Miaso ya Iha ya ku Lemesa Nayo!
1 Ku ciuano ca muaka ca vakua Watch Tower Bible and Tract Society of Pennsylvania ca keleko lia 4 ya Kulombo ya 2014, va hanene mutambi ua ku hituluka mu mukanda uetu ua miaso. Ou mutambi ua nehele ndzolela ya kama! Va vuluisile mbunga yose ya keleko, seho i ya pande ku kala nayo miaso ya Vuangana mu ku lemesa cetu.—Visa 96:2.
2 Mu tonda ku tantekeya omo lia vika va hitulukila mu miaso yetu ni? Via vingi vi lingisa ngoco. Ca ku livanga, ku ivuisisa cetu ca Mbimbiliya kasi ci li na ku livuezelela, ngeci na mezi a mu miaso yetu nao aluluka. (Visi 4:18) Cikuavo naua, cingi ca mezi a mu mukanda uetu ua miaso va a tundisile mu Mbimbiliya ya laza ya Tradução do Novo Mundo. Ngeci mukemuo mezi aco a na pande ku a sungamesa linga a litombole na Mbimbiliya ya iha. Omo lia vukama vua cipanga ca ku alulula mezi a mu miaso, mu mukanda ua miaso va na vuezamo imo miaso ya iha.
3 Vuno tu ka vandamena noho mukanda ua uha ua miaso u ka tuhuka amba tu kembe miaso ya iha ni? Houe. Tuli na ndzolela ya ku mi leka nguetu mu vingonde vi hatako, tu ka haka haka miaso ya ingi ya iha mu Site yetu jw.org. Nkala muaso ua uha u ka tuhuka, va ka u haka mu KM ku ntsongo ya ku Kunguluka ca Vipanga na ku sonekako nguavo “muaso ua uha.”
4 Mua ku Lilongesela Miaso ya Iha: Ca cikalu ku lilongesa muaso ua uha. Vunoni, ngeci mua mukua visamo, tu tonda ku pua na ku imba mu ku kunguluka kati ku “holoka” houe. (Visa 30:12) Kavenu vinanga vili muintsi linga mu lilongese muaso ua uha.
Puenu na ku halakana ku muaso u mu uana mu Site yetu. Nga mu halakana muaso vintsimbu via vingi, ci ka pua ca casi ku u patekela.
Lilongesenu mezi a muaso na ku seteka ku a patekela.
Kavangeyenu muaso ua ku ngalavala oku muimba. Lingenumo noho mu na u kuata vuino.
Liviukisilenu imo miaso ya iha mu Ku-lemesa ca mu Vusoko noho vantu vose ha ndzivo va na u kuata.
5 Mu vingonde vi hatako, nga va na hangula muaso ua uha mu ku soka ku Kunguluka ca Vipanga, vamuanetu mu cikungulukilo va ka halakana muaso ua ku ngalavala lumo. Mu nima yaco, amba vuose va ka kavangeya muaso ua ku ngalavala, ngue mu tue ku linga.
6 Ku imba ku viuano vietu, ce ku tu kuasa u ivua ndzolela ya ku pandakana mezi etu mu ku lemesa Yehova. Ngeci mukemuo, ka tua pandele ku lizilisa ku katuka katuka ha ntsimbu ya ku imba muaso nga tuli mu ku lemesa.
7 Kuli naua njila ikuavo i tu hasa ku muesa nguetu tua haka seho ku miaso yetu ya ku lela. Ku viuano via muhato na limbo, ve ku imbisa miaso ntsimbu kanda va putuke programa. Luvali mu muaka, vamuanetu ve ku enda mangendzi, ku fuma ku vimbango viuana via mavu, ku vimbongo viavo kuya ku Patterson, Nova York, va ka sike miaso i tue ku imba mu ku lemesa. Ngeci mukemuo, nga ntuamena ua programa a tu lania ku tumama na ku halakana miaso i va na viukisa, tua pande ku ononoka. Ku lingamo ci ka tu kuasa ku haka mutima ku vilongesa vi hatako.—Ezel 7:10.
8 Ku ntsongo ya ku kunguluka ca lelo, tu imba muaso ua uha, uli na mutue “Vuangana Vuli na ku Sika—vu Ize.” Ou muaso, u va na muesele ku ciuano ca muaka, va u pangela ku lipuisamo ca miaka 100 ya ku sika ca Vuangana.
9 Mua vusunga miaso ya iha ya pua mpundu viuma “via cili” vi na fumu kuli Yehova. (Mat. 12:35a) Tu lihakelenu kapandi ka ku lilongesa eyi miaso ya iha na ku imba na mitima yose mezi a ku sangaziala na ku hana vumpahu kuli Njambi yetu!—Visa. 147:1.