Apocalipsis

2 ”Xijtlajkuiljuili nopa ángel tlen tlanechikoli Éfeso: Ya ni tlen kiijtoua katli kipia nopa chikome sitlalimej ipan imanejmak uan nejnemi kampa eltok nopa chikome tlauilketsali tlen oro: 2 ‘Kuali nijmati tlen tijchijtok, kenijkatsa chikauak titekititok uan kenijkatsa tikijiyouijtok nochi. Nojkia nijmati amo tijneki tikinitas maseualmej katli kichiuaj tlen amo kuali uan kuali tikitak tlaj nelnelia eliyayaj apóstoles katli kiijtouayayaj kiampa elij pero amo nelia, uan tikitak para san tlakajkayauayayaj. 3 Nojkia tikijiyouijtok nochi uan nojua tinechtekipanojtok maske tikixnamiktok tlaouijkayotl pampa tieli notokilijka uan amo tisiajtok. 4 Pero onka se tlamantli tlen nijneki nimitsiljuis: ayokmo tijnextia nopa tlaiknelili tlen achtouia tijpixtoya.

5 ” ’Yeka, xikilnamiki tlen tijpixtoya uan tlen nama ayokmo tijpia, ximoyolkuepa uan xijchiua tlen achtouia tijchiuayaya. Tlaj amo timoyolkuepas, niualas uan nimitskuilis nopa tlauilketsali kampa eltok. 6 Pero tijchijtok se kuali tlamantli: tikinkualankaita tlen kichiuaj katli kitokiliaj itlamachtil* Nicolás, tlamantli tlen nojkia nijkualankaita. 7 Katli kipia inakas, ma kitlakakili tlen Dios* kiniljuia tlanechikolmej ika ichikaualis:* katli tlatlanis nijkauas ma kikua itlajka nopa kuauitl tlen temaka nemilistli tlen eltok kampa tlauel tlayejyektsi* tlen Dios iaxka’.

8 ”Xijtlajkuiljuili nopa ángel tlen tlanechikoli Esmirna: Ya ni tlen kiijtoua Katli Peua Uan Katli Tlami, katli mijki uan sampa moyolkuik: 9 ‘Nijmati kenijkatsa titlaijiyouijtok uan para amo tleno tijpia, maske noixpa ta titlatominpia. Nojkia, nijmati kenijkatsa katli kiijtouaj elij judíos mitsixpanoj ika tlen kiijtouaj, pero inijuantij amo elij judíos. Inijuantij elij se grupo tlen iaxka Satanás. 10 Amo xijmakasi nopa tlamantli tlen ika titlaijiyouis. Xikita, Diablo nojua kichiuas se keskij tlen inmojuantij ma inmechtsakuakaj para senkistok ma inmechyejyekokaj, uan inmechtlatsakuiltisej matlaktli tonali. Amo xijtlauelkaua Dios hasta kema timikis, uan na nimitsmakas nemilistli tlen eli kej se corona. 11 Katli kipia inakas, ma kitlakakili tlen Dios kiniljuia tlanechikolmej ika ichikaualis: nopa ompa mikilistli ayokmo tleno uelis kichiuilis katli tlatlanis.

12 ”Xijtlajkuiljuili nopa ángel tlen tlanechikoli Pérgamo: Ya ni tlen kiijtoua katli kipia nopa espada* tlen onkak kuali tlatentili uan ueueyak: 13 ‘Nijmati kanke tiitstok: kampa eltok iueyi silla Satanás. Maske nopaya tiitstok, amo tinechtlauelkajtok. Nojkia, amo tijkajtok tinechneltoka, yon ipan nopa tonali kema itstoya Antipas, notekipanojka katli amo nechtlauelkajki, katli kimiktijkej inmoixpa, kampa itstok Satanás.

14 ” ’Pero onka se keski tlamantli tlen nijneki nimitsiljuis: tijkajtok kampa inmojuantij ma itstokaj katli tlauel motlatskiliaj ipan itlamachtil Balaam, katli kinextilik Balac kenijkatsa kinyoltilanas para ma tlajtlakolchiuakaj israeleuanij para ma kikuakaj nopa nakatl tlen kinmaktilijtokej teteyomej* uan ma auilnemikaj.* 15 Nojkia, kampa inmojuantij itstokej katli tlauel motlatskiliaj ipan nopa tlamachtili katli kitokiliaj itlamachtil Nicolás. 16 Yeka, ximoyolkuepa. Tlaj amo kiampa tijchiuas, nimantsi niualas uan nikinteuis ika noespada tlen ueueyak tlen kisa ipan nokamak.

17 ” ’Katli kipia inakas, ma kitlakakili tlen Dios kiniljuia tlanechikolmej ika ichikaualis: katli tlatlanis nijmakas nopa maná* tlen motlatijtok uan nijmakas se piltetsi chipauak. Nopaya ijkuilijtok se yankuik tokajyotl tlen amo aka kimati, san kimati katli kiseliaʼ.

18 ”Xijtlajkuiljuili nopa ángel tlen tlanechikoli Tiatira: Ya ni tlen kiijtoua iKone Dios, katli kipia iixteyol kej tlilelemektli uan iikxi kej senkistok cobre: 19 ‘Nijmati tlen tijchijtok, kenijkatsa titeiknelijtok, kenijkatsa titlaneltokatok, kenijkatsa titlatekipanojtok uan kenijkatsa tikijiyouijtok nochi. Uan nijmati tlen nama tijchiua eli más que tlen achtouia tijchijki.

20 ” ’Pero onka se tlamantli tlen nijneki nimitsiljuis: tijkajtok nopa siuatl Jezabel nopaya ma itsto, katli kiijtoua eli se siuateokamanalojketl* uan kinkajkayaua ika itlamachtil notekipanojkauaj para ma auilnemikaj* uan ma kikuakaj nopa nakatl tlen kinmaktilijtokej teteyomej. 21 Nijkajki tonali para ma moyolkuepa, pero ya amo kineki moyolkuepas uan nojua kineki auilnentos. 22 Xikita, nijchiuas tlauel ma mokoko hasta amo uelis meuas, uan katli momekatiaj iuaya nijchiuas tlauel ma tlaijiyouikaj. Pero amo kiampa nijchiuas tlaj moyolkuepasej ika nopa tlamantli tlen amo kuali tlen yaya kinyoltilanki ma kichiuakaj. 23 Ikoneuaj nikintsontlamiltis ika se kokolistli tlen temiktia. Kiampa nochi tlanechikolmej kimatisej na nijtlachilia ininyolo uan inintlalnamikilis tlen más motlatijtok. Uan sejse inmojuantij nijtlaxtlauis ika tlen kichiuas.

24 ” ’Pero se keskij katli itstokej ipan Tiatira, nochi katli amo kitokiliaj itlamachtil Jezabel, uan amo kimatij nopa tlamachtili tlen amo melauak* tlen uala tlen Satanás, niinmechiljuia: “Amo niinmechtlalilia seyok tlamamali. 25 Pero kena niinmechiljuia, ximotlatskilijtokaj ipan nopa tlamantli tlen inkipiaj hasta kema niualas. 26 Katli tlatlanis uan nojua nemis ipan noojui hasta itlamia, nijmakas tlanauatili para kinnauatis altepemej, 27 sanse kej noTata nechmakatok tlanauatili. Uan ya kinyakanas maseualmej ika teposkuatopili, yeka kintsontlamiltisej sanse kej kema tlatlapaka sokichachapali. 28 Nojkia nijmakas nopa sitlali tlen kualka tlauia.* 29 Katli kipia inakas, ma kitlakakili tlen Dios kiniljuia tlanechikolmej ika ichikaualis” ’.