Vuno Mua Liviukisila via Litangua lia Seho mu Muaka Ni?

1. Omo lia vika litangua lia Mulalelo likelio lia seho ya kama mu muaka? (Luka 22:19, 20)

KULI vangamba va Yehova, Mulalelo ua Ku-tsa ca Kilistu ukeuo ua pua litangua lia seho ya kama mu muaka. Ciuano caco, cikeco lika ca sikile mpundu Yesu ku vandongesi veni ku ci linga. (Tandenu Luka 22:19, 20.) Tue ku lavelela Mulalelo omo lia vusunga vua vuingi. Tu hilulenuho vumo.

2. Tumbulenu vumo vusunga vue ku tu lingisa ku lavelela Mulalelo na ndzolela ya kama.

² Mulalelo ue ku tu kuasa ku hilula ha seho ya nkombelo. Ue ku tu kuasa naua mu vinjila vi tu hasa ku mueselamo ku santsela cetu ku nkombelo ya Yesu. (2 Kol. 5:14, 15) Cikuavo naua, ue ku tu hana vukovelelo vua ku ‘likolesa umo na mukuavo na vamuanetu.’ (Loma 1:12) Nkala muaka, cingi ca vamuanetu na vandumbuetu va zeya mu lutsilielo, ve ku soloka ku Mulalelo. Kaha vamo, ve ku ivua vene na cizango ca ku hiluka kuli Yehova, omo lia ndzolela i ve ku va tambula nayo, ku Mulalelo. Kaha cingi ca vantu ve ku muesa seho ku vusunga, ve ku ivua cizango ca ku putuka kuendela mu njila yaya ku muono, omo lia viuma vi ve ku ivua na ku mona ku ciuano caco. Mua vusunga, evi vikevio via lingisa Mulalelo ku ua pua seho ya kama kuli etu!

3. Vati Mulalelo ue ku lingisa vamuanetu ku likuata kumo mu mavu ose? (Talenu naua cikupulo.)

³ Tue ku lavelela naua Mulalelo na ndzolela ya kama, muomu tu tantekeya ngecize ciuano caco ce ku lingisa vamuanetu mu mavu ose ku likuata kumo. Vakaleho va Yehova ve ku likungulula mu ku lahuka ca litangua muaya mavu hose, ku ciuano caco. Kaha tue ku ivua cimpande ce ku tsindika ha seho ya nkombelo, tue kuimba miaso ivali ya ku sangaziala Yehova. Tue ku hitisa vimueso vivali via Mulalelo kaha na ku tava “ame” ku vivundilo viuana. Mu kati ka 24 ola, vikungulukilo viose muaya mavu, vie ku linga viuma vimo lika ku ciuano caco. Aci singaniekenu ndzolela ye ku ivua Yehova na Yesu, mu ve ku tu mona tu na likuata kumo mu ku va muesa kasingimiko mu njila eyi!

4. Vika tu simutuila mu cilongesa cino?

⁴ Mu cilongesa cino, tu simutuila ha vihula evi: Vati tu hasa ku viukisa mitima yetu ku Mulalelo? Vati tu hasa ku kuasa vakuetu va uane vukuasi ku ciuano caco? Kaha vati tu hasa ku kuasa vaze va na zeye mu lutsilielo? Vikumbululo vievi vihula, vi ka tu kuasa ku liviukisila vieci ciuano ca ku lela.

VATI TU HASA KU VIUKISA MUTIMA UETU KU VIA MULALELO?

5. (a) Omo lia vika tua pande ku hilula ha seho ya nkombelo? (Visamo 49:7, 8) (b) Vika mua lilongesa ku vídeo Omo lia Vika Yesu ua Tsile?

⁵ Imo njila ya seho cikuma i tu hasa ku viukisa mutima uetu ku via Mulalelo, ya pua mu ku hilula ha seho ya nkombelo ya Yesu Kilistu. Ku ndzili yetu lika, nga ka tua hasele ku lipatula etu vavene ku vupi na ku kutsa. (Tandenu Visamo 49:7, 8; talenu naua video Omo lia Vika Yesu ua Tsile?)a Ngeci mukemuo, Yehova ku cilemo ceni, ua viukisile viuma linga muaneni Yesu, a ku tu tsile. Mua vusunga, Yehova na Yesu va lihakelele kapandi ka kama ka ku vi puisamo. (Loma 6:23) Ngeci mukemuo, ntsimbu yose i tue ku lihakela kapandi ka ku hilula ha viuma vi va tu lingilile Yehova na Yesu mu ku tu hana nkombelo, seho i tua haka ku kombelo ye ku livuezela. Tu hilulenu ha vimo viuma via vindende via muesa kapandi ka va lihakelele Yehova na Yesu mu ku tu hana nkombelo. Vunoni ha katete, tu ci tantekeyenu vika via pua nkombelo?

6. Nkombelo ya pua vika?

⁶ Nkombelo ya pua ndando i ve ku fueta mu ku patula cuma. Yala ua katete Andama, ua puile ua ku tantuluka mu va mu tangele. Vunoni mua vulumuine ua zimbalesele lulavelelo lua ku ka yoya miaka yose, kati lika kuli ikeye vunoni na ku vana veni vose. Linga tu hase ku patula evi via zimbalesele Andama, Yesu ua hanene muono ueni ua ku tantuluka, ku pua nkombelo. Mu ntsimbu yose ya kele ha mavu, “ikeye ka lingile vupi, cipue ku-kokola ka va ci uanene mu kanua keni.” (1 Petulu 2:22) Ngeci mukemuo, ha ntsimbu ya tsile, muono ueni ua litombuele mpundu na muono ua ku tantuluka ua zimbalelesele Andama.—1 Kol. 15:45; 1 Tim. 2:6.

7. Tumbulenu vimo vieseko via lihitile navio Yesu mua kele ha mavu.

⁷ Yesu ua tualeleleho ku ononoka Ise mu vutantuluke, vutuhu ua hitile mu vieseko via vingi mua kele ha mavu. Ku vunike ua pandele ku nonoka ku visemi veni va ha mavu, vutuhu ka va puile va ku tantuluka. (Luka 2:51) Kaha ha vunkavala, Yesu ua vianene ntsindiye yose ye ku mu lingisile ku pua mukua lisino cipue ku visemi veni ni kuli Yehova. Kaha co mua kolele, ua pandele ku kolesa ku vieseko via kele na ku mu nakuila Satana Ndiavu, cikuma-kuma vieseko via citona meso via ku mu vindika ku pangela Njambi. (Mat. 4:1-11) Satana ua likuminyine ku sevuisisa Yesu, linga kati a puisemo via tondeka mu ku fueta nkombelo.

8. Vieseko vikuavo vika, ua lihitile navio Yesu?

⁸ Mu cipanga ceni ca ku ambulula ha mavu, Yesu ua hitile mu vieseko vikuavo naua. (Luka 4:28, 29; 13:31) Va mu luisile na ku tonda ku mu tsiha, ku pinda naua na visevuka via vandongesi veni kaha mu va mu kuatele ku vitozi, va mu tinguile na ku mu pakesa. (Mako 9:33, 34) Mu nima ya viose evi, va mu tsihile mu njila ya kasahuntu na ku vavala ca kama. (VaHe. 12:1-3) Kaha eci ceseko ca ku manusuila, ua pandele ku hitamo ca ku hona ku mu niunga kuli ise Yehova.b—Mat. 27:46.

9. Vati muli na ku livua ha mutima ku tuala ha nkombelo ya Yesu? (1 Petulu 1:8)

⁹ Mua vusunga Yesu, ua yandele mua kama mu ku tu hana nkombelo. Ngeci mukemuo, ku singanieka ha viose via yandele navio Yesu mu ku tu hana nkombelo, ci na vuezelela ku cilemo cetu kuli Ikeye ni vati?— Tandenu 1 Petulu 1:8.

10. Vitanga vika ua lihitile navio Yehova mu ku hana nkombelo?

¹⁰ Amba Yehova co, kapandi kaka ua lihakelele mu ku tu hana nkombelo ya muaneni Yesu? Yehova na Yesu, vakevo cisemi na muana va lilema mua kama ku hiana vose. (Visi. 8:30) Aci singaniekenu ha vati Yehova ua livuile ku mutima mua kele na ku mona muaneni a hita mu vieseko via vingi cikuma ha mavu. Mua vusunga, ua vuile ku vavala ca kama ku mutima, ku mona muaneni ya lema va mu yandesa, va mu yengula kaha na ku mu eseka.

11. Pangesenu cimo cimueso mu ku muesa, vati Yehova ua livuile mua muene Yesu va mu tsiha.

¹¹ Cisemi uose ua tsisaho laza muana, a tantekeya vuino ku lema ca vusiua vu ce ku koka ku-tsa ca muana. Tua tsiliella mua kama mu cisangukilo. Vunoni eci, ka ce ku zima ni ku manusula ku vavala ci tue ku ivua ku mutima, mu ku tsisa vantu va tua lema. Eci cimueso ci tu kuasa ku ivuisisa vati ua livuile Yehova, mu ku mona muaneni ya lema a yanda na ku-tsa ha litangua lize, mu muaka ua 33 T.K.N.c—Mat. 3:17.

12. Vika tu hasa ku linga, ntsimbu tu lavelela Mulalelo?

¹² Mu ntsimbu ya lisupuko ku tunda hano, na ha litangua lia Mulalelo, setekenu ku lihakela kapandi ya ku lilongesa viuma vikuavo ku tuala ha nkombelo mu cilongesa cenu ca mu vulika ni mu ku lemesa ca mu vusoko. Pangesenu Mukanda ua ku Tondesesa Nauo ua Vakaleho va Yehova nga ua tuhuka mu lilimi lienu, ni nkala mavulu eka e ku kuasa mu ku lilongesa Mbimbiliya mu ku lova, linga mu hinde vuino ha cimpande caco.d Kaha naua lihakelenu kapandi ka ku kava ku tanda ca Mbimbiliya ca Mulalelo, ce ku tuhuka mu mukanda ua Muono Uetu Vakua Kilistu na Vipanga Vietu. Kaha ha litangua lia Mulalelo, kati mu suve ku ka tala ku Lemesa ca Cimene ca ku Lifuila. Ku viukisa mutima uetu ku via Mulalelo, ce tu hana na vukovelelo vua ku kuasa vakuetu.—Ezela 7:10.

KUASENU VAKUENU

13. Tumbulenu cinanga ca katete vi tu hasa ku linga mu ku kuasa vakuetu va ka uane vukuasi ku Mulalelo?

¹³ Vati tu hasa ku kuasa vakuetu va uane vukuasi ku Mulalelo? Cinanga ca katete, ca pua ku va lania. Kaha ku tundisako ku handeka na vaze va tue ku liuana navo mu lihia ntsimbu yose, tu hasa ku soneka mukana ua vantu va tu tonda ku lania. Ca ku muenako, tu hasa ku lania vavusoko, vakuetu ku vipanga, vakuetu ku sikola na vantu veka. Kaha ambe nga ka tuesi na vilanio via ku puamo via ku mavoko, tu hasa ku va tuma vi link via cilanio. Nga tu lingamo, tu ka hasa ku komoka vantu vangahi va ka soloka ku Mulalelo!—Ekel. 11:6.

14. Hanenu cimueso ca solola ndzili ya kala ha ku lania muntu mpundu.

¹⁴ Ku lania muntu u mu tantekeya mpundu, ca kala na ndzili ya kama. Tangua limo, umo ndumbuetu ua kala na yala ka puile Mukaleho ua Yehova, ua komokele mua kama, omo yala lieni ua mu lekele ngueni, a kaya neni ku Mulalelo. Omo lia vika ua komokele? Muomu vintsimbu via vingi ku nima, ndumbuetu uesekele ku lania yalieni, vunoni ka tavele. Amba vika honi via mu tavesele ha ntsimbu eyi? Yala ngueni: “Kuli umo ua nji laniene mpundu.” Uze yala va mu laniene kuli umo mukuluntu mu cikungulukilo ua puile mundambo ueni. Ngeci ua tavele kaha tunde mu muaka uze ua putukile ku kunguluka mu miaka ya ingi ya hateleko.

15. Vika tua pande ku vuluka omo tu lania vantu ku Mulalelo?

¹⁵ Kati mu suve ngecize, vaze va tue ku lania va hasa ku kala na vihula via vingi, cikuma-kuma nga lua katete kuiza ku viuano vietu. Ngeci mukemuo, ci pua ca cili ku hilula vihula vika va hasa ku linga na ku liviukisila ku va kumbuluila. (Kolo. 4:6) Ca ku muenako, vamo ve ku lihula nguavo: “Vati ci kenda ciuano caco? Ci ka ambata ntsimbu ingahi? Kuli imo zalesi i va tavesako ni? Ve ku lomba milambu? Nga tuli na ku lania muntu ku Mulalelo, tu hasa ku mu i hula lika nguetu: “Muli na vimo vihula?” Kaha mu nima yaco, tu hasa ku kuasa muntu ku vihula viose vi hasa ku kala navio. Tu hasa ku pangesa naua video Ku Vuluka Ku-tsa ca Yesu na Vika vie ku Lihita mu Ndzivo ya Vuangana?, mu ku kuasa muntu evuisise vuino vati vie kuenda viuano vietu. Kaha naua kapitulu 28 ka livulu Yoyenu mu Ndzolela ku Miaka Yose!, ka kala na mizimbu ikuavo ya cili i tu hasa ku mu leka.

16. Vihula vika vikuavo va hasa ku kala navio vaze ve kuiza ku kunguluka ku Mulalelo?

¹⁶ Mu nima ya Mulalelo, vaze va vaha va hasa ku kala naua na vihula vikuavo. Halumo va hasa ku lihula, omo lia vika vavandende lika va nali ku vimueso ni omo lia vika va naliko. Kaha va hasa naua ku lihula, lungahi tue ku linga Mulalelo ni va hasa ku lihula nga viuano via Vakaleho va Yehova vie kuenda ngue Mulalelo. Vutuhu cingi cevi viuma ve ku vi simutuila mu cimpande ca Mulalelo, vantu va vaha ve ku tondeka ku va lomboluelavio vuino. Cimpande “Omo lia Vika Vakaleho va Yehova ve ku Linga Mulalelo ua Muangana mu Cifua ca Liseza na Malombelo Akuavo?,” ce ku tu kuasa ku kumbulula evi vihula. Tu tonda ku linga viose-vio mu ku kuasa vaze va na fuila ku ka tambula muono ua ya-ye va keza ku Mulalelo, cipue ntsimbu kanda, mu ntsimbu yaco ni mu nima ya Mulalelo.—Vili. 13:48.

KUASENU VAKUA KU ZEYA

17. Vati vakuluntu va hasa ku kuasa vaze vazeya lutsilielo? (Ezekiele 34:12, 16)

¹⁷ Mu vingode via Mulalelo, vati vakuluntu va hasa ku kuasa vaze vazeya mu lutsilielo? Mu ku lisosomua navo na ku muesa ngecize mua va haka seho. (Tandenu Ezekiele 34:12, 16.) Ntsimbu kanda Mulalelo u hete, lihakelenu kapandi ka kutonda vakua ku zeya vavengi ha vindzivo. Va lekenu ngecize mua va haka seho ya kama kaha mu tonda ku va kuasa mu njila yose-oyo i mu hasa. Va lanienu ku Mulalelo. Kaha nga va keza, va tambulenu na mavoko avali. Mu nima ya Mulalelo, tualelenuho ku vendela ni ku va sana-sana ku telefone. Lingenu cose linga mu kuase ava vamuanetu na vandumbuetu va tua lema, va puisemo via tondeka mu ku hiluka kuli Yehova. —1 Pet. 2:25.

18. Vika tu hasa ku linga tu vose, linga tu kuase vakua ku zeya mu lutsilielo? (Loma 12:10)

¹⁸ Vose mu cikungulukilo, va hasa ku kuasa vose ve ku kunguluka ku Mulalelo. Mu njila ika? Mu ku va muesa cilemo, ngozi na kasingimiko. (Tandenu Loma 12:10.) Vulukenu ngecize ava vampanga va pua va seho ya kama kuli Yehova. Va hasa ku likanoela kuiza ku viuano. Halumo omo lia liova nguavo ka va ka va tambula vuino.e Ngeci mukemuo, kati mu handeke ni ku linga viuma vi va vuisa ntsoni ni vi va vavalesa ku mutima. (1 Tes. 5:11) Ava vamuanetu na vandumbuetu va pua vavusoko vetu mu lutsilielo. Ngeci mukemuo, tue ku ivua ndzolela ya kama ya ku putuka naua ku kunguluka navo! —Visa. 119:176; Vili. 20:35.

19. Vukuasi vuka tue ku uana mu ku vuluka ku-tsa ca Yesu?

¹⁹ Mua vusunga mu nima ya ku hilula evi viose, ka ci tu komouesa ku tantekeya ngecize Yesu ua tu sikile tu pue na ku vuluka ku-tsa ceni nkala muaka. Mu tue ku lingamo, tue ku likuasa etu vavene na vakuetu mu vinjila via vingi. (Isaya 48:17, 18) Tue ku kolesa cilemo cetu muli Yehova na Yesu. Tue ku muesa ku santsela cetu ku viuma vi va tu lingila na ku kaniamesa ku likata cetu na vamuanetu. Cikuavo naua tue ku hasa naua ku kuasa vakuetu, linga navo va hase ku tambula vivezikiso vi ya neha nkombelo. Ngeci mukemuo, tu lihakelenu kapandi kose linga tu liviukisile via Mulalelo ua muaka uno, muomu litangua liaco: likelio li ka pua lia seho ya kama mu muaka uose!