Ma tijpatlakaj tlen timoiljuiaj sanse kej Jehová

1. ¿Kenke moneki tielisej kej nopa cocokuauitl? (Nojkia xikita tlaixkopinkayotl).

SE Cocokuauitl amo nima posteki maske chikauak tlaajaka, pampa yamanik uan ueli mouelpachoua. Tlaj tojuantij tijnekij nojua kuali tijtekipanojtosej Jehová, moneki tielisej tiyamanikej. Ni kiijtosneki, kemantika monekis tijpatlasej tlen timoiljuiaj. Ni uelis tijchiuasej kema mopatla tonemilis uan kema sekinok amo moiljuiaj yon kitlapejpeniaj sanse tlamantli kej tojuantij.

2. ¿Tlake techpaleuis kema mopatlas tonemilis uan tlake tikitasej ipan ni tlamachtili?

² Nochi katli tijtekipanouaj Jehová tijnekij tijpatlasej tlen timoiljuiaj kema kinamiki. Nojkia tijnekij tijnextisej amo timoueyimatij uan titetlasojtlaj. Se keskij toikniuaj kinextijkej ni tlamantli ipan ininnemilis kema kiixnamijkej se keski tlaouijkayotl. Ipan ni tlamachtili tikitasej kenijkatsa kichijkej uan kenijkatsa uelis tijchiuasej tojuantij. Pero achtoui tikitasej kenijkatsa Jehová uan Jesús kipatlaj tlen moiljuiaj kema kinamiki.

JEHOVÁ UAN JESÚS KIPATLAJ KEJ MOILJUIAJ KEMA KINAMIKI

3. ¿Kenijkatsa tijmatij Jehová kipatla tlen moiljuia kema kinamiki?

³ Biblia kiijtoua Jehová eli kej se ueyi tetl tlen amo moolinia yon moijkuinia (Deut. 32:4, TNM). Maske Biblia kiampa kiijtoua, Jehová nojkia kipatla tlen moiljuia kema kinamiki. ¿Kenke kiampa tikijtouaj? Ipan Tlaltipaktli mopatlatok se keski tlamantli, yeka Jehová nojkia kipatlatok tlen moneki pampa kineki kichiuas tlen mosentlalijtok. Jehová techchijki kej ya, yeka tojuantij nojkia uelis tijpatlasej tlen timoiljuiaj kema mopatla tonemilis. Tlen Jehová techiljuia ipan Biblia, techpaleuia kuali ma tijtlapejpenikaj tlen tijchiuasej kema tikixnamikisej tlaouijkayotl. Tlen Jehová kichiua uan tlen techiljuia ipan Biblia, kinextia ya mosentlalijtok ipan tlen kichiuas, pero nojkia kipatla tlen moiljuia kema kinamiki.

4. Xikijto se tlamantli tlen kinextia Jehová kipatla tlen moiljuia kema kinamiki (Levítico 5:7, 11).

⁴ Maske Jehová itlanauatiljuaj eli xitlauak, kemantika kipatla tlen moiljuia. Ma tikitakaj kenijkatsa Jehová amo kinchiualtik israeleuanij ma kichiuakaj se keski tlamantli. Amo kintetsopayaya ma temakakaj sanse tlakajkaualistli o ofrenda. Ipan nopa Tlanauatili kiijtouayaya tlake tlakajkaualistli ueliskia temakasej maske eliyayaj teikneltsitsij (xijpoua Levítico 5:7, 11).

5. Xikijto kenijkatsa Jehová kinextik amo moueyimati uan tetlasojtla.

⁵ Kemantika Jehová kipatla tlen moiljuia pampa amo moueyimati uan tetlasojtla. Kinextik amo moueyimati kema nechka kitsontlamiltiskia altepetl Sodoma. Jehová kintitlanki se keskij iluikaeuanij, ma kiiljuitij Lot ma motlatiti kampa onka tepetl. Pero Lot kimakaski yas, yeka pejki chikauak tlajtlani ma kinkauakaj itstotij ipan altepetl Zóar. Maske Jehová ueltoskia kichiualtis Lot ma kichiua tlen kiiljuijtoya, amo kiampa kichijki. Ya kitlakakilik uan amo kitsontlamiltik Zóar kej moiljuijtoya kichiuas (Gén. 19:18-22). Kema ya panotoya se keski xiuitl, Jehová nojkia kinextik kintlasojtla maseualmej katli itstoyaj Nínive. Kititlanki tlajtolpanextijketl Jonás ma kiniljuiti kintsontlamiltiskia pampa tlauel tlajtlakolchijtoyaj. Pero kema níniveeuanij moyolkuepkej, Jehová kinteikneltiitak uan kintlapojpoljuik (Jon. 3:1, 10; 4:10, 11).

6. ¿Kenijkatsa Jesús kinextik kipatla tlen moiljuia kema kinamiki sanse kej iTata?

⁶ Kema Jesús tlajtolmoyajki, kemantika nojkia kipatlak tlen moiljuiyaya sanse kej iTata. Maske kititlantoyaj san ma kinpaleui israeleuanij, se tonali kipaleuik se siuatl katli amo eliyaya israelita. Nopa siuatl chikauak kitlajtlanik ma kichikaua isiuapil, katli kipixtoya “se iajakayo axkualtlakatl”, Jesús kitlasojtlak uan kichikajki nopa siuapil (Mat. 15:21-28). Nama, ma timoiljuikaj ipan tlen Jesús kiijtok kema ya pejtoya tlajtolmoyaua, ya kiijtok: “Pero ajkeya teyolmelaua para axnechneltoka, uajka na nojkia nikiljuis noTata nepa iluikak para yajaya axnoaxka” (Mat. 10:33). ¿Nelia kiampa kichijki kema Pedro expa kiijtok amo kiixmatiyaya? Amo, Jesús amo kichijki tlen kiijtojtoya pampa kiitak Pedro nelia moyolkokojtoya ika tlen kiijtojtoya uan amo kitlauelkajtoya. Kema Jesús moyolkuik kimonextilik Pedro, kiampa uelis kinextik kitlapojpoljuijtoya uan kiikneliyaya (Luc. 24:33, 34).

7. Kej kiijtoua Filipenses 4:5, ¿kenijkatsa tijnekiskiaj ma techitakaj sekinok?

⁷ Ya tikitakej Jehová uan Jesús kipatlaj tlen moiljuiaj kema kinamiki uan Jehová kineki nojkia kiampa ma tijchiuakaj (xijpoua Filipenses 4:5). Uelis timotlasintokisej: “¿Kiitaj sekinok nijpatla tlen nimoiljuia kema kinamiki? ¿Nijpia noyolo uan amo nikinchiualtia ma mochiua san tlen na nijneki? ¿O amo nijneki nijpatlas tlen nimoiljuia, san nijneki ma mochiua tlen nitlanauatia uan nitochontik? ¿Nikintetsopa toikniuaj ma kichiuakaj san tlen na nimoiljuia? ¿O nechpaktia nikintlakakilis sekinok uan nikinkauas ma kichiuakaj tlen inijuantij kiijtouaj?”. Tlaj tijchiuaj kampeka tijpatlasej tlen timoiljuiaj kema kinamiki, tijnextisej tielij kej Jehová uan Jesús. Nama ma tikitakaj kenijkatsa uelis tijpatlasej tlen timoiljuiaj kema mopatla se keski tlamantli ipan tonemilis, uan kema sekinok amo moiljuiaj yon kichiuaj sanse tlamantli kej tojuantij.

MA TIJPATLAKAJ TLEN TIMOILJUIAJ KEMA MOPATLA KEJ TIITSTOKEJ

8. ¿Tlake techpaleuis ma tijpatlakaj tlen timoiljuiaj kema mopatla kej tiitstokej? (Nojkia xikita nota).

⁸ Kema mopatla kej tiitstokej, nojkia moneki tijpatlasej tlen timoiljuiaj. Uelis mopatlatiuetsis kej tiitstokej pampa tijpiasej se kokolistli, amo tijpiasej tomij o pampa políticos mokualanisej. Ni tlamantli uelis kichiuas ma titlaijiyouikaj (Ecl. 9:11; 1 Cor. 7:31). Kema ayokmo tijtekipanouaj Jehová kej timomajtoyaj, nojkia uelis tijmatisej ouij tijpatlasej se keski tlamantli. Maske amo techpano sanse tlamantli, tlauel mitspaleuis tlaj tijchiuas ni naui tlamantli: 1) nima ximomati, 2) ximosentlali ipan tlen nojua uelis tijchiuas, 3) ximosentlali ipan tlen mitspaleuis, uan 4) xikinpaleui sekinok.b Ma tikitakaj kenijkatsa kinpaleuik ni naui tlamantli se keskij toikniuaj.

9. ¿Tlake kinpaleuik Emanuele uan isiua kema mopatlak kej itstoyaj?

⁹ Nima ximomati. Emanuele uan Francesca tlatekipanouaj kej misioneros uan kintitlankej ipan seyok altepetl. Kema asitoj, nima pejki kiyekouaj nopa tlajtoli tlen nopaya kamanaltij uan pejki kinixmatij toikniuaj ipan tlanechikoli. Pero pejki momoyaua COVID-19, uan ayokmo uelkej monechikouaj ininuaya toikniuaj. Nojkia, inana Francesca miktiuetski. Maske Francesca kinekiyaya kinitati ichampoyouaj, amo uelki pampa momoyajtoya nopa kokolistli. ¿Tlake kinpaleuik? Achtoui, Emanuele uan Francesca momaijtojkej uan kitlajtlanijkej Jehová ma kinmaka tlalnamikilistli para kiijiyouisej tlen kinpanoyaya. Jehová kintlakakilik uan kinyolchikajki ika itlanechikol. Tlauel kinyolchikajki se video, kampa se toikni kiijtok: “Tlaj nima tijseliaj nopa tlamantli tlen mopatla, amo titlaijiyouiaj, tiyolpakij uan kuali tijtekipanouaj Jehová”.c Nojkia, kichijkej kampeka más kuali tlajtolmoyauasej ipan teléfono uan pejki kimachtiaj ika Biblia se maseuali. Nojkia, kinkajkej sekinok ma kinpaleuikaj uan ma kinyolchikauakaj. Se tosiuaikni mojmostla kintitlaniliyaya se texto, kiampa kichijki se xiuitl. ¿Tlake techmachtia? Tlaj nima timomatij kej tiitstokej, techpaleuis ma tiyolpakikaj ika tlen kena ueli tijchiuaj.

10. ¿Tlake kichijki se tosiuaikni maske mopatlak kej itstoya?

¹⁰ Ximosentlali ipan tlen nojua uelis tijchiuas uan ipan tlen mitspaleuis. Tosiuaikni Christina, katli tlakatki Rumania uan nama itstok Japón. Tlauel moyolkokok kema mosemanki tlanechikoli inglés. Maske moyolkokok, ya nojua mosentlalik ipan tlen ueliskia kichiuas. Mosentlalik kuali tlatekipanos ipan tlanechikoli kampa kamanaltij japonés uan tlajtolmoyauas ika pakilistli. Kiiljuik se siuatl katli achtouia iuaya tekitiyaya, ma kimachti nopa tlajtoli ika Biblia uan ika pilamochtsi Nochipa xiitsto, uan nopa siuatl kena kinejki. Christina amo san kiyekok kuali kamanalti japonés, nopa siuatl katli kimachtiyaya, nojkia kinejki momachtis Biblia. ¿Tlake techmachtia? Tlaj timosentlalisej ipan tlen nojua uelis tijchiuasej uan ipan tlen techpaleuis, uelis tijchiuasej sekinok tlamantli maske mopatlas kej tiitstokej.

11. ¿Tlake kichijkej se toikni iuaya isiua kema ayokmo kipixkej tomij?

¹¹ Xikinpaleui sekinok. Se toikni iuaya isiua katli itstokej kampa amo kinkauaj ma tlaueyichiuakaj, kipolojkej ininteki kema ayokmo onkak tomij ipan nopa altepetl. ¿Tlake kichijkej kema kiampa kinpanok? Ayokmo tlauel motlakojkouijkej uan nojkia amo mosentlalijkej ipan nopa kuesoli, inijuantij kichijkej kampa kinpaleuisej sekinok ipan tlajtolmoyaualistli (Hech. 20:35). Nopa toikni kiijtok: “Kema tlauel titlajtolmoyauayayaj techpaleuiyaya ayokmo ma timoiljuikaj ipan nopa kuesoli tlen techpanoyaya uan más timosentlalijkej ipan tlen toTeotsij kineki”. ¿Tlake techmachtia? Tlaj mopatla kej tiitstokej, ma tijchiuakaj kampeka tlauel titlajtolmoyauasej uan tikinpaleuisej sekinok.

12. ¿Kenijkatsa techpaleuia tlen kichijki Pablo kema titlajtolmoyauaj?

¹² Kema titlajtolmoyauaj nojkia moneki tijpatlasej tlen tikijtouaj pampa tikamanaltij ininuaya maseualmej katli kineltokaj sekinok tlamantli, sejkanok euaj, o amo moiljuiaj sanse tlamantli kej tojuantij. ¿Kenke moneki tijchiuasej kej apóstol Pablo? Pampa ya kipatlak tlen kiijtouayaya kema tlajtolmoyauayaya. Jesús kinauatik ma tlamachti toTeotsij iTlajtol ipan sekinok altepemej (Rom. 11:13). Yeka, monejki kamanaltis ininuaya judíos, griegos, katli ixtlamatij, miltekitinij, tekichiuanij uan tlanauatianij. Ya kinejki kinpaleuis tlauel miakej, yeka kipatlak tlen kiijtouayaya kema tlajtolmoyauayaya (1 Cor. 9:19-23). Kema tlajtolmoyauayaya, achtoui kiitayaya tlake kineltokaj maseualmej uan tlake momajtoyaj kichiuaj. ¿Tlake techmachtia? Tlauel techpaleuis tlaj achtoui tikitasej tlake kinekij kimatisej maseualmej uan tlaj tikiniljuiaj tlen inijuantij kinekij kimatisej.

MA TIJTLEPANITAKAJ TLEN SEKINOK MOILJUIAJ

13. ¿Kenijkatsa techpaleuis tlaj tijtlepanitaj tlen sekinok moiljuiaj? (1 Corintios 8:9).

¹³ Tlaj tijpatlaj tlen timoiljuiaj o tlen tijchiuaj kema kinamiki, techpaleuis ma tijtlepanitakaj tlen sekinok moiljuiaj. Ma timoiljuikaj ipan ni tlamantli. Miakej tosiuaikniuaj kinpaktia kitekiuisej maquillaje uan sekij amo, se keskij toikniuaj kinpaktia kiisej se kentsi tlaili, uan sekij amo kinpaktia. Nojkia, amo sanse kej timopajtiaj kema timokokouaj. Tlaj timoiljuisej tlen tojuantij tijchiuaj más kuali uan tikinchiualtisej sekinok ma moiljuikaj kej tojuantij, tikinyolkokosej toikniuaj uan tijchiuasej ma moxelokaj ipan tlanechikoli. ¡Tojuantij amo tijnekij kiampa ma pano! (Xijpoua 1 Corintios 8:9; 10:23, 24). Tlaj tijchiuaj tlen Biblia techiljuia, amo tikintetsopasej sekinok uan kuali timouikasej ininuaya. Ma tikitakaj kenijkatsa uelis kiampa tijchiuasej ipan ome tlamantli.

14. ¿Ika tlake textos uelis timoyakanasej kema timoyoyontiaj uan timoyejyekchiuaj?

¹⁴ Kej timoyoyontiaj uan kej timoyejyekchiuaj. Jehová amo techiljuia tlake yoyomitl moneki timokentisej. Ya san techiljuia kenijkatsa kinamiki timoyoyontisej. Moneki timoyoyontisej kej kinamiki uan kiampa tijnextisej tijtlepanitaj toTeotsij uan tikintlepanitaj sekinok (1 Tim. 2:9, 10; 1 Ped. 3:3). Amo tijnekiskiaj toyoyo ma kichiua san ma techmauisokaj. Tlen Biblia tetlajtolmaka nojkia kinpaleuia ueuejtlakamej amo ma kinchiualtikaj toikniuaj ma moyoyontikaj o ma moxiljuikaj kej inijuantij kinpaktiskia. Ma tikitakaj tlen panok ipan se tlanechikoli. Telpokamej kototsi motsonkaltekiyayaj uan tsontepasoltikej nemiyayaj pampa kiampa kichiuayayaj miakej telpokamej. Ueuejtlakamej kinekiyayaj kinpaleuisej nopa telpokamej, pero amo kinekiyayaj kintetsopasej. Se toikni katli tepaxaloua kiniljuik ueuejtlakamej ma kiniljuikaj nopa telpokamej: “Tlaj kema titlamachtia tlaixpa, katli mitstlakakiliaj san mitsmauisouaj uan amo mitstlakakiliaj, uajka ximoiljui tlaj timoyoyontijtok o timoyejyekchijtok kej kinamiki”. Tlen kiijtok toikni, kinpaleuik ueuejtlakamej uan kiampa kinpaleuijkej nopa telpokamej.d

15. ¿Tlake textos uelis techpaleuis kema tijtlapejpenisej ika tlake timopajtisej? (Romanos 14:5).

¹⁵ Kej timopajtiaj. Sejse toikni moneki kitlapejpenis ika tlake mopajtis (Gál. 6:5). Kema tikitasej ika tlake timopajtisej, moneki amo tikixpanosej nopa tlanauatili kampa kiijtoua amo ma timotlalilikaj estli yon amo ma tijtekiuikaj tlen kichiuaj tetlajchiuianij o curanderos (Hech. 15:20; Gál. 5:19, 20). Uajka, maske tojuantij uelis tijtlapejpenisej ika tlake timopajtisej, moneki amo ma tikixpanokaj nopa tlanauatili. Sekij toikniuaj mopajtiaj ika se doctor, sekij ika xiuipajtli uan sekij ika sekinok tlamantli. Maske uelis tojuantij san techpaktia se tlamantli, moneki tijtlepanitasej tlen kitlapejpeniaj toikniuaj kema mopajtiaj. Tlauel techpaleuis tlaj tikilnamiktosej ni tlamantli: 1) san toTeotsij iTlanauatijkayo kitsontlamiltis nochi kokolistli (Is. 33:24); 2) Sejse moneki kiitas tlaj nelia kipaleuis tlen ika mopajtis (xijpoua Romanos 14:5); 3) amo kinamiki tikinijilnamikisej toikniuaj yon tikinyolkokosej (Rom. 14:13), uan 4) moneki timoiknelisej uan amo tijchiuasej san tlen tojuantij tijnekij, kiampa amo timoxelosej ipan tlanechikoli (Rom. 14:15, 19, 20). Tlaj tijchiuaj ni naui tlamantli, techpaleuis kuali ma timouikakaj ininuaya toikniuaj uan ma tiyolpakikaj.

16. ¿Kenijkatsa ueuejtlakamej uelis kinextisej kipatlaj tlen moiljuiaj kema kinamiki? (Nojkia xikita tlaixkopinkayomej).

¹⁶ Ueuejtlakamej moneki kinmachtisej sekinok kenijkatsa moneki kipatlasej tlen moiljuiaj (1 Tim. 3:2, 3). Se ueuejtlakatl katli ya ueyi, amo kinchiualtia sekinok ueuejtlakamej ma kichiuakaj tlen ya kiniljuia, pampa kimati toTeotsij ichikaualis uelis kichiuas seyok ueuejtlakatl ma kiijto se tlamantli tlen kinpaleuis kuali ma kitlapejpenikaj tlen kichiuasej. Uan tlaj, tlen kitlapejpeniaj se keskij ueuejtlakamej amo kiixpano tlen Biblia kiijtoua, nopa sekinok ueuejtlakamej kichiuaj ika pakilistli tlen moijtok, maske amo moiljuiaj sanse tlamantli.

TLAUEL TECHPALEUIA KEMA TIJPATLAJ TLEN TIMOILJUIAJ KEMA KINAMIKI

17. ¿Tlake tlateochiualistli tijselisej tlaj tijpatlaj tlen timoiljuiaj kema kinamiki?

¹⁷ Tlaj tijpatlaj tlen timoiljuiaj kema kinamiki, tijselisej miak tlateochiualistli. Techpaleuis kuali ma timouikakaj ininuaya toikniuaj uan amo ma timokualanikaj. Nojkia techpaleuis kuali tiitstosej ininuaya toikniuaj maske amo sanse tielij uan maske amo timomajtokej tijchiuaj sanse tlamantli. Uan tlauel tiyolpakisej pampa tijmajtosej tijchiuaj kej Jehová, katli kipatla tlen moiljuia kema kinamiki.