Apocalipsis

4 Teipa, nikitak se puerta tlapojtok ipan iluikak, uan itoskak katli achtoui nechkamanaljuiyaya kakistiyaya kej se trompeta. Nechiljuik: “Xitlejko nikaj uan nimitsnextilis tlamantli tlen panos”. 2 Teipa, ichikaualis Dios* nimantsi pejki tekiti ipan na. Uajka nikitak se ueyi silla ipan iluikak, uan se akajya moseuijtoya ipan nopa ueyi silla. 3 Katli nopaya moseuijtoya nesiyaya kej se piltetsi tlen kiiljuiaj jaspe uan seyok piltetsi chichiltik tlen tlauel yejyektsi,* uan kampa eltoya nopa ueyi silla kiyaualojtoya se arcoíris* tlen nesiyaya kej se piltetsi tlen kiiljuiaj esmeralda.

4 Uan ipan nopa ueyi silla kiyaualojtoyaj 24 uejueyi sillas, uan ipan nopa uejueyi sillas nikinitak moseuijtoyaj 24 ueuejtlakamej. Kipixtoyaj ininyoyo chipauak uan ipan inintsonteko kipixtoyaj se corona tlachijchiuali ika oro. 5 Ipan nopa ueyi silla tlapetlaniyaya, kakistiyaya miakej inintoskak uan tlatomoniyaya; uan eltoya chikome tlauili tlen tlatlatoya iixpa nopa ueyi silla. Ni kiixnextiyaya nopa chikome chikaualistli* tlen Dios. 6 Uan iixpa nopa ueyi silla eltoya se mar tlen nesiyaya kej se vidrio tsalantik uan tlauiyaya.

Uan tlatlajko, kampa nopa ueyi silla, kiyaualojtoyaj nauij ángeles tlen temitoyaj ika ixteyoli ika ininixpa uan ika ininika. 7 Nopa achtoui ángel nesiyaya kej se león, nopa ompa ángel nesiyaya kej se toro, nopa expa ángel kipixtoya ixayak kej se maseuali uan nopa najpa ángel nesiyaya kej se kuajtli* tlen patlantinemiyaya. 8 Sejse tlen nopa ángeles kipixtoyaj chikuasej inineltlapal tlen temitoya ika ixteyoli ika ininpani uan inineltlapaltsala. Uan tonaya uan tlayoua ajachika* kiijtouayayaj: “Tlatsejtseloltik, tlatsejtseloltik, tlatsejtseloltik Jehová* Dios,* Katli Kipia Nochi Chikaualistli, ya katli eli, katli eliyaya uan katli ualas”.

9 Kema nopa ángeles kiuejkapantlaliaj, kitlepanitaj uan kitlaskamatij katli moseuijtok ipan nopa ueyi silla, katli itstok para nochipa uan amo kema miki, 10 nopa 24 ueuejtlakamej motlankuaketsaj iixpa katli moseuijtok ipan nopa ueyi silla uan kiueyichiuaj katli itstok para nochipa uan amo kema miki. Kitlaliaj inincorona iixpa nopa ueyi silla uan kiijtouaj: 11 “ToDios Jehová,* katli tijpia chikaualistli, kinamiki ta ma mitsuejkapantlalikaj uan ma mitstlepanitakaj pampa ta tijchijchijki nochi tlamantli, uan pampa kiampa tijnejki, yeka onkak uan tijchijchijki”.