Jacob yajki Harán

¿TIJMATI ajkia ni tlakamej tlen ininuaya monojnotstok Jacob? Teipa kema ya nejnentoya miak tonali, Jacob kinpantito ni tlakamej nechka ipan se ameli. Kinmokuitlauijtoyaj ininborregojuaj. Jacob kintlajtlanik: ‘¿Kanke inmochaj?’.

Inijuantij kinankilijkej: ‘Tiualauij altepetl Harán’.

Uan Jacob sampa kintlajtlanik: ‘¿Inkiixmatij Labán?’.

Uan kinankilijkej: ‘Kena, xikita ne uala iichpoka, Raquel, iuaya iborregojuaj’. ¿Tikita monechkauijtiuala Raquel?

Kema Jacob kiitak Raquel kinualikayaya itata iborregojuaj, yajki kiijkuinito nopa tetl katli kiixtsaktoya nopa ameli uan kej nopa kinamakaskiaj. Uajka Jacob kitsoponik Raquel uan kiiljuik ajkia eliyaya. Raquel tlauel yolpajki, yajki ichaj uan kiiljuito itata Labán tlen panotoya.

Labán tlauel yolpajki pampa Jacob mokauaskia ichaj. Uan kema Jacob kiiljuik kinekiyaya mosiuajtis iuaya Raquel, Labán yolpajki. Uan kiiljuik ma kitekipano chikome xiuitl tlaj kinekiyaya mosiuajtis iuaya Raquel. Jacob kej nopa kichijki pampa tlauel kiikneliyaya Raquel. Uan kema asik tonali mosenkauaskiaj, ¿tijmati tlake panok?

Labán amo kimaktilik Raquel kej mokajtoyaj, ya kimaktilik iichpoka Lea katli achtouiejketl. Yeka kema Jacob mokajki sampa kitekipanos seyok chikome xiuitl, Labán nojkia kimaktilik Raquel. Ne tonali toTeotsij kinkauayaya tlakamej ma kipiakaj miakej ininsiuajuaj. Uan nama kej kinextia Biblia moneki kipiasej san setsi ininsiua.