Rut wet Noemí

Iche lewhay toj nehla ihi hop Israel. Hop toj tamenej, toj atsinha toj israelita toj lhey Noemí tʼaye Moab lhayʼe lechʼefwa wet dos leles. Toj paj, Noemí lechʼefwa yʼil. Leles tawhayey toj iyej atsinhay toj moabitas: Rut wet Orfa. Wet toj yik tʼat lewhay Noemí leles hate yʼinhen.

Toj Noemí ihanchʼoye toj nʼolhak ihi hop Israel, yaple lewʼet. Rut wet Orfa yikche hop lham, mat toj ihi nʼayij Noemí yok: «Amel ahopehen oles lechʼefwas toj isen wet otichelis (nueras) toj isen. Ohuminchek amel yachajo toj letawhayey. Aple amel hawʼet toj ihi Moab». Atsinhay nichulho toja: «Olhamel ohumin am, owathitʼahlak atsʼilak». Noemí yachajopej toj ifwenho lhamel toj is che yaple lewʼet. Toj lepes, Orfa yik, mat Rut imalheyej lham. Noemí ifwenho Rut toja: «Orfa yaple lewʼet lhayʼe laka dioses. Ekche lham wet aple ako lewʼet». Mat Rut yok: «Olehitʼala amej. Aka wichi hopkhila oka wichi wet aka Dios hopkhila oka Dios». ¿Chi malhyej (Ep hote) toj Noemí ilat lhame toj tachʼahuye toj Rut ifwenho tajtso?

Rut wet Noemí ichate Israel toj iwo tesa toj nʼolanhi cebada. Iche ifwala, toj Rut ihoye Booz, Rahab lhos laka honhat wet ihutwek cebada toj imalhehi honhat. Booz ilatchʼoye toj Rut hope moabita toj tʼifwtiyej hop Noemí wet ilehiyejtʼa. Lham ifwenho lechumyenhay toj is che imanthi cebada hopkhilak Rut ihutwek.

Honatsitso, Noemí yʼatshane Rut toja: «¿Atsi honhat toj lhehine toj letachumlhi ifwalana?». Rut yok: «Oihine Booz laka honhat». Noemí ifwenho toja: «Booz hope ochʼefwa lewʼet lhele elh. Tujlhache toj letachumlhi toj lhehi laka honhat toj lelhayʼe atsinhay iyhaj, atamsek ihihla».

Rut tujlhache tʼat toj tachumlhi toj ihi Booz laka honhat pajtha noj toj iche cebada. Booz ihanej toj Rut hope atsinha toj is wet matche toj chumaj. Lewhaytso, che hinʼu yʼil wet leles ihihitʼa, lewʼet lhele elh iwoyek iyej hop lechʼefwa. Toj malhyejtso Booz wet Rut tawhayey. Lhos ihi wet itiyej lhey Obed. Toj tafwaytshi lewhay, Obed hope niyat David lechati. Noemí laka amigas matche toj lakajyaj ihi. Lhamel ifwenho: «Toj ichun, Heowa hiwʼen amho Rut, toj matche toj is lakey toj iti amej. Wet athana aka nieto ihi. Nawujyenej tajtso Heowa».