¿Kenke Jesús tlauel kipatiita itoka Jehová?

1, 2. 1) ¿Tlake kichijki Jesús nopa youali kema nechka kimiktiskiaj? 2) ¿Tlake tikitasej ipan ni tlamachtili?

ELIYAYA jueves ika tlayoua. Pejtoya nisán 14 tlen xiuitl 33 uan Jesús nechka kitemaktiliskiaj, kitlajtolsenkauaskiaj, kiiljuiskiaj tlen kichiuiliskiaj, kitlaijiyouiltiskiaj uan kimiktiskiaj. Ya itstoya ipan se cuarto tlen eltoya uejkapa ininuaya itokilijkauaj. Kema ya tlantoyaj tlakuaj, Jesús kiniljuik se keski tlajtoli tlen ika kinyolchikajki. Uan kema ayamo yauiyayaj, Jesús momaijtok ika nochi iyolo. Ipan Juan capítulo 17, apóstol Juan kiijkuilok tlen Jesús kiijtok kema momaijtok.

² Ipan ni tlamachtili tikitasej tlake techmachtia nopa tlamaijtoli tlen Jesús kichijki, tlake kitekipachouayaya ipan nopa tonali uan tlake mosentlalijtoya kichiuas kema itstoya ipan Tlaltipaktli.

“NIKINNEXTILIJTOK MOTOKA”

3. ¿Tlake kiijtok Jesús tlen itoka Jehová uan tlake kinejki kiijtos? (Juan 17:6, 26).

³ Ipan nopa tlamaijtoli, Jesús kiiljuik Jehová: “Nikinnextilijtok motoka”. Ni kinextia ya mosentlalijtoya kiampa kichiuas, pampa ompa kiijtok (xijpoua Juan 17:6, 26). ¿Kinekiyaya kiijtos kinmachtijtoya Dios itoka Jehová? Amo. Itokilijkauaj kuali kimatiyayaj nopa tlamantli pampa eliyayaj judíos uan nopa tokajyotl miakpa nesi ipan iTlajkuilol Dios Ika Hebreo. Jesús kiampa kiijtok pampa kinnextilijtoya kenijkatsa eli Jehová, tlake mosentlalijtok kichiuas, tlake kichiua uan nopa kuajkuali tlamantli tlen kinextia. San Jesús kuali kiixmati iTata, yeka san ya ueliyaya kinmachtia miak tlamantli tlen ya.

4, 5. 1) ¿Tlake ueliskia kichiuas tlauel ma tijpatiitakaj itoka se akajya? Xikijto se neskayotl. 2) ¿Kenke Jesús itokilijkauaj tlauel kipatiitakej itoka Jehová?

⁴ Ximoiljui ipan ni tlamantli: ipan motlanechikol itstok se ueuejtlakatl katli itoka David uan eli tepajtijketl. Uelis ya uejkaj tikixmati. Pero ximoiljui se tonali sanima timokokoua. Nima mitsuikaj kampa tekiti, ya mitspaleuia timochikauas uan nama más tikiknelia. Uelis kema tijkaki se akajya kitokaxtia, nimantsi tikilnamiki kenijkatsa mitspaleuik. Nama ayokmo tikita David san kej se ueuejtlakatl, nojkia tikita kej se akajya katli mitspaleuik ximochikaua. Uelis tikijtosej nama más tijpatiita itoka.

⁵ Maske Jesús itokilijkauaj kimatiyayaj Dios motokaxtia Jehová, inijuantij más kuali kiixmatkej uan yeka tlauel kipatiitakej nopa tokajyotl. ¿Tlake kinpaleuik kiampa ma kichiuakaj? Nochi tlen Jesús kichijki uan tlen kiijtok kema tlajtolmoyajki, kinpaleuik itokilijkauaj ma kiitakaj kenijkatsa eli Jehová. Kema kiitakej kenijkatsa tlamachtiyaya Jesús uan kenijkatsa kinpaleuiyaya maseualmej, kinpaleuik más kuali ma kiixmatikaj Jehová (Juan 14:9; 17:3).

“MOTOKA TLEN TA TINECHMAKAK”

6. ¿Tlake kinejki kiijtos Jesús kema kiijtok Jehová kimakatoya itoka? (Juan 17:11, 12).

⁶ Jesús kiiljuik Jehová kema momaijtok: “Xikinmokuitlaui para tijueyichiuas motoka tlen ta tinechmakak” (xijpoua Juan 17:11, 12). ¿Kiijtosneki ipan nopa tonali Jesús pejki motokaxtia Jehová? Amo. Kema Jesús kamanaltiyaya tlen Jehová itoka kiijtok nopa tlajtoli “motoka”. Nopa kinextia Jesús amo pejki motokaxtia Jehová. Uajka, ¿tlake kinejki kiijtos kema kiijtok Jehová kimakatoya itoka? Achtoui, ya kinextik kenijkatsa eli Jehová uan tematiltiyaya nochi tlen ya kiiljuiyaya. Jesús ualajki ipan Tlaltipaktli pampa iTata kiualtitlanki uan kichijki milagros ipan itoka (Juan 5:43; 10:25). Nojkia, itoka Jesús kiijtosneki: “Jehová temanauia”. Uajka, ipan Jesús itoka, nojkia uala Jehová itoka.

7. Xikijto ika se neskayotl kenke Jesús ueliyaya kamanalti ipan itoka iTata.

⁷ Uelis más kuali tijkuamachilisej ika ni neskayotl: se tekichijketl tlen se altepetl uelis kiiljuis se akajya ma yaui ipan seyok altepetl uan kinauatis ma kiijto tlen ya kiijtoskia. Uajka tlen kiijtos nopa maseuali eliskia sanse ipati kej tlen kiijtoskia nopa tekichijketl. Kiampa pano ika nopa tekitl tlen Jehová kimakak Jesús, pampa ya kimakak tlanauatili iKone uan ya ueliyaya kamanalti ipan itoka iTata (Mat. 21:9; Luc. 13:35).

8. ¿Kenke Jehová kiijtok itoka eltoya ipan Jesús kema ayamo ualayaya ipan Tlaltipaktli? (Éxodo 23:20, 21).

⁸ Biblia kiijtoua Jesús eli nopa Tlajtoli pampa Jehová miakpa kitekiuijtok para kiniljuis ángeles uan maseualmej tlake kinekiyaya ma kimatikaj uan ma kichiuakaj (Juan 1:1-3). Uelis Jesús elki nopa ángel katli Jehová kititlanki para kinyakanas israeleuanij ipan nopa uaktok tlali. ¿Kenke monekiyaya kineltokasej nopa ángel? Jehová kiijtok: “Pampa yajaya kiuika nochi nopa tlanauatili tlen nijuika na [o notoka, TNM]” (xijpoua Éxodo 23:20, 21).a ¿Kenke tikijtouaj itoka Jehová kejuak eltoya ipan Jesús? Pampa Jesús kamanalti ipan itoka Jehová, eli katli más kimanauia uan tlapaleuia ma mochiua tlatsejtseloltik itoka Jehová.

“PAPÁ, XIJUEYICHIUA MOTOKA”

9. ¿Kenke tijmatij Jesús tlauel kipatiitayaya itoka Jehová?

⁹ Kema Jesús ayamo ualayaya ipan Tlaltipaktli, tlauel kipatiitayaya itoka Jehová. Uan nojkia kiampa kichijki kema itstoya ipan Tlaltipaktli. Ika nochi tlen kichijki kinextik tlauel kipatiitayaya itoka Jehová. Kema Jesús nechka kimiktiskiaj, kiiljuik iTata: “Papá, xijueyichiua motoka”. Uan ipan iluikak iTata chikauak kinankilik: “Nijueyichijtok uan sampa nijueyichiuas” (Juan 12:28).

10, 11. 1) ¿Kenijkatsa Jesús kiuejkapantlalik itoka Jehová? (Nojkia xikita tlaixkopinkayotl). 2) ¿Kenke moneki tijuejkapantlalisej uan tijmanauisej itoka Jehová?

¹⁰ Jesús nojkia kiueyichijki itoka iTata. ¿Kenijkatsa kichijki? Kema kiniljuiyaya sekinok nopa kuajkuali tlamantli tlen Jehová kinextia uan kichiua. Pero amo san ya nopa kichijki. Ya kimatiyaya monekiyaya kinextis itoka Jehová eli tlatsejtseloltik uan san ya nochi kuali kichiua. Jesús kinextik tlauel kipatiitayaya ni tlamantli kema kinmachtik itokilijkauaj kenijkatsa momaijtosej. Ya kiijtok: “ToTata katli tiitstok iluikak, ma kiuejkapantlalikaj motoka” (Mat. 6:9).

¹¹ ¿Kenke moneki tijuejkapantlalisej itoka Jehová uan tijmanauisej? Pampa ipan xochimili Edén, Satanás kiijtok Dios san istlakatiyaya uan amo kinekiyaya Adán uan Eva ma yolpakikaj (Gén. 3:1-5). Satanás nojkia kiijtok ika tlen Jehová kichiua kinextia mokuapoloua. Nopa istlakatili kichijki maseualmej ma moiljuikaj Jehová kichiua tlen amo kuali. Uan teipa kema itstoya Job, Satanás kiijtok maseualmej kitekipanouaj Dios san pampa kinekij ma kinpaleui. Nojkia kiijtok kema maseualmej kiixnamikisej tlaouijkayotl, kitlauelkauasej Jehová pampa amo nelnelia kiikneliaj (Job 1:9-11; 2:4). Monekiyaya panos tonali uan kiampa nesiskia ajkia kiijtouayaya tlen melauak: Jehová o Satanás.

“NITEMAKTILIA NONEMILIS”

12. ¿Tlake mosemakak kichiuas Jesús pampa kiikneliyaya itoka Jehová?

¹² Jesús tlauel kiikneliyaya iTata, yeka kichiuayaya kampeka kiuejkapantlalis itoka Jehová uan kimanauis. Yeka kiijtok: “Nitemaktilia nonemilis” (Juan 10:17, 18). Jesús kinejki motemaktilis para kimanauis itoka Jehová.b Adán uan Eva, katli eliyayaj xitlauakej, kitlauelkajkej Jehová uan kipaleuijkej Satanás. Pero Jesús amo kiampa kichijki, ya mosemakak ualas ipan Tlaltipaktli uan kinextis tlauel kiiknelia iTata pampa nochipa kineltokak (Heb. 4:15; 5:7-10). Jesús amo kema kitlauelkajki Jehová uan nochipa kineltokak hasta kema kimiktijkej (Heb. 12:2). Kiampa kinextik tlauel kiikneliyaya Jehová uan itoka.

13. ¿Kenke san Jesús ueliyaya kinextis Satanás eliyaya katli istlakatiyaya? (Nojkia xikita tlaixkopinkayotl).

¹³ Ika nochi tlen Jesús kichijki kinextik Satanás eliyaya katli istlakati uan amo Jehová (Juan 8:44). San Jesús eli katli tlauel kuali kiixmati Jehová. Tlaj Satanás kiijtojtoskia se tlamantli tlen melauak, Jesús kimajtoskia. Pero ya mosentlalijtoya kimanauis itoka Jehová uan amo kinekiyaya maseualmej ma moiljuikaj tlen amo kuali tlen ya. Uan maske nesiyaya kejuak Jehová kitlauelkajtoya, Jesús mosentlalijtoya amo kitlauelkauas Jehová maske kimiktiskiaj (Mat. 27:46).c

“NIJTLAMICHIJTOK NOPA TEKITL TLEN TINECHMAKAK”

14. ¿Kenijkatsa Jehová kiteochijki Jesús pampa amo kitlauelkajki?

¹⁴ Kema Jesús nechka kimiktiskiaj, kiiljuik Jehová ipan se tlamaijtoli: “Nijtlamichijtok nopa tekitl tlen tinechmakak” (Juan 17:4). Ya motemachiyaya Jehová kiteochiuaskia pampa amo kitlauelkajtoya (Juan 17:4, 5). Uan Jehová nelnelia kiteochijki pampa kiyolkuik (Hech. 2:23, 24). Teipa kimakak se tekitl tlen tlauel ipati ipan iluikak (Filip. 2:8, 9). Kema panok miak xiuitl, Jesús pejki tlanauatia ipan iTlanauatijkayo Dios. ¿Uan tlake kichiuaskia nopa Tlanauatijkayotl? Jesús kiixtonki kema techmachtik ma timomaijtokaj. Ya kiijtok: “Tijnekij moTlanauatijkayo ma uala tlanauatiki. Ma mochiua tlen ta tijneki ipan Tlaltipaktli kej mochiua ipan iluikak” (Mat. 6:10).

15. ¿Tlake sekinok tlamantli kichiuas Jesús?

¹⁵ Jesús nechka kinteuis ikualankaitakauaj Jehová uan kintsontlamiltis maseualmej katli amo kuajkualmej ipan Armagedón (Apoc. 16:14, 16; 19:11-16). Uan teipa kimajkauas Satanás kejuak ipan se “ostotl tlen tlauel uejkatla”, nopaya tsaktos uan amo tleno uelis kichiuas (Apoc. 20:1-3). Teipa, Jesús tlanauatis Mil Xiuitl, kichiuas ma onka tlaseuilistli ipan Tlaltipaktli uan kinpaleuis maseualmej ma elikaj xitlauakej. Kinyolkuis katli miktokej uan kichiuas Tlaltipaktli ma eli se xochimili. ¡Kiampa mochiuas tlen Jehová mosentlalijtok! (Apoc. 21:1-4).

16. ¿Kenijkatsa tiitstosej kema tlamis nopa Mil Xiuitl?

¹⁶ Kema tlamis nopa Mil Xiuitl, ayokmo aka elis tlajtlakole uan nochi elisej xitlauakej. Maseualmej ayokmo monekis kiiljuisej Jehová ma kintlapojpoljui, yon monekis se akajya katli motlajkoketsas ika Dios uan maseualmej. Nojkia ayokmo monekis sacerdotes ma kinpaleuikaj maseualmej para ma monechkauikaj ika Jehová. Uan Jehová kitsontlamiltis “nopa mikilistli, ikualankaitaka tlen san iyojtsi mokauas”. Katli miktokej, moyolkuisej uan nochi katli itstosej ipan Tlaltipaktli elisej xitlauakej (1 Cor. 15:25, 26).

17, 18. 1) ¿Tlake panos kema tlamis nopa Mil Xiuitl? 2) ¿Tlake kichiuas Jesús kema tlamis tlanauatis? (1 Corintios 15:24, 28; nojkia xikita tlaixkopinkayotl).

¹⁷ ¿Tlake seyok tlamantli panos kema tlamis nopa Mil Xiuitl? Mouejkapantlalis itoka Jehová uan nochi kiitasej san ya nelnelia kichiua tlen kuali. Ipan xochimili Edén Satanás kiijtok Jehová san tlakajkayaua, amo kuali tlanauatia uan amo kiniknelia maseualmej. Pero katli kitekipanouaj Jehová, kinextijtiualajtokej kiuejkapantlaliaj itoka. Kema tlamis nopa Mil Xiuitl, ya kiuejkapantlalijtos itoka uan kinextijtos nelnelia tlauel techiknelia.

¹⁸ Uajka nochi maseualmej kimatisej Satanás san kiistlakauik Jehová. ¿Tlake kichiuas Jesús kema tlamis tlanauatis? ¿Kichiuas kej Satanás uan tlaijixnamikis? ¡Amo! (Xijpoua 1 Corintios 15:24, 28). Jesús kikuepilis iTlanauatijkayo iTata uan kikauas ma kiyakana. Kiampa kichiuas pampa tlauel kiiknelia.

19. ¿Kenijkatsa kiita Jesús itoka Jehová?

¹⁹ Yeka, Jehová kimakak itoka iKone uan kimakak tlanauatili para ma kamanalti ipan itoka. Uan Jesús kichijtok tlen kinauatik. Uajka, ¿kenijkatsa Jesús kiita itoka Jehová? Ya tlauel kipatiita. Kimanauik nopa tokajyotl maske kimiktijkej, uan kema tlamis tlanauatis kikuepilis iTlanauatijkayo iTata. ¿Kenijkatsa uelis tijchiuasej kej ya? Tijnankilisej ni tlajtlani ipan tlamachtili 23.