Amo kema tiitstokej toselti

1, 2. 1) ¿Kenke tikijtouaj amo toselti tikixnamikij tlaouijkayotl? 2) ¿Tlake tikitasej ipan ni tlamachtili?

TLAJ tikixnamiktokej se ueyi tlaouijkayotl uelis timoiljuiaj tiitstokej toselti, kejuak tiitstoskiaj ipan se ueyi kuatitlamitl uan amo tijmatiskiaj kanke tiasej. Pero amo tiitstokej toselti pampa Jehová katli tlauel techiknelia kiita tlake techpano uan kiijtoua ya itstos touaya. Jehová kiniljuia sejse itekipanojkauaj katli amo kitlauelkauaj: “Na niinmoTeko [...]. Niinmechpaleuis (Is. 41:10).

² Ipan ni tlamachtili tikitasej naui tlamantli tlen ika Jehová techpaleuia: 1) techyakana, 2) techmaka tlen moneki, 3) techmokuitlauia uan 4) techyolchikaua. Jehová kiijtojtok maske tikixnamikisej miak tlaouijkayotl, ya amo kema techilkauas yon techtlauelkauas. Yeka, amo kema tiitstokej toselti.

JEHOVÁ TECHYAKANA

3, 4. ¿Kenijkatsa techyakana Jehová? (Salmo 48:14).

³ (Xijpoua Salmo 48:14). Jehová techyakana pampa kimati toselti amo uelis timoyakanasej. ¿Kenijkatsa kichiua? Kitekiuia Biblia (Sal. 119:105). Ika Biblia techpaleuia ma tijtlapejpenikaj tlen tijchiuasej uan ma tijnextikaj kuajkuali tlamantli tlen techpaleuia más ma tiyolpakikaj uan ma timotemachikaj tijpiasej nemilistli tlen amo kema tlamis.a Techmachtia kenijkatsa titetlapojpoljuisej, amo titekualankaitasej, amo titekajkayauasej uan tikiniknelisej sekinok ika nochi toyolo (Sal. 37:8; Heb. 13:18; 1 Ped. 1:22). Kema tijnextiaj ni kuajkuali tlamantli techpaleuia más ma tikiknelikaj tonamik, más kuali ma tikinyakanakaj tokoneuaj uan más kuali ma timouikakaj ininuaya touampoyouaj.

⁴ Ipan Biblia, Jehová kichijki ma moijkuilo tlen kinpanok maseualmej katli kiixnamijkej se keski tlaouijkayotl uan kiyolmatkej sanse tlamantli kej tojuantij (1 Cor. 10:13; Sant. 5:17). Kema tijpouaj uan tijchiuaj ipan tonemilis tlen tijyekouaj, techpaleuia ipan ni ome tlamantli: se, kichiua ma tikitakaj amo san tojuantij tikixnamiktokej se keski tlaouijkayotl ipan tonemilis, pampa sekinok nojkia kiampa kinpanok uan uelkej kiijiyouiaj pampa Jehová kinpaleuik (1 Ped. 5:9). Uan ome, techpaleuia ma tijmatikaj kenijkatsa tikixnamikisej kuesoli tlen tijpiasej teipa (Rom. 15:4).

5. ¿Ajkia inijuantij kintekiuia Jehová para techyakanas?

⁵ Jehová nojkia techyakana ika toikniuaj.b Katli techpaxalouaj chijchikuasej metstli ipan tlanechikoli, kiixtomaj tlamachtili tlen techpaleuia más kuali ma titlaneltokakaj uan amo ma timoxelokaj (Hech. 15:40–16:5). Ueuejtlakamej nojkia kichiuaj kampeka techpaleuisej kuali ma titlaneltokakaj (1 Ped. 5:2, 3). Tetajmej kinpaleuiaj ininkoneuaj ma kiiknelikaj Jehová, kuali ma kitlapejpenikaj tlen kichiuasej, ma momachtikaj Biblia ininselti, ma momatikaj yasej tlanechikoli uan ma tlajtolmoyauakaj (Prov. 22:6). Uan ika tlen kichiuaj tosiuaikniuaj katli kuali tlaneltokaj, kinnextiliaj katli nojua elij ichpokamej kenijkatsa moneki monejnemiltisej, kintlajtolmakaj uan kinyolchikauaj ika miak tlaiknelili (Tito 2:3-5).

6. ¿Tlake moneki tijchiuasej tlaj tijnekij ma techpaleui tlen ika Jehová techyakana?

⁶ Jehová techpaleuia pampa techmakatok se keski tlamantli tlen ika techyakana. ¿Tlake moneki tijchiuasej tlaj tijnekij ma techpaleui uan tlaj tijnekij tijnextisej tijtlaskamatiliaj? Proverbios 3:5, 6 kiijtoua: “Ximotemachi ipan TOTEKO ika nochi moyolo. Amo xijtokili san tlen motlalnamikilis mitsiljuia”. ¿Kenijkatsa techpaleuis tlaj tijchiuaj tlen kiijtoua ni texto? Jehová techyakanas “ipan se ojtli tlen xitlauak”. Ni nojkia kiijtosneki techpaleuis amo ma tijpiakaj miak kuesoli uan más ma tiyolpakikaj. ¡Tlauel tijtlaskamatiliaj Jehová pampa techiknelia uan techiljuia tlake moneki tijchiuasej sejse tlen tojuantij! (Sal. 32:8).

JEHOVÁ TECHMAKA TLEN MONEKI

7. Kej kiijtoua Filipenses 4:19, ¿kenijkatsa techpaleuia Jehová?

⁷ (Xijpoua Filipenses 4:19). Jehová techyakana uan nojkia techteochiua pampa tijchiuaj kampeka tijpiasej tlen moneki, kej tlen tijkuasej, tlen timokentisej uan tijpantisej kampa tiitstosej (Mat. 6:33; 2 Tes. 3:12). Maske nochi timotekipachouaj pampa tijnekij tijpiasej tlen moneki, Jehová techiljuia amo tlauel ma timotekipachokaj ika nopa tlamantli (Mateo 6:25). ¿Kenke? Pampa ya kiijtojtok nochipa itstos ininuaya itekipanojkauaj katli amo kitlauelkauaj (Mat. 6:8; Heb. 13:5). Uelis timotemachisej Jehová kichiuas tlen techtenkauilijtok uan techmakas tlen moneki.

8. ¿Kenijkatsa Jehová kipaleuik David?

⁸ Ma timoiljuikaj kenijkatsa Jehová kipaleuik David kema motlatijtinemiyaya pampa tlanauatijketl Saúl kinekiyaya kimiktis. Ipan nopa tonali tlauel ouij kej itstoyaj, pero Jehová kinmakak tlen kinpolouayaya David uan itlateuijkauaj. Kema David moiljuik kenijkatsa kinpaleuijtoya Jehová, kiijtok: “Na nojkia nitelpokatixtoya uan ama ya niueuentsi, pero axkema nikitak TOTEKO kitlauelkaua se tlakatl tlen itstok xitlauak iixpa. Niyon ikoneuaj se kuali tlakatl axnikinitstok intla motlaejeuiaj para ika panosej” (Sal. 37:25). Uelis ta nojkia tikitstok kenijkatsa Jehová mitsmakatok nochi tlen mitspoloua uan nojkia tlen kinpoloua toikniuaj.

9. ¿Kenijkatsa Jehová kinpaleuia itekipanojkauaj kema kintlasojsoljuilia se tlenijki? (Nojkia xikita tlaixkopinkayomej).

⁹ Kema tetlasojsoljuilia se tlenijki, Jehová kinmaka itekipanojkauaj tlen moneki. Ipan achtoui siglo, Cristo itokilijkauaj katli itstoyaj ipan sekinok altepemej kintitlanilijkej toikniuaj tlen Jerusalén tlakualistli uan sekinok tlamantli pampa onkayaya se ueyi mayantli (Hech. 11:27-30; Rom. 15:25, 26). Ipan ni tonali, Jehová nojkia kinmokuitlauia itekipanojkauaj pampa kema tetlasojsoljuilia se tlenijki, ya kinyololinia itokilijkauaj ma temakakaj tlakualistli, atl, yoyomitl uan pajtli tlen kitekiuisej toikniuaj katli itstokej kampa panotok nopa tlamantli. Nojkia kinkualchijchiuiliaj ininchaj toikniuaj uan kali kampa timosentiliaj tlen sosolijtok. Uan nima kiitaj kenijkatsa kinyolchikauasej ika Biblia katli kipolojkej ininchaj o mijki se akajya katli kiikneliyayaj.c

10, 11. ¿Tlake mitsmachtia tlen kipanok Boris?

¹⁰ Jehová kipaktia temakas tlen kipia uan nojkia kiampa kichiua ika maseualmej katli amo kitekipanouaj. Tojuantij nojkia tijchiuaj kampeka tikinpaleuisej katli amo kitekipanouaj Jehová (Gál. 6:10). Kiampa sekinok kuali kiitaj Jehová itlanechikol. Ma tikitakaj tlen kipanok Boris, katli kiyakana se escuela ipan altepetl Ucrania. Maske ya amo kitekipanoua Jehová, nochipa kuali kinnojnotsayaya uan kintlepanitayaya konemej katli elij Jehová itlajtoltemakauaj. Kema pejki mochiua tlauilankayotl ipa nopa altepetl, yajki ipan seyok altepetl kampa ueliskia momanauis, uan toikniuaj nima kipaleuijkej. Kema panok tonali, nojkia yajki kema moilnamijki Cristo imikilis. Uan kema moiljuik kenijkatsa toikniuaj kipaleuijkej, Boris kiijtok: “Jehová itlajtoltemakauaj nochipa nechpaleuijkej uan nechmokuitlauijkej, tlauel nikintlaskamatilia”.

¹¹ Nochi uelis tijnextisej titetlasojtlaj sanse kej Jehová kema tikinpaleuiaj nochi katli kinpoloua se tlamantli maske sekij amo kitekipanouaj (Luc. 6:31, 36). Timotemachiaj tlaj tijnextiaj tikinikneliaj sekinok uelis kinyololinis ma kiixmatikaj Jehová uan ma kitekipanokaj touaya (1 Ped. 2:12). Pero tlaj kitekipanouaj o amo, tojuantij tlauel tiyolpakij pampa titemakaj tlen tijpiaj (Hech. 20:35).

JEHOVÁ TECHMOKUITLAUIA

12. ¿Tlake kintenkauilijtok Jehová itekipanojkauaj? (Salmo 91:1, 2, 14).

¹² (Xijpoua Salmo 91:1, 2, 14). Jehová kiijtojtok kinpaleuis itekipanojkauaj kuali ma tlaneltokakaj. Ya amo kema kikauas Satanás ma kichiua ayokmo ma titlaueyichiuakaj (Juan 17:15). Uan kema peuas nopa ueyi tlaijiyouilistli, timotemachiaj Jehová kichiuas tlen kitenkajtok uan kinpaleuis itekipanojkauaj nojua kuali ma tlaneltokakaj uan ma kipiakaj tlen moneki (Apoc. 7:9, 14).

13. ¿Kenijkatsa Jehová kinmokuitlauia sejse itekipanojkauaj?

¹³ ¿Uan kenijkatsa Jehová techmokuitlauia sejse tlen tojuantij? Techmakatok Biblia para techpaleuis ma tikitakaj tlake tlamantli kuali uan tlake amo (Heb. 5:14). Kema tijchiuaj tlen Biblia techtlajtolmaka, techmanauia kejuak eliskia totepostsajka pampa techpaleuia kuali ma titlaneltokakaj uan kuali ma tiitstokaj (Sal. 91:4). Jehová nojkia techmokuitlauia ika toikniuaj tlen tlanechikoli (Is. 32:1, 2). Kema timouampojchiuaj ininuaya toikniuaj katli kiikneliaj Jehová uan kineltokaj, techyolchikaua uan techpaleuia amo ma tijchiuakaj tlen amo kuali (Prov. 13:20).

14. 1) ¿Kenke Jehová amo nochipa techkixtilia tokuesoljuaj? 2) ¿Tlake techtenkauilia Jehová ipan Salmo 9:10? (Nojkia xikita nota).

¹⁴ Kemantika Jehová kinmanauiyaya itekipanojkauaj uan kiampa amo kinpanoyaya tlen amo kuali, pero amo nochipa kiampa kichiuayaya. Biblia kiijtoua uelis kipanos tlen amo kuali “aki ueli tlakatl kema axkichia” (Ecl. 9:11). Uejkajkia uan ipan ni tonali, Jehová kikajtok ma kintlatsakuiltikaj itekipanojkauaj o ma mikikaj. ¿Kenke kikajtok? Pampa kiampa kinextia Satanás san istlakati (Job 2:4-6; Mat. 23:34). Maske Jehová amo nochipa techkixtilis tokuesoljuaj, uelis timotemachisej amo kema techtlauelkauas (Sal. 9:10).d

JEHOVÁ TECHYOLCHIKAUA

15. ¿Kenijkatsa Jehová techyolchikaua ika tlamaijtoli, ika Biblia uan ika toikniuaj? (2 Corintios 1:3, 4).

¹⁵ (Xijpoua 2 Corintios 1:3, 4). Kemantika nochi timokuesouaj, amo kuali tijyolmatij uan tlauel timotetsopaj. Uelis ipan ni tonali tikixnamiktokej se tlamantli tlen kichiua ma tijyolmatikaj tiitstokej toselti. Kemantika uelis timoiljuisej amo aka kikuamachilia tlen tijyolmatij. Pero, ¿itstok se akajya katli kena techkuamachilia? Kena, toTata Jehová. Uan amo san ya nopa kichiua, nojkia “techyoltlalia ipan nochi tlaouijkayotl tlen tikixnamikij”. ¿Kenijkatsa kichiua? Kema timomaijtouaj, kema tijpouaj Biblia uan nojkia ika toikniuaj. Kema tikiljuiaj Jehová nochi tlen techtekipachoua, ya technankilia uan techmaka nopa tlaseuilistli “tlen yon se maseuali amo kema kikuamachilis” (Filip. 4:6, 7). Kema tijpouaj Biblia, tikitaj kenijkatsa Jehová tlauel techiknelia, techpaleuia ma tijmatikaj tlake tijchiuasej uan techyolchikaua pampa timotemachiaj ipan tlen kitenkajtok kichiuas. Uan kema tiauij ipan tlanechikoli, toikniuaj kinextiaj tlauel techikneliaj uan techyolchikauaj ika tlen Biblia kiijtoua.

16. ¿Tlake mitsmachtia tlen kinpanok Nathan uan Priscilla?

¹⁶ Jehová uelis techyoltlalis uan techyolchikauas ika Biblia, ya nopa kinextia tlen kinpanok Nathan uan Priscilla, katli itstokej ipan Estados Unidos. Se keski xiuijtlaya, yajkej ipan seyok altepetl pampa kinekiyayaj tlapaleuisej ipan tlajtolmoyaualistli. Nathan kiijtoua: “Timoiljuiyayaj kuali kisaskia nochi tlen tijchiuaskiaj”. Pero kema asitoj ipan nopa altepetl, pejkej mokokouaj uan ayokmo kipixkej tomij. Teipa, tlakuepilijkej ipan ininaltepe, pero nopaya nojkia amo kipixtoyaj tomij. Ya kiijtoua: “Nijnekiyaya nijmatis kenke Jehová amo techteochijtoya kej tojuantij timoiljuiyayaj. Uan pejki nimoiljuia tlaj nijchijtoya se tlamantli tlen amo kinamiki”. Pero kej panotiajki tonali, kiitakej Jehová amo kema kintlauelkajtoya. Nathan kiijtoua: “Kema tikixnamikiyayaj nopa tlaouijkayotl, tlauel techyolchikauayaya pampa kema tijpouayayaj Biblia, tijyolmatiyayaj kejuak technojnotsayaya uan techtlajtolmakayaya se touampox. Timosentlalijkej ipan tlen Jehová kichiuayaya para techpaleuis uan amo ipan nopa kuesoli. Uan nopa techpaleuijtok ma tijmatikaj kenijkatsa tikixnamikisej sekinok tlaouijkayotl tlen tijpiasej”.

17. ¿Kenijkatsa kiyolchikajkej tosiuaikni Helga? (Nojkia xikita tlaixkopinkayomej).

¹⁷ Kej tikitstokej, toikniuaj nojkia tlauel techyolchikauaj. Ma tikitakaj tlen kipanok Helga, katli itstok ipan altepetl Hungría. Ipan miak xiuitl, kipixki miak kuesoli uan nopa kichijki tlauel ma motetsopa uan ma moiljui amo tleno ipati. Pero kema kiilnamiki tlen kipanok, kiita Jehová tlauel kiyolchikajki ika toikniuaj tlen tlanechikoli. Ya kiijtoua: “Jehová nochipa nechpaleuik kema nijmatiyaya ayokmo nikijiyouiyaya tlen nechpanoyaya, pampa monekiyaya nitekitis, nijmokuitlauis nokone katli mokokoua uan nijpiayaya sekinok kuesoli. Ipan ni 30 xiuitl tlen panotok, nikitstok kenijkatsa Jehová nechyolchikajtok uan amo kema nechtlauelkajtok. Miakpa nechnextilijtok tlauel nechiknelia uan nechyolchikajtok ika toikniuaj. Nojkia, toikniuaj miakpa nechtitlanilijtokej mensajes, tarjetas uan nechyolchikajtokej kema más monekiyaya”.

18. ¿Kenijkatsa uelis tikinyolchikauasej sekinok?

¹⁸ Eli se ueyi tlateochiualistli pampa tojuantij nojkia uelis tikinyolchikauasej sekinok sanse kej Jehová kichiua. ¿Kenijkatsa uelis tijchiuasej? Tlaj kuali tikintlakakilisej, tikinyolchikauasej ika tlen tikiniljuisej uan tikinpaleuisej ika tlen moneki (Prov. 3:27). Uan amo san tikinpaleuiaj toikniuaj, nojkia tikinpaleuiaj sekinok maseualmej katli ayamo kitekipanouaj Jehová. Tlaj kiixnamiktokej se kokolistli o mijki se katli tlauel kiikneliaj, tikinpaxalouaj, kuali tikintlakakiliaj uan tikinyolchikauaj ika Biblia. Kema tijchiuaj kej Jehová “katli nochipa teyoltlalia”, amo san tikinpaleuiaj toikniuaj ma kiixnamikikaj tlen kinpano, nojkia uelis tikinpaleuisej sekinok maseualmej, kiampa kinekisej kiixmatisej Jehová (Mat. 5:16).

JEHOVÁ NOCHIPA ITSTOS TOUAYA

19. ¿Kenijkatsa techpaleuia Jehová, uan kenijkatsa uelis tijchiuasej kej ya?

¹⁹ Jehová tlauel kitekipachoua tlen techpano uan amo kema techtlauelkaua kema tikixnamikij tlaouijkayotl. Tlauel techiknelia uan techmokuitlauia sanse kej se tetaj kimokuitlauia ipilkone. Techyakana, techmaka tlen moneki, techmokuitlauia uan techyolchikaua. Uan tojuantij uelis tijchiuasej kej ya tlaj tikinpaleuiaj uan tikinyolchikauaj katli nojkia kiixnamiktokej se kuesoli. Maske ipan ni tonali tijpiasej miak tlaouijkayotl, tlauel techyolchikaua pampa uelis timotemachisej Jehová nochipa itstos touaya, pampa ya kiijtojtok: “Amo ximajmauikaj pampa na niitstok inmouaya” (Is. 41:10).