Lizina Lia Yehova Lia Lomboloka Vika Kuli Yesu?

1-2. (a) Vika ua lingile Yesu ku vutsiki ntsimbu kanda atse? (b) Vihula vika tuhilula mu cilongesa cino?

LIAMU ciuano lia 14 ya Nisane ya 33 T.K.N., Yesu ua lingile cimo cilika caku lifuila hamolika na vapostolo vendi vakuononoka. Vunoni ua tantekeyele nguendi, vuovuno Yunda a muenda vungungu, kaha vitozi vendi vekumu yandesele nakumu tsiha. Ngeci mu nima ya cilika caco, ua handekele viuma viavingi via kaniamesele vapostolo vendi. Mu nima yaco, Yesu ualingile civundilo caseho yakama, kaha civundilo caco tuhasa ku citanda ku Yoano kapitulu 17.

² Mu cilongesa cino, tuka hilula vimo viuma vitu lilongesa ku civundilo calingile Yesu. Ca kulivanga, kuviuma vika Yesu ua tualele mana ntsimbu kanda atse? Mu kuambulula cendi cose, vika Yesu uatualele mana?

“NJINA VA TANTEKEYESA LIZINA LIOVE”

3. Vika Yesu ua handekele kutuala ha lizina lia Yehova, kaha vika mezi aco a lomboloka? (Yoano 17:​6, 26)

³ Mu civundilo cendi Yesu uahandele nguendi: “Njina va tantekeyesa lizina liove.” Yesu ua hilukililemo luvali luose muku muesa nguendi, ua tantekeyesele lizina lia Yehova ku vandongesi vendi. (Tandenu Yoano 17:​6, 26.) Vika Yesu uatondele kuhandeka? Vuno ua tantekeyesele vandongesi vendi lizina kava tantekeyele ni? Mua vusunga houe, muomu vandongesi va Yesu vapuile vaYundeya kaha va tantekeyele lizina lia Njambi Yehova. Kaha lizina liaco, lia soloka makulukazi na makulukazi mu visoneka via ciHevelu. Ngeci mukemuo, Yesu kakele na kuhandeka mpundu via lizina lia Yehova vunoni uakele na kuhandeka vika liemanena lizina liaco. Ngeci mua: Vutumbe, vipanga na vifua viendi, mu cifua cakulinga naumo uahi uahasele kulingamo.

4-5. (a) Mu cimueso eci, vika ca lomboloka kutantekeya vuino lizina lia muntu? (b) Munjila ika vandongesi va Yesu va tantenkeyele lizina lia Yehova?

⁴ Aci singaniekenu ha cimueso eci: Mu cikungulukilo cenu mua kala umo muanetu lizina liendi Ndaviti uapua mukuluntu mu cikungulukilo kaha naua ndotolo. Vamuanetu vamu tantekeya vuino mu miaka yayingi. Kaha tangua limo, umo uava muanetu avavala mua kama nakumu satusuila ku sipitali kueku pangela uze muanetu uapua ndotolo. Kaha ou muanetu ndotolo apangesa vutongue vuendi, mukusaka muanetu linga akanguke. Vati muanetu ivana saka aka muenamo muanetu Ndaviti? Mua vusunga, kaka mumono lika kupua mukuluntu mu cikungulukilo, vunoni naua kupua ndotolo uohielele muono uendi.

⁵ Navuno vene, vandongesi va Yesu va tantekeyele lizina lia Yehova, vunoni kuambulula ca Yesu cava kuasele kulimuena hatoma vilia lomboloka lizina liaco. Vika tu handekela ngoco? Muomu Yesu ua muesele vifua via Ise mu vilinga namu vihandeka. Ngeci mukemuo, vapostolo va Yesu va tantekeyele vuino Yehova muku halakana ku vilongesa via Yesu naku mona cifua yoyelemo na vantu.—Yoa. 14:9; 17:3.

“LIZINA LIOVE LIZE LI UANJI HANA”

6. Vati Yehova uahana lizina liendi kuli Yesu? (Yoano 17:​11, 12)

⁶ Yesu mu civundilo cendi, ua vundilile kutuala ha vandongesi vendi nguendi: “Vaniunge omo lia lizina liove lize li uanji hana.” (Tandenu Yoano 17:​11, 12.) Vuno eci ca lombolokele ngecize, Yesu vekumu tantekeyele kupua Yehova ni? Houe. Muomu Yesu mua handekele nguendi, “lizina liove,” uakele naku talekesa mezi aco kuli Yehova. Ngeci mukemuo, Yesu ka pangesele lizina liaYehova muku litumbula ivene. Nga mukemuo, vika uatondele kuhandeka mua vundilile nguendi lizina lia Njambi vamu helelio? Caku livanga, Yesu uapuile kanganda ka Yehova kaha ualingile vikomoueso mu lizina lia Ise. (Yoa. 5:43; 10:25) Cikuavo naua, lizina Yesu lia lomboloka “Yehova Muovole.” Mua vusunga, hakala ku litombola cakama ha lizina lia Yehova na Yesu.

7. Vati Yesu ua handekele mu lizina lia Yehova? Hanenu cimueso.

⁷ Linga tuivuisise vati Yesu ua handekele mu lizina lia Yehova, tu hilulenu ha cimueso cina hatako. Singaniekenu nga nguvulu atuma umo kanganda muku handeka mu lizina liendi. Kaha nga kanganda aya na kuambulula muzimbu ngue muze vene muva namutumu, mua vusunga mezi endi akapua ngue nguvulu mpundu alina kuhandeka. Navuno vene, Yesu uemanene Yehova na kuhandeka na vantu mu lizina lia Ise.—Mat. 21:9; Luka 13:35.

8. Omolia vika Yehova ua handekele nguendi lizina liendi lili muli Yesu ntsimbu kanda eze ha mavu? (Ezundu 23:​20, 21)

⁸ Yesu mu kupua Lizi, Yehova uamu pangesele mu kupua kanganda linga atuale mizimbu na vimamuna ku tungelo hamolika na vantu. (Yoa. 1:​1-3) Kaha cisoloka ngue Yesu ikeye uapuile kangelo ya pangesele Yehova muku kuasa vaIsaleli mu vindinda. Ngeci Yehova ualekele vaIsaleli nguendi: “Muomu lizina liange li li muli ikeye.”a (Tandenu Ezundu 23:​20, 21.) Lizina lia Yehova liakele muli Yesu, muomu ikeye uapuile uaku livanga mu kuimanenako Yehova mu kuambulula kaha naku lelesa lizina lia Ise.

“TATA, ZUMBANGEYA LIZINA LIOVE”

9. Seho ika Yesu uahakele ku lizina lia Yehova? Lombololenu.

⁹ Ngue mutua hilula, Yesu tele kanda acize ha mavu, lizina lia Yehova liakele lia seho yakama kuli Ikeye. Ngeci mukemuo, kacitu komouesa kumona nguetu, Yesu ua pangesele lizina lia Yehova mu viose via lingile muakele ha mavu. Ku kuhua ca kuambulula cendi ua handekele nguendi: “Tata, zumbangeya lizina liove.” Kaha Yehova uamu kumbuluile na lizi liakama nguendi: “Njina lizumbangeya laza kaha nji lizumbangeya naua.”—Yoa. 12:28.

10-11. (a) Vati Yesu ua zumbangeyele lizina lia Yehova? (Talenu naua cikupulo.) (b) Omolia vika lizina lia Yehova lia tondeka kuli lelesa naku lizumbangeya?

¹⁰ Yesu nendi ua zumbangeyele lizina lia Yehova. Vati ua lingilemo? Muku muesa vifua na vilinga via Ise ku vakuavo. Muomu cuma caseho yakama capuile kulelesa lizina lia Yehova naku hakuila lutsimo luendi.b Kaha Yesu ua muesele seho yaco, mua longesele vandongesi vendi via civundilo ca tatetu, nguendi: “Tatetu uli muilu, va lelese lizina liove.”—Mat. 6:9.

¹¹ Omolia vika lizina lia Yehova lia tondeka kuli lelesa naku lizumbangeya? Omolia makuli ahandekele Satana Ndiavu muku sahula naku vangeya Yehova Njambi mu Citungu ca Endene. Satana ua muesele nguendi, Yehova mukua makuli muomu ua vindikile vaAndama na Eva viuma via cili. (Njen. 3:​1-5) Muku kulingamo, ua muesele nguendi Yehova kafuilile kutu sika. Ngeci mukemuo, makuli a Satana akuata kulutsimo lua Yehova na lizina liendi. Kaha ku matangua a Yombi, Satana ua vangeyele vangamba va Yehova nguendi vapua tuvinga musukuma. Cikuavo naua, ua vuezeleko nguendi cilemo cavo capua cahelu-helu lika. Muomu nga vahita mu visoti vahasa kuseza Yehova. (Yombi 1:​9-11; 2:4) Ngeci mukemuo, ca tondekele ntsimbu muku muesa nga Satana ikeye mukua makuli ni Yehova.

“NJIHANA MUONO UANGE”

12. Kulema lizina lia Yehova ca kuasele Yesu ku kala na cizango caku kulinga vika?

¹² Kulema lizina lia Yehova ca kuasele Yesu, kulinga cose linga alelese naku zumbangeya lizina lia Yehova. Ivene nguendi: “Njihana muono uange.” (Yoa. 10:​17, 18) Mua vusunga, Yesu ua lihanene nakutsila lizina lia Yehova.c Cavusiua kuhandeka nguetu, vaAndama na Eva vutuhu vapuile vaku tantuluka, vavianene Yehova naku kala ku mutamba ua Satana. Vunoni, Yesu ua lihanene nakuiza ha mavu muku muesa cilemo cendi kuli Yehova. Ngeci, uononokele Yehova naku kakatela kuli Ikeye. (VaHe. 4:15; 5:​7-10) Yesu ua tualeleho kumuesa vuoloke naha kutsa cendi haciti. (VaHe. 12:2) Kulingamo, ua muesele cilemo cendi kuli Yehova na lizina liendi.

13. Omolia vika Yesu ikeye uafuilile kumuesa ngecize, Satana uapua mukua makuli? (Talenu naua cikupulo.)

¹³ Yesu mukuyoya cendi cose, uamuesele ngecize Satana ikeye mukua makuli kati Yehova. (Yoa. 8:44) Muomu Yesu ua tantekeyele vuino Yehova kuhiana muntu ueka. Kaha makuli ose a vangeyele Satana kuli Yehova nga apuile vusunga, Yesu nga ua atantekeyele. Ngeci Yesu ua tualeleho ku kakatela muli Yehova linga a hakuile lizina lia Ise. Kaha ambe vene muca solokele ngue Yehova namu seza, ua lihanene naha kutsa naku viana kumuesa lisino kuli Ise ua cilemo.—Mat. 27:46.d

“NJINA . . . MANUSULA CIPANGA CI UANJI HELE”

14. Vati Yehova ua lunguisile kuononoka ca Yesu?

¹⁴ Mu civundilo ca lingile ku vutsiki ntsimbu kanda atse, Yesu ua handekele nguendi: “Njina . . . manusula cipanga ci uanji hele linga nji cilinge.” Yesu ua tsilielele nguendi Yehova akamu lunguisa omolia kuononoka cendi. (Yoa. 17:​4, 5) Kaha lutsilielo luendi kalua ile mungoco. Muomu Yehova katavesele Yesu kutualelaho muvukalo vua vatsi. (Vili. 2:​23, 24) Cikuavo naua, Yehova ua sanguile Yesu nakumu haka kuvukama muilu. (Filp. 2:​8, 9) Kaha mukuhita ca ntsimbu, Yesu uaputukile kusika mu Vuangana vua Njambi. Vika vuka puisamo vuangana vuaco? Mutamba uamu civali ua civundilo ca tatetu nguaco: “Vuangana vuove vuize. Cizango cove [Yehova] va ci linge, hano ha mavu, ngue mu vali na ku ci linga muilu.”—Mat. 6:10.

15. Vika naua Yesu aka puisamo?

¹⁵ Vuovuno Yesu akalua na vitozi va Njambi naku vanongesa mu ndzita ya Alemangendo. (Kuso. 16:​14, 16; 19:​11-16) Mu nima yaco, Satana vaka mumbila “mu cina ka cesi na masima” ni nguetu kaka hasa naua ku tukokela navumo vusonde vuahi. (Kuso. 20:​1-3) Mukuhita ca likulukazi lia miaka, Yesu aka kuasa vantu kupua va kutantuluka na kuyoya mu ciyulo. Kaha aka sangula vatsi nakupuisa mavu ose citungu. Mua vusunga, vutumbe vua Yehova vuka lipuisamo.—Kuso. 21:​1-4.

16. Vika naua vika lipuisamo kuntsongo ya likulukazi lia miaka?

¹⁶ Vika naua vika lipuisamo kuntsongo ya likulukazi lia miaka? Vupi naku hona kutantuluka kavi kakalako. Ngeci mukemuo, katuka tondeka naua sasendote ku tuimanenako. Muomu ‘ku-tsa citozi uaku sulumuinako vaka muenieka.’ Kaha vihilo kavi kakalako naua muomu vatsi vaka sanguka. Cikuavo naua, vantu vose hamavu va kapua va kutantuluka.—1 Kol. 15:​25, 26.

17-18. (a) Vika vika soloka kuntsongo ya likulukazi liamiaka? (b) Vika Yesu akalinga mu nima yaku sika likulukazi liamiaka? (1 Kolintu 15:​24, 28) (Talenu naua cikupulo.)

¹⁷ Vika naua vika lipuisamo kuntsongo ya likulukazi liamiaka? Mu ntsimbu yaco kuka soloka viuma via ku lifuila cikuma. Cimpande caku lelesa lizina lia Yehova vaka cimanusula. Vati vaka cimanusula? Mu citungu ca Endene, Satana ua vangeyele Yehova nguendi, uapua mukua makuli kaha keku sika vantu na cilemo. Kuntsongo ya likulukazi liamiaka, lutsimo lua Yehova vaka lulelesa mu vutuntu. Kaha Yehova aka muesa ngecize uapua Tatetu ua cilemo.

¹⁸ Ngeci mutuna mono, vuovuno makuli ose a Satana vaka aneka ha mutanya. Vika Yesu aka linga mu nima yaku sika mu likulukazi lia miaka? Vuno aka kava lungano lua Satana na kualulukila Yehova ni? Houe. (Tandenu 1 Kolintu 15:​24, 28.) Yesu aka hiluisa vuangana kuli Ise. Cilemo cendi kuli Yehova, ceku muvuisa cizango caku muononoka mu viose kati ngue Satana.

19. Lizina lia Yehova lia lomboloka vika kuli Yesu?

¹⁹ Mua vusunga, kacitu komouesa kumona nguetu, Yehova uakala na cizango cakuhana Yesu lizina liendi. Kaha Yesu uamuesa ngecize uapua kanganda uaku tantuluka kuli Ise. Ngeci mukemuo, vika lia lomboloka lizina lia Yehova kuli Yesu? Yesu ua muesa seho yaco muku mulihana na cizango cose naku kutsa omolia lizina liaco. Kaha aka kala naua navukatuisi vuaku hiluisa viose kuli Yehova, ku ntsongo ya likulukazi lia miaka. Vati tuhasa ku tambuluisa lungano lua Yesu? Mu cilongesa cina hatako tuka hilula eci cihula.