David wet Goliat

Heowa ifwenho toja hop Samuel: «Hoye Isaí (Jesé) lewʼet. Elh lhamel leles hopkhila elh toj niyathiyeja Israel». Wet Samuel ihoye, wet toj hiwʼen Isaí lhos toj talakw, itichunlhi: «Nʼal toj mamsena hope elh toj nʼotshupiye». Mat Heowa ifwenho Samuel toj hopkhitʼa wet ikalelhtho: «Olham owʼen mʼak toj hope tʼat wichi, otetshanhitʼa mʼak toj tumpha».

Isaí ichaje Samuel seis leles iyhaj. Mat Samuel yok: «Heowa tatshupiyetʼa elh lhamel. ¿Ha iche ales iyhaj?». Isaí nichulho: «Tatay elh toj lepes lhele, David, lham tʼuye tʼat hop tsonʼatas». Toj David nam, Heowa ifwenho Samuel: «¡Hope lhamtsi!». Toj malhyejtso, Samuel itsaype aceite David lhetek hopkhilak hope elh toj nʼotshupiye toj niyathiyeja Israel.

Toj tafwaytshi lewhay, israelitas tatayhla filisteos, iche hinʼu toj gigante toj iyej lhamel toj lhey Goliat. Nilhokej ifwalas, lham ilakwetha israelitas wet tʼanpej: «Chen nʼoye elh amel hopkhilak itay nʼohla. Che ikalh nʼohi, olhamel ohopkhila akawos. Mat che olham okalhi, amel ahopkhila okawos».

David ihoye lhip toj sipʼalis lhaihutwek toj ichaje lhak lechilalis toj soldados. Toj ihi lhiptso David ilate toj Goliat tʼan, wet yok: «¡Olham ottayhlahla lham!». Niyat Saúl nichulho lham: «Ahanʼafwaj tʼat». David yok: «Heowa tachʼotla nʼoye».

Toj malhyejtso, Saúl hiwʼenho laka armadura, mat David yok: «Iwohiyetʼak ochumyenlhi tajtso». Toj malhyejtso David tachuma lefwomthis (honda). Ihowhaye tewok lhip, tachuma cinco tuntey toj tolajen wet ithatho lhuk. David inu alhoho toj ihohla Goliat. Wet gigante tʼan: «¡Hanʼafwaj, ho kana! Wet atʼisan owʼenhihola afwenchey wet itshatay». David nowahiyetʼa lham wet yok: «Am lechajlhi aka espada wet lanza toj letay nʼohla, mat olham ochumyenlhi Heowa lhey toj otay ahila. Hopkhitʼa olhamel toj letatayhla wet letatayhla olhamel oka Dios. Nilhokej iyhaj toj ikana hiwʼenla toj Heowa hope elh toj lhayʼe lhip toj khajay, inuʼpe espada wok lanza. Lham tachʼotla nʼoyehen toj okalhi amel».

Toj paj, David itihi lefwomthis tunte wet yam aytajche toj ifwomej. Isej Heowa lechʼotyaj tunte toj lham ifwomej tiyajo tʼat hop Goliat letacho. Wet gigante nichat katsi wet yʼil tʼat. Toj malhyejtso filisteos inu alhoho hopkhilak nʼolanhitʼa lhamel. Wet am, ¿ha letʼekhaye Heowa malhyej David?