Heowa laka ángel tʼuye Ezequías

Asirios ikalhi pʼante 10 tribus toj ihi Israel. Athana Asiria laka niyat, Senaquerib, tʼupʼantehlak lhayen lewuka 2 tribus toj ihi Judá. Hop toj tamenej toj lhayen lewuka weihalhapej ciudades toj ihi Judá. Mat ciudad toj lhayʼe lhip toj tʼupʼantehlak lhayen lewuka hope Jerusalén. Mʼak toj Senaquerib ihanhiyejtʼa hope toj Heowa tʼuye tʼat Jerusalén.

Ezequías, Judá laka niyat, hiwʼenho pʼante Senaquerib wujpe chinaj tʼoj hopkhilak inuhiyetʼa Jerusalén. Senaquerib tachumla pʼante chinaj tʼojtso, mat tej toj malhyejtso ichene laka ejército hopkhilak inuye lhamel. Wichi toj ihi Jerusalén wuj toj nowayhen hop toj asirios lhayʼe lhip toj yamwhaye lhamel. Toj malhyejtso Ezequías ifwenho lhamel: «Yej nowayhen. Hop asirios khajayhen, mat Heowa tachʼotla namehen hopkhilak namel lhayʼe lhip toj nakhajayhen».

Senaquerib ichen lesilotwo, toj hope lechʼotfwa (rabsaqué), hopkhilak ilakwlhi wichi toj ihi Jerusalén. Nʼosilotwotso ikasit tʼat toj ihi lhip toj iseye ciudadtso wet yok: «Heowa ikalhihitʼa tachʼot amehen. Yej matitche mʼak toj Ezequías yome. Ihichetʼa Dios toj iwoyek tʼu amehen».

Ezequías yʼatshane Heowa atsi mʼak toj is che iwoye, wet Heowa nichulho: «Yej nowache mʼak toj rabsaqué yome. Senaquerib ikalhihitʼala hop Jerusalén». Toj paj, Ezequías tachumla Senaquerib lhomet toj yok: «Leche mʼak toj letʼekhaye. Heowa iwohiyetʼak ifwayhat amel». Toj malhyejtso Ezequías iwo tʼalhyaja: «Heowa, por favor, fwayhat olhamel hopkhilak nilhokej wichi ihanej toj tsʼilak am toj ahope Dios toj matche». Wet Heowa nichulho: «Hop Asiria laka niyat tiyajihotʼala Jerusalén. Olham toj otʼuye ciudadna».

Senaquerib imatitche toj tatay lhimpaj toj ikalhihila Jerusalén. Mat toj honatsi, Heowa ichene laka ángel lhip toj asirios ihi, toj iseye Jerusalén. ¡Angeltso ilanhen 185.000 sipʼalis! Nilhokej hinʼul toj khajayhen yʼinhen wet niyat Senaquerib yaple lewʼet hop toj nʼokalhi lham. Malhyejtso pʼante toj Heowa tʼuye Ezequías wet Jerusalén, malhyej toj lham yome pʼante. Che am lhehi pʼante Jerusalén, ¿ha letʼekhaye pʼante Heowa?