Vintsina via Mukanda ua Viuano via Muono Uetu Vakua Kilistu na Vipanga Vietu
4-10 YA NOVEMBRO
VUPITE VUA MU LIZI LIA NJAMBI | 1 YOANO 1-5
“Kati mu Leme Mavu Cipue Viuma vi li ha Mavu”
(1 Yoano 2:15, 16) Kati mu leme mavu cipue viuma vi li ha mavu. Nga umosi a lema mavu, cilemo ca Tata muli ikeye cahimo. 16 Muomu viose vi li ha mavu, lisungu lia ntsitu, na lisungu lia meso, na ku-lihalesa ca muono, vikevio kati via Tata, vunoni via ha mavu.
w05 1/1 10 ¶13
Tu Kavenu Lungano lua Sile Yesu
13 Vamo halumo va hasa ku handeka nguavo kati viose via ha mavu via pua via ku pihia. Cipue ngoco, ano mavu na viuma via kalamo vi hasa ku tu tangula ku pangela Yehova. Kaha viuma viaco ka vie ku tu kuasa tu suena kuli Njambi. Ngeci mukemuo, nga tu lema viuma via ha mavu cipue nga kati via ku pihia, tu ka likokela vusonde. (1 Timoteo 6:9, 10) Cikuavo naua, cingi ca viuma via ha mavu via pua via ku pihia kaha vi hasa ku tu lingisa tu likele ku pua vakua vusunga. Nga tu tala viprograma via ha TV vize vie ku muesa luozi, cilemo ca vupite, ni vupangala, viuma viaco vi hasa ku tu lingisa tu vi tave kaha vi ka tu puila ceseko. Kaha nga tu likata na vantu vaze ve ku lisosomua lika via muono uavo ni via mingoso, netu vene tu ka putuka ku lema viuma viaco na ku vi haka seho.—Mateo 6:24; 1 Kolintu 15:33.
(1 Yoano 2:17) Kaha mavu a hita na lisungu liao: vunoni ou ue ku linga-linga cizango ca Njambi a kala-kala ntsimbu yose ya ya-ye.
w13 15/8 27 ¶18
Hilulenu Vuntu vu mua Pande ku Kala Navuo
18 Cuma cikuavo ci hasa ku tu kuasa ku viana “viuma vi li ha mavu” ca pua ku hilula mezi a va huiminine Yoano: “Mavu a hita na lisungu liao: vunoni ou ue ku linga-linga cizango ca Njambi a kala-kala ntsimbu yose ya ya-ye.” (1 Yoano 2:17) Mavu a Satana eku soloka ngue a cili kaha eku soloka naua ngue a ka kalako miaka yoye, vunoni tangua a ka nonga. Mua vusunga, viahi via mu mavu a Satana vi ka kalako miaka yose. Ku vuluka vusunga vuaco, ci tu kuasa ku lihenga ku miheto ya Satana.
Ku Hinda Vupite vua mu Lutsilielo
(1 Yoano 2:7, 8) Vakua cilemo cange, ka nji ku mi sonekela lizi lia lisiko lia liha, vunoni lizi lia lisiko lia laza, li mua kele nalio fume ha katete: lisiko lia laza likelio lizi olio li mua vuile. 8 Naua nji mi sonekela lizi lia lisiko lia liha, likelio vusunga muli ikeye na muli enu; muomu milima i li na ku hita, na mutuna ua cili u na tu laza.
w13 15/9 10 ¶14
Vimamuna vie ku tu Hana Yehova via Kala na Seho
14 Visoneka via ciNgelengu vie ku tu mamuna cikuma tu lileme umo na mukuavo. Yesu ngueni lisiko lia mu civali ku hiana akuavo lia pua: “lema mukuenu ngue ove ivene.” (Mat. 22:39) Kaha na ntsongo ya Yesu Tiango ua tumbuile cilemo ngueni “lisiko lia vuangana.” (Tia. 2:8) Kapostolo Yoano ua sonekele ngueni: “Vakua cilemo cange, ka nji ku mi sonekela lizi lia lisiko lia liha, vunoni lizi lia lisiko lia laza, li mua kele nalio fume ha katete.” (1 Yoano 2:7, 8) Vika Yoano ua kele na ku handeka mua tumbuile mezi “lisiko lia laza”? Ua handekele via lisiko lia ku lema vakuetu. Kaha lisiko liaco lia puile “lia laza” muomu Yesu ua li hele laza “fume ha katete.” Vunoni lia puile naua “lia liha” muomu vandongesi veni ve ku tondekele ku kala na cilemo ca ku lihana linga va hase ku lua na viuma vie ku solokele ku lutue. Mu ku pua vandongesi va Kilistu, mua vusunga tua haka seho ku vimamuna vie ku tu kuasa ku lihenga ku cimbembesi ca mavu, cize ci hasa ku tu tangula ku lema vakuetu.
(1 Yoano 5:16, 17) Umo nga a mona muanaye a li na ku linga vupi vukevuo kati vua ku-tsa, ikeye a ka mu vundililako kaha Njambi a ka mu hanena muono ku li vaze va linga vupi vukevuo kati vua ku-tsa. Ku vu li vupi vua ku-tsa: kati via vukevuo vu nji ku handeka, nguange a mu vundilileko cahi. 17 Vuhenge vuose vukevuo vupi: kaha ku vu li vupi vukevuo kati vua ku-tsa.
it-3 243 ¶6
Ku Ecela
Ca pua ca cili ku vundila linga Njambi a konekele vipi via vakuetu, ambe vene cikungulukilo cose. Mosesa ua lingilemo ku tuala ha cifuti ca Isaleli, mu ku litavela vupi vua vaIsaleli na ku lomba ku konekela, kaha Yehova ua mu halakanene. (Num. 14:19, 20) Cikuavo naua, ha ntsimbu i va kundikile tembele, Solomone neni ua vundilile Yehova linga a konekele vipi via vangamba veni na ku va kuasa va vi seze. (1 Vam. 8:30, 33-40, 46-52) Ezela neni ua litavelele ku mbunga vipi via vaYundeya vaze va hilukile ku cifuti cavo. Civundilo ceni ca ku tundilila ku mutima kaha na cimamuna ceni via lingisile vantu ku tonda ku konekela ca Yehova. (Ezela 9:13–10:4, 10-19, 44) Tiango ua mamuine vakua ku zeya mu lutsilielo va tonde vakuluntu mu cikungulukilo linga va mu vundilile, kaha ‘nga va lingi vipi, va ka vecelavio.’ (Tia. 5:14-16) Vutuhu ngoco, kua kala “vupi vua ku-tsa,” vua pua ku vulumuina sipilitu santu, kaha vua pua vupi ka citava ku vu konekela. Kaha Mukua Kilistu ka pandele ku kundika mu vivundilo vaze ve ku linga vupi vuaco.—1 Yoa. 5:16; Mat. 12:31; VaHe. 10:26, 27; talenu ESPÍRITO; PECADO.
Ku Tanda Mbimbiliya
(1 Yoano 1:1–2:6) Cize ca kele fume ha katete, ci tu nevu, ci tu na mono na meso etu, ci tu na tale, na mavoko etu a na kuatako, ca Lizi lia muono; 2 (kaha muono ua solokele, netu tu na u mono, kaha tu li na ku ambulula vukaleho, na ku mi zimbuila muono ou ka ue ku hua ua ya-ye, uze ua kele kuli Tata kaha ua solokele kuli etu); 3 cize ci tu na mono na ku ivua, cikeco ci tu mi ambuluila, linga enu naua mu likate netu: cili, ku-likata cetu ci li hamo na Tata na hamo na Muaneni Yesu Kilitu: 4 nevi vi tu ku soneka, linga ndzolela yetu i ka sule. 5 Nolu lukeluo luhande lu tu nevu kuli ikeye vene, kaha tu lu ambulula kuli enu nguetu, Njambi ikeye mutana, kaha muli ikeye ka muesi milima na imo yahi. 6 Nga tu handeka, nguetu tua likate neni, kaha tu endela mu milima, tu ku handeka makuli, ka tu ku linga vusunga: 7 vunoni nga tu endela mu mutana, ngue omo ikeye a li mu mutana, tu li na ku likata umo na mukavo, na maninga a Yesu Muaneni a tu vukisa ku vipi viose. 8 Nga tu handeka, nguetu ka tuesi na vupi, tu ku lionga etu vavene, na vusunga vuahimo muli etu. 9 Nga tu litavela vipi vietu, ikeye mukua cili na mukua vuviuke mu ku tu ecela ku vipi vietu, na ku tu vukisa ku vuhenge vuose. 10 Nga tu handeka, nguetu ka tua lingile vipi, tu na mu puisa mukua makuli, na lizi lieni liahimo muli etu.
2 Vana vange va vandende, nji mi sonekela viuma evi linga kati mu linge vupi. Kaha nga umosi a linga vupi, tu li na Lihako kuli Tata, ikeye Yesu Kilistu mukua vuviuke: 2 ikeye nkombelo ya maninga ya ku vipi vietu; kati ngue vietu lika, vunoni nevi via vakua mavu vose. 3 Mukemuo tua tantekeya ngecize tua mu tantekeya, nga tu niunga mezi eni a lisiko. 4 Ou a handeka, ngueni, Nji mu izi, kaha ke ku niunga mezi a lisiko eni, ikeye mukua makuli, kaha muli ikeye vusunga vuahimo, 5 vunoni uose ue ku niunga lizi lieni, cili vene cilemo ca Njambi ca tantuluka muli ikeye. Hakeho ha tu ku tantekeyela ngecize tu li muli ikeye: 6 ou a handeka, ngueni a kala-kala muli ikeye, na pande ku enda-enda ngue omo ikeye naua uendele.
11-17 YA NOVEMBRO
VUPITE VUA MU LIZI LIA NJAMBI | 2 YOANO 1–YUNDA
“Tua Pande ku Lua tu Tualeleho mu Vusunga”
(Yunda 3) Vakua cilemo cange, mu ku litakamesa cikumakuma ku mi sonekela via vuovoke vuetu, vukevuo vuetu tu va vose, nja uanene mutima ua ku mi sonekela mu ku mi mamuna linga mu luile cikumkuma ku-tsiliela cize ci va na kundikila lumo kuli vakua ku lela.
w04 15/9 11-12 ¶8-9
“Kolesenuko Muli Muangana”
8 Ka tua kele ku ndzimba ku tuala ha miheto ya Satana, muomu Visoneka via i tumbula. (2 Kolintu 2:11) Hali mukua vuviuke Yombi, Satana ua pangesele miheto ya yingi ngeci mua ku mu manusula vupite vueni, ku tsa ca vana veni, ku mu luisa ku vavusoko, vuvezi, kaha na ku mu vangeya kuli vavusamba veni va makuli. Ngeci Yombi ua vuile vusiua vua kama kaha ua singaniekele ngueni Njambi ua mu mbilile kuti. (Yombi 10:1, 2) Vutuhu halumo kati Satana ue ku koka visoti viaco mpundu, vunoni a hasa ku vi puisa vukovelelo mu ku pindisa Vakua Kilistu vavengi.
9 Ku ntsimbu ino, vusonde vue ku pihisa lutsilielo luetu, vu na livuezelela. Tua yoyela mu mavu eku tuala mana ku vupite kati ku vizango via mu lutsilielo. Vakua mizimbu ve ku lingisa vantu ku singanieka nguavo vupangala vue neha ndzolela. Kaha vavengi va pua “vakua ku lema ku viukilila via ha mavu, na Njambi intsa ka va leme.” (2 Timoteo 3:1-5) Ngeci mukemuo, visinganieka viaco vi hasa ku tu sambukila nga ka tua ‘luilile cikumakuma ku-tsiliela.’—Yunda 3.
Ku Hinda Vupite vua mu Lutsilielo
(Yunda 4) Muomu vantu vamosi va na niondelela ngoco, cihiso eci va va sonekeleleco laza ku ntsekulu, vakevo vakua ku sahula Njambi, kavumbi ka Njambi ve ku ka alulula viuma via vipi, kaha va viana Sukuluetu umo lika ikeye Muangana uetu, Yesu Kilistu.
(Yunda 12) Vantu ava va na pu vioua via mavue ku viuano vienu via via-ku-lia via cilemo omo va lia nenu mumo, vakevo tuniungi va ku lilisa vakevo vavene na vuoma vuahi; maselua ka esi na mema, a ku pekumuka na mahundzi; miti ya ku lalumuka ngue ku ntondue ka yesi na mihako, ya tsa luvali, ya tukuka na mizi;
it-1 62
Viuano via via-ku-lia via Cilemo
Mbimbiliya ka ya tumbuile vati via fuile viuano via via-ku-lia via cilemo, na lungahi va kele na ku vi linga. (Yunda 12) Kaha viuano viaco kati Yesu ua tumine ku vi linga cipue vandongesi veni. Cikuavo naua, ci moneka ngue ka va pandele ku kakateya muntu a linge viuano viaco. Vamo nguavo evi viuano va kele na ku vi linga ku Vakua Kilistu vaze va kele na vupite kaha va kele na ku lania vamuanaye. Va kele na ku lia ku mesa hamo lika na vantsiua, vantuluue, vampite, kaha na vihutu.
it-3 456
Livue
Lizi likuavo lia ciNgelengu spi·lasʹ, ci moneka ngue lia lomboloka mavue aze eku kala kuintsi lia mema. Yunda ua li pangesele mu ku tumbula cimueso ca vamala va kovelele mu cikungulukilo ca Vakua Kilistu na vutumbe vua ku pihia. Ngeci mua mavue eku kala kuintsi lia mema a pua vusonde ku mato, na vuno vene ava vamala va puile vusonde ku vakuavo mu cikungulukilo. Ua handekele via vamala vaco ngueni: “Vantu ava va na pu vioua via mavue ku viuano vienu via via-ku-lia via cilemo omo va lia nenu mumo.”—Yunda 12.
(Yunda 14, 15) Kaha Enoke naua, uze ua puile ua mu citanu na vavali fume kuli Andama, ua zimbuile vupolofeto vua ava, ngueni, Talenu, Muangana neza na makulukazi a engi a veni vakua ku lela, 15 mu ku sompesa vose na ku hisa vose va sahula Njambi omo vilinga viavo viose via ku sahula, vize vi va lingile na ku sahula Njambi, nomo viuma viose via vikalu vakua kasahuntu va vi handeka mu ku amba Njambi.
‘Ua ile Njambi ku Mutima’
Vupolofeto vuka Enoke ua zimbuile? Ua zimbuile ngueni: “Talenu, Muangana [Yehova] neza na makulukazi a engi a veni vakua ku lela, mu ku sompesa vose na ku hisa vose va sahula Njambi omo vilinga viavo viose via ku sahula, vize vi va lingile na ku sahula Njambi, omo viuma viose via vikalu vakua kasahuntu va vi handeka mu ku amba Njmbi.” (Yunda 14, 15) Nga mu tala vuino ha mezi a handekele Enoke a muesa ngue via hitile laza, ngue Njambi na puisilemo vupolofeto vuaco. Cingi ca vupolofeto vua hateleko va vu sonekele mu cifua cimo. Omo lia vika? Muomu kapolofeto ue ku handeka cuma ci ka lipuisamo mpundu, ngeci ue ku soneka mu cifua ci muesa ngue via lipuisamo laza!—Isaya 46:10.
‘Ua ile Njambi ku Mutima’
Lutsilielo lua muesele Enoke lu hasa ku tu lingisa ku lihula nga tue ku mona ano mavu ngue mue ku a muenamo Njambi. Cize ku sompesa ca ambuluile Enoke na ku simpa cose; ca kuata na ku mavu ano ngue mu ca puile ku matangua a Enoke. Mua vusunga Yehova ua nehele Livazi lia kama ku matangua a Noa, mu ku puisamo muzimbu ua ambuluile Enoke. Vunoni cize ku nongesa caco ca pua cimueso ca ku nongesa ca kama ci li mu hiehi. (Mateo 24:38, 39; 2 Petulu 2:4-6) Ngeci mua ku ntsimbu ize, na vuno vene Njambi na tungelo veni va ku lela tangua va ka sompesa mu vuoloke ano mavu eku sahula Njambi. Tu vose tua pande ku hilula ha muzimbu ua Enoke na ku lekako vakuetu. Halumo vusoko vuetu na vavusamba va hasa ku tu yengula. Tu hasa ku livua vulika ntsimbu imo. Vunoni Yehova ka sile Enoke; kaha kali ka seza vangamba veni va vusunga matangua ano!
Ku Tanda Mbimbiliya
(2 Yoano 1-13) Mukuluntu ua mbunga kuli ndona i va na hangula na kuli vana veni, vaze nji va lema mua vusunga; kati ngue yange lika, vunoni na vose vaze va tantekeya vusunga; 2 omo vusunga vuze vu kala-kala muli etu, kaha vu ka kala-kala netu ntsimbu yose ya ya-ye: 3 Kavumbi, cikeketima, ciyulo, vi ka kala netu, via ku fuma kuli Njambi Tata na kuli Yesu Kilistu Muana Tata, mu vusunga na mu cilemo. 4 Nji viukilila cikumakuma omo nji na uana vana vove vamosi va li na ku enda mu vusunga, ngue omo tua tambuile lizi lia lisiko kuli Tata. 5 Kaha vuovuno nji ku lambelela ove, ndona, kati ngue nji ku sonekela lizi lia lisiko lia liha, vunoni lize vene li tua kele nalio fume ha katete, likelio tu lileme umo na mukuavo. 6 Kaha cilemo cikeco eci ngecize tu ana ku enda ngue ku mezi a lisiko eni. Eli likelio lizi lia lisiko, ngue omo mua li ivu fume ha katete linga mu ana ku ende nalio. 7 Muomu vakua ku onga va vengi va na sanduokela ha mavu, vakevo vaze ka va tava ngecize Yesu Kilistu neza na muvila ua ntsitu. Ou ikeye vene mukua ku onga, ikeye antekilistu. 8 Liniungienu, ku tina mu zimbalese viuma vize vi tua lingi, vunoni linga mu tambule cilunguiso ca mutuntu. 9 Uose a tanguka ikeye kesi na Njambi: ou a ka kala-kala mu luhande, ikeye vene a li na Ise na Muana vose vavali. 10 Nga umosi eza kuli enu, kaha ka neha luhande luno, kati mu mu tambule mu zindzivo zienu, kaha kati mu mu sambelele: 11 muomu ou a mu sambelela a lipandakana neni ku vilinga vieni via vipi. 12 Omo nji li na via vingi via ku mi sonekela, ka nji hianga ku vi soneka mu lipapelo na tinda: vunoni nji lavelela ku iza kuli enu, kaha nja ku handeke nenu ku meso enu, linga ndzolela yenu i ka sule. 13 Vana va ndumbuove ua mpuevo uze i va na hangula, va ku hinduisa.
18-24 YA NOVEMBRO
VUPITE VUA MU LIZI LIA NJAMBI | KU-SOLOLA 1-3
“Nja Tantekeya Vilinga Viove”
(Ku-Solola 1:20) lihungu lia zintangantanga zize zitanu na zivali zi ua muene mu livoko liange lia cilio, na zindeya zize zitanu na zivali zia olu. Zintangantanga zize zitanu na zivali zi na pu tungelo va zimbunga zize zitanu na zivali: na zindeya zize zitanu na zivali zi na pu zimbunga zitanu na zivali.
w12 15/10 14 ¶8
Cimbembesi Cika mue ku Solola?
8 Linga tu viane cimbembesi caco, tua pande ku vuluka ngecize Yesu va mu tumbula mu Mbimbiliya ku pua uze ua kala na “zintangantanga zitanu na zivali” ku livoko lieni lia cilio. Kaha “zintangantanga” ziemanena va ku vuavesa na vakuluntu vose mu vikungulukilo. Yesu a hasa ku tuamenena “zintangantanga” muose mua na zange. (Ku-So. 1:16, 20) Vunoni mu ku pua Mutue ua cikungulukilo ca Vakua Kilistu, Yesu ua kala na mpoko ha vakuluntu va cikungulukilo. Kaha nga umo mukuluntu a tondeka ku mu sungamesa, Uze ua kala na ‘meso ngue mulengi ua tuhia’ a ka linga cose mangana ku sungamesa caco va ka ci linge mu cifua na ha ntsimbu Yeni. (Ku-So. 1:14) Ngeci mukemuo, tu singimikenu vaze va va hangula ku sipilitu santu, muomu Paulu ua sonekele ngueni: “Ononokenu kuli vaze va li na ku mi sika, kaha va tavienu: muomu va li na ku vingila miono yenu, ngue vaze va ka hana konda; linga va ci linge na ndzolela, kati na mivindzo: muomu ngecize ka ca mi viukililile.”—VaHe. 13:17.
(Ku-Solola 2:1, 2) Kuli kangelo ua mbunga ya ku Efeso soneka: Viuma evi via li ku handeka uze na kuata zintangantanga zize zitanu na zivali mu livoko lieni lia cilio, uze enda ha kati ka zindeya zize zitanu na zivali zia olu: 2 Nja tantekeya vilinga viove, na ku-fuitangana cove na lukakatela luove, kaha va vapi ka u hasa ku kala navo, kaha ua lohele vaze va litumbula vapostolo vunoni katimo, kaha ua va uanene vakua makuli;
w12 15/4 29 ¶11
Yehova ue ku tu Niunga Linga tu Kovoke
11 Mu cimueso ci va tumbula ku Ku-Solola tupitulu 2 na 3, Yesu Kilistu a hilula vikungulukilo 7 via ku Ásia Menor. Cimona caco ca muesa ngecize, Kilistu ua muene mu vutuntu vi va kele na ku linga. Vintsimbu vimo ua tumbuile vamo ha mazina, ku va sangala muntu ku muntu na ku hana vimamuna. Vika via lomboloka? Ku tuala ha cimona caco, vikungulukilo 7 viemanena Vakua Kilistu va va vuavesele tunde mu 1914, kaha vimamuna vi va hele ku vikungulukilo 7 viemanena vimamuna vi ve ku hana ku vikungulukilo via vangamba va Njambi lelo lino mu mavu ose. Ngeci mukemuo, tu hasa ku kala na vusunga nguetu Yehova ali na ku tuamenena vangamba veni ku hitila muli Muaneni. Vati tu hasa ku uana vukuasi ku ku tuamenena caco?
w01 15/1 20-21 ¶20
Tualelenuho Kuendela Hamo na Lukungulukilo lua Yehova
20 Ku tualelelaho kuendela hamo na lukungulukilo ca tondeka ku tava mpoko ya hele Njambi kuli Yesu Kilistu mu ku pua ‘mutue ua cikungulukilo.’ (Efeso 5:22, 23) Cikuavo naua, ku Isaya 55:4 Yehova ngueni: “Tenu, nji na mu hie ngue mukaleho kuli vantu, mukua ku tuamena na mukua ku sika vantu.” Mua vusunga, Yesu a tantekeya ku tuamenena, kaha a tantekeya naua vampanga veni na viuma vi va tondeka. Ngeci mua hiluile vikungulukilo 7 via ku Ásia Menor, ua handekele lutanu ngueni: “Nja tantekeya vilinga viove.” (Ku-Solola 2:2, 19; 3:1, 8, 15) Cili vene, Yesu a tantekeya vilinga vietu ngeci mua Ise, Yehova. Ntsimbu kanda Yesu a linge Civundilo, ua handekele ngueni: “Isuenu na tantekeya viose vi mua zela, ntsimbu kanda mu mu vundile.”—Mateo 6:8-13.
Ku Hinda Vupite vua mu Lizi lia Njambi
(Ku-Solola 1:7) Talenu, eza na maselua; na meso ose a ka mu mona, na vaze va mu tuvile; na miyati yose ya mavu i ka lila mbimbiamitue omo ikeye. Mukemuo vene, Ame.
kr 226 ¶10
Vuangana vua Njambi vu Nongesa Vitozi Viavuo
10 Ku sompesa. Vitozi vose va Vuangana vua Njambi va ka mona viuma vi ka soloka ku lutue mu ku vueza ku ku vavala cavo. Yesu ngueni: “Va ka mona Muana muntu a ku iza mu maselua na ngolo na vumpahu vua kama.” (Mako 13:26) Kaha evi vi ka muesa ngecize Yesu neza mu ku sompesa. Mutamba ukuavo ua vupolofeto ku tuala ha matangua a ku kotokela, Yesu ua handekele ha ku sompesa ci ka kalako. Kaha via handekele tu hasa ku vi uana ku cisimo ca vampanga na vampembe. (Tandenu Mateo 25:31-33, 46.) Vaze ve ku hakuila Vuangana vua Njambi va ka va sompesa ngue “vampanga,” kaha va ka ‘andula mitue yavo’ na ku nongonona ngecize kuovoka cavo “ci li na ku suena ku hiehi.” (Luka 21:28) Vunoni vakua ku alulukila Vuangana vua Njambi va ka va sompesa ngue “vampembe” kaha va ka “lila mbimbiamutue,” na ku nongonona ngecize kayando ka ke ku hua ka na va vandamena.—Mat. 24:30; Ku-So. 1:7.
(Ku-Solola 2:7) Ou a li na lituitui, evue evi via li ku handeka Sipilitu na zimbunga. Kuli ou a vula, nji ka mu hia ku lia ku muti ua muono, uze u li mu Citungu ca Njambi.
w09 15/1 31 ¶1
Vimpande via Tsimana mu Mukanda ua Ku-Solola—I
2:7—Vika ca pua “citungu ca Njambi”? Mu ku linga aa mezi va a talekesa ku Vakua Kilistu va ku vuavesa, citungu ci va tumbula hano citava cemanena vuangana vua muilu. Kaha va ku vuavesa va ka va lunguisa mu ku lia “ku muti ua muono.” Ni nguetu va ka tambula muono ka ue ku tsa.—1 Kol. 15:53.
Ku Tanda Mbimbiliya
(Ku-Solola 1:1-11) Ku-Solola ca Yesu Kilistu, cize ca mu hele Njambi ku solola ku vakuamanda veni, viuma vize vi na pande ku soloka ku ntsimbu ya indende: kaha ikeye ua tumine hali kangelo keni na ku vi ambulula kuli mukuamanda ueni Yoano; 2 ikeye ua ambuluile vukaleho vua lizi lia Njambi, na vukaleho vua Yesu Kilistu, vua viuma vize via muene. 3 Ua vezika ou a tanda, na vaze vevua mezi a vupolofeto vuze, kaha va niunga vize vi va na sonekamo: muomu ntsimbu i li ku hiehi-hiehi. 4 Yoano ku zimbunga zize zitanu na zivali zi li ku Asia: Kavumbi kuli enu na ciyulo, via uze ua kala kaha ua kele kaha ali ku iza; na via Vimbembesi vatanu na vavali va li ku lutue lua citumamo ceni ca vuangana; 5 na via Yesu Kilistu, ikeye mukaleho mukua cili, ntuatua ua ku vatsi, na mukua ku sika vamiangana va mavu. Kuli uze a tu lema kaha ua tu ecelele ku vipi vietu na maninga eni; 6 kaha ua tu puisile vuangana, ku pua vasasendote kuli Njambi yeni na Ise; kuli ikeye ku kale vumpahu na ngolo ku miaka na miaka ya ya-ye. Ame. 7 Talenu, eza na maselua; na meso ose a ka mu mona, na vaze va mu tuvile; na miyati yose ya mavu i ka lila mbimbiamitue omo ikeye. Mukemuo vene, Ame. 8 Yange nji Alefa na Omenga, ngueni Muangana Njambi, uze ua kala kaha ua kele kaha a li ku iza, Mukua Ngolo Yose. 9 Yange Yoano, muanokuenu, mukua ku tambula hamo nenu ku lamba na vuangana na lukakatela vi li muli Yesu, nja kele ku nkundu ya Patemose, omo lizi lia Njambi na vukaleho vua Yesu. 10 Nja kele muli Sipilitu ku litangua lia Muangana, kaha nja vuile ku nima yange lizi lia kama, ngue lia lunetu, 11 ngualio, Vize viu ku mona, sonekavio mu mukanda kaha tuma ku zimbunga zize zitanu na zivali: ku Efeso, na ku Smilina, na ku Pelengamu, na ku Tatila, na ku Salende, na ku Filandelefia na ku Laondisiya.
25 YA NOVEMBRO–1 YA DEZEMBRO
VUPITE VUA MU LIZI LIA NJAMBI | KU-SOLOLA 4-6
“Vamala Vauana Vakua ku Endesa Tuvalu”
(Ku-Solola 6:2) Kaha nja muene, kaha talenu, kavalu ua ku vuka, na uze ua tumameneho ua kele na vuta vua lungusa; kaha va mu hele cilongo: kaha ua tuhukile na ku hiana na mu ku hiana.
Vamala Vauana Vakua Tuvalu va Pua Veya?
Mukua ku endesa kavalu ua ku vuka ua pua iya? Vusunga vu tu kuasa ku mu tantekeya tu vu uana ku livulu lia ku Ku-Solola, lize lia soluele eci ku endesa ca muilu ku pua ngue “Lizi lia Njambi.” (Ku-Solola 19:11-13) Lizi, ya pua nkumbu ya Yesu Kilistu muomu ua puile muluua ua Njambi. (Yoano 1:1, 14) Cikuavo naua, va mu tumbuile ‘Muangana ua Vamiangana, na Sukulu ua Vasukulu’ na “Mukua Cili na Mukua Vusunga.” (Ku-Solola 19:16) Mua vusunga, Yesu ua kala na mpoko ya ku pua muangana ua ngolo, kaha ke ku pangesa ngolo yeni mu njila ya ku pihia. Vunoni halumo tu hasa ku katula vihula.
Vamala Vauana Vakua Tuvalu va Pua Veya?
Ntsimbu ika vamala vakua tuvalu va putukile ku endesa tuvalu? Tantekeyenu ngecize mukua ku endesa ua katate, ua pua Yesu Kilistu. Ua putukile ku endesa kavulu mua tambuile cilongo. (Ku-Solola 6:2) Ntsimbu ika Yesu va mu zikile cilongo a pue Muangana muilu? Kati mu nima ya ku-tsa ceni mua hilukile muilu. Mbimbiliya ya muesa ngecize mua hilukile muilu ua ka vandamenene amba vuose va mu puise muangana. (VaHevelu 10:12, 13) Yesu ua hele vakua ku mu kava vitantekeyeso via muesele ku hua ca ntsimbu ya ku vandamena na ku putuka ca ku sika ceni muilu. Ua handekele ngueni omo a ka putuka ku sika muilu, viuma ha mavu vi ka pihia cikuma. Ku ka kala vindzita, ndzala, na misongo ya ku litambuisa. (Mateo 24:3, 7; Luka 21:10, 11) Kaha mu ya putukile Ndzita ya ku Livanga ya Mavu ose mu 1914, ca solokele ha toma ngecize vantu va kovelele mu ntsimbu ya ku kaluua ha mavu, ize i va tumbula mu Mbimbiliya “matangua aze a ku kotokela.”—2 Timoteo 3:1-5.
(Ku-Solola 6:4-6) Kaha kavalu mukuavo ua tuhukile, kavalu ua ku tila: na kuli uze ua tumameneho va mu hele ku fumisa ciyulo ha mavu, linga va litsihe umo na mukuavo: kaha va mu hele mukuale ua kama. 5 Kaha omo ua vatuile citantekeyeso ca mu citatu, nja vuile kasitu ua muono ua mu citatu ku handeka, ngueni, Tuaya. Kaha nja muene, kaha talenu, kavalu ua ku lava; na uze ua tumameneho ua kele na cipeseleso mu livoko lieni. 6 Kaha nja vuile ngue lizi ha kati ka tusitu vaze vauana va muono, ngualio, Njongo ya tiliku na lumbongo lua palata, na zinjongo zitatu zia sevanda na lumbongo lua palata; na mazi na viniu kati u vi pihise.
Vamala Vauana Vakua Tuvalu va Pua Veya?
Mukua ku endesa ou kavalu uemanena ndzita. Tantekeyenu ngecize ua tundisa ciyulo kati mu vifuti via vindende lika, vunoni mu mavu ose. Mu 1914, ukeuo muaka u ya putukile ndzita ya ku livanga ya mavu ose ize ka ya keleko lumo. Kaha mu nima ya ndzita yaco, kua hatele ndzita ya mu civali ya mavu ose ize ya hianene cikuma. Tunde mu 1914, vamo va muesele ngecize vantu va tsile ku ndzita na ku liuayanga, va tuvakanene 100 milhoês! Kaha vantu va vengi va vulumukile cikuma.
Vamala Vauana Vakua Tuvalu va Pua Veya?
“Nja muene, kaha talenu, kavalu ua ku lava; na uze ua tumameneho ua kele na cipeseleso mu livoko lieni. Kaha nja vuile ngue lizi ha kati ka tusitu vaze vauana va muono, ngualio, Njongo ya tiliku na lumbongo lua palata na zinjongo zitatu zia sevanda na lumbongo lua palata; na mazi na viniu kati u vi pihise.’”—Ku-Solola 6:5, 6.
Mukua ku endesa ou kavalu uemanena ndzala. Ku sekulu ya ku livanga omo lia ku keha ca via-ku-lia, njongo ya tiliku, ndando yayo ya puile lumbongo lumo lua palata, ize ya puile fueto ya mu litangua lia mutuntu. (Mateo 20:2) Kaha lumbongo luaco naua va lu landele zinjongo zitatu zia sevanda. Matangua angahi vie ku hasele ku suka vusoko vua kama? Ku ntsimbu ize vantu va va nanguile kati va sanduole via-ku-lia, cipue via nkala litangua, ngeci mua azeite na viniu.
(Ku-Solola 6:8) Kaha nja muene, kaha talenu, kavalu ua ku vukuluka: na uze ua tumameneho, lizina lieni Ku-tsa; kaha Vukalo vua Vatsi vua mu kavele. Kaha va va hele mpoko ku mutamba ua mu ciuana ua mavu, ku tsiha na mukuale, na ndzala na ku-tsa, na tusitu va ku misenge ya mavu.
Vamala Vauana Vakua Tuvalu va Pua Veya?
Mukua ku endesa kavalu ua mu ciuana uemanena ku-tsa, omo lia mavezi na vikuavo vie ku ci koka. Mu nima ya muaka ua 1914, vuvezi vua lisinda vua ku Espanha vua tsihile vantu va ku pua 10 milhões. Kaha vantu 500 milhões va kele na vuvezi vuaco, ha kati ka vantu 3, muntu 1 ua kele na vuvezi vuaco!
Vunoni vuvezi vuaco vua puile vuputukilo lika. Muomu mu sekulu 20 vantu va ku pua 100 milhões va tsile ku vuvezi vua kakuti. Kaha lelo lino, makulukazi na makulukazi a vantu vali na ku-tsa vuasi omo lia vuvezi vua SIDA (AIDS), tumbe (TB), na malaria, vutuhu vifua via ku saka via livuezelela.
Na lelo lino na vimo vi na aluluka viahi, vantu kasi vali na ku-tsa—ku ndzita, ku ndzala kaha mavezi a ku litambuisa kasi a li na ku tualelelaho ku livuezelela. Vihilo via sulu na vatsi ca ku hona lulavelelo.
Ku Hinda Vupite vua mu Lutsilielo
(Ku-Solola 4:4) Kaha mu ku zingilika citumamo mua kele vitumamo vikuavo via vuangana makumi avali na viuana: kaha ku vitumamo nja muene vakuluntu makumi avali na vauana va na tumama, va na zala vuzalo vua ku vuka; na ku mitue yavo vilongo via olu.
(Ku-Solola 4:6) Kaha ku lutue lua citumamo, ngue cisali ca vindulu via ku lifua na kilistale. Na haze ha sungama citumamo na mu ku zingilika citumamo, tusitu vauana va muono va ku sula na meso ku lutue na ku nima.
re 76-77 ¶8
Vumpahu vua Citumamo ca Vuangana ca Yehova
8 Yoano ua tantekeyele ngecize vasasendote va va hanguile ku pangela ku tavenakulu. Ngeci halumo ua komokele omo lia viuma via tumbuile ngueni: “Kaha mu ku zingilika citumamo mua kele vitumamo vikuavo via vuangana makumi avali na viuana: kaha ku vitumamo nja muene vakuluntu makumi avali na vauana va na tumama, va na zala vuzalo vua ku vuka; na ku mitue yavo vilongo via olu.” (Ku-Solola 4:4) Cili vene, mu cihela ca vasasendote, kua kala vakuluntu 24 va va hangula na ku va zika vilongo ngue vamiangana. Veya va pua vakuluntu vaco? Va pua Vakua Kilistu va ku vuavesa vaze va sanguka laza, kaha vaya laza muilu ngue mua va kulahesele Yehova. Vati tua tantekeyamo?
re 80 ¶19
Vumpahu vua Citumamo ca Vuangana ca Yehova
19 Veya vemanena ava tusitu? Cimona ca kapolofeto Ezekiele ci tu kuasa ku uana cikumbululo. Ezekiele ua muene Yehova mu litemba lieni muilu, kaha litemba liaco va li zingilikile ku tusitu ngue vaze va tumbuile Yoano. (Ezekiele 1:5-11, 22-28) Mu nima yaco, Ezekiele ua muene ngecize litemba liaco va li zingilikile ku tungelo. Vunoni ha ntsimbu yaco, ua tumbuile vaze tungelo ngueni vaselumbini. (Ezekiele 10:9-15) Kaha tungelo vauana va muene Yoano halumo vemanena vaselumbini va Njambi, vaze va kala na seho ya kama mu lukungulukilo Lueni. Yoano mua muene vaselumbini va li mu hiehi na Yehova ka vi muene ku pua ciyovo, muomu mu tavenakulu mua kele vaselumbini vavali va olu helu lia cikasa ca litavasiano, kaha cikasa caco cemanenene citumamo ca vuangana ca Yehova. Kaha ku hitila muli vaselumbini vaco, Yehova ua kele na ku hana masiko ku cifuti.—Ezundu 25:22; Visamo 80:1.
(Ku-Solola 5:5) Kaha umo ua vakuluntu ua handekele nange, ngueni, Kati u lile; tala, Ndumba uze ua ku muyati ua Yunda, Muzi ua Ndaviti, na vulu mu ku fukula mukanda na vitantekeyeso viauo vitanu na vivali.
cf 36 ¶5-6
“Tala, Ndumba uze ua ku Muyati ua Yunda”
5 Vintsimbu via vingi ndumba va mu setekesa ku ku simpa. Vuno mua liuanaho laza ndumba ni? Kaha nga mukemuo, halumo mua mu muenenene ha laako. Ambe ngoco, ce ku vuisa vuoma. Nga mu tala mu meso ou kasitu ua ndzili kaha neni a mi tala, mua vusunga ca cikalu ku singanieka ngecize, neni ue kuivua vuoma vua vimo. Mbimbiliya ya handeka via ‘Ndumba, ua hiana tusitu, kaha ke ku ongoloka kuli umosi.’ (Visimo 30:30) Kaha eci cikeco ku simpa ca kala naco Kilistu.
6 Tu ci simutuilenu vinjila vitatu via muesele Yesu ku simpa ngue ca ndumba: ua hakuilile vusunga; ua hakuilile vuviuke kaha va mu luisile. Tu ka mona naua ngecize, ambe nga ka tua puile va ku simpa, vunoni tu vose tu hasa ku tambuluisa ku simpa ca Yesu.
Ku Tanda Mbimbiliya
(Ku-Solola 4:1-11) Kaha mu nima yevi nja muene, Kaha talenu, lipito lia sokolokele muilu, na lizi lia katete lize li nja vuile, ngue lia luneta lia handekele nange, umo mukua ku handeka ngueni, Londa kuno, kaha nji ka ku muesa vize vi na pande ku sololoka fume hano. 2 Haze vene nja kele muli Sipilitu: kaha talenu, va na tumbika citumamo ca vuangana muilu, kaha umo ua tumamene ku citumamo; 3 na uze ua tumameneko mu ku mu tala ua lifuile na livue lia yasepe na ngue salendoniu: na nkongolo ua zingilikile citumamo, mu ku mu tala ua lifuile na esemeanda. 4 Kaha mu ku zingilika citumamo mua kele vitumamo vikuavo via vuangana makumi avali na viuana: kaha ku vitumamo nja muene vakuluntu makumi avali na vauana va na tumama, va na zala vuzalo vua ku vuka; na ku mitue yavo vilongo via olu. 5 Kaha ku citumamo cize ca vuangana kue ku fuma mihiato na mezi na ku-zima ca kalunga. Kaha ku lutue lua citumamo kua kele zindeya zitanu na zivali zia ku suama, zikezio Vimbembesi vatanu na vavali va Njambi; 6 Kaha ku lutue lua citumamo, ngue cisali ca vindulu via ku lifua na kilistale. Na haze ha sungama citumamo na mu ku zingilika citumamo, tusitu vauana va muono va ku sula na meso ku lutue na ku nima. 7 Kaha kasitu ua katete ua lifuile na ndumba, na kasitu ua mu civali ua lifuile na muana ngombe, na kasitu ua mu citatu ua kele na cihanga ngue ca muntu, na kasitu ua mu ciuana ua lifuile na cihungu ua ku pulula. 8 Na tusitu vaze vauana va muono, vose va li na mavava atanu na limo, va na sulu na meso kuose ku mbandza na mu ntima: kaha ka ve ku huima mutana na vutsiki, nguavo, Ua lela, ua lela, ua lela, Muangana Njambi Mukua Ngolo yose, Uze ua kele kaha ua kala kaha a li ku iza. 9 Kaha omo tusitu vaze va muono va ka sangaziala na ku singimika na ku santsela uze a tumama ku citumamo ca vuangana, uze a yoya ku miaka na miaka ya ya-ye, 10 vakuluntu vaze makumi avali na vauana va ka ua ku meso a uze a tumama ku citumamo, va ka lemesa uze a yoya ku miaka na miaka ya ya-ye, kaha va ka mbila vilongo viavo ku lutue lua citumamo, nguavo, 11 Yove ua viuka, Muangana uetu na Njambi yetu, Ku tambula ku-sangaziala na kasingimiko na ngolo: Muomu yove ua tangele viuma viose, Nomo cizango cove via puile, va vi tangele.