Mua Liviukisila ku Lihana Kuli Yehova Ni?

1-2. Vika na pande ku linga muntu ntsimbu kanda va mu mbatize?

MU MIAKA itanu ya ku manusuila, vantu va tuvakana makulukazi va na va mbatiza mu ku pua Vakaleho va Yehova. Ngeci mua Timoteo, cingi cavo va va longesele vusunga “fume ku vukeke.” (2 Tim. 3:​14, 15) Vamo co ve ku tantekeya vusunga mu vukuluntu. Ca ku muenako, umo mpuevo ua lilongesele Mbimbiliya na Vakaleho va Yehova va mu mbatizile na miaka 97!

² Nga mua pua ndongesi ua Mbimbiliya ni visemi vendi va pua Vakeleho ni? Vuno mu tonda ku mi mbatiza ni? Nga mukemuo, ovuo vutumbe vua cili! Vunoni ntsimbu kanda va mi mbatize, ha katete mua pande ku lihana kuli Yehova. Cino cilongesa, ci mi kuasa ku tantekeya vika ca lomboloka ku lihana kuli Njambi. Kaha ci mi kuasa naua ku tantekeya, omo lia vika ka mua pandele kuivua vuoma vua ku lihana na ku mi mbatiza, nga mua liviukusila ku lingamo mpundu.

VIKA CA LOMBOLOKA KU LIHANA?

3. Tumbulenu malungano a vantu va lihanene kuli Yehova.

³ Kuliya na Mbimbiliya, muntu ue ku lihana kuli Yehova ve ku mu hangula ku puisamo cimo cipanga ca ku lifuila. VaIsaleli va puile muyati ua lihanene kuli Yehova. Vunoni vamo hakati kavo, va lihanene kuli Yehova mu njila ya ku lifuila. Ca ku muenako, Alone ua kele na ku zala “cilongo ca ku lela” ha kele citasu ca olu ha lutue. Citasu caco ca muesele ngecize va mu hanguile ku puisamo cipanga ca ku lifuila ca sasendote ua kama ua vaIsaleli. (Levi. 8:9) VaNazileu navo va lihanene kuli Yehova mu njila ya ku lifuila. Lizi “Nazileu,” lia fuma ku lizi nazirʹ lia ciHevelu, kaha lia lomboloka “Ku-lihangunuka” ni “Ua ku lihana.” Ngeci mukemuo, vaNazileu va pandele kuononoka vi va va sikile mu Masiko a Mosesa.—Num. 6:​2-8.

4. (a) Mu mue ku lihana kuli Yehova, vika vie ku pua via seho ya kama mu muono ueni? (b) Vika ca lomboloka ku ‘liviana’ enu vavene? (Talenu naua cikupulo.)

⁴ Mu mue ku lihana kuli Yehova, mue ku pua ndongesi ya Yesu Kilistu. Kaha mu muono ueni, ku linga cizango ca Njambi ce ku pua ca seho ya kama. Ku pua Mukua Kilistu ua ku lihana, ca ambatesela kumo na vika? Yesu ngueni: “Nga umosi na zange ku nji kava ange, a liviane ivene.” (Mat. 16:24) Mezi a ciNgelengu, “a liviane ivene” a hasa ku lomboloka naua nguao, “kati va liyoyele vakevo vavene.” Mu ku pua ngamba ua Yehova ua ku lihana, ce ku tondeka mu viane viose vie ku liluisa na cizango ceni. (2 Kol. 5:​14, 15) Ngeci mua “vilinga via vusitu,” ca ku muenako vupangala. (Ngal. 5:​19-21; 1 Kol. 6:18) Vuno kuononoka masiko aco ce ku kaluuisa muono uenu ni? Houe. Muomu nga mu lema Yehova na ku tava ngecize masiko eni eku mi niunga, ka ci mi kaluuisa. (Visa. 119:97; Isaya 48:​17, 18) Muanetu Nicholas ngueni: “Mu hasa ku mona masiko a Yehova ngue kamenga ke ku mi vindika ku linga vi mu tonda, ni viuma vie ku mi niunga ku vusonde.”

5. (a) Vati mu hasa ku lihana kuli Yehova? (b) Ku litepa cika ca kala ha ku lihana na ku mi mbatiza? (Talenu naua cikupulo.)

⁵ Vati mu hasa ku lihana kuli Yehova? Mu hasa ku lingamo mu ku mu kulahesa ku hitila mu civundilo nguenu, mu ka pangela lika Ikeye na ku mu tuameka mu muono. Mua vusunga, mue ku kulahesa ngecize mu ka lema Yehova ‘na mutima uenu uose, na muono uenu uose, na mana enu ose, na ngolo yenu yose.’ (Mako 12:30) Muntu ue ku lihana kua lika lueni,. vunoni ve ku mu mbatizila ha mbunga, kaha ce ku muesa ku vantu ngecize na lihana kuli Yehova. Ku lihana ya pua nkuminio ya seho ya kama, Yehova a tonda mu i puisemo. Kaha kakeko kapandi ka mua pande ku lihakela.—Ekel. 5:​4, 5.

OMO LIA VIKA MUA PANDE KU LIHANA KULI YEHOVA?

6. Vika vie ku lingisa muntu ku lihana kuli Yehova?

⁶ Vusunga vuka vua pande ku mi lingisa ku lihana kuli Yehova? Omo lia cilemo cenu kuli ikeye. Cilemo ka ca puile cifua ci mue ku livuilamo. Vunoni ca hitukila ha ku tualelelaho “ku tantekeya cizango” ca Yehova kaha na vutumbe vueni. (Kolo. 1:9) Cilongesa cenu ca Mbimbiliya ca mi hana vusunga ngecize (1) Yehova kua kala mpundu (2) Mbimbiliya ya pua Lizi lieni, (3) kaha ue ku pangesa lukungulukilo lueni linga a puisemo cizango ceni.

7. Vika tua pande ku linga ntsimbu kanda tu lihane kuli Njambi?

⁷ Vose va lihana kuli Yehova, va pande ku tantekeya vilongesa via katete via mu Lizi lia Njambi kaha na kuononoka masiko endi. Ve ku lihakela kapandi ka ku lekako vakuavo vi ve ku lilongesa. (Mat. 28:​19, 20) Cilemo cavo kuli Yehova ce ku livuezelela, kaha ve kuivua cizango ca ku lemesa lika ikeye. Vuno nenu mua kala na cizango caco ni? Mua vusunga, nga mu lema Yehova na mutima uenu uose, mu ka lihana na ku mi mbatiza. Kati muomu mu tonda lika ku vuisa ndzolela mulongisi uenu ua Mbimbiliya ni vene visemi venu, ni ku kava lika vi ve ku linga vavusamba, houe.

8. Vati ku santsela ci ka mi kuasa ku hangula ku lihana kuli Yehova? (Visamo 116:​12-14)

⁸ Mu mue ku hilula ha viuma viose via mi lingila Yehova, mue kuivua cizango ca ku mu santsela kaha na ku hana muono ueni kuli ikeye. (Tandenu Visamo 116:​12-14.) Mbimbiliya ya tumbula Yehova kupua Mukua ku hana “vuana vuose vua ku viuka na vuana vuose vua ku tantuluka.” (Tia. 1:17) Cikombelo ca Muaneni Yesu, ca pua vuana vua seho vua tu hana. Aci singaniekenu! Vuana vuaco vue ku mi kuasa ku pua kavusamba ka Yehova. Kaha ua mi hana vukovelelo vua ku ka yoya miaka yose. (1 Yoa. 4:​9, 10, 19) Ngeci mukemuo, ku lihana kuli Yehova ca pua njila ya ku mueselamo ku santsela ku cilemo ceni ca kama na ku vivezikiso via mi hana. (Ndeu. 16:17; 2 Kol. 5:15) Ku santsela caco va ci tumbula mu Cilongesa 46 ha ntsina 4 ca mu livulu, Yoyenu mu Ndzolela ku Miaka Yose! Na mu video ya viminutu 3, ya mutue Ku Hana Mavuana Enu Kuli Njambi.

VUNO MUA LIVIUKISILA KU LIHANA NA KU MI MBATIZA NI?

9. Omo lia vika muntu ka pandele ku ivua ntsindiye ya ku lihana?

⁹ Mu hasa ku livua nguenu, kanda mu liviukisile ku lihana na ku mi mbatiza. Halumo mua pande kualulula vimo mu muono uenu, linga muononoke vimamuna viose via Yehova, ni ntsimbu ya ku puaho linga mu kaniamese lutsilielo luenu. (Kolo. 2:​6, 7) Kati vandongesi vose ve ku kola vuasi-vuasi mu lutsilielo, kaha kati vanike vose ve ku lihana na ku mbatizimu mu ntsimbu imo lika. Hilulenu ha viuma vi mua pande ku pangela ku tuala ha lutsilielo luenu, kaha kati muli setekese na vakuenu.—Ngal. 6:​4, 5. 

10. Kapandi ka ka mua pande ku lihakela nga kanda mu li liviukisile ku lihana na ku mi mbatiza? (Talenu naua cikasa “Kuli Vaze Vali na ku Kolela mu Vusunga.”)

¹⁰ Ambe vene nga mu nongonona ngecize kanda mu liviukisile ku lihana kuli Yehova, kati mu ivue vusiua vunoni tualelenuho ku lihakela kapandi kaco. Vundilenu kuli Yehova a mi kuase kualulula vimo viuma mu muono uenu. (Filp. 2:13; 3:16) Kaha kalenu na vusunga ngecize a ka halakana civundilo cenu na ku mi kuasa.—1 Yoano 5:14.

OMO LIA VIKA VAMO VE KU LIKANOELA KU LIHANA?

11. Vati Yehova a ka tu kuasa ku tualelelaho ku muononoka?

¹¹ Vutuhu vamo va liviukisila ku lihana va va mbatize, vunoni kasi ve kuivua liova lia ku lingamo. Ve kuivua ngoco muomu ve ku singanieka nguavo, ‘halumo mu nima ya ku nji mbatiza nji ka vulumuna, kaha va ka nji uisa mu cikungulukilo.’ Nga liova liaco likelio muli nalio, kalenu na vusunga ngecize Yehova a ka mi hana viose vitondeka, linga “mu ende ngue ca pande kuli [ikeye] na ku mu ya ku mutima mu viose.” (Kolo. 1:10) Cili vene, a ka mi kolesa mangana mu linge via vusunga, ngue mua lingile ku vangamba vendi vavengi. (1 Kol. 10:13) Mua vusunga, Yehova ue ku kuasa vangamba vendi va tualelelaho ku muononoka, ngeci va vandende lika va ve ku uisa mu cikungulukilo.

12. Vati tu hasa ku liniunga mangana kati tu linge vupi vua kama?

¹² Omo lia ku hona ku tantuluka, vantu vose ve ku hita mu vieseko via ku linga vupi. (Tia. 1:14) Vunoni, yenu muli na mpoko ya ku lihanguila vi mu hasa ku linga nga mu hita mu vieseko. Mua vusunga, mua kala na mpoko ya ku hangula vati mu yoya muono uenu. Vutuhu vamo nguavo, ka tu hasa ku lihanguila cifua ci tue ku livuilamo na vi tu linga. Vunoni kati vusunga, tu hasa ku lilongesa ku liniunga ku vilinga via ku pihia. Ambe nga mu hita mu vieseko mu hasa ku viana ku linga via vipi. Kuli viuma via vingi vi mi kuasa ku viana ku linga vupi. Ca ku muenako, ku vundila kuli Yehova matangua ose, ku linga cilongesa ca mu vulika, ku kunguluka ntsimbu yose na ku lekako vakuenu vi mua tsiliela. Ku lingamo, ci ka mi kuasa ku tualelelaho kuononoka Yehova. Kaha vulukenu naua ngecize Yehova a ka mi kuasa.—Ngal. 5:16.

13. Vika tu lilongesa ku lungano lua cili lua Yosefe?

¹³ Ci ka pua ca casi kuononoka Yehova, nga mu liviukisila vua lumo ntsimbu kanda mu hite mu cimo ceseko. Mu Mbimbiliya tu hasa ku uanamo malungano a vantu vavengi va lingilemo, vutuhu navo ka va tantulukile. Ca ku muenako, mpuevo ya Potifale, ua kele na ku sindiya Yosefe kusua kumo linga va limone ku muvila. Vunoni, Yosefe ua tantekeyele mua ku lingila. Mbimbiliya nguayo: “ikeye ua vianene.” Kaha ua handekele ngueni: “Vati nji ka hasa ku linga vupi vua kama ngecize, na ku vulumuna kuli Njambi?” (Njen. 39:​8-10) Mua vusunga, Yosefe ua tantekeyele mua ku lingila ntsimbu kanda a hite mu ceseko caco. Omo liaco, ua hasele ku linga cihangula ca cili.

14. Vati tu hasa ku viana ku uila mu vieseko?

¹⁴ Vati mu hasa ku tambuluisa Yosefe na ku viana ku uila mu vieseko? Mu hasa ku liviukisila vuovuno ntsimbu kanda mu hite mu vieseko. Lihakelenu kapandi ka ku zinda via zinda Yehova ambe vene mu visinganieka. (Visa. 97:10; 119:165) Ku lingamo ka mu ka uila mu vieseko, muomu mua liviukisila laza.

15. Vati muntu a hasa ku muesa ngecize a li na ‘ku lengeya’ Yehova? (VaHevelu 11:6)

¹⁵ Halumo mua nongonona ngecize, mua uana vusunga kaha mu tonda ku lemesa Yehova na mutima ueni uose. Vunoni kasi muli na liova lia ku lihana na ku mi mbatiza. Nga mu liziva ngoco, mu hasa ku linga via lingile Muangana Ndaviti. Ua lambelele Yehova ngueni: “Nji hilule, a Njambi, na ku tantekeya mutima uange: nji eseke, na ku tantekeya visinganieka viange; na ku mona nga ku i ili njila ya ipi muli ange, kaha nji tuamene mu njila ize ka ye ku hua, ya ya-ye.” (Visa. 139:​23, 24) Yehova ue ku vezikisa vaze ve “ku mu lengeya.” Kapandi ka mue ku lihakela linga mu lihane na ku mi mbatiza, ke ku muesa mpundu ngecize muli na ku lengeya Yehova.—Tandenu VaHevelu 11:6.

TUALELENUHO KU SUENA KULI YEHOVA

16-17. Vati Yehova ue ku koka vaze va kolela mu vusunga? (Yoano 6:44)

¹⁶ Yesu nguendi Yehova ikeye ue ku koka vandongesi vendi. (Tandenu Yoano 6:44.) Aci singaniekenu ha mezi aco na vika a lomboloka kuli yenu! Yehova ue ku mona viuma via cili mu nkala muntu ue ku koka. Ue ku va mona ku pua ‘vantu va ku lifuila,’ ni ‘vupite vuendi.’ (Ndeu. 7:6) Mukemuo mue ku mi muenamo Yehova.

¹⁷ Vunoni, halumo muli na ku kolela mu vusunga. Kaha halumo mu hasa ku liziva ngecize, muli na ku pangela lika Yehova muomu visemi venu vali na ku lingamo; kati muomu Yehova ua mi koka. Vunoni, Mbimbiliya nguayo: “Suenenu kuli Njambi, kaha ikeye a ka suena kuli enu.” (Tia. 4:8; 1 Miz. 28:9) Nga mu livanga ku suena kuli Yehova, nendi a ka mi suena. Kuli ikeye, ka mua puile lika mutamba ua cimo civunga. Muomu ue ku koka muntu ku muntu ha likaliendi, hamo na vaze vali na ku kolela mu vusunga. Ngue mu ua muesa mukanda ua Tiango 4:​8, nga muntu uaco a livanga ku suena kuli Yehova, Nendi a suena kuli ikeye.—Setekesenu na 2 Tesalonika 2:13.

18. Vika tu ka lilongesa mu cilongesa ci na hatako? (Visamo 40:8)

¹⁸ Mue ku kava lungano lua Yesu mu mue ku lihana kuli Yehova na ku mi mbatiza. Muomu Yesu, ua lihanene na mutima uose mu ku linga cizango ca Ise. (Tandenu Visamo 40:8; VaHe. 10:7) Mu cilongesa ci na hatako, tu ka lilongesa vika vi mi kuasa ku tualelelaho ku lemesa Yehova, mu nima ya ku mi mbatiza.