ထိုသူကို နောက်ဆုံးသောနေ့၌ ငါထမြောက်စေမည်” ဟူ၍ ပုံဥပမာပေး၍မိန့်ဆိုချိန်တွင် အချို့သည် ကိုယ်တော့်ကို အပြစ်တင်ညည်းညူခဲ့ကြသည်။—ယောဟန် ၆:၅၃၊ ၅၄။
၁၄ ယေရှု၏ပုံဥပမာများက လူတို့ ဘုရားသခင်နှင့်အတူ သွားလာလိုစိတ်ရှိမရှိ ဖော်ထုတ်ပေးလေ့ရှိ၏။ ဤပုံဥပမာသည်လည်း ထိုနည်းအတိုင်းပင်ဖြစ်၏။ ယင်းကြောင့် သူတို့၏တုံ့ပြန်မှုသည် အတော်ပင်ပြင်းထန်သွားလေသည်။ ကျွန်ုပ်တို့ဖတ်ရှုကြရသည်မှာ ‘တပည့်အများတို့သည် ကြားလျှင် “ထိုစကားသည် အလွန်ခက်လှ၏။ အဘယ်သူ နားခံနိုင်မည်နည်း” ဟုဆိုကြ၏။’ ထိုအခါ ယေရှုက မိမိမိန့်ဆိုသမျှ၏ ဝိညာဉ်ရေးဆိုလိုချက်ကို သဘောပေါက်ဖို့ကြိုးစားသင့်ကြောင်း ဆက်ရှင်းပြသည်။ ကိုယ်တော်က “ဝိညာဉ်သာလျှင် အသက်ရှင်စေ၏။ ကိုယ်ကာယသည် အလျှင်းမတတ်နိုင်။ ငါပြောသောစကားသည် ဝိညာဉ်ဖြစ်၏။ အသက်လည်းဖြစ်၏” ဟုမိန့်ဆိုခဲ့သည်။ ထိုသို့မိန့်ဆိုသည့်တိုင် လူအများသည် နားမထောင်လိုကြရာ ‘ထိုအခါမှစ၍ တပည့်အများတို့သည် ကိုယ်တော်နှင့်မပေါင်းဖော်ဘဲ ဆုတ်သွားကြ၏’ ဟုမှတ်တမ်းကဆိုသည်။—ယောဟန် ၆:၆၀၊ ၆၃၊ ၆၆။
ရှာဖွေလေ့လာ ဘုရားရေးရာရတနာ
(ယောဟန် ၆:၄၄) ကျွန်တော့်ကို စေလွှတ်တဲ့အရှင်သာ မဆွဲဆောင်ရင် ဘယ်သူမှ ကျွန်တော့်ဆီ မလာနိုင်ဘူး။ လာတဲ့သူကို နောက်ဆုံးသောနေ့မှာ ရှင်ပြန်ထမြောက်လာအောင် ကျွန်တော်လုပ်ပေးမယ်။
nwtsty ယဟ ၆:၄၄ လေ့လာမှု မှတ်စု
ဆွဲဆောင်ရင်– “ဆွဲဆောင်” ဆိုတဲ့ ဂရိကြိယာကို ပိုက်ကွန်နဲ့ ငါးအများကြီး ဖမ်းမိတာနဲ့ပတ်သက်ပြီး အသုံးပြုခဲ့ပေမဲ့ (ယဟ ၂၁:၆၊ ၁၁) ဘုရားသခင်က လူတွေရဲ့ ဆန္ဒမပါဘဲ ဆွဲဆောင်တယ်လို့ မဆိုလိုပါဘူး။ အဲဒီကြိယာက “ဆွဲဆောင်” ဆိုတဲ့ အဓိပ္ပာယ် ရှိတယ်။ ယေရှုရဲ့စကားက ယေ ၃၁:၃ ကို ရည်ညွှန်းနေတာလည်း ဖြစ်နိုင်တယ်။ အဲဒီမှာ ယေဟောဝါက မိမိရဲ့ ရှေးခေတ်လူမျိုးကို ‘ငါက ခိုင်မြဲတဲ့မေတ္တာနဲ့ မင်းကို ဆွဲယူတယ်’ လို့ဆိုတယ်။ (စက်ပ်ထွားဂျင့် ကျမ်းမှာ အဲဒီ ဂရိကြိယာကိုပဲ အသုံးပြုထားတယ်။) ယေရှုက ထပ်တူသဘောမျိုးနဲ့ သူ့ဆီ လူအမျိုးမျိုးကို ဆွဲဆောင်တယ်လို့ ယဟ ၁၂:၃၂ မှာ ဖော်ပြတယ်။ လူတွေကို လွတ်လပ်စွာ ရွေးချယ်ခွင့်ပေးထားတယ်လို့ ကျမ်းစာက ဖော်ပြတယ်။ ဘုရားအမှုဆောင်တာနဲ့ပတ်သက်လို့ လူတိုင်းမှာ ရွေးချယ်ခွင့်ရှိတယ်။ (တရ ၃၀:၁၉၊ ၂၀) ဘုရားသခင်က တလိုတလားရှိတဲ့ နှလုံးသားပိုင်ရှင်တွေကို သူ့ဆီ ညင်ညင်သာသာ ဆွဲဆောင်တယ်။ (ဆ ၁၁:၅။ ပ ၂၁:၂။ တ ၁၃:၄၈) ယေဟောဝါက ကျမ်းစာသတင်းတရားနဲ့ သန့်ရှင်းတဲ့ စွမ်းအားတော်အားဖြင့် ဆွဲဆောင်တယ်။ ယဟ ၆:၄၅ မှာ ကိုးကားထားတဲ့ ရှာ ၅၄:၁၃ က ပရောဖက်ပြုချက်ဟာ အဖဘုရား ဆွဲဆောင်တဲ့သူတွေနဲ့ ဆိုင်တယ်။—ယဟ ၆:၆၅ နဲ့နှိုင်းယှဉ်ပါ။
(ယောဟန် ၆:၆၄) ဒါပေမဲ့ ခင်ဗျားတို့ထဲမှာ မယုံကြည်တဲ့သူ တချို့ရှိတယ်” လို့ပြောတယ်။ ဘယ်သူတွေဟာ မယုံကြည်တဲ့သူတွေ ဖြစ်မယ်၊ ဘယ်သူ သစ္စာဖောက်မယ်ဆိုတာ အစကတည်းက ယေရှုသိနေတယ်။
nwtsty ယဟ ၆:၆၄ လေ့လာမှု မှတ်စု
ဘယ်သူ သစ္စာဖောက်မယ်ဆိုတာ . . . ယေရှုသိနေတယ်– ယုဒရှကာရုတ်ကို ယေရှု ရည်ညွှန်းနေတာ။ တမန်တော် ၁၂ ပါးကို ယေရှု မရွေးခင် ဖခင်ဆီ တစ်ညလုံး ဆုတောင်းခဲ့တယ်။ (လု ၆:၁၂-၁၆) ဒါကြောင့် ယုဒဟာ အစပိုင်းမှာ ဘုရားကို သစ္စာရှိသူဖြစ်တယ်။ ဒါပေမဲ့ ဟီဘရူးကျမ်းစောင်တွေမှာပါတဲ့ ပရောဖက်ပြုချက်တွေအရ မိမိနဲ့ရင်းနှီးသူတစ်ယောက် သစ္စာဖောက်မယ်ဆိုတာ ယေရှု သိထားတယ်။ (ဆ ၄၁:၉။ ၁၀၉:၈။ ယဟ ၁၃:၁၈၊ ၁၉) စိတ်နှလုံးကို သိမြင်နိုင်တဲ့ ယေရှုဟာ ယုဒ စပြီး ဆိုးညစ်လာတာကို သိမြင်ခဲ့တယ်။ (မ ၉:၄) ဘုရားသခင်က ကြိုတင်သိမြင်နိုင်စွမ်း ရှိတဲ့အတွက် ယေရှု ယုံကြည်အားထားသူတစ်ယောက် သစ္စာဖောက်မယ့်အကြောင်း သိတယ်။ ဒါပေမဲ့ ယုဒ သစ္စာဖောက်ရမယ်လို့ ကြိုတင်သတ်မှတ်ထားတာ မဟုတ်ဘူး။ အဲဒီလိုတွေးတာက ဘုရားသခင်ရဲ့အရည်အသွေးတွေ၊ အတိတ်က ဘုရားစီရင်ခဲ့ပုံတွေနဲ့ မစပ်အပ်ဘူး။
အစကတည်းက– ဒီအသုံးအနှုန်းက ယုဒ မွေးဖွားခဲ့တဲ့အချိန်၊ တမန်တော်အဖြစ် ရွေးချယ်ခံရတဲ့အချိန်ကို ရည်ညွှန်းနေတာ မဟုတ်ဘူး။ ယေရှု တစ်ညလုံးဆုတောင်းပြီးမှ တမန်တော်တွေကို ရွေးချယ်ခဲ့တာဖြစ်တယ်။ (လု ၆:၁၂-၁၆) အဲဒီအသုံးအနှုန်းက ယုဒ စပြီး သစ္စာမဲ့တာကို ရည်ညွှန်းတယ်။ အဲဒါကို ယေရှု ချက်ချင်းရိပ်မိတယ်။ (ယဟ ၂:၂၄၊ ၂၅။ ဗ ၁:၁။ ၂:၂၃။ ယဟ ၆:၇၀။ ၁၃:၁၁ လေ့လာမှု မှတ်စုကို ကြည့်။) အဲဒီအပြင် ယုဒဟာ ရုတ်တရက် စိတ်ပြောင်းလဲသွားတာ မဟုတ်ဘဲ ကြိုတင်စီစဉ်ထားတာ ဖြစ်တယ်။ ခရစ်ယာန် ဂရိကျမ်းစောင်တွေမှာပါတဲ့ “အစကတည်းက” (ဂရိ၊ အာခေ) ဆိုတဲ့ အသုံးအနှုန်းရဲ့ အဓိပ္ပာယ်ဟာ ရှေ့နောက်စကားအပေါ်မူတည်ပြီး အကန့်အသတ်ရှိတယ်။ ဥပမာ၊ ၂ပ ၃:၄ (ယုဒသန်ကျမ်း) မှာ “အစကတည်းက” ဆိုတဲ့စကားလုံးကို “ဖန်ဆင်းစ” လို့ ပြန်ဆိုထားတယ်။ များသောအားဖြင့်တော့ ဒီစကားလုံးကို အကန့်အသတ်နဲ့ပဲ အသုံးပြုတယ်။ ဥပမာ၊ ပေတရုက “သန့်ရှင်းသော စွမ်းအားတော်ဟာ အရင်တုန်းက [အစကတည်းက] ကျွန်တော်တို့အပေါ် သက်ရောက်ခဲ့သလို” လူမျိုးခြားတွေ အပေါ်မှာလည်း သက်ရောက်တယ်လို့ ဆိုတယ်။ (တ ၁၁:၁၅) ဒီမှာ ပေတရုက မိမိမွေးတဲ့အချိန်၊ တမန်တော်ဖြစ်လာတဲ့ အချိန်ကို ဆိုလိုနေတာ မဟုတ်ဘူး။ အဲဒီအစား အေဒီ ၃၃ ပင်တေကုတ္တေပွဲနေ့ကို ဆိုလိုနေတာ။ အဲဒါက သတ်သတ်မှတ်မှတ် ရည်ရွယ်ချက်တစ်ခုအတွက် သန့်ရှင်းသော စွမ်းအားတော် စသွန်းလောင်းတဲ့အချိန် ဖြစ်တယ်။ (တ ၂:၁-၄) ရှေ့နောက်စကားတွေက “အစကတည်းက” ဆိုတဲ့စကားလုံးရဲ့ အဓိပ္ပာယ်အပေါ် အကျိုးသက်ရောက်နိုင်ပုံ နမူနာတွေကို ယဟ ၁၅:၂၇ နဲ့ ၁ ယဟ ၂:၇ မှာ တွေ့နိုင်တယ်။
ကျမ်းစာဖတ်ရှုခြင်း
(ယောဟန် ၆:၄၁-၅၉) “ကျွန်တော်ဟာ ကောင်းကင်ကလာတဲ့ မုန့်ပဲ” လို့ ယေရှုပြောတဲ့အတွက် ဂျူးတွေက သူ့ကို ကဲ့ရဲ့ပြစ်တင်ပြီး၊ ၄၂ “သူဟာ ယောသပ်ရဲ့သား ယေရှု မဟုတ်လား။ သူ့မိဘတွေကို ငါတို့သိသားပဲ။ ဒါနဲ့များ သူ့ကိုယ်သူ ‘ကောင်းကင်ကလာတယ်’ ဆိုပဲ” လို့ပြောကြတယ်။ ၄၃ ဒါနဲ့ သူတို့ကို ယေရှု ပြန်ပြောတာက “ခင်ဗျားတို့ ကဲ့ရဲ့ပြစ်တင်မနေနဲ့တော့။ ၄၄ ကျွန်တော့်ကို စေလွှတ်တဲ့အရှင်သာ မဆွဲဆောင်ရင် ဘယ်သူမှ ကျွန်တော့်ဆီ မလာနိုင်ဘူး။ လာတဲ့သူကို နောက်ဆုံးသောနေ့မှာ ရှင်ပြန်ထမြောက်လာအောင် ကျွန်တော် လုပ်ပေးမယ်။ ၄၅ ပရောဖက်ကျမ်းတွေမှာ ‘သူတို့အားလုံး ယေဟောဝါ သွန်သင်ပေးတာကို ခံရလိမ့်မယ်’ လို့ရေးထားတယ်။ အဖဘုရားရဲ့ စကားကို ကြားနာပြီး သင်ယူတဲ့သူတွေ ကျွန်တော့်ဆီ လာကြတယ်။ ၄၆ ဘုရားသခင်ဆီကလာတဲ့ ကျွန်တော်ကလွဲလို့ လူတစ်ယောက်မှ အဖဘုရားကို မမြင်ဖူးဘူး။ ကျွန်တော်တစ်ယောက်ပဲ မြင်ဖူးတာ။ ၄၇ ကျွန်တော် မှန်တာကို ပြောမယ်၊ အမှန်အတိုင်း ပြောမယ်။ ယုံတဲ့သူ ထာဝရအသက် ရလိမ့်မယ်။ ၄၈ “ကျွန်တော်ဟာ အသက်မုန့်ပဲ။ ၄၉ ခင်ဗျားတို့ရဲ့ ဘိုးဘေးတွေက တောထဲမှာ မန္နမုန့်ကို စားရပေမဲ့ သေခဲ့ကြတယ်။ ၅၀ ကောင်းကင်ကလာတဲ့ ဒီမုန့်ကို စားတဲ့သူကတော့ သေရမှာ မဟုတ်ဘူး။ ၅၁ ကျွန်တော်ဟာ ကောင်းကင်ကလာတဲ့ သက်ရှိမုန့်ပဲ။ ဒီမုန့်ကိုစားတဲ့သူတိုင်း ထာဝစဉ် အသက်ရှင်လိမ့်မယ်။ ဒီလောကမှာရှိတဲ့လူတွေ အသက်ရနိုင်ဖို့ ကျွန်တော်ပေးမယ့် မုန့်ဟာ ကျွန်တော့်အသားပဲ။” ၅၂ ဂျူးတွေက “သူ့အသားကိုစားဖို့ ငါတို့ကို ဘယ်လိုလုပ်ပေးလို့ရမှာလဲ” ဆိုပြီးငြင်းခုံကြတယ်။ ၅၃ အဲဒီအခါ ယေရှုက “ကျွန်တော် မှန်တာကို ပြောမယ်၊ အမှန်အတိုင်း ပြောမယ်။ လူသားရဲ့အသားကို မစားဘူး၊ လူသားရဲ့သွေးကို မသောက်ဘူးဆိုရင် ခင်ဗျားတို့ အသက်ရမှာ မဟုတ်ဘူး။ ၅၄ ကျွန်တော့်အသားကို စားပြီး ကျွန်တော့်သွေးကို သောက်တဲ့သူဟာ ထာဝရအသက် ရလိမ့်မယ်။ သူ့ကို နောက်ဆုံးသောနေ့မှာ ရှင်ပြန်ထမြောက်လာအောင် ကျွန်တော်လုပ်ပေးမယ်။ ၅၅ ကျွန်တော့်အသားဟာ စစ်မှန်တဲ့ စားစရာပဲ။ ကျွန်တော့်သွေးဟာ စစ်မှန်တဲ့ သောက်စရာပဲ။ ၅၆ ကျွန်တော့်အသားကို စားပြီး ကျွန်တော့်သွေးကို သောက်တဲ့သူဟာ ကျွန်တော်နဲ့ တစ်စိတ်တစ်ဝမ်းတည်းပဲ။ ကျွန်တော်လည်း သူနဲ့ တစ်စိတ်တစ်ဝမ်းတည်းပဲ။ ၅၇ အသက်ရှင်တဲ့ အဖဘုရားက ကျွန်တော့်ကို စေလွှတ်တယ်၊ အဖဘုရားကြောင့် ကျွန်တော်အသက်ရှင်နေတယ်။ အလားတူပဲ၊ ကျွန်တော့်အသားကို စားတဲ့သူကလည်း ကျွန်တော့်ကြောင့် အသက်ရှင်လိမ့်မယ်။ ၅၈ ကောင်းကင်ကလာတဲ့ မုန့်ဟာ အဲဒီလိုဖြစ်ရမှာ။ ခင်ဗျားတို့ရဲ့ ဘိုးဘေးတွေ စားခဲ့တဲ့မုန့်မျိုး မဟုတ်ဘူး။ အဲဒီမုန့်ကို စားပေမဲ့ သူတို့သေခဲ့ရတယ်။ ဒီမုန့်ကို စားတဲ့သူကတော့ ထာဝစဉ် အသက်ရှင်လိမ့်မယ်” လို့ပြောတယ်။ ၅၉ ဒီအကြောင်းတွေကို ကပေရနောင်မြို့က တရားဇရပ်မှာ ယေရှု သွန်သင်ပေးခဲ့တယ်။
စက်တင်ဘာ ၂၄-၃၀
ကျမ်းစာထဲက အဖိုးတန်ဘဏ္ဍာများ | ယောဟန် ၇-၈
“ဖခင်ကို ယေရှု ဂုဏ်တင်ခဲ့”
(ယောဟန် ၇:၁၅-၁၈) ဂျူးတွေ တအံ့တဩဖြစ်ပြီး “ဒီလူက ဘာသာရေးကျောင်းတွေ မတက်ခဲ့ဘဲနဲ့ ကျမ်းစာအသိပညာ ဘာလို့ ဒီလောက်ကြွယ်ရတာလဲ” လို့ပြောကြတယ်။ ၁၆ ယေရှုက “ကျွန်တော် သင်ပေးနေတာတွေဟာ ကျွန်တော့်ရဲ့တရား မဟုတ်ဘူး။ ကျွန်တော့်ကို စေလွှတ်လိုက်တဲ့အရှင်ရဲ့ တရားတွေပဲ။ ၁၇ အဲဒီအရှင်ရဲ့ အလိုတော်ကို ဆောင်ချင်တဲ့သူဆိုရင် ဒီတရားဟာ ဘုရားသခင်ဆီကလား၊ ကျွန်တော့်သဘောအတိုင်း သင်ပေးနေတာလားဆိုတာ သိလိမ့်မယ်။ ၁၈ ကိုယ့်သဘောအတိုင်း သင်ပေးတဲ့သူက ကိုယ်ဂုဏ်တက်ဖို့ပဲ လုပ်တယ်။ စေလွှတ်တဲ့အရှင်ကို ဂုဏ်တင်တဲ့သူကတော့ ဖြောင့်မှန်တဲ့သူပဲ။ မတရားတာ မလုပ်ဘူး။
“ကျမ်းစာ၌ရေးထားသည်”
၅ ယေရှုသည် မိမိ၏သတင်းတရား အဘယ်မှဖြစ်ကြောင်းကို လူတို့အား သိစေလိုသည်။ ထို့ကြောင့် ကိုယ်တော်က “ငါသွန်သင်သော တရားသည် ငါ၏တရားမဟုတ်၊ ငါ့ကို စေလွှတ်တော်မူသောအရှင်၏ တရားတော်ဖြစ်၏” ဟုမိန့်ဆိုသည်။ (ယောဟန် ၇:၁၆) အခြားတစ်ချိန်တွင်လည်း “ငါသည် ကိုယ့်သဘောအတိုင်း အဘယ်အမှုကိုမျှမပြုဘဲ ငါ့ခမည်းတော်သည် ငါ့အားသွန်သင်တော်မူသည့်အတိုင်း ဟောပြော” ၏ဟု မိန့်တော်မူသည်။ (ယောဟန် ၈:၂၈) ထို့ပြင် ကိုယ်တော်က “ငါဟောပြောသောစကားကို ငါ့သဘောအတိုင်း ဟောပြောသည်မဟုတ်။ ငါနှင့် တစည်းတလုံးတည်းရှိတော်မူသော ခမည်းတော်သည် မိမိအမှုတော်များကို ပြုတော်မူ၏” ဟုဆိုသည်။ (ယောဟန် ၁၄:၁၀) ဤစကားများ ဟုတ်မှန်ကြောင်း ယေရှုသက်သေထူသည့် နည်းတစ်နည်းမှာ သမ္မာကျမ်းစာကို မကြာခဏ ကိုးကားခြင်းဖြင့်ဖြစ်သည်။
၆ မှတ်တမ်းတင်ထားသော ယေရှု၏စကားများကို ဂရုစိုက်လေ့လာသောအခါ ကိုယ်တော်သည် ဟေဗြဲကျမ်းစာစောင် ထက်ဝက်ကျော်ကို တိုက်ရိုက်ကိုးကားကြောင်း သို့မဟုတ် သွယ်ဝိုက်ရည်ညွှန်းကြောင်း ထင်ရှား၏။ ယင်းသည် မှတ်သားလောက်ဖွယ် ဖြစ်ချင်မှဖြစ်မည်။ ကိုယ်တော်သည် သုံးနှစ်ခွဲတိုင် ဟောပြောသွန်သင်ခဲ့ရာ စွမ်းအားတော်ဖြင့် ရေးသားထားသော ကျမ်းစာစောင်ရှိသမျှကို အဘယ်ကြောင့် မကိုးကားရသနည်းဟု သင်စဉ်းစားမိပေမည်။ အမှန်မှာ ကိုယ်တော် ထိုသို့ကိုးကားခဲ့ပေမည်။ ယေရှု၏စကားများနှင့် လုပ်ရပ် အနည်းအကျဉ်းကိုသာ မှတ်တမ်းတင်ခဲ့ကြောင်း အမှတ်ရပါ။ (ယောဟန် ၂၁:၂၅) အမှန်ဆိုလျှင်၊ သင်သည် မှတ်တမ်းတင်ထားသော ယေရှု၏စကားအားလုံးကို နာရီပိုင်းအတွင်း အသံကျယ်ကျယ်ဖြင့် ဖတ်ရှုနိုင်သည်။ ယခု သင်သည် ဘုရားသခင်နှင့် ကိုယ်တော်၏နိုင်ငံတော်အကြောင်းကို နာရီပိုင်းအတွင်း ပြောဆိုသည်ဆိုပါစို့။ ထိုအချိန်အတွင်း ဟေဗြဲကျမ်းစာစောင် ထက်ဝက်ကျော်ကိုပင် သင်ရည်ညွှန်းလိုက်သည်။ နောက်တစ်ချက်မှာ ယေရှုလက်ဝယ်တွင် အများအားဖြင့် ကျမ်းလိပ်များမရှိခြင်း ဖြစ်သည်။ ကျော်ကြားသော တောင်ပေါ်ဒေသနာကို ကိုယ်တော် ဟောပြောစဉ်က ဟေဗြဲကျမ်းစာစောင်များမှ ကျမ်းပိုဒ်များစွာကို တိုက်ရိုက်ဖြစ်စေ၊ သွယ်ဝိုက်ဖြစ်စေ အလွတ်ပင် ရည်ညွှန်းခဲ့သည်။
(ယောဟန် ၇:၂၈၊ ၂၉) အဲဒီအခါ ဗိမာန်တော်မှာ သွန်သင်နေတဲ့ ယေရှုက အသံကိုမြှင့်ပြီး “ခင်ဗျားတို့ ကျွန်တော့်ကို သိတယ်။ ကျွန်တော် ဘယ်ကလာမှန်းလည်း သိတယ်။ ဒါပေမဲ့ ကျွန်တော်က ကိုယ့်သဘောနဲ့ကိုယ် လာတာမဟုတ်ဘူး။ ကျွန်တော့်ကို စေလွှတ်တဲ့အရှင်ဟာ တကယ်ရှိတယ်။ အဲဒီအရှင်ကို ခင်ဗျားတို့ မသိဘူး။ ၂၉ ကျွန်တော်ကတော့ သိတယ်။ ကျွန်တော်ဟာ အဲဒီအရှင်ရဲ့ ကိုယ်စားလှယ်ပဲ။ ကျွန်တော့်ကို သူစေလွှတ်လိုက်တာ” လို့ပြောတယ်။
(ယောဟန် ၈:၂၉) ကျွန်တော့်ကိုစေလွှတ်တဲ့အရှင်ဟာ ကျွန်တော်နဲ့အတူ ရှိတယ်။ သူနှစ်သက်တာကိုပဲ အမြဲလုပ်တဲ့အတွက် ကျွန်တော့်ကို တစ်ယောက်တည်း စွန့်ပစ်မှာ မဟုတ်ဘူး” လို့ပြောတယ်။
လောကစိတ်ဓာတ်ကိုမခံယူဘဲ ဘုရားသခင့် စွမ်းအားတော်ကို ခံယူပါ
၁၉ ယေဟောဝါကို အပြည့်အဝနာခံပါ။ ယေရှုက ခမည်းတော်နှစ်သက်ရာကို အမြဲပြုလုပ်ခဲ့တယ်။ တစ်ကြိမ်မှာတော့ ကိစ္စရပ်တစ်ခုနဲ့ပတ်သက်ပြီး ယေရှုလုပ်လိုရာနဲ့ ယေဟောဝါဖြစ်စေလိုရာ မကိုက်ညီခဲ့ဘူး။ ဒါပေမဲ့ ကိုယ်တော်က မိမိရဲ့ခမည်းတော်ကို “ကျွန်ုပ်၏အလိုအတိုင်း မဖြစ်ပါစေနှင့်။ ကိုယ်တော်၏အလိုတော်အတိုင်း ဖြစ်ပါစေ” ဆိုပြီး ယုံကြည်စိတ်ချမှုအပြည့်နဲ့ ပြောခဲ့တယ်။ (လု. ၂၂:၄၂) ‘နာခံမှုပြဖို့မလွယ်ကူတဲ့အခါမှာတောင် ဘုရားသခင်ကို ငါ နာခံသလား’ ဆိုပြီး မိမိကိုယ်ကိုမေးပါ။ ကျွန်ုပ်တို့ရဲ့အသက်က ဘုရားသခင်ကို နာခံခြင်းအပေါ် မူတည်တယ်။ ကျွန်ုပ်တို့ရဲ့ဖန်ဆင်းရှင်၊ အသက်ပေးရှင်၊ အသက်ကို ထောက်ပံ့ပေးရှင်အနေနဲ့ ကိုယ်တော်က ကျွန်ုပ်တို့ရဲ့ အကြွင်းမဲ့နာခံမှုကို ရထိုက်တယ်။ (ဆာ. ၉၅:၆၊ ၇) နာခံမှုကို ဘာနဲ့မှအစားထိုးလို့ မရဘူး။ နာခံမှု မတင်ပြဘူးဆိုရင် ဘုရားသခင့်မျက်နှာသာ မရနိုင်ဘူး။
ရှာဖွေလေ့လာ ဘုရားရေးရာရတနာ
(ယောဟန် ၇:၈-၁၀) ပွဲတော်ကို မင်းတို့ပဲ သွားကြ။ ငါကတော့ အချိန်မတန်သေးလို့ မသွားသေးဘူး” လို့ပြောပြီး၊ ၉ ဂါလိလဲနယ်မှာပဲ နေရစ်ခဲ့တယ်။ ၁၀ ဒါပေမဲ့ ညီတွေ ထွက်သွားပြီးမှ ယေရှုက ပွဲတော်တက်ဖို့ လူတွေမသိအောင် အသာလေး ထွက်လာတယ်။
အဘယ်ကြောင့် မှန်ရာကို ပြောရသနည်း
ယင်းအခြေအနေမျိုးနှင့်ပတ်သက်၍ ယေရှုခရစ် အဘယ်ပုံသက်သေထားတော်မူခဲ့သနည်း။ တစ်ချိန်တွင် မိမိခရီးစဉ်ကို စိတ်ဝင်စားကြသော မယုံကြည်သူအချို့နှင့် ယေရှုစကားပြောဆိုခဲ့သည်။ သူတို့က ကိုယ်တော်အား “ဤအရပ်မှထွက်၍ ယုဒပြည်သို့ကြွပါ” ဟု အကြံပေးခဲ့ကြသည်။ ယေရှု၏တုံ့ပြန်ပုံကား အဘယ်နည်း။ “ထိုပွဲ [ယေရုရှလင်သို့] သို့သင်တို့သွားကြလော့။ ငါမသွားသေး။ ငါ့အချိန်မပြည့်စုံသေး။” ထို့နောက် မကြာမီတွင် ယေရှုသည် ပွဲတော်ကျင်းပရာ ယေရုရှလင်မြို့သို့ သွားခဲ့သည်။ ကိုယ်တော်သည် အဘယ်ကြောင့် ထိုသို့ဖြေကြားတော်မူသနည်း။ သူတို့သည် ယေရှုအဘယ်နေရာတွင် ရှိမည်နှင့်ပတ်သက်သော အသေးစိတ်အချက်အလက်အတိအကျကို သိသင့်သူများ မဟုတ်ပါ။ ထို့ကြောင့် ယေရှုသည် မမှန်မကန်ပြောခြင်းမဟုတ်သော်လည်း မိမိ သို့မဟုတ် မိမိနောက်လိုက်များကို အန္တရာယ်မပြုနိုင်ရန် သူတို့အား အပြည့်အစုံ မဖြေကြားခြင်းဖြစ်သည်။ ယင်းသည် မုသာပြောခြင်းမဟုတ်။ အကြောင်းမှာ ခရစ်တော်နှင့်ပတ်သက်၍ တမန်တော်ပေတရု ဤသို့ရေးသားခဲ့သည်– ‘ထိုသခင်သည် မကောင်းမှုကိုမပြု။ နှုတ်တော်၌လည်း မုသာကိုရှာမတွေ့။’—ယောဟန် ၇:၁-၁၃။ ၁ ပေတရု ၂:၂၂။
(ယောဟန် ၈:၅၈) ယေရှုက “ကျွန်တော် မှန်တာကိုပြောမယ်၊ အမှန်အတိုင်းပြောမယ်။ အာဗြဟံ မမွေးခင်ကတည်းက ကျွန်တော်ရှိနေပြီ” လို့ပြောတယ်။
nwtsty ယဟ ၈:၅၈ လေ့လာမှု မှတ်စု
ကျွန်တော်ရှိနေပြီ– ယေရှုက “အသက် ၅၀ တောင် မရှိသေးဘဲနဲ့” ‘အာဗြဟံကို မြင်ဖူးတယ်’ လို့ ပြောတဲ့အတွက် အတိုက်အခံလုပ်သူ ဂျူးတွေက ကျောက်ခဲနဲ့ပေါက်ချင်ကြတယ်။ (ယဟ ၈:၅၇) ဒါနဲ့ ယေရှုက သူဟာ မြေကြီးပေါ်မလာခင်၊ အာဗြဟံမမွေးခင် ကောင်းကင်မှာ တန်ခိုးကြီးတဲ့ နာမ်ဝိညာဉ်သားဖြစ်ခဲ့တယ်လို့ ပြောပြလိုက်တယ်။ ယေရှုဟာ ဘုရားနဲ့တန်းတူဖြစ်တယ်လို့ ဒီအခန်းငယ်မှာ ဖော်ပြတယ်လို့ တချို့ဆိုကြတယ်။ ဒီကျမ်းချက်မှာ အသုံးပြုထားတဲ့ အက်ဂို အေမီ (တချို့ကျမ်းတွေမှာ “ငါဖြစ်၏” လို့ပြန်ဆို) ဆိုတဲ့ ဂရိစကားလုံးဟာ စက်ပ်တွားဂျင့်ကျမ်း ထွ ၃:၁၄ ပြန်ဆိုချက်ကို သွယ်ဝိုက်ရည်ညွှန်းနေတာ ဖြစ်တယ်၊ ဒီအခန်းငယ်နှစ်ခုစလုံးကို တစ်ညီတည်း ပြန်ဆိုသင့်တယ်လို့ ဆိုကြတယ်။ (ယဟ ၄:၂၆ လေ့လာမှု မှတ်စုကို ကြည့်။) ဒီအခန်းငယ်ရဲ့ ရှေ့နောက်စကားအရ ဂရိကြိယာ အေမီ (ei·miʹ) ဟာ “အာဗြဟံ မမွေးခင်ကတည်းက” စတင်ပြီး ဆက်လက်တည်ရှိနေတယ်ဆိုတဲ့ အဓိပ္ပာယ်ရှိတယ်။ ဒါကြောင့် “ငါဖြစ်၏” အစား “ရှိနေပြီ” လို့ ပြန်ဆိုသင့်တယ်။ ရှေးခေတ်နဲ့ ခေတ်သစ် ဘာသာပြန်ကျမ်းအတော်များများမှာ “ရှိနေပြီ” နဲ့ဆင်တူတဲ့ စကားလုံးတွေ အသုံးပြုထားတယ်။ အမှန်မှာ ယဟ ၁၄:၉ မှာပါတဲ့ “ဖိလိပ္ပု၊ ကျွန်တော် ခင်ဗျားတို့နဲ့ ဒီလောက်အကြာကြီး နေခဲ့တာတောင် ကျွန်တော့်ကို မသိသေးဘူးလား” ဆိုတဲ့ ယေရှုရဲ့စကားကို ပြန်ဆိုရာမှာလည်း ထပ်တူ ဂရိကြိယာ အေမီ ကို အသုံးပြုထားတယ်။ ဘာသာပြန်အများစုက ဆင်တူယိုးမှားစကားလုံးတွေကို အသုံးပြုထားတယ်။ ဒါက ရှေ့နောက်စကားပေါ်မူတည်ပြီး အေမီ ဆိုတဲ့စကားလုံးကို “ရှိနေပြီ” လို့ပြန်ဆိုတာဟာ သဒ္ဒါနည်းအရ မမှားမှန်း ဖော်ပြတယ်။ (တခြားဥပမာတွေကို လု ၂:၄၈။ ၁၃:၇။ ၁၅:၂၉။ ယဟ ၁:၉။ ၅:၆။ ၁၅:၂၇။ တ ၁၅:၂၁။ ၂က ၁၂:၁၉။ ၁ယ ၃:၈ တို့မှာ တွေ့နိုင်တယ်။) အဲဒီအပြင် ယဟ ၈:၅၄၊ ၅၅ မှာပါတဲ့ ယေရှုရဲ့စကားတွေက ဖခင်နဲ့ မိမိ အတူတူပဲလို့ ပြောနေတာမဟုတ်မှန်း ထင်ရှားတယ်။
ကျမ်းစာဖတ်ရှုခြင်း
(ယောဟန် ၈:၃၁-၄၇) အဲဒီနောက် ယေရှုက ယုံကြည်သူဂျူးတွေကို “ခင်ဗျားတို့သာ ကျွန်တော့်စကားကို အမြဲလိုက်နာရင် ကျွန်တော့်တပည့်အစစ် ဖြစ်ရုံမက၊ ၃၂ အမှန်တရားကိုပါ သိရလိမ့်မယ်။ အဲဒီအမှန်တရားက ခင်ဗျားတို့ကို လွတ်မြောက်စေလိမ့်မယ်” လို့ပြောတယ်။ ၃၃ ဒါနဲ့ တခြားလူတွေက “ကျုပ်တို့ဟာ အာဗြဟံရဲ့ သားမြေးတွေပါ။ ဘယ်သူ့ဆီမှာမှ ကျွန်ခံဖူးတာ မဟုတ်ဘူး။ ကျုပ်တို့ လွတ်မြောက်လိမ့်မယ်လို့ ခင်ဗျား ဘာကြောင့်ပြောရတာလဲ” ဆိုပြီး မေးတော့၊ ၃၄ ယေရှုက “ကျွန်တော် မှန်တာကိုပြောမယ်၊ အမှန်အတိုင်း ပြောမယ်။ အပြစ်လုပ်တဲ့သူဟာ အပြစ်ရဲ့ကျွန်ပဲ။ ၃၅ ကျွန်ဆိုတာ သခင့်အိမ်မှာ အမြဲနေရမှာ မဟုတ်ဘူး။ သားကပဲ အမြဲနေရတာ။ ၃၆ ဒါကြောင့် သားတော်ကသာ လွှတ်ပေးရင် တကယ်လွတ်မြောက်ကြလိမ့်မယ်။ ၃၇ ခင်ဗျားတို့ဟာ အာဗြဟံရဲ့ သားမြေးတွေမှန်း ကျွန်တော်သိတာပေါ့။ ဒါပေမဲ့ ကျွန်တော့်ကိုသတ်ဖို့ ခင်ဗျားတို့ ကြိုးစားနေတယ်။ ကျွန်တော့်စကားကိုမှ လက်မခံနိုင်ကြတာ။ ၃၈ ကျွန်တော် အဖနဲ့အတူ ရှိတုန်းက မြင်ခဲ့ရတာတွေကို ပြောတယ်။ ခင်ဗျားတို့လည်း ခင်ဗျားတို့အဖဆီက ကြားခဲ့ရတာတွေကို လုပ်တယ်” လို့ပြောတယ်။ ၃၉ သူတို့က “ကျုပ်တို့အဖဟာ အာဗြဟံပဲ” ဆိုတော့ ယေရှုက “အာဗြဟံရဲ့ သားသမီးမှန်ရင် အာဗြဟံရဲ့အကျင့်ကို ကျင့်မှာပေါ့။ ၄၀ အခုတော့ ဘုရားသခင်ဆီက ကြားခဲ့ရတဲ့ အမှန်တရားအကြောင်း ပြောပြနေတဲ့ ကျွန်တော့်ကို သတ်ဖို့ ခင်ဗျားတို့ ကြိုးစားနေကြတယ်။ အာဗြဟံက အဲဒီလိုမှ မလုပ်ခဲ့တာ။ ၄၁ ခင်ဗျားတို့က ခင်ဗျားတို့အဖရဲ့ အကျင့်တွေကို ကျင့်နေတာ” လို့ပြောတော့ သူတို့က “ကျုပ်တို့က အကျင့်ပျက်ပြားပြီး ရလာတဲ့ သားသမီးတွေ မဟုတ်ဘူး။ ကျုပ်တို့မှာ အဖတစ်ယောက်ပဲ ရှိတာ။ အဲဒါ ဘုရားသခင်ပဲ” လို့ပြန်ပြောကြတယ်။ ၄၂ အဲဒီအခါ ယေရှုက “ဘုရားသခင်သာ ခင်ဗျားတို့အဖမှန်ရင် ကျွန်တော့်ကို ချစ်ကြမှာပဲ။ ဘာလို့လဲဆိုတော့ ဘုရားသခင် စေလွှတ်လိုက်လို့ ကျွန်တော် ဒီမှာရှိနေတာ။ ကိုယ့်သဘောနဲ့ကိုယ် လာတာ မဟုတ်ဘူး။ ဘုရားသခင် စေလွှတ်လို့ပါ။ ၄၃ ကျွန်တော်ပြောနေတာကို ဘာလို့ နားမလည်ကြတာလဲ။ ကျွန်တော့်စကားကို လက်မခံနိုင်လို့ပေါ့။ ၄၄ ခင်ဗျားတို့ရဲ့အဖဟာ မာရ်နတ်ပဲ။ သူ့ဆန္ဒအတိုင်း ခင်ဗျားတို့ လုပ်ချင်ကြတာ။ သူဟာ အစကတည်းက လူ့အသက်သတ်တဲ့သူပဲ။ သူ့မှာ အမှန်တရား မရှိတဲ့အတွက် အမှန်တရားမှာ သူ တည်မြဲမနေဘူး။ မုသားပြောသူ၊ မုသားရဲ့အဖ ဖြစ်တဲ့အတွက် လိမ်ညာပြောတဲ့အခါ သူ့ရဲ့ပင်ကိုဉာဉ်အတိုင်း ပြောတတ်တယ်။ ၄၅ ကျွန်တော်ကတော့ အမှန်တရားကိုပဲ ပြောတဲ့အတွက် ခင်ဗျားတို့ မယုံကြဘူး။ ၄၆ ကျွန်တော့်မှာ အပြစ်ရှိတယ်လို့ ခင်ဗျားတို့ထဲက ဘယ်သူ အထောက်အထား ပြနိုင်သလဲ။ အမှန်တရားကို ပြောတာပါဆိုတော့လည်း ဘာလို့ မယုံကြတာလဲ။ ၄၇ ဘုရားသခင်နဲ့ စပ်ဆိုင်တဲ့သူဟာ ဘုရားသခင်ရဲ့ တရားစကားကို နားထောင်တတ်တယ်။ ခင်ဗျားတို့ကတော့ ဘုရားသခင်နဲ့ မစပ်ဆိုင်တဲ့အတွက် နားမထောင်ကြဘူး” လို့ပြောတယ်။