Tambuluisenu Tungelo

1-2. (a) Vati tua liseza na tungelo? (b) Vati naua tua litombola na tungelo?

YEHOVA mua mi kokele linga muize mu vusunga, uami kovelesa mu vusoko vuaku komouesa kaha vua cilemo. Kaha vusoko vuaco kavua puile lika vua vantu, vunoni na makulukazi a tungelo. (Ndan. 7:​9, 10) Mutue kuhilula ha tungelo, tuhasa kutuala mana kuku litepa cakala hakati ketu navo. Caku muenako, tungelo va tuhiana ku miaka yaku yoya. (Yombi 38:​4, 7) Kaha va tuhiana ku ngolo. Cikuavo naua, muku linga katua tantulukile va tuhiana kuvuviuke naku lela.—Luka 9:26.

² Mua vusunga, vutuhu tua liseza navo muvia vingi, vunoni tua litombola naua mu via vingi. Caku muenako, ngeci mua tungelo, netu tuakala na vuhasi vua ku tambuluisa vifua via Yehova. Tuakala na mpoko yaku lihanguila viuma, mazina etu na vuntu vuetu mpundu. Kaha tueku linga vipanga viaku liseza-seza mu lukungulukilo lua Yehova. Cikuavo naua, ngeci mua tungelo vatu tanga na cizango ca kulemesa Yehova.—1 Pet. 1:12.

3. Vika tu lilongesa mu cilongesa cino?

³ Muku linga tua litombola na tungelo muvia vingi, malungano avo acili ahasa kutu kaniamesa nakutu longesa viuma via vingi via seho. Mu cilongesa cino, tumona vika tuhasa ku lilongesa kuku likehesa ca tungelo, ku cilemo cavo ku vantu, ku kolesa cavo naku kapandi kaveku lihakela kakuniunga kulela ca cikungulukilo.

TUNGELO VAPUA VAKU LIKEHESA

4. (a) Vati tungelo veku muesa ku likehesa? (b) Vika viava lingisa ku likehesa? (Visamo 89:7)

⁴ Tungelo vapua vaku likehesa. Caku muenako, vutuhu vakala na vutongue, ngolo na mana, vunoni kasi ve kuononoka vitume via Yehova. (Visa. 103:20) Kave ku lihalesa omolia viuma vive kupuisamo, ni kutembesa vukama vua ngolo yavo. Ve ku linga cizango ca Njambi na ndzolela, vintsimbu via vingi ca ku hona ku solola mazina avo.a (Njen. 32:​24, 29; 2 Vam. 19:35) Veku viana ku tambula vumpahu vua fuila Yehova. Vika honi viava lingisa ku likehesa ngecize? Muomu va lema muakama Yehova naku mu singimika.—Tandenu Visamo 89:7.

5. Vati umo kangelo ua muesele ku likehesa mua sungamesele Yoano? (Talenu naua cikupulo.)

⁵ Tu hilulenu umo muzimbu ua muesa ku likehesa ca tungelo. Mu muaka ua 96 T.K.N., umo kangelo kava tumbuile ha lizina, ua soluele cimona caku lifuila kuli kapostolo Yoano. (Kuso. 1:1) Vati Yoano ualingile mua muene cimona caco? Ua tondele kulemesa uze kangelo. Vunoni kangelo uamu vindikile vuasi-vuasi, nguendi: ‘Havue, kati u lingemo! nange nji ngamba kumo nove na vamuanoko. Lemesa Njambi.’ (Kuso. 19:10) Mua vusunga, kangelo uaco ua muesele ku likehesa ca kama! Muomu katondele vumpahu ni kumu komoka. Ngeci haze vene, ua kuasele Yoano a talekese vumpahu kuli Yehova Njambi. Cikuavo naua, vutuhu uze kangelo laza uasua kupangela Yehova, kaha uahiana Yoano ku ngolo, vunoni ua handekele nguendi, uapua ngamba kumo na Yoano. Vutuhu ua sungamesele Yoano, vunoni ua handekele nendi na ngozi naku hona kumu tenukila. Muomu, halumo uevuisisile ngecize Yoano ua tondele lika ku lingamo, omolia viuma via ku komouesa viamu lekesele.

6. Vati tuhasa ku tambuluisa ku likehesa ca tungelo?

⁶ Vati tuhasa ku tambuluisa ku likehesa ca tungelo? Tuhasa kulingamo, muku puisamo viteli vietu cakuhona kulihalesa, ni kumuesa ngecize tuakala na vuhasi vua kulifuila. (1 Kol. 4:7) Cikuavo naua, nga laza tuasua kupangela Yehova ni tuakala na viteli viaku lifuila, katua pandele kulimona ngue tuahiana vakuetu. Vunoni, omo tupuisamo viavingi mu lukungulukilo, na kulikehesa cetu capande ku livuezelela. (Luka 9:48) Ngeci mua tungelo tuapande ku pangela vakuetu, kati kuva muesa ngue tua vahiana seho.

7. Vati tuhasa kumuesa ku likehesa omo tu sungamesa ni kumamuna vakuetu?

⁷ Tuhasa naua kumuesa ku likehesa, nga tu sungamesa vamuanetu mu cikungulukilo ni vana vetu. Nga tulinaku mamuna, vintsimbu vimo ceku tondeka tuvaleke vusunga cakuhona ku vongoloka. Vunoni ngeci mua uze kangelo ua sungamesele Yoano, tuapande kulingamo na ngozi. Nga ka tulihaka ku vukama, tuka mamuna vakuetu na kasingimiko na ngozi, kaha Mbimbiliya ikeyo ikapua luvula lua vimamuna vietu.—Kolo. 4:6.

TUNGELO VALEMA VANTU

8. (a) Kuliya na Luka 15:10 vati tungelo veku muesa cilemo ku vantu? (b) Mutamba uka vakala nauo tungelo mu cipanga ca kuambulula? (Talenu naua cahelu.)

⁸ Tungelo kava mbilile vantu kuti ni kuvamona ngecize kavakele na seho. Vunoni vatu lema. Veku viukilila nga mpanga ua zimbalele ahiluka kuli Yehova, ni nga muntu aluluka na kuiza mu vusunga. (Tandenu Luka 15:10.) Cikuavo naua, tungelo valihaka muakama mu cipanga ca kuambulula. (Kuso. 14:6) Vutuhu kave kuambulula mpundu citona meso, vunoni veku kuasa vakua kuambulula kuuana vantu vatonda kutantekeya Yehova. Vutuhu ngoco, kacitava tuhandeke na vusunga vuaku sula ngandza ngecize tungelo vakevo mpundu vatu tuamenena kuli ngandi. Muomu Yehova ahasa kupangesa viuma vikuavo mukutu tuamenena, ngeci mua sipilitu santu. (Vili. 16:​6, 7) Vunoni, kasi ueku vapangesa muakama m cipanga ca kuambulula. Ngeci mukemuo, ngatuli mu kuambulula tukalenu na vusunga ngecize tungelo vaka tukuasa.—Talenu cikasa “Vivundilo Viavo vavi Kumbuluile.”b

9. Vati tuhasa ku tambuluisa cilemo ca tungelo ku vantu?

⁹ Vati tuhasa ku tambuluisa cilemo ca tungelo ku vantu? Nga tuivua mutambi uaku hiluka caumo muanetu mu vusunga, tueku viukilila ngeci mua tungelo. Kaha tupuenu nakulinga cose mukumu tambula na mavoko avali, kumuesa cilemo, nakumu vuisa ngecize kali-kali na hiluka. (Luka 15:​4-7; 2 Kol. 2:​6-8) Tuhasa naua ku tambuluisa tungelo, muku fuitangana mu cipanga ca kuambulula. (Ekel. 11:6) Kaha ngue muve kulinga tungelo muku kuasa mu kuambulula, netu tuapande kutonda vinjila viaku kuaselamo vamuanetu mulihia. Caku muenako, tuhasa ku likuminya kuambulula hamo na muanetu uamuha! Cikuavo naua, tuhasa kuambulula na vakulupe ni na vakua cihindu ca cindende.

10. Vika tua lilongesa ku muzimbu ua ndumbuetu Sara?

¹⁰ Vatico nga katue kuhasa kupuisamo via vingi, omolia vimo vitanga? Kasi tuhasa kuuana vukovelelo vua kupanga na tungelo mulihia. Halakanenu muzimbu ua ndumbuetu Sarac uaku India. Mu nima ya kulinga vupioneiru mu miaka 20, ndumbuetu Sara uakovela muku vavala kaha ke kuhasa naua kutunda ha muhela. Mua vusunga, kacitu komouesa ngecize uauilile mu vusiua vuakama. Vunoni na vukuasi vua vusoko vuendi vuamu lutsilielo naku tanda Mbimbiliya kusua kumo, kamandende-kamandende ua putukile naua kuivua ndzolela. Kaha omolia citanga cendi, ca tondekele alulule ambuluisi yendi. Mu kulinga kahasele cipue vene kutumama mu kusoneka mikanda, kuambulula cendi capuile likahoni caku telefone. Ngeci uakele naku sana mangendzi endi aku hilukila ku telefone, kaha vakevo vakele naku muleka naua via vantu veka vatondele ku lilongesa. Vika viezilemo? Mu vingonde via vindende lika, uakele na vilongesa via Mbimbiliya 70! Vunoni kahasele kuva longesa lika liendi! Ngeci ua haneneko vamo ku vamuanetu mu cikungulukilo. Cingi ca vandongesi vaco veku kunguluka. Mua vusunga, tungelo vekuivua ndzolela yakama ya kupanga na vamuanetu na vandumbuetu veku lihakela kapandi, ngeci mua ndumbuetu Sara!

TUNGELO VAPUA VAKUA KUKOLESA

11. Vati tungelo veku muesa lungano luaku komouesa kutuala haku kolesa?

¹¹ Tungelo vapua lungano luaku komouesa kutuala ha kukolesa. Ve kukolesa mu vuhenge na vukenia mu makulukazi a miaka. Kaha vamuene vakuavo tungelo vava lemesele hamo lika, va alulukila Yehova. (Njen. 3:1; 6:​1, 2; Yun. 6) Mbimbiliya ya handeka via umo kangelo uva luisile mpundu kuli umo ndemone ua ngolo, mu matangua aengi. (Ndan. 10:13) Kaha naua mu miaka yose iva kalako vantu, tungelo va mona vantu va vandende lika vahangula kupangela Yehova, vunoni cingi cavo kave kulingamo. Vutuhu ngoco, ava tungelo va kuononoka ve kupangela Yehova na ntuima na ndzolela. Va tantekeya ngecize, Njambi tangua aka fumisako vuhenge vuose, ha ntsimbu yacili.

12. Vika vihasa kutu kuasa kukolesa?

¹² Vati tuhasa ku tambuluisa kukolesa ca tungelo? Ngeci muavo, netu tuhasa kumona, kuhita mu vuhenge ni kutu luisa. Vunoni tueku tambuluisa lukuhalelo luavo ngecize, Njambi tangua aka manusula vuhenge ha ntsimbu yacili. Ngeci mua tungelo, ‘ka tue ku zeya mu ku linga vize via cili.’ (Ngal. 6:9) Kaha Njambi ua kulahesa ku tukuasa kukolesa. (1 Kol. 10:13) Tuhasa kuvundila sipilitu santu ya Yehova, muomu yeku tukuasa kukala na ntsintsa na ndzolela. (Ngal. 5:22; Kolo. 1:11) Vatico nga vami luisa? Kulahelenu muli Yehova na mutima uose kaha kati muivue liova, muomu Yehova akami kuasa nakumi kaniamesa ntsimbu yose.—VaHe. 13:6.

TUNGELO VEKU NIUNGA KULELA CA CIKUNGULUKILO

13. Cipanga cika ca kulifuila vatambula tungelo kuno ku matangua aku kotokela? (Mateu 13:​47-49)

¹³ Kuno ku matangua a ku kotokela, Yehova na hana tungelo cimo cipanga ca kulifuila. (Tandenu Mateu 13:​47-49.) Cipanga ca kuambulula ceku koka vantu vavengi kaha vaku liseza-seza. Vamo veku kola mu lutsilielo nakupua Vakua Kilistu vavusunga, vunoni vakuavoco kuahi. Kaha tungelo vatambula cipanga caku tepa “vakua vupi ku vakua vuviuke” ni nguetu, kuniunga kulela ca cikungulukilo. Eci kaca lombolokele ngecize, uose alikela kulikata netu kaka hiluka naua. Kaha kaca lombolokele naua ngecize, mu cikungulukilo kamu kakala vitanga, houe. Vunoni, tulina vusunga ngecize tungelo ve kulinga cose muku niunga kulela ca cikungulukilo.

14-15. Vati tuhasa ku tambuluisa seho iva haka tungelo kukulela ca cikungulukilo? (Talenu naua cikupulo.)

¹⁴ Vati tuhasa ku tambuluisa seho iva haka tungelo ku kulela ca cikungulukilo? Mu kulingako mutamba uetu, linga cikungulukilo ci tualeleleho kulela mu vilinga namu lutsilielo. Munjila ika? Mu ku lihakela kapandi ka kuniunga mutima uetu, mu kuhangula vavusamba va cili na kuviana vaze vahasa kutu hungumuna. (Visa. 101:3) Tuhasa naua kukuasa vamuanetu va tualeleleho ku kakatela kuli Yehova. Caku muenako, vati tuapande kulinga nga tu nongonona ngecize umo muanetu ni ndumbuetu na lingi vupi vua kama? Mu kulinga tuamu lema, tuapande kumu mamuna aye ku vakuluntu linga atambule vukuasi. Nga kalingimo, kaha cika tondeka honi yetu tulingemo. Muomu tu tonda uose-ouo ali na musongo uamu lutsilielo, atambule vuasi vukuasi!—Tia. 5:​14, 15.

¹⁵ Cavusiua kuhandeka nguetu, vamo ve kulinga vupi vuakama kaha ceku tondeka vene kuva tundisa mu cikungulukilo. Nga vana vatundisa, tueku ‘likela ku likata’ navo.d (1 Kol. 5:​9-13) Evi vie kuniunga kulela ca cikungulukilo. Kaha naua kulikela kulikata navaze va vatundisa, capua kuva muesa cilemo. Muomu kapandi ketu ka kulikela kulikata navo, kahasa kuva vuisa cizango ca kuhiluka kuli Yehova. Kaha nga va lingamo, tueku viukilila cikuma, hamo na Yehova na tungelo.—Luka 15:7.

16. Mu vinjila vika mutonda ku tambuluisa tungelo?

¹⁶ Mua vusunga, tuakala na civezikiso cakama cakumona muilu na meso etu alutsilielo kaha na kupangela hamo na tungelo! Tu lihakelenu kapandi kaku tambuluisa vifua viavo, ngeci mua: ku likehesa, kulema vantu, kukolesa kaha na seho ivahaka ku kulela ca cikungulukilo mu lutsilielo namu vilinga. Cilivene, nga tu tambuluisa tungelo, tuka tualelelaho kupua mutamba uavusoko vua Yehova ku miaka yose ya ya-ye.