ကမ္ဘာ့ဖြစ်ရပ် အကဲခတ်

အာရှမှာ လာရောက်ဆေးကုသခြင်း တိုးများလာ

အရည်အသွေးပြည့်မီတဲ့ ဆေးဝါးကုသမှုကို ခံယူဖို့ ကိုယ့်နိုင်ငံထက် ဆေးကုသစရိတ် တော်တော်လေး နည်းတဲ့ နိုင်ငံရပ်ခြားကို သွားရောက်ကုသတဲ့ လူနာတွေ ကမ္ဘာတစ်ဝန်းမှာ တိုးများလာနေပါတယ်။ ဖိလစ်ပိုင် သတင်းစာတစ်စောင်ရဲ့ မှတ်တမ်းအရ ၂၀၁၅ ခုနှစ် ရောက်ရင် ဖိလစ်ပိုင်နိုင်ငံမှာ တစ်နှစ်ကို “ဆေးကုခံ ကမ္ဘာလှည့်ခရီးသည်” တစ်သန်းလောက် ရောက်မယ်လို့ ခန့်မှန်းထားပြီး အဲဒီအရေအတွက်ကို တောင်ကိုးရီးယားနိုင်ငံက ၂၀၂၀ ပြည့်နှစ်မှာ ပြည့်မီနိုင်တယ်။ အိန္ဒိယ၊ မလေးရှား၊ စင်ကာပူနဲ့ ထိုင်းနိုင်ငံတွေကလည်း လူကြိုက်များလာတဲ့ နိုင်ငံတွေ ဖြစ်ကြတယ်။ အနောက်နိုင်ငံသားတွေက အရိုး၊ နှလုံး စတဲ့ရောဂါတွေကို ကုဖို့ ရောက်လာကြတယ်။ အဲဒီအပြင် ငွေကြေးချမ်းသာလာတဲ့ တရုတ်နိုင်ငံသားတွေလည်း “သူတို့တူချင်တဲ့ အကျော်အမော်တွေ” ရဲ့ဓာတ်ပုံတွေနဲ့အတူ မျက်နှာခွဲစိတ်ပြုပြင်ဖို့ ရောက်လာနေကြတယ်လို့ မှတ်တမ်းက ဖော်ပြတယ်။

အလုပ်တစ်ခုမက တစ်ပြိုင်တည်းလုပ်ခြင်းရဲ့ ဆိုးကျိုး

နည်းပညာကြောင့် အလုပ်သမားတွေဟာ တစ်ချိန်တည်းမှာ ခက်ခဲရှုပ်ထွေးတဲ့ တာဝန်တစ်ခုထက်မကကို လုပ်ရလေ့ရှိပြီး မေးမြန်းလာတာတွေကိုလည်း ချက်ခြင်း ပြန်ဖြေနေရတယ်။ “တစ်ချိန်တည်း အလုပ်တစ်ခုထက်မက လုပ်သူတွေရဲ့ စွမ်းဆောင်ရည်ဟာ ကျဆင်းတတ်တယ်” လို့ အမေရိကန်နိုင်ငံ စတန်းဖော့ဒ် တက္ကသိုလ်ရဲ့ ဒါရိုက်တာတစ်ယောက်ဖြစ်တဲ့ ခလစ်ဖော့ဒ် နက်စ်က ဆိုတယ်။ မှတ်တမ်းတွေအရ၊ အလုပ်အများကြီးကို တစ်ပြိုင်တည်းလုပ်တဲ့သူတွေဟာ စိတ်ဖိစီးတတ်ကြတယ်၊ ဘာမဟုတ်တာလေးနဲ့ အာရုံပြောင်းလွယ်တယ်၊ ကောင်းကောင်း မစဉ်းစားနိုင် ဖြစ်တတ်တယ်။ ဒါကြောင့် အရေးကြီးတဲ့ အသေးစိတ် အချက်အလက်တွေကို လွတ်သွားတတ်တယ်။ နက်စ်က ခုလိုအကြံပြုတယ်– “သင် တစ်ခုခုကို လုပ်တဲ့အခါ မိနစ် ၂၀ လောက် အဲဒါကိုပဲလုပ်ပြီး တခြားဘာကိုမှ မလုပ်ပါနဲ့။ ဒါက အာရုံစိုက်နိုင်ဖို့၊ ကောင်းကောင်း စဉ်းစားနိုင်ဖို့ လေ့ကျင့်ခန်းဖြစ်တယ်။”