Promesa toj ifwenho Heowa

Tafwaytshi dos meses toj israelitas inukwepha toj talho Egipto, ichate chenaj Sinaí wet lhamel itihi lewʼetes. Toj malhyejtso, Heowa tʼalhe pʼante Moisés che ihoʼpe chenajtso wet ifwenho: «Olham toj ofwayhten israelitas. Che tachʼahu noye wet ihanlhi oka leyes, hopehla oka wichi». Lewhay toj Moisés inuhcha toj talhʼpe chenaj, ifwenho israelitas mʼak toj Heowa ifwenho. ¿Atsi mʼak toj lhamel ichulho? Lhamel yok: «Owohiyela nilhokej mʼak toj Heowa yome».

Toj paj, Moisés yachajo toj yapilʼpe chenaj. Heowa ifwenho toja: «Che tres ifwalas otahuhiyeja wichi. Fwenho lhamel toj isitʼak ihoʼpe chenaj Sinaí». Toj Moisés inuhcha ifwenho israelitas toj is che lhaiwaklhathen toj tachʼahuhiyela Heowa.

Toj ichate ifwalatso toj Heowa ifwenho pʼante Moisés, israelitas hiwʼen toj lepleylhi wet pele toj chalaj toj iʼpe chenaj. Hate ilate trueno toj matche toj aytaji lhayʼe nʼofwol. Toj paj Heowa ichumyenlhi itaj toj inuhcha toj ihoʼpe chenaj. Israelitas matche toj nʼowayhen. Nilhokʼpe chenajtso toj tutsaj iʼpe wet wuj toj ilaylhi. Wet nʼofwol lhayʼepej lhip toj aytaji. Toj malhyejtso Heowa yok: «Ohope Heowa. Isitʼak lenʼokwiyej dioses iyhaj».

Moisés yachajo toj ihoʼpe chenaj, wet nechʼe Heowa hiwʼenho leyes laka wichi. Leyestso ifwenho lhamel mʼak toj is che iwoye toj nʼokwiyej wet lakey toj lhamel is che inʼalit. Moisés ilesayen wet toj paj iyahyenho israelitas. Lhamel yopʼantekwe: «Owohiyela nilhokej mʼak toj Dios tʼalh nʼoyehen». Wet lhamel ifwenho laka promesa Dios, mat ¿ha yamla matche?