“Hangulenu Litangua lia Lelo iya i mu ka Pangela”

1. Linga tuivue ndzolela vika tuapande kulinga, kaha omolia vika? (Isaya 48:​17, 18)

TATETU ua muilu uatu lema cikuma, kaha atonda tuyoye mu ndzolela mu ntsimbu inovene, naku lutue. (Ekel. 3:​12, 13) Yehova uatu tangele na vutongue vuaku komouesa, vunoni katu hanene vuhasi vuaku lituamenena ni ku lihanguila vize viacili navia vipi. (Ekel. 8:9; Yele. 10:23) Yehova atantekeya nguendi, linga tuivue ndzolela ya vusunga tuapande kumu lemesa naku yoya kuliya na masiko endi.—Tandenu Isaya 48:​17, 18.

2. Satana atonda tu tsiliele makuli aka, vunoni vika Yehova ualingile?

² Vika Yehova ualingile kutuala ha makuli aco? Ua tavasele vantu va lituamenena vavene mu kantsimbu lika. (Njen. 3:​4, 5) Kaha tueku limuena vika viezamo mu veku lituamenena vantu. Vunoni Mbimbiliya ya sula na malungano a vamala na vampuevo, va yoyele muono ua ndzolela muku pangela Yehova. Umo uavo uapua Yesu Kilistu. Mu cilongesa cino, caku livanga, tuhilula omolia vika Yesu uahanguile kupangela Yehova. Camu civali, omolia vika Tatetu ua muilu uafuila ku mupangela. Kaha caku manusuila, tuhilula vusunga vuatu lingisa kuhangula kupangela Yehova.

OMOLIA VIKA YESU UAHANGUILE KUPANGELA YEHOVA?

3. Satana uahele vika kuli Yesu, kaha vika Yesu ua hanguile kulinga?

³ Yesu muakele hano mavu, ua tondekele kuhangula iya ueku pangelele. Mu nima ya mbatizimu, Satana uamu kulahesele nguendi ueku mu hanene mavuangana ose aha mavu, nga ueku mu lemesele. Vunoni Yesu uamu kumbuluile nguendi: “Tundomu ove Satana! Muomu vasoneka nguavo: ‘Ua pande ku lemesa Yehova Njambi na ku pangela lika ikeye.’” (Mat. 4:​8-10) Omolia vika Yesu ualingile cihangula caco? Tu hilulenu vumo vusunga.

4-5. Omolia vika Yesu ua hanguile kupangela Yehova?

⁴ Yesu uahanguile kupangela Yehova, muomu uamu lema cikuma. (Yoa. 14:31) Ua lingilemo naua, muomu Yehova ikeye uafuila ku mupangela. (Yoa. 8:​28, 29; Kuso. 4:11) Ua tantekeyele nguendi, Yehova uapua Ndundzi ya muono, citava kumu kulahela kaha uapua cihuanga. (Visa. 33:4; 36:9; Tia. 1:17) Yehova uakele naku leka Yesu vusunga, kaha naku mu hana viose viakele navio. (Yoa. 1:14) Vunoni Satana uatu kokela kutsa. Cikuavo naua, uapua mukua makuli na mukua lizangamena. (Yoa. 8:44) Omolia ku tantekeya vusunga vuaco, Yesu ka tambuluisile Satana muku muesa lisino kuli Yehova.—Filp. 2:​5-8.

⁵ Vusunga vukuavo vua lingisile Yesu kuhangula kupangela Yehova, vuapuile kutuala mana ku viuma vieku lipuisilemo omolia cipanga cendi. (VaHe. 12:2) Ua tantekeyele nguendi, nga atualelaho kupangela Yehova, aka lelesa lizina lia Ise naku manusula visoti viose viakoka Ndiavu.

OMOLIA VIKA YEHOVA UAFUILA KUMU LEMESA?

6-7. (a) Omolia vika cingi ca vantu lelo lino kave kupangela Yehova? (b) Omolia vika Yehova uafuila kumu lemesa?

⁶ Cingi ca vantu lelo lino, kave kupangela Yehova muomu kava tantekeya vifua viendi, kaha kava tantekeya viose viava lingila. Vantu vaco, valifua na vakua Atena vambuluilile kapostolo Paulu. —Vili. 17:​19, 20, 30, 34.

⁷ Kapostolo Paulu ua lekele vakua kumu halakana nguendi: Njambi ua vusunga, “ikeye ue kuhana vose muono, na muku na viuma viose.” Kaha ua handekele naua nguendi: “Omo liendi, tuli na kuyoya, kuenda kaha ku tua kala.” Njambi ikeye Sakatanga, “ua tangele miyati yose ya vantu.” Ngeci mukemuo uafuila kumu lemesa.—Vili. 17:​25, 26, 28.

8. Vika Yehova kaka lingi nalimo litangua liahi? Lombololenu.

⁸ Muku linga Yehova uapua Sakatanga na Mukua Kuhiana mu kaye kose, nga ueku sindiya vantu vamu pangele. Vunoni nalimo litangua liahi aka lingamo. Yehova uatu muesa vukaleho vua muesa ngecize kuakala, kaha uatu lema cikuma muntu ku muntu. Cikuavo naua, atonda vantu vose vapue vavusamba vendi ku miaka yose. (1 Tim. 2:​3, 4) Ngeci mukemuo, Yehova ueku tulongesa muaku lekako vakuetu via vutumbe vuendi, naku valeka muzimbu uacili kutuala ha viuma viaka lingila vantu kulutue. (Mat. 10:​11-13; 28:​19, 20) Tue kuhasa naua kumu lemesa, kuhitila mu cikungulukilo kaha uatu hana vakuluntu veku tuniunga na cilemo.—Vili. 20:28.

9. Vati Yehova ueku muesa cilemo ku vantu vose?

⁹ Yehova ueku muesa cilemo ku vantu vose ambe kuli vaze kava tsilielele nguavo kuakala. Caku muenako, mu miaka yayingi vantu va lihanguila kuyoya kuliya na cizango cavo. Vutuhu ngoco, Yehova ueku va muesa cilemo naku vahana viuma viva tondeka linga va tualeleho kuyoya naku litovalesa muono. (Mat. 5:​44, 45; Vili. 14:​16, 17) Omo liaco, ve kuhasa kukala na vavusamba na vavusoko vava lema, kulela vana, kupanga naku litovalesa muono. (Visa. 127:3; Ekel. 2:24) Vusunga vuaco vua muesa hatoma ngecize, Yehova ualema vantu vose. (Ezu. 34:6) Tuhilulenu vumo vusunga vueku tulingisa kuhangula kulemesa Yehova na vati ueku tuvezikisa.

OMOLIA VIKA TUAHANGULA KUPANGELA YEHOVA

10. (a) Vusunga vuka vueku tulingisa kupangela Yehova? (Mateu 22:37) (b) Vukuasi vuka tue kutambula omolia ntsintsa ya Yehova? (Visamo 103:​13, 14)

¹⁰ Ngeci mua Yesu, tue kupangela Yehova muomu tua mulema cikuma. (Tandenu Mateu 22:37.) Mu tueku lilongesa vifua via Yehova tue kuivua cizango caku suena kuli Ikeye. Tu hilulenu ha ntsintsa yeku tu muesa Yehova. Caku muenako, vaIsaleli muva muesele lisino, Yehova uava vundilile nguendi: “Hilukenu vuovuno muntu uose ku njila yeni ya ipi.” (Yele. 18:11) Yehova uatantekeya nguendi katua tantulukile, tuapua mpumputa. (Tandenu Visamo 103:​13, 14.) Mu mue kuhilula ha ntsintsa ya Yehova na vifua viendi vikuavo viaku komouesa, kamue kuivua cizango caku mupangela ku miaka yose ni?

11. Vusunga vukuavo vuka vueku tulingisa kupangela Tatetu ua muilu?

¹¹ Tueku pangela Yehova muomu uafuila ku mupangela. (Mat. 4:10) Cikuavo naua, mutue kupangela Yehova tueku kuasa ku lelesa lizina liendi. Tueku muesa nguetu Satana uapua mukua makuli, kaha tueku zolesa mutima ua Yehova. Kaha nga tuhangula kupangela Yehova lelo lino, tuka kala na vukovelelo vuaku mupangela ku miaka yose.—Yoa. 17:3.

12-13. Vika tu lilongesa ku muzimbu ua vandumbuetu Jane na Pam?

¹² Ambe nga muapua vanike, muhasa kulema cikuma Yehova. Kaha omo muya naku kola cilemo cenu ciya naku livuezelela. Tu hilulenu ha muzimbu ua vaJane na vaPam vapua vantsongo na mukuluntu. Muva putukile ku lilongesa Mbimbiliya, vaJane vakele na miaka 11 kaha vaPama vakele na 10. Vutuhu visemi kuva tondele ku lilongesa Mbimbiliya, vunoni va tavesele vana vavo kulikata na Vakaleho va Yehova, vunoni vapandele kuya mu vulombelo vua visemi vavo. Ndumbuetu Jane ua handekele nguendi: “Ku lilongesa Mbimbiliya na Vakaleho va Yehova canji kuasele kuhona kuuila mu ntsindiye ya vakuetu muku likovelesa mu vidroga na vupangala.”

¹³ VaJane na vaPam vapuile vankavala mu vaputukile kuambulula. Mu nima yaco va kovelele mu cipanga ca vupioneiru oku vaniunga visemi vavo vava kulupe. Ndumbuetu Jane uahandekele naua nguendi: “Nja limuenene naua nguange, Yehova ueku niunga vavusamba vendi. Kaha ngue muua muesa 2 Timoteu 2:​19, ‘Yehova atantekeya vaze vanapu vendi.’” Mua vusunga Yehova uahaka seho yakama kuli vaze veku hangula kumu lema naku mupangela!

14. Vati tuhasa kulelesa lizina lia Yehova kuhitila mu mezi na vilinga vietu? (Talenu naua vikupulo.)

¹⁴ Tu tonda kulelesa lizina lia Yehova mu viuma viose. Aci singaniekenu nga muli naumo kavusamba uacili, mukua vuhuanga kaha uapua mukua kuecela. Vunoni muivua umo avangeya kavusamba kenu nguendi, uapua cikenya kaha kapuile mukua vusunga. Vika muka linga? Mua vusunga muka muhakuila. Navuno vene, Satana na vantu vendi mu veku sandola makuli kutuala hali Yehova, tueku hakuila Yehova muku handeka vusunga kutuala hali Ikeye. (Visa. 34:1; Isaya 43:10) Tueku muesa nguetu tueku pangela Yehova na mutima uose, kuhitila mu mezi namu vilinga.

15. Vivezikiso vika uatambuile kapostolo Paulu mualuluile vimo mu muono uendi? (Filipu 3:​7, 8)

¹⁵ Tue kualulula vizango vietu mu muono, linga tu pangele Yehova mu vutuntu. Caku muenako, kapostolo Paulu ua hanguile kuseza lutsimo muimbo liendi linga akave Kilistu naku pangela Yehova. (Ngal. 1:14) Omo liaco, ua yoyele muono ua ndzolela na kukala na vukovelelo vuaku kasika na Kilistu muilu. Kaha nalimo litangua liahi ua liveyele omolia cihangula calingile, netu vene nalimo litangua liahi tuka liveya nga tulingamo.—Tandenu Filipu 3:​7, 8.

16. Vika tu lilongesa ku muzimbu ua ndumbuetu Julia? (Talenu naua vikupulo.)

¹⁶ Nga tu tuameka cipanga ca Yehova mu muono uetu, tuhasa kuyoya muono uacili lelo, naku lutue. Tu hilulenu ha muzimbu ua ndumbuetu Julia. Ntsimbu kanda alilongese vusunga, kuputuka kuvunike ua puile mukua kuimba mu Igreja. Kaha umo mukua kuimba ua vutongue ua nongonuene vutongue vua ndumbuetu Julia naku mu longesa ku vueza ku vutongue vuaco. Ndumbuetu ua tsimanene cikuma, kaha uakele na kuimbila ku vihela via kutsimana. Tangua limo tele ali ku sikola ya miaso, umo muanetu uamu longesele lizina lia Njambi, Yehova. Kaha muntsimbu yayindende lika ndumbuetu Julia ua putukile ku lilongesa Mbimbiliya luvali mu simano. Mu nima yaco, ua hanguile kupangela Yehova, mu cihela caku kava lutsimo. Vunoni kulinga cihangula caco, kaca puile cacasi. Ndumbuetu Julia nguendi: “Vantu vavengi vakele naku njileka nguavo, njili naku pihisila vuana vuange mungoco. Vunoni nja tondele kupangela Yehova muvutuntu.” Vati ndumbuetu Julia ali naku livua omolia cihangula ca lingile imo miaka 30 ku nima? Ivene nguendi: “Njakala na ciyulo camu visinganieka, kaha nja tsiliela nguange Yehova aka puisamo vizango viange kulutue.”—Visa. 145:16.

TUALELENUHO KUPANGELA YEHOVA

17. Vati ku tantekeya nguetu tuli muhiehi naku kotoka ca mavu, ca kuata kuli vaze vahangula kupangela Yehova na vaze kanda va lingemo?

¹⁷ Tuli muhiehi naku kotoka ca mavu. Ngeci kapostolo Paulu ua sonekele nguendi: “Muomu kua litulu kantsimbu ka kandendende, Mukua ku iza a keza, ka li ka tokaho.” (VaHe. 10:37) Vati muzimbu uaco ualikuata netu? Ca kulivanga, muomu ntsimbu ina lisupuho linga vantu vahangule kupangela Yehova, yayindende. (1 Kol. 7:29) Kaha nga tua hangula laza kupangela Njambi, tua tantekeya nguetu vutuhu tuhasa kuhita mu visoti, vunoni ‘mu ntsimbu yayindende lika.’

18. Yehova na Yesu vatonda tulinge vika?

¹⁸ Yesu ua kaniamesele vandongesi vendi nguendi, kava pandele lika kuputuka kumu kava, vunoni naku tualelaho kulingamo. (Mat. 16:24) Ngeci mukemuo, nga muli na kupangela Yehova mu miaka yayingi, kati muhilukile mu nima. Vunoni muapande ku lihakela kapandi kaku tualelaho ku mupangela. Vutuhu capua cacikalu, vunoni nga tulingamo tuhasa kutambula vivezikiso viavingi ambe muntsimbu ino.—Visa. 35:27.

19. Vika tu lilongesa ku muzimbu ua muanetu Gene?

¹⁹ Vamo veku singanieka nguavo, kupangela Yehova capua ku liputuisa muono uacili. Nga muapua vakuendze ni vahumbe, vuno mueku singanieka nguenu mueku liputuisa muono uacili omolia kuhangula kupangela Yehova ni? Muanetu Gene uapua mukuendze ua handekele nguendi: “Nja singaniekele nguange njakele naku liputuisa muono ua ndzolela omolia kupua Mukaleho ua Yehova. Muomu cingi ca vanike vanja kolele navo, valemene cikuma vilika, ku litantekeya na kueha vueho vua luozi. Vunoni ange njakele na kupangesa ntsimbu yange mu kuambulula naku kunguluka.” Vati visinganieka viaco viakuatele muanetu Gene? Ivene nguendi: “Nja putukile kuyoya muono ua vuongono naku livuisa ndzolela, vunoni ndzolela yaco kaya tualeleho. Ngeci nja hiluile ha vusunga vuamu Mbimbiliya vunja sembuluile kaha nja likuminyine kupangela Yehova na mutima uange uose. Fume ha ntsimbu yaco, njeku mona nguange Yehova ueku kumbulula vivundilo viange viose.”

20. Kapandi kaka tuapande kulihakela?

²⁰ Mukua Visamo uembilile Yehova nguendi: “Ua vezika uze i u ku hangula, na ku mu suenesa kuli ove, linga a kale mu lipela liove.” (Visa. 65:4) Netu tu lihakelenu kapandi kaku puisamo via likuminyine Yehosua mua handekele nguendi: “Ange ni na ndzivo yange, tu ka pangela Yehova.”—Yeho. 24:15.