Adán wet Eva tachʼahuhiyetʼa Dios

Iche ifwala, toj Eva unofwaj, iche amlhaj toj tahuyej lham. Yok: «¿Ha matche toj Dios nʼayej amho toj letuj halʼo lhay?». Eva nichulho: «Iwoyek olhamel otuj, mat iche elh toj iwohiyetʼak otuj. Che olhamel otuj halʼo lhaytso oyinhenla». Amlhaj yok: «Mathichetʼa mʼak toj nʼofwel amhohen, che amel letuj ahatehla iwoye Dios». ¿Ha matche tajtso? Kha, mat Eva imatitche mʼak toj mathichetʼa. Toj iyahinpej halʼo lhaytso lhayʼe lhip toj tʼuhlak tuj, toj malhyejtso yelhte wet hate hiwʼenho Adán. Lham ihanej che tachʼahuhiyetʼa Dios yʼinhenla, mat chʼaj, lham tuj.

Toj honaj, Heowa tahuyej Adán wet Eva, yʼatshane lhamel mʼak toj tamenej toj tachʼahuhiyetʼa lham. Eva yome toj amlhaj toj letes, wet Adán yome toj Eva toj letes. Toj lhamel tachʼahuhiyetʼa Heowa, lham ichenpha lhamel toj ihi yachuyajwʼet Edén. Hopkhilak lhamel yachajihotʼa toj tiyajo yachuyajwʼet Edén Heowa itihi ángeles lhayʼe espada toj lekʼe toj ihi lhiptso.

Heowa yome toj hate itihiyeja letes hop elh toj ifwechʼenlhi Eva. Heowa yenhilhitʼa amlhaj toj yomwetha. Nahanej toj hopkhitʼa amlhaj toj tahuyej Eva, hope pʼante ángel toj fwitsaj toj yomyenlhi amlhaj, tʼupʼantehlak ifwechʼenlhi Eva, ángeltso nʼoyen lheya Satanás hop Diablo. Toj tatay alhoho Heowa itayhthila Satanás. Lham iwohiyetʼalak tujlhache toj ifwechʼenwetha wichi hopkhilak iwoye mʼak toj niʼisa.