Nʼopʼitseyhay, ¿ha kamaj iloyhiche molhyej espíritus?
Wujpe wichi imatitche wichi toj yʼil yʼihuye lhip toj wichi toj yʼinhen lewʼet. ¿Ha matche? Kha. Dios lhomtes yomey mʼak toj matche wet mʼak toj tolhe Dios wehialha, lham lhey Heowa. Lham yenlhi pʼante wichi wet ihanej atsi toj iyej lhamel toj pajche yʼinhen (Salmo 83:18, Nuevo Mundo [NM]; 2 Timoteo 3:16).
Adán tolhe honhat mok wet yopnu pʼante honhat mok.
Dios Lhomtes yomey: “Dios tachuma lhip honhat”, yenlhi pʼante hinʼu toj tachen toj tolhe honhat mok toj lhey Adán (Génesis 2:7). Dios itihi honhat toj wʼatshan wet isilataj toj lhey Edén. Chik Adán tachʼahuye pʼante wet iwuye ley toj tolhe Heowa, athana kamaj iloy. Mat lham iwuhiyeʼa pʼante mʼak toj tolhe Heowa, iwuye pʼante mʼak toj lham yahemenche pʼante. Toj molhyejtso Dios yuk: “Lhäpnho tʼat honhatnaj letälho tä oayenlhi. Tsi ahonhat tʼat wet lewelanla honhata” (Génesis 3:19).
Lawhoy pʼante Heowa yenlhi Adán toj tolhe honhat mok, ¿ha pajche pʼante ihi lhip che hope Adán? Kha. Lham hopkhitʼe pʼante espíritu celestial toj kamaj newache. Toj molhyejtso, lawhoy Heowa yuk “lhäpnho tʼat honhatnaj letälho”, tajtso Heowa yome toj Adán yʼinhila. Adán yʼihuyehitʼe lhip toj wichi toj yʼinhen lewʼet, lawhoy toj yʼil pʼante, lham nemhi lewʼatshancheyaj ihi. Hop nʼotʼilek hope hiwʼenhitʼe nʼowʼatshancheyaj.
Mat, ¿atsi mʼak toj iyej wichi iyhoj toj yʼinhen? ¿Ha kamaj iche wichitso? Dios Lhomtes nichulho tajtso.
“Wichi lhäyʼe itshätäy tefwaji lhip tä tiyäje. Nilhokej tä õyenejlhi honhat mok wet äp yäpnho honhat mok” (Eclesiastés 3:20).
“Tseyhay mʼak ihanhiyejtʼa” (Eclesiastés 9:5).
“Te lehumnhayaj wet tʼulhnhayaj wet tʼischenyaj nofwihena” (Eclesiastés 9:6).
“Tsi lhip tä lehoye tä häpe honhat tä nʼopʼitseyhay lewʼet, ihichetʼa nʼochumyaj, wok nʼotichunhayaj, wok nʼotäfwnhayaj, wok nʼohanyhayaj” (Eclesiastés 9:10).
“Wet yʼinhen, yachajo tä honhat tʼat, wet noj häp mʼayhay tä iwaklhat yämthilek iwoye” (Salmo 146:4).
Wichi toj iloyhiche iwuye mʼayhayna wet wichi toj yʼinhen iwuhiyeʼa mʼayhayna.
Mʼak tajtso toj ihi Dios Lhomtes, ¿ha hope mʼak toj atha toj latʼechaye? Lhek tichina hop nʼojcha techumlhipej hopkhilak hiwenhu mʼak toj laka nʼotshas tefw. Mat, ifwala toj yʼil hinʼuna, lewʼet lheley ihi lawitʼay wet hiwʼenhitʼe chinajtʼoj che ichojej mʼak toj tefw. Chejpho hila iche latayfwas iwuyeje mʼak toj niʼisa lewʼet lheley. Atsan amej: “Chik hinʼutso kamaj iloy molhyej espíritu, ¿atsiyej nemhi yikchufwi toj tachʼote lewʼet lheley? wet ¿atsiyej lham nemhi tʼamajejla laka nʼotshas wichi toj fwitses?”. Nilhokej textosna yome mʼak toj matche. Lham nemhi lewʼatshancheyaj ihi wet iwuhiyeʼa mʼayhay (Salmo 115:17).
Nʼopʼitseyhay iwuhiyeʼa hiwʼenhu lechʼotyaj wichi toj hiwʼen naylos, tʼuyehen wichi toj iyhoj oscheʼpe.
Wichi toj yʼinhen ihanhiyejtʼe mʼak toj lawuye. Lhamel nemhi iche hiwʼenche honhat, nemhi iche ilotchehonhat, nemhi iche yomwetʼo. Lhamel iwuhiyeʼa tachʼot ame wet iwuhiyeʼa mʼak toj niʼisa (Eclesiastés 9:4; Isaías 26:14). Toj molhyejtso, wichi toj yʼinhen ¿ha yachahihola toj iloyhiche? Matche. Toj paj lewʼenla atsi mʼak toj yomey Dios Lhomtes toj yomey wichi toj yʼinhen yachajola toj iloyhiche.