¡Nechʼe toj lhos ihi!

Abraham wet Sara wujpe años toj lhamel iwek. Lhamel yikchʼoye lewʼet toj isilataj toj ihi Ur hopkhilak ichechufwi lewʼet toj tsantʼahes. Mat Sara ihichetʼa lewhay che yome toj isitʼa lhip toj ihi hop toj tʼekhaye pʼante Heowa.

Toj Sara tʼupʼantehlak lhos ihi, ifwenho Abraham toja: «Che okawo Agar lhos ihla am malhyejla iwoye che olhas». Toj tafwaytshi lewhay, Agar lhos ihi, wet itiyej lhey Ismael.

Toj tafwaytshi tʼat wujpe lewhayis, toj Abraham hiwʼen pʼante 99 años wet Sara 89, tres wichi tʼisiyakaye pʼante lhamel. Abraham tʼane pʼante lhamel hopkhilak tatachepha toj ichufwi halʼo wet tʼekhen. ¿Ha lehanej atsi iyhaj toj hopehen lhamel? Hopehen ángeles. Lhamel ifwenho Abraham toja: «Che año elh, am wet hachʼefwa as ihihla». Sara tachʼahuye tʼat mʼak toj nʼofwenho Abraham, toj ilate tajtso tʼischeylhi wet itichunlhi: «¿Ha iwohiyelak olhos ihi tej che otalakw?».

Toj año elh, lhayam matche mʼak toj ángel toj tʼalhe Heowa ifwenho pʼante Abraham wet Sara, lhamel lhos ihi, Abraham itiyej pʼante lhos lhey Isaac, toj hope «tʼischey».

Toj tottʼaye toj Isaac hiwʼen cinco años, Sara hiwʼen toj Ismael ilakwlhi lham. Sara iwatlak tʼuye lhos toj malhyejtso tahuyej Abraham wet yok: «Chen hop Agar wet Ismael». Toj ichun Abraham tʼuhitʼahlak iwoye tajtso mat Heowa ihuminche pʼantek tʼuye hop Isaac. Hop toj tamenej ifwenho Abraham toja: «Woye tʼat mʼak toj Sara ifwel amho. Olham otʼuhiyela Ismael mat nilhokej mʼak toj ofwel amho oyamla matche isej Isaac».