လူသားတွေ ဘယ်လိုဖြစ်တည်လာကြသလဲ

သမ္မာကျမ်းစာရဲ့ ပထမဦးဆုံးကျမ်းဖြစ်တဲ့ ကမ္ဘာဦးကျမ်းမှာ စကြဝဠာရဲ့ မူလအစကို ဒီလိုရိုးရိုးရှင်းရှင်း ဖော်ပြထားတယ်– “အစအဦး၌ ဘုရားသခင်သည် ကောင်းကင်နှင့် မြေကြီးကို ဖန်ဆင်းတော်မူ၏။” (ကမ္ဘာဦး ၁:၁) ဘုရားသခင်က အပင်တွေနဲ့ တိရစ္ဆာန်တွေကို ဖန်ဆင်းပြီးနောက် ပထမဆုံးလူသားမောင်နှံဖြစ်တဲ့ အာဒံနဲ့ဧဝကို ဖန်ဆင်းခဲ့တယ်။ သူတို့နှစ်ယောက်က လွတ်လပ်စွာ ရွေးချယ်ပိုင်ခွင့်အပါအဝင် ဘုရားသခင်ရဲ့ အရည်အသွေးနဲ့ ဖန်ဆင်းခံထားရလို့ တိရစ္ဆာန်တွေနဲ့ မတူပါဘူး။ ဒါကြောင့် သူတို့ရဲ့လုပ်ရပ်အတွက် သူတို့ တာဝန်ယူရမှာဖြစ်တယ်။ ဘုရားသခင်က အာဒံနဲ့ဧဝကို လူ့မိသားစုကြီးရဲ့ ပထမဆုံးမိဘတွေအဖြစ် ကမ္ဘာပေါ်မှာ အားရကျေနပ်ဖွယ်အသက်တာနဲ့ အေးချမ်းငြိမ်သက်စွာ ထာဝစဉ်နေထိုင်စေလိုတယ်။ ဘုရားသခင့်စကားကိုသာ သူတို့နားထောင်ခဲ့ရင် အဲဒီလို နေထိုင်ရမှာဖြစ်တယ်။

ဒါပေမဲ့ ကောင်းကင်တမန်တစ်ပါးက သူ့ကိုယ်ကျိုးအတွက် လူတွေကို လှည့်ဖြားခဲ့တယ်။ အဲဒီအချိန်ကစပြီး သူဟာ “ဆန့်ကျင်သူ” လို့ အဓိပ္ပာယ်ရှိတဲ့ စာတန် ဖြစ်လာတယ်။ စာတန်ကို မာရ်နတ်လို့လည်း ခေါ်တယ်။ ဘုရားသခင့်စကား နားမထောင်ရင် ပိုကောင်းတဲ့ဘဝကို ရရှိနိုင်မယ်လို့ မြွေကနေတစ်ဆင့် ဧဝကို စာတန်မာရ်နတ် လှည့်ဖြားခဲ့တယ်။ အာဒံနဲ့ဧဝဟာ စာတန်နောက်ကို လိုက်ခဲ့တဲ့အတွက် ဘုရားနဲ့ သူတို့ရဲ့ ရင်းနှီးတဲ့နှောင်ကြိုး ပြတ်တောက်သွားတယ်။ သူတို့ ရွေးချယ်မှု မှားသွားလို့ ထာဝစဉ်အသက်မရှင်နိုင်တော့ဘူး။ ဒါ့အပြင် သူတို့ကြောင့် ကျွန်ုပ်တို့အားလုံးလည်း အပြစ်နဲ့ သေခြင်းတရားအောက် ရောက်ရှိသွားတယ်။

ဘုရားသခင်က ဒီအခြေအနေဆိုးကြီးကို ပြောင်းလဲပေးမယ့်အစီအစဉ်အကြောင်း ချက်ချင်း ကြေညာပြီး အာဒံရဲ့ သားစဉ်မြေးဆက်တွေ ထာဝရအသက်ရရှိဖို့ လမ်းစဖွင့်ပေးခဲ့တယ်။ “အမျိုးအနွယ်” ဖြစ်တဲ့ အထူးရွေးချယ်ထားသူတစ်ယောက်အကြောင်း ကြိုပြောခဲ့တယ်။ အဲဒီအမျိုးအနွယ်ဟာ စာတန်ကို အပြီးအပိုင် ဖျက်ဆီးပစ်ပြီး စာတန်၊ အာဒံ၊ ဧဝတို့ကြောင့် ဖြစ်ပေါ်ခဲ့တဲ့ ဆင်းရဲဒုက္ခရှိသမျှကို ဖယ်ရှားပေးမှာဖြစ်တယ်။ (ကမ္ဘာဦး ၃:၁၅) အဲဒီ “အမျိုးအနွယ်” က ဘယ်သူဖြစ်မလဲ။ အချိန်က ပြောပြပါလိမ့်မယ်။

အဲဒီအချိန်အတွင်းမှာ စာတန်က ဘုရားရဲ့ မွန်မြတ်တဲ့ရည်ရွယ်ချက် ပျက်သွားအောင် မပြတ်တမ်း ကြိုးစားခဲ့တယ်။ ဆိုးညစ်တဲ့သူတွေလည်း များသည်ထက်များလာလို့ ဘုရားသခင်က ရေလွှမ်းမိုးဘေးနဲ့ သူတို့ကို ဖျက်ဆီးဖို့ ဆုံးဖြတ်ခဲ့တယ်။ ဘုရားသခင်က နောဧဆိုတဲ့ ဖြောင့်မတ်သူတစ်ဦးကို ရေပေါ်မှာ ပေါလောမျောပါနိုင်တဲ့ ဧရာမသေတ္တာကြီးပုံစံမျိုး သင်္ဘောကို ဆောက်ခိုင်းတယ်။ နောဧနဲ့ သူ့မိသားစုအပြင် တိရစ္ဆာန်တွေကို ကယ်တင်ဖို့ သင်္ဘောထဲဝင်ခိုင်းတယ်။

ရေလွှမ်းမိုးပြီး တစ်နှစ်အကြာမှာ နောဧနဲ့သူ့မိသားစုဟာ သင်္ဘောထဲကနေ သန့်စင်ပြီးသား ကမ္ဘာပေါ်ကို ထွက်လာခဲ့ကြတယ်။ ဒါပေမဲ့လည်း အဲဒီအချိန်ထိ “အမျိုးအနွယ်” ကတော့ ပေါ်မလာသေးပါဘူး။

—ကမ္ဘာဦးအခန်းကြီး ၁-၁၁; ယုဒ ၆၊ ၁၄၊ ၁၅; ဗျာဒိတ် ၁၂:၉ တို့အပေါ် အခြေခံထား။