Se tlakatl tlauel tetik

¿TIJMATI ajkia nopa iyojtsi tlakatl katli san ya eliyaya tlauel tetik? Eliyaya se tetlajtolsenkajketl tlen motokaxtik Sansón. Uan Jehová kimakayaya tetikayotl. Kema Sansón ayamo tlakajtoya, Jehová kiiljuik inana: ‘Nechka tijtlakatiltis se okichpil. Ya kinmanauis israeleuanij ininmako filisteaeuanij’.

Ne Canaán itstoyaj filisteaeuanij katli amo kualmej. Kipiayayaj miakej inintlateuijkauaj uan kinchiuiliyayaj israeleuanij tlen amo kuali. Se tonali kema Sansón kinitato filisteaeuanij, ojtipa kisako se ueyi león katli nanalkatiualayaya. Uan Sansón kimiktik nopa león san ika ima. Nojkia kinmiktik tlauel miakej filisteaeuanij.

Teipa Sansón kiixtokak se siuatl tlen itoka Dalila. Uan sejse katli kinyakanayayaj filisteaeuanij mokajkej kimakaskiaj Dalila 1,100 platatomij, tlaj kiniljuiskia kenke Sansón eliyaya tlauel tetik. Dalila kinekiyaya nopa tomij. Ya amo nelia mouampojchijtoya ika Sansón, yon ika toTeotsij itekipanojkauaj. Yeka Dalila kisentlajtlanijtoya kenke eliyaya tlauel tetik.

Teipa Dalila uelki kichijki ma kiijto Sansón kenke eliyaya tlauel tetik. Uan Sansón kiijtok: ‘Amo kema nechtsonkaltektokej. Pampa kema nitlakatki, toTeko nechtlapejpenik ma nijtekipano kej se nazareo. Tlaj nechximasej, niyamanias’.

Kema Dalila kikajki ni, kichijki ma kochi ikuaxanko. Teipa kinotski se tlakatl uan kiiljuik ma kixima. Kema Sansón isak ayokmo kipiayaya tetikayotl. Uajka filisteaeuanij kiitskijkej. Kikixtilijkej iixteyoljuaj uan kichiualtijkej ma kintekipano.

Se tonali filisteaeuanij kiiljuichiuilijkej ininteotsij Dagón, uan kikixtijkej Sansón kampa tsaktoya pampa kinejkej kipinajtisej. Uajka Sansón itsonkal sampa ya moskaltijtoya. Sansón kiiljuik nopa okichpil katli kimatilantiauiyaya: ‘Xinechkaua nimomatlatskilis ipan tlaketsali katli kitlalantok ni kali’. Uajka Sansón kitlajtlanik Jehová ma kimaka tetikayotl uan kema momatlatskilik, chikauak kiijtok: ‘Ma nimiki ininuaya ni filisteaeuanij’. Itstoyaj 3,000 filisteaeuanij tlen iljuichiuayayaj. Uan kema Sansón kikuatopejki nopa ome tlaketsali, nopa ueyi kali uelonki uan kinmiktik nochi nopa amo kualmej maseualmej.