TLAMACHTILI 32
UIKATL 38 Jehová mitsmokuitlauis
¿Kenijkatsa techpaleuia Jehová ma tikijiyouikaj tlen techpano?
“Dios katli kipia ueyi iyolo, […] kichiuas xielikaj intemachmej, ya kichiuas xielikaj intetikej uan inmechtlalis kampa amo aka inmecholinis” (1 PED. 5:10).
TLEN MOIXTOMAS
¿Tlake tlamantli techmakatok Jehová uan kiampa uelis tikijiyouisej tlen techpano uan kenijkatsa uelis kuali tijtekiuisej?
1. ¿Kenke moneki tikijiyouisej tlen techpano, uan tlake uelis techpaleuis? (1 Pedro 5:10).
TIITSTOKEJ ipan tonali tlen tlauel ouij uan nochi tikixnamikij tlaouijkayotl. Sekij kipiaj se kokolistli tlen amo kipia pajtli, miktok se akajya katli tlauel kiikneliaj uan sekij kintetsopaj ininchampoyouaj o tekichiuanij (Mat. 10:18, 36, 37). Nochi moneki tikijiyouisej tlen techpano, uan timotemachiaj Jehová kinpaleuis nochi itekipanojkauaj, uan nojkia ta (xijpoua 1 Pedro 5:10).
2. ¿Tlake techpaleuia ma tikijiyouikaj tlen techpano?
2 Tijnextiaj tikijiyouiaj tlen techpano kema nojua tijtekipanouaj Jehová ika pakilistli maske tikixnamikij tlaouijkayotl, techtlatsakuiltiaj o techyoltilana tlen amo kuali. Amo tikijiyouiaj tlen techpano san ika tochikaualis, tikijiyouiaj pampa Jehová techmaka “nopa tetikayotl tlen amo aka ueli kipia” (2 Cor. 4:7). Ipan ni tlamachtili tikitasej naui tlamantli tlen Jehová techmakatok para ma tikijiyouikaj uan kenijkatsa uelis kuali tijtekiuisej.
TLAMAIJTOLI
3. ¿Kenke tikijtouaj eli se ueyi milagro timokamanaljuisej iuaya Jehová?
3 Jehová techmakatok se tlamantli tlen techpaleuia ma tikijiyouikaj tlen techpano. Maske titlajtlakolejkej, ya kichijtok ma tiuelikaj timokamanaljuisej iuaya (Heb. 4:16). Ma timoiljuikaj ipan ni tlamantli: uelis timokamanaljuisej iuaya Jehová ipan tlen ueli hora, tikiljuisej tlen ueli tlamantli, ipan tlen ueli tlajtoli uan kampa ueli, maske uejka tiitstokej o techtsaktokej (Jon. 2:1, 2; Hech. 16:25, 26). Ya techkuamachilia maske kemantika tlauel timokuesouaj uan yeka amo ueli tikiljuiaj nochi tlen tijnekiskiaj (Rom. 8:26, 27). ¡Eli se ueyi milagro pampa ueli timokamanaljuiaj iuaya Jehová!
4. ¿Kenke amo kenijki tlaj tikiljuiaj Jehová ma techpaleui tikijiyouisej tlen techpano?
4 Ipan Biblia Jehová techiljuia kema tijtlajtlaniaj “tlen ueli tlamantli tlen ya kipaktia, ya techtlakakilia” (1 Juan 5:14). Uajka, ¿uelis tikiljuisej ma techpaleui tikijiyouisej tlen techpano? Kena, pampa nopa eli se tlamantli tlen ya kipaktia. ¿Kenke kiampa tikijtouaj? Pampa Biblia kiijtoua kema tikijiyouiaj tlen techpano, Jehová ueli kinankilia Satanás (Prov. 27:11). Nojkia, ya kineki “kinnextilis iueyichikaualis inijuantij tlen motemachiaj ipan ya ika nochi ininyolo” (2 Crón. 16:9). Yeka, uelis timotemachisej Jehová kineki uan ueli techpaleuis ma tikijiyouikaj tlen techpano (Is. 30:18; 41:10; Luc. 11:13).
5. ¿Kenijkatsa tlamaijtoli techpaleuia ma tijpiakaj tlaseuilistli? (Isaías 26:3).
5 Biblia techiljuia ma tikiljuikaj Dios nochi tlen techtekipachoua, kiampa “nopa tlaseuilistli tlen Dios temaka, tlen yon se maseuali amo kema kikuamachilis” kiyaualtsakuas toyolo uan totlalnamikilis (Filip. 4:7). ¡Tlauel tijtlaskamatiliaj! Katli amo kitekipanouaj Jehová nojkia kiixnamikij kuesoli uan kitekiuiaj miak tlamantli pampa kinekij kipiasej tlaseuilistli ipan inintlalnamikilis. Se keski tlamantli tlen kichiuaj uelis tlauel kintlanauis uan demonios nojkia uelis kinchiuilisej tlen amo kuali (nojkia xikita Mateo 12:43-45). Pero kema timomaijtouaj, Jehová techmaka miak tlaseuilistli uan amo kej nopa tlamantli tlen maseualmej kitekiuiaj para kuali kiyolmatisej. Tojuantij timotemachiaj ipan Jehová uan ya kimokuitlauia totlalnamikilis uan toyolo pampa mojmostla techmaka tlaseuilistli (xijpoua Isaías 26:3). ¿Kenijkatsa kichiua? Ya techpaleuia ma tikilnamikikaj textos kampa kinextia tlauel techiknelia uan kineki techpaleuis (Sal. 62:1, 2).
6. ¿Tlake uelis tijchiuasej uan kiampa más techpaleuis kema timomaijtouaj? (Nojkia xikita tlaixkopinkayotl).
6 Tlen uelis tijchiuas. Kema tikixnamikisej se tlaouijkayotl, ma tikiljuikaj Jehová nochi tlen tijyolmatij, ma tijtlajtlanikaj tlaseuilistli uan nojkia tlalnamikilistli para tijmatisej tlake tijchiuasej (Sal. 55:22; Prov. 2:10, 11). Kema tikiljuisej ma techpaleui tikijiyouisej nopa tlaouijkayotl, nojkia ma tijtlaskamatilikaj (Filip. 4:6). Kema tikixnamiktosej nopa kuesoli, nochipa ma tikitakaj kenijkatsa techpaleuia uan nojkia ma tijtlaskamatilikaj. Amo ma tijkauakaj kuesoli ma kichiua ayokmo ma tikitakaj kenijkatsa techteochiua Jehová (Sal. 16:5, 6).
Kema timomaijtouaj, tikamanaltij iuaya Jehová; kema tijpouaj Biblia, Jehová kamanalti touaya. (Xikita párrafo 6).b
BIBLIA
7. ¿Kenijkatsa kema timomachtiaj Biblia techpaleuia ma tikijiyouikaj tlen techpano?
7 Jehová techmakatok Biblia para techpaleuis ma tikijiyouikaj tlen techpano. Nopaya onka textos tlen kinextia ya nochipa techpaleuia. Ma tikitakaj se neskayotl. Mateo 6:8 kiijtoua: “InmoTata ya kimati tlake inmechpoloua maske ayamo inkitlajtlaniaj”. Ni tlajtoli kiijtok Jesús uan ya kuali kiixmati iTata, amo kej tojuantij. Yeka, kema titlaijiyouiaj, timotemachiaj Jehová kimati tlake techpoloua uan techpaleuis. Biblia kiijtoua miak tlamantli tlen techpaleuia ma tikijiyouikaj tlen techpano (Sal. 94:19).
8. 1) Xikijto se texto tlen uelis techpaleuis ma tikijiyouikaj tlen techpano. 2) ¿Tlake techpaleuis ma tikilnamikikaj tlen Biblia kiijtoua kema moneki?
8 Biblia nojkia kipia tlamachtili tlen techpaleuia tikijiyouisej tlen techpanos. Nopa textos techmachtia miak tlamantli tlen techpaleuia kuali ma tijtlapejpenikaj tlen tijchiuasej (Prov. 2:6, 7). Ma timoiljuikaj ipan ni tlamantli: Biblia kiijtoua amo tlauel ma timotekipachokaj ika tlen panos teipa, san ma timosentlalikaj ipan nopa kuesoli tlen techpanos sejse tonali (Mat. 6:34). Tlaj timomajtokej tijpouasej Biblia uan timoyoliljuisej, amo ouij tijmatisej tikilnamikisej textos tlen techpaleuis ipan nopa kuesoli tlen tikixnamikij.
9. ¿Kenijkatsa techpaleuia kema timoyoliljuiaj ipan nopa tlapoualistli tlen uala ipan Biblia?
9 Biblia nojkia kiijtoua se keskij maseualmej katli eliyayaj kej tojuantij, motemachijkej ipan Jehová uan ya kinpaleuik (Heb. 11:32-34; Sant. 5:17). Kema timoyoliljuiaj ipan ni tlapoualistli, techpaleuia ma timotemachikaj Jehová eli “totlamanauijka uan tochikaualis. Nimantsi techpaleuia kema onka tlaouijkayotl” (Sal. 46:1). Tlaj tikitaj kenijkatsa kuali tlaneltokayayaj Dios itekipanojkauaj katli uejkajkia itstoyaj uan kenijkatsa kiijiyouijkej tlen kinpanok, techpaleuis ma tijnekikaj tijchiuasej kej inijuantij (Sant. 5:10, 11).
10. ¿Kenijkatsa uelis kuali tijtekiuisej Biblia?
10 Tlen uelis tijchiuas. Ma tijpouakaj Biblia mojmostla uan ma tikijkuilojtiakaj nopa textos tlen tikitaj techpaleuis. Miakej toikniuaj kipouaj nopa pilamochtsi Mojmostla timomachtiaj toTeotsij iTlajtol pampa kinpaleuia ma moyoliljuikaj ipan tlamantli tlen kinyolchikaua nopa tonali. Ya nopa kiitak tosiuaikni Marie.a Inana uan itata kipixkej cáncer uan ya monejki kinmokuitlauis ipan nopa metstli kema nechka mikiskiaj. Marie kiijtoua tlake kipaleuik ma kiijiyoui tlen kipanoyaya: “Nimomajtoya mojmostla nijpouas texto tlen tijpouaj ika ijnalok uan nimoyoliljuis. Nopa nechpaleuiyaya ma nimosentlali ipan Jehová uan amo san ma nimoiljuijto ipan nopa tlaouijkayotl tlen nikixnamikiyaya” (Sal. 61:2).
TOIKNIUAJ
11. ¿Kenke techyolchikaua tijmatisej toikniuaj kiijiyouiaj tlen kinpano?
11 Jehová techmakatok toikniuaj para techpaleuis ma tikijiyouikaj tlen techpano. Tlauel techyolchikaua tijmatisej “ipan nochi Tlaltipaktli toikniuaj nojkia kiixnamikij sanse tlaijiyouilistli” (1 Ped. 5:9). ¿Kenke? Pampa kema tikitaj inijuantij nojkia kiixnamikij kuesoli sanse kej tojuantij, techpaleuia ma tikitakaj nojkia uelis tikijiyouisej tlen ueli tlaouijkayotl (Hech. 14:22).
12. ¿Kenijkatsa uelis timosentikapaleuisej? (2 Corintios 1:3, 4).
12 Toikniuaj nojkia uelis techpaleuisej ika se keski tlamantli, uan apóstol Pablo ya nopa kiitak. Kema kitsaktoyaj ichaj, miakej toikniuaj kipaleuijkej uan ipan nopa cartas tlen kiijkuilok kintokaxtik uan kintlaskamatilik pampa tlauel kiyolchikajkej (Filip. 2:25, 29, 30; Col. 4:10, 11). Ipan ni tonali, toikniuaj nojkia itstokej touaya para techpaleuisej ma tikijiyouikaj tlen techpano uan tojuantij nojkia uelis kiampa tijchiuasej por inijuantij kema monekis (xijpoua 2 Corintios 1:3, 4).
13. ¿Tlake kipaleuik tosiuaikni Maya ma kiijiyoui tlen kipanok?
13 Ma tikitakaj tlen kipanok tosiuaikni Maya katli eua Rusia. Ipan 2020, se keskij policías kalajkej ichaj uan tlatejtemotoj. Teipa, kiuikakej kampa tekichiuanij pampa tlajtolmoyauayaya. ¿Kenijkatsa kipaleuijkej toikniuaj? Maya kiijtoua: “Se tonali, kema nijmatiyaya ayokmo nikijiyouiyaya, toikniuaj nechnojnotskej, nechtlajkuiljuilijkej uan nechiljuijkej tlauel nechikneliyayaj”. Nojkia kiijtoua: “Nijmatiyaya kampa ueli nikinpia tlauel miakej toikniuaj katli tlauel teikneliaj, pero desde xiuitl 2020, xitlauak nikitak nelnelia kiampa elij”.
14. ¿Kenijkatsa uelis techpaleuisej toikniuaj? (Nojkia xikita tlaixkopinkayotl).
14 Tlen uelis tijchiuas. Kema tikixnamikij tlaouijkayotl, ma tiitstokaj ininnechka toikniuaj. Ma tikilnamikikaj nochipa uelis tikiniljuisej ueuejtlakamej ma techpaleuikaj ika nopa tlaouijkayotl tlen eli “keja se ueyi ajakatl o keja atl tlen uetsi nelchikauak” (Is. 32:2). Nojkia ma tikilnamikikaj toikniuaj nojkia kiixnamikij tlaouijkayotl. Tlaj tijpaleuiaj se toikni kema moneki, techpaleuis ma timoiljuikaj kej kinamiki, ma tiyolpakikaj uan ma tikijiyouikaj tlen tikixnamikij (Hech. 20:35).
Ma tiitstokaj ininuaya toikniuaj. (Xikita párrafo 14).c
TLEN TIJCHIAJ TIJSELISEJ
15. ¿Kenijkatsa kipaleuik Jesús tlen kichiayaya kiselis, uan kenijkatsa techpaleuia tojuantij? (Hebreos 12:2).
15 Jehová techpaleuia ma tikijiyouikaj tlen techpano ika tlen techtenkauilijtok techmakas (Rom. 15:13). Ma tikilnamikikaj Jesús kiijiyouik tlen tlauel amo kuali ipan Tlaltipaktli pampa motemachiyaya ipan tlen kiseliskia teipa (xijpoua Hebreos 12:2). Ya kimatiyaya tlaj amo kitlauelkauaskia Jehová, tlapaleuiskia ma mouejkapantlali iTata itoka. Nojkia tlauel kinekiyaya sampa itstos iuaya iTata ipan iluikak uan ma asi nopa tonali kema tlanauatiskia ininuaya iikniuaj. Tojuantij nojkia timotemachiaj tiitstosej nochipa ipan yankuik Tlaltipaktli, uan nopa techpaleuia ma tikijiyouikaj tlen ueli tlaouijkayotl tlen tikixnamikij ipan ni tonali.
16. ¿Kenijkatsa tlen tijchiaj tijselisej kipaleuik se tosiuaikni, uan tlake mitsmachtia tlen kiijtok?
16 Ma tikitakaj kenijkatsa tlen tijchiaj tijselisej kipaleuik se tosiuaikni tlen Rusia katli itoka Alla. Kema kiitskijkej iueue uan kitsajkej pampa nechka kitlajtolsenkauaskiaj, ya kiijtok: “Kema nimomaijtouayaya uan nimoyoliljuiyaya ipan tlen Jehová techtenkauilijtok, nechpaleuik amo tlauel ma nimokueso. Nijmati asis se tonali kema tlamis nochi tlen techtlaijiyouiltia. Jehová tlatlanis uan tojuantij nojkia”.
17. ¿Kenijkatsa tijnextiaj tijpatiitaj tlen tijchiaj tijselisej? (Nojkia xikita tlaixkopinkayotl).
17 Tlen uelis tijchiuas. Ma tijkixtikaj tonali para timoyoliljuisej ipan tlen Jehová techtenkauilijtok. Ma timoyoliljuikaj ipan nochi nopa tlateochiualistli tlen tijselisej ipan yankuik Tlaltipaktli. Tlaj kiampa tijchiuasej, nochi tlaouijkayotl tlen nama tikixnamikij, tikitasej “amo uejkaua uan amo tlauel ouij” (2 Cor. 4:17). Nojkia, ma tijchiuakaj kampeka tikiniljuisej sekinok maseualmej tlen tijneltokaj. ¿Timoiljuijtokej kenijkatsa tlauel ouij itstokej pampa Satanás tlanauatia ipan Tlaltipaktli uan amo kimatij tlen Dios kichiuas teipa? Maske san ika se keski tlajtoli tlen tikiniljuisej uelis kinekisej kimatisej tlen Dios kitenkajtok kichiuas.
Ma tijkixtikaj tonali para timoyoliljuisej ipan tlen Dios kitenkajtok kichiuas teipa. (Xikita párrafo 17).d
18. ¿Kenke uelis timotemachisej ipan tlen Jehová kitenkajtok?
18 Kema Job ya kiijiyouijtoya miak tlamantli, kiiljuik Jehová: “Na nijmati para ta nochi tiueli tijchiua. Axaka uelis mitstsakuilis para axtijchiuas niyon se tlamantli tlen tijsenkajtok para tijchiuas” (Job 42:2). Job kiitak amo tleno uelis kitsakuilis Jehová para kichiuas tlen kitenkajtok. Tlauel techpaleuia tikijiyouisej tlen techpano kema tijkuamachiliaj ni tlamantli. Ma timoiljuikaj ipan se siuatl katli tlauel mokokoua uan mokuesoua pampa maske yajtok kinita miakej tepajtianij, amo aka ueltok kipaleuia. Pero teipa kipantia se kuali tepajtijketl katli kipantilia tlake kokolistli kipia uan kiixtomilia kenijkatsa kipajtis. Maske nopa siuatl nojua mokokoua, kuali kiyolmati uan nama kiita más amo ouij kiijiyouis ikokolis pampa kimati kena mochikauas. Tojuantij nojkia techpaleuia ma tikijiyouikaj tlen techpano pampa timotemachiaj Jehová nechka kiyankuilis ni Tlaltipaktli.
19. ¿Tlake techpaleuis ma tikijiyouikaj tlen techpano?
19 Ipan ni tlamachtili tikitakej Jehová techmakatok se keski tlamantli tlen techpaleuia ma tikijiyouikaj tlen techpano. Kej tlamaijtoli, Biblia, toikniuaj uan tlen tijchiaj tijselisej. Tlaj kuali tijtekiuiaj ni naui tlamantli tlen Jehová techmakatok, techpaleuis ma tikijiyouikaj tlen ueli kuesoli tlen tikixnamikij hasta kema tlamis nochi tlen Satanás kichiua ipan Tlaltipaktli uan nochi tlaouijkayotl (Filip. 4:13).
UIKATL 33 Xikiljui Jehová tlen mitskuesoua
a Mopatlatok se keski tokajyotl.
b TLEN NESI IPAN TLAIXKOPINKAYOMEJ: Se toikni katli ya ueyi miak xiuitl kiijiyouijtok tlen kipano uan amo kitlauelkaua Jehová.
c TLEN NESI IPAN TLAIXKOPINKAYOTL: Se toikni katli ya ueyi miak xiuitl kiijiyouijtok tlen kipano uan amo kitlauelkaua Jehová.
d TLEN NESI IPAN TLAIXKOPINKAYOTL: Se toikni katli ya ueyi miak xiuitl kiijiyouijtok tlen kipano uan amo kitlauelkaua Jehová.