“ဒီစာအုပ်က လူတွေရဲ့နှလုံးကို ထိမိပြီး လှုံ့ဆော်ပေးဖို့ ကူညီပေးတယ်”
ဘရာဇီးတောင်ပိုင်း ပေါ်တိုအလယ်ဂရီမြို့မှာ လွန်ခဲ့တဲ့နှစ်အနည်းငယ်က လူမှုရေးကိစ္စရပ်တွေကိုဆွေးနွေးတဲ့ အပြည်ပြည်ဆိုင်ရာ ညီလာခံတစ်ခုကို လက်ခံကျင်းပခဲ့တယ်။ ၁၃၅ နိုင်ငံက သောင်းနဲ့ချီတဲ့ကိုယ်စားလှယ်တွေက ညီလာခံကို တက်ရောက်ခဲ့ကြတယ်။ အားလပ်ချိန်မှာ ပေါ်တိုအလယ်ဂရီမှာရှိတဲ့ အသင်းတော်တစ်ခုက သက်သေခံအုပ်စုတစ်စုဟာ ကိုယ်စားလှယ်တွေကို ဘုရားသခင့်နိုင်ငံတော်သတင်းဟောပြောဖို့ ချဉ်းကပ်ခဲ့တယ်။ သူတို့ဘယ်လို ပြောဆိုဆက်သွယ်ခဲ့ကြသလဲ။
ရှေ့ဆောင်တစ်ဦးဖြစ်တဲ့ အဲလစ်စဘက်တေက ဒီလိုပြောပြတယ်– “လူမျိုးအပေါင်းမှလူတို့အတွက် သတင်းကောင်းစာအုပ်ငယ်ကို ကျွန်မတို့ သုံးခဲ့ကြတယ်။ ကိုယ်စားလှယ်အတော်များများက သတင်းကောင်းကို တစ်ခါမှ မကြားဖူးကြပေမဲ့ လိုလိုလားလား နားထောင်ကြတယ်။ တရုတ်၊ နိုင်ဂျီးရီးယား၊ ပြင်သစ်၊ ဘိုလီးဗီးယား၊ အစ္စရေး၊ အိန္ဒိယကလူတွေနဲ့ စကားပြောခွင့်ရခဲ့တယ်။ ကိုယ်စားလှယ်တချို့ကို သူတို့ရဲ့ဘာသာစကားနဲ့ ကျမ်းစာစာပေတွေ ဝေငှနိုင်ခဲ့ပြီး သူတို့က ဝမ်းသာအားရလက်ခံခဲ့ကြတယ်။”
မက္ကဆီကိုက ရှေ့ဆောင်တစ်ဦးဖြစ်တဲ့ ရာအူးလည်း ဒီစာအုပ်ငယ်ကိုသုံးခဲ့လို့ ရလဒ်ကောင်းတွေ ရရှိခဲ့တယ်။ မကြာသေးခင်ကမှ ဇနီးဆုံးပါးသွားတဲ့ အသက် ၈၀ ရှိတဲ့ အာရပ်လူကြီးတစ်ဦးထံ သူချဉ်းကပ်ခဲ့တယ်။ အဲဒီလူက စာအုပ်ငယ်ထဲက အာရဘီဘာသာစကားနဲ့ရေးထားတဲ့ နိုင်ငံတော်သတင်းကို ဖတ်ပြီးတဲ့နောက် ဝမ်းသာမျက်ရည်ကျလာတယ်။ အကြောင်းကတော့ ဗျာ. ၂၁:၃၊ ၄ မှာပါတဲ့ သေခြင်းရှိတော့မည်မဟုတ်ဆိုတဲ့ ဘုရားသခင့်ကတိတော်ကို သူ့ရဲ့မိခင်ဘာသာစကားနဲ့ဖတ်ရလို့ စိတ်နှလုံးထိမိခဲ့တယ်။ အလွတ်သဘောသက်သေခံနေချိန်မှာ ရာအူးဟာ ပေါ်တူဂီလူမျိုးတစ်ဦးနဲ့ တွေ့ခဲ့တယ်။ အဲဒီလူရဲ့သားလည်း သေဆုံးသွားပြီဖြစ်တယ်။ ရာအူးက စာအုပ်မှာပါတဲ့ ပေါ်တူဂီဘာသာစကား စာမျက်နှာကို ပြလိုက်တယ်။ အဲဒါကိုဖတ်ပြီးတဲ့နောက် ဒီလူက ကျမ်းစာအကြောင်းပိုသိချင်တယ်လို့ပြောပြီး ကျမ်းစာသင်အံမှုလက်ခံခဲ့တယ်။
ရာအူးဟာ လူမျိုးအပေါင်းမှလူတို့အတွက် သတင်းကောင်းစာအုပ်ငယ်ကိုသုံးပြီး ကိုရီးယား၊ ဂျာမန်၊ ဇာပိုတက်၊ တရုတ်၊ ပါရှန်း၊ ပြင်သစ်၊ မိုက်ဇ်၊ ရုရှား၊ ဟင်ဒီ၊ အာမေးနီးယန်းနဲ့ အင်္ဂလိပ် စကားပြောတဲ့သူတွေကို သက်သေခံခဲ့တယ်။ သူ ဒီလိုပြောခဲ့တယ်– “ခရစ်ယာန်ဓမ္မအမှုမှာ ဒီစာအုပ်ကိုသုံးဖို့ ဘယ်လောက်အရေးကြီးတယ်ဆိုတာ ကျွန်တော်သိလာတယ်။ သူတို့ရဲ့စကားကို ကျွန်တော်မပြောတတ်ပေမဲ့ ဒီစာအုပ်က လူတွေရဲ့နှလုံးကိုထိမိပြီး လှုံ့ဆော်ပေးဖို့ ကူညီပေးတယ်။”
နိုင်ငံရပ်ခြားကို ခရီးသွားတဲ့သူ၊ ပြောင်းရွှေ့နေထိုင်တဲ့သူ များသည်ထက်များလာတယ်။ ဒါကြောင့် ဘာသာခြားစကားပြောသူတွေနဲ့ တွေ့ဆုံဖို့ အကြောင်းပိုများလာတယ်။ လူမျိုးအပေါင်းမှလူတို့အတွက် သတင်းကောင်းစာအုပ်ငယ်ကိုသုံးပြီး သူတို့ကို ဘုရားသခင့်နိုင်ငံတော်သတင်းကောင်း ဝေမျှနိုင်တယ်။ ဒီစာအုပ်ကို သင်အမြဲဆောင်ထားသလား။
[စာမျက်နှာ ၃၂ ပါရုပ်ပုံ]
ရာအူးက စာအုပ်ငယ်ကိုသုံးပြီး လူတွေရဲ့နှလုံးကို ထိမိစေခဲ့