Tlen kiijkuilok Lucas

2 Ipan nopa tonali, Tlanauatijketl* Augusto tlanauatik ma moamatlalikaj nochi maseualmej. 2 (Ni achtoui censo mochijki kema Quirinio eliyaya gobernador tlen Siria). 3 Uan nochi yajkej moamatlalitoj ipan ininaltepe kampa tlakatkej. 4 José nojkia moamatlalito. Kiski tlen altepetl Nazaret ipan tlali Galilea uan yajki hasta tlali Judea, ipan ialtepe David tlen itoka Belén, pampa eliyaya iteipaixui uan tlen ichampoyouaj* David. 5 Yajki moamatlalito iuaya María, katli ya eliyaya isiua, kej mokajtoyaj kichiuasej, uan nechka konepiaskia. 6 Kema itstoyaj nopaya, asik hora para María konepias. 7 Uan kipixki se pilokichpiltsi, iachtouikone. Kipijki ika yoyomitl* uan kitejki ipan nopa kuakajo kampa tlakuaj tlapialmej, pampa amo onkayaya kanke ueliskia mokauasej.

8 Nopaya nechka itstoyaj katli kinmokuitlauiyayaj inintlapialjuaj, mokauayayaj kampa tlanemijya* uan kinmokuitlauiyayaj ininborregojuaj ika tlayoua. 9 Uan kampa itstoyaj, sanima* monextik iángel Jehová,* iueyitilis* Jehová* kinyaualok uan petlanki, uan tlauel momajmatijkej. 10 Pero nopa ángel kiniljuik: “Amo ximomajmatikaj, pampa xikitakaj, niinmechmatiltia kuali tlajtoli tlen kichiuas nochi tlauel ma yolpakikaj. 11 Pampa nama tlakatki ipan ialtepe David se katli inmechmakixtis,* katli eli Cristo, toTeko. 12 Inkiixmatisej nopa pilokichpiltsi pampa inkipantisej kipiktokej ika yoyomitl uan kitektokej kampa tlakuaj tlapialmej”. 13 Uajka iuaya nopa ángel monextijkej tlauel miakej ángeles katli kiueyichiuayayaj Dios* uan kiijtouayayaj: 14 “Ma tijueyichiuakaj Dios katli itstok iluikak, uan ipan Tlaltipaktli ma kipiakaj tlaseuilistli katli Dios kiita kipiaj kuali ininyolo”.

15 Kema nopa ángeles kinkajtejkej uan yajkej iluikak, katli kinmokuitlauiyayaj borregojmej pejkej moiljuiaj: “Moneki nimantsi tiasej Belén, uan tikitatij tlen panotok, tlen Jehová* techmatiltijtok”. 16 Uajka moisiuiltijkej uan kipantitoj María uan José kitektoyaj nopa pilokichpiltsi kampa tlakuaj tlapialmej. 17 Kema kiitakej nopa, kiijtojkej tlen ángel kiniljuijtoya tlen nopa pilokichpiltsi. 18 Uan nochi katli kintlakakilijkej, tlauel mosentlachilijkej ika tlen kiijtojkej katli kinmokuitlauiyayaj borregojmej. 19 Pero María pejki kiajokui ipan iyolo nochi nopa tlajtoli, uan moyoliljuiyaya tlake kinekiyaya kiijtos. 20 Uajka, katli kinmokuitlauiyayaj borregojmej tlakuepilijkej. Kiueyichijtiauiyayaj uan kipakilismakatiauiyayaj Dios ika nochi tlen kiitstoyaj uan kikaktoyaj, pampa kipantijkej nochi kej kiniljuijtoyaj.

21 Kema chikueyitik uan asik tonali para kichiuilisej circuncisión* nopa pilkonetsi, kitokaxtijkej Jesús, kej kiijtojtoya nopa ángel ma kitokaxtikaj kema María ayamo tlanemiltiyaya.*

22 Nojkia, kema asik tonali para motlapajpakchiuasej, kej kiijtouayaya iTlanauatil Moisés, kiuikakej nopa pilkonetsi hasta altepetl Jerusalén para kinextitij iixpa Jehová,* 23 kej ijkuilijtok ipan iTlanauatil Jehová:* “Nochi okichpilmej katli achtouieuanij moneki kimaktilisej* Jehová”.* 24 Uan temaktilijkej se tlapiali kej kiijtoua iTlanauatil Jehová:* “Omej palomas katli ya uejueyij o omej pilpalomajtsitsij”.

25 Ipan Jerusalén itstoya se tlakatl katli motokaxtiyaya Simeón, ya kichiuayaya tlen kuali uan nochipa tlauel tlaneltokayaya, kichiayaya nopa tonali kema Dios kinyolchikauaskia israeleuanij, uan ichikaualis Dios* kiyakanayaya. 26 Uan nojkia, ichikaualis Dios kimatiltijtoya amo mikiskia hasta kema kiitaskia Cristo, katli Jehová* kititlaniskia. 27 Uajka ichikaualis Dios kiyakanki ma kalaki ipan teokali. Uan kema itatauaj nopa pilkonetsi Jesús kalajkej iuaya para kichiuilisej tlen kiijtouayaya iTlanauatil Moisés, 28 Simeón kinauajki nopa pilokichpiltsi, kiueyichijki Dios uan kiijtok: 29 “NoUeyiTeko, nama ya uelis nimikis ika pakilistli kej tikijtok, 30 pampa nikitstok ika noixteyol tlen ika titemakixtis, 31 katli tijtlalijtok para nochi maseualmej ma kiitakaj. 32 Eli se tlauili para kinkixtilis tlen kinixtsakua katli amo elij judíos, uan kiuejkapantlalis moaltepe Israel”. 33 Itata uan inana tlauel mosentlachiliyayaj ika tlen kiijtouayayaj tlen nopa okichpil. 34 Nojkia, Simeón kinteochijki uan kiiljuik María, inana nopa pilokichpiltsi: “Xikita, ni okichpil kiixtlalijtokej para miakej ma uetsikaj uan miakej ma motlananakaj ipan Israel, uan elis se tlaneskayotl* tlen Dios katli maseualmej kitlaijiljuisej 35 (uan ta, titlaijiyouis kej kema se akajya kikechiliaj se espada* tlen ueueyak) para kipannextis tlen miakej moyoliljuiaj”.

36 Nojkia itstoya nopaya se siuatl katli eliyaya teokamanalojketl,* Ana ikone Fanuel, katli eliyaya tlen familia* Aser. Eliyaya se siuatl katli ya ueyi, katli san itstoya chikome xiuitl iuaya iueue kema monamiktik 37 uan teipa mijki iueue, uan ya kipixtoya 84 xiuitl. Nochipa itstoya ipan teokali, kampa kitekipanouayaya Dios tonaya uan tlayoua, mosauayaya* uan momaijtouayaya.* 38 Ipan nopa tlalochtli* monechkauik kampa inijuantij, uan pejki kitlaskamatilia Dios uan kinkamanaljuia tlen nopa okichpil nochi katli kichiayayaj ma kimakixtikaj altepetl Jerusalén.

39 Uajka, kema ya kichijtoyaj nochi tlen kiijtoua iTlanauatil Jehová,* tlakuepilijkej ininaltepe Nazaret tlen mokaua tlali Galilea. 40 Nopa pilokichpiltsi moskaltijtiajki, kipixtiajki chikaualistli uan tlalnamiktiajki. Uan Dios nochipa kipaleuiyaya.

41 Sejse xiuitl, itatauaj momajtoyaj yauij Jerusalén ipan nopa iljuitl tlen Pascua. 42 Kema Jesús kipixtoya 12 xiuitl, ixtlejkokej para Jerusalén, kej momajtoyaj kichiuaj ipan nopa iljuitl. 43 Kema tlanki nochi nopa iljuitl uan ya tlakuepiliyayaj, Jesús mokajki tlatepotsko,* ipan Jerusalén, pero itatauaj amo kimatkej. 44 Inijuantij moiljuiyayaj nopa okichpil yauiyaya ininuaya katli nojkia nejnentiauiyayaj, uan ya nejnentoyaj se tonal. Uajka pejkej kitemouaj kampa ininuikaljuaj uan ininteixmatkauaj. 45 Pero amo kipantijkej, yeka mokuepkej Jerusalén uan ejeliuis* kitemojkej. 46 Kema panok eyi tonali, kipantijkej ipan teokali moseuijtoya tlatlajko kampa tlamachtianij. Kintlakakiliyaya uan kintlatsintokiliyaya. 47 Uan nochi katli kitlakakilijtoyaj, mosentlachiliyayaj pampa nochi kuali kikuamachiliyaya uan kuali tlanankiliyaya. 48 Kema itatauaj kipantijkej, tlauel mosentlachilijkej uan inana kiiljuik: “Konetl, ¿kenke kiampa titechchijki? Motata uan na tlauel timokuesojtokej uan timitstemojtokej”. 49 Pero Jesús kinnankilik: “¿Kenke innechtemojtinemiyayaj? ¿Amo inkimatiyayaj moneki niitstos ichaj noTata?”. 50 Maske kiampa kiniljuik, inijuantij amo kikuamachilijkej tlen kiniljuiyaya.

51 Uajka temok ininuaya uan tlakuepilijkej Nazaret, uan kinneltokiliyaya nochi tlen kinauatiyayaj. Uan inana kuali kiajokuiyaya ipan iyolo nochi ni tlajtoli. 52 Uan Jesús moskaltijtiajki, tlalnamiktiajki, uan Dios uan maseualmej kuali kiitayayaj.