Yehova ue ku “Kanguisa Vaze va na Vatuka ku Mutima”

1. Vati Yehova ue ku livua ku tuala ha vangamba vendi?

YEHOVA ue ku mona viose vi ve ku lihita navio vangamba vendi, kaha ue ku mona nga tuli mu vusiua ni mu ndzolela. (Visa. 37:18) Ue kuivua ndzolela mue ku tu mona tu mu pangela na mutima uose, ambe nga tuli mu vusiua. Ngeci ue kuivua cizango ca kama ca ku tu kuasa na ku tu lembezieka.

2. Vika Yehova ue ku lingila vakua kulua na vusiua, kaha vika tua pande ku linga mangana a tu niunge?

² Visamo 147:3 nguayo Yehova ue ‘ku kuta vimbandu’ via vakua ku vavala ku mutima. Ou mukanda ua muesa vati Yehova ue ku niunga vakua kulua na vusiua. Vika tua pande ku linga mangana Yehova a tu niunge? Tu talenu cimueso ci na hatako: Ndotolo a hasa ku kanguisa muntu na livulumuna. Vunoni linga muntu uaco a kanguke, na pande kuononoka vimamuna via ndotolo. Mu cilongesa cino, tu lilongesa vika Yehova ua leka vaze vali mu vusiua ku hitila mu Lizi liendi, na ku mona vati tu hasa kuononoka vimamuna viendi.

YEHOVA UA TU HANA VUSUNGA NGUENDI TUA KALA NA SEHO KULI IKEYE

3. Omo lia vika vamo ve ku livua vungoco?

³ Mu mavu ano, vantu vavengi ka va lemene vakuavo. Omo liaco, ve ku yandesa vakuavo na ku va lingisa ku liziva vungoco. Ndumbuetu Helena nguendi: “Visemi vange ka va kele na ku tu muesa cilemo. Vatata va puile vakua luozi kaha tangua na tangua va kele na ku nji leka nguavo nji cilinge ca ngoco.” Ngeci mua ndumbuetu Helen, nenu halumo ve ku mi yandesa, ku mi tsopa, na ku mi lingisa ku livua vungoco. Nga mukemuo, ci hasa ku mi kaluuila ku tava nguenu kuli umo ua mi lema mpundu.

4. Kuliya na Visamo 34:​18, vusunga vuka ua tu hana Yehova?

⁴ Ambe nga vakuenu va mi yandesa, kalenu na vusunga nguenu Yehova ua mi lema kaha mua kala na seho kuli ikeye. Ua kala “ha hiehi na vaze va li na mutima ua ku tsa.” (Tandenu Visamo 34:18.) Nga muli na “cimbembesi ca ku vavala,” ni nguetu nga muli mu vusiua, vulukenu nguenu Yehova ua muene vifua vienu via cili ngeci ua mi kokele kuli ikeye. (Yoa. 6:44) Cikuavo naua, ntsimbu yose a ka mi kuasa muomu mua kala na seho kuli ikeye.

5. Vika tu hasa ku lilongesa kuli Yesu ku tuala ha cifua ca muenenemo vantu va livuile vungoco?

⁵ Tu hasa ku tantekeya cifua ce ku livuilamo Yehova mu ku hilula lungano lua Yesu. Mua kele hano ha mavu, Yesu ua muesele ngozi ku vantu va livuile vungoco omo lia ku va yandesa ku vakuavo. (Mat. 9:​9-12) Umo mpuevo ua kele na vuvezi vua kama mua mu kuatele ku vuzalo vuendi linga a kanguke, Yesu ua mu lembeziekele na ku mu sangala omo lia lutsilielo luendi. (Mako 5:​25-34) Yesu ue ku tambuluisa Ise mu vutantuluke. (Yoa. 14:9) Ngeci mukemuo, kalenu na vusunga nguenu, Yehova ua mi haka seho kaha ue ku mona vifua vienu via cili hamo lika na lutsilielo kaha na cilemo cenu kuli ikeye.

6. Vika mu hasa ku linga nga mu livua vungoco?

⁶ Nga mue ku livua vungoco, vika mu hasa ku linga? Tandenu mizimbu ya mu Mbimbiliya ya muesa seho i mua kala nayo kuli Yehova na ku hilulaho.b (Visa. 94:19) Nga ka mua hasele ku puisamo vizango vienu, ni muli na kuivua vusiua omo lia ku hona ku puisamo vi vali na ku linga vakuenu, kati mu lisetekese na vakuenu. Muomu Yehova ke ku lavelela mu linge viuma ka mu hasa ku puisamo. (Visa. 103:​13, 14) Nga kuli umo ua mi yandesele (cipue ku muvila, mu visinganieka, ni ua mi kuatele ku ndzili), kati mu lituike mulonga. Vulukenu nguenu, Yehova a ka hisa vakua ku yandesa vakuavo, na ku kuasa vakua ku yanda. (1 Pet. 3:12) Ndumbuetu Sandra u va yandesele ku vunike, ua handekele nguendi: “Ntsimbu yose, nje ku vundila Yehova a nji kuase ku limona mu cifua ce ku nji muenamo ikeye.”

7. Vati visoti vi tua hitile vi hasa ku tu kuasa mu cipanga ca Yehova?

⁷ Kati mu kale na vimpata nguenu Yehova ka hasa ku mi pangesa mu kuase vakuenu. Yehova ua mi hana civezikiso ca ku pangela hamo nendi mu cipanga ca kuambulula. (1 Kol. 3:9) Visoti vi mua hita mu muono vi hasa ku mi kuasa ku lihaka mu cihela ca vakuenu, na kuivuisisa vati ve ku livua nga vali na ku yanda. Ku lingamo, ci ka mi kuasa ku lihakela kapandi ka ku kuasa vakuenu. Ndumbuetu Helen u tua tumbula helu, ua tambuile vukuasi, kaha ue ku hasa ku kuasa naua vakuavo. Ivene nguendi: “Nja kele na ku livua vungoco, vunoni na vukuasi vua Yehova, hano honi nje ku livua kupua ua seho.” Ndumbuetu Helen ali na ku pangela Yehova na ndzolela kaha ua pua pioneira ua ntsimbu yose.

YEHOVA A TONDA TU KALE NA VUSUNGA NGUETU UE KU TUECELA

8. Vusunga vuka tu uana ku Isaya 1:18?

⁸ Vamo vangamba va Yehova, kasi ve kuivua vusiua omo lia visevuka vi va lingile ntsimbu kanda va va mbatize ni munima yaco. Vunoni capua ca seho ku vuluka nguetu, Yehova ua tu lema ngeci ua tu hanene nkombelo ya Yesu linga a tu konekele ku vipi vietu. Kaha a tonda tu tave vuana vuaco. Yehova ua tu hana vusunga nguendi nga tu sungamesa viumac ha kati ketu nendi, a tuecela mu vutuntu. (Tandenu Isaya 1:18.) Mua vusunga, Yehova nga na tuecela, ke ku vuluka naua vupi vu tua lingile muomu ua tu lema. Cikuavo naua, ke ku suva viuma via cili vi tue ku linga.—Visa. 103:​9, 12; VaHe. 6:10.

9. Omo lia vika ka tua pandele ku tuala mana ku visevuka vi tua lingile?

⁹ Nga mue kuivua vusiua omo lia visevuka vi mua lingile, lihakelenu kapandi ka ku tuala mana ku viuma vi muli na ku linga mu ntsimbu ino, na viuma vi mu ka hasa ku linga ku lutue. Tu hilulenu lungano lua kapostolo Paulu. Vutuhu ua luisile Vakua Kilistu na vukenia, vunoni ua liveyele. Muomu ua tantekeyele nguendi, Yehova ua muecelele. (1 Tim. 1:​12-15) Vuno ua tualeleleho ku livua mulonga omo lia vupi vua lingile ni? Houe ka lingilemo, cikuavo naua ka vihisile ntsimbu yendi mu ku singanieka viuma via lingile mua puile kaFaliseo uva singimikile. (Filp. 3:​4-8, 13-15) Vunoni Paulu ua tualeleleho ku panga na ntuima mu cipanga ca kuambulula, na ku tuala mana via ku lutue. Ngeci mua Paulu, netu ka tu hasa kualulula visevuka vi tua lingile. Vunoni tu hasa ku sangaziala Yehova ku hitila mu viuma vi tue ku linga mu ntsimbu ino, na ku tuala mana via ku lutue na ku vikulaheso via Yehova.

10. Vika tua pande ku linga nga visevuka vi tua lingile via vavalesele vakuetu?

¹⁰ Halumo mue ku livua mua ku pihia omo lia visevuka vi mua lingile, via vavalesele kati yenu lika vunoni na vakuenu. Vika vi hasa ku mi kuasa? Lihakelenu kapandi ka ku sungamesa viuma, na ku muesa mpundu nguenu mua liveye. (2 Kol. 7:11) Cikuavo naua, vundilenu Yehova a kuase vakuenu va yandele omo lia visevuka vienu. Mua vusunga, Yehova a ka mi kuasa hamo lika na vakuenu va vuile ku vavala ku mutima mu mua sevukile, linga mu vose mu tualeleleho ku kolesa na kuivua ciyulo.

11. Vika tu hasa ku lilongesa ku luango lua kapolofeto Yona? (Talenu naua ca helu.)

¹¹ Lilongeselenu ku visevuka vi mua lingile, na ku tavesa Yehova a mi pangese mu cifua ca tonda. Tu talenu via lingile kapolofeto Yona. Yehova ua mu tumine ku Ninivayi, vunoni ua tinine na kuya kueka. Yehova ua sungamesele Yona, ngeci ua lilongesele ku cisevuka cendi. (Yona 1:​1-4, 15-17; 2:​7-10) Yehova ua mu hele vukovelelo vukuavo mu ku mu tuma lueka ku Ninivayi, kaha Yona vuasi-vuasi uononokele. Vutuhu ua liveyele omo lia ku muesa lisino ha katete, vunoni ka tavesele cisevuka caco ci mu lingise ku viana cipanga ca mu hele Yehova.—Yona 3:​1-3.

YEHOVA UE KU TU LEMBEZIEKA KU HITILA MU SIPILITU SANTU

12. Nga tua tsisa ni tuli na ku pinda na visoti vieka, vati Yehova ue ku tu hana ciyulo? (Filipu 4:​6, 7)

¹² Nga tua tsisa ni tuli na ku pinda na visoti vieka, Yehova ue ku tu lembezieka ku hitila mu sipilitu santu yendi. Tu hilulenu muzimbu ua vaRon na vaCarol. Ca vusiua, munavo ua litsihile. Vavene nguavo: “Tua hita mu visoti via vingi, vunoni kutsa ca munetu ca hiana visoti viose vi tua hita mu muono. Vintsimbu via vingi ka tua hasele ku kosa, ngeci tua kele na ku vundila kuli Yehova. Kaha tua vuile ciyulo ci va tumbula ku Filipu 4:​6, 7.” (Tandenu.) Nga muli na kulua na visoti, lekenu Yehova vati muli na ku livua, ha ntsimbu yose-oyo i mu tonda. (Visa. 86:3; 88:1) Puenu na ku vundila Yehova a mi hane sipilitu santu, kaha kalenu na vusunga nguenu ntsimbu yose a ka mi kuasa.—Luka 11:​9-13.

13. Vati sipilitu santu ye ku tu kuasa ku tualelelaho ku lemesa Yehova? (Efeso 3:16)

¹³ Ka muesi na ndzili ya ku linga na vimo viahi omo lia visoti vi muli na ku pinda navio ni? Nga mukemuo, sipilitu santu i hasa ku mi hana ndzili ya ku tualelelaho ku lemesa Yehova. (Tandenu Efeso 3:16.) Tu hilulenu via lihitile navio ndumbuetu Flora. Nendi na yaliendi va kele mu cipanga ca vumisionaliu, vunoni yaliendi ua muendele vungungu kaha va tsihile vulo. Ivene nguendi: “Yaliange mua njendele vungungu, nja livuile ngue muilu mu lahako ha mavu ha kola, kaha ka nja hasele ku singanieka viuma vieka. Nja kele na ku vundila Yehova a nji hane sipilitu santu linga nji hase ku kolesa. Kaha Yehova ua nji lembeziekele mu ku nji hana viose vi nja tondekele linga nji kolese mu cisoti caco, ca solokele ngue ka nji hasa ku ci vula.” Ndumbuetu Flora ua limuenenene nguendi, Yehova ua mu kuasele ku mu tsiliela cikuma, na ku kala na vusunga nguendi ntsimbu yose a ka mu kuasa ku vula nkala visoti. Ndumbuetu Flora ua handekele naua nguendi: “Mezi a ku Visamo 119:​32, a muesa ha toma vati Yehova ua nji kuasele. Mezi aco nguao: ‘Nji ka tunta mu njila ya vizilika viove, omo yove u ka kamesa mutima uange.’”

14. Vati tu hasa ku tavesa sipilitu santu i tu kuase?

¹⁴ Vika mua pande ku linga munima ya ku vundila sipilitu santu? Lihakelenu kapandi ka ku linga viuma vi mi kuasa ku tambula sipilitu santu. Viuma viaco viambatesela kumo na ku kunguluka kaha na kuambulula. Sulisenu vuongo na visinganieka via Yehova, mu ku tanda Lizi liendi tangua na tangua. (Filp. 4:​8, 9) Omo mu lingamo, tualenu mana ku mizimbu ya vantu va va tumbula mu Mbimbiliya va hitile mu visoti, na ku mona vati Yehova ua va kuasele ku kolesa. Ndumbuetu Sandra u tua tumbula helu, ua hitile mu visoti via vikalu. Ivene nguendi: “Muzimbu ua Yosefe ua nji kuatele cikuma ku mutima. Yosefe ka tavesele visoti na vuhenge vu va mu muesele vi zeyese vusamba vuendi na Yehova.”—Njen. 39:​21-23.

YEHOVA UE KU TU LEMBEZIEKA KU HITILA MULI VAMUANETU

15. Veya va hasa ku tu lembezieka, kaha vati va hasa ku tu kuasa? (Talenu naua cikupulo.)

¹⁵ Nga tuli na ku yanda, vamuanetu va hasa ku tu “lembezieka.” (Kolo. 4:11) Yehova ue ku tu muesa cilemo cendi ku hitila muli vamuanetu na vandumbuetu. Ve ku tu lembezieka mu ku kala netu mu ntsimbu ya visoti, ku tu halakana, na kuivusisa vati tuli na ku livua. Va hasa ku tu kaniamesa na cimo cinimbu ca mu Mbimbiliya ni ku vundila hamo netu.d (Loma 15:4) Vintsimbu vimo, umo muanetu ni ndumbuetu a hasa ku tu vuluisa cifua ce ku muenamo Yehova viuma. Kaha tu hasa ku livua ku lembama na ku tualelelaho ku kolesa. Vintsimbu vimo, vamuanetu ve ku tu kuasa naua mu ku tu hana via kulia.

16. Vika tua pande ku linga mangana vakuetu va tu kuase?

¹⁶ Linga vakuetu va tu kuase, tua pande ku va vundila vukuasi. Vamuanetu va tu lema cikuma ngeci va tonda ku tu kuasa. (Visi. 17:17) Vunoni halumo ka va tantekeya vati tuli na ku livua na vika mpundu tu tondeka. (Visi. 14:10) Ngeci mukemuo, nga muli na kulua na cimo cisoti, lekenuko kavusamba kenu ua kuhia mu lutsilielo vati muli na ku livua. Mu lekenu vika a hasa ku linga mu ku mi kuasa. Cikuavo naua, mu hasa ku lekako vakuluntu mu cikungulukilo va mue ku livua ku zituka mu ku simutuila navo. Vamo vandumbuetu ve ku livua ku zituka ku simutuila na umo ndumbuetu ua kuhia mu lutsilielo.

17. Vika vi hasa ku tu honouesa ku tambula vukuasi, kaha vati tu hasa ku vi vula?

¹⁷ Kati mu kale ntsimbu ya kama kua lika lienu. Nga tuli na ku pinda na visoti, tue ku tonda ku kala kua lika lietu. Kaha vintsimbu vimo, vamuanetu ka va hasa ku tuivuisisa, ni va hasa ku handeka mezi a tu vavalesa ku mutima. (Tia. 3:2) Vunoni kati mu tavese viuma viaco vi mi lingise ku hona ku likata na vamuanetu. Muanetu Gavin ua pua mukuluntu mu cikungulukilo ua vavala vuvezi vua litima, ua handekele nguendi: “Vintsimbu via vingi, ka nje ku tonda ku simutuila ambe ku kala na vavusamba vange.” Vutuhu ngoco, muanetu Gavin ue ku lihakela kapandi ka ku likata na vamuanaye. Kaha mue ku lingamo, vintsimbu via vingi ue ku liziva vuino. Ndumbuetu Amy nguendi: “Ce ku nji kaluuila ku kulahela vantu omo lia viuma via nji solokelele. Vunoni nje ku lihakela kapandi ka ku lema vamuanetu na ku va kulahela ngue mue ku linga Yehova. Muomu nja tantekeya nguange, mu nje ku lingamo Yehova ue kuivua ndzolela kaha nange vene.”

VIKULAHESO VIA YEHOVA VIA KU LUTUE VIE KU TU LEMBEZIEKA

18. Vika tua lavelela ku lutue, kaha vika tua pande ku linga mu ntsimbu ino?

¹⁸ Tuli na vusunga nguetu, Yehova a ka fumisako viose vie ku tu kokela lamba. (Ku-So. 21:​3, 4) Ntsimbu yaco mu i ka heta, viose vie ku tu kokela lamba ‘ka tu ka vi vuluka, cipue ku vi visinganieka.’ (Isaya 65:17) Ngue mu tua mono, Yehova ue ‘ku kuta vimbandu vietu’ mu ntsimbu ino. Ngeci mukemuo, kuatenu na mavoko avali viose vie ku mi lingila Yehova mu ku mi kaniamesa na ku mi kuasa. Kaha kalenu na vusunga nguenu, Yehova ue ku “mi lela” ni nguetu, ku mi niunga.—1 Pet. 5:7.