Vuezenu ku Vucili vua Vivundilo Vienu

1. Yehova ua lania vangamba veni va pue na ku linga vika? (Talenu naua cikupulo.)

KULI iya tua pande ku tinina nga tu tondeka ku tu lembezieka na ku tu tuamenena? Cikumbululo tu ci tantekeya. Tu hasa ku tinina kuli Yehova Njambi, ku hitila mu vivundilo. Yehova ua tu lania tu vundile kuli ikeye. Kaha ua tonda tu vundile ntsimbu yose ni nguetu “na ku huima cahi.” (1 Tes. 5:17) Tu hasa ku vundila kuli Ikeye linga a tu tuamenene mu vifua viose via muono uetu. (Visi. 3:5, 6) Mu ku linga ua pua cihuanga, Yehova Njambi ka tumbuile vintsimbu vingahi tua pande ku vundila.

2. Vika tu simutuila mu cilongesa cino?

² Tua haka seho ya kama ku vuana vua ku vundila. Vunoni mu ku linga tua kala na via vingi via ku linga, ci hasa ku tu kaluuila ku uana ntsimbu ya ku vundila. Kaha halumo tu hasa ku mona naua ngecize tua pande ku vueza ku vucili vua vivundilo vietu. Ngeci mukemuo, ce ku tu vuisa ndzolela ku tantekeya ngecize tu hasa ku uana ku lembezieka ca kama na ku tuamenena ca mu Mbimbiliya. Mu cilongesa cino, tu simutuila vati tu hasa ku uana ntsimbu ya ku vundila mu ku hilula lungano lua Yesu kaha tu simutuila naua, vati hasa ku vueza ku vucili vua vivundilo vietu, mu ku hakamo viuma vitanu via pua mutamba ua vivundilo vietu.

YESU UA HANGUILE NTSIMBU YA KU PUA NA KU VUNDILA

3. Vika Yesu ua tantekeyele ku tuala ha vivundilo?

³ Yesu ua tantekeyele ngecize Yehova ua haka seho ya kama ku vivundilo. Muomu tele kanda a cize hano ha mavu, ua muene Ise a kumbulula vivundilo via vamala na vampuevo vavengi vakua lutsilielo. Ca ku muenako, Yesu kua kele omo Ise ua kumbuluile vivundilo via Hana, Ndaviti na Eliya, mu ku tumbulako lika vamo. (1 Sam. 1:10, 11, 20; 1 Vam. 19:4-6; Visa. 32:5) Ngeci mukemuo, ka ci tu komouesa ku mona ngecize Yesu ua longesele vandongesi veni seho ya ku vundila ku-sua kumo na lukulahelo!—Mat. 7:7-11.

4. Vika tu lilongesa ku vivundilo via Yesu?

⁴ Ku hitila mu vivundilo vieni mpundu, Yesu ua silile vandongesi lungano. Mu ku ambulula ceni cose, Yesu ua kele na ku vundila ku-sua kumo. Ua hanguile ntsimbu ya ku pua na ku vundila, muomu ua kele na via vingi via ku linga kaha va kele na ku mu zengeleka ku vantu vavengi. (Mako 6:31, 45, 46) Vintsimbu vimo, ua kele na ku hinduka cimene-mene linga a hase ku uana ntsimbu ya ku vundila lika lieni. (Mako 1:35) Ntsimbu imo, ua vundilile vene vutsiki vuose linga a hase ku linga cimo cihangula ca seho. (Luka 6:12, 13) Kaha ntsimbu ikuavo co, ua vundilile vintsimbu via vingi ku vutsiki vu va mu kuatele muomu ya heteleho ntsimbu, ya ku puisamo mutamba ua ukalu cikuma ua vutumbe vua mu nehele hano ha mavu.—Mat. 26:39, 42, 44.

5. Vati tu hasa ku tambuluisa Yesu omo tu vundila?

⁵ Lungano lua Yesu lua tu longesa ngecize ambe tu kale na via vingi cikuma via ku linga, kasi tua pande ku tonda ntsimbu ya ku pua na ku vundila. Ngeci mua Yesu, halumo ci ka tondeka tu hangule mpundu ntsimbu ya ku pua na ku vundila, ngeci mua ku livanga ku hinduka ku cimene ni ku vundila ku vutsiki. Nga tu lingamo, tu ka muesa kuli Yehova ngecize tua haka seho ya kama kuli ovu vuana vua ku lifuila. Umo ndumbuetu ua lizina Lynne, a vuluka vati ku tantekeya vuana vua civundilo, ca mu ile mua kama ku mutima. Ivene ngueni: “Mu nja tantekeyele ngecize nji hasa ku handeka na Yehova ntsimbu yose-oyo, ca nji kuasele ku mu mona ku pua kavusamba kange ua kama kaha na ku nji vuisa cizango ca ku vueza ku vucili vua vivundilo viange.” Mua vusunga, cingi cetu mukemuo vene mu tue ku livua. Ngeci mukemuo, tu hilulenu viuma vitanu via pua mutamba ua vivundilo.

VIUMA 5 VIA PUA MUTAMBA UA VIVUNDILO

6. Kuliya na Ku-Solola 4:10, 11, vika ua fuila ku tambula Yehova?

⁶ Sangazialenu Yehova. Mu cimo cimona ca ku lifuila, kapostolo Yoano ua muene vakuluntu 24, va li na ku sangaziala Yehova muilu. Va sangazialele Njambi nguavo, Ikeye ua fuila “ku tambula ku-sangaziala na kasingimiko na ngolo.” (Tandenu Ku-Solola 4:10, 11.) Tungelo va ku ononoka, navo va kala na vusunga vua vuingi vue ku va lingisa ku sangaziala Yehova. Va kala muilu hamo lika neni kaha va mu tantekeya vuino-vuino. Ve ku mona vifua vieni via cili vili solola mu viose vie ku linga. Ngeci mukemuo, mu ve ku mona viuma vie ku linga Yehova, ve ku ivua cizango ca ku mu sangaziala.—Yombi 38:4-7.

7. Vati tu hasa ku sangaziala Yehova?

⁷ Tua pande naua ku vueza visangala mu vivundilo vietu kuli Yehova. Tu hasa ku mu sangala mu ku mu leka ngecize tua mu lema na ku tumbula vifua vikuavo via tu lingisa ku mu komoka. Omo mu tanda na ku lilongesa Mbimbiliya, lihakelenu kapandi ka ku seteka ku nongonona vifua vie ku muesa Yehova cikuma-kuma vize vi mua lema mua kama. (Yombi 37:23; Loma 11:33) Kaha mu vivundilo vienu, mu lekenu vati mue ku livua ku tuala ha vifua viaco. Tu hasa naua ku sangaziala Yehova, omo lia ku tu kuasa na ku kuasa vusoko vuetu vuose vua mu lutsilielo, muomu ue ku tu niunga na ku tu lela ntsimbu yose.—1 Sam. 1:27; 2:1, 2.

8. Tumbulenu vimo viuma vie ku tu lingisa ku santsela Yehova. (1 Tesalonika 5:18)

⁸ Santselenu Yehova. Tua kala na vusunga vua vuingi vua pande ku tu lingisa ku santsela Yehova, ku hitila mu vivundilo. (Tandenu 1 Tesalonika 5:18.) Tu hasa ku mu santsela ku nkala cuma ca cili ci tua kala naco, muomu vuana vuose vua cili vue ku tunda kuli Ikeye. (Tia. 1:17) Ca ku muenako, tu hasa ku mu santsela omo lia ku vuaha ca mavu na viuma vikuavo via tangele. Tu hasa naua ku mu santsela, omo lia ku tu hana muono, vusoko, vavusamba na lulavelelo. Kaha tua pande naua ku mu santsela mu ku tu tavesa linga tu likuate vusamba neni.

9. Omo lia vika tua tondeka ku kala na mutima ua ku santsela?

⁹ Vintsimbu vimo, ce ku tondeka ku lihakela kapandi ka kama, linga tu hase ku singanieka ha viuma vi tu hasa ku santsela Yehova. Tuli na ku yoyela mu mavu a sula na vantu ka ve ku santsela. Cingi cavo, ve ku tuala lika mana ku viuma vi va tonda kati ku ku santsela ku viuma vi va kala laza navio. Ngeci mukemuo, nga cifua caco ci tu sambukila, vivundilo vietu netu vi hasa ku pua via ku pinga-pinga lika. Vunoni linga kati vi fue ngoco, tua pande ku tualelelaho ku pangela ha ku kala na mutima ua ku santsela ku viose vie ku tu lingila Yehova.—Luka 6:45.

10. Vati ku kala na mutima ua ku santsela ca kuasele umo ndumbuetu ku kolesa? (Talenu naua cikupulo.)

¹⁰ Ku kala na mutima ua ku santsela ci hasa ku tu kuasa ku kolesa mu visoti. Halakanenu muzimbu ua ndumbuetu Kyung-sook ua tuhukile mu Vutala vua 15 ya Janeiro ya 2015. Va mu uanene na vuvezi vua cancer ya ku masuli. Ivene ngueni: “Citanga caco ca nji zeyesele mua kama. Nja livuile ngue nji na zimbalesa viose kaha nja vuile liova lia kama.” Vika via mu kuasele ku kolesa? Ivene ngueni viuma via mu kuasele via puile, ntsimbu kanda aye mu kosa, ua kele na kuya helu lia ndzivo yeni na ku vundila na lizi lia kama, ku tuala ha viuma vitanu via tondele ku santsela Yehova mu litangua lize. Evi via mu lingisile ku lembama mutima na ku muesa cilemo ceni kuli Yehova. Kaha ua limuenenene vati Yehova ue ku kuasa vangamba veni va ku ononoka mu ve ku hita mu visoti. Mu nima yaco, ua nongonuene ngecize mu muono uetu mua sula vivezikiso ku hiana vieseko. Ngeci mua Kyung-sook, netu tua kala na vusunga vua ku santsela Yehova ambe nga tuli na ku hita mu ceseko. Ku muesa ku santsela cetu kuli Ikeye ku hitila mu civundilo, ci hasa ku tu kuasa ku kolesa na ku niunga visinganieka vietu.

11. Omo lia vika vandongesi va Yesu va tondekele ku simpa mu nima yeni kuya muilu?

¹¹ Vundilenu Yehova a mi kuase ku simpa mu cipanga ca ku ambulula. Tele kanda a hiluke muilu, Yesu ua vuluisile vandongesi ngecize va na pande ku hana vukaleho vueni “mu Yelusalema na mu Yundeya yose na Samaliya na ku mutamba uze ha lenga mavu.” (Vili. 1:8; Luka 24:46-48) Mu nima ya ntsimbu ya indende, Vantuamena va mu Yundeya va kuatele kapostolo Petulu na Yoano na ku va neha ku Mpunga linga va va vindike ku ambulula na ku va zuzuisa. (Vili. 4:18, 21) Vati va lingile va Petulu na Yoano?

12. Kuliya na Vilinga 4:29, 31, vati va lingile vandongesi?

¹² Mu va va zuzuisile Vakuluntu va vaYundeya, Petulu na Yoano va handekele nguavo: “Nga ca viuka ku halakana kuli enu, kati kuli Njambi, ci yongolienu enu: muomu ka tu ku hasa ku holoka vunoni ku handeka evi vi tua muene nevi vi tua vuile.” (Vili. 4:19, 20) Omo Petulu na Yoano va vecelele, vandongesi va vundilile kuli Yehova na lizi lia kama linga a va kuase ku linga cizango ceni. Nguavo: “U fungile vangamba vove ku handeka lizi liove na ku-simpa cose.” Yehova ua kumbuluile civundilo cavo.—Tandenu Vilinga 4:29, 31.

13. Vika tu hasa ku lilongesa ku lungano lua muanetu Jin-Hyuk?

¹³ Tu hasa ku tambuluisa vandongesi va Yesu mu ku tualelaho ku ambulula ambe nga vakua nguvulu va tu vindika. Tu hilulenu lungano lua muanetu Jin-Hyuk u va tualele mu kamenga, omo lia ku viana ku lihaka mu via mavu. Kaha mu kamenga va ka mu kundikile cipanga ca ku niunga vamo vindzinda va kele mu kaliavuoso. Vunoni va mu vindikile ku simutuila viuma vieka vize ka via likuatele na cipanga caco, cipue vene nga via mu Mbimbiliya. Ngeci ua vundilile ku simpa na liano, linga a hase ku ambulula muzimbu ua cili ha nkala vukovelelo vue ku mu solokelele. (Vili. 5:29) Ivene ngueni: “Yehova ua kumbuluile vivundilo viange mu ku nji kuasa ku simpa na ku nji hana mana a ku putuka vilongesa via Mbimbiliya via vingi ha vimbelo via mu kamenga kaha nkala cilongesa 5 minutu lika. Ku vutsiki nja kele na ku soneka mikanda i nje ku hanene ku vindzinda viaco lia mukuavo.” Netu tu hasa ku kala na vusunga ngecize Yehova a ka tu kuasa ku puisamo cipanga cetu ca ku ambulula. Ngeci mua muanetu Jin-Hyuk, tu hasa ku vundila ku simpa na mana.

14. Vika vi hasa ku tu kuasa nga tuli na ku pinda na visoti? (Visamo 37:3, 5)

¹⁴ Vundilenu vukuasi vua Yehova nga muli na ku pinda na visoti. Cingi cetu tue ku pinda na visoti via mu muvila ni via mu visinganieka. Halumo tua tsisa muntu u tua lema, tuli na cimo citanga mu vusoko, ku tu luisa ni nkala cisoti ceka. Kaha viuma ngeci mua misongo ya kuli tambuluisa na vindzita via vuezelela ku ku kaluua cevi visoti. Ngeci mukemuo, muanienu mutima uenu kuli Yehova, mu lekenu citanga ci muli na ku pinda naco ngue muli na ku leka kavusamba kaha kalenu na vusunga ngecize “a ka ci lingisa.”—Tandenu Visamo 37:3, 5.

15. Vati ku vundila ci hasa ku tu kuasa “mu lamba”? Hanenu cimueso.

¹⁵ Ku kakatela mu vivundilo ci hasa ku tu kuasa ku kolesa “mu lamba.” (Loma 12:12) Yehova a tantekeya ngecize vangamba veni ve ku hita mu visoti, ngeci “a kevua mutambi uavo.” (Visa. 145:18, 19) Umo ndumbuetu ua miaka 29 ua pua pioneiro ua lizina Kristie, ua limuenenene vusunga vuaco. Ndumbuetu Kristie ua putukile ku vavala mua kama kaha eci ca mu kokelele vusiua. Mu nima ya ntsimbu va mu lekele nguavo, va ina va na va uana na musongo ka ue ku kanguka. Ndumbuetu Kristie ngueni: “Nja vundilile mua kama kuli Yehova linga a nji hane ngolo ya ku kolesa nkala litangua. Nja setekele ku kakatela ku programa yange ya ku linga viuma via mu lutsilielo, ngeci mua ku kunguluka na ku lilongesa mu vulika.” Ua vuezeleko naua ngueni: “Ku vundila ca nji kuasele mu vintsimbu via vikalu. Nja tantekeyele ngecize Yehova a li nange ntsimbu yose kaha ku tantekeya evi ca nji lembeziekele mua kama. Vutuhu ka nja kangukile ku vuvezi vuange, vunoni Yehova ua kumbuluile vivundilo viange mu ku nji hana ciyulo ca mu ntima na ku lembama.” Kaha vulukenu ngecize Njambi na tantekeya “ku ohiela ku vieseko vakua ku mu lemesa.”—2 Pet. 2:9.

16. Omo lia vika tua tondeka vukuasi vua Yehova linga tu hase ku vula vieseko?

¹⁶ Vundilenu vukuasi vua Yehova mu ku vula vieseko. Mu ku linga ka tua tantulukile, ntsimbu yose tue ku-lua na vieseko via ku linga vupi. Kaha Satana ali na ku linga cose linga a kaluuise kapandi ka tue ku lihakela. Imo njila ye ku puisilamo ovu vutumbe, ya pua mu ku pikula visinganieka vietu na vueho vua ku vihia. Vuana vuaco vu hasa ku tu sulisa na visinganieka via ku vihia, vize vie ku vihisa vuntu vuetu kaha vi hasa ku tu lingisa ku vulumuna.—Mako 7:21-23; Tia. 1:14, 15.

17. Mu nima ya ku vundila ku vula cimo ceseko, vika tua pande ku linga? (Talenu naua cikupulo.)

¹⁷ Tua tondeka vukuasi vua Yehova linga tu hase ku vula vieseko via ku linga vupi. Mu civundilo ca longesele vandongesi veni, Yesu ua vuezelemo aa mezi: “Kati u tu tuamenene ku vieseko, vunoni tu ohiele ku vipi.” (Mat. 6:13) Yehova ua tonda ku tu kuasa, vunoni tua pande ku mu vundila vukuasi vuaco. Kaha tua pande naua ku linga viuma via litombola na vivundilo vietu. Ca ku muenako, tu hasa ku lihakela kapandi ka ku liniunga ku viuma vize vi hasa ku pihisa visinganieka vietu, ni vi hasa ku tu sambuisila visinganieka via mu mavu a Satana. (Visa. 97:10) Tu hasa ku sulisa visinganieka vietu na viuma via cili mu ku tanda na ku lilongesa Mbimbiliya. Kaha ku kunguluka na ku ambulula naco ci ka niunga visinganieka vietu. Yehova co ua tu kulahesa ngueni, ka ka tavesa tu hite mu vieseko vize ka tu hasa ku kolesa.—1 Kol. 10:12, 13.

18. Ku tuala ha ku vundila, vika tu vose tua pande ku linga?

¹⁸ Muntu ku muntu ha kati ketu, a tondeka ku tualelelaho ku vundila mua kama linga a tualeleho ku ononoka Yehova, kuno ku matangua a ku kotokela kaha a akalu. Ngeci mukemuo, puenu na ku uana ntsimbu ya ku vundila nkala litangua. Yehova ua tonda tu ‘muanie mitima yetu kuli ikeye’ mu ku vundila. (Visa. 62:8) Puenu na ku sangaziala Yehova na ku mu santsela ku viose vie ku linga. Kaha puenu na ku vundila a mi kuase ku pua va ku simpa mu ku ambulula na ku mi kuasa ku-lua na nkala visoti vi mi solokela ni ku vula nkala vieseko vi muli na ku lihita navio. Kati mu tavese na vimo viahi ni na umo uahi, a mi vindike ku vundila ku-sua kumo kuli Yehova. Vati honi Yehova ue ku kumbulula vivundilo vietu? Tu ka kumbulula eci cihula ca seho mu cilongesa ci na hatako.