Mampivarahontsana ny Ady
Anisan’ny zavatra mafy indrindra amin’ny olona izany hoe miaina ao anatin’ny ady. Miaramila sy sivily maro eran-tany no mahatsapa ny ngidin’izany.
MIARAMILA
“Feno olona maty sy maratra mafy manodidina anao. Tsy hainao mihitsy izay hanjo anao.”—Gary, Grande-Bretagne.
“Voatifitra ny lamosiko sy ny tarehiko. Be dia be koa ny olona novonoina hitako, anisan’izany ny ankizy sy ny be taona. Mahatonga anao ho mafy fo ny ady.”—Wilmar, Kolombia.
“Rehefa misy olona voatifitra eo imasonao dia miraikitra ao an-tsainao ilay izy. Tsy afaka ao an-tsainao mihitsy ilay kikiaka sy taraindraina. Tsy ho hadinonao mihitsy iny olona iny.”—Zafirah, Etazonia.
SIVILY
“Hoatran’ny hoe tsy ho falifaly intsony aho. Natahotra ny ho faty aho, fa ny ain’ny havako sy ny namako anefa no nampanahy ahy kokoa.”—Oleksandra, Ukraine.
“Mampatahotra ilay hoe milahatra sakafo manomboka amin’ny 2:00 maraina hatramin’ny 11:00 alina, sady tsy hainao hoe mety ho voatifitra tampoka ianao.”—Daler, Tadjikistan.
“Maty tamin’ny ady i Dada sy Neny dia lasa kamboty aho. Tsy manana an’iza na iza hampionona sy hikarakara ahy intsony aho izao.”—Marie, Rwanda.
Mangidy tokoa ny vokatry ny ady! Nilamin-tsaina ihany anefa ireo olona ireo. Resy lahatra koa ry zareo hoe kely sisa dia tsy hisy intsony ny ady. Hazavain’ny Baiboly ny fomba hahatanterahan’izany. Izany mihitsy no resahin’ity gazety ity.