Hop 12 wichi toj iyahinpe honhat

Hop israelitas yikchʼoye pʼante chenaj Sinaí, tiyajche desierto toj Parán pajtha ichate lhip toj lhey Kadés. Toj ihi lhiptso, Heowa ifwenho Moisés toja: «Chen 12 hinʼul, weihalhapej toj talho tribus hopkhilak iyahinpe Canaán lhip toj owʼenhihola israelitas». Toj malhyejtso, Moisés tatshupiye 12 hinʼul wet yok: «Hoye Canaán wet tetshanchʼoye che honhattso iwoyek nʼotutchey, che wichi khajayhen wok kha wet che wichi ichufwi carpas wok ihi ciudades». Hop 12 espías ihoye Canaán, iche elh lhamel toj lhey Caleb wet Josué.

Toj tafwaytshi 40 ifwalas espías tapile lewʼet. Ichaj higos, granadas wet uvas wet yome toja: «Canaán hope honhat toj matche toj is, mat wichi toj ihi khajayhen wet ciudades lelafwek matche toj toschepha». Toj malhyejtso Caleb yok: «Iwoyek nakalhi lhamel, mah, nahoye». ¿Atsi mʼak toj tamenej toj Caleb yome pʼante tajtso? Hop toj lham wet Josué tʼekhaye Heowa, mat 10 espías iyhaj yok: «Yej nahoye. Wichi toj ihi lhiptso matche toj wus, malhyej iwoye gigantes wet namel nalelemsas, namalhyej iwoye saltamontes».

Hop israelitas nowayhen wet iwo tesa toj isitʼa letichunhayaj wet yok: «Natʼukwe elh líder wet naple Egipto. ¿Atsi mʼak toj tamenej toj is che nahoye Canaán, hopkhilak nʼolanhen namel?». Josué wet Caleb yome toja: «Mʼak toj is hope toj natchʼahuye Heowa, lham tʼuhla namehen, yej nowayhen». Mat israelitas tachʼahuhiyetʼa, mat iwatlak ilan Josué wet Caleb.

¿Atsi toj iwoye Heowa? Ifwenho Moisés toja: «Owoyeje wujpe mʼayhay toj isis israelitas, mat lhamel kamaj tachʼahuhitʼa nʼoye, hop toj tamenej imalhnhila 40 años desiertona pajtha yʼinhen, tajlhamet leles, Josué wet Caleb ihihla honhat toj ofwenho toj owʼenhihola israelitas».