Jehová kimakak chikaualistli Sansón

Miakej israeleuanij sampa pejkej kinueyichiuaj teotsitsij. Yeka Jehová kikajki filisteaeuanij ma kintlaijiyouiltikaj. Sekij israeleuanij kena kiikneliyayaj Jehová. Se tlakatl katli motokaxtiyaya Manoa kiampa kichiuayaya. Manoa uan isiua amo kinpixtoyaj ininkoneuaj. Se tonali, Jehová kititlanki se iiluikaejka ma kiitati Manoa isiua uan ma kiiljui: “Tijpias se mopilkone. Yaya kinmanauis israeleuanij tlen ininmako filisteaeuanij, uan elis nazareo”. ¿Tijmati ajkia inijuantij eliyayaj nazareos? Eliyayaj katli mosentlalijtoyaj san kitekipanosej Jehová. Inijuantij amo motsonkaltekiyayaj.

Teipa, tlakatki Manoa ikone uan kitokaxtlalijkej, Sansón. Kema Sansón moskaltik, Jehová kimakak miak chikaualistli. ¡San ika ima ueliyaya kimiktis se león! Se tonali, iselti kinmiktik 30 filisteaeuanij. Yeka filisteaeuanij tlauel kikualankaitayayaj uan kinekiyayaj kimatisej kenijkatsa ueliskiaj kimiktisej. Se youali, Sansón mokajki ipan altepetl Gaza uan nopaya kochki. Uajka ikualankaitakauaj yajkej altepeteno uan nopaya kichixkej, pampa kinekiyayaj kimiktisej kema tlanesiskia. Tlajkoyoual, Sansón mejki uan yajki kampa kalakij ipan nopa altepetl, uan kikopejki nopa puertas. Teipa, kikechpanojtejki uan kiuikak tepeixko nechka altepetl Hebrón.

Teipa, nopa filisteaeuanij kikamauitoj Dalila, katli Sansón kiixtokayaya, uan kiiljuijkej: “Timitsmakasej tlauel miak platatomij tlaj titechiljuis kenke Sansón kipia miak chikaualistli. Tijnekij tikitskisej uan tijtsakuasej”. Dalila kinekiyaya nopa tomij, yeka kiniljuik kena kinpaleuiskia. Maske Sansón amo kinekiyaya kiiljuis Dalila kenke kipixtoya miak chikaualistli, ya nojua kisentlajtlanilijtoya. Tlauel kikuatotonik, yeka Sansón kiiljuik: “Amo kema nechtsonkaltektokej, pampa nieli nazareo. Tlaj nechximasej, ayokmo nijpias chikaualistli”. ¿Timoiljuia kuali tlen kichijki Sansón kema kiiljuik Dalila kenke kipixtoya miak chikaualistli?

Dalila nimantsi kiniljuito filisteaeuanij: “¡Ya nijmati kenke kipia miak chikaualistli!”. Dalila kichijki Sansón ma kochi ikuaxanko, uan kinotski se akajya uan kiiljuik ma kixima. Uajka Dalila kiijtok: “¡Sansón, nikaj itstokej filisteaeuanij!”. Kema Sansón isak, kimatki ayokmo kipixtoya chikaualistli. Uajka filisteaeuanij kiitskijkej, kiixteyolkixtijkej uan kitsajkej.

Se tonali, tlauel miakej filisteaeuanij mosentilijtoyaj kampa kiueyichiuayayaj ininteotsij Dagón. Kiijtouayayaj: “¡Toteotsij techpaleuijtok ma tikitskikaj Sansón! Xijualikakaj uan ma techtlauetskilti”. Kiketskej Sansón tlajtlajko kampa eltoya ome tlaketsali, uan pejkej kipinajtiaj. Sansón chikauak kiijtok: “Jehová, san nama sampa xinechmaka chikaualistli”. Itsonkal Sansón ya moskaltijtoya, yeka chikauak kikuatopejki nopa ome tlaketsali, uan nopa kali uetski ininpani. Nochi katli nopaya itstoyaj, mijkej, uan Sansón nojkia mijki.