Muesenu ku Santsela ku Vamuanetu Vapua “Vuana Kuli Vantu”

1. Viuma vika Yesu ua lingilile vantu?

NA UMO UAHI ua kuasaho mua kama vakuavo ku hiana Yesu. Mua kele ha mavu, ua kuasele vantu ku hitila mu vikomoueso via lingile. (Luka 9:​12-17) Ua tu hele vuana vua kama mu ku tu tsila. (Yoa. 15:13) Yesu fume ha ku sanguka cendi, kasi ali na ku tualelelaho ku tu kuasa. Ngue mua tu kulahesele, ue ku vundila Yehova a tu hane sipilitu santu mu ku tu longesa na ku tu lembezieka. (Yoa. 14:​16, 17; 16:13) Ku hitila mu viuano vietu, Yesu ue ku tu kuasa ku longesa vantu Mbimbiliya mu mavu ose na ku va puisa vandongesi.—Mat. 28:​18-20.

2. Veya va pua “vuana kuli vantu” va va tumbula ku Efeso 4:​7, 8?

² Yesu ua tu hele naua vuana vukuavo, kapostolo Paulu ua sonekele nguendi munima ya kuya muilu, Yesu “ua hele vuana kuli vantu.” (Tandenu Efeso 4:​7, 8.) Paulu ua lomboluele nguendi ua hele vuana vuaco linga a kuase cikungulukilo mu vinjila via liseza-seza. (Efe. 1:​22, 23; 4:​11-13) Lelo lino, “vuana” vuaco vuambatesela kumo na vakua ku kuasa vipanga, vakuluntu mu cikungulukilo kaha na tuniungi va ku zinguluka.a Mua vusunga, vamuanetu vaco ka va tantulukile kaha ve ku sevuka. (Tia. 3:2) Vunoni Manguana uetu Yesu Kilistu, ue ku va pangesa va tu kuase.

3. Vati tu vose tu hasa ku kuasa vamuanetu vapua “vuana kuli vantu”? Hanenu cimueso.

³ Yesu “ua hele vuana kuli vantu,” ni nguetu vamuanetu ve ku tu tuamenena mu ku kaniamesa cikungulukilo. (Efe. 4:12) Vunoni tu vose tu hasa ku lingako mutamba uetu, mu ku va kuasa ku puisamo viteli viavo. Ca ku muenako, vamo ha kati ketu tue ku kuasa cipanga ca ku tunga Vindzivo via Vuangana. Vakuavo ve ku kuasa mu ku teleka viakulia, ku tuala vakua ku panga na likalu ni vikuata vi ve ku pangesa, na viuma vikuavo. Na vuno vene, ku hitila mu mezi na mu vilinga vietu, tu vose tu hasa ku kuasa vakua ku kuasa vipanga, vakuluntu mu cikungulukilo na tuniungi va ku zinguluka. Mu cilongesa cino, tu mona vati vipanga viavo vie ku tu kuasa, kaha na vati tu hasa ku muesa ku santsela ku vamuanetu vaco na Yesu “ua hele vuana kuli vantu.”

VAKUA KU KUASA VIPANGA VE KU TU KUASA

4. Vati vakua ku kuasa vipanga va kele na ku kuasa vakuavo ku sekulu ya ku livanga?

⁴ Ku sekulu ya ku livanga, vamo vamuanetu va va hanguile kupua vakua ku kuasa vipanga. (1 Tim. 3:8) Ci soloka ngue Paulu ua handekele via vakua ku kuasa vipanga mua handekele ku 1 Kolintu 12:​28, nguendi: “vakua ku kolesa.” Aa mezi a muesa ngecize vamuanetu vaco, va kele na ku puisamo viteli via seho mu ku kuasa vakuluntu mu cikungulukilo va tuale mana mu ku longesa na mu ku linga mangendzi a ku kaniamesa. Ca ku muenako, halumo va kele na ku kuasa ku kopiala Visoneka via ku Lela ni halumo ku landa vikuata via tondekele linga va kopiale.

5. Vipanga vika ve ku linga vakua ku kuasa vipanga lelo lino?

⁵ Singaniekenu ha vipanga via seho vi ve ku linga vakua ku kuasa vipanga mu cikungulukilo cenu. (1 Pet. 4:10) Ca ku muenako, halumo ve ku tala via ku niunga vimbongo ni ku tepela vihela via kuambuluila, ve ku tala via ku pinga na ku tepela mikanda ku vakua kuambulula, ve ku pangela ku vintsambo, ve ku panga mu kupua vakua kuinikila ni ve ku vuahesa na ku niunga Ndzivo ya Vuangana. Viose evi vie ku kuasa cikungulukilo kuenda vuino. (1 Kol. 14:40) Cikuavo naua, vakua ku kuasa vipanga ve ku kala na mitamba ku viuano via mu kati ka simano, na ku linga vimpande via mbunga. Kaha mukua ku kuasa vipanga va hasa ku mu hangula kupua mukuasi ua mukuluntu ua civunga ca ku tuhuka mu lihia. Mu ku hita ca ntsimbu, vakua ku kuasa vipanga ve ku va hangula naua va pue na ku linga mangendzi a ku kaniamesa hamo na vakuluntu.

6. Vika vie ku tu lingisa ku santsela vakua ku kuasa vipanga?

⁶ Tu talenu vi va handekele vamo vandumbuetu ku tuala ha vukuasi vu ve ku hana vakua ku kuasa vipanga mu cikungulukilo. Ndumbuetu Beberlyb ua ku Bolívia, nguendi: “Viuano vie ku nji tovala mua kama, omo lia vakua ku kuasa vipanga. Nje ku hasa kuimba, ku kumbulula, ku halakana ku vimpande, kaha na ku lilongesa via vingi ku vivideo na vikupulo vi ve ku muesa ku viuano. Vakua ku kuasa vipanga, ve ku niunga vamuanetu na vandumbuetu mu ntsimbu ya ciuano na ku kuasa vaze ve ku kungulukila ku hitila mu videoconferência. Kaha munima ya ciuano, ve ku kuasa ku komba mu Ndzivo ya Vuangana, ku niunga vimbongo, na ku tu hana mikanda i tondeka. Nje ku santsela cikuma ku ku fuitangana cavo.” Ndumbuetu Leslie ua ku Colômbia, kaha yaliendi ua pua mukuluntu mu cikungulukilo nguendi: “Yaliange ue ku tondeka cikuma vukuasi vua vakua ku kuasa vipanga. Ca ku hona vukuasi vuavo, nga ue ku kala na via vingi via ku linga. Ngeci nje ku santsela cikuma ku ku fuitangana na cizango cavo ca ku kuasa.” Mua vusunga, tu vose mukemuo mu tue ku livua ku tuala ha vakua ku kuasa vipanga va mu cikungulukilo cetu.—1 Tim. 3:13.

7. Vati tu hasa ku muesa ku santsela kuli vakua ku kuasa vipanga? (Talenu naua cikupulo.)

⁷ Ka tua pandele lika kuivua cizango ca ku santsela vakua ku kuasa vipanga, vunoni Mbimbiliya nguayo: “Santselenuko” ni nguetu, tua pande ku ci muesa mu vilinga. (Kolo. 3:15) Muanetu Cristóvão ua pua mukuluntu mu cikungulukilo ku Finlândia, ua handekele vati ue ku muesa ku santsela. Ivene nguendi: “Nje ku tuma mukanda kuli mukua ku kuasa vipanga na ku sonekamo mezi a mu Mbimbiliya, kaha na ku tumbula cifua ca na nji kaniameselamo ni omo lia vika nje ku muesa ku santsela ku vipanga vie ku linga.” Muanetu Pascal na mpueyendi Jael, va yoyela ku Nova Caledônia ve ku kundika vakua ku kuasa vipanga mu vivundilo viavo. Muanetu Pascal nguendi: “Ano matangua, tue ku kundika vakua ku kuasa vipanga mu vuvindilo vietu, na ku lambelela Yehova a kale navo na ku va kuasa.” Mua vusunga, Yehova ue ku kumbulula vivundilo viaco kaha tu vose mu cikungulukilo tue ku tambula vukuasi vuaco.—2 Kol. 1:11.

VAKULUNTU MU CIKUNGULUKILO ‘VE KU FUITANGANA HA KATI KENU’

8. Omo lia vika Paulu ua sonekele nguendi, vakuluntu mu cikungulukilo va kele na ku “fuitangana”? (1 Tesalonika 5:​12, 13)

⁸ Ku sekulu ya ku livanga, vakuluntu va kele na ku fuitangana mu ku kuasa cikungulukilo. (Tandenu 1 Tesalonika 5:​12, 13; 1 Tim. 5:17) Va kele na ku tuamenena mu kuendesa viuano na ku linga vihangula via kuasele cikungulukilo. Va kele na ku hana naua vimamuna na cilemo ku vamuanaye mu ku va kuasa ku tualeleleho ku kaniama mu lutsilielo. (1 Tes. 2:​11, 12; 2 Tim. 4:2) Cikuavo naua, vamuanetu vaco va fuitanganene mu ku suka vusoko vuavo na ku va kuasa ku kaniamesa vusamba vuavo na Yehova.—1 Tim. 3:​2, 4; Tito 1:​6-9.

9. Vipanga vika ve ku linga vakuluntu mu cikungulukilo?

⁹ Lelo lino, vakuluntu mu cikungulukilo va kala na via vingi via ku linga. Va pua vakua kuambulula. (2 Tim. 4:5) Vamuanetu vaco ve ku muesa lungano lua cili mu ku panga na ntuima mu kuambulula, ve ku viukisa vihela via kuambuluila, kaha ve ku tu kuasa ku longesa na kuambulula na vutongue. Ve ku pua vangazi va ku hona kahangu kaha vakua cikeketima. Nga umo na lingi vupi vua kama, vakuluntu ve ku mu kuasa ku hiluisa vusamba vuendi na Yehova. Kaha ve ku linga cose mu ku lelesa cikungulukilo. (1 Kol. 5:​12, 13; Ngal. 6:1) Cikuavo naua, vakuluntu mu cikungulukilo va pua tuniungi. (1 Pet. 5:​1-3) Ve ku linga vimpande, ku lihakela kapandi ka ku tantekeya vamuanaye, ku linga mangendzi a ku va kaniamesa. Vamo vakuluntu ve ku kuasa ku ku tunga, ku tungulula na ku niunga Vindzivo via Vuangana, ku viukisa viuano via muhato na via limbo, kaha vamo ve ku panga ku Comissões de Ligação com Hospitais na Grupos de Visitas a Pacientes na vipanga vikuavo via vingi. Mua vusunga, Vakuluntu mu cikungulukilo ve ku fuitangana mua kama!

10. Vusunga vuka tua kala navuo vua ku santsela vakuluntu mu cikungulukilo?

¹⁰ Yehova ua polofetele nguendi tuniungi va ka tu niunga vuino kaha ka tu “kevua naua vuoma, cipue ku ivua uili.” (Yele. 23:4) Ndumbuetu Johanna ua ku Finlândia, ua limuenenene vusunga vuaco mu va vavalele vanaye. Ivene nguendi: “Vutuhu ce ku nji kaluuila ku leka vakuetu visoti vi nje kulua navio, vunoni umo mukuluntu mu cikungulukilo uze ka nja tantekeyele vuino, ua nji halakanene na ntsintsa mu nja mu lekele visoti viange. Ua vundilile nange na ku nji kuasa ku mona ngecize Yehova ua nji lema. Vutuhu ka nje ku vuluka mezi a handekele muanetu uaco, vunoni nje ku vuluka nguange nja livuile ku lembama. Njili na vusunga nguange Yehova ikeye ua mu tumine mu ku nji kuasa ha ntsimbu i nja tondekele.” Vati vakuluntu mu cikungulukilo cenu va mi kuasele?

11. Vati tu hasa ku muesa ku santsela ku vakuluntu mu cikungulukilo? (Talenu naua cikupulo.)

¹¹ Yehova a tonda tu santsele vakuluntu mu cikungulukilo “omo [lia] vipanga viavo.” (1 Tes. 5:​12, 13) Ndumbuetu Henrietta ua ku Finlândia nguendi: “Vutuhu vakuluntu mu cikungulukilo ve ku kuasa vakuavo na mutima uose, vunoni navo ve ku pinda na visoti. Ntsimbu ya va kehela kaha ka va kele na ndzili ku hiana vakuavo. Ngeci vintsimbu vimo, nje ku va leka nguange: ‘Nji na tondele lika ku mi leka nguange, mua pua vakuluntu va cili mu cikungulukilo.’” Ndumbuetu Sera ua ku Turquia, nguendi: “Vakuluntu mu cikungulukilo ve ku tondeka ku va kaniamesa linga va tualeleleho ku puisamo vipanga viavo. Ngeci mukemuo, tu hasa ku va sonekela mikanda, kuambulula navo, ni ku va lania tua ku lie hamo.” Vuno kuli umo mukuluntu mu cikungulukilo u mu tonda ku santsela omo lia ku fuitangana cendi ni? Nga mukemuo, tondenu vinjila via ku lingamo.—1 Kol. 16:18.

TUNIUNGI VA KU ZINGULUKA VE KU TU KANIAMESA

12. Veya ua hanguile Yesu mu ku kaniamesa vikungulukilo? (1 Tesalonika 2:​7, 8)

¹² Yesu ua hanguile vamo vamala linga va kuase cikungulukilo mu njila ikuavo. Ua pangesele vakuluntu mu Yelusalema va hangule Paulu, Mbanambasa na vakuavo va pue tuniungi va ku zinguluka. (Vili. 11:22) Omo lia vika? Va va hanguile linga va kolese vikungulukilo ngeci mu ve ku linga na vakua ku kuasa vipanga hamo lika na vakuluntu mu cikungulukilo. (Vili. 15:​40, 41) Paulu na Mbanambasa na vakuavo, va lihakelele kapandi ka ku puisemo vipanga viavo. Kaha vintsimbu vimo, va kele na ku haka miono yavo mu vusonde linga va longese na ku kaniamesa vakuavo.—Tandenu 1 Tesalonika 2:​7, 8.

13. Viteli vika vikuavo va kala navio tuniungi va ku zinguluka?

¹³ Tuniungi va ku zinguluka ve kuenda mangendzi ntsimbu yose. Vamo ve kuenda mangendzi a laha mu ku meneka vikungulukilo. Simano ku simano, tuniungi va ku zinguluka ve ku hana vimpande via ku liseza-seza, ku linga mangendzi a ku kaniamesa, na kuendesa viuano via vapioneiro, via vakuluntu mu cikungulukilo, kaha na via ku tuhuka mu kuambulula. Ve ku liviukisila vimpande kaha na ku viukisa viuano via limbo na via muhato. Ve ku longesa ku visikola via vapioneiro, ku viukisa viuano via ku lifuila na vapioneiro va ku vihela vi ve ku meneka, kaha na ku linga vipanga vikuavo via seho. Cikuavo naua, Mbetele ye ku va kundika vipanga vie ku tondeka mu vuasi-vuasi.

14. Vusunga vuka vue ku tu lingisa ku santsela cipanga ca tuniungi va ku zinguluka?

¹⁴ Vati vikungulukilo vie ku tambula vukuasi ku vipanga via tuniungi va ku zinguluka? Umo muanetu ua ku Turquia ua handekele nguendi: “Tuniungi va ku zinguluka mu ve ku tu meneka, ce ku nji vuisa cizango ca ku pangesa ntsimbu ya yingi mu ku kuasa vamuanetu na vandumbuetu. Tuniungi va ku zinguluka vose va nja monaho laza, na umo uahi ua nji lingisa ku livua ngue kesi na ntsimbu ni ka tondo ku handeka nange.” Ndumbuetu Johanna u tua tumbula helu, tangua limo uambuluile na kaniungi ua ku zinguluka. Vunoni na umo uahi u va uanene ha ndzivo, ua handekele nguendi: “Kasi nje ku vuluka litangua liaco. Nja mu lekele nguange, vayaya vose va nungulukile ku cihela ceka kaha nje ku va vuila vusona vua kama. Kaha ua nji kaniamesele na ku nji kuasa ku mona ngecize, mu ntsimbu ino halumo ka tu hasa ku kala hamo na vavusoko na vavusamba. Vunoni mu mavu a aha tu kala na ntsimbu ya yingi ya ku kala navo.” Mua vusunga, cingi cetu tue ku vuluka vintsimbu via ndzolela vi tua kele na tuniungi vetu na vati va tu kuasele.—Vili. 20:37–21:1.

15. (a) Kuliya na 3 Yoano 5-8, vati tu hasa ku muesa ku santsela ku tuniungi va ku zinguluka? (Talenu naua cikupulo.) (b) Omo lia vika tua pande ku santsela vampuevo va vamuanetu ve ku fuitangana mu cikungulukilo? Kaha vati tu hasa ku lingamo? (Talenu cikasa “Vulukenu Vampuevo Vavo.”)

¹⁵ Kapostolo Yoano ua mamuine Ngayu linga a muese vuhuanga kuli vamuanaye vezile mu ku kaniamesa cikungulukilo kaha na ku va “kuasa ku vungendzi vuavo ngue omo mua viuka ku meso a Njambi.” (Tandenu 3 Yoano 5-8.) Netu tu hasa ku lingamo mu ku lania kaniungi ua ku zinguluka linga tulie nendi. Njila ikuavo yapua ku kunguluka ku viuano via ku tuhuka mu kuambulula mu ntsimbu i ve ku tu meneka. Ndumbuetu Leslie u tua tumbula helu, ue ku muesa ku santsela mu njila ikuavo. Ivene nguendi: “Nje ku vundila Yehova linga a va hane vi ve ku tondeka. Nange na yaliange tue ku va sonekela naua mikanda mu ku va leka vati vungendzi vuavo vua tu kuasele.” Cikuavo naua, vulukenu nguenu tuniungi va ku zinguluka navo ve ku pinda na visoti kaha ve ku hona ngeci muetu. Vintsimbu vimo ve ku vavala, kuma mutima na kuivua vusiua. Ngeci mukemuo, halumo mezi enu a ngozi ni vuana vu mue ku hana vu hasa kupua cikumbululo ku vivundilo via kaniungi ua ku zinguluka.—Visi. 12:25.

TUA TONDEKA VAMUANETU VAPUA “VUANA KULI VANTU”

16. Kuliya na Visimo 3:​27, vihula vika va hasa ku lihula vamuanetu?

¹⁶ Tua tondeka vamuanetu vavengi vapua “vuana kuli vantu” linga va tu tuamenene. Nga mua pua muanetu ua ku mbatiza, vuno ci li ‘ku ngolo ya livoko lienu ku ci linga’ ni? (Tandenu Visimo 3:27.) Mu tonda kupua mukua ku kuasa vipanga ni? Nga mua pua mukua ku kuasa vipanga, vuno mu tonda ku lihakela kapandi ka kupua mukuluntu mu cikungulukilo ni?c Vuno mu hasa kualulula vimo mu muono uenu linga muye ku Sikola ya Vakua ku Ambulula Vuangana ni? Sikola yaco i ka mi kuasa linga Yesu a mi pangese mu vutuntu. Nga mu livua ngecize ka mu hasa ku puisamo, vundilenu Yehova a mi hane sipilitu santu mu hase ku puisamo viteli viose-ovio vi va mi hana.—Luka 11:13; Vili. 20:28.

17. “Vuana kuli vantu” vue ku muesa vika ku tuala hali Muangana uetu Yesu Kilistu?

¹⁷ Yesu ua hangula vamuanetu vakua ku fuitangana vapua “vuana kuli vantu” mu ku muesa ngecize ali na ku tu tuamenena kuno ku matangua a ku kotokela. (Mat. 28:20) Mua vusanga, tue ku santsela mua kama ku kala na Muangana ua tu lema, ua pua cihuanga, kaha a tantekeya vi tua tondeka ngeci ua tu hana vamuanetu ve ku tu kuasa. Ngeci mukemuo, tondenu vukovelelo vua ku santsela vamuanetu ve ku fuitangana mu lukungulukilo. Kati tu suve ku santsela naua Yehova, muomu ikeye ue ku tu hana “vuana vuose vua ku viuka na vuana vuose vua ku tantuluka.”—Tia. 1:17.