Kuhitila Muli Yoano
3 Kuakele umo kaFaliseu lizina liendi Nikondemo, uapuile umo ua vakua kusika vaYundeya. 2 Uezile kuli Yesu vutsiki naku muleka nguendi: “Lambi, tua tantekeya nguetu u mulongisi ua kutunda kuli Njambi, muomu naumo uahi ahasa kulinga evi vitantekeyeso viuli na kulinga, nga Njambi kesi nendi.” 3 Ngeci Yesu uamu kumbuluile nguendi: “Nji kuleka vusunga nguange, noho muntu asemuke lueka, kati ngoco ka hasa kumona Vuangana vua Njambi.” 4 Nikondemo ua muihuile nguendi: “Vati muntu na kolo laza ahasa kusemuka lueka naua? Vuno ahasa kukovela naua muzimo lia naye linga asemuke lua mu civali ni?” 5 Yesu uamu kumbuluile nguendi: “Nji kuleka vusunga nguange, noho muntu na semuka ku mema na sipilitu, kati ngoco ka hasa kukovela mu Vuangana vua Njambi. 6 Uze ua semuka ku ntsitu napu ntsitu, vunoni uze ua semuka ku sipilitu napu sipilitu. 7 Kati ulikomokele mu njina kuleka nguange: Enu vantu mua pande kusemuka lueka. 8 Mpundzi ye ku pekumuka kuose-oko ku ina zange kaha ue kuivua kuhuhua cayo, vunoni ka utantekeya kuiko itunda ni kuiko iya. Mukemuo mu ce kufua naku muntu uose na semuka ku sipilitu.”
9 Kaha Nikondemo ua muihuile nguendi: “Evi viuma vi hasa kulingiua vati?” 10 Yesu uamu kumbuluile nguendi: “Kati u mulongisi ua Isaleli, vati ka utantekeya evi viuma? 11 Nji kuleka vusunga nguange, yetu tue kuhandeka viuma vi tu tantekeya na kuambulula vukaleho vua viuma vi tua mono, vunoni enu ka mue kutava vukaleho vu tue ku mihana. 12 Nja mileka viuma via ha mavu, vunoni ka mua vi tavele, amba nga nji mileka via muilu mu vitava vati? 13 Cikuavo naua, naumo muntu ua londaho laza muilu uahi, kuvanga lika Muana muntu uze ua tundile muilu. 14 Ngue muze Mosesa ua sukikile linoka mu likango, mukemuo mu va na pande naua kusukika Muana muntu, 15 linga uose amu tsiliela akale na muono ka ue kuhua.
16 “Muomu Njambi ua lemene cikuma vakua mavu, ngeci ua hanene Muanendi umolika, linga uose amu tsiliela kati aka nonge, vunoni aka uane muono ka ue kuhua. 17 Muomu Njambi ka tumine Muanendi ha mavu linga ahise vakua mavu, vunoni linga vakua mavu va kovoke kuhitila muli ikeye. 18 Uose amu tsiliela ka vaka muhisa. Vunoni uze ka mu tsiliela va na muhisa laza, muomu ka tsilielele mu lizina lia Muana umolika ua Njambi. 19 Kaha hano hakeho ha kemana cihiso: ceke cezile ha mavu, vunoni vantu va lemene cikuma milima kuhiana ceke, muomu vilinga viavo viapuile via vipi. 20 Muomu uose ue kulinga via vipi ua zinda ceke, kaha ke kuiza ku ceke kutina vilinga viendi va vipaye.* 21 Vunoni uze ue kulinga via vusunga eza mu ceke, linga vilinga viendi visoloke mpundu nguavo na vilingi mu ku litombola na cizango ca Njambi.”
22 Mu nima yevi, Yesu na vandongesi vendi vaile ku amo membo amu Yundeya, uaka sikamene navo mu imo ntsimbu kaha uakele na kumbatiza vantu. 23 Vunoni Yoano, nendi uakele na kumbatizila ku Enoni kuhiehi na Salimi, muomu kuakele mema a engi kaha vantu va tualeleho kuyako aka vambatize. 24 Mu ntsimbu eyi Yoano tele kanda vamu hake mu kamenga.
25 Vandongesi va Yoano vakele na kulihoya naumo kaYundeya kutuala ha ku lilelesa. 26 Ngeci vezile kuli Yoano naku muleka nguavo: “Lambi, uze yala i uakele nendi mu sinia lia Yondau iua zimbuile vukaleho vuendi, tala, ali na kumbatiza vantu, kaha vose vali na kuya kuli ikeye.” 27 Yoano uava kumbuluile nguendi: “Muntu ka hasa kutambula cuma na cimo cahi kuvanga va namu hanaco muilu.” 28 Nenu vavenya munji kelako vukaleho munja handekele nguange, ‘Kati yange Kilistu, vunoni va nanji tumu ku lutue luendi.’ 29 Uose ali na ntsombolua ikeye sandungi. Vunoni nga kavusamba ka sandungi emana ku mukulo uendi mu kumu halakana ue kuivua ndzolela ya kama omo lia kuivua lizi lia sandungi. Ngeci mukemuo, ndzolela yange inapumo. 30 Ikeye na pande ku livuezelela, vunoni yange nja pande ku tepuluka.”
31 Uze atunda muilu ua hiana vakuavo vose. Uze atunda ha mavu ua ha mavu vene, kaha ue kuhandeka via ha mavu. Uze atunda muilu ua hiana vakuavo vose. 32 Ambulula vukaleho vua viuma via na mono na kuivua, vunoni naumo uahi atava vukaleho vuendi. 33 Uze atava vukaleho vuendi na tava nguendi, Njambi uapua ua vusunga.* 34 Muomo uze ya na tumu Njambi ue kuhandeka mezi a Njambi. Muomu Njambi ke kuhana sipilitu na vunkondi.* 35 Tata ua lema Muana kaha na kundika viose mu mavoko endi. 36 Uze atsiliela Muana ali na muono ka ue kuhua, uze kononoka Muana kaka mono muono, vunoni vutenu vua Njambi vukala hali ikeye.