လူသားတွေကို ကယ်တင်ဖို့ ဘုရားစီစဉ်ပေး

ဘုရားသခင်က မိမိကို သစ္စာရှိစွာဝတ်ပြုသူတစ်ဦးဖြစ်တဲ့ အာဗြဟံကို ကြိုပြောထားတဲ့ “အမျိုးအနွယ်” ဟာ သူ့မျိုးရိုးစဉ်ဆက်ထဲကနေ ပေါ်ထွန်းလာမယ်လို့ ကတိပေးခဲ့တယ်။ အဲဒီအမျိုးအနွယ်အားဖြင့် “လူမျိုးအပေါင်း” အကျိုးခံစားရမယ်။ (ကမ္ဘာဦး ၂၂:၁၈) အာဗြဟံရဲ့မြေးဖြစ်သူ ယာကုပ်ဟာ နောက်ပိုင်းမှာ အီဂျစ်ပြည်ကို ပြောင်းရွှေ့သွားတယ်။ အဲဒီမှာ သူ့ရဲ့မိသားစုအရေအတွက် များလာပြီး ရှေးခေတ် အစ္စရေးလူမျိုး ဖြစ်လာတယ်။

နောက်ပိုင်းမှာ၊ ရက်စက်တဲ့ အီဂျစ်ဘုရင် ဖာရောက အစ္စရေးလူတွေကို ကျွန်လုပ်ခိုင်းတယ်။ ဒါကြောင့် ဘုရားသခင်က ကြိုဟောသူ (ပရောဖက်) မောရှေကို ပေါ်ထွန်းစေတယ်။ ပင်လယ်နီကို အံ့ဖွယ်နည်းနဲ့ နှစ်ခြမ်းခွဲပြီး အီဂျစ်ပြည်ကနေ အစ္စရေးလူမျိုးကို ကယ်နုတ်ဖို့ မောရှေကို ဦးဆောင်ခိုင်းခဲ့တယ်။ အဲဒီနောက် ဘုရားသခင်က အစ္စရေးလူတွေကို လမ်းညွှန်ပေးဖို့၊ ကာကွယ်ပေးဖို့ ပညတ်တော်ဆယ်ပါးအပါအဝင် ပညတ်တွေပေးတယ်။ ဒီပညတ်တွေမှာ အပြစ်ကနေ ခွင့်လွှတ်ခံရဖို့ ပူဇော်ရမယ့်ယဇ်တွေကို အသေးစိတ် ဖော်ပြထားတယ်။ အစ္စရေးလူမျိုးအတွက် ပရောဖက်နောက်တစ်ယောက် စေလွှတ်ပေးမယ်လို့ မောရှေကနေတစ်ဆင့် သူတို့ကို ဘုရားသခင် ပြောခဲ့တယ်။ အဲဒီပရောဖက်က ကတိပြုထားတဲ့ “အမျိုးအနွယ်” ဖြစ်တယ်။

နှစ်ပေါင်းလေးရာကျော်လောက်ကြာပြီးနောက် ဘုရားသခင်က ဧဒင်ဥယျာဉ်မှာ ကြိုပြောထားတဲ့ ပေါ်ထွန်းလာမယ့်အမျိုးအနွယ်ဟာ ထာဝစဉ် တည်မြဲတဲ့နိုင်ငံတစ်ခု တည်ထောင်မယ်လို့ ဘုရင်ဒါဝိဒ်ကို ကတိပေးခဲ့တယ်။ အဲဒီအမျိုးအနွယ်ဟာ မေရှိယဖြစ်လာပါလိမ့်မယ်။ မေရှိယဟာ လူသားတွေကိုကယ်တင်ဖို့၊ ကမ္ဘာကြီးကို သာယာလှပတဲ့ဥယျာဉ်အဖြစ် ပြောင်းလဲပေးဖို့ ဘုရားသခင်ခန့်အပ်ထားတဲ့ ကယ်တင်ရှင်ဖြစ်တယ်။

ဘုရားသခင်က ဒါဝိဒ်နဲ့ တခြားပရောဖက်တွေအားဖြင့် မေရှိယအကြောင်းကို တဖြည်းဖြည်းနဲ့ ဖော်ပြလာတယ်။ မေရှိယဟာ နှိမ့်ချပြီး နူးညံ့ကြင်နာတတ်သူဖြစ်မယ်၊ မေရှိယအုပ်ချုပ်မှုအောက်မှာ ငတ်ပြတ်မှု၊ မတရားမှုနဲ့ စစ်ပွဲတွေ ပပျောက်သွားမယ်လို့ သူတို့ ကြိုဟောခဲ့တယ်။ အဲဒီအပြင် မေရှိယအုပ်ချုပ်ချိန်မှာ လူလူချင်းသာမက လူနဲ့ တိရစ္ဆာန်ကြားမှာတောင် ငြိမ်သက်အေးချမ်းလာလိမ့်မယ်၊ ဘုရားသခင်ရဲ့ မူလရည်ရွယ်ချက်ထဲမှာမပါတဲ့ ဖျားနာမှု၊ ဆင်းရဲခက်ခဲမှုနဲ့ သေခြင်းတွေ ပျောက်ကွယ်သွားမယ်၊ သေဆုံးသွားသူတွေ ပြန်အသက်ရှင်လာပြီး ကမ္ဘာပေါ်မှာ နေထိုင်ကြမယ်လို့လည်း ကြိုဟောခဲ့ကြတယ်။

မေရှိယဟာ အစ္စရေးနိုင်ငံက ဘက်သလီဟင်မြို့မှာ ဖွားမြင်မယ်၊ နောင်တစ်ချိန်မှာ အသတ်ခံရမယ်ဆိုပြီး ပရောဖက် မိက္ခာနဲ့ ဒံယေလတို့ကနေတစ်ဆင့် ဘုရားသခင် ကြိုဟောခဲ့တယ်။ ဒါပေမဲ့ ဘုရားသခင်က မေရှိယကို ပြန်အသက်ရှင်စေပြီး ကောင်းကင်မှာ ဘုရင်အဖြစ် ခန့်အပ်လိမ့်မယ်။ မေရှိယရဲ့ နိုင်ငံတော်ဟာ လူ့အုပ်ချုပ်မှုအားလုံးရဲ့နေရာမှာ အပြီးသတ်အစားထိုးပြီး ထာဝစဉ်တည်မြဲသွားမယ်လို့လည်း ဒံယေလကြိုမြင်ခဲ့တယ်။ ကြိုဟောထားတဲ့အတိုင်း မေရှိယ တကယ်ပဲ ပေါ်ထွန်းလာခဲ့သလား။

—ကမ္ဘာဦးအခန်းကြီး ၂၂-၅၀၊ ထွက်မြောက်ရာ၊ တရားဟောရာ၊ ၂ ဓမ္မရာဇဝင်၊ ဆာလံ၊ ဟေရှာယ၊ ဒံယေလ၊ မိက္ခာ၊ ဇာခရိ ၉:၉ တို့အပေါ် အခြေခံထား။