Vati Yehova Uekutu Kuasa Kukolesa?

1. Omolia vika tuatondeka kukolesa, kaha vukuasi vuka tuli navuo? (1 Petulu 5:10)

KUNO ku matangua aku kotokela, vangamba va Yehova va tondeka kukolesa. Muomu cingi ca vamuanetu valina kuhita mu visoti via kuvavala, kutsisa muntu uva lema, kuvaluisa kuva vusoko ni vene ku vanguvulu. (Mat. 10:​18, 36, 37) Vunoni visoti viose-ovio vimuli na kupinda navio, kalenu na vusunga nguenu Yehova akami kuasa kukolesa.—Tandenu 1 Petulu 5:10.

2. Kukolesa ca Mukua Kilistu ca hitukila haka?

² Kukolesa ca lomboloka kutualelaho kuononoka Yehova nakumu pangela na ndzolela ambe nga tuhita mu visoti viose-ovio, ngeci muaku tuluisa ni ngatuhita mu ntsindiye ya kulinga vupi. Cikuavo naua, linga tu tualeleho kukolesa tuapande kutsiliela ngecize viuma vihasa kualuluka. Kaha kukolesa ca Mukua Kilistu kaca hitukilile ha ndzili yendi vavenya, vunoni ya hitukila hali Yehova uze ahasa kutuhana “ngolo ya ku hiana cikumakuma.” (2 Kol. 4:7) Mu cilongesa cino, tukamona viuma viuana vie kutuhana Yehova mu kutukuasa kukolesa. Kaha tukamona naua, vati viuma viaco vika tukuasa cimo ku cimo.

CIVUNDILO

3. Omolia vika tu handekela nguetu civundilo capua vuana vuaku komouesa?

³ Yehova uatuhana vuana vuaku komouesa vuekutu kuasa kukolesa. Kaha vutuhu katua tantulukile, vunoni kuhitila mu vuana uaco, tue kuhasa kuhandeka na Yehova. (VaHe. 4:16) Tuci singaniekenu ha viuma evi: Tuhasa kuvundila kuli Yehova ha ntsimbu yose-oyo na kuhandeka ha viuma viose-ovio. Cikuavo naua, ue kutuivua ngatu mu vundila mu lilimi liose-olio, ku cihela cose-oco, kua likalietu ni vene mu kamenga. (Yona 2:​1, 2; Vili. 16:​25, 26) Ngatua lisosomua, kaha katuesi na ku uana mezi a kulombolola vati tuli nakulivua, Yehova uekuhasa kuivuisisa vika tutonda kuhandeka. (Loma 8:​26, 27) Mua vusunga, civundilo capua vuana vuaku komouesa!

4. Omolia vika tu handekela nguetu, vivundilo via kulomba kukolesa vialikuata na cizango ca Yehova?

⁴ Kuhitila mu Mbimbiliya Yehova ue kutuhana vusunga nguendi: “Viose-ovio vitu vundila ngavia litombola na cizango cendi, atuivua.” (1 Yoa. 5:14) Vuno tuhasa kuvundila Yehova linga atukuase kukolesa ni? Eyo. Muomu kulingamo, calikuata na cizango cendi. Vika tuhandekela ngoco? Muomu mutue kukolesa mu visoti, tueku kuasa Yehova kuhana cikumbululo kuli Satana Ndiavu. (Visi. 27:11) Cikuavo naua, Mbimbiliya yahandeka nguayo, Yehova alina cizango “mu ku kuasa na zindzili zieni vaze va li na mutima ua ku tantuluka kuli ikeye.” (2 Miz. 16:9) Ngeci mukemuo, tukalenu na vusunga nguetu Yehova alina ngolo kaha na cizango cakutu kuasa kukolesa.—Isaya 30:18; 41:10; Luka 11:13.

5. Vati kuvundila ce kutuhana ciyulo camu visinganieka? (Isaya 26:3)

⁵ Mbimbiliya nguayo, mutue kuvundila kuli Yehova atu kuase mu visoti vietu, ‘ciyulo ca Njambi cize ca hiana mana ose, ce kuniunga mitima yetu na visinganieka vietu.’ (Filp. 4:7) Kaha tue kusantsela ku vukuasi vuaco. Muomu vantu kave kupangela Yehova, vekulua na visoti viavingi na kulinga viuma via kuliseza-seza mangana vakale na ciyulo camu visinganieka. Caku muenako, vamo ve kupangesa cimo cifua ca kuhilula na vutumbe vua kufumisa visinganieka mu vuongo linga vakale mu ciyulo. Vunoni kulingamo, capua vusonde vuakama. (Setekesenu na Mateu 12:​43-45.) Ambe nga mu nima ya kuhilula, vantu vaco vutuhu vekuivua kulembama, vunoni kaveku kala na ciyulo ca vusunga cize ce kutuhana Yehova. Mutue kuvundila kuli Yehova, tue kumuesa nguetu tua hitukila hali Ikeye kaha ue tuhana “ciyulo ca ku tantuluka.” (Tandenu Isaya 26:3.) Imo njila yekutu kuaselamo Yehova, yapua kutu kuasa kuvuluka vinimbu viekutu kaniamesa. Kaha vinimbu viaco, vie kutukuasa kumona vukama vua cilemo ca Yehova na vati atonda kutukuasa. Omo liaco, tuekuivua kulembama.—Visa. 62:​1, 2.

6. Vati muhasa kupangesa vuino vuana vua civundilo? (Talenu naua cikupulo.)

⁶ Vimu hasa kulinga. Nga uli nakuhita mu visoti, “mbila citeli cove hali Yehova” kuhitila mu civundilo, linga amihane ciyulo. (Visa. 55:22) Mu vundilenu naua mana atondeka linga muhase kulua na visoti vienu. (Visi. 2:​10, 11) Kaha omo mulambelela Yehova ami kuase kukolesa, kati musuve naua kusantsela. (Filp. 4:6) Cikuavo naua, monenu vati Yehova alina kumi kuasa kukolesa mu visoti vienu, kaha mu santselenu ku vukuasi vuaco. Ngeci mukemuo, kati mutavese visoti vienu vimi puputuise kumona vivezikiso vimuli navio.—Visa. 16:​5, 6.

LIZI LIA NJAMBI

7. Vati ku lilongesa Mbimbiliya ce kutukuasa kukolesa?

⁷ Yehova uatuhana Lizi liendi Mbimbiliya, mukutu kuasa kukolesa. Kaha mu Mbimbiliya muakala vinimbu viavingi viekutu hana vusunga nguetu, Yehova atonda kutu kuasa. Caku muenako Mateu 6:​8, nguayo: “Isuenu ua muilu na tantekeya laza via mi kambela ntsimbu kanda mu mu vundilevio.” Yesu ua handekele mezi aco, muomu ua tantekeyele vuino Yehova kuhiana muntu ueka. Ngeci mukemuo, tuhasa kukala na vusunga nguetu, nga tuhita mu visoti Yehova a tantekeya viatu kambela, kaha akatukuasa. Kaha mu Mbimbiliya muasula vikulaheso via Yehova vize viekutu kaniamesa linga tukolese mu visoti.—Visa. 94:19.

8. Tumbulenu cimo citume camu Mbimbiliya cihasa kutu kuasa kukolesa. (b) Vika vihasa kutukuasa kuvuluka vitume viamu Mbimbiliya mu ntsimbu itu kavi tondeka?

⁸ Vitume viamu Mbimbiliya vihasa kutu kuasa kukolesa. Kaha vitume viaco, viekutu kuasa kulinga vihangula viacili. (Visi. 2:​6, 7) Caku muenako, Mbimbiliya yatu mamuna kulikela ku lisosomua na viuma vikatu solokela kulutue, kaha yatu kaniamesa naua kutualelaho kutsiliela muli Yehova matangua ose. (Mat. 6:34) Ngeci mukemuo, nga tukala na cizilila ca kutanda Mbimbiliya naku ihilula, cika tupuila cacasi kuvuluka vitume viaco mu ntsimbu itu kavi tondeka.

9. Vati kuhilula mizimbu yamu Mbimbiliya cihasa kutu kuasa?

⁹ Mu Mbimbiliya muakala mizimbu ya vantu ngeci muetu, va kolesele kaha vatambuile vukuasi vua Yehova. (VaHe. 11:​32-34; Tia. 5:17) Kaha mutue kuhilula vati Yehova uava kuasele, tueku kaniamesa lutsilielo luetu ngecize netu aka tukuasa. Muomu Yehova “ikeye vutinino vuetu na ngolo yetu, ku-kuasa ca mu hiehi mu kayando.” (Visa. 46:1) Ngeci mukemuo, nga tuhilula vati vangamba va Yehova vamuesele lutsilielo muli Ikeye na kutualelaho kumu pangela mu ntsimbu ya visoti, netu cekutu kuasa kukolesa.—Tia. 5:​10, 11.

10. Vati muhasa kupangesa vuino vuana vua Lizi lia Njambi?

¹⁰ Vi muhasa kulinga. Tandenu Mbimbiliya tangua na tangua, na kusoneka vimo vinimbu vihasa kumi kuasa. Kaha cingi ca vamuanetu na vandumbuetu, veku uana vukuasi vuakama muve kutanda vinimbu viamu mukanda Hilulenu Visoneka Tangua na Tangua, ku cimene. Caku muenako, ndumbuetu Mariea ua limuenene vusunga vuaco, omo visemi vendi vava uanene na musongo ua Câncer. Vika viamu kuasele kukolesa mu ntsimbu yakele na kuniunga visemi vendi? Ivene nguendi: “Nkala litangua ku cimene, njakele na kutanda vinimbu viamu mukanda Hilulenu Visoneka Tangua na Tangua naku vihilula.” Kaha ua vuezeleko nguendi: “Kulinga-lingamo canji kuasele kusulisa visinganieka viange na vitume viamu Mbimbiliya, kaha na kutuala mana ku viuma viaseho yakama, kuhiana visoti vinja kele nakulua navio.”—Visa. 61:2.

VAMUANETU NA VANDUMBUETU

11. Vati tue kulivua mutue kusinganieka ha vati vamuanetu vali na kukolesa?

¹¹ Yehova uekutu kuasa kukolesa kuhitila muli vamuanetu na vandumbuetu mu mavu ose. Kaha ‘ku tantekeya ngecize vamuanetu va li hano ha mavu, vali na kumona lamba imo lika,’ ceku tukuasa kumona nguetu katuesi likalietu. (1 Pet. 5:9) Ngeci mukemuo, tukalenu na vusunga nguetu visoti viose-ovio vituli na kupinda navio vamuanetu navo vahitamo laza kaha vakolesele, netu neve tuhasa kukolesa.—Vili. 14:22.

12. Vati vamuanetu vekutu kuasa, kaha vati netu tuhasa ku vakuasa? (2 Kolintu 1:​3, 4)

¹² Omo tu tualelaho kukolesa, vamuanetu vekutu kuasa. Kaha kapostolo Paulu, ua limuenene vusunga vuaco. Muakele mu kamenga ka kundzivo, ntsimbu yose uakele na kusantsela vamuanetu vakele nakumu meneka muku vatumbula ha mazina. Kaha ava vamuanetu vaco, valembeziele Paulu, kumu kaniamesa nakumu kuasa na viuma via tondekele. (Filp. 2:​25, 29, 30; Kolo. 4:​10, 11) Netu lelo lino vihasa kutu solokela, kaha mutue kutondeka vukuasi linga tukolese, vamuanetu na vandumbuetu vekutu kuasa na kukala netu. Cikuavo naua, muve kutondeka vukuasi vuetu, tueku va kuasa na kukala navo.—Tandenu 2 Kolintu 1:​3, 4.

13. Vika via kuasele ndumbuetu Maya kukolesa?

¹³ Vamuanetu na vandumbuetu, va kaniamesele muakama ndumbuetu Maya uaku Rússia. Mu 2020, vapulisia va kovelele mu ndzivo yendi kaha mu nima ya ntsimbu vamu tualele nakumu sompesa omolia kulekako vakuavo via lutsilielo luendi. Kaha ivene nguendi: “Mu ntsimbu ei ya ikalu, vamuanetu na vandumbuetu vanji muesele cilemo mukunji sana ku telefone naku nji sonekela mikanda.” Kaha ua vuezeleko naua nguendi: “Vutuhu nja tantekeyele vukama vua cilemo cavusoko vunja kala navuo, vunoni tunde mu 2020, nja limuena vusunga vuaco.”

14. Vika tuapande kulinga mangana tutambule vukuasi, omo tukolesa? (Talenu naua cikupulo.)

¹⁴ Vi muhasa kulinga. Omo mu tualelaho kukolesa, kalenu muhiehi na vamuanoko. Ngeci mukemuo, kati mu likanuuele kupinga vukuasi ku vakuluntu mu cikungulukilo. Muomu vapua “ngue vuvando ku luhundzi, na civando ku kalunga.” (Isaya 32:2) Kaha vulukenu naua nguenu vamuanetu navo vali na kumona lamba imolika. Ngeci mukemuo, nga mulingila vakuenu viuma viacili, mukevua ndzolela kaha mu kahasa kukolesa.—Vili. 20:35.

LULAVELELO LUETU

15. Vati lulavelelo lueku kuasa vangamba va Yehova va kuononoka, kaha vati lua kuasele Yesu? (VaHevelu 12:2)

¹⁵ Yehova ua tuhana lulavelelo luekutu kuasa kukolesa. (Loma 15:13) Caku muenako, lulavelelo lua kuasele Yesu kukolesa mu ntsimbu ya ikalu mu muono uendi. (Tandenu VaHevelu 12:2.) Yesu ua tantekeyele nguendi omolia kuononoka cendi, ueku kuasele kulelesa lizina lia Yehova. Cikuavo naua, Yesu ua lavelele ku lipandakana na Ise muilu naku lavelela ntsimbu ye kupuile Muangana naku sika hamolika na vamuanaye vaku vuasuesa mu Vuangana vua muilu. Navuno vene, lulavelelo luetu luakuka yoya miaka yose mu mavu a aha, luekutu kuasa kukolesa mu visoti viose-ovio vitue kupinda navio mu mavu a Satana.

16. Vati lulavelelo lua kuasele umo ndumbuetu kukolesa, kaha vika mua lilongesa ku muzimbu uendi?

¹⁶ Tu hilulenu vati lulavelelo luakuka yoya miaka yose lua kuasele ndumbuetu Alla uaku Rússia, omo yaliendi vamu kuatele nakumu haka mu kamenga naku vandamena kumu sompesa. Ndumbuetu nguendi: “Nje kuvundila na kuhilula kusua kumo, ha lulavelelo luanji hana Yehova. Kulingamo, cekunji kuasa kuhona kuma mutima. Cikuavo naua, nja tantekeya nguange mu nima ya visoti evi, tualavelela viuma viacili. Muomu Yehova aka vula vitozi vendi nakutu lunguisa.”

17. Vati tuhasa kumuesa kusantsela ku lulavelelo lua tuhana Yehova? (Talenu naua cikupulo.)

¹⁷ Vi muhasa kulinga. Uanenu ntsimbu ya kuhilula ha muono uami kulahesa Yehova. Aci singaniekenu ku yoyela mu mavu a aha hamolika na vavusamba na vavusoko na kumona vantu vose vali mu ndzolela. Kaha visoti vimuli na kupinda navio mu ntsimbu ino vinapu ‘via viehu kaha via kantsimbu lika,’ muku visetekesa na muono uacili mu mavu a aha. (2 Kol. 4:17) Cikuavo naua, lihakelenu kapandi ka kulekako vakuenu viuma vimua tsiliela. Aci singaniekenu vati muono uekuva kaluuila mu mavu ano a Satana ca kuhona ku tantekeya vutumbe vua Njambi. Kaha ngamu simutuila navo muvuihi, vahasa kukala na cizango caku tantekeya viavingi kutuala ha Vuangana vua Njambi na vikulaheso viendi.

18. Omolia vika tuapande ku kulahela mu vikulaheso via Yehova?

¹⁸ Yombi mu nima ya kukolesa mu visoti, ualekele Yehova nguendi: “Nji tantekeya ngecize ove u hasa viuma viose.” (Yombi 42:2) Yombi ua lilongesele ngecize, na vimo viahi vihasa kuvindika vutumbe vua Yehova. Kaha ku tantekeya vusunga vuaco, cihasa ku tukuasa kukolesa mu visoti. Caku muenako, aci singaniekenu umo mpuevo ali muvusiua vuakama, muomu vuvezi vuendi vana vuhonoua kuvusaka ku vandotolo vavengi. Vunoni mu nima yaco, kusoloka umo ndotolo ua vutongue nakumu lomboluela ngecize aka hasa kumu saka. Mua vusunga mpuevo uaco, ahasa kuivua kulembama vutuhu na tantekeya nguendi mu kahita ntsimbu yakama, linga akanguke. Kaha aka tualelaho kukolesa muomu na tantekeya nguendi aka kanguka. Navuno vene, netu tuhasa ku tualelaho kukolesa muomu tua tantekeya nguetu cikulaheso ca Yehova ca kuneha Citungu cika lipuisamo.

19. Vika tua tondeka linga tukolese?

¹⁹ Ngue mutua lilongesa, Yehova ueku tukuasa kukolesa mu visoti vietu kuhitila mu civundilo, mu Lizi liendi Mbimbiliya, mu vamuanetu vamu lutsilielo namu lulavelelo luetu. Mua vusunga, nga tupangesa vuino vukuasi vuaco, Yehova akatu kuasa kukolesa mu visoti viose-ovio noho haka nongesela mavu a Satana.—Filp. 4:13.