Nimotemachia Jehová nochipa nechmokuitlauijtos

NIKIXMATKI JEHOVÁ UAN PEJKI NIMOTEMACHIA IPAN YA

Nitlakatki ipan 1948 ipan se pilaltepetsi tlen Nigeria. Ipan nopa tonali, notío Moustapha, iteipaikni notata, uan nojkia Wahabi, noikni achtouiejketl, mochijkej Jehová itlajtoltemakauaj. Kema nijpixtoya 9 xiuitl, notata mijki. Nopa nelia tlauel nechyolkokok. Wahabi nechiljuik sampa tikitaskiaj totata kema moyolkuiskia, uan pampa nimoiljuiyaya ipan nopa tlamantli, nijnejki nimomachtis Biblia. Nimoatsonpoliuiltik ipan 1963, uan sekinok eyij noikniuaj nojkia kiampa kichijkej.

Ipan 1965, niajki altepetl Lagos, kampa se noikni ya mochantijtoya. Nopaya tlauel tiyolpajkej kema tiitstoyaj ika se keskij precursores regulares tlen tlanechikoli Igbobi. Inijuantij tlauel yolpakiyayaj, yeka nojkia nimochijki precursor ipan enero 1968.

Albert Olugbebi, se toikni katli itstoya Betel, kichijki se tlanechikoli pampa kinekiyaya techiljuis monekiyayaj precursores especiales ipan Nigeria ika norte. Nikilnamiki techiljuik ika miak pakilistli: “Inmojuantij intelpokamej uan uelis inkitekiuisej tonali uan inmochikaualis para Jehová. Onka miak tekitl tlen uelis inkichiuasej”. Na nijnekiyaya nijchiuas kej Isaías uan nias kampa Jehová nechtitlaniskia, yeka nijtemitik se solicitud (Is. 6:8).

Ipan mayo 1968, nechtitlankej kej precursor especial ipan altepetl Kano, Nigeria. Ipan nopa tonali mochijtoya se tlauilankayotl ipan Biafra, tlen pejki ipan 1967 uan tlanki ipan 1970. Nopa ueyi tlauilankayotl tlauel tlasosolok uan teipa pejki moteuiaj ipan Nigeria ika este. Se toikni katli kinekiyaya nechpaleuis nechiljuik amo ma nia ipan nopa altepetl. Pero nikiljuik: “Tlaskamati. Nijmati tlauel timotekipachoua, pero tlaj Jehová kineki ma nia nopaya, nimotemachia ya itstos nouaya”.

NIMOTEMACHIK IPAN JEHOVÁ MASKE TLAUILANKAYOTL TLASOSOLOK

Kema nikitak nopa tlauilankayotl tlauel tlasojsolojtoya, tlauel nechyolkokok. Kema titlajtolmoyajtinemiyayaj, kemantika tikinitayayaj katli kinmiktijtoyaj. Maske achtouia eltoya miak tlanechikoli ipan Kano, miakej toikniuaj kistejtoyaj. San mokauayayaj se 15 toikniuaj uan inijuantij tlauel momajmatijtoyaj uan moyolkuesojtoyaj. ¡Tlauel yolpajkej kema kiitakej tiasitoj chikuasej precursores especiales! Nima tikinyolchikajkej uan nopa tlauel kinpaleuik. Tikinpaleuijkej sampa ma kichiuakaj tlanechikoli, ma tlajtolmoyauakaj, ma kititlanikaj Betel inininformes uan ma tlajtlanikaj amatlajkuiloli.

Nochi precursores especiales pejkej timomachtiaj tlajtoli hausa. Miakej maseualmej techtlakakiliyayaj pampa tikinkamanaljuiyayaj ipan inintlajtol. Pero miakej katli itstoyaj ipan se religión tlen tlauel kiixmatij amo kinpaktiyaya ma titlajtolmoyauakaj, yeka monekiyaya timomokuitlauisej. Se tonali, na iuaya seyok toikni techtojtokak se tlakatl ika se cuchillo, pero amo techasito pampa tojuantij chikauak timotlalojkej. Maske ueltoskia techpanos tlen amo kuali, Jehová kichijki amo tleno ma techpano kej kiijtoua Salmo 4:8, uan yolik momiakilijtiajkej tlajtolmoyauanij. Ipan ni tonali, ipan Kano eltok 11 tlanechikoli uan itstokej kipano 500 tlajtolmoyauanij.

TECHTLATSAKUILTIAJ IPAN NÍGER

Ipan agosto 1968, se keski metstli teipa tiasitoyaj Kano, na uan sekinok omej precursores especiales techtitlankej Niamey (Níger, África Occidental). Nopaya tlauel tlatotonia uan amo kej ipan sekinok altepemej. Monejki timomatisej kiampa tiitstosej uan nojkia monejki tijyekosej tlajtoli francés, tlen motekiuia ipan nopa altepetl. Maske tijmatkej ouij, timotemachijkej ipan Jehová uan pejki titlajtolmoyauaj ipan nopa altepetl ininuaya se keskij toikniuaj katli nopaya itstoyaj. Pampa tlauel titlajtolmoyauayayaj, miakej maseualmej tlen Niamey, katli ueliyayaj tlapouaj, kipixtoyaj nopa amochtli tlen ika titlamachtiyayaj, La verdad que lleva a vida eterna. Uan miakej techtemouayayaj pampa kinekiyayaj ma tikinmakakaj se amochtli.

Nima tikitakej tekichiuanij amo kinpaktiyaya tlen kichiuayayaj Jehová itlajtoltemakauaj. Ipan julio 1969, tijchijkej nopa achtoui ueyi tlanechikolistli ipan nopa altepetl uan mosentilijkej se 20 maseualmej. Tlauel tiyolpaktoyaj pampa omej moatsonpoliuiltiskiaj. Pero ipan nopa achtoui tonali, policías ayokmo techkajkej ma tijchiuakaj nopa ueyi tlanechikolistli. Kinuikakej toikni katli tepaxaloua chijchikuasej metstli uan precursores especiales. Nopaya techtlatsintokijkej se keski tlamantli uan teipa techiljuijkej ma titlakuepilikaj ualmostla. Tikitakej tijpiaskiaj se keski kuesoli ika tekichiuanij, yeka nopa tlamachtili tlen atsonpoliuilistli moixtonki ipan se kali, uan toikniuaj moatsonpoliuiltijkej ipan se ueyatl kampa amo aka kinitak.

Kema panok se keski semanas, tekichiuanij tlen Níger techiljuijkej na uan sekinok makuiltij precursores especiales ma tikisteuakaj. Uan san tijpiayayaj 48 horas, tojuantij monekiyaya tikitasej kenijkatsa tikisaskiaj. Tikinneltokakej uan nima tiajkej Betel tlen Nigeria; nopaya techtitlankej sejkanok.

Nechiljuijkej ma nia pilaltepetsi Orisunbare, Nigeria. Tlauel nechpaktiyaya nitlajtolmoyauas nopaya uan nitlamachtis ininuaya toikniuaj. Tlajko xiuitl teipa, kali Betel nechiljuik sampa nitlakuepiliskia Níger; nama niaskia noselti. Maske nimosentlachilik uan nimotekipachok ika tlen nechiljuijkej, na tlauel nijnekiyaya sampa nikinitas toikniuaj tlen Níger.

Kema panotoya se tonali niasitoya Niamey, se tlakatl tlen Nigeria kiitak nieli se Jehová itlajtoltemajka, uan pejki nechtlajtlania miak tlamantli tlen Biblia. Pejki nijmachtia, uan teipa ayokmo tlachichinki yon tlaik uan moatsonpoliuiltik. Teipa nitlajtolmoyajki ipan sekinok altepemej uan nikitak kenijkatsa maseualmej pejkej kitekipanouaj Jehová. Kema niasito Níger itstoyaj 31 toikniuaj; uan kema nikistejki, itstoyaj 69.

“AMO TIJMATIJ KENIJKATSA ITSTOKEJ TOIKNIUAJ IPAN GUINEA”

Ipan diciembre 1977, nitlakuepilik Nigeria pampa nechmachtiskiaj eyi semanas. Kema tlanki timomachtiaj, toikni Malcolm Vigo, katli kiyakanayaya Betel, nechmakak se amatlajkuiloli tlen nechtitlanilik kali Betel tlen Sierra Leona. Toikniuaj kitemouayayaj se precursor katli amo mosiuajtijtoya, katli amo mokokouayaya uan katli kamanaltiyaya inglés uan francés. Kinekiyayaj ma tepaxalo chijchikuasej metstli ipan Guinea-Conakri. Toikni Vigo nechiljuik yeka nechtlanejtoyaj ma nimomachtiti. Nechiljuik ouij nijmatiskia nijchiuas nopa tekitl, yeka nechiljuik: “Kuali ximoiljui tlaj tijselis”. Na nima nikiljuik: “Kena nias pampa eli Jehová katli nechtitlani”.

Niajki Sierra Leona uan nimosentilik ininuaya toikniuaj tlen Betel. Se toikni katli kiyakanayaya Betel nechiljuik: “Amo tijmatij kenijkatsa itstokej toikniuaj ipan Guinea”. Maske kali Betel kiyakanayaya tlajtolmoyaualistli ipan Guinea, amo ueliyayaj monojnotsaj ininuaya toikniuaj pampa políticos tlauel mokualaniyayaj. Miakpa kinektoyaj kititlanisej se toikni ipan nopa altepetl, pero amo ueltoyaj. Yeka, nechiljuijkej ma nia Conakri, Guinea uan ma nijkixti nopa amatl tlen ika nechkauaskiaj ma nimokaua nopaya.

Kema niasito Conakri, niajki kampa kinpaleuiaj katli euaj Nigeria. Nopaya nimosentilik iuaya nopa tekichijketl uan nikiljuik nijnekiyaya nitlajtolmoyauas ipan Guinea. Pero ya nechiljuik amo kiampa ma nijchiua pampa ueliskia nechtsakuasej o nechpanos tlen amo kuali. Nechiljuik: “Xitlakuepili Nigeria uan nopaya xitlajtolmoyaua”. Uan na nijnankilik: “Nijneki nimokauas”. Nopa tlakatl kitlajkuiljuilik katli kiyakana nochi tlen mochiua ipan Guinea uan kiiljuik ma nechpaleui, uan kiampa kichijki.

Teipa, kema nitlakuepilik kali Betel tlen Sierra Leona, nikiniljuik toikniuaj tlen kiijtojtoya nopa tekichijketl tlen altepetl Guinea. Toikniuaj tlauel yolpajkej kema kimatkej nechkajkej ma nimokaua ipan Guinea. Ni panok pampa Jehová nechpaleuijtoya.

Ipan 1978 uan tlanki ipan 1989, nitepaxalok ipan Guinea, Sierra Leona uan nojkia ipan Liberia kema amo itstoya toikni katli nopaya tepaxalouayaya. Achtoui tlauel nimokokouayaya kema niauiyaya ipan pilaltepetsitsij, pero toikniuaj nochipa kichiuayayaj kampeka nechuikasej hospital.

Se tonali tlauel nimokokok pampa nechasik malaria uan niijtiokuilojki. Kema nimochikajki, nijmatki toikniuaj ya kiitstoyaj kanke nechtokaskiaj kema nimikiskia. Maske nechpanok miak tlamantli tlen ika ueliskia nimikis, amo kema nimoiljuik nijkauas nopa tekitl tlen nechmakatoyaj. Uan nojua nimotemachia san Jehová uelis techmakixtis, pampa tlaj timikisej ya techyolkuis.

NA UAN NOSIUA TIMOTEMACHIAJ IPAN JEHOVÁ

Ipan 1988, nikixmatki Dorcas, se precursora katli amo moueyimati uan kuali tlaneltoka. Timosenkajkej uan nojua tijpaxalojkej tlanechikoli. Ya nochipa nechpaleuia uan kinextia nechiknelia, uan kikajtok miak tlamantli pampa kitekipanoua Jehová. Kemantika tinejnemiyayaj se 25 kilómetros kema tiauiyayaj ipan seyok tlanechikoli uan nochipa tijuikayayaj tlen tijtekiuiskiaj. Kema tiauiyayaj tlanechikoli tlen uejka eltoya, tiauiyayaj ipan carro o ipan sekinok tlamantli. Kanajya tlauel sokitla eliyaya uan nopa ojtli amo kuali eltoya.

Dorcas amo majmaui. Kemantika tikixkotonayayaj ueyatl kampa itstoyaj miakej cocodrilos. Se tonali, tiuejkajkej makuili tonali kema tiajkej ipan se tlanechikoli. Nopa puentes sosolijtoya, yeka tikixkotonkej ueyatl ipan se akali. Kema Dorcas kisaskia tlen nopa akali, uetski uan atsonpolijki. Ipan ueyatl itstoyaj cocodrilos uan amo tiueliyayaj tiajkij. Pero se keskij telpokamej katli nopaya itstoyaj, kalajkej uan kikixtijkej. Maske miak tonali amo uelki tikochij pampa tlauel timomajmatijtoyaj, nojua titlatekipanojkej nopaya.

Ipejya 1992, tlauel timosentlachilijkej pampa Dorcas tlanemiltiyaya. ¿Ayokmo ueliskia senkistok titlatekipanosej? Timoiljuijkej: “Jehová techmaka ni pilkonetsi”. Yeka tosiuapil tijtokaxtijkej Jahgift (kiijtosneki “tlen Jehová techmaka”). Kema panok naui xiuitl tlakatki tokone Eric. Nokoneuaj elij se ueyi tlateochiualistli tlen Jehová techmakak. Jahgift tlatekipanok ipan kali kampa tlajtolkuepaj ipan Conakri, uan Eric eli tlapaleuijketl.

Maske Dorcas ayokmo uelki tlatekipanoua kej precursora especial, nojua tlatekipanok kej precursora regular maske tokoneuaj eliyayaj konetsitsij. Na nojua nitlatekipanok kej precursor especial pampa Jehová techpaleuik. Uan kema tokoneuaj moskaltijkej, Dorcas sampa tlatekipanok kej precursora especial, uan nama tielij misioneros ipan Conakri.

JEHOVÁ NOCHIPA TECHMOKUITLAUIA

Nochipa niajtok kampa Jehová nechtitlantok. Na uan nosiua miakpa tikitstokej kenijkatsa Jehová techmanauijtok uan techteochijtok. Amo tikixnamiktokej miak tlaouijkayotl yon tlauel timotekipachojtokej pampa timotemachijtokej ipan Jehová uan amo ipan tlen tijpiaj. Tikitstokej san Jehová eli ‘totemakixtijka’ uan san ya uelis techmokuitlauis (1 Crón. 16:35). Temachtli nijmati Jehová ‘kinmanauis ika ichikaualis’ nochi katli motemachiaj ipan ya (1 Sam. 25:29).