‘Tualelenuho ku Kava’ Yesu Ambe nga va mi Mbatiza

1-2. Vivezikiso vika ue ku tambula muntu mu nima ya ku mu mbatiza?

TUE KUIVUA ndzolela ya kama nga va na tu mbatiza na ku kovela ku vusoko vua Yehova. Mua vusunga, ca pua ku vezika ca kama ku likuata vusamba vua cili na Yehova. Tu vose tu tava mezi a handekele Ndaviti ngueni: “[Yehova,] ua vezika uze i u ku hangula, na ku mu suenesa kuli ove, linga a kale mu lipela liove.”—Visa. 65:4.

² Yehova ke ku tavesa muntu uose-ouo a likuate vusamba nendi. Ngue mu ca muesa cilongesa ci na hiti, Yehova ue ku koka lika vaze ve ku muesa ngecize, va tonda mpundu ku likuata vusamba vua cili neni. (Tia. 4:8) Mu mue ku lihana kuli Yehova na ku mi mbatiza, mue ku likuata vusamba na Yehova mu cifua ca ku lifuila. Ngeci mukemuo, mu hasa ku kala na vusunga nguenu, cipue mu nima ya ku mi mbatiza “a ka mi muaniena civezikiso, ngecize ka mu ka kala na muhela ha ku ci tambuila.”—Mal. 3:10; Yele. 17:​7, 8. 

3. Kapandi kaka va pande ku lihakela Vakua Kilistu va ku mbatiza? (Ekelesiaste 5:​4, 5)

³ Ku mi mbatiza ca pua lika vuputukilo vua muono uenu mu ku pangela Yehova. Mu nima ya ku mi mbatiza, mua pande ku lihakela kapandi ka ku puisamo cikulaheso cenu ca ku tualelelaho ku pangela Yehova, cipue nga mu hita mu vieseko ni mu pinda na visoti. (Tandenu Ekelesiaste 5:​4, 5.) Mu ku pua ndongesi ya Yesu, mu ka lihakela kapandi ka ku kava lungano lua Yesu na masiko eni. (Mat. 28:​19, 20; 1 Pet. 2:21) Cino cilongesa ci mi kuasa ku lingamo.

‘TUALELENUHO KU KAVA’ YESU AMBE NGA MU PINDA NA VISOTI NI VIESEKO

4. Mu njila ika vandongesi va Yesu ve kuambata ‘citi’? (Luka 9:23)

⁴ Kati mu singanieke nguenu nga va mi mbatiza, kaha ka mu ka hita naua mu visoti. Yesu ua lekele vandongesi veni ngueni ve kuambatele ‘citi.’ Kaha ve ku lingilemo “ku litangua ku litangua.” (Tandenu Luka 9:23.) Vuno Yesu ua handekele ngueni vandongesi veni, ve ku muene lamba ntsimbu yose ni? Houe. Ua handekele lika ngueni, vutuhu ve ku tambuile vivezikiso, vunoni ve ku hitile mu visoti. Kaha visoti viaco, vimo vie ku puile via vikalu cikuma.—2 Tim. 3:12.

5. Vivezikiso vika ua kulahesa Yesu ku vose ve ku tuameka Vuangana vua Njambi?

⁵ Halumo va mi luisa laza ku vusoko vuenu ni mua seza vupite linga mu tuameke Vuangana vua Njambi mu muono. (Mat. 6:33) Nga mukemuo, kaha kalenu na vusunga nguenu Yehova ue ku mona viose vi mue ku mu lingila. (VaHe. 6:10) Cili vene, mue ku limuena vusunga vua mezi a Yesu mua handekele ngueni: “Na umo uahi na seza ndzivo, cipue vana va naye, va vamala cipue va vampuevo, cipue naye, cipue ise, cipue vana veni, cipue mehia, omo yange, nomo zimpande zia cili, vunoni a ka tambula cihita ku cuma cimo ca na sile ku ntsimbu eyi ya vuovuno, zindzivo, na vana va naye va vamala na ava va vampuevo, na vanaye, na vana veni, na mehia, hamo na tuyando; kaha ku ntsimbu ya ku izako muono ka ue ku hua ua ya-ye.” (Mako 10:​29, 30) Mua vusunga, vivezikiso vi mua tambula via hania viose vi mua seza ku nima, omo lia ku tuameka Vuangana vua Njambi.—Visa. 37:4.

6. Mu nima ya ku mi mbatiza, omo lia vika mu ka tondeka ku tualelelaho kulua na “lisungu lia ntsitu”?

⁶ Mu ku linga ka mua tantulukile, mu nima ya ku mi mbatiza kasi mua pande ku tualelelaho ku lua na “lisungu lia ntsitu.” (1 Yoa. 2:16) Vintsimbu vimo, halumo nenu mu hasa ku livua ngue mua livuile kapostolo Paulu. Ua sonekele ngueni: “Nji viukilila mu mezi a lisiko a Njambi na vuntu vua mu kati: vunoni nji mona mezi eka a lisiko mu vilio viange, akeo a li na ku lua ndzita na mezi a lisiko a mu mutima uange, na akeo a li na ku nji kutiliya ku vundzinda vua mezi a lisiko a vupi, aze a li mu vilio viange.” (Loma 7:​22, 23) Mu hasa kuivua vusiua omo lia kulua na masungu. Vunoni, nga mu vuluka vi mua kulahesele Yehova mu mua lihanene kuli ikeye, ci ka mi kuasa ku lua na vieseko. Vusunga ni ovu: vi mua kulahesele Yehova vi ka mi kuasa nga mu hita mu vieseko. Mu njila ika?

7. Vati ku lihana kuli Yehova ci ka mi kuasa ku tualelelaho ku muononoka?

⁷ Mu mue ku lihana kuli Yehova, mue ku liviana enu vavene. Eci ca lomboloka ngecize, mua pande ku viana vizango vienu ni matumbe ka e kuya Yehova ku mutima. (Mat. 16:24) Kaha nga mu hita mu ceseko, ka mu ka lisosomua ku tuala ha vika mu ka linga. Muomu mu ka hangula ku tualelelaho kuononoka Yehova. Ku lingamo, mu ka tambuluisa Yombi. Vutuhu ua hitile mu visoti via vikalu, vunoni ua handekele ngueni: “Ka nji ka lisondoluela vuoloke vuange.”—Yombi 27:5.

8. Vati ku vuluka vi mua kulahesele Yehova mu mua lihanene kuli ikeye, ci ka mi kuasa ku vula vieseko?

⁸ Nga mu pua na ku vuluka vi mua kulahesele Yehova mu mua lihanene kuli ikeye, ci ka mi kuasa ku vula nkala ceseko. Ca ku muenako, vuno mu ka lisakalala via masungu na muntu ua kala laza na mukua ndzivo yendi ni? Houe. Muomu mua kulahesele Yehova nguenu, ka mu ka linga viuma ngeci muevi. Nga ka mu kala na visinganieka via ku pihia, kaha mu nima yaco ka mu ka tondeka ku lua mu ku litundisavio. Nga mu lingamo, ka mu kendela “mu njila ya vakua [vupi].”—Visi. 4:​14, 15.

9. Vati ku vuluka vi mua kulahesele Yehova mu mua lihanene kuli ikeye, ci ka mi kuasa naua ku tualelelaho ku mu tuameka?

⁹ Vati co nga va mi hana vipanga vi ka mi tanganesa ku kunguluka ntsimbu yose? Mua vusunga, mu tantekeya vi mua pande ku linga. Ntsimbu kanda va mi hane vipanga viaco, mua likuminine laza nguenu ka mu ka tava vipanga vi mi tanganesa ku kunguluka. Ngeci mukemo, ka mu ka tava vipanga viaco kaha na ku seteka ku tuameka Yehova mu nima yaco. Ku hilula lungano lua Yesu ci ka tu kuasa cikuma. Ua lingile cose mu kuya Ise ku mutima. Ngeci mua Yesu, nenu lihakelenu kapandi ka ku tualelelaho ku viana viose ka vie kuya Yehova ku mutima.—Mat. 4:10; Yoa. 8:29.

10. Mu nima ya ku mi mbatiza, vati Yehova a ka mi kuasa mu ‘tualeleho ku kava’ Yesu?

¹⁰ Nga mu hita mu visoti ni ceseko ca ku linga via ku pihia, mu hasa ku muesa nguenu mu tonda ku ‘tualelelaho ku kava’ Yesu. Omo mu lingamo, mu hasa ku kala na vusunga nguenu, Yehova a ka mi kuasa. Mbimbiliya nguayo: “Vunoni ceseko ka ca mi esekele, ku vanga cize muntu a ci hasa: vunoni Njambi mukua cili, ikeye ka tava ngecize va mi esieke nevi via hiana ngolo yenu; vunoni hamo lika na ceseko a lingilako naua aha ha mu ka tuhukila, linga mu ka hase ku kolesa.”—1 Kol. 10:13.

VATI MU HASA KU TUALELELAHO KU KAVA YESU?

11. Vati mu hasa ku tualelelaho ku kava Yesu? (Talenu naua cikupulo.)

¹¹ Yesu ua pangelele Yehova na mutima uose, kaha ua kele na ku vundila ntsimbu yose. (Luka 6:12) Mu nima ya ku mi mbatiza, nga mu tualelelaho ku linga viuma vi kaniamesa vusamba vuenu na Yehova, ci ka mi kuasa ku tualelelaho ku kava Yesu. Mbimbiliya nguayo: “Hose ha tua heta, hakeho tu endienuho.” (Filp. 3:16) Vintsimbu vimo, mu kevua mizimbu ya vamuanetu va hangula ku linga via vingi mu cipanga ca Yehova. Halumo va ile ku Sikola ya Vakua ku Ambulula Vuangana na ku nungulukila kuze ku tondeka vukuasi. Nga ci mi tavesa, nenu mu hasa ku kala na vutumbe vuaco. Vangamba va Yehova ve ku tonda vinjila via ku linga via vingi mu cipanga ca kuambulula. (Vili. 16:9) Vunoni, vati co nga mu ntsimbu ino ka mu hasa ku lingamo? Kati mu singanieke nguenu vamuanetu ve ku hasa ku lingamo va kala na seho ku hiana yenu. Vunoni, tualelenuho ku kolesa, muomu cikeco ca seho. (Mat. 10:22) Vulukenu nguenu mue ku vuisa Yehova ndzolela mu mue ku mu pangela kuliya na vuhasi vuenu. Ku lingamo, ca pua ca seho linga mu tualeleho ku kava Yesu mu nima ya ku mi mbatiza.—Visa. 26:1.

12-13. Vika mua pande ku linga nga ndzolela i mua kele nayo mu cipanga ca Yehova ili na ku tepuluka? (1 Kolintu 9:​16, 17) (Talenu naua cikasa “Tualelenuho ku Tunta.”)

¹² Vika mua pande ku linga nga mu mona nguenu ka mue ku vundila naua na mutima uose, ni ka mua lemene naua kuambulula ngue mu mua lingile laza? Vati co nga ka mua lemene naua ku tanda Mbimbiliya ngue mu mua lingile laza? Nga mukemuo, kati mu singanieke nguenu ka muesi naua na sipilitu ya Yehova. Ka mua tantulukile, ngeci mukemuo vintsimbu vimo mu hasa ku zeya. Nga ntuima yenu i putuka ku tepuluka, hilulenu lungano lua kapostolo Paulu. Vutuhu ua lihakelele kapandi ka ku tambuluisa Yesu, vunoni ua tantekeyele ngueni vintsimbu vimo ka kele na cizango ca ku linga via pandele ku linga. (Tandenu 1 Kolintu 9:​16, 17.) Ua handekele ngueni: “Nga kati ku cizango cange ivene, nga va na nji kundika vipanga vimo via mukua ku pangeziela.” Aa mezi a lomboloka ngecize, Paulu ua lihakelele kapandi ka ku puisamo cipanga ca kuambulula, vutuhu vintsimbu vimo ua livuile ku zeya.

¹³ Na vuno vene, kati mu linge vihangula kuliya na cifua ci mu livuilamo. Vunoni, lihakelenu kapandi ka ku linga via cili ambe nga ka muesi na cizango ca ku lingamo. Muomu nga mu tualelelaho ku linga via cili ntsimbu yose, cifua ci mue ku livuilamo ci ka aluluka. Ngeci mukemuo, tualelenuho ku lilongesa mu vulika, ku vundila, ku kunguluka, na kuambulula. Ku lingamo ci ka mi kuasa ku tualelelaho ku kava Yesu mu nima ya ku mi mbatiza. Kaha vamuanetu mu va ka mona kapandi kenu, ci ka va kaniamesa.—1 Tes. 5:11.

“LIESEKIENU . . . LISETEKIENU”

14. Vika mua pande ku hilula kusua kumo, kaha omo lia vika? (2 Kolintu 13:5)

¹⁴ Ambe mu nima ya ku mi mbatiza, ca pua ca seho ku lihilula kusua kumo. (Tandenu 2 Kolintu 13:5.) Puenu na ku hilula muono uenu na vilinga, mu mone nga mue ku vundila tangua na tangua, ku tanda na ku lilongesa Mbimbiliya, ku kunguluka kaha na kuambulula. Lihakelenu kapandi ka ku puisamo viuma viaco linga muivue ndzolela. Ca ku muenako, lihulenu nguenu: ‘Vuno nji hasa ku lumbununa vilongesa via katete via mu Mbimbiliya ni? Vati nji hasa ku tovalesa cipanga ca kuambulula? Vika nje ku tsindika mu vivundilo viange? Vuno vi nje ku vundila vie ku muesa ngecize nja tsiliela muli Yehova ni? Vuno nje ku kunguluka ntsimbu yose ni? Vika nji hasa ku linga nji tuale mana ku viuano na ku kumbulula?’

15-16. Vika tua lilongesa ku muzimbu ua muanetu Robert ku tuala ha vula ceseko?

¹⁵ Ca pua ca seho ku nongonona vuzeye vuenu. Muanetu Robert ua tsindikile ha vusunga vuaco nguendi: “Tele njili na miaka kampe 20, nja kele na cipanga ca mutamba ua ntsimbu. Tangua limo umo muana mpuevo ku vipanga, ua nji laniene linga tuye ku ndzivo yavo. Kaha ua nji lekele nguendi tu ka kala likalietu. Ha katete nja likanouelele, vunoni yaco mu nima nja vianene, na ku mu leka omo lia vika ka nja pandele kuyako.” Muanetu Robert ka uilile mu ceseko. Mua vusunga ua lingile mua cili! Mu nima ya ku hilula ha viuma via mu solokelele ua nongonuene ngecize nga ua vianene vuasi. Ivene nguendi: “Ka nja vianene cilanio caco vuasi-vuasi, ngue mua lingile Yosefe na mpuevo ya Potifale. (Njen. 39:​7-9) Mua vusunga, ca nji kaluuilile ku viana. Vunoni citanga caco ca nji kuasele ku mona ngecize, nja pande ku kaniamesa vusamba vuange na Yehova.”

¹⁶ Nenu mu hasa ku uana vukuasi nga mu lihilula ngue mua lingile Muanetu Robert. Nga mu vula cimo ceseko, lihulenu nguenu: ‘Vuno nje ku hitisamo ntsimbu ya kama amba nji viane ni?’ Nga mua nongonona ngecize hali hamo ha tondeka ku sungamesa, kati muivue vusiua. Vunoni vuahelelenu omo lia ku tantekeya vuzeye vuaco. Lekenuko Yehova via vuzeye vuaco kaha kaniamesenu cizango cenu ca ku muononoka.—Visa. 139:​23, 24.

17. Vati muzimbu ua muanetu Robert ua muesa ngecize, kuononoka cendi ca kuatele ku lizina lia Yehova?

¹⁷ Tu hasa ku lilongesa vikuavo ku muzimbu ua muanetu Robert. Ua handekele naua nguendi: “Mu nima ya ku viana cilanio ca muana mpuevo uaco, ngeci ua nji lekele nguendi, ‘U na vulu ceseko!’ Kaha mu nja muhuile omo lia vika ua lingilemo, ua nji lekele nguendi kavusamba kendi ua puile Mukaleho ua mu lekele nguendi, Vakaleho va vakuendze na vahumbe ve ku yoya muono ua vuongono. Kaha muana mpuevo ua lekele kavusamba kendi nguendi a ka njeseka. Ngeci nja vuahelele omo lia ku zumbangeya lizina lia Yehova.”

18. Kapandi kaka mu tonda ku lihakela ambe mu nima ya mbatizimu? (Talenu naua cikasa “Vimpande vi mu Hasa ku Lema.”)

¹⁸ Nga mu lihana kuli Yehova na ku mi mbatiza, mu ka muesa ngecize mu tonda ku lelesa lizina liendi, ambe nga mu hita mu visoti viose-ovio. Kaha kalenu na vusunga ngecize, Yehova a tantekeya visoti vi mue ku hita na vieseko vi mue ku vula. Cikuavo naua, Yehova a ka vezikisa kapandi kenu nga mu tualelelaho ku muononoka. Kaha tsilielenu nguenu, Ikeye a ka mi kuasa ku kolesa ku hitila mu sipilitu santu yendi. (Luka 11:​11-13) Na vukuasi vua Yehova, mu hasa ku tualelelaho ku tambuluisa Yesu ambe mu nima ya ku mi mbatiza.