Outubro

Vuno vintsimbu vimo, ce ku mi kaluuila ku ononoka ni? Muangana Ndaviti neni mukemuo mua kele na ku livua. Ngeci ua vundilile kuli Njambi ngueni: “Nji kuatese na cimbembesi ca ku ononoka.” (Visa. 51:12) Ndaviti ua lemene mua kama Yehova. Vutuhu ngoco ca mu kaluuilile ku ononoka. Netu vintsimbu vimo ce ku tu kaluuila ku lingamo. Omo lia vika? Ha katete, muomu ka tua tantulukile kaha tua zendamena ku vupi. Ca mu civali, Satana ue ku tu eseka linga tu seze Yehova ngue mua lingile ikeye. (2 Kol. 11:3) Kaha ca mu citatu, va tu zengeleka ku vantu va kala na “cimbembesi cize ci na ku panga mu vana va lisino.” (Efe. 2:2) Ngeci mukemuo, tua pande ku lihakela kapandi ka kama ka ku viana eci cimbembesi ce ku tu tuala ku vupi, na ku viana ntsindiye ya ku muesa lisino ye ku tundilila kuli Satana na mavu eni. Kaha tu hasa ku lingamo, mu ku ononoka Yehova na vaze va kala na mpoko hali yetu. w23.10 6 ¶1

Vika tu lilongesa ku cikomoueso ca Yesu ca himpuile mema ku pua viniu? Tu lilongesaho ku likehesa. Yesu ka lipambele omo lia ku linga cikomoueso caco kaha cipue vene mua puisilemo viuma vieka, na limo litangua liahi ua lipambele. Vunoni ntsimbu yose ua likehesele na ku hana vumpahu vuose kuli Ise. (Yoa. 5:​19, 30; 8:28) Netu tu hasa ku tambuluisa lungano lua Yesu, mu ku viana ku lipamba ku tuala ha viuma vi tue ku puisamo. Vunoni omo lia Njambi yetu ua ku komouesa u tue ku pangela. (Yele. 9:​23, 24) Tua pande ku sangala Ikeye, muomu ikeye ua fuila ku ci tambula. Muomu na vimo viahi vi tu hasa ku puisamo ca ku hona vukuasi vua Yehova. (1 Kol. 1:​26-31) Ku likehesa ce ku tu kuasa linga kati tu lipambe omo lia ku kuasa vakuetu, vunoni tue ku viukilila mu ku tantekeya ngecize Yehova ue ku mona vi tue ku linga kaha ua vi haka seho. (Setekesenu na Mateo 6:​2-4; VaHe. 13:16) Mua vusunga, tue kuya Yehova ku mutima mu tue ku tambuluisa ku likehesa ca Yesu.—1 Pet. 5:6. w23.04 4 ¶9; 5 ¶11-12

Kapostolo Paulu va mu huiminine ku kaniamesa Vakua Kilistu, linga va pue na ku tuameka ku lutue vizango via vakuavo. Vati tu hasa ku kava eci citume mu ntsimbu ya ciuano? Mu ku vuluka ngecize ngeci muetu, vakuetu navo va tonda ku kumbulula. Tu hilenuho mu njila eyi. Nga muli na ku simutuila na vavusamba venu, vuno mu ka handeka mua kama mu cifua ca ku linga ka mu ka hana honi vakuenu vukovelelo vua ku handeka ni? Houe ka mu ka lingimo. Muomu mu tonda navo va kale na mutamba mu ku simutuila cenu. Na vuno vene, ku viuano tue ku tonda vakuetu vavengi linga navo va kumbulule. Kaha imo njila ya cili cikuma i tu hasa ku kaniameselamo vamuanetu na vandumbuetu, ya pua mu ku va hana vukovelelo vua ku muesa lutsilielo luavo ku hitila mu vikumbululo. (1 Koli. 10:24) Ku kehesa ku vikumbululo vietu ci hana ntsimbu ku vakuetu vavengi ku kumbulula. Kaha ambe nga mu hana cikumbululo ca cihi, kati mu handeke ha vintsina via vingi cikuma. Muomu nga mu handeka ha vintsina viose vili ha cinanga, vakuenu ka va ka kala na vimo viahi via ku handekaho. w23.04 22-23 ¶11-13

Tua pande ku vuluka ngecize ca pua ca seho ya kama, ku tualelelaho ku kuasa vakuetu mu cipanga ca ku ambulula. Nga tuli mu ku ambulula tua pande ku pua va ku votsika. Muomu tue ku liuana na vantu va tsiliela viuma via ku liseza-seza kaha naua visemua viavo na cifua ci ve ku singaniekelamo ca liseza-seza. Kapostolo Paulu ua litombuesele. Kaha netu tu hasa ku mu tambuluisa. Yesu ua hanguile Paulu ku pua “kapostolo ua vakua vifuti.” (Loma 11:13) Mu ku puisamo cipanga caco, Paulu ua pandele ku ambuluila vaYundeya, vaNgelengu, vakua mana, vandimi, vamiata na vamiangana. Kaha linga a hase ku heta ku mitima ya vantu va ku liseza-seza ngeci, ca tondekele a “litombuese ku vantu vose.” (1 Kol. 9:​19-22) Ua kele na ku tuala mana ku cisemua, muyati na viuma vi va tsilielele vantu va kele na ku ambuluila kaha ua litombuesele navo kuliya novio. Netu tu hasa ku puisamo via vingi mu ku ambulula cetu, nga tu tonda vinjila via ku litombueselamo ku vantu va tue ku ambuluila. w23.07 23 ¶11-12

Ku konkama ka ca puile ku zeya. Kaha ca tondeka ku lihakela kapandi ka kama cikuma-kuma nga tuli na ku hita mu visoti. Cikuavo naua, ku konkama ca pua mutamba ua “muhako ua sipilitu.” (Ngal. 5:​22, 23) Lizi “ku konkama” mu ciNgelengu va kele na ku lipangesa mu handeka via tuvalu va mu musenge nga va vononouesa na ku va pita. Vutuhu kasitu uaco ononoka na ku tava ku mu pita, vunoni kasi na ndzili yeni. Kaha etu co, vati tu hasa ku pua va ku konkama na ku kaniama ha ntsimbu imo lika? Mu ku linga ku ndzili yetu ka tu hasa, ngeci mukemuo, tua pande ku tualelelaho ku vundila sipilitu santu i tu kuase ku kala na cifua caco. Mizimbu ya ingi ya muesa ngecize netu tu hasa ku pua va ku konkama. Cingi ca vamuanetu ve ku muesa ku konkama ambe nga va na va sangumuna. Kaha eci ce ku seza vukaleho vua cili ku vantu.—2 Tim. 2:​24, 25. w23.09 15 ¶3

Mu cimo cimona ca ku lifuila, kapostolo Yoano ua muene vakuluntu 24, va li na ku sangaziala Yehova muilu. Va sangazialele Njambi nguavo, Ikeye ua fuila “ku tambula ku-sangaziala na kasingimiko na ngolo.” (Ku-So. 4:​10, 11) Tungelo va ku ononoka, navo va kala na vusunga vua vuingi vue ku va lingisa ku sangaziala Yehova. Va kala muilu hamo lika neni kaha va mu tantekeya vuino-vuino. Ve ku mona vifua vieni via cili vili solola mu viose vie ku linga. Ngeci mukemuo, mu ve ku mona viuma vie ku linga Yehova, ve ku ivua cizango ca ku mu sangaziala. (Yombi 38:​4-7) Tua pande naua ku vueza visangala mu vivundilo vietu kuli Yehova. Tu hasa ku mu sangala mu ku mu leka ngecize tua mu lema na ku tumbula vifua vikuavo via tu lingisa ku mu komoka. Omo mu tanda na ku lilongesa Mbimbiliya, lihakelenu kapandi ka ku seteka ku nongonona vifua vie ku muesa Yehova cikuma-kuma vize vi mua lema mua kama. (Yombi 37:23; Loma 11:33) Kaha mu vivundilo vienu, mu lekenu vati mue ku livua ku tuala ha vifua viaco. Tu hasa naua ku sangaziala Yehova, omo lia ku tu kuasa na ku kuasa vusoko vuetu vuose vua mu lutsilielo.—1 Sam. 2:​1, 2. w23.05 3-4 ¶6-7

Mu 1919, Mbambilone ya kama ni nguetu civunga cose ca malombelo a makuli, ka ca hasele naua ku saleka mavoko aco ha vangamba va Njambi. Mu muaka uaco, Yesu ua tumbikile “mukuamanda ua cili mukua mana” ha ntsimbu mpundu i va putukile ku tambula vantu vakua mitima ya cili, linga vendele mu “Njila ya ku Lela.” (Mat. 24:​45-47; Isa. 35:8) Kaha omo lia cipanga ca cili ci va lingile vaze va pangelele mu njila ya mu lutsilielo ku miaka ya ku nima, vose va kele na endela mu tapalo yaco, va hasele ku lilongesa via vingi ku tuala ha vutumbe vua Yehova. Kaha va hasele naua ku tombuesa miono yavo na vitume via Yehova. (Visi. 4:18) Yehova ka lavelele vangamba veni va alulule viuma viose mu ntsimbu imo. Vunoni ue ku va sungamesa kamandende-kamandende! Mua vusunga, tangua tu kevua ndzolela ya kama, omo tu ka hasa kuya Njambi yetu ku mutima mu viose vi tu ka linga. Nkala tapalo ya tondeka ku i viukisa ntsimbu yose. Tunde mu 1919, cipanga ca ku viukisa “Tapalo ya ku Lela” ce ku tualelelaho linga vantu vavengi va li na ku tunda mu Mbambilone ya Kama, va hase ku endelamo. w23.05 17 ¶15; 19 ¶16

Vakua Civunga ca Vantuamena ve ku longesa vakuasi vavo va ku vindzango via ku liseza-seza. Vamuanetu vaco, ve ku puisamo viteli via vingi mu lukungulukilo. Kaha va liviukisila ku tualelelaho ku niunga vampanga va Kilistu. Ku lemesa ca vusunga ci ka tualelelaho ha mavu, ambe omo Vakua Kilistu va ku vuavesa va ku manusuila va kaya muilu, mu hiehi na ku ntsongo ya lamba ya kama. Vangamba va Yehova ka va ka likela ku mu lemesa na mutima uose. Tu tantekeya ngecize ha ntsimbu yaco, civunga ca vifuti, ni nguetu Ngonge ya Mangonge ci ka luisa vangamba va Njambi. (Ezek. 38:​18-20) Vunoni ku luisa caco ka ci ka lingisa vangamba va Njambi ku likela ku mu lemesa, muomu Yehova a ka va niunga! Mu cimo cimona, kapostolo Yoano ua muene “civunga ca kama” ca vampanga veka va Kilistu. Kaha va mu lekele nguavo civunga caco ca “fumine ku lamba ize ya kama.” (Ku-So. 7:​9, 14) Ngeci mukemuo, tuli na vusunga nguetu Yehova a ka vohiela! w24.02 5-6 ¶13-14

Vati honi tu hasa ku linga mangana tu tambule sipilitu santu? Tua pande ku i vundila, ku lilongesa Lizi Lieni kaha na ku likata na lukungulukilo lu ve ku tuamenena na sipilitu. Ku lingamo ci ka tu kuasa ku pangela ha “muhako ua sipilitu.” (Ngal. 5:​22, 23) Njambi ue ku hana sipilitu santu yeni, kuli vaze ve ku lihakela kapandi ka ku kala na visinganieka na vilinga via ku lela. Ngeci mukemuo, Njambi a ka likela ku tu hana sipilitu santu yeni nga tu tualelelaho ku singanieka via ku vihia na ku vi linga. (1 Tes. 4:​7, 8) Linga tu tualeleho ku tambula sipilitu santu ka tua pandele ku yengula via “vupolofeto.” (1 Tes. 5:20) Lizi “vupolofeto” li va tumbula ha cinimbu eci, liemanena mizimbu ye ku tu hana Njambi ku hitila mu sipilitu santu yeni ngeci mua ize ya handeka via litangua lia Yehova na vuasi-vuasi vua ntsimbu i tuli na ku yoyelamo. Ka tua pandele ku nakuila litangua liaco ku laako na ku singanieka ngecize Alemangendo ka i keza mu ntsimbu ya muono uetu. Vunoni tua pande ku lihakela kapandi ka ku kala na vilinga via ku lela kaha na ku tualelelaho ku fuitangana “mu ku lemesa Njambi,”— 2 Pet. 3:​11, 12. w23.06 12 ¶13-14

Vati tua pande ku linga nga cimo cikupulo ca vuntselentsele ci soloka ha likina lietu? Tua pande ku ci tina mu vuasi-vuasi. Kaha vi hasa ku tu kuasa ku lingamo, via pua ku vuluka ngecize vusamba vuetu na Yehova cikeco cuma ca seho ya kama ci tua kala naco. Ku handeka vusunga, cingi ca vikupulo vi ve ku singanieka vantu nguavo ka via puile mpundu via vuntselentsele, kasi vi hasa ku sangumuna masungu. Ngeci mukemuo, tua pande ku vi viana muomu ka tu tondo ku hana cipue vene kacinanga ka kandende ka tuala ku vupangala. (Mat. 5:​28, 29) Muanetu David ua pua mukuluntu ku Tailandia ngueni: “Nje ku lihula nguange, ambe nga cikupulo caco kati ca vuntselentsele cikuma, vuno Yehova a ka viukilila nga nji tualelelaho ku ci tala ni?’ Evi vie ku nji kuasa ku linga cihangula ca mana.” Tu hasa ku pua vakua mana, nga tu lihakela kapandi ka ku kala na liova lia ku vuisa Yehova ku mutima ku vihia. Liova liaco lia pua “vusangumikilo” ni nguetu, luvula lua “mangana.” w23.06 23 ¶12-13

Lizi “hondo yove” halumo likemanena vikungulukilo vietu. Mu lamba ya kama, halumo Yehova a ka tu ohiela ngue mua na kulahesa nga tu ka tualelelaho ku likata na vamuanetu. Ngeci mukemuo, tua pande ku lihakela kapandi mu ntsimbu ino, kati lika ka ku tava vamuanetu na vandumbuetu, vunoni ka ku va lema mpundu. Muomu halumo ku ovoka cetu ci ka hitukila hali evi! “Litangua lia kama lia Yehova” li ka neha visoti ku vantu vose. (Zef. 1:​14, 15) Vangamba va Yehova navo va ka hita mu visoti viaco. Vunoni nga tu liviukisila vuovuno, tu ka hasa ku simpa na ku kuasa vakuetu. Tu ka hasa ku kolesa mu nkala visoti vi ka tu solokela. Kaha omo vamuanetu va ka yanda, tu ka lihakela kapandi ka ku va kuasa mu ku va muesa cikeketima na ku va hana vize via va kambela. Cikuavo naua, tu ka likuata kumo na vamuanetu na vandumbuetu muomu tua lihakela laza kapandi ka ku va lema. Kaha Yehova a ka tu lunguisa na muono ka ue ku hua ua ya-ye mu mavu a aha, muze ka mu ka kala cipue viyovo ni visoti via ku liseza-seza.—Isaya 65:17. w23.07 7 ¶16-17

Mbimbiliya ya lombolola ngecize ku laza, kua kele vamala va lutsilielo kaha va puile va ku kaniama. Vutuhu ngoco, vintsimbu vimo navo va livuile ku zeya. Ca ku muenako, Ndaviti vintsimbu vimo ua livuile ngue “muncinda [ua ku kola] ngo,” vunoni ha vintsimbu vikuavo co, ua “vuile vuoma.” (Visa. 30:7) Kaha Samusoni ua kele na ndzili ya kama omo lia “sipilitu ya Yehova,” vunoni ua tantekeyele ngecize ca ku hona vukuasi vuenu ‘ngolo yeni ye ku fumine,’ kaha ue ku lifuile na muntu uose-ouo. (Vang. 14:​5, 6; 16:17) Ngeci mukemuo, ava vamala kaniamene lika omo lia ngolo i va kele na ku tambula kuli Yehova. Kapostolo Paulu, ua tantekeyele ngecize ua tondekele ngolo ya Yehova. (2 Kol. 12:​9, 10) Ua luile na citanga ca cihindu. (Ngal. 4:​13, 14) Vintsimbu vimo, ua lihakelele kapandi ka ku linga via cili. (Loma 7:​18, 19) Kaha vintsimbu vikuavo co, ua luile na liova lia viuma vie ku mu solokelele. (2 Kol. 1:​8, 9) Vutuhu ngoco, mua livuile ku zeya, hakeho ha livuile ku kaniama. Omo lia vika? Muomu Yehova ua mu hanene ngolo ya tondekele linga hase ku pinda na visoti. w23.10 12 ¶1-2

Vintsimbu vimo nga tu pinda na visinganieka via ku livua vungoco, tu hasa ku vuluka ngecize Yehova ikeye ua tu koka. (Yoa. 6:44) Ue ku mona vifua vietu via cili vize ka tue ku mona. Kaha a tu tantekeya vuino ku hiana etu vavene. (2 Miz. 6:30) Ngeci mukemuo, tu hasa ku mu tsiliela nga a tu leka ngueni, tua mu ya ku mutima. (1 Yoa. 3:​19, 20) Ntsimbu kanda tu lilongese vusunga, cingi cetu tua lingile viuma vie ku tu lingisa ku livua mulonga na lelo lino. (1 Pet. 4:3) Ambe Vakua Kilistu va kuhia, navo ve ku pinda na vitanga viaco. Amba enu co? Vuno vintsimbu vimo mue ku livua nguenu Yehova ka ka miecelani? Nga mukemuo, tantekeyenu ngecize kati yenu lika mue ku livuamo. Vangamba va Yehova va ku laza navo va pindile na visinganieka viaco. Ca ku muenako, kapostolo Paulu ua vuile vungoco mua singaniekele visevuka via lingile. (Loma 7:24) Mua vusunga, Paulu ualulukile na ku mu mbatiza. Vunoni kasi ua limuene ku pua “ua mundendende ha kati ka vapostolo” kaha ua “hiana” ku vupi.—1 Kol. 15:9; 1 Tim. 1:15. w24.03 27 ¶5-6

Ku cihangula ca ku vihia ca Muangana Yoase, tu lilongesako ngecize tua pande ku hangula vavusamba vaze va tu kuasa ku linga via cili, kaha va lema Yehova na ku tonda ku muya ku mutima. Vunoni ka ca tondekele ku likuata lika vusamba na vakua citso cetu. Vulukenu ngecize Yoase ua likuatele vusamba na Yehoyanda, uze ua puile mukuluntu kuli ikeye. Ku tuala ha vavusamba venu, lihulenu nguenu: ‘Vuno ve ku nji kuasa ku kaniamesa lutsilielo luange muli Yehova ni? Ve ku nji kaniamesa ku yoya muaya vitume vieni ni? Ve ku handeka via Yehova na vilongesa vieni neni? Ve ku singimika vitue vieni ni? Vuno ve ku nji leka lika vize vi nji tonda, ni va kala na ku simpa ca ku nji sungamesa nga nja sevuka?’ (Visi. 27:​5, 6, 17) Ku handeka vusunga, nga vavusamba venu ka va lemene Yehova, kaha vaali? Vunoni nga va mu lema, kaha kati mu va mbile kuti, muomu va mi kuasa.—Visi. 13:20. w23.09 9-10 ¶6-7

Lizi Alefa, a pua masona a katete mu ciNgelengu kaha Omenga co, masona a ku manusuila. Mu ku pangesa aa mezi “Alefa na Omenga,” Yehova ue ku tu kuasa ku ivuisisa ngecize nga na putuka ku linga vimo, a ka tualelelaho noho ha ka vipuisilamo.Mu nima ya Yehova ku tanga Andama na Eva, ua va lekele ngueni: “Semenu, na ku lilanesa, kaha sulisenu mavu naua, na ku a ononuesa.” (Njen. 1:28) Tunde ha ntsimbu yaco eyi, Yehova ua lipuisile “Alefa.” Ni nguetu, Yehova a solola vutumbe vua ku tanga viuma viose via ku tantuluka, ku puisa Andama na Eva na mbuto yeni va ku tantuluka na ku puisa mavu citungu. Ku lutue, Yehova tangua a ka lipuisa “Omenga,” omo a ka puisamo vikulaheso vieni viose. Mu nima ya Yehova ku tanga viuma viose ua handekele ngueni “melu na mavu a huile na civunga cao cose. Mu ku handeka evi, ua tu hanene cimo cikulaheso via lomboloka ngecize vutumbe vua Yehova ku tuala ha vantu na mavu vu ka lipuisamo mpundu ku tsongo ya litangua 7.—Njen. 2:​1-3. w23.11 5 ¶13-14

Vungendzi vua ku tunda ku Mbambilone kuya ku Isaleli, ua puile ua ukalu kaha vue ku ambatele vingonde viuana. Vunoni Yehova ua va kulahesele ngecize vioua viose via solokele ngue vi ka tanganesa vungendzi vuaco, a ka vi tundisako. Vivezikiso via ku hiluka ku Isaleli, via hianene nkala visoti vi ve ku liuanene navio mu ku hilukamo. Civezikiso ca kama, ca likuatele na ku lemesa cavo. Vunoni ka mua kele na imo tembele ya Yehova mu Mbambilone. Kaha ka mua kele naua mutula u ve ku pangesele vaIsaleli mu ku hana vikombelo vi va tumbuile mu masiko a Mosesa. Kaha ka kua kele civunga ca sasendote, ci va viukisile mu ku hana-hana vikombelo viaco. Cikuavo naua, vangamba va Yehova va puile va vandende mu ku va setekesa na vamala na vampuevo ka va kele na ku pangela Yehova ni ku singimika vitume vieni. Ngeci mukemuo, makulukazi a vaYundeya va kele na ku lavelela na mutima uose ku hiluka ku cifuti cavo linga va ka tungulule ku lemesa ca ku lela. w23.05 14-15 ¶3-4

Tua tondeka vukuasi vua sipilitu santu ya Njambi, linga tu tualeleleho ‘kuenda ngue vana va ceke.’ Omo lia vika? Muomu mavu ano a sula na vilinga via mazilo. Omo liaco, ka ce ku pua ca casi ku tualelelaho ku pua va ku lela. (1 Tes. 4:​3-5, 7, 8) Sipilitu santu, i hasa ku tu kuasa ku vula visinganieka via mavu, vize ka vie ku litombola na visinganieka via Njambi. Kaha sipilitu santu ye ku tu kuasa naua ku kala na “vuhuanga vuose, na vuviuke.” (Efe. 5:9) Tu hasa ku vundila sipilitu santu. Yesu nguendi Yehova ue ‘ku hana sipilitu santu kuli vaze ve ku mu vundila.’ (Luka 11:13) Kaha tue ku tambula naua sipilitu santu, mu tue ku sangaziala Yehova ku viuano. (Efe. 5:​19, 20) Ngeci mukemuo, na vukuasi vua sipilitu ya Njambi tue ku hasa ku yoya mu cifua ce ku mu vuisa ndzolela. w24.03 23-24 ¶13-15

Mu tondeka cikuma ntsintsa ni? Nga mukemuo, vundilenu Yehova a mi kuase ku kala nayo. Ntsintsa ya pua mutamba ua muhako ua sipilitu. (Ngal. 5:​22, 23) Ngeci mukemuo, tu hasa ku vundila Yehova linga a tu kuase na sipilitu santu yeni, tu muese ntsintsa. Nga co tu hita mu citanga ci keseka ntsintsa yetu, tu ka “tualelelaho ku vundila” sipilitu santu i tu kuase ku pua vakua ntsintsa. (Luka 11:13) Cikuavo naua tu hasa ku vundila kuli Yehova a tu kuase ku mona viuma mu cifua ce ku vi muenamo. Kaha mu nima ya ku vundila, tua pande ku lingako mutamba uetu mu ku muesa ntsintsa nkala litangua. Omo tu tualelelaho ku muesa ntsintsa na ku vundila kapandi ka ku i muesa, nayo i ka livuezelela mu mutima uetu na ku pua mutamba ua vuntu vuetu. Ye ku kuasa naua ku hilula ha malungano a mu Mbimbiliya. Mu Mbimbiliya mua kala malungano a vantu vavengi va muesele ntsintsa. Mu ku hilula ha mizimbu yavo, tu hasa ku lilongesa vinjila via ku mueselamo eci cifua. w23.08 22 ¶10-11

Yesu ua kulahesele Kapostolo Petulu ngecize Yehova ue ku mu kuasele. Kaha mu nima ya cikomoueso, ua kuasele Petulu na vapostolo vakuavo ku kuata vantsi va vengi. (Yoa. 21:​4-6) Cikomueso caco ca hele vusunga kuli Petulu ngecize Yehova a ka va hana viose vi ka va kambela ku muvila. Cikuavo naua, Petulu ua vulukile mezi a handekele Yesu ngecize vose vaze va “lengeya vuangana ha katete,” Yehova a ka va hana via va kambela. (Mat. 6:33) Kaha viose evi, via kuasele Petulu ku tuameka cipanga ceni ca ku ambulula ku hiana mingoso ya vantsi. Na ku simpa cose, Petulu ua kuasele makulukazi a vantu ku tava muzimbu ua cili ha litangua lia Pentekosta ya 33 T.K.N. (Vili. 2:​14, 37-41) Kaha mu nima ya ntsimbu, ua kuasele naua vakua Samaliya ku lilongesa via vingi ku tuala hali Kilistu. (Vili. 8:​14-17; 10:​44-48) Mua vusunga, Yehova ua pangesele Petulu mu njila ya ku komouesa linga a koke vantu va ku liseza-seza veze mu lukungulukilo lua Yehova. w23.09 20 ¶1; 23 ¶11

Kampe mu nima ya miaka ivali, tunde ha va nongesele Yelusalema kuli vakua Mbambilone. Muangana Nevukaneza ua ku Mbambilone, ua kele na cimo cilota ca mu tangele mua kama ca umo kamponia. Ngeci ua handekele ngueni a ka tsiha vose vakua mana veni, hamo lika na Ndaniele, nga ka va mu lomboluela cilota caco. (Ndan. 2:​3-5) Ndaniele ua pandele ku kala na vuasi muomu miono ya vavengi ya hitukilile hali ikeye. Ngeci ‘ua kovelele kuli muangana mu ku mu vundila ntsimbu, linga a ku lombolole cilota caco.’ (Ndan. 2:16) Ku lingamo ca tondekele ku simpa na lutsilielo. Muomu Mbimbiliya ka ya muesele na hamo hahi ngecize Ndaniele ua kele na ku langulula vilota ku nima. Ndaniele ua vundilile vavusamba veni vatatu, “va vundile vikeketima kuli Njambi ua muilu omo lihungu eli.” (Ndan. 2:18) Yehova ua kumbuiluile vivundilo viaco. Na vukuasi Vueni, Ndaniele ua hasele ku langulula cilota ca Nevukaneza. Evi viohielele muono ueni na ua vavusamba veni. w23.08 3 ¶4

Talenu vimo vivezikiso via kala ha ku pua mukua ntsintsa. Nga tu muesa ntsintsa tue ku yoya mu ndzolela na ku lembama. Ce ku tu kuasa naua ku cihindu ca mu visinganieka na ca ku muvila. Kaha ce ku tu kuasa naua ku likuata vusamba vua cili na vakuetu. Cikuavo naua, cikungulukilo ce ku likuata kumo. Nga muntu na tu sangumuka, ku livandeka ku vutenu ce ku lingisa linga cimpande caco kati ci ye ku laako. (Visa. 37:8; Visi. 14:29) Vunoni helu lia viose evi, tua tonda ku tambuluisa Tatetu ua muilu na ku likuata vusamba vua kama neni. Mua vusunga, ntsintsa ya pua cifua ca cili kaha ce ku tu kuya ku mutima. Vutuhu vintsimbu vimo, ce ku pua ca cikalu ku muesa ntsintsa, vunoni na vukuasi vua Yehova tu hasa ku lihakela kapandi ka ku pangela ha cifua caco. Kaha omo tu lavelela mavu a aha na ntsintsa, tu kalenu na vusunga ngecize “liso lia Yehova li li kuli vaze va mu vuila vuoma, kuli vaze va lavelela ku ngozi yeni.” (Visa. 33:18) Ngeci mukemuo, tu vose tu li hakelenu kapandi ka ku tualelelaho ku zala ntsintsa. w23.08 22 ¶7; 25 ¶16-17

Tiango ua tondele ku muesa ngecize yala ua kele na lutsilielo, vunoni lutsilielo luaco ka lua kele na vukaleho. (Tia. 2:​1-5, 9) Tiango ua handekele naua via muntu a mona muanaye a tondeka vukuasi vua ku muvila, ngeci mua vuzalo ni via ku-lia, vunoni ka mu hana vukuasi vuaco. Kaha ambe nga muntu uaco a handeka ngueni ua tsiliela muli Njambi, lutsilielo lueni ka lua kele na luvula ni nguetu vilinga, ngeci mukemuo lua ngoco. (Tia. 2:​14-16) Cikuavo naua, Tiango ua pangesele cimueso ca Lahave ku pua lungano lua cili lua ku muesa lutsilielo mu vilinga. (Tia. 2:​25, 26) Lahave ua vuile via Yehova kaha na ku nongonona ngecize Yehova ua kuasele vaIsaleli. (Yeho. 2:​9-11) Lahave ua muesele lutsilielo ku hitila mu vilinga, mu ku niunga vaIsaleli vavali va ile mu ku ka tala cifuti ca Yeliko, muomu miono yavo ya kele mu vusonde. Omo liaco, ou mpuevo vutuhu ka puile ua ku tantuluka kaha naua kati kaIsaleli, vunoni va mu tumbuile mukua vuviuke ngeci mua Avilahama. Muzimbu ua Lahave, u tu longesa ngecize ca pua ca seho ku muesa lutsilielo ku hitila mu vilinga. w23.12 5-6 ¶12-13

Etu Vakua Kilistu, ka tue ku viukilila lika na vusunga vua helu-helu. Na vukuasi vua sipilitu santu ya Njambi, tua tonda ku lihakela kapandi ka ku ivuisisa vuino “vize via ku lova via Njambi.” (1 Kol. 2:​9, 10) Ngeci mukemuo, ci pua ca cili nga mu putuka ku lilongesa mu ku lova mu cifua cize ci kaniamesa vusamba vuenu na Yehova. Ca ku muenako, mu hasa ku tondesesa vuino ku tuala ha vati Yehova ua muesele cilemo ku vangamba veni va ku laza na vati evi via muesa ngecize neni ua mi lema. Cikuavo naua, mu hasa ku hilula mua vati Yehova ua tumbikile ku lemesa mu Isaleli ya laza na vati ku lemesa caco ca lifua na ca Vakua Kilistu lelo lino. Ni halumo, mu hasa ku lilongesa mu ku lova vupolofeto vua puisilemo Yesu mu muono ueni na mu ku ambulula ceni hano ha mavu. Citava mu pangese Índice das Publicações da Torre de Vigia ni Guia de Pesquisa. Nga mu pangesa vikuata viaco, lutsilielo luenu lu ka kaniama na ku “tantekeya Njambi.”—Visi. 2:​4, 5. w23.10 18-19 ¶3-5

Lizi “cikumakuma” lia pangesele kapostolo Petulu, lia lomboloka “ku tanduvuka.” Mutamba ua mu civali ua cinimbu, ua muesa vuhasi vu ca kala naco cilemo caco ni nguetu ci hsa ku fuika vipi via vamuanetu. Linga vi tu lomboloke vuino, ca pua ngue tu na kuata cilemo na mavoko avali, ngue mu tue ku kuata ntanga. Kaha tu putuka ku i tanduvula, noho i na fuika, kati vumo, cipue vuvali, vunoni “vipi via vingi.” Lizi ku “fuika” liemanena ku ecela. Cilemo ci hasa ku fuika vuzeye na visevuka ngue muze ntanga muye ku fuika vitoma. Cilemo cetu ku vakuetu ca pande ku kaniama mu cifua ca ku linga, tu hasa ku ecela vipenga via vamuanetu, ambe vize vie ku kaluua cikuma ku viecela. (Kolo. 3:13) Mu tue ku ecela vakuetu, tue ku muesa ngecize cilemo cetu ci na kaniama kaha naua, tu tonda kuya Yehova ku mutima. w23.11 11-12 ¶13-15

Mua puisile miaka 26, Muangana Yosiya ua putukile ku tungulula tembele. Mu cipanga caco, va “uanene mukanda ua lisiko lia Yehova lia hele kuli Mosesa.” Mu va mu tandeleleuo, Muangana Yosiya ua vuile cizango ca kama ca ku ononoka vitume via kelemo. (2 Miz. 34:​14, 19-21) Mu tonda ku pua na ku tanda Mbimbiliya ku sua kumo ni? Nga muli na ku lingamo laza, vati ci li na kuenda? Vuno mue ku soneka vinimbu vize vi hasa ku mi kuasa? Yosiya mua puisile miaka 39, ua lingile cisevuka ca mu kokelele ku-tsa. Ua likulahelele ikeye ivene, mu cihela ca ku kulahela muli Yehova. (2 Miz. 35:​20-25) Vika tu lilongesaho? Ambe tu na kolo ni laza tua sua ku lilongesa Mbimbiliya, tua pande ku tualelelaho ku lengeya Yehova. Eci ca ambatesela kumo na ku vundila, ku lilongesa Lizi lieni, na ku halakana vimamuna via vamuanetu va ku hia. Ku lingamo, ci ka tepulula ku visevuka vi tu ka linga, na ku yoya mu ndzolela.—Tia. 1:25. w23.09 12 ¶15-16

Mbimbiliya ya tumbula vampuevo vavengi va lemene Yehova na ku mu pangela. Kaha va puile “vakua ku linga viuma mu ku puisamo” na “vakua cili mu viuma viose.” (1 Tim. 3:11) Kaha naua, mu vikungulukilo mua kala vandumbuetu vavengi va ku hia mu lutsilielo, vaze va fuila ku va tambuluisa. Vahumbe, singaniekenu hali vamo vandumbuetu va ku hia, va mu hasa ku tambuluisa. Kaha talenu vifua via cili vi va kala navio, na ku mona vati mu hasa ku vi tambuluisa. Ku likehesa ca pua cifua ca seho ca tondeka mu ku hia mu lutsilielo. Mpuevo ua ku lihekesa ue ku likuata vusamba vua cili na Yehova kaha na vakuavo. Ca ku muenako, mpuevo ua lema Yehova ue ku tava cifua ca tumbikilamo Yehova mpoko. (1 Kol. 11:3) Yehova ua hangula iya na pande ku tuamenena viuma mu cikungulukilo na mu vusoko. w23.12 18-19 ¶3-5

Yehova ua lavelela ngecize yala na pande ku lema mpueyeni, ku mu niunga, ku mu hana via tondeka ku muvila, mu visinganieka na mu lutsilielo. Ku kala na liano, ku singimika vampuevo, kaha ku pua muntu u va hasa ku kulahela ci ka mi kuasa ku pua yala ua cili. Halumo mu nima ya ku ambata, mu ka pua cisemi. Vika mu hasa ku lilongesa kuli Yehova ku tuala ha ku pua cisemi ua cili? (Efe. 6:4) Yehova ua lekele muaneni Yesu ha toma ngecize ua mu lema kaha ua muya ku mutima. (Mat. 3:17) Nga mua pua cisemi, puenu na ku leka vana venu kusua kumo nguenu mua va lema. Puenu na ku va sangala ku viuma via cili vi ve ku linga. Cisemi ua cili ue ku tambuluisa Yehova, ue ku kuasa vana ku pua Vakua Kilistu va kuhia cipue va vamala ni va vampuevo. Ngeci mukemuo, mu hasa ku liviukisila vuovuno mu ku muesa vusoko vuenu na vamuanetu mu cikungulukilo ngecize mua va lema kaha mua va haka seho.—Yoa. 15:9. w23.12 28-29 ¶17-18

Etu vangamba va Yehova, netu tue ku pinda na visoti na mavezi a ve ku pinda nauo vantu vose ha mavu. Vunoni mu ku vuezelela kuli evi, va hasa naua ku tu luisa kuli vaze va zinda ku lemesa cetu. Kaha vutuhu Yehova ke ku tu ohiela ku visoti viaco, vunoni ua kulahesa ngecize a ka tu kuasa. (Isaya 41:10) Na vukuasi vueni, tu hasa ku niunga ndzolela yetu, ku linga vihangula via cili kaha na ku tualelelaho ku kakatela kuli Ikeye, ambe nga tu hita mu visoti via ku linga na ha meso vui. Yehova ua kulahesa ku tu hana “ciyulo ca Njambi” ci ya tumbula Mbimbiliya. (Filp. 4:​6, 7) Eci ciyulo, ca pua ku lembama ci tue ku ivua mu mutima na ku simpa ce kuiza omo lia vusamba vuetu na Yehova. Ciyulo caco “ca hiana mana ose” ku hiana muze mu tue ku singanieka. Ca ku muenako, vuno mua vundilileho kuli Yehova oku mua lisosomua kaha mu nima yaco mua vuile ku lembama ni? Cikeco vene “ciyulo ca Njambi” ci mua vuile. w24.01 20 ¶2; 21 ¶4

Vaze va lema Njambi, va tonda ku sangaziala lizina lieni na mutima uavo uose. Muangana Ndaviti ua tantekeyele ngueni ku sangaziala lizina lia Yehova ca pua vene ku sangaziala Yehova mpundu. Nga tuivua lizina lia Yehova, tue ku vuluka lutsimo na vifua vieni, hamo lika na vipanga vieni via ku komouesa. Ndaviti ua muene lizina lia Yehova ku pua lia ku lela, kaha na ku lisangaziala. Ua tondele ku lingamo na “viose” via kele navio, ni nguetu, na mutima ueni uose. Na vuno vene, vaLevi navo va tuamekele ku sangaziala Yehova. Na ku likehesa cose, va litavelele nguavo, ka va kele na mezi a ku sangaziala lizina lia Yehova ngue mu ca pande. (Neh. 9:5) Mua vusunga, ku likehesa cavo ca vuisile Yehova ndzolela. w24.02 9 ¶6

Yehova ka ka mi mono ku pua mukua ku zeya, muomu ka mua puisilemo cimo cizango ka cesi ku ndzili yenu. (2 Kol. 8:12) Lilongeselenu vimo ku visevuka vienu. Kati mu suve vi mu na puisamo laza. Mbimbiliya nguayo: “Njambi kati mukua vuhenge linga a suve vipanga vienu.” (VaHe. 6:10) Ngeci mukemuo, nenu ka mua pandele ku vi suva. Singaniekenu ha viuma vi mua puisamo laza—ambe nga ku likuata vusamba na Yehova, ku ambulula ni ku mi Mbatiza. Ngue muze vene mu mua kolele mu lutsilielo na ku puisamo vizango via ku nima, kasi mu hasa ku tualelelaho ku kola linga mu puisemo cizango ci mu na lihakela mu ntsimbu ino. Na vukuasi vua Yehova mu hasa ku puisamo cizango cenu. Omo mu tualelelaho ku puisamo cizango cenu ca mu lutsilielo, kati mu suve vukuasi na vivezikiso vie ku mi hana Yehova mu vungendzi. (2 Kol. 4:7) Mua vusunga, nga ka mu hilukila mu nima, mu ka tambula vivezikiso via kama ku tuvakana na vize vi mue ku tambula mu ntsimbu ino.—Ngal. 6:9. w23.05 31 ¶16-18

Yehova ue ku muesa ngecize ua lema vangamba veni, kaha ve ku muya ku mutima. Mbimbiliya ya muesa ngecize, Yehova ua lekele Yesu ngueni ua mu lema, kaha ue ku muya ku mutima. (Mat. 3:17; 17:5) Nenu mu tonda Yehova a mi leke ngueni mue ku muya ku mutima ni? Yehova ke ku handeka netu ku fuminina muilu, vunoni ue ku lingamo ku hitila mu Mbimbiliya. Tu hasa ku kuivua Yehova a tu leka ngueni tue ku muya ku mutima, nga tu tanda via lekele Yesu ku vandongesi veni. Muomu ca pua vene ngue Yehova ali na ku tu leka mezi aco. Yesu ua tambuluisile vuntu vua Ise. Ngeci mukemuo, mu tue ku tanda vati Yesu ua muesele ngecize vandongesi veni va mu ile ku mutima, tu hasa ku singanieka ngue Yehova mpundu ali na ku tu leka mezi aco. (Yoa. 15:​9, 15) Ku hita mu visoti, ka ca lombolokele ngecize ka tuesi na kuya Njambi ku mutima. Vunoni, visoti vie ku tu hana vukovelelo vua ku muesa ngecize tua lema Yehova na ku mu kulahela.—Tia. 1:12. w24.03 28 ¶10-11